1. ¿Nda̱chun va̱ʼa kúnda̱a̱-iniyó ña̱ ndóoyó “ki̱vi̱ nu̱ú ndíʼi”?

TÁ MIÍYÓ ka̱kuyó tá xa̱a̱ ni̱ya̱ʼa ña̱ ku̱i̱ya̱ 1914, xa̱a̱ ndiʼi tiempo ndóovayó “ki̱vi̱ nu̱ú ndíʼi” (2 Tim. 3:1). Ndiʼiyó xíniso̱ʼoyó nu̱ú noticia ña̱ xa̱a̱ xínu ña̱ ni̱ka̱ʼa̱n ta̱ Jesús koo tiempo ña̱ ndóoyó vitin: guerra, so̱ko, ña̱ táa̱n, ña̱ íyo kue̱ʼe̱, ña̱ íyo ku̱a̱ʼáníka tu̱ndóʼo xíʼin ña̱ va̱ása táxika na̱ yiví ña̱ natúʼunyó xa̱ʼa̱ Ndióxi̱, xíʼin inkakaña (Mat. 24:3, 7-9, 12; Luc. 21:10-12). Saátu xítoyó ña̱ íyo na̱ yiví na̱ kéʼé nda̱a̱ táki̱ʼva ni̱ka̱ʼa̱n ta̱ apóstol Pablo (koto recuadro “ ¿Ndáa ki̱ʼva íyo na̱ yiví tiempo vitin?”). Miíyó na̱ ndásakáʼnu Jehová kúnda̱a̱ káxi iniyó ña̱ ndóoyó “ki̱vi̱ nu̱ú ndíʼi” (Miq. 4:1).

2. ¿Ndáa pregunta kúú ña̱ ndakuiinyó?

² Nda̱a̱ tá ku̱i̱ya̱ 1914 ta nda̱a̱ vitin xa̱a̱ ku̱a̱ʼání ku̱i̱ya̱ ni̱ya̱ʼa, ña̱kán xa̱a̱ yatin “ki̱vi̱ nu̱ú ndíʼi” kúú ña̱ ndóoyó. Ña̱ ndiʼi-xa̱ʼa̱ ña̱ ñuyǐví yóʼo xa̱a̱ ku̱yatinkaña, xa̱ʼa̱ ña̱kán xíniñúʼu ndakuiinyó u̱vi̱ pregunta ña̱ ndáyáʼviní: ¿Ndáaña kuu tá ná ndiʼi ki̱vi̱ so̱ndíʼi? Ta, ¿ndáaña ndátu Jehová keʼéyó vitin?

3. Nda̱a̱ táki̱ʼva káchi profecía ña̱ va̱xi nu̱ú 1 Tesalonicenses 5:1-3, ¿ndáaña ka̱ʼa̱n na̱ chíñu?

³ (Kaʼvi 1 Tesalonicenses 5:1-3). * Ta̱ Pablo káʼa̱nra xa̱ʼa̱ “ki̱vi̱ Jehová”. Ña̱ tu̱ʼun yóʼo, káʼa̱nña xa̱ʼa̱ tá ná kixáʼana sandiʼi-xa̱ʼa̱na Babilonia ña̱ káʼnu, ña̱ kúú ndiʼi veʼe-ñu̱ʼu vatá ña̱ íyo iníísaá ñuyǐví, ta ña̱yóʼo ndiʼiña tá ná kixáʼa ña̱ Armagedón  (Apoc. 16:14, 16; 17:5). Tá kúma̱ní si̱lóʼo ña̱ kixáʼa ña̱ “ki̱vi̱” yóʼo, na̱ chíñu ka̱ʼa̱nna “va̱ʼaní kundooyó vitin ta va̱ása yi̱ʼvíkayó”. Na̱ chíñu na̱ íyo iníísaá ñuyǐví, sava xíniñúʼuna táʼan ña̱ tu̱ʼun yóʼo ña̱ ka̱ʼa̱nna xa̱ʼa̱ ña̱ ndakundoo va̱ʼana. * Soo ña̱ káʼa̱n Biblia xa̱ʼa̱, xa̱a̱ síínva kooña. ¿Nda̱chun? Saáchi tá ná ka̱ʼa̱nna ña̱yóʼo, ku̱a̱ʼání na̱ yiví kandíxana ña̱ na̱ chíñu na̱ íyo iníísaá ñuyǐví, ku̱chiñuna ta̱xina ña̱ va̱ʼaní koona ta va̱ása yi̱ʼvíkana. Soo, saá kúú ña̱ iin kama kixaa̱ ña̱ gran tribulación ta sandiʼi-xa̱a̱ña ndiʼina (Mat. 24:21).

4. a) ¿Ndáaña va̱ása xíni̱yó xa̱ʼa̱ ña̱ tu̱ʼun “va̱ʼaní kundooyó vitin ta va̱ása yi̱ʼvíkayó”? b) ¿Ndáaña xa̱a̱ kúnda̱a̱-iniyó xa̱ʼa̱ña?

