1. ¿Ndáaña kivi keʼé Jehová ña̱ va̱ʼa saxínura ña̱ kúni̱ra?

JEHOVÁ kivi keʼéra nda̱a̱ ndáaka ña̱ʼa ña̱ va̱ʼa saxínura ña̱ kúni̱ra. Chiñu ña̱ xa̱a̱ kéʼéra kúú ña̱ maestro, kúútura iin yivá ta̱ sándi̱ko-ini ta saátu iin evangelizador (Is. 48:17; 2 Cor. 7:6; Gál. 3:8). Soo ni saá, xíniñúʼura na̱ yiví ña̱ va̱ʼa keʼéna ña̱ kúni̱ra (Mat. 24:14; 28:19, 20; 2 Cor. 1:3, 4). Jehová kivi taxira ndee̱ xíʼin ña̱ ndíchi ndaʼa̱ nda̱a̱ ndáaka miíyó, ña̱ va̱ʼa saxínuyó ña̱ kúni̱ra. Ta ndiʼi ña̱yóʼo kúú ña̱ kúni̱ kachi ki̱vi̱ra, nda̱a̱ táki̱ʼva ndákanixi̱ní sava na̱ xíni̱ va̱ʼa xa̱ʼa̱ ña̱yóʼo.

2. a) ¿Nda̱chun sava túviyó ña̱ va̱ása xíniñúʼu Jehová miíyó? b) ¿Ndáaña sakuaʼayó nu̱ú artículo yóʼo?

² Ndiʼiyó kúni̱yó ná kuniñúʼu Jehová miíyó, soo savayó sana ndákanixi̱níyó ña̱ va̱ása xíniñúʼura miíyó. ¿Nda̱chun? Saáchi túviyó, ña̱ xa̱ʼa̱ ña̱ xa̱a̱ ku̱chéeyó á xa̱ʼa̱ inkaka ña̱ʼa va̱ása kivi keʼéyó ña̱ kúni̱ra. Ta inkatuna, xa̱ʼa̱ ña̱ xa̱a̱ kúsi̱í-inina xíʼin chiñu ña̱ kúúmiína túvina ña̱ va̱ása xíniñúʼu keʼéna ku̱a̱ʼáka chiñu. Nu̱ú ña̱ artículo yóʼo, sakuaʼayó ndáa ki̱ʼva kivi sanáʼa̱ Jehová miíyó ña̱ va̱ʼa keʼéyó ña̱ kúni̱ra. Saátu kotoyó sava ejemplo na̱ ta̱a xíʼin ná ñaʼá na̱ ni̱xi̱yo tiempo xi̱naʼá, na̱ ta̱xi Jehová ndee̱ ndaʼa̱ ña̱ ke̱ʼéna ña̱ kúni̱ra. Ta saátu, kotoyó ndáaña xíniñúʼu keʼéyó ña̱ va̱ʼa ná kuniñúʼu Jehová miíyó.

3. Nda̱a̱ táki̱ʼva káchi Filipenses 2:13, ¿ndáaña kivi taxi Jehová ndaʼa̱yó?

³ (Kaʼvi Filipenses 2:13). * * Mií Jehová kivi chika̱a̱-iniyó ña̱ kuni̱yó keʼéyó chiñura. ¿Ndáa ki̱ʼva kéʼéraña? Sana kivi kunda̱a̱-iniyó ña̱ ti̱xin congregaciónyó íyo sava ña̱ xíniñúʼu á kivitu kaʼvi na̱ anciano iin carta ña̱ chi̱ndaʼá na̱ sucursal, nu̱ú káʼa̱nna xíʼinyó ña̱ xíniñúʼuna na̱ chindeétáʼan xíʼin na̱ hermano inka ñuu. Saá, sana kivi nda̱ka̱tu̱ʼun xíʼin miíyó ndáaña kivi keʼéyó ña̱ va̱ʼa chindeétáʼanyó xíʼinna. Á sanatu xa̱a̱ nda̱kiʼinyó iin chiñu ña̱ yo̱ʼvi̱, ta ndáka̱tu̱ʼun xíʼin miíyó á kuchiñuyó saxínuyóña. Inkatu ña̱ sana kivi keʼéyó kúú ña̱ kaʼviyó sava ña̱ va̱xi nu̱ú Biblia, ta ndakanixi̱níyó ndáa ki̱ʼva kuniñúʼuyóña ña̱ va̱ʼa chindeétáʼanyó xíʼin inkana. Jehová va̱ása íxandúxara xíʼinyó ña̱ keʼéyó nda̱a̱ ni iin ña̱ʼa. Soo, tá xítora ña̱ kúni̱yó keʼéyó ku̱a̱ʼáka chiñu nu̱úra, kivi chika̱a̱ra-iniyó ña̱ kuni̱yó keʼéyóña.

