1. ¿Ndáaña xi̱ndakanixi̱ní ta̱ apóstol Pablo xa̱ʼa̱ na̱ siervo ministerial?

 NDÁYÁʼVINÍ chiñu ña̱ kéʼé na̱ siervo ministerial ti̱xin congregación. Xi̱ndayáʼviní na̱ siervo ministerial nu̱ú ta̱ apóstol Pablo ña̱kán tá ka̱ʼyira carta ku̱a̱ʼa̱n nu̱ú na̱ cristiano na̱ ñuu Filipos chi̱ndeéra na̱ siervo ministerial xíʼin na̱ anciano (Filip. 1:1).

2. ¿Ndáaña káʼa̱n ta̱ Luis xa̱ʼa̱ chiñu ña̱ kúúmiíra?

² Ku̱a̱ʼání ta̱ hermano ta̱ xa̱a̱ nda̱kuchi kúsi̱íní-inira ña̱ kúúra siervo ministerial. Ni loʼo á ku̱a̱ʼá ku̱i̱ya̱na kiviva xa̱a̱na koona siervo ministerial. Tá kúú ta̱ Devan, 18 ku̱i̱ya̱ xi̱kuumiíra tá ndu̱ura siervo ministerial, soo ta̱ Luis yáʼaka 50 ku̱i̱ya̱ xi̱kuumiíra tá ndu̱ura siervo ministerial. Ta̱ Luis káʼa̱nra: “Kúsi̱íní-inii̱ ña̱ kúi̱ siervo ministerial. Ta va̱ʼaní kúnii̱ chi kúʼvi̱ní-ini na̱ hermano xínina yi̱ʼi̱”.

3. ¿Ndáa pregunta ndakuiinyó?

³ Tá xa̱a̱ nda̱kuchiún ta ta̱ʼán koún siervo ministerial, ¿á kúni̱ún koún siervo ministerial? Soo, ¿ndáa xa̱ʼa̱ kúú ña̱ kúni̱ún koún siervo ministerial? ¿Ndáaña va̱xi nu̱ú Biblia kúú ña̱ xíniñúʼu keʼún ña̱ va̱ʼa koún siervo ministerial? Nu̱ú artículo ña̱ kaʼviyó vitin ndakuiinyó pregunta yóʼo. Soo, siʼna ná ka̱ʼa̱nyó xa̱ʼa̱ chiñu ña̱ kéʼé na̱ siervo ministerial.

¿NDÁA CHIÑU KÚÚ ÑA̱ KÉʼÉ IIN TA̱ SIERVO MINISTERIAL?

4. ¿Ndáa chiñu kéʼé iin ta̱ siervo ministerial? (Koto na̱ʼná).

⁴ Iin ta̱ hermano ta̱ xa̱a̱ nda̱kuchi kúú ta̱ kivi xa̱a̱ koo siervo ministerial. Tá ndáka̱xinna iin ta̱ hermano ña̱ koora siervo ministerial,  espíritu santo Jehová kúú ña̱ chíndeétáʼan xíʼinna. Ta na̱ siervo ministerial chíndeétáʼanna xíʼin na̱ anciano ña̱ keʼéna ku̱a̱ʼá chiñu ti̱xin congregación. Sava na̱ siervo ministerial xítona ndáa territorio ku̱ʼu̱n na̱ hermano natúʼunna xíʼin na̱ yiví xa̱ʼa̱ Ndióxi̱, ta saátu xítona á íyo tutu ña̱ ku̱ʼu̱n xíʼinna. Savana ndátiʼvína salón á ndáya̱kúnna ta saátu tá xíniñúʼu nduviíñá xáʼa̱nna kéʼéna chiñu yóʼo. Inkatuna kúúna acomodador, á kíʼintuna kuenta xíʼin equipo ña̱ audio xíʼin video ña̱ íyo ti̱xin salón. Ku̱a̱ʼáníva chiñu kéʼé na̱ siervo ministerial. Soo ña̱ ndáyáʼvika kúú ña̱ kúʼvi̱ní-inina xínina Jehová ta kéʼéna ña̱ káʼa̱nra. Saátu kúʼvi̱ní-inina xínina ndiʼi na̱ hermano na̱ ñúʼu congregación (Mat. 22:​37-39). Soo, ¿ndáaña xíniñúʼu keʼé iin ta̱ hermano ta̱ xa̱a̱ nda̱kuchi ña̱ va̱ʼa koora siervo ministerial?

