1. ¿Nda̱chun xíniñúʼu ndasakáʼnuyó iinlá mií Jehová?

IINLÁ mií Jehová kúú ta̱ xíniñúʼu ndasakáʼnuyó, chi i̱xava̱ʼara miíyó ta ta̱xira ña̱ tákuyó (Apoc. 4:11). Soo ni kúʼvi̱-iniyó xíniyó Jehová ta íxato̱ʼóyóra, íyo sava ña̱ʼa ña̱ kivi kasi nu̱úyó ña̱ iinlá miíra ndasakáʼnuyó. Ta ña̱ va̱ása kundoʼoyó ña̱yóʼo, xíniñúʼu kunda̱a̱-iniyó nda̱saa kivi kuuña. Soo, siʼna ná kotoyó ndáaña kúni̱ kachi ña̱ iinlá mií Jehová ndasakáʼnuyó.

2. Nda̱a̱ táki̱ʼva káchi Éxodo 34:14, tá iinlá mií Jehová ndásakáʼnuyó, ¿ndáaña va̱ása keʼéyó?

² Ña̱ Biblia chítáʼanña ña̱ kúʼvi̱ní-iniyó xíniyó Jehová xíʼin ña̱ iinlá miíra ndasakáʼnuyó. Ta va̱ása xíniñúʼu kúʼvi̱ka-iniyó kuniyó inkaka ña̱ʼa nu̱úka ña̱ kuʼvi̱-iniyó kuni̱yó Jehová (kaʼvi Éxodo 34:14). *

3. ¿Ndáa xa̱ʼa̱ kúú ña̱ iinlá mií Jehová ndásakáʼnuyó?

³ Iinlá mií Jehová ndásakáʼnuyó, xa̱ʼa̱ ña̱ sa̱kuaʼayó ku̱a̱ʼání ña̱ʼa xa̱ʼa̱ra. Ni̱xa̱a̱yó ku̱nda̱a̱-iniyó xa̱ʼa̱ ña̱ va̱ʼa ña̱ kúúmiíra. Xíni̱yó ndáaña kútóora ta ndáaña va̱ása kútóora, ta kúni̱yó keʼéyó ña̱ káʼa̱nra. Kúnda̱a̱-iniyó ndáaña kúni̱ra taxira ndaʼa̱yó ta kúni̱yó chindeétáʼanyó xíʼinra, ta tákuyó nda̱a̱ táki̱ʼva kúni̱ra. Saátu kúsi̱íní-iniyó xa̱ʼa̱ ña̱ táxira ña̱ kooyó migora (Sal. 25:14). Ndiʼi ña̱ sákuaʼayó xa̱ʼa̱ra sákuyatinkaña miíyó nu̱úra (Sant. 4:8).

4. a) ¿Ndáaña xíniñúʼu ta̱ Ndi̱va̱ʼa ña̱ sandáʼvira miíyó ña̱ va̱ása ndasakáʼnuyó iinlá mií Jehová? b) ¿Ndáaña sakuaʼayó nu̱ú ña̱ artículo yóʼo?

 ⁴ Ta̱ Ndi̱va̱ʼa kúú ta̱ ndísochíñu xíʼin ña̱ ñuyǐví yóʼo, ta xíniñúʼuraña ña̱ sandáʼvira miíyó ña̱ keʼéyó ña̱ kúni̱ miíyó (Efes. 2:1-3; 1 Juan 5:19). Kúni̱ra ná xa̱a̱yó kuʼvi̱ka-iniyó kuni̱yó inkaka ña̱ʼa, ta va̱ása ndasakáʼnuyó iinlá mií Jehová. Ná kotoyó u̱vi̱ ña̱ kivi kuniñúʼura ña̱ keʼéra ña̱yóʼo xíʼinyó. Ña̱ nu̱ú, kúni̱ra ná xa̱a̱yó kuni̱yó koo ku̱a̱ʼání ña̱ ku̱i̱káyó. Ta ña̱ u̱vi̱, kúni̱ra ña̱ va̱ása vií ndaka̱xinyó ña̱ kotonde̱ʼéyó á ña̱ kusíkíyó.

