ARTÍCULO ÑA̱ KAʼVIYÓ 45
YAA 138 Ndáyáʼviní na̱ xa̱a̱ ku̱chée
Ña̱ ni̱ka̱ʼa̱n na̱ ta̱a na̱ xi̱ndasakáʼnu Jehová
“Ndíchiní na̱ yiví na̱ xa̱a̱ chée ta ku̱a̱ʼání ña̱ xíni̱ na̱ yiví na̱ xa̱a̱ ku̱a̱ʼá ku̱i̱ya̱” (JOB 12:12).
TEMA
Tá ná kuniso̱ʼoyó ña̱ káʼa̱n Jehová, ku̱a̱ʼání ña̱ va̱ʼa ndakiʼinyó tiempo vitin ta chí nu̱únínu kivi kutakuyó ndiʼi tiempo.
1. ¿Ndáana kivi chindeétáʼan xíʼinyó?
NDIʼIYÓ xíniñúʼu ña̱ chindeétáʼanna xíʼinyó ña̱ va̱ʼa ndaka̱xinyó ña̱ keʼéyó. Ta na̱ anciano xíʼin inka na̱ hermano na̱ xu̱xa-ini xíʼin tu̱ʼun Ndióxi̱ kúú na̱ kivi chindeétáʼan xíʼinyó. Ná kǒo ndakanixi̱níyó ña̱ kǒo chindeétáʼankaví consejona xíʼinyó chi xa̱a̱ yatáníña. Saáchi Jehová kúni̱ra ña̱ ná sakúaʼayó xíʼin ña̱ ndo̱ʼo na̱ xa̱a̱ chée, saáchi na̱yóʼo xa̱a̱ ku̱a̱ʼání ku̱i̱ya̱na xa̱ʼa̱ ña̱kán xíni̱nína ta ndíchinína (Job 12:12).
2. ¿Ndáaña sakúaʼayó nu̱ú artículo yóʼo?
2 Tiempo xi̱naʼá, Jehová xi̱niñúʼura na̱ ta̱a na̱ xa̱a̱ chée na̱ nda̱kú ni̱xi̱yo ini xíʼinra ña̱ va̱ʼa chikaa̱na ndee̱ xíʼin na̱ ñuura ta saátu ña̱ kuniʼina yichi̱ nu̱úna. Ná ndakaʼányó xa̱ʼa̱ ta̱ Moisés, ta̱ David xíʼin ta̱ apóstol Juan. Xa̱a̱ síín tiempo ni̱xi̱yo iin tá iinna ta xa̱a̱ síín tu̱ndóʼo ni̱ya̱ʼana nu̱ú, ña̱kán tá xa̱a̱ ku̱nu̱mí kuvina va̱ʼaní consejo ta̱xina ndaʼa̱ na̱ válíka. U̱ni̱ saá na̱ ta̱a yóʼo ni̱ka̱ʼa̱nna ña̱ ndáyáʼviní kuniso̱ʼoyó Jehová, ta Jehová ta̱xira ña̱ ni̱ka̱ʼyi̱ ña̱ ni̱ka̱ʼa̱n na̱yóʼo nu̱ú tu̱ʼunra ña̱ va̱ʼa chindeétáʼanña xíʼinyó, kúúyó na̱ xa̱a̱ chée á na̱ va̱lí (Rom. 15:4; 2 Tim. 3:16). Nu̱ú artículo yóʼo sakúaʼayó xa̱ʼa̱ ña̱ ni̱ka̱ʼa̱n u̱ni̱ saá na̱ ta̱a yóʼo tá si̱lóʼo kúma̱níka kuvina ta saátu kotoyó ndáaña kivi sakúaʼayó xíʼin ña̱ ni̱ka̱ʼa̱nna.
“KU̱A̱ʼÁNÍ TIEMPO KUTAKUNDÓ”
3. ¿Ndáa ki̱ʼva xi̱niñúʼu Jehová ta̱ Moisés?
3 Nda̱kúní ni̱xi̱yo ini ta̱ Moisés xíʼin Jehová. Ta̱yóʼo xi̱kuura profeta xíʼin juez, ka̱ʼyira tu̱ʼun Ndióxi̱ ta xi̱niʼira yichi̱ nu̱ú na̱ soldado, ña̱kán ku̱a̱ʼáníva ña̱ʼa xi̱xini̱ra. Xi̱niʼira yichi̱ nu̱ú na̱ ñuu Israel tá ke̱ena ñuu Egipto ta xi̱nira ku̱a̱ʼání milagro ña̱ ke̱ʼé Jehová. Ña̱kán Jehová xi̱niñúʼurara ña̱ ka̱ʼyira u̱ʼu̱n libro ña̱ va̱xi nu̱ú Biblia, ka̱ʼyira Salmo 90 ta sananí ka̱ʼyitura ña̱ Salmo 91. Ta sana ka̱ʼyitura tutu ña̱ Job.