5. ¿Ndáaña kivi keʼún ña̱ va̱ʼa xa̱ún koún siervo ministerial?

⁵ Biblia káʼa̱nña ndáaña xíniñúʼu keʼé iin ta̱ kúni̱ xa̱a̱ koo siervo ministerial (1 Tim. 3:​8-10, 12, 13). Ña̱kán, ¿ndáaña kivi keʼún tá kúni̱ún koún siervo ministerial? Xíniñúʼu kaʼviún ña̱ káʼa̱n xa̱ʼa̱ ndáaña xíniñúʼu keʼé iin na̱ hermano ña̱ va̱ʼa koona siervo ministerial ta chika̱ún ndee̱ ña̱ saxínúnña. Soo siʼna ná ka̱ʼa̱nyó xa̱ʼa̱ iin pregunta ña̱ ndáyáʼviní.

¿NDÁA XA̱ʼA̱ KÚÚ ÑA̱ KÚNI̱ÚN KOÚN SIERVO MINISTERIAL?

6. ¿Nda̱chun kúni̱ún chindeétáʼún xíʼin na̱ hermano? (Mateo 20:28; koto na̱ʼná ña̱ va̱xi chí).

⁶ Ta̱ Jesús kúú ta̱ chi̱núu iin yichi̱ ña̱ va̱ʼaní nu̱úyó, ta xa̱ʼa̱ ña̱ xi̱kuʼvi̱ní-inira xi̱xinira yivára ta saátu na̱ yiví xi̱keʼéra sava chiñu ña̱ va̱ʼa chindeétáʼanra xíʼin inkana tasaá ni̱na̱ʼa̱ra ña̱ vitání-inira (kaʼvi Mateo 20:28; Juan 13:​5, 14, 15). Ña̱kán, saátu miíún tá kúʼvi̱-iniún xíniún Jehová ta saátu na̱ yiví, mií Jehová chindeétáʼan xíʼún ña̱ kivi xa̱ún koún siervo ministerial (1 Cor. 16:14; 1 Ped. 5:5).

7. ¿Nda̱chun kǒo xíniñúʼu ni̱nu kuniyó?

⁷ Na̱ yiví na̱ kǒo ndásakáʼnu Jehová, ndásakáʼnuna inka na̱ yiví xa̱ʼa̱ ña̱ kéʼéna. Soo su̱ví saáví kéʼé na̱ ndásakáʼnu Jehová. Ta̱ hermano ta̱ ndíku̱n yichi̱ ta̱ Jesús ta kúʼvi̱-inira xínira inkana, kǒo kúni̱ra kaʼndara chiñu nu̱ú inkana ta ni kǒo kúni̱ra na̱ʼa̱ra ña̱ ndáyáʼviníra. Tá iin ta̱ hermano ni̱nu kúnira ta kúni̱ra kundayáʼvira nu̱ú inkana kǒo kivi ni̱ʼira iin chiñu ti̱xin congregación, saáchi tá ná ka̱ʼa̱nna xíʼinra keʼéra iin ña̱ʼa sana kǒo kandíxara keʼéraña  ta kǒo kivi chindeétáʼanra xíʼin na̱ hermano (Juan 10:12). Kǒo taxiví Jehová bendición ndaʼa̱ na̱ yiví na̱ ni̱nu kúni á na̱ kúni̱ ndukáʼnu nu̱ú inkana (1 Cor. 10:​24, 33; 13:​4, 5).

8. ¿Ndáaña ni̱ka̱ʼa̱n ta̱ Jesús xíʼin na̱ apóstolra?