5. ¿Nda̱chun xíniñúʼu kiʼinyó kuenta ña̱ va̱ása kuni̱yó koo ku̱a̱ʼání xu̱ʼúnyó?

⁵ Ndiʼiyó kúni̱yó ná va̱ása kuma̱ní ña̱ kuxuyó, ti̱ko̱to̱yó xíʼin veʼe nu̱ú kooyó. Soo xíniñúʼu kiʼinyó kuenta ña̱ va̱ása kuni̱yó koo ku̱a̱ʼání xu̱ʼúnyó. Tiempo vitin, ku̱a̱ʼání na̱ yiví kútóonína koo ku̱a̱ʼání xu̱ʼúnna, xíʼin ndiʼi ña̱ kivi satána xíʼin ña̱yóʼo (2 Tim. 3:2). Ta̱ Jesús xi̱kunda̱a̱-inira ña̱ na̱ ndíku̱n-ñaʼá kivi kuni̱na koo ku̱a̱ʼá xu̱ʼúnna, xa̱ʼa̱ ña̱kán ni̱ka̱ʼa̱nra: “Ni iinna kǒo kívi kachíñu nu̱ú u̱vi̱ patrón; saáchi sa̱a̱-inina kunina iinra ta kuʼvi̱-inina kunina inkara. Ndóʼó kǒo kívi kachíñundó nu̱ú Ndióxi̱ ta kachíñundó ña̱ koo ña̱ ku̱i̱kándó” (Mat. 6:24). Na̱ ndásakáʼnu Ndióxi̱, ta xíniñúʼuna ku̱a̱ʼání tiempo xíʼin ndee̱na ña̱ koo ña̱ ku̱i̱kána, nda̱a̱ táki̱ʼva íyo na̱ káchíñu nu̱ú u̱vi̱ patrón saá íyona. Ta va̱ása ndásakáʼnuna iinlá mií Jehová.

6. ¿Ndáaña sákuaʼayó xíʼin ña̱ ni̱ka̱ʼa̱n ta̱ Jesús xíʼin na̱ congregación ña̱ Laodicea?

⁶ Tá xa̱a̱ kúni̱ ndiʼi ña̱ siglo nu̱ú, na̱ cristiano ña̱ congregación ña̱ ñuu Laodicea ni̱nuní xi̱kunina xa̱ʼa̱ ña̱ ni̱xi̱yo ku̱a̱ʼání xu̱ʼúnna, xa̱ʼa̱ ña̱ ni̱xi̱yo ku̱a̱ʼání ña̱ ku̱i̱kána va̱ása níxixiniñúʼuna nda̱a̱ ni iin ña̱ʼa. Soo nu̱ú Jehová xíʼin ta̱ Jesús ni̱xi̱yona nda̱a̱ táki̱ʼva íyo na̱ ñúʼu ndaʼa̱  tu̱ndóʼo, na̱ chíʼñaní náʼa̱, na̱ ndáʼvi, na̱ va̱ása túvi nu̱ú, na̱ íyo chálá. Ta̱ Jesús va̱ása nítaxira consejo ndaʼa̱na xa̱ʼa̱ ña̱ kúúna na̱ ku̱i̱ká, chi xa̱ʼa̱ ña̱ kúni̱na koo ku̱a̱ʼáka ña̱ ku̱i̱kána kúúña, ta ña̱ kítáʼanna xíʼin Jehová va̱ása viíka íyoña (Apoc. 3:14-17). Tá kíʼinyó kuenta ña̱ xa̱a̱ ki̱xáʼa kutóoyó koo ku̱a̱ʼá ña̱ʼayó, xíniñúʼu kama sandiʼi-xa̱ʼa̱yó ña̱yóʼo (1 Tim. 6:7, 8). Tá va̱ása kéʼéyó ña̱yóʼo, níma̱yó kivi kixáʼaña ndataʼvíña, ta Jehová va̱ása kutóokara ndáa ki̱ʼva ndásakáʼnuyóra, chi kúni̱ra ña̱ iinlá miíra ná ndasakáʼnuyó (Deut. 4:24). ¿Ndáa ki̱ʼva kivi kixáʼayó kutóoníyó koo xu̱ʼúnyó?

