1, 2. a) ¿Nda̱chun ni̱ka̱ʼa̱n ta̱ apóstol Pablo ña̱ ndáyáʼviníka kuʼvi̱-iniyó kuniyó inkana? b) ¿Ndáa pregunta ndakuiinyó?

 TÁ XA̱A̱ ndi̱ʼi̱ ni̱ka̱ʼa̱n ta̱ apóstol Pablo xa̱ʼa̱ ña̱ kándíxayó Ndióxi̱, ña̱ ndátuyó ndakiʼinyó chí nu̱únínu xíʼin ña̱ kúʼvi̱-iniyó xíniyó inkana, ni̱ka̱ʼa̱nra ña̱yóʼo: “Soo ña̱ ndáyáʼvika nu̱ú ndiʼi ña̱yóʼo kúú ña̱ kuʼvi̱-iniyó kuniyó inkana” (1 Cor. 13:13). ¿Nda̱chun ni̱ka̱ʼa̱nra ña̱yóʼo? Saáchi tá ná kooyó nu̱ú ñuyǐví xa̱á va̱ása kundi̱ʼi̱ka-iniyó ta ndakanixi̱níyó á sáxi̱nu Ndióxi̱ ña̱ ni̱ka̱ʼa̱nra xíʼinyó, chi xa̱a̱ kotovayó ña̱ ndixa ni̱xi̱nu ndiʼi ña̱ ni̱ka̱ʼa̱nra xíʼinyó. Soo ndiʼi tiempova kuʼvi̱-iniyó kuniyó Jehová xíʼin na̱ yiví.

² Xa̱ʼa̱ ña̱ ndiʼi tiempo náʼa̱yó ña̱ kúʼvi̱-iniyó xínitáʼanyó, ná ka̱ʼa̱nyó xa̱ʼa̱ u̱ni̱ pregunta. Ña̱ nu̱ú, ¿nda̱chun xíniñúʼu kuʼvi̱-iniyó kunitáʼanyó? Ña̱ u̱vi̱, ¿ndáa ki̱ʼva na̱ʼa̱yó ña̱ kúʼvi̱-iniyó xínitáʼanyó? Ta ña̱ u̱ni̱, ¿ndáaña keʼéyó tasaá kǒo sandákooyó ña̱ kuʼvi̱-iniyó kunitáʼanyó?

3. ¿Nda̱chun xíniñúʼu kuʼvi̱-iniyó kuni táʼanyó?

³ ¿Nda̱chun ndáyáʼviní ña̱ kuʼvi̱-iniyó kunitáʼanyó? Saáchi tá kéʼéyó ña̱yóʼo saá náʼa̱yó ña̱ ndixa ndásakáʼnuyó Ndióxi̱. Ta̱ Jesús ni̱ka̱ʼa̱nra xíʼin na̱ apóstolra: “Tasaá kúú ña̱ kunda̱a̱-ini ndiʼina ña̱ kúúndó discípuloi̱: tá kúʼvi̱-inindó  xínitáʼanndó” (Juan 13:35). Ta saátu, tá kúʼvi̱-iniyó xíniyó inkana va̱ʼaní kítáʼanyó xíʼinna. Ña̱kán ta̱ Pablo ni̱ka̱ʼa̱nra, ña̱ ndiʼi “na̱ kúʼvi̱-ini xínitáʼan va̱ʼaní kítáʼanna” (Col. 3:14). Soo, ¿nda̱chun xíniñúʼu kuʼvi̱-iniyó kuniyó inkana? Ta̱ apóstol Juan ni̱ka̱ʼa̱nra xa̱ʼa̱ ña̱yóʼo tá ka̱chira: “Na̱ kúʼvi̱-ini xíni Ndióxi̱ saátu ná kuʼvi̱-inina kunina ñanina” (1 Juan 4:21). Ña̱kán, tá náʼa̱yó ña̱ kúʼvi̱-iniyó xíniyó na̱ hermanoyó, saátu náʼa̱yó ña̱ kúʼvi̱-iniyó xíniyó Jehová.

4, 5. Ka̱ʼa̱n xa̱ʼa̱ iin ña̱ náʼa̱ ndáa ki̱ʼva kítáʼan ña̱ kúʼvi̱-iniyó xíniyó Ndióxi̱ xíʼin ña̱ kúʼvi̱-iniyó xíniyó na̱ hermano.