⁸ Sava yichi̱, nda̱a̱ na̱ migo ta̱ Jesús xi̱kuni̱na kuumiína iin chiñu ña̱ káʼnuní. Soo, xi̱kuni̱na kuumiína ña̱yóʼo xa̱ʼa̱ ña̱ ni̱nuní xi̱kuni̱na. Ña̱yóʼo kúú ña̱ ku̱u xíʼin ta̱ Santiago ta saátu xíʼin ta̱ Juan. Na̱yóʼo ni̱ka̱ʼa̱nna xíʼin ta̱ Jesús ña̱ ná taxira iin chiñu ña̱ ndáyáʼviní ndaʼa̱na ti̱xin Reinora. Soo nu̱úka ña̱ ka̱ʼa̱n ta̱ Jesús xíʼin ta̱ Santiago ta saátu xíʼin ta̱ Juan ña̱ va̱ʼaní ni̱xi̱yo ña̱ xi̱kuni̱na keʼéna, ña̱yóʼo ni̱ka̱ʼa̱nra xíʼin u̱xu̱ u̱vi̱ saá na̱ apóstolra: “Na̱ kúni̱ koo na̱ káʼnuka nu̱ú inkana va̱ʼaka ná kachíñuna nu̱ú inkana, ta nda̱a̱ ndáaka na̱ kúni̱ koo na̱ nu̱ú nu̱úndó siʼna ná kachíñuna nu̱ú ndiʼindó” (Mar. 10:​35-37, 43, 44). Soo na̱ hermano na̱ chíkaa̱ ndee̱ ña̱ kuumiína iin chiñu xa̱ʼa̱ ña̱ kúni̱na chindeétáʼanna xíʼin na̱ hermano, iin bendición kúú na̱yóʼo ti̱xin congregación (1 Tes. 2:8).

¿NDÁAÑA KIVI KEʼÚN ÑA̱ VA̱ʼA KUNI̱ÚN CHINDEÉTÁʼÚN XÍʼIN INKANA?

9. ¿Ndáaña kivi keʼún ña̱ va̱ʼa kuni̱ún chindeétáʼún xíʼin inkana?

⁹ Kúʼvi̱va-iniún xíniún Jehová, ta saátu kúni̱ún chindeétáʼún xíʼin na̱ hermano. Soo, sana kǒo kúni̱ún koún siervo ministerial chi ndákanixi̱níún ña̱ ku̱a̱ʼání chiñu kéʼéna. Ña̱kán, ¿ndáaña kivi keʼún ña̱ va̱ʼa kuni̱ún keʼún ku̱a̱ʼáka chiñu ti̱xin congregación? Kivi ndakaʼún ña̱ tá ná chindeétáʼún xíʼin na̱ hermano saá kusi̱íní-iniún. Ta̱ Jesús ni̱ka̱ʼa̱nra: “Kúsi̱íka-iniyó tá táxiyó ña̱ʼa ndaʼa̱ inkana nu̱úka ña̱ ndakiʼinyóña” (Hech. 20:35). Ta̱ Jesús xi̱ndiku̱nra consejo yóʼo ta si̱íní ni̱xi̱yora xa̱ʼa̱ ña̱ xi̱chindeétáʼanra xíʼin inkana. Ta saátu miíún kivi kusi̱í-iniún tá chíndeétáʼún xíʼin inkana.

10. ¿Ndáa ki̱ʼva ni̱na̱ʼa̱ ta̱ Jesús ña̱ xi̱kusi̱íní-inira tá xi̱chindeétáʼanra xíʼin na̱ yiví? (Marcos 6:​31-34).

¹⁰ Xi̱kusi̱íní-ini ta̱ Jesús tá xi̱chindeétáʼanra xíʼin na̱ yiví (kaʼvi Marcos 6:​31-34). Ná ka̱ʼa̱nyó xa̱ʼa̱ iin ejemplo. Iin yichi̱ ta̱ Jesús xíʼin na̱ apóstolra ku̱naánína ña̱kán nda̱kiʼinna ku̱a̱ʼa̱nna iin lugar ña̱ xíká kíndo̱o ña̱ va̱ʼa ndakindee̱na. Soo tá ni̱xa̱a̱na kán, xa̱a̱ ndátu ku̱a̱ʼá na̱ yiví miína chi xi̱kuni̱na kuniso̱ʼona ña̱ sánáʼa̱ ta̱ Jesús. Kiviva ka̱ʼa̱n ta̱ Jesús xíʼinna ña̱ kǒo tiempora saáchi miíra xíʼin na̱ apóstolra ni tiempo ña̱ kuxuna kǒo níxi̱yo nu̱úna. Saátu kivi loʼo kuitíva ña̱ʼa sanáʼa̱rana ta ka̱ʼa̱nra xíʼinna ña̱ ndakiʼinna ku̱ʼu̱nna. Soo xa̱ʼa̱ ña̱ xi̱kuʼvi̱-inira xi̱xinirana ku̱a̱ʼání ña̱ʼa sa̱náʼa̱rana. Ta tá ki̱ʼinra kuenta xa̱a̱ xi̱kuaáva kúúña (Mar. 6:35). Sa̱náʼa̱rana chi ku̱ndáʼvi-inira xi̱nirana ta xi̱kuʼvi̱-inira xi̱xinirana. Xi̱kusi̱íní-ini ta̱ Jesús tá xi̱chindeétáʼanra xíʼin na̱ yiví.