4. ¿Ndáana ta̱xi ta̱ Moisés consejo ndaʼa̱, ta nda̱chun ke̱ʼéraña?
4 Tá xa̱a̱ kúúmií ta̱ Moisés 120 ku̱i̱ya̱ ta xa̱a̱ ku̱nu̱mí kuvira, nda̱chitáʼanra ndiʼi na̱ israelita ña̱ va̱ʼa sandákaʼánrana xa̱ʼa̱ ndiʼi ña̱ xi̱nina. Saáchi tá ni̱xi̱yo válí sava na̱yóʼo, xi̱nina milagro ña̱ ke̱ʼé Jehová ta saátu xi̱nina ndáa ki̱ʼva ta̱xira castigo ndaʼa̱ na̱ ñuu Egipto (Éx. 7:3, 4). Na̱yóʼo ni̱ya̱ʼana ma̱ʼñú tá mar Rojo ta xi̱nina ndáa ki̱ʼva ndi̱ʼi-xa̱ʼa̱ na̱ soldado ta̱ faraón (Éx. 14:29-31). Tá xa̱a̱ ñúʼuna nu̱ú ñuʼú yi̱chí, ki̱ʼinna kuenta ña̱ kǒo nda̱a̱ ni iin ña̱ʼa níxi̱kuma̱ní nu̱úna, saáchi mií Jehová ki̱ʼin kuenta xíʼinna (Deut. 8:3, 4). Tá xa̱a̱ ku̱nu̱mí ki̱ʼvina nu̱ú ñuʼú ña̱ ni̱ka̱ʼa̱n Jehová taxira ndaʼa̱na, ta̱ Moisés ni̱ka̱ʼa̱nra tu̱ʼun ña̱ chi̱kaa̱ní ndee̱ xíʼinna. a
5. ¿Ndáaña va̱ʼaní ni̱ka̱ʼa̱n ta̱ Moisés ndakiʼin na̱ ñuu Israel? (Deuteronomio 30:19, 20).
5 ¿Ndáaña ni̱ka̱ʼa̱n ta̱ Moisés xíʼinna? (Kaʼvi Deuteronomio 30:19, 20). b Ku̱a̱ʼání ña̱ va̱ʼa xi̱ndatu na̱ ñuu Israel ndakiʼinna. Mií Jehová taxi bendición ndaʼa̱na ta ku̱a̱ʼání tiempo kundoona nu̱ú ñuʼú ña̱ ni̱ka̱ʼa̱nra taxira ndaʼa̱na. Ta, ¿ndáa ki̱ʼva ni̱xi̱yo ñuʼú kán? Va̱ʼaní ni̱xi̱yoña ta va̱ʼaní xi̱kana ña̱ʼa nu̱úña. Ta̱ Moisés ni̱ka̱ʼa̱nra xíʼin na̱ ñuu Israel ndáa ki̱ʼva ni̱xi̱yo ñuʼú yóʼo, ka̱chira: “Iin ñuʼú nu̱ú íyo ñuu náʼnu ña̱ va̱ʼaní ña̱ va̱ása ní ixava̱ʼandó, nu̱ú íyo veʼe ña̱ kúúmií ku̱a̱ʼání ña̱ʼa ña̱ va̱ʼa ña̱ kǒo níkachíñundó xa̱ʼa̱, pozo ña̱ va̱ása níkaandó, tú uva xíʼin tú olivo tú va̱ása níchiʼindó” (Deut. 6:10, 11).
6. ¿Ndáaña ndo̱ʼo na̱ ñuu Israel xa̱ʼa̱ ña̱ kǒo níxiniso̱ʼona ña̱ ni̱ka̱ʼa̱n Jehová?
6 Saátu ni̱ka̱ʼa̱n ta̱ Moisés xíʼin na̱ israelita, ña̱ tá xi̱kuni̱na kundoona nu̱ú ñuʼú kán xi̱niñúʼu kuniso̱ʼona ña̱ káʼa̱n Jehová. Ta̱ Moisés ni̱ka̱ʼa̱nra xíʼinna ña̱ xíniñúʼu kuniso̱ʼona ña̱ káʼa̱n Jehová tasaá kutakuna. Soo na̱ israelita kǒo níxiniso̱ʼona ña̱ ni̱ka̱ʼa̱n Jehová. Ña̱kán Jehová ta̱xira ña̱ ku̱chiñu na̱ ñuu Asiria ka̱nitáʼanna xíʼinna ta nda̱kiʼinnana ku̱a̱ʼa̱n xíʼinna. Ta tá ni̱ya̱ʼa loʼo tiempo, saátu ke̱ʼé na̱ ñuu Babilonia xíʼinna (2 Rey. 17:6-8, 13, 14; 2 Crón. 36:15-17, 20).