⁴ ¿Ndáa ki̱ʼva kítáʼan ña̱ kúʼvi̱-iniyó xíniyó Jehová xíʼin ña̱ kúʼvi̱-iniyó xíniyó na̱ hermanoyó? Ña̱ va̱ʼa kunda̱a̱-iniyó xíʼin ña̱yóʼo, ná ndakanixi̱níyó xa̱ʼa̱ ndáa ki̱ʼva kítáʼan sava táʼví ku̱ñuyó xíʼin níma̱yó. Iin ta̱ doctor kivi kunda̱a̱-inira ndáa ki̱ʼva íyo níma̱ iin na̱ yiví na̱ íxatátánra tá xítora ndáa ki̱ʼva kánda̱ tu̱chu su̱kún ndaʼa̱na. ¿Ndáaña sákuaʼayó xíʼin ejemplo yóʼo?

⁵ Tá xíto ta̱ doctor ña̱ kúee kánda̱ tu̱chu su̱kún ndaʼa̱ na̱ yiví, sana kúúmiína kue̱ʼe̱. Soo tá xítora ña̱ ndeé kánda̱ña sana íyo va̱ʼavana. Ki̱ʼva saá kivi kundoʼoyó, tá kíʼinyó kuenta ña̱ kǒo náʼa̱kayó ña̱ kúʼvi̱-iniyó xíniyó na̱ hermano, xíʼin ña̱yóʼo kúnda̱a̱-iniyó ña̱ va̱ása kúʼvi̱ka-iniyó xíniyó Jehová. Soo tá ndiʼi tiempo náʼa̱yó ña̱ kúʼvi̱-iniyó xíniyó na̱ hermano, ña̱yóʼo náʼa̱ña ña̱ va̱ʼaní kítáʼanyó xíʼin Jehová ta kúʼvi̱ní-iniyó xíniyóra.   

6. ¿Nda̱chun xíniñúʼu kundi̱ʼi-iniyó tá va̱ása kúʼvi̱ka-iniyó xíniyó na̱ hermanoyó? (1 Juan 4:​7-9, 11).

⁶ ¿Nda̱chun xíniñúʼu kundi̱ʼi-iniyó tá va̱ása kúʼvi̱ka-iniyó xíniyó na̱ hermanoyó? Saáchi ña̱yóʼo kúni̱ kachiña ña̱ va̱ása viíka kítáʼanyó xíʼin Jehová. Ta va̱ʼaní ni̱ka̱ʼa̱n ta̱ apóstol Juan xa̱ʼa̱ ña̱yóʼo tá ka̱chira: “Saáchi na̱ va̱ása kúʼvi̱-ini xíni na̱ ñanina na̱ va̱ʼa xínina, va̱ása kívi kuʼvi̱-inina kunina Ndióxi̱ ta̱ va̱ása kívi kunina” (1 Juan 4:20). ¿Ndáaña sákuaʼayó xíʼin ña̱yóʼo? Tá kúʼvi̱-iniyó xíniyó na̱ hermanoyó saá kúú ña̱ kivi sakúsi̱íyó-ini Jehová (kaʼvi 1 Juan 4:​7-9, 11).

7, 8. ¿Ndáaña keʼéyó ña̱ va̱ʼa na̱ʼa̱yó ña̱ kúʼvi̱-iniyó xínitáʼanyó?

⁷ Ku̱a̱ʼání yichi̱ káʼa̱n Biblia tu̱ʼun yóʼo: “Kuʼvi̱-inindó kunitáʼanndó” (Juan 15:​12, 17; Rom. 13:8; 1 Tes. 4:9; 1 Ped. 1:22; 1 Juan 4:11). Soo ña̱ kúʼvi̱-iniyó xíniyó inkana níma̱yó ndíka̱ ña̱yóʼo ta ni iin na̱ yiví kǒo kívi kuniña. Tá saá, ¿ndáa ki̱ʼva na̱ʼa̱yó nu̱ú inkana ña̱ kúʼvi̱-iniyó xíniyóna? Kivi na̱ʼa̱yó ña̱yóʼo xíʼin ña̱ káʼa̱nyó ta saátu xíʼin ña̱ kéʼéyó.   