11. ¿Ndáa ki̱ʼva chi̱ndeétáʼan ta̱ Jesús xíʼin na̱ yiví? (Koto na̱ʼná).

¹¹ Kǒo nísanáʼa̱ kuití ta̱ Jesús na̱ yiví xa̱ʼa̱ tu̱ʼun Ndióxi̱ chi saátu ta̱xira ña̱ xi̱xina. Tá kúú iin yichi̱ ke̱ʼéra iin milagro ta ku̱a̱ʼání ndu̱u comida i̱xaara, ta ni̱ka̱ʼa̱nra xíʼin na̱ discípulora ña̱ taxinaña ndaʼa̱ na̱ yiví (Mar. 6:41). Xíʼin ña̱yóʼo sa̱náʼa̱ra na̱ discípulora ndáaña xíniñúʼu keʼéna ña̱ va̱ʼa chindeétáʼanna xíʼin na̱ yiví. Saátu ta̱ Jesús ni̱na̱ʼa̱ra xíʼin ña̱ ke̱ʼéra ndáa ki̱ʼva xíniñúʼu chindeétáʼanna xíʼin inkana ta saátu íyo ña̱ kéʼé na̱ siervo ministerial. Ni̱kusi̱íníva-ini na̱ apóstol saáchi chi̱ndeétáʼanna xíʼin ta̱ Jesús ña̱ nda̱taʼvína ña̱ xi̱xi na̱ yiví ta ndiʼina chu̱tú-ti̱xin (Mar. 6:42). Soo ku̱a̱ʼáníkava yichi̱ ke̱ʼé ta̱ Jesús ña̱ʼa xa̱ʼa̱ inkana nu̱úka ña̱ keʼéra ña̱ kútóo miíra, ndiʼi ku̱i̱ya̱ ña̱ ni̱xi̱yora nu̱ú ñuʼú yóʼo chi̱ndeétáʼanra xíʼin na̱ yiví (Mat. 4:23; 8:16). Xi̱kusi̱íní-ini ta̱ Jesús tá xi̱sanáʼa̱ra na̱ yiví xa̱ʼa̱ Ndióxi̱ ta saátu tá xi̱chindeétáʼanra xíʼinna. Saátu miíún tá ná koún siervo ministerial kusi̱í-iniún ña̱ chindeétáʼún xíʼin inkana.

12. ¿Nda̱chun kǒo xíniñúʼu ndakanixi̱níyó ña̱ kǒo kivi chindeétáʼanyó xíʼin na̱ hermano?

 ¹² Sana ndákanixi̱níún ña̱ kǒo iin chiñu ña̱ va̱ʼaní xíni̱ún keʼún, soo kǒo ndakava-iniún chi íyova ña̱ kivi keʼún ña̱ va̱ʼa chindeétáʼún xíʼin na̱ hermano. Iin ña̱ kivi keʼún kúú ña̱ ka̱ʼún xíʼin Jehová, ta kaʼviún ña̱ va̱xi nu̱ú 1 Corintios 12:​12-30. Nu̱ú texto yóʼo, ta̱ Pablo ni̱ka̱ʼa̱nra ña̱ ndiʼi miíyó na̱ ndásakáʼnu Jehová íyova chiñu ña̱ ndáyáʼviní ña̱ kivi keʼéyó ti̱xin congregación. Sana ta̱ʼán koún siervo ministerial chi íyo sava ña̱ xíniñúʼu viíka keʼún soo kǒo ndakava-iniún, chi tá ná chika̱ún ndee̱ kiviva viíní xa̱ún keʼúnña. Chikaa̱ ndee̱ ña̱ viíní kachíñún nu̱ú Jehová ta saátu ña̱ chindeétáʼún xíʼin na̱ hermano. Na̱ anciano kotona ndáaña kúú ña̱ xíni̱ún keʼún, tasaá taxina iin chiñu ndaʼún ña̱ kivi keʼún (Rom. 12:​4-8).