7. ¿Ndáaña sákuaʼayó xíʼin tu̱ʼun ña̱ ni̱ka̱ʼa̱n ta̱ Moisés? (Koto na̱ʼná).
7 ¿Ndáaña sákuaʼayó? Tá ná kuniso̱ʼoyó ña̱ káʼa̱n Jehová, kivi kutakuyó ndiʼi saá tiempo. Na̱ ñuu Israel xi̱niñúʼu kuniso̱ʼona ña̱ ni̱ka̱ʼa̱n Jehová xíʼinna, saáchi xa̱a̱ ku̱nu̱míní ki̱ʼvina nu̱ú ñuʼú ña̱ ni̱ka̱ʼa̱nra taxira ndaʼa̱na, ta saátu miíyó xa̱a̱ ku̱nu̱míní ki̱ʼviyó nu̱ú ñuyǐví xa̱á ña̱ ni̱ka̱ʼa̱n Jehová taxira ndaʼa̱yó. Kán kuniyó ña̱ nduliviní ñuʼú yóʼo (Is. 35:1; Luc. 23:43). Kǒoka ta̱ Ndi̱va̱ʼa xíʼin na̱ ta̱chí ndi̱va̱ʼa koo (Apoc. 20:2, 3). Kǒoka veʼe-ñu̱ʼu vatá koo ta iinlá Jehová ndasakáʼnuyó (Apoc. 17:16). Ta ni kǒoka na̱ chíñu ixandi̱va̱ʼa xíʼin na̱ yiví (Apoc. 19:19, 20). Saátu va̱ása kooka na̱ yiví na̱ keʼé ña̱ kini (Sal. 37:10, 11). Ndiʼi na̱ yiví kuniso̱ʼona ta kandíxana ley ña̱ káʼa̱n Jehová, saáchi ña̱yóʼo kúú ña̱ chindeétáʼan xíʼinyó ña̱ vií kooyó ta vií kutáʼanyó. Xa̱ʼa̱ ña̱kán, ndiʼi na̱ yiví ku̱ʼvi̱-inina kunitáʼanna ta vií kundoona (Is. 11:9). Liviní ña̱ ndátuyó ndakiʼinyó chí nu̱únínu. Soo tá ná kuniso̱ʼoyó ña̱ káʼa̱n Jehová, saá kúú ña̱ kivi kutakuyó ndiʼi saá tiempo nu̱ú ñuyǐví xa̱á (Sal. 37:29; Juan 3:16).
Tá xíniso̱ʼoyó ña̱ káʼa̱n Jehová xíʼinyó, kivi kooyó ndiʼi saá tiempo nu̱ú ñuyǐví xa̱á. (Koto párrafo 7).
8. ¿Ndáaña ke̱ʼé iin ta̱ misionero xa̱ʼa̱ ña̱ nda̱kanixi̱níra xa̱ʼa̱ ña̱ káʼa̱n Ndióxi̱ taxira ndaʼa̱yó chí nu̱únínu? (Judas 20, 21).
8 Tá kǒo nándóso-iniyó xa̱ʼa̱ ña̱ káʼa̱n Ndióxi̱ taxira kooyó ndiʼi saá tiempo chí nu̱únínu, saá kúú ña̱ kuchiñuyó ya̱ʼayó nu̱ú nda̱a̱ ndáaka tu̱ndóʼo ña̱ ná kixi nu̱úyó (kaʼvi Judas 20, 21). Saátu chíndeétáʼanña xíʼinyó ña̱ ya̱ʼayó nu̱ú sava ña̱ʼa ña̱ íxayo̱ʼvi̱ xíʼinyó. Iin ta̱ misionero ta̱ xa̱a̱ ku̱a̱ʼání ku̱i̱ya̱ ndíkaa̱ chí África, xi̱niñúʼu chikaa̱níra ndee̱ ña̱ va̱ása keʼéra iin ña̱ʼa ña̱ kǒo kútóo Jehová saáchi xi̱kuni̱níra keʼéra ña̱yóʼo. Ta̱yóʼo káchira: “Ki̱ʼii̱n kuenta ña̱ tá níkeʼíi̱ ña̱ kini kán, kǒo kivi ni̱ʼíi̱ ña̱ kutakui̱ ndiʼi tiempo. Ña̱kán ni̱ka̱ʼa̱n-ndáʼvii̱ xíʼin Jehová ña̱ ná chindeétáʼanra xíʼi̱n, xa̱ʼa̱ ña̱ chi̱ndeétáʼan Jehová xíʼi̱n va̱ása níkeʼíi̱ ña̱ kini ta kǒo níndi̱ʼi-inii̱”.