⁸ Íyo ku̱a̱ʼání ki̱ʼva ña̱ kivi na̱ʼa̱yó nu̱ú na̱ hermano ña̱ kúʼvi̱-iniyó xíniyóna, ta Biblia káʼa̱nña xa̱ʼa̱ sava ña̱yóʼo: “Nina ña̱ nda̱a̱ ka̱ʼa̱nndó xíʼin táʼanndó” (Zac. 8:16). “Vií koondó xíʼin táʼanndó” (Mar. 9:50). “Siʼnaka miíndó keʼé ña̱yóʼo ña̱ ixato̱ʼó táʼanndó” (Rom. 12:10). “Viíní ndakiʼin-táʼanndó” (Rom. 15:7). “Kǒo sandákoondó ña̱ [...] koo káʼnu-inindó xa̱ʼa̱na” (Col. 3:13). “Chindeétáʼanndó xíʼin táʼanndó tá yáʼandó nu̱ú tu̱ndóʼo” (Gál. 6:2). “Ndakundeéndó sandíkondó-ini táʼanndó” (1 Tes. 4:18). “Ndasandakúndó-ini táʼanndó” (1 Tes. 5:11). “Ka̱ʼa̱nndó xíʼin Ndióxi̱ xa̱ʼa̱ táʼanndó” (Sant. 5:16).

9. ¿Ndáaña keʼéyó tasaá na̱ʼa̱yó nu̱ú na̱ hermano ña̱ kúʼvi̱-iniyó xíniyóna? (Koto na̱ʼná).

⁹ Vitin ná ka̱ʼa̱nyó xa̱ʼa̱ ña̱ ndáyáʼviní ni̱ka̱ʼa̱n ta̱ Pablo nu̱ú párrafo ña̱ ni̱ya̱ʼa, tá  ka̱chira: “Ndakundeéndó sandíkondó-ini táʼanndó”. Tá sándi̱koyó-ini inkana, saá náʼa̱yó ña̱ kúʼvi̱-iniyó xíniyóna. ¿Nda̱chun? Iin tutu ña̱ káʼa̱n xa̱ʼa̱ Biblia, káʼa̱nña ña̱ tu̱ʼun griego ña̱ xi̱niñúʼu ta̱ Pablo tá ni̱ka̱ʼa̱nra “sandíkondó-ini inkana”, kúni̱ kachiña “ña̱ kundichiyó síi̱n iin na̱ yiví ña̱ va̱ʼa chikaa̱yó ndee̱ xíʼinna tá yáʼana nu̱ú tu̱ndóʼo ña̱ yo̱ʼvi̱ní”. Ña̱kán, tá sándi̱koyó-ini na̱ hermano na̱ xóʼvi̱, saá chíndeétáʼanyó xíʼinna ña̱ kǒo sandákoona ndasakáʼnuna Ndióxi̱. Ña̱kán tá iin na̱ hermano yáʼana nu̱ú iin tu̱ndóʼo ña̱ yo̱ʼvi̱ní ta íyoyó ña̱ chindeétáʼanyó xíʼinna, saá náʼa̱yó nu̱úna ña̱ kúʼvi̱ní-iniyó xíniyóna (2 Cor. 7:​6, 7, 13).

10. ¿Nda̱chun inkáchi kúni̱ kitáʼan ña̱ kundáʼvi-iniyó kuniyó inkana xíʼin ña̱ sándi̱koyó-inina?

¹⁰ Ña̱ kundáʼvi-iniyó kuniyó iin na̱ yiví xíʼin ña̱ sándi̱koyó-inina iin káchi kúni̱ kitáʼan ña̱yóʼo. ¿Nda̱chun? Saáchi tá iin na̱ yiví kúndáʼvi-inina xínina iin na̱ xóʼvi̱ xa̱ʼa̱ ña̱ yáʼana nu̱ú iin tu̱ndóʼo, kúni̱na sandíkona-inina ta chindeétáʼanna xíʼinna. Ña̱kán, ña̱ va̱ʼa chindeétáʼanyó xíʼin iin na̱ yiví siʼna kúndáʼvi-iniyó xíniyóna tasaá sándi̱koyó-inina. Ta ki̱ʼva saá íyo ña̱ kéʼé Jehová. Ta̱ Pablo ni̱ka̱ʼa̱nra xa̱ʼa̱ Jehová ña̱ “ta̱yóʼo kúú ta̱ kúndáʼviní-ini xíni miíyó ta sándi̱kora-iniyó” (2 Cor. 1:3). Mií Jehová kúú ta̱ chíkaa̱ ndee̱ xíʼinyó tá yáʼayó nu̱ú tu̱ndóʼo (2 Cor. 1:4). Tá xa̱a̱ ku̱naaníyó ta xíʼiyó ti̱kui̱í nda̱a̱ ndíko-iniyó, tasaá kúú ña̱ kéʼé Jehová xíʼin na̱ yiví na̱ xóʼvi̱ chi sándi̱kora-inina. ¿Ndáaña chindeétáʼan xíʼinyó ña̱ kundáʼvi-iniyó kuniyó inkana ta sandíkoyó-inina nda̱a̱ táki̱ʼva kéʼé Jehová? Ña̱ chikaa̱yó ndee̱ ña̱ kuumiíyó ña̱ va̱ʼa ña̱ kúúmií Jehová. Ná ka̱ʼa̱nyó xa̱ʼa̱ sava ña̱yóʼo.