4. ¿Ndáa ki̱ʼva kivi taxi Jehová ndee̱ ndaʼa̱yó ña̱ va̱ʼa keʼéyó ña̱ kúni̱ra?

⁴ Saátu kivi taxi Jehová ndee̱ ndaʼa̱yó ña̱ va̱ʼa keʼéyó ña̱ kúni̱ra (Is. 40:29). Kivitu kuniñúʼura espíritu santora, ña̱ va̱ʼa chindeétáʼanra xíʼinyó ña̱ ku̱a̱ʼáka ña̱ʼa kuxini̱yó keʼéyó (Éx. 35:30-35). Ta xíniñúʼura na̱ ñuura ña̱ va̱ʼa sanáʼa̱ra miíyó ña̱ keʼéyó savaka chiñu. Tá va̱ása xíni̱yó keʼéyó iin chiñu ña̱ ta̱xina ndaʼa̱yó, ná ka̱ʼa̱nyó xíʼin inkana ña̱ ná chindeétáʼanna xíʼinyó. Ta saátu kivi kuyatinkayó nu̱ú Jehová, ta ka̱ʼa̱nyó xíʼinra ná taxikara ndee̱ ndaʼa̱yó ña̱ keʼéyó ña̱ kúni̱ra (2 Cor. 4:7; Luc. 11:13). Tá káʼviyó Biblia ndáni̱ʼíyó sava ña̱ káʼa̱n ndáa ki̱ʼva sa̱náʼa̱ Jehová ku̱a̱ʼání na̱ ta̱a xíʼin ná ñaʼá, ta ta̱xira ndee̱ ndaʼa̱na ña̱ keʼéna ña̱ kúni̱ra. Ná kotoyó sava ejemplo, ta ná ndakanixi̱níyó nda̱á ki̱ʼva kivi kuniñúʼu Jehová miíyó nda̱a̱ táki̱ʼva ke̱ʼéra xíʼin na̱kán.

5. ¿Ndáaña sákuaʼayó xa̱ʼa̱ ndáa ki̱ʼva xi̱niñúʼu Jehová ta̱ Moisés ña̱ sa̱kǎkura na̱ ñuura?

⁵ Jehová xi̱niñúʼura ta̱ Moisés ña̱ sa̱kǎkura na̱ ñuu Israel. Soo, ¿ama kúú ña̱ xi̱niñúʼurara? ¿Á xi̱kuuña tá nda̱kanixi̱ní ta̱ Moisés ña̱ xa̱a̱ íyo tu̱ʼvara chi “nda̱kiʼinra ku̱a̱ʼání ña̱ ndíchi táʼan ña̱ ndákiʼin na̱ ñuu Egipto”? (Hech. 7:22-25). Va̱ása, chi Jehová siʼna sa̱náʼa̱rara ña̱ xíniñúʼu vitá koo inira (Hech. 7:30, 34-36). Ta ta̱xira ña̱ ndakú-ini ndaʼa̱ra ña̱ va̱ʼa ku̱ʼu̱nra nu̱ú ta̱ chíñu ña̱ ñuu Egipto (Éx. 9:13-19). ¿Ndáaña sákuaʼayó xa̱ʼa̱ ndáa ki̱ʼva xi̱niñúʼu Jehová ta̱ Moisés? Ña̱ mií Jehová xíniñúʼura na̱ ndixa kúni̱ keʼé chiñura ta kándíxana ña̱ chindeétáʼanra xíʼinna (Filip. 4:13).

6. ¿Ndáaña sákuaʼayó xa̱ʼa̱ ndáa ki̱ʼva xi̱niñúʼu Jehová ta̱ Barzilái ña̱ chindeétáʼanra xíʼin ta̱ rey David?