7-9. ¿Ndáaña sákuaʼayó xíʼin ña̱ ndo̱ʼo iin ta̱ anciano ta̱ naní David?

⁷ Ná kotoyó ña̱ ndo̱ʼo iin ta̱ anciano ta̱ naní David, ta̱ kíʼinní kuenta xíʼin ña̱ kéʼéra, ta̱ íyo chí Estados Unidos. Miíra káʼa̱n ña̱ kúúra iin ta̱ va̱ʼaní káchíñu. Ta xíʼin empresa nu̱ú xi̱kachíñura, xi̱kuumiíra iin chiñu ña̱ va̱ʼaní, ta ni̱xa̱a̱ra ku̱ura iin ta̱ va̱ʼaní xíni̱ keʼé ña̱ chiñu yóʼo ña̱ país kán. Káchira: “Tá tiempo saá nda̱kanixi̱níi̱ ña̱ ndiʼi ña̱kán xi̱kuuña bendición Jehová”. Soo, ¿á saá ni̱xi̱yoña?

⁸ Ta̱ David ki̱ʼinra kuenta ña̱ chiñu ña̱ kúúmiíra ki̱xáʼaña sándiʼi-xa̱ʼa̱ña ña̱ vií kítáʼanra xíʼin Jehová. Káchira: “Tá xi̱xa̱ʼi̱n reunión xíʼin predicación, nina xa̱ʼa̱ chiñu xi̱ndakanixi̱níi̱. Ku̱a̱ʼání xu̱ʼún xi̱kiʼi̱n, soo ndeéka ki̱xáʼa ndíʼi̱-inii̱ ta ki̱xáʼíi̱ kúúmiíi̱ ku̱a̱chi xíʼin ñá síʼíi̱”.

⁹ Tasaá, ta̱ David ki̱ʼinra kuenta ña̱ xíniñúʼu kotora ndáaña kúú ña̱ ndáyáʼvika nu̱úra. Káchira: “Chi̱ka̱a̱-inii̱ ña̱ nasamai̱ ña̱ ndóʼi̱”. Tasaá ki̱xáʼara ndákanixi̱níra ndáa ki̱ʼva kivi nasamara hora ña̱ káchíñura, ta ni̱ka̱ʼa̱nra xíʼin ta̱ káchíñura nu̱ú xa̱ʼa̱ ña̱yóʼo. Soo ta̱ káchíñura nu̱ú va̱ása nítaxikara ña̱ kachíñura. Ta, ¿ndáaña ke̱ʼéra? Káchira: “Tá inka ki̱vi̱, nda̱taxii̱ solicitud ña̱ koi̱ precursor auxiliar”. Ta ña̱ va̱ʼa koo ña̱ xíniñúʼuna, miíra xíʼin ñá síʼíra ki̱xáʼana kéʼéna  chiñu ña̱ limpieza. Tá ni̱ya̱ʼa loʼo tiempo, ta̱ David ki̱xáʼara kúúra precursor regular, ta tá ni̱ya̱ʼa loʼo saátu ñá síʼíra ki̱xáʼañá kúúñá precursora. Ta nda̱ka̱xinna keʼéna iin chiñu ña̱ va̱ása kútóo ku̱a̱ʼání na̱ yiví keʼéna, soo su̱ví ña̱yóʼo kúú ña̱ ndáyáʼvika nu̱úna. Ni loʼo kúú xu̱ʼún ña̱ kíʼinna vitin nu̱ú ña̱ xi̱kiʼinna tá ya̱chi̱, soo ndiʼi yo̱o̱ kúúmiína ña̱ xíniñúʼuna. Kúni̱na keʼéna ku̱a̱ʼáka chiñu nu̱ú Jehová nu̱úka inkaka ña̱ʼa, saá ku̱nda̱a̱-inina ña̱ ndáara na̱ nándukú siʼnaka Reinora (Mat. 6:31-33).