11. Táki̱ʼva káchi Colosenses 3:12 xíʼin 1 Pedro 3:​8, ¿ndáaña kivi chindeétáʼan xíʼinyó ña̱ kuʼvi̱-iniyó kuniyó inkana ta sandíkoyó-inina?

¹¹ ¿Ndáaña chindeétáʼan xíʼinyó ña̱ kǒo sandákooyó ña̱ kuʼvi̱-iniyó kuniyó inkana xíʼin ña̱ sandíkoyó-inina? Ña̱ kunda̱a̱-iniyó xíʼin ña̱ ndóʼona, ña̱ kuʼvi̱-iniyó kuniyóna ta va̱ʼa koo iniyó xíʼinna (kaʼvi Colosenses 3:12; 1 Pedro 3:8). Ña̱ kuumiíyó ña̱ va̱ʼa ña̱ kúúmií Jehová kúú ña̱ chindeétáʼan xíʼinyó ña̱ va̱ʼa sándi̱koyó-ini inkana tá yáʼana nu̱ú tu̱ndóʼo. Ta̱ Jesús ni̱ka̱ʼa̱nra ña̱yóʼo: “Saáchi ña̱ʼa ña̱ káʼa̱nyó kúú ña̱ ndíka̱a̱ níma̱yó. Ta̱a ta̱ va̱ʼa káʼa̱nra nina ña̱ va̱ʼa, saáchi nina ña̱ va̱ʼa ndíka̱a̱ níma̱ra” (Mat. 12:​34, 35). Ña̱kán, iin ki̱ʼva ña̱ na̱ʼa̱yó ña̱ kúʼvi̱-iniyó xíniyó na̱ hermanoyó kúú ña̱ sándi̱koyó-inina.

12. a) ¿Ndáaña xíniñúʼu kiʼinyó kuenta xíʼin? b) ¿Ndáa pregunta ndakuiinyó?

¹² Ndiʼiyó kúni̱yó keʼéyó ña̱yóʼo: Ña̱ “ndakundeéyó kuʼvi̱-iniyó kunitáʼanyó” (1 Juan 4:7). Soo ná kǒo nandósó-iniyó xa̱ʼa̱ ña̱ ni̱ka̱ʼa̱n ta̱ Jesús: Ña̱ “ku̱a̱ʼání na̱ yiví kǒo kuʼvi̱ka-inina kunitáʼanna” (Mat. 24:12). Ta̱ Jesús kǒo níxi̱kuni kachira ña̱ ku̱a̱ʼání na̱ discípulora sandákoona ña̱ kuʼvi̱-inina kunitáʼanna. Soo ni saá, xíniñúʼu kiʼinníyó kuenta ta kǒo keʼéyó nda̱a̱ táki̱ʼva kéʼé na̱ yiví na̱ ndóo tiempo vitin, na̱ kǒo kúʼvi̱-ini xínitáʼan. Vitin ná ndakuiinyó iin pregunta, ¿á íyo iin ña̱ kivi chindeétáʼan xíʼinyó ña̱ kotoyó á ndixa kúʼvi̱-iniyó xíniyó na̱ hermanoyó?

13. ¿Ama kúú ña̱ xíniñúʼu na̱ʼa̱yó ña̱ kúʼvi̱-iniyó xíniyó na̱ hermanoyó?

¹³ Ña̱ chindeétáʼan xíʼinyó ña̱ kunda̱a̱-iniyó á ndixa kúʼvi̱-iniyó xíniyó na̱ hermanoyó  kúú ña̱ kotoyó ndáaña kéʼéyó tá káku iin ku̱a̱chi (2 Cor. 8:8). Ña̱yóʼo kúú ña̱ ni̱ka̱ʼa̱n ta̱ apóstol Pablo: “Soo mií ña̱ ndáyáʼvika kúú ña̱ kuʼvi̱ní-inindó kunitáʼanndó, saáchi na̱ kúʼvi̱-ini xíni inkana ndiʼi tiempo íyo tu̱ʼvana ña̱ koo káʼnu-inina xa̱ʼa̱ táʼanna” (1 Ped. 4:8). Ña̱kán, tá ndixa kúʼvi̱-iniyó xíniyó na̱ hermanoyó ni káʼa̱nna iin ña̱ va̱ása va̱ʼa xa̱ʼa̱yó á kéʼéna iin ña̱ va̱ása va̱ʼa xíʼinyó, koo káʼnuva-iniyó xa̱ʼa̱na.