13. ¿Ndáaña xíniñúʼu ndakaʼún tá kúni̱ún koún siervo ministerial?

¹³ Inka ña̱ kivi chindeétáʼan xíʼún ña̱ chika̱ún ndee̱ ña̱ koún siervo ministerial kúú ña̱ ndakaʼún ña̱ ndiʼi miíyó na̱ ndásakáʼnu Ndióxi̱ xíniñúʼu sáxi̱nuyó requisito ña̱ va̱xi nu̱ú Biblia. Ndiʼi miíyó na̱ ndásakáʼnu Jehová xíniñúʼu viíní kitáʼanyó xíʼinra, saátu xíniñúʼu kusi̱í-iniyó ña̱ chindeétáʼanyó xíʼin inkana, xíʼin ña̱ chinúuyó iin yichi̱ va̱ʼa nu̱úna. Tá iin ta̱ hermano kúni̱ra kuumiíra ku̱a̱ʼáka chiñu ti̱xin congregación, ¿ndáaña xíniñúʼu chikaa̱ra ndee̱ keʼéra?

¿NDÁAÑA KEʼÚN ÑA̱ VA̱ʼA XA̱ÚN KOÚN SIERVO MINISTERIAL?

14. ¿Ndáaña xíniñúʼu keʼé ta̱ siervo ministerial? (1 Timoteo 3:​8-10, 12).

¹⁴ Vitin ná ka̱ʼa̱nyó xa̱ʼa̱ sava requisito ña̱ xíniñúʼu keʼé iin ta̱ hermano ta̱ kúni̱ xa̱a̱ koo siervo ministerial, ta ña̱yóʼo va̱xiña nu̱ú 1 Timoteo 3:​8-10, 12 (kaʼviña). Na̱ siervo ministerial xíniñúʼu viíní keʼéna chiñu ña̱ táxina ndaʼa̱na, ta tá xíto inkana ña̱yóʼo ka̱ʼa̱n va̱ʼana xa̱ʼa̱na. Soo, su̱ví ña̱yóʼo kúni̱ kachiña ña̱ nina xa̱ʼa̱ chiñu kundi̱ʼi̱-inina chi saátu kivi tavána tiempo ña̱ kusíkína á ña̱ koo si̱ína (Ecl. 3:​1, 4). Ña̱kán tá viíní kéʼé na̱ siervo ministerial chiñu ña̱ táxina ndaʼa̱na, ndiʼi na̱ hermano ti̱xin congregación ka̱ʼa̱n va̱ʼana xa̱ʼa̱na ta kundaa-ininana.

15. ¿Ndáaña kúni̱ kachi ña̱ kǒo ka̱ʼa̱nna ña̱ vatá á ña̱ to̱ʼón? Ta, ¿ndáaña kúni̱ kachi ña̱ kǒo kundi̱ʼi̱-inina xa̱ʼa̱ ña̱ kuumiína ku̱a̱ʼání ña̱ʼa?

¹⁵ “Kǒo xíniñúʼu ka̱ʼa̱nna ña̱ vatá á ña̱ to̱ʼón”. Ña̱yóʼo kúni̱ kachiña ña̱ xíniñúʼu sáxi̱nuna ña̱ ki̱ndoona keʼéna ta kǒo xíniñúʼu sandáʼvina inkana (Prov. 3:32). “Ná kǒo kundi̱ʼi̱-inina  ña̱ kuumiína ku̱a̱ʼání ña̱ʼa”. Ña̱yóʼo kúni̱ kachiña ña̱ kǒo xíniñúʼu sandáʼvina inkana tasaá kuumiína ku̱a̱ʼá xu̱ʼún, ña̱kán tá kúúmiína iin negocio kǒo xíniñúʼu sandáʼvina na̱ hermano ña̱ va̱ʼa tavána ku̱a̱ʼáka xu̱ʼún.