“VA̱ʼA KANA NDIʼI ÑA̱ KÉʼÚN”
9. ¿Ndáa tu̱ndóʼo ni̱ya̱ʼa ta̱ David nu̱ú?
9 Iin rey ta̱ va̱ʼaní xi̱kuu ta̱ David, saáchi va̱ʼaní xi̱ndasakáʼnura Jehová, xi̱sakáʼara yaa, xi̱taaraña, xi̱xaʼa̱nra nu̱ú ku̱a̱chi ta saátu xi̱kuura profeta. Ta saátu ku̱a̱ʼání tu̱ndóʼo ni̱ya̱ʼara nu̱ú. Ku̱a̱ʼání ku̱i̱ya̱ xi̱xinura xi̱xikara nu̱ú ta̱ rey Saúl. Tá xa̱a̱ kúúra rey, xi̱nura ku̱a̱ʼa̱nra, saáchi se̱ʼera ta̱ Absalón xi̱kuni̱ra kaʼnírara chi xi̱kuni̱ra koora rey. Soo ni ke̱ʼé ta̱ David ku̱a̱ʼání ña̱ va̱ása va̱ʼa ta ni̱ya̱ʼara nu̱ú ku̱a̱ʼání tu̱ndóʼo, nda̱kúva ni̱xi̱yo inira xíʼin Jehová nda̱a̱ tá ni̱xi̱ʼi̱ra. Jehová ni̱ka̱ʼa̱nra ña̱ xi̱sakúsi̱íní ta̱ David inira. Ña̱kán xíniñúʼu kuniso̱ʼoyó consejo ña̱ ta̱xi ta̱ David (Hech. 13:22; 1 Rey. 15:5).
10. ¿Nda̱chun ta̱xi ta̱ David consejo ndaʼa̱ se̱ʼera ta̱ Salomón?
10 Ná ka̱ʼa̱nyó xa̱ʼa̱ ña̱ ni̱ka̱ʼa̱n ta̱ David xíʼin se̱ʼera ta̱ Salomón. Jehová nda̱kaxinra ta̱ Salomón ña̱ chindeétáʼanra xíʼin na̱ ñuu ña̱ sakúaʼana xa̱ʼa̱ Jehová ta saátu ña̱ ixava̱ʼara iin templo (1 Crón. 22:5). Ku̱a̱ʼáníva tu̱ndóʼo ya̱ʼa ta̱ Salomón nu̱ú, ña̱kán ná kotoyó ndáa consejo ta̱xi ta̱ David ndaʼa̱ra.
11. ¿Ndáaña ni̱ka̱ʼa̱n ta̱ David xíʼin ta̱ Salomón, ta ndáaña ke̱ʼéra tá xa̱a̱ ku̱chéera? (1 Reyes 2:2, 3; koto na̱ʼná).
11 ¿Ndáaña ni̱ka̱ʼa̱n ta̱ David xíʼinra? (Kaʼvi 1 Reyes 2:2, 3). c Ta̱ David ni̱ka̱ʼa̱nra xíʼin se̱ʼera ta̱ Salomón, ña̱ kuniso̱ʼora ndiʼi ña̱ káʼa̱n Jehová xíʼinra tasaá vií kana ndiʼi ña̱ keʼéra. Ta ku̱a̱ʼání ku̱i̱ya̱ chi̱ndeétáʼanva Jehová xíʼinra (1 Crón. 29:23-25). Iin templo ña̱ liviní i̱xava̱ʼa ta̱ Salomón, ku̱a̱ʼá libro ña̱ va̱xi nu̱ú Biblia ka̱ʼyira ta saátu ni̱ka̱ʼa̱nra ña̱ va̱xi nu̱ú inkakaña. Ndiʼina xi̱xini̱ ña̱ ndíchiní ni̱xi̱yora ta xi̱kuumiíra ku̱a̱ʼání ña̱ ku̱i̱ká (1 Rey. 4:34). Soo nda̱a̱ táki̱ʼva ni̱ka̱ʼa̱n yivára ta̱ David xíʼinra, nani xíniso̱ʼora ndiʼi ña̱ káʼa̱n Jehová xíʼinra, va̱ʼa kana ndiʼi ña̱ keʼéra. Soo tá xa̱a̱ ku̱chéera ki̱xáʼara káñúʼura á ndáñu̱ʼura ndióxi̱ vatá. Xa̱ʼa̱ ña̱kán kǒo níchindeétáʼanka Jehová xíʼin ta̱ Salomón ta va̱ása viíka níxaʼndachíñura nu̱ú na̱ ñuu, chi kǒoka ña̱ ndíchi níxi̱kuumiíra (1 Rey. 11:9, 10; 12:4).