14. Táki̱ʼva káchi 1 Pedro 4:​8, ¿ndáa ki̱ʼva xíniñúʼu kuʼvi̱-iniyó kunitáʼanyó? Ka̱ʼa̱n xa̱ʼa̱ iin ejemplo.

¹⁴ Ná ka̱ʼa̱nyó xa̱ʼa̱ ña̱ ni̱ka̱ʼa̱n ta̱ Pedro nu̱ú versículo 8: “Kuʼvi̱ní-inindó kunitáʼanndó”. Tá ni̱ka̱ʼa̱n ta̱ Pedro ña̱ xíniñúʼu kuʼvi̱ní-iniyó kunitáʼanyó, ña̱yóʼo kúni̱ kachiña ña̱ xíʼin ndiʼi níma̱yó ná keʼéyóña. Saáchi tá kéʼé na̱ hermano ña̱ va̱ása va̱ʼa xíʼinyó, ná ixakáʼnu-iniyó xa̱ʼa̱na. Ña̱ va̱ʼa kunda̱a̱-iniyó xíʼin ña̱yóʼo: Ná ndakanixi̱níyó ña̱ kúúmiíyó iin mesa ta íyoní mancha nu̱únú á kininí káa nu̱únú ta ña̱ va̱ʼa kunaʼa̱ nu̱únú, ndákasiyó iin tela káʼnu nu̱únú, tasaá kǒo kunaʼa̱ mancha ña̱ kúúmiínú. Ta ki̱ʼva saá xíniñúʼu keʼéyó xíʼin na̱ hermanoyó, tá ndixaní kúʼvi̱-iniyó  xínitáʼanyó ni nda̱a̱ ndáaka ña̱ ná keʼéna xíʼinyó ixakáʼnuva-iniyó xa̱ʼa̱na.

15. ¿Ndáaña keʼéyó tá ndixaní kúʼvi̱-iniyó xíniyó na̱ hermanoyó? (Colosenses 3:13).

¹⁵ Tá ndixaní kúʼvi̱-iniyó xíniyó na̱ hermano ña̱yóʼo chindeétáʼan xíʼinyó ña̱ ixakáʼnu-iniyó xa̱ʼa̱na ni sava yichi̱ ixayo̱ʼvi̱níña xíʼinyó (kaʼvi Colosenses 3:13). Ta tá íxakáʼnu-iniyó xa̱ʼa̱na, saá kúú ña̱ náʼa̱yó ña̱ kúʼvi̱-iniyó xíniyóna ta kúni̱yó sakúsi̱íyó-ini Jehová. ¿Ndáaka ña̱ kivi chindeétáʼan xíʼinyó ña̱ ixakáʼnu-iniyó xa̱ʼa̱ na̱ hermanoyó?   

16, 17. ¿Ndáaña kivi chindeétáʼan xíʼinyó ña̱ ixakáʼnu-iniyó xa̱ʼa̱ na̱ hermanoyó? Ka̱ʼa̱n xa̱ʼa̱ iin ejemplo. (Koto na̱ʼná).

¹⁶ Ña̱ xíniñúʼu kiʼinyó kuenta xíʼin kúú ña̱ va̱ʼa ña̱ kéʼé na̱ hermano ta su̱ví ña̱ va̱ása va̱ʼa kéʼéna. Ná kachiyó ña̱ ndátakayó kuxuyó xíʼin na̱ hermanoyó ta kúsi̱íkaví-iniyó. Tasaá ni̱ka̱ʼa̱nyó ña̱ taváyó na̱ʼná, ta ta̱váyó u̱ni̱ña, soo nu̱ú iinña va̱ása va̱ʼa nínana iin na̱ hermano. Ña̱kán, ¿ndáaña keʼéyó xíʼin na̱ʼná ña̱ va̱ása va̱ʼa níkana? Xíniñúʼu ndakatayóña ta kindo̱oyó xíʼin u̱vi̱ ña̱ va̱ʼaní ka̱na nu̱ú ndiʼina xáku̱.