16. a) ¿Ndáaña kúni̱ kachi ña̱ kǒo xíniñúʼu koʼona ku̱a̱ʼání ndixi? b) ¿Ndáaña xíniñúʼu keʼéyó ña̱ va̱ʼa kutáʼan viíyó xíʼin Ndióxi̱?

¹⁶ “Kǒo xíniñúʼu koʼona ku̱a̱ʼání ndixi”. Ña̱yóʼo kúni̱ kachiña ña̱ kǒo xíniñúʼu koʼona nda̱a̱ xi̱niina chi tá saá ná keʼéna kixáʼa na̱ yiví ka̱ʼa̱nna ña̱ xíʼinína. Xíniñúʼu chikaa̱na ndee̱ ña̱ vií kutáʼanna xíʼin Jehová ta keʼéna ña̱ kúni̱ra. Kiviva xa̱a̱yó viíní kutáʼanyó xíʼin Jehová ni kúúyó na̱ yiví ku̱a̱chi.

17. ¿Ndáa ki̱ʼva kunda̱a̱-ini na̱ anciano á vií kéʼé iin ta̱ hermano chiñu? (1 Timoteo 3:10; koto na̱ʼná).

¹⁷ Inka ña̱ xíniñúʼu keʼéna kúú ña̱ na̱ʼa̱na ña̱ va̱ʼaní káchíñuna. Ña̱yóʼo kúni̱ kachiña ña̱ xíniñúʼu na̱ʼa̱na ña̱ xa̱a̱ va̱ʼaní kéʼéna chiñu ña̱ táxina ndaʼa̱na. Ña̱kán, tá táxi na̱ anciano iin chiñu ndaʼa̱na xíniñúʼu chikaa̱na ndee̱ ña̱ viíní keʼéna ndiʼi ña̱ káʼa̱nna xíʼinna ta saátu ña̱ káʼa̱n na̱ ñuu Ndióxi̱. Xíniñúʼu kunda̱a̱ káxi inina ndáa chiñu kúú ña̱ keʼéna ta ama xíniñúʼu sandíʼinaña. Tá chíkaa̱na ndee̱ ña̱ viíní keʼéna ndiʼi chiñu ña̱ táxina ndaʼa̱na, na̱ hermano na̱ ñúʼu congregación kiʼinna kuenta ña̱ viíní kéʼéna chiñu. Ndóʼó na̱ anciano kotondó ndáa ta̱ hermano ta̱ xa̱a̱ nda̱kuchi kúú ta̱ kivi chindeétáʼanndó xíʼin ña̱ xa̱a̱ra koora siervo ministerial (kaʼvi 1 Timoteo 3:10). Sava congregación íyo ta̱ va̱lí ta̱ xa̱a̱ nda̱kuchi ta̱ kúúmií 10 ku̱i̱ya̱ á nda̱a̱ 14. ¿Á íyo ta̱ va̱lí congregación nu̱ú ndíka̱ún? ¿Á távára tiempo ña̱ sakúaʼakara xa̱ʼa̱ Ndióxi̱? ¿Á táxira comentario ti̱xin reunión? Ta, ¿á kée ni̱ʼira predicación? Tá saá kéʼéra, ndóʼó na̱ anciano kivi taxindó chiñu ndaʼa̱ra ña̱ kivi keʼéra. Tá ná keʼéndó ña̱yóʼo saá kiʼinndó kuenta á va̱ʼa kéʼé ta̱ va̱lí yóʼo chiñu, tasaá tá ná kuchée loʼokara kivi sandákutura requisito ña̱ koora siervo ministerial.

18. ¿Ndáaña kúni̱ kachi ña̱ “kǒo nda̱a̱ ni iin na̱ kivi chikaa̱ ku̱a̱chi-ñaʼá”?