10. ¿Nda̱saa kivi kundaayó níma̱yó?

¹⁰ Ni loʼo á ku̱a̱ʼá kúú ña̱ʼa ña̱ kúúmiíyó, xíniñúʼu kundaayó níma̱yó. ¿Ndáa ki̱ʼva keʼéyóña? Ña̱ va̱ása kutóoyó koo ku̱a̱ʼání ña̱ ku̱i̱káyó, ta va̱ása taxiyó ña̱ kundayáʼvika chiñu ña̱ kúúmiíyó, nu̱úka chiñu ña̱ kéʼéyó nu̱ú Jehová. Ña̱ va̱ʼa kunda̱a̱-iniyó á saá ndóʼoyó, ná nda̱ka̱tu̱ʼun xíʼin miíyó: “¿Á nina xa̱ʼa̱ chiñu ndákanixi̱níi̱ tá ku̱a̱ʼi̱n reunión á predicación? ¿Á ndíʼi̱ka-inii̱ xa̱ʼa̱ ña̱ vií koi̱ chí nu̱únínu? ¿Á íyo ku̱a̱chi nu̱úi̱ xíʼin na̱ ti̱ndaʼa̱ xíʼi̱n xa̱ʼa̱ xu̱ʼún xíʼin inkaka ña̱ʼa? ¿Á kandíxai̱ keʼíi̱ iin chiñu ña̱ va̱ása kútóo ku̱a̱ʼánína keʼéna, tasaá va̱ʼaka kachíñui̱ nu̱ú Jehová?” (1 Tim. 6:9-12). Tá ná keʼéyó ña̱yóʼo, ná ndakaʼányó ña̱ kúʼvi̱ní-ini Jehová xínira miíyó, ta káʼa̱nra ña̱yóʼo xíʼin na̱ ndásakáʼnu-ñaʼá xíʼin ndiʼi níma̱na: “Yi̱ʼi̱ kúú ta̱ chindeétáʼan xíʼún ta va̱ása sandákoo ndaʼíi̱ yóʼó”. Xa̱ʼa̱ ña̱kán, ta̱ apóstol Pablo ni̱ka̱ʼa̱nra ña̱yóʼo: “Ndóʼó kǒo kundi̱ʼi̱-inindó xa̱ʼa̱ ña̱ kuni̱ndó koo ku̱a̱ʼá xu̱ʼúnndó” (Heb. 13:5, 6).

11. ¿Nda̱saa kivi xa̱a̱yó keʼéyó ña̱ va̱ása va̱ʼa xíʼin ña̱ xítonde̱ʼéyó á ña̱ sísikíyó?

¹¹ Jehová kúni̱ra ña̱ si̱í ná kooyó, ta ña̱ xítonde̱ʼéyó á ña̱ sísikíyó kúú ña̱ sákusi̱í-iniyó. Ta ña̱ Biblia káchiña ña̱ “kǒoka inka ña̱ va̱ʼa nu̱ú na̱ yiví chi ña̱ va̱ʼaníka kúú ña̱ kuxuna, koʼona ta ndakiʼinna ña̱ va̱ʼa xa̱ʼa̱ ña̱ ndeéní káchíñuna” (Ecl. 2:24). Soo vitin, ku̱a̱ʼání ña̱ xítonde̱ʼé na̱ ñuyǐví á ña̱ sísikína va̱ása va̱ʼaña, soo nu̱ú na̱ yiví ña̱ va̱ʼava kúúña, ta ña̱yóʼo chíndaʼáñana ña̱ xa̱a̱na kutóona ña̱ʼa ña̱ káʼa̱n tu̱ʼun Ndióxi̱ va̱ása va̱ʼa.