Tu̱ʼun ña̱ ni̱ka̱ʼa̱n ta̱ David xíʼin se̱ʼera ta̱ Salomón chíndeétáʼanña xíʼinyó kunda̱a̱-iniyó ña̱ tá xíniso̱ʼoyó ña̱ káʼa̱n Jehová, kivi taxira ña̱ ndíchi ndaʼa̱yó ña̱ va̱ʼa vií koo ña̱ ndaka̱xinyó keʼéyó. (Koto párrafo 11 xíʼin 12). d
12. ¿Ndáaña sákuaʼayó xíʼin tu̱ʼun ña̱ ni̱ka̱ʼa̱n ta̱ David?
12 ¿Ndáaña sákuaʼayó? Tá xíniso̱ʼoyó ña̱ káʼa̱n Jehová xíʼinyó, va̱ʼa kana ndiʼi ña̱ kéʼéyó (Sal. 1:1-3). Kǒo káʼa̱nví Jehová ña̱ taxira ña̱ ndíchi xíʼin ña̱ ku̱i̱ká ndaʼa̱yó, nda̱a̱ táki̱ʼva ta̱xiraña ndaʼa̱ ta̱ Salomón. Soo tá xíniso̱ʼoyó ña̱ káʼa̱nra, taxivara ña̱ ndíchi ndaʼa̱yó ña̱ va̱ʼa vií koo ndiʼi ña̱ ndaka̱xinyó keʼéyó (Prov. 2:6, 7; Sant. 1:5). Ña̱ va̱xi nu̱ú tu̱ʼunra va̱ʼaní chíndeétáʼanña xíʼinyó tá xa̱a̱ ndúkúyó chiñu ña̱ kachíñuyó, ña̱ ndaka̱xinyó ndáaña kaʼviyó, ña̱ kusíkíyó xíʼin ña̱ kǒo kundi̱ʼi̱ní-iniyó xa̱ʼa̱ xu̱ʼún. Tá xíniso̱ʼoyó ña̱ káʼa̱n Jehová xíʼinyó, saá kúú ña̱ va̱ása xo̱ʼvi̱yó chí nu̱únínu (Prov. 2:10, 11). Koo na̱ migoyó na̱ chindeétáʼan xíʼinyó ta saátu si̱íní kooyó xíʼin na̱ veʼeyó.
13. ¿Ndáaña chi̱ndeétáʼan xíʼin ñá Carmen ña̱ ndaka̱xin viíñá ña̱ keʼéñá?
13 Ñá Carmen ñá íyo ñuu Mozambique xi̱ndakanixi̱níñá ña̱ va̱ʼaní kooñá tá ná kaʼvi va̱ʼañá. Ña̱kán ni̱xa̱ʼa̱nñá universidad ña̱ va̱ʼa kooñá arquitecta. Ña̱yóʼo káʼa̱nñá: “Xi̱kutóoníi̱ ña̱ xi̱sanáʼa̱na yi̱ʼi̱. Soo xi̱kunaaníi̱ ta kǒoka tiempo níxikuumií ña̱ keʼíi̱ inka ña̱ʼa. Ka̱a u̱xa̱ sava xi̱ta̱a̱n xi̱kixáʼíi̱ xi̱kaʼvii̱ ta xi̱kei̱ ka̱a i̱ñu̱ xi̱kuaá. Xa̱ʼa̱ ña̱kán xi̱ ixayo̱ʼvi̱níña xíʼi̱n ña̱ ku̱ʼi̱n reunión ta va̱ása níkivika ndasakáʼnui̱ Jehová táki̱ʼva kúni̱ra. Ki̱ʼii̱n kuenta ña̱ xi̱kuni̱i̱ ndasakáʼnui̱ Jehová ta saátu xi̱kuni̱i̱ kaʼvi va̱ʼi̱” (Mat. 6:24). Ña̱kán ni̱ka̱ʼa̱nñá xíʼin Jehová ta na̱ndukúñá ña̱ káʼa̱n xa̱ʼa̱ ña̱yóʼo nu̱ú tutu ña̱ tává na̱ ñuu Ndióxi̱. Ta, ¿ndáaña ku̱u? Ñáyóʼo ni̱ka̱ʼa̱nñá: “Siʼíi̱ xíʼin na̱ anciano va̱ʼaní consejo ta̱xina ndaʼíi̱, ña̱kán kǒo níxiinkai̱ kaʼvii̱ universidad ta ki̱xáʼíi̱ káchíñui̱ ku̱a̱ʼáka tiempo nu̱ú Jehová. Xa̱ʼa̱ ña̱yóʼo vií íyo ña̱ nda̱kaxii̱n keʼíi̱ ta kǒo ndíkó-inii̱ xa̱ʼa̱ ña̱yóʼo”.