⁶ Tá ni̱ya̱ʼa loʼo, Jehová xi̱niñúʼura ta̱ Barzilái ña̱ chindeétáʼanra xíʼin ta̱ rey David. Tá xínu ta̱ David xíʼin inkaka na̱ kítáʼan xíʼinra nu̱ú se̱ʼera ta̱ Absalón, ku̱naanína ta kúni̱na koʼona ti̱kui̱í ta saátu kuxuna. Ni xa̱a̱ chéení ta̱ Barzilái, miíra xíʼin inkakana ndakúní ni̱xi̱yo inina tá ni̱xa̱ʼa̱nna nda̱kana ña̱ xíniñúʼuna. Ta̱ Barzilái va̱ása níndakanixi̱níra ña̱ xa̱ʼa̱ ña̱ xa̱a̱ chéera va̱ása kuniñúʼuka Jehová miíra. Chi xíʼin ña̱ si̱í-ini ta̱xira ña̱ kúúmiíra ña̱ va̱ʼa chindeétáʼanra xíʼin na̱ ndásakáʼnu Ndióxi̱ na̱ kúma̱ní ña̱ʼa nu̱ú (2 Sam. 17:27-29). ¿Ndáaña sákuaʼayó xíʼin ña̱yóʼo? Ña̱ ni xa̱a̱ chéeyó Jehová kivi kuniñúʼura miíyó ña̱ chindeétáʼanyó xíʼin na̱ hermanoyó, na̱ íyo iníísaá ñuyǐví na̱ kúma̱ní ña̱ʼa nu̱ú (Prov. 3:27, 28; 19:17). Soo tá va̱ása kívi kuniyóna, kivi taxiyó donación ña̱ va̱ʼa  chindeétáʼanyó xíʼin na̱ hermanoyó na̱ íyo iníísaá ñuyǐví na̱ xíniñúʼu sava ña̱ʼa (2 Cor. 8:14, 15; 9:11).

7. a) ¿Ndáa ki̱ʼva xi̱niñúʼu Jehová ta̱ Simeón? b) ¿Nda̱saa ndásandakú ña̱yóʼo iniyó?

⁷ Ta̱ Simeón xi̱kuura iin anciano ta̱ nda̱kúní ni̱xi̱yo ini ña̱ ñuu Jerusalén, ta ni̱ka̱ʼa̱n Jehová xíʼinra ña̱ tá kúma̱níka kuvira kunira ta̱ Mesías. Ña̱yóʼo sana chi̱ka̱a̱níña ndee̱ xíʼinra, chi xa̱a̱ ku̱a̱ʼání ku̱i̱ya̱ ndátura ña̱ kixaa̱ ta̱ Mesías. Jehová ta̱xira ña̱ va̱ʼa ndaʼa̱ra xa̱ʼa̱ ña̱ ndakúní ni̱xi̱yo inira. Soo iin ki̱vi̱, espíritu santo Ndióxi̱ xi̱niʼiña yichi̱ nu̱ú ta̱ Simeón, ña̱ ni̱xa̱ʼa̱nra templo, ta kán xi̱nira ta̱ Jesús. Tasaá, Jehová xi̱niñúʼurara ña̱ ka̱ʼa̱nra xa̱ʼa̱ iin profecía, ña̱ ta̱ loʼo yóʼo xa̱a̱ra koora ta̱ Cristo (Luc. 2:25-35). Ni sana va̱ása níxinika ta̱ Simeón tá ni̱xi̱ka ta̱ Jesús na̱túʼunra, soo ta̱xivara tíxa̱ʼvi xa̱ʼa̱ ña̱ xi̱niñúʼu Jehová miíra. Tá ná ndatakura nu̱ú ñuyǐví xa̱á, ku̱a̱ʼání ña̱ va̱ʼa ndakiʼinra ta saátu inkaka na̱ kundoo nu̱ú ñuʼú yóʼo xa̱ʼa̱ ña̱ kaʼndachíñu ta̱ Jesús (Gén. 22:18). Saátu kivi kusi̱í-iniyó xa̱ʼa̱ ña̱ xíniñúʼu Jehová miíyó ña̱ keʼéyó ña̱ kúni̱ra.

8. ¿Nda̱saa kivi kuniñúʼu Jehová miíyó?