12. Nda̱a̱ táki̱ʼva káchi 1 Corintios 10:21, 22, ¿nda̱chun xíniñúʼu viíní ndaka̱xinyó ña̱ kotonde̱ʼéyó xíʼin ña̱ kusíkíyó?

¹² Miíyó kúni̱yó ndasakáʼnuyó iinlá mií Jehová, xa̱ʼa̱ ña̱kán va̱ása kivi kuxuyó mesa Jehová ta kuxuyó mesa na̱ ta̱chí ndi̱va̱ʼa (kaʼvi 1 Corintios 10:21, 22). * Tá xíxiyó xíʼin iinna náʼa̱ña ña̱ kítáʼanyó xíʼinna. Tá ndáka̱xinyó ña̱  kotonde̱ʼéyó á ña̱ kusíkíyó nu̱ú kána na̱ kánitáʼan, na̱ kéʼé ndiʼi ña̱ kúú kuenta ta̱ Ndi̱va̱ʼa, na̱ kéʼé ña̱ kini, na̱ kéʼé ña̱ kúni̱ miína, íyoyó nda̱a̱ táki̱ʼva íyo iin na̱ xíxi xíʼin na̱ sáa̱-ini xíni Ndióxi̱. Tá ná keʼéyó ña̱yóʼo, va̱ása va̱ʼa kuniyó ta saátu ña̱ kítáʼanyó xíʼin Jehová va̱ása va̱ʼaka kooña.

13, 14. a) ¿Nda̱saa kivi chitáʼanyó ña̱ xítoyó á ña̱ sísikíyó xíʼin ña̱ xíxiyó? b) Nda̱a̱ táki̱ʼva káchi Santiago 1:14, 15, ¿nda̱chun va̱ása xíniñúʼu taxiyó kuaʼnu ña̱ va̱ása va̱ʼa iniyó?

¹³ ¿Ndáa ki̱ʼva kivi chitáʼanyó ña̱ ndáka̱xinyó keʼéyó xíʼin ña̱ xíxiyó? Ki̱vi̱ xíxiyó, kíʼinyó kuenta xíʼin ña̱ chíka̱a̱yó yuʼúyó. Soo, tá xa̱a̱ ko̱kóyóña, ña̱yóʼo kíxáʼaña káchíñu miíña ti̱xinyó, ta kíxáʼaña kíʼviña ku̱ñuyó. Tá va̱ʼa íyo ña̱ xíxiyó chíndeétáʼanña xíʼinyó ña̱ vií kooyó, tá ta va̱ása va̱ʼa íyo ña̱ xíxiyó va̱ása chíndeétáʼanña xíʼinyó. Soo, ña̱yóʼo va̱ása ndi̱ku̱n ndóʼoyóña chi tá yáʼa tiempo saáví kéʼéña ña̱ va̱ása va̱ʼa xíʼinyó.

¹⁴ Ki̱ʼva saá íyoña, tá kíʼinyó kuenta xíʼin ña̱ ndáka̱xinyó kotonde̱ʼéyó á ña̱ kusíkíyó. Chi saá ña̱yóʼo kíʼviña xi̱níyó, ta kíxáʼayó kúni̱yó keʼéyóña. Tá vií íyo ña̱ xítoyó á sísikíyó va̱ʼa kúniyó xíʼinña, soo tá su̱ví ña̱ va̱ʼa kúúña sándiʼi-xa̱ʼa̱ña ña̱ va̱ʼa ña̱ kúúmiíyó (kaʼvi Santiago 1:14, 15). * Soo ña̱yóʼo va̱ása ndi̱ku̱n keʼéña ña̱ va̱ása va̱ʼa xíʼinyó, chi tá ná ya̱ʼa tiempo saáví kuniyóña. Xa̱ʼa̱ ña̱kán ña̱ Biblia káʼa̱nña ña̱yóʼo xíʼinyó: “Kǒo sándaʼvindó miíndó: chi Ndióxi̱ kǒo kívi sándaʼviyóra, chi nda̱a̱ ndáaka ña̱ chíʼiyó ña̱kán ndakiʼinvayó; chi ndiʼi na̱ chíʼi si̱ʼva̱ ña̱ kútóo ku̱ñuna, ña̱ ndakiʼinna kúú ña̱ ndiʼi-xa̱ʼa̱na” (Gál. 6:7, 8). Ña̱kán, ndáyáʼviní ña̱ va̱ása kotonde̱ʼéyó á kusíkíyó ña̱ʼa ña̱ va̱ása kutóo Jehová (Sal. 97:10).