14. ¿Ndáa consejo ta̱xi ta̱ Moisés xíʼin ta̱ David?
14 Ta̱ Moisés xíʼin ta̱ David xi̱kuʼvi̱ní-inina xi̱xinina Jehová, ña̱kán xi̱xiniso̱ʼona ña̱ xi̱kaʼa̱nra. Tu̱ʼun ña̱ ni̱ka̱ʼa̱nna tá xa̱a̱ ku̱nu̱mí kuvina chi̱ndeétáʼanña xíʼin na̱ xi̱niso̱ʼoña ña̱ va̱ʼa nda̱kú koo inina xíʼin Jehová. Saátu u̱vi̱ saána ni̱ka̱ʼa̱nna ña̱ kǒo chíndeétáʼanka Jehová xíʼin na̱ kúxíká nu̱úra ta ni kǒo táxikara bendición ndaʼa̱na. Consejo ña̱ ni̱ka̱ʼa̱nna va̱ʼaní chíndeétáʼanña xíʼinyó tiempo vitin. Tá ni̱ya̱ʼa ku̱a̱ʼá tiempo, inka ta̱ va̱ʼaní xi̱ndasakáʼnu Jehová ni̱ka̱ʼa̱nra ña̱ ndáyáʼviní nda̱kú koo iniyó xíʼin Jehová.
“KÚSI̱ÍNÍ-INII̱”
15. ¿Ndáaña xi̱ni ta̱ apóstol Juan?
15 Xi̱kuʼvi̱ní-ini ta̱ Jesús xi̱xinira ta̱ apóstol Juan (Mat. 10:2; Juan 19:26). Ta̱yóʼo ni̱xi̱kara xíʼin ta̱ Jesús ña̱ xi̱natúʼunra xíʼin na̱ yiví, xi̱nira milagro ña̱ ke̱ʼé ta̱ Jesús ta saátu ni̱xi̱yora xíʼinra tá ni̱ya̱ʼara nu̱ú tu̱ndóʼo. Ni̱xi̱yora xíʼin ta̱ Jesús tá xa̱ʼnínara ta saátu xi̱nira tá nda̱takura. Xi̱nira ndáa ki̱ʼva xa̱ʼnu congregación tá siglo nu̱ú ta saátu xi̱nira tá ku̱ndaa̱-ini ndiʼi na̱ yiví xa̱ʼa̱ tu̱ʼun Ndióxi̱ (Col. 1:23).
16. Ña̱ ka̱ʼyi ta̱ Juan, ¿ndáana xa̱a̱ chíndeétáʼanña xíʼin?
16 Tá si̱lóʼo kúma̱ní kuvi ta̱ Juan, ka̱ʼyira sava tutu ña̱ va̱xi nu̱ú tu̱ʼun Ndióxi̱ ta saátu ka̱ʼyira ña̱ ni̱ka̱ʼa̱n ta̱ Jesucristo (Apoc. 1:1). Saátu ka̱ʼyira Evangelio ña̱ Juan xíʼin u̱ni̱ carta. Carta ña̱ u̱ni̱ ka̱ʼyiraña ku̱a̱ʼa̱n nu̱ú iin ta̱ xi̱ndasakáʼnu Ndióxi̱ ta̱ xi̱naní Gayo, ta xi̱kuni̱níra xi̱xinirara (3 Juan 1). Tiempo saá, sana xa̱a̱ ku̱a̱ʼání na̱ hermano xi̱xini̱táʼan ta̱ Juan xíʼin, ta xi̱kuni̱níra xi̱xinirana. Ña̱ ka̱ʼyi ta̱ Juan va̱ʼaní chíndeétáʼanña xíʼin ndiʼi miíyó na̱ ndásakáʼnu Ndióxi̱ nda̱a̱ tiempo vitin.
17. Nda̱a̱ táki̱ʼva káchi 3 Juan 4, ¿ndáaña sákusi̱í-iniyó?
17 ¿Ndáaña ka̱ʼyi ta̱ Juan? (Kaʼvi 3 Juan 4). Ta̱ Juan ni̱ka̱ʼa̱nra ña̱ kúsi̱íní-iniyó tá ndásakáʼnuyó Ndióxi̱. Tá ka̱ʼyira carta ña̱ u̱ni̱, ku̱a̱ʼánína ki̱xáʼana sánáʼa̱na ña̱ vatá ta ki̱xáʼa táʼví táʼanna. Soo inkana va̱ʼaníva xi̱ndasakáʼnuna Jehová ta xi̱keʼéna ndiʼi ña̱ xi̱kaʼa̱nra xíʼinna (2 Juan 4, 6). Ña̱kán xi̱kusi̱íní-ini ta̱ Juan xíʼin ña̱ xi̱keʼéna ta saátu xi̱kusi̱íní-ini Jehová xíʼinna (Prov. 27:11).