⁸ Tá siglo nu̱ú, iin ta̱a ta̱ va̱ʼaní-ini ta̱ xi̱naní José ta̱xira ña̱ ná kuniñúʼu Jehová miíra (Hech. 4:36, 37). Na̱ apóstol xi̱ka̱ʼa̱nna Bernabé xíʼinra, ña̱ kúni̱ kachi “ta̱ sándi̱ko-ini”, xi̱ka̱ʼa̱nna ña̱yóʼo xíʼinra xa̱ʼa̱ ña̱ va̱ʼaní sándi̱kora-ini inkana. Tá kúú, tá ndu̱u ta̱ Saulo cristiano, ku̱a̱ʼání na̱ hermano xi̱yi̱ʼvína kuyatinna nu̱úra, chi xi̱kundaa-inina ña̱ xi̱ ixandi̱va̱ʼara xíʼin na̱ congregación. Soo, ta̱ Bernabé chi̱ndeétáʼanra xíʼinra. Sana ta̱xiní ta̱ Saulo tíxa̱ʼvi ndaʼa̱ra xa̱ʼa̱ ña̱ va̱ʼaní ni̱xi̱yo-inira xíʼinra (Hech. 9:21, 26-28). Tá ni̱ya̱ʼa loʼo, na̱ anciano ña̱ ñuu Jerusalén na̱kunda̱a̱-inina ña̱ na̱ hermano na̱ íyo iin ñuu ña̱ ndíka̱a̱ xíka, ña̱ xi̱naní Antioquía de Siria xíniñúʼuna na̱ chindeétáʼan xíʼinna. Ta, ¿ndáana chi̱ndaʼána ku̱a̱ʼa̱n nu̱úna? Ta̱ Bernabé. Iin ña̱ va̱ʼaní kúú ña̱ chi̱ndaʼána ta̱yóʼo, saáchi ña̱ Biblia káʼa̱nña xa̱ʼa̱ ta̱ Bernabé ña̱ va̱ʼaní chi̱ka̱a̱ra ndee̱ xíʼinna ña̱ va̱ʼa nda̱kú koo inina xíʼin Ndióxi̱ (Hech. 11:22-24). Saátu tiempo vitin, Jehová kivi chindeétáʼanra xíʼinyó ña̱ va̱ʼa sandíkoyó-ini na̱ hermanoyó, tá kúú na̱ ni̱xi̱ʼi̱ iin na̱ táʼan, ta saátu ña̱ ku̱ʼu̱nyó kotoyó á káʼa̱nyó xíʼin iin na̱ ndeé ndóʼo, á na̱ nda̱kava-ini, ta chika̱a̱yó ndee̱ xíʼinna. ¿Á taxiyó ña̱ kuniñúʼu Jehová miíyó nda̱a̱ táki̱ʼva xi̱niñúʼura ta̱ Bernabé? (1 Tes. 5:14).

9. ¿Ndáaña sákuaʼayó xa̱ʼa̱ ndáa ki̱ʼva chi̱ndeétáʼan Jehová xíʼin ta̱ hermano ta̱ naní Vasily?

⁹ Jehová chi̱ndeétáʼanra xíʼin iin ta̱ hermano ta̱ naní Vasily ña̱ koora iin ta̱ va̱ʼaní níʼi yichi̱. Chi tá kúúmiíra 26 ku̱i̱ya̱ ta̱xina chiñu ndaʼa̱ra ña̱ koora anciano, nda̱kanixi̱níra ña̱ va̱ása íyo tu̱ʼvara ña̱ chindeétáʼanra xíʼin na̱ congregación, tá kúú na̱ hermano na̱ íyo ku̱a̱chi nu̱ú. Soo ku̱a̱ʼáníka ña̱ʼa sa̱kuaʼara tíxa̱ʼvi ña̱ sa̱náʼa̱ inkaka na̱ anciano na̱ xíni̱ va̱ʼa miíra, ta saátu ti̱xin ña̱ Escuela del Ministerio del Reino. Ta chi̱ka̱a̱níra ndee̱ ña̱ vií keʼéra chiñura. Tá kúú, ke̱ʼéra iin lista nu̱ú va̱xi sava ña̱ kúni̱ra xa̱a̱ra keʼéra. Ta tá ki̱xáʼara kéʼéra sava ña̱yóʼo, saá va̱ása níyi̱ʼvíkara. Káchira: “Ña̱ xi̱yi̱ʼvíi̱ nu̱ú tá ya̱chi̱ vitin sákusi̱íníña-inii̱. Ki̱vi̱ chíndeétáʼan Jehová xíʼi̱n ña̱ ndani̱ʼíi̱ iin texto, ña̱ kuniñúʼi̱ ña̱ sandíkoi̱-ini iin na̱ hermano, va̱ʼaní kúni̱i̱”. Tá ná keʼéndó nda̱a̱ táki̱ʼva ke̱ʼé ta̱ Vasily, ta táxindó miíndó ña̱ kúniñúʼu Jehová ndóʼó, miíra sanáʼa̱ ndóʼó ña̱ keʼéndó ku̱a̱ʼáka chiñu ti̱xin congregación.