15. ¿Ndáa regalo kúú ña̱ ta̱xi Jehová ndaʼa̱yó?

¹⁵ Ku̱a̱ʼání na̱ ndásakáʼnu Jehová kútóonína kotonde̱ʼéna ña̱ JW Broadcasting^®, canal ña̱ kúúmiíyó nu̱ú Internet. Iin ñá hermana ñá naní Marilyn ni̱ka̱ʼa̱nñá: “Ña̱ canal yóʼo chíndeétáʼanníña xíʼi̱n ña̱ kusi̱í-inii̱, ta saátu kivi kotoi̱ ndiʼi ña̱ kúni̱ miíi̱. Ki̱vi̱ ndákavaní-inii̱, ndáni̱ʼí iin discurso á iin adoración matutina ña̱ chíka̱a̱ní ndee̱ xíʼi̱n. Ña̱yóʼo chíndeétáʼanña xíʼi̱n ña̱ yatinka koi̱ xíʼin Jehová, ta saátu na̱ ñuura. Ña̱ JW Broadcasting na̱samaña ndiʼi ña̱ tákui̱”. ¿Á vií xíniñúʼuyó ña̱ regalo yóʼo, ña̱ ta̱xi Jehová ndaʼa̱yó? Ta su̱ví iinlá ña̱ programa ña̱ kána yo̱o̱ tá yo̱o̱ kivi kotoyó, chi saátu kivi kotoyó ku̱a̱ʼáníka video, ta saátu ña̱ kuniso̱ʼoyó audio xíʼin ku̱a̱ʼá nu̱ú yaa.

16, 17. ¿Nda̱chun kúú ña̱ xíniñúʼu kiʼinníyó kuenta xíʼin tiempo ña̱ xíniñúʼuyó ña̱ keʼéyó ña̱ sákusi̱í-iniyó, ta nda̱saa kivi keʼéyóña?

¹⁶ Ta su̱ví nda̱saa ña̱ ndáka̱xinyó kotonde̱ʼéyó á kusíkíyó kúú ña̱ xíniñúʼu kiʼinyó kuenta xíʼin. Chi saátu xíniñúʼu kiʼinyó kuenta nda̱saa tiempo xíniñúʼuyó xíʼin ña̱yóʼo, chi tá va̱ása kíʼinyó kuenta kivi ku̱a̱ʼáka tiempo keʼéyó ña̱ sákusi̱í-iniyó nu̱úka ña̱ kachíñuyó nu̱ú Jehová. Ku̱a̱ʼánína íxayo̱ʼvi̱ña xíʼinna ña̱ kiʼinna kuenta xíʼin ña̱ kéʼéna. Tá kúú, iin ñá hermana ñá naní Abigail ñá kúúmií 18 ku̱i̱ya̱ káchiñá: “Tándíʼi kéʼíi̱ ku̱a̱ʼání chiñu, va̱ʼaní kúni̱i̱ tá xítoi̱ televisión. Soo tá va̱ása kíʼin kuenta xíʼin ña̱yóʼo, kivi ku̱a̱ʼání hora kotoi̱ televisión”. Iin ta̱ loʼo ta̱ naní Samuel káchira: “Sava yichi̱ ku̱a̱ʼání hora xítoi̱ video nu̱ú Internet. Kíxáʼíi̱ xítoi̱ iinña, ta ni kǒo kíʼin kuenta, ta xa̱a̱ ni̱ya̱ʼa u̱ni̱ á ku̱mí hora xítoi̱ ña̱yóʼo”.