18. ¿Ndáaña kivi sakúaʼayó xíʼin ña̱ ni̱ka̱ʼa̱n ta̱ Juan?
18 ¿Ndáaña sákuaʼayó? Tá nda̱kú íyo iniyó xíʼin Jehová saá kúú ña̱ si̱í íyoyó (1 Juan 5:3). Tá kúú, kúsi̱íní-iniyó saáchi xíni̱yó ña̱ sákusi̱íyó-ini Jehová. Kúsi̱íní-ini Jehová tá xítora ña̱ kǒo kéʼéyó ña̱ kini ña̱ kéʼé na̱ yiví ta iinlá miíra nda̱kú íyo iniyó xíʼin (Prov. 23:15). Saátu kúsi̱íní-ini na̱ ángel xíʼin ña̱ kéʼéyó (Luc. 15:10). Ta kúsi̱íní-iniyó tá xítoyó ña̱ nda̱kú íyo ini na̱ hermano tá yáʼana nu̱ú tu̱ndóʼo á tentación (2 Tes. 1:4). Ña̱kán tá ná ndiʼi-xa̱ʼa̱ ndiʼi na̱ yiví na̱ kéʼé ña̱ kini, saá kusi̱íní-iniyó saáchi nda̱kú ni̱xi̱yo iniyó xíʼin Jehová.
19. ¿Ndáaña ni̱ka̱ʼa̱n iin ñá hermana xa̱ʼa̱ ña̱ sánáʼa̱yó na̱ yiví xa̱ʼa̱ Ndióxi̱? (Koto na̱ʼná).
19 Kúsi̱íní-iniyó tá nátúʼunyó xíʼin inkana xa̱ʼa̱ tu̱ʼun Ndióxi̱. Ñá Rachel, ñá íyo ñuu República Dominicana káʼa̱nñá ña̱ kúsi̱íní-iniñá tá nátúʼunñá xíʼin inkana xa̱ʼa̱ ña̱ káʼa̱n tu̱ʼun Ndióxi̱. Ña̱yóʼo káʼa̱nñá xa̱ʼa̱ na̱ káʼviñá xíʼin: “Tá xítoi̱ ña̱ kíxáʼa na̱ káʼvii̱ xíʼin kúʼvi̱-inina xínina Jehová, kúsi̱íní-inii̱. Saáchi kíʼii̱n kuenta ña̱ kíxáʼana ndáa-ininara ta násamana ña̱ kéʼéna ña̱ va̱ʼa sakúsi̱ína-inira. Sava yichi̱ xi̱ ixayo̱ʼvi̱ña xíʼi̱n ña̱ ku̱ʼi̱n kaʼvii̱ xíʼinna, soo vitin kúsi̱íní-inii̱ saáchi kúʼvi̱ní-inina xínina Jehová”.
Kúsi̱íní-iniyó tá sánáʼa̱yó inkana ña̱ kuʼvi̱-inina kunina Jehová ta kandíxana ña̱ káʼa̱nra. (Koto párrafo 19).
¿NDÁAÑA SÁKUAʼAYÓ XÍʼIN ÑA̱ NI̱KA̱ʼA̱N TA̱ MOISÉS, TA̱ DAVID XÍʼIN TA̱ JUAN?
20. ¿Ndáaña kúú ña̱ inkáchi kéʼéyó xíʼin ña̱ xi̱keʼé ta̱ Moisés, ta̱ David xíʼin ta̱ Juan?
20 Síínní ni̱xi̱yo na̱ yiví tiempo ña̱ ni̱xi̱yo ta̱ Moisés, ta̱ David xíʼin ta̱ Juan, nu̱ú tiempo ña̱ ndóo miíyó vitin. Soo inkáchi íyo ña̱ kéʼéyó xíʼin ña̱ ke̱ʼé ta̱ Moisés, ta̱ David xíʼin ta̱ Juan, chi ndásakáʼnuyó Jehová nda̱a̱ táki̱ʼva xi̱keʼé na̱kán. Xi̱kaʼa̱nna xíʼin Jehová, xi̱ndaa-ininara ta xi̱kaʼa̱nna xíʼinra ña̱ chindeétáʼanra xíʼinna ta saátu íyo ña̱ kéʼé miíyó tiempo vitin. Saáchi ta̱ Moisés, ta̱ David xíʼin ta̱ Juan xi̱kandíxanína ña̱ táxi Jehová bendición ndaʼa̱ na̱ xíniso̱ʼo ña̱ káʼa̱nra ta saátu íyo ña̱ kándíxa miíyó.