10. ¿Ndáaña ke̱ʼé ñá Abigaíl, ta ndáaña sákuaʼayó xíʼin ña̱ ke̱ʼéñá?

¹⁰ Ndiʼi tiempo ña̱ xi̱kuni̱ ta̱ rey Saúl ixandi̱va̱ʼara xíʼin ta̱ David xíʼin na̱ kítáʼan xíʼinra,  na̱yóʼo xi̱niñúʼuna na̱ chindeétáʼan xíʼinna. Iin yichi̱, na̱ ta̱a na̱ kítáʼan xíʼin ta̱ David ndu̱kúna loʼo ña̱ kuxuna nu̱ú iin ta̱a ta̱ ku̱i̱ká ta̱ naní Nabal. Ta va̱ása níkukaʼan nu̱úna ña̱ ndukúna ña̱yóʼo nu̱úra, chi xi̱ndaana kití sa̱na̱ra chí nu̱ú ñuʼú yi̱chí. Soo ta̱ Nabal va̱ása níxiinra taxira ña̱ kuxuna. Ta xa̱ʼa̱ ña̱yóʼo ni̱sa̱a̱ní ta̱ David, ta xi̱kuni̱ra kaʼníra ta̱ Nabal xíʼin ndiʼi na̱ kítáʼan xíʼinra (1 Sam. 25:3-13, 22). Tasaá, ñá síʼí ta̱ Nabal ñá Abigaíl va̱ása nítaxiñá keʼéra ña̱yóʼo. Ñáyóʼo ndakúní ni̱xi̱yo iniñá chi ni̱xa̱ʼa̱nñá na̱ndukúñá ta̱ David, ta ku̱xítíñá nu̱úra ta ni̱ka̱ʼa̱nñá xíʼinra ña̱ ná va̱ása kaʼnírana. Ta ni̱ka̱ʼa̱nñá xíʼinra ña̱ ná sandákoora ku̱a̱chi yóʼo ndaʼa̱ mií Jehová. Ta tu̱ʼun ña̱ ni̱ka̱ʼa̱nñá sa̱ndíkoña-inira, saá na̱kunda̱a̱-inira ña̱ mií Jehová kúú ta̱ chi̱ndaʼáñá (1 Sam. 25:23-28, 32-34). Jehová xi̱niñúʼura ñá Abigaíl chi ku̱a̱ʼání ña̱ va̱ʼa-ini xi̱kuumiíñá. Ki̱ʼva saátu kivi kuniñúʼu Jehová sava ná hermana, ña̱ chindeétáʼanná xíʼin na̱ veʼená ta saátu xíʼin na̱ congregación (Prov. 24:3; Tito 2:3-5).

11. ¿Ndáaña ke̱ʼé ná se̱ʼe ta̱ Salum, ta ndáana ndíku̱n yichi̱ náyóʼo tiempo vitin?

¹¹ Tá xa̱a̱ ni̱ya̱ʼa ku̱a̱ʼání ku̱i̱ya̱, ná se̱ʼe ta̱ Salum chi̱ndeétáʼanná xíʼin na̱ xi̱niñúʼu Jehová ña̱ nda̱sava̱ʼana nama̱ ña̱ ñuu Jerusalén (Neh. 2:20; 3:12). Ni xi̱kuu ta̱ Salum iin príncipe, ná se̱ʼera xi̱kuni̱vaná keʼéna chiñu kán, ni i̱yoní ni̱xi̱yoña ta saátu yo̱ʼvi̱ña (Neh. 4:15-18). Síínní ni̱xi̱yoná nu̱ú na̱ ta̱a na̱ tecoítas na̱ xi̱kuumií chiñu ña̱ ndáyáʼvi, chi na̱yóʼo va̱ása níxiinna keʼéna ña̱ chiñu yóʼo (Neh. 3:5). Ná se̱ʼe ta̱ Salum ni̱kusi̱íní-ininá tá ni̱xi̱nu chiñu kán ti̱xin ña̱ 52 kuití ki̱vi̱ (Neh. 6:15). Tiempo vitin, íyo ná hermana ná kúsi̱íní-ini kachíñu nu̱ú Jehová, tá kúú ña̱ ku̱ʼu̱nná nu̱ú íxava̱ʼana veʼe á ña̱ ndaya̱kúnná veʼe ña̱ xa̱a̱ nda̱taxina ndaʼa̱ra. Xa̱ʼa̱ ña̱ xíni̱níná keʼéná chiñuná ta xíʼin ña̱ si̱í-ini kéʼénáña, saá kúú ña̱ va̱ʼaníka kána chiñu.

