¿Ndáaña kivi keʼún ña̱ va̱ʼa kaʼvi ni̱ʼún tu̱ʼun Ndióxi̱?
¿Á ÍXAYO̱ʼVI̱ÑA xíʼún kaʼviún tu̱ʼun Ndióxi̱ ndiʼi semana? ¿Á kúxuxaún kaʼviúnña? Ku̱a̱ʼánívayó ndóʼo ña̱yóʼo sava yichi̱. Íyo ku̱a̱ʼání ña̱ kéʼéyó ndiʼi ki̱vi̱, soo xíniñúʼu taváyó tiempo ña̱ keʼéyó sava ña̱ ndáyáʼviní, tá kúú ña̱ kuchuyó. Ta va̱ʼaní kúniyó tá xa̱a̱ ndíʼi chíchiyó. Saátu íyo ña̱ káʼviyó Biblia, chi tá xa̱a̱ ndíʼi káʼviyóña va̱ʼaní kúniyó (Efes. 5:26). Ña̱ va̱xi yóʼo kivi chindeétáʼan xíʼún:
Keʼé iin programa ña̱ chindeétáʼan xíʼún ña̱ va̱ʼa kaʼviún ndiʼi ki̱vi̱. Iin tá iin miíyó na̱ ndásakáʼnu Jehová xíniñúʼu kaʼviyó tu̱ʼun Ndióxi̱ ndiʼi ki̱vi̱ chi ndáyáʼviníña (Filip. 1:10). Ña̱ va̱ʼa kǒo nandósó-iniún ña̱ kaʼviún Biblia, nu̱ú iin tutu kivi kaʼyíún ki̱vi̱ xíʼin hora ña̱ nda̱kaxiún kaʼviún ta chinúuña iin lugar nu̱ú kivi kuniúnña. Kivitu chika̱ún á chinúún alarma nu̱ú teléfono ña̱ va̱ʼa sandákaʼánña yóʼó hora ña̱ xíniñúʼu kaʼviún.
Koto ndáaña va̱ʼaka chindeétáʼan xíʼún. Savana kútóona kaʼvina ku̱a̱ʼání tiempo, soo inkana loʼova tiempo kútóona kaʼvina. Ta yóʼó, ¿nda̱saa tiempo kútóún kaʼviún? Kiʼin kuenta xíʼin ña̱yóʼo tá xa̱a̱ ndáka̱xiún nda̱saa tiempo kaʼviún. Tá xa̱a̱ ki̱xaa̱ hora ña̱ kaʼviún soo kǒo káchi-iniún keʼún ña̱yóʼo, ¿ndáaña kivi keʼún? Kivi kaʼviún 10 minuto kuití. Ña̱ nda̱a̱, loʼo minuto kúúña, soo va̱ʼaníka ña̱ loʼo kuití ná kaʼviún nu̱úka ña̱ kǒo kaʼviún. Tá xa̱a̱ ná kixáʼún kaʼviún sana kuni̱kavaún kaʼviún ku̱a̱ʼá tiempo (Filip. 2:13).
Ya̱chi̱ka ndaka̱xiún ña̱ kúni̱ún kaʼviún. Ña̱ va̱ʼa viíní kuniñúʼún tiempo ña̱ nda̱kaxiún kaʼviún, xa̱a̱ ya̱chi̱ka ndaka̱xiún ndáaña kúni̱ún kaʼviún xa̱ʼa̱ (Efes. 5:16). Kivi kaʼyíún nu̱ú iin tutu ña̱ kúni̱ún kaʼviún xa̱ʼa̱. Tá íyo iin ña̱ kúni̱ún kunda̱a̱-iniún xa̱ʼa̱, kaʼyíña. Saátu tá íyo inka ña̱ʼa ña̱ kúni̱ún nandukún kivi kaʼyíúnña, ta inka ki̱vi̱ kivi kaʼviún xa̱ʼa̱ña.
Kivi nasamaún ki̱vi̱ ña̱ kaʼviún. Ndiʼi semana xíniñúʼu kaʼviún. Soo tá kǒo níkivi kaʼviún ki̱vi̱ ña̱ xa̱a̱ nda̱kaxiún kiviva nasamaúnña, saátu hora xíʼin ña̱ kúni̱ún kaʼviún xa̱ʼa̱.
Ku̱a̱ʼáníva ña̱ va̱ʼa ndakiʼún tá ná kaʼviún Biblia ndiʼi ki̱vi̱. Saáchi va̱ʼaníka xa̱ún kutáʼún xíʼin Jehová, vií koo ña̱ ndaka̱xiún keʼún ta va̱ʼaníka kuniún (Jos. 1:8).