21. ¿Ndáaña va̱ʼa ndakiʼin na̱ xíniso̱ʼo consejo ña̱ ni̱ka̱ʼa̱n ta̱ Moisés, ta̱ David xíʼin ta̱ Juan?
21 Ná kuniso̱ʼoyó consejo ña̱ ta̱xi u̱ni̱ saá na̱ ta̱a yóʼo, ta ná kandíxayó ta keʼéyó ña̱ káʼa̱n Jehová xíʼinyó. Saá kúú ña̱ viíní kana ña̱ kúni̱yó keʼéyó ta kivi kutakuyó ndiʼi saá tiempo (Deut. 30:20). Ta va̱ʼaní kúniyó chi sákusi̱íyó-ini yiváyó Jehová, chi ndiʼi ña̱ káʼa̱nra sáxi̱nuraña. Ku̱a̱ʼání bendición taxi Jehová ndaʼa̱yó chí nu̱únínu (Efes. 3:20).
YAA 129 Ndakúní íyo iniyó
a Ku̱a̱ʼání na̱ israelita na̱ xi̱ni milagro ña̱ ke̱ʼé Jehová mar Rojo va̱ása níki̱ʼvina nu̱ú ñuʼú ña̱ ni̱ka̱ʼa̱nra taxira ndaʼa̱na, chi ni̱xi̱ʼi̱vana (Núm. 14:22, 23). Jehová ni̱ka̱ʼa̱nra ña̱ na̱ xi̱kuumií 20 ku̱i̱ya̱ á ku̱a̱ʼáka kuvina nu̱ú ñuʼú yi̱chí (Núm. 14:29). Soo ta̱ Josué, ta̱ Caleb xíʼin inkaka na̱ válíka xíʼin na̱ tribu ta̱ Leví kǒo níxi̱ʼi̱vína, chi xi̱nina ndáa ki̱ʼva ni̱xi̱nu ña̱ ni̱ka̱ʼa̱n Jehová. Ta ña̱yóʼo ni̱xi̱nuña tá ni̱ya̱ʼa na̱ israelita yu̱ta Jordán ta ni̱ki̱ʼvina nu̱ú ñuʼú ña̱ Canaán (Deut. 1:24-40).
b Deuteronomio 30:19, 20: “Ndiʼi na̱ íyo chí ndiví xíʼin na̱ íyo nu̱ú ñuʼú yóʼo kúúna testigo ña̱ táxii̱ ná ndaka̱xinndó á kúni̱ndó kutakundó á kúni̱ndó kuvindó, á kúni̱ndó ndakiʼinndó bendición á kúni̱ndó ndakiʼinndó chiʼña. Ta ña̱ va̱ʼa kutaku miíndó xíʼin na̱ se̱ʼendó na̱ kaku chí nu̱únínu, xíniñúʼu ndaka̱xinndó ña̱ kutakundó, 20 kuʼvi̱-inindó kunindó Jehová Ndióxi̱ndó, kuniso̱ʼondó ña̱ káʼa̱nra ta va̱ása sandákoondóra, saáchi miíra kúú ta̱ táxi ña̱ tákundó ta taxira ña̱ naʼá kundoondó nu̱ú ñuʼú ña̱ ni̱ka̱ʼa̱n Jehová taxira ndaʼa̱ ta̱ Abrahán, ta̱ Isaac xíʼin ta̱ Jacob, na̱ táʼanndó na̱ xi̱ndoo xi̱naʼá”.
c 1 Reyes 2:2, 3: “Yi̱ʼi̱ xa̱a̱ ku̱nu̱míva kuvii̱, ña̱kán ndakú va̱ʼa koún ta ta̱a va̱ʼa koún. 3 Xíniñúʼu kandíxaún Jehová Ndióxi̱ún, ta kundiku̱ún yichi̱ra, chiñu ña̱ xáʼndara ta saátu ley ña̱ ta̱xira, nda̱a̱ táki̱ʼva xa̱a̱ ni̱ka̱ʼyi̱ña nu̱ú Ley ta̱ Moisés. Saá kúú ña̱ va̱ʼaní kana ndiʼi ña̱ keʼún ni nda̱a̱ ndáaka nu̱ú ná ku̱ʼún”.
d ÑA̱ KÁʼA̱N XA̱ʼA̱ NA̱ʼNÁ: Ndaʼa̱ yitin: Ta̱ David táxira consejo ndaʼa̱ se̱ʼera ta̱ Salomón. Ndaʼa̱ kúaʼa: Ku̱a̱ʼání ña̱ʼa sákuaʼa na̱ hermano ti̱xin Escuela Nu̱ú Sákuaʼa na̱ Precursor.