12. ¿Ndáa ki̱ʼva kivi kuniñúʼu Jehová miíyó nda̱a̱ táki̱ʼva ke̱ʼéra xíʼin ñá Tabita?

¹² Jehová chi̱ndeétáʼanra xíʼin ñá Tabita ñá ke̱ʼéñá ku̱a̱ʼání ña̱ va̱ʼa xíʼin inkana, tá kúú xíʼin ná ñaʼá ná ni̱xi̱ʼi̱ yií (Hech. 9:36). Xa̱ʼa̱ ña̱ va̱ʼaní ni̱xi̱yo iniñá, ku̱a̱ʼánína xa̱kuna xa̱ʼa̱ñá tá ni̱xi̱ʼi̱ñá. Soo ni̱kusi̱íní-inina tá sa̱ndátaku ta̱ apóstol Pedro ñáyóʼo (Hech. 9:39-41). ¿Ndáaña sákuaʼayó xíʼin ña̱ ke̱ʼé ñá Tabita? Ña̱ ni kúúyó na̱ xa̱a̱ chée á na̱ válí, kúúyó ta̱a á ñaʼá, ndiʼiyó kivi keʼéyó sava ña̱ʼa ña̱ chindeétáʼanyó xíʼin na̱ hermanoyó (Heb. 13:16).

13. ¿Ndáa ki̱ʼva xi̱niñúʼu Jehová iin ñá hermana ñá nani Ruth ñá xi̱kukaʼanní nu̱ú, ta ndáaña ni̱ka̱ʼa̱nñá?

¹³ Iin ñá hermana ñá xi̱kukaʼanní nu̱ú ñá naní Ruth xi̱kuni̱ñá kooñá misionera. Tá ni̱xi̱yo loʼoñá, xi̱xa̱ʼa̱nñá veʼe tá veʼe ña̱ xi̱taxiñá tutu ndaʼa̱ na̱ yiví, ta kamaní xi̱keʼéñá ña̱yóʼo. Ka̱chiñá: “Xi̱kutóoníi̱ keʼíi̱ ña̱ chiñu kán”. Soo xi̱ ixayo̱ʼvi̱níña xíʼinñá ña̱ ka̱ʼa̱nñá xíʼin na̱ yiví veʼe tá veʼe xa̱ʼa̱ Reino Ndióxi̱. Ni xi̱kukaʼanní nu̱ú ñá Ruth ni̱xa̱a̱ñá ku̱uñá precursora regular tá kúúmiíñá 18 ku̱i̱ya̱. Tá ku̱i̱ya̱ 1946, ni̱xa̱ʼa̱nñá Escuela ña̱ Galaad ña̱ Watchtower, ta saátu ni̱xa̱ʼa̱nñá na̱túʼunñá xa̱ʼa̱ Ndióxi̱ chí Hawái xíʼin Japón. Jehová xi̱niñúʼurañá ña̱ ni̱xa̱ʼa̱nñá na̱túʼunñá xa̱ʼa̱ra xíʼin ku̱a̱ʼání na̱ yiví na̱ íyo ñuu kán. Tá xa̱a̱ ni̱ya̱ʼa 80 ku̱i̱ya̱ ña̱ ni̱xi̱kañá na̱túʼunñá xa̱ʼa̱ Ndióxi̱, ñáyóʼo ni̱ka̱ʼa̱nñá: “Jehová kúú ta̱ táxi ndeé ndaʼíi̱. Miíra chi̱ndeétáʼan xíʼi̱n ña̱ va̱ása kúkaʼanka nu̱úi̱. Kándíxaníi̱ ña̱ mií Jehová kivi kuniñúʼura nda̱a̱ ndáakana ña̱ kachíñuna nu̱úra, tá kándíxana ña̱ chindeétáʼanra xíʼinna”.