¹⁷ Ndiʼi ña̱ livi ña̱ ndákaʼányó xa̱ʼa̱ na̱ hermanoyó íyoña nda̱a̱ táki̱ʼva íyo na̱ʼná ña̱ táan va̱ʼayó chi kútóoníyóña. Tá kúú, tá xa̱a̱ ndákutáʼanyó xíxiyó á kéʼéyó inka ña̱ʼa xíʼin na̱ hermanoyó kúsi̱íní-iniyó. Soo ná kachiyó ña̱ iin na̱ hermano kán ni̱ka̱ʼa̱nna á ke̱ʼéna iin ña̱ʼa ña̱ kǒo níkutóoyó. ¿Ndáaña  keʼéyó xíʼin ña̱ ni̱ka̱ʼa̱nna? ¿Á kivi nandósó-iniyó xa̱ʼa̱ ña̱ ke̱ʼéna nda̱a̱ táki̱ʼva kéʼéyó xíʼin na̱ʼná ña̱ nda̱katayó? (Prov. 19:11; Efes. 4:32). Xa̱ʼa̱ ña̱ va̱ʼaní kítáʼanyó xíʼin na̱ hermano kán kiviva nandósó-iniyó xa̱ʼa̱ ña̱ ke̱ʼéna á ña̱ ni̱ka̱ʼa̱nna, chi su̱ví ña̱ ndeéví kúú ña̱ ke̱ʼéna xíʼinyó. Ña̱kán, ná ndakaʼányó xa̱ʼa̱ nina ña̱ va̱ʼa ña̱ kéʼé na̱ hermanoyó nda̱a̱ táki̱ʼva kéʼéyó xíʼin na̱ʼná ña̱ kútóoníyó.

18. ¿Ndáaña ndáyáʼviní ni̱ka̱ʼa̱n artículo yóʼo xa̱ʼa̱?

¹⁸ ¿Nda̱chun xíniñúʼu kuʼvi̱-iniyó kunitáʼanyó? Nda̱a̱ táki̱ʼva sa̱kúaʼayó, tá ndixa kúʼvi̱-iniyó xíniyó na̱ hermanoyó saá náʼa̱yó ña̱ kúʼvi̱tu-iniyó xíniyó Jehová. Soo, ¿ndáa ki̱ʼva na̱ʼa̱yó ña̱ kúʼvi̱-iniyó xíniyóna? Iin ki̱ʼva ña̱ keʼéyó ña̱yóʼo kúú ña̱ sandíkoyó-inina. Ta ña̱ va̱ʼa keʼéyó ña̱yóʼo xíniñúʼu kundáʼvi-iniyó kuniyóna. Soo, ¿ndáaña keʼéyó ña̱ va̱ʼa kuʼvi̱ka-iniyó kuniyóna ndiʼi tiempo? Xíniñúʼu ixakáʼnu-iniyó xa̱ʼa̱na tá kéʼéna ña̱ va̱ása va̱ʼa xíʼinyó.

19. ¿Nda̱chun ndáyáʼviní ña̱ kuʼvi̱-iniyó kunitáʼanyó tiempo vitin?

¹⁹ ¿Nda̱chun ndáyáʼviní ña̱ kuʼvi̱-iniyó kunitáʼanyó tiempo vitin? Ná kotoyó ña̱ ni̱ka̱ʼa̱n ta̱ apóstol Pedro: “Xa̱a̱ ku̱yatinní ndiʼi-xa̱ʼa̱ ndiʼi ña̱ʼa, xa̱ʼa̱ ña̱kán, [...] ña̱ ndáyáʼvika kúú ña̱ kuʼvi̱ní-inindó kunitáʼanndó” (1 Ped. 4:​7, 8). ¿Ndáaña kundoʼoyó tiempo ña̱ so̱ndíʼi vitin? Ta̱ Jesús ni̱ka̱ʼa̱nra xa̱ʼa̱ ña̱ kundoʼo na̱ discípulora: “Ndiʼi na̱ ñuu sa̱a̱-inina kunina ndóʼó xa̱ʼa̱ ña̱ kándíxandó yi̱ʼi̱” (Mat. 24:9). Ni kúni̱ ta̱ Ndi̱va̱ʼa ndataʼvíra miíyó, soo kǒo kuchiñura keʼéra ña̱yóʼo. Saáchi iin ña̱ chindeétáʼan xíʼinyó ña̱ inkáchi ndasakáʼnuyó Jehová kúú ña̱ kuʼvi̱ní-iniyó kunitáʼanyó (Col. 3:14; Filip. 2:​1, 2).