¹⁸ “Kǒo nda̱a̱ ni iin na̱ kivi chikaa̱ ku̱a̱chi-ñaʼá”. ¿Ndáaña kúni̱ kachi ña̱yóʼo? Ña̱yóʼo kúni̱ kachiña ña̱ kǒo keʼéna ña̱ kini tasaá kǒo ka̱ʼa̱nna xa̱ʼa̱na ña̱ kéʼéna ku̱a̱chi kini. Sava yichi̱ inkana kivi chikaa̱na ku̱a̱chi miíyó ña̱ ke̱ʼéyó iin ña̱ʼa, soo su̱ví ña̱ ndixaví kúúña chi saá ke̱ʼéna xíʼin ta̱ Jesús, ta mií ta̱ Jesús ni̱ka̱ʼa̱nra ña̱ saátu keʼéna xíʼin na̱ ndíku̱n miíra (Juan 15:20). Soo na̱ hermano na̱ chíkaa̱ ndee̱ ña̱ keʼéna  ña̱ va̱ʼa nda̱a̱ táki̱ʼva ke̱ʼé ta̱ Jesús, ka̱ʼa̱n va̱ʼana xa̱ʼa̱na ti̱xin congregación (Mat. 11:19).

19. ¿Ndáaña kúni̱ kachi ña̱ iin kuití xíniñúʼu koo ñá síʼi ta̱a?

¹⁹ Ta̱ kúni̱ koo siervo ministerial iin kuití xíniñúʼu koo ñá síʼira. Xíniñúʼu ixato̱ʼóra ña̱ káʼa̱n Jehová ta iin kuití xíniñúʼu koo ñá síʼira (Mat. 19:​3-9). Iin ta̱ ndásakáʼnu Jehová ta̱ xa̱a̱ ti̱ndaʼa̱ kǒo xíniñúʼu ku̱su̱nra xíʼin inka ñaʼá (Heb. 13:4). Iinlá ñá síʼira xíniñúʼu kuni̱ra kunira ta kǒo xíniñúʼu ka̱ʼa̱n livira xíʼin inka ñaʼá (Job 31:1).

20. ¿Ndáaña kéʼé iin ta̱a ta̱ viíní kíʼin kuenta xíʼin na̱ veʼera?

²⁰ Inka ña̱ xíniñúʼu keʼé na̱ siervo ministerial kúú ña̱ xíniñúʼu viíní kiʼinna kuenta xíʼin na̱ veʼena ta saátu xíʼin na̱ va̱lí se̱ʼena. Ndiʼi ta̱a ta̱ xa̱a̱ ti̱ndaʼa̱ xíniñúʼu viíní kuniʼira yichi̱ nu̱ú na̱ veʼera. Ndiʼi semana xíniñúʼu kaʼvira xíʼinna, ta xíniñúʼu chikaa̱ra ndee̱ ña̱ kee ni̱ʼira predicación xíʼinna. Saátu xíniñúʼu chindeétáʼanra xíʼin na̱ va̱lí se̱ʼera ña̱ vií kutáʼanna xíʼin Jehová (Efes. 6:4). Iin ta̱a ta̱ va̱ʼaní níʼi yichi̱ nu̱ú na̱ veʼera va̱ʼaní kundaara na̱ congregación (kivi nandukún ña̱ káʼa̱n 1 Timoteo 3:5).

21. ¿Ndáaña kivi keʼún tá ta̱ʼán koún siervo ministerial?

²¹ Tá kúma̱ní xa̱ún koún siervo ministerial káʼa̱nndi̱ xíʼún ña̱ ka̱ʼún xíʼin Jehová ta kaʼviún ña̱ va̱xi nu̱ú artículo yóʼo. Koto ndáa requisito kúú ña̱ xíniñúʼu sáxi̱nu iin ta̱ hermano ta̱ kúni̱ koo siervo ministerial ta chikaa̱ ndee̱ ña̱ keʼúnña. Kǒo sandákoún ña̱ kuʼvi̱-iniún kuniún Jehová ta saátu ña̱ kuʼvi̱-iniún kuniún na̱ hermano. Ña̱yóʼo chindeétáʼan xíʼún ña̱ kuni̱ún chindeétáʼún xíʼinna (1 Ped. 4:​8, 10). Chikaa̱ ndee̱ ña̱ xa̱ún koún siervo ministerial, tasaá si̱íníka koún chi kivi chindeétáʼún xíʼin na̱ hermano (Filip. 2:13).