14. Nda̱a̱ táki̱ʼva káchi Colosenses 1:29, ¿ndáaña xíniñúʼu keʼéyó tá kúni̱yó ná kuniñúʼu Jehová miíyó?

¹⁴ Jehová ku̱a̱ʼání ki̱ʼva xíniñúʼura na̱ ndásakáʼnu-ñaʼá ña̱ keʼéna ña̱ kúni̱ra. Ta miíyó,  ¿ndáaña xa̱a̱yó keʼéyó ixaa Jehová? Miívayó kúú na̱ xíniñúʼu chika̱a̱ní ndee̱ (kaʼvi Colosenses 1:29). * Tá ná taxiyó ña̱ kuniñúʼu Jehová miíyó, miíra chindeétáʼan xíʼinyó ña̱ natúʼunyó xíʼin ña̱ si̱í-ini, ña̱ viíní sánáʼa̱yó, ña̱ kuxini̱yó sandíkoyó-ini inkana, ña̱ kooyó iin na̱ viíní kachíñu, á iin migo na̱ va̱ʼaní, á keʼéyó inkaka ña̱ʼa ña̱ va̱ʼa saxínuyó ña̱ kúni̱ra.

15. Nda̱a̱ táki̱ʼva káchi 1 Timoteo 4:12, 15, ¿ndáaña xíniñúʼu ndukú ta̱ va̱lí nu̱ú Jehová?

¹⁵ ¿Á kúún iin ta̱ loʼo ta̱ xa̱a̱ ku̱a̱ʼa̱n kúchée? Vitin xíniñúʼuna na̱ ta̱a na̱ íyo ndee̱ na̱ kúni̱ kachíñu, ña̱ va̱ʼa koona siervo ministerial. Ti̱xin ku̱a̱ʼání congregación, íyoníka na̱ anciano nu̱ú na̱ siervo ministerial. ¿Á kivi chika̱a̱kaún ndee̱ ña̱ keʼún ku̱a̱ʼáka chiñu ti̱xin congregación? Sava yichi̱ na̱ hermano káchina: “Xa̱a̱ kúsi̱í-inii̱ ña̱ kúi̱ publicador ta va̱ása xíniñúʼukaví keʼíi̱ inkaka chiñu”. Tá saá ndóʼún, ka̱ʼa̱n xíʼin Jehová ná chindeétáʼanra xíʼún ña̱ va̱ʼa kuni̱ún koún siervo ministerial, ta saátu ña̱ taxira ndee̱ ndaʼún ña̱ va̱ʼa kachíñukaún nu̱úra (Ecl. 12:1). Kúni̱ndi̱ ña̱ ná chindeétáʼún xíʼindi̱ (kaʼvi 1 Timoteo 4:12, * 15). *

16. ¿Ndáaña xíniñúʼu ndukúyó nu̱ú Jehová, ta nda̱chun?

¹⁶ Jehová kivi keʼéra ku̱a̱ʼání ña̱ʼa ña̱ va̱ʼa kuniñúʼura miíyó ña̱ saxínuyó ña̱ kúni̱ra. Xa̱ʼa̱ ña̱kán, ná ka̱ʼa̱nyó xíʼinra ña̱ ná chindeétáʼanra xíʼinyó ña̱ kuni̱yó kachíñuyó nu̱úra, ta saátu ná ka̱ʼa̱nyó xíʼinra ña̱ taxira ndee̱ ndaʼa̱yó ña̱ keʼéyóña. Kúúyó na̱ va̱lí á na̱ xa̱a̱ chée, ná kuniñúʼuyó tiempoyó, ndee̱yó, xíʼin ña̱ xíni̱yó keʼéyó ña̱ va̱ʼa ndasakáʼnuyó Jehová vitin (Ecl. 9:10). Ná va̱ása taxiyó kasi ña̱ yíʼviyó nu̱úyó ña̱ keʼéyó ña̱ kúni̱ Jehová, ni ña̱ ndákanixi̱níyó ña̱ va̱ása ndáyáʼviyó nu̱úra. Ni loʼo á ku̱a̱ʼá kúú ña̱ kéʼéyó, ndiʼivayó kivi ndasakáʼnu yiváyó ta̱ kúʼvi̱ní-ini xíni miíyó.