¹⁷ ¿Nda̱saa kivi kiʼinyó kuenta xíʼin tiempo ña̱ xíniñúʼu ña̱ keʼéyó ña̱ sákusi̱í-iniyó? Ña̱ nu̱ú xíniñúʼu keʼéyó kúú ña̱ kotoyó nda̱saa kúú ña̱ xíniñúʼuyó. Ta ña̱ va̱ʼa kiʼinyó kuenta xíʼin ña̱yóʼo, kivi kaʼyíyó nu̱ú iin calendario hora ña̱ xíniñúʼuyó ña̱ iin semana ña̱ xítoyó televisión,  ña̱ kíʼviyó nu̱ú Internet, á ña̱ sísikíyó nu̱ú celular ña̱ kúúmiíyó. Tá ki̱ʼinyó kuenta ña̱ ku̱a̱ʼání tiempo xíniñúʼuyó xíʼin ña̱yóʼo, viíní ná keʼéyó iin calendario ña̱ kivi chindeé miíyó. Ña̱ nu̱ú ná keʼéyó kúú ña̱ʼa ña̱ ndáyáʼvika, ta tándi̱ʼi kivi taváyó tiempo ña̱ keʼéyó ña̱ sákusi̱í-iniyó. Tándi̱ʼi ná ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ keʼéyóña. Saá kúú ña̱ kuumiíyó tiempo xíʼin ndee̱ ña̱ kaʼvi iinlá miíyó Biblia, ña̱ kaʼviyó xíʼin na̱ veʼeyó, ña̱ ku̱ʼu̱nyó reunión xíʼin predicación ta sanáʼa̱yó na̱ yiví. Saá kúú ña̱ kusi̱í-iniyó kotonde̱ʼéyó á kusíkíyó inkaka ña̱ʼa.

18, 19. ¿Nda̱saa kivi na̱ʼa̱yó ña̱ iinlá mií Jehová ndásakáʼnuyó?

¹⁸ Tá sa̱ndíʼi ta̱ apóstol Pedro ka̱ʼyíra xa̱ʼa̱ ña̱ ndiʼi-xa̱ʼa̱ ñuyǐví ta̱ Ndi̱va̱ʼa xíʼin xa̱ʼa̱ ña̱ kixaa̱ ñuyǐví xa̱á, ni̱ka̱ʼa̱nra ña̱yóʼo: “Ndóʼó xa̱ʼa̱ ña̱ xa̱a̱ ndátundó ndiʼi ña̱yóʼo, chika̱a̱ndó ndee̱ ña̱ kǒo ni iin ña̱ va̱ása va̱ʼa kuumiíndó ta ni kǒo ña̱ ndíʼi̱ní-inindó xa̱ʼa̱ tá ná kixaa̱ra nu̱úndó” (2 Ped. 3:14). Ki̱vi̱ ndíku̱nyó ndiʼi consejo yóʼo, kéʼéyó nda̱a̱ ndáaka ña̱ʼa ña̱ va̱ʼa limpio kooyó ta saátu ña̱ kéʼéyó nu̱ú Jehová, ta náʼa̱yó ña̱ iinlá miíra ndásakáʼnuyó.

¹⁹ Ta̱ Ndi̱va̱ʼa xíʼin na̱ ñuyǐvíra ndakundeéna sandákavana miíyó ña̱ kundi̱ʼi̱ka-iniyó xa̱ʼa̱ inkaka ña̱ʼa (Luc. 4:13). Soo, nda̱a̱ ndáaka tu̱ndóʼo ná ya̱ʼayó nu̱ú, ná va̱ása taxiyó ña̱ nda̱a̱ ni iin ña̱ʼa ná kasi nu̱úyó ña̱ keʼéyó ña̱ kúni̱ Jehová. Chi ña̱ kúni̱yó keʼéyó kúú ña̱ iinlá miíra ndasakáʼnuyó.