⁴ Kúnda̱a̱-iniyó xa̱ʼa̱ sava ña̱ ka̱ʼa̱n na̱ chíñu xa̱ʼa̱ ña̱ “va̱ʼaní kundooyó vitin ta va̱ása yi̱ʼvíkayó”. Soo saátu íyo sava ña̱ va̱ása xíni̱yó, tá kúú ndáa ki̱ʼva kixáʼana ka̱ʼa̱nna ña̱yóʼo, ta nda̱saa keʼénaña. Saátu va̱ása xíni̱yó á ku̱a̱ʼá yichi̱ ka̱ʼa̱nnaña á iin kuití yichi̱. Soo nda̱a̱ ndáaka ña̱ ná ka̱ʼa̱nna, íyova iin ña̱ kúnda̱a̱-iniyó: ña̱ va̱ása xíniñúʼu taxiyó ña̱ sandáʼvina miíyó, ta kandíxayó ña̱ na̱ chíñu na̱ íyo iníísaá ñuyǐví kuchiñuna taxina ña̱ va̱ʼa kundooyó. Ta ña̱yóʼo, xa̱a̱ ku̱a̱ʼání tiempo ndátuyó ña̱ ná ka̱ʼa̱nnaña, ta ña̱yóʼo kúú ña̱ na̱ʼa̱ nu̱úyó ña̱ xa̱a̱ ku̱nu̱mí kixaa̱ “ki̱vi̱ Jehová”.

5. ¿Nda̱saa chíndeétáʼan 1 Tesalonicenses 5:4-6 xíʼinyó ña̱ koo tu̱ʼvayó ña̱ kixaa̱ “ki̱vi̱ Jehová”?

⁵ (Kaʼvi 1 Tesalonicenses 5:4-6). * Ta̱ Pablo káʼa̱nra xíʼinyó xa̱ʼa̱ ña̱ xíniñúʼu keʼéyó ña̱ va̱ʼa koo tu̱ʼvayó tá ná kixaa̱ “ki̱vi̱ Jehová”. Va̱ása xíniñúʼu ku̱su̱nyó nda̱a̱ táki̱ʼva kéʼé inkana, chi xíniñúʼu kunditoyó ta koo tu̱ʼvayó. Tá kúú, xíniñúʼu kiʼinyó kuenta ña̱ va̱ása ki̱ʼviyó xíʼin ña̱ política ña̱ íyo ñuyǐví yóʼo, ta ya̱ʼandosóyó ña̱ káʼa̱n Jehová. Chi tá saá ná keʼéyó, kivi xa̱a̱yó kooyó táʼan na̱ ñuyǐví yóʼo (Juan 15:19). Kúnda̱a̱-iniyó ña̱ iinlá Reino Ndióxi̱ kivi taxi ña̱ kundoo va̱ʼayó.

6. ¿Nda̱chun kúni̱yó chindeétáʼanyó xíʼin na̱ yiví?

⁶ Ta saátu kúni̱yó chindeétáʼanyó xíʼin inkana, ña̱ kunda̱a̱-inina xa̱ʼa̱ ña̱ káʼa̱n Biblia xa̱ʼa̱ ña̱ kundoʼo ña̱ ñuyǐví yóʼo. Ná ndakaʼányó chi tá ná kixáʼa ña̱ gran tribulación, na̱ yiví va̱ása kivika nandukúna Jehová. Xa̱ʼa̱ ña̱yóʼo, xíniñúʼu kamaní ku̱ʼu̱nyó natúʼunyó xíʼinna. *

7. ¿Ndáaña ndátu Jehová keʼéyó vitin?

⁷ Xa̱ʼa̱ ña̱ si̱lóʼo tiempo kíndo̱o ña̱ kixaa̱ “ki̱vi̱ Jehová”, kúni̱ra ña̱ ná ndakundeéyó natúʼunyó xa̱ʼa̱ra. Ta xíniñúʼu chika̱a̱yó ndee̱ ña̱ keʼéyó chiñu yóʼo (1 Cor. 15:58). Tá ni̱ka̱ʼa̱n ta̱ Jesús  xa̱ʼa̱ ndiʼi ña̱ kuu ki̱vi̱ nu̱ú ndíʼi, ni̱ka̱ʼa̱nra xa̱ʼa̱ ndáaña keʼé miíyó na̱ ndásakáʼnu Ndióxi̱. Ni̱ka̱ʼa̱nra: “Siʼna xíniñúʼu sakuaʼa ndiʼi na̱ yiví xa̱ʼa̱ Ndióxi̱” (Mar. 13:4, 8, 10; Mat. 24:14). Ná ndakanixi̱níyó xa̱ʼa̱ ña̱yóʼo: ndiʼi yichi̱ ña̱ ku̱a̱ʼa̱nyó nátúʼunyó, chíka̱a̱yó ndee̱ ña̱ va̱ʼa xi̱nu ña̱ profecía yóʼo.

8. ¿Ndáaña náʼa̱ nu̱úyó ña̱ ku̱a̱ʼání kúú na̱ nátúʼun xa̱ʼa̱ Reino Ndióxi̱?

⁸ Ku̱i̱ya̱ tá ku̱i̱ya̱, ku̱a̱ʼáka na̱ yiví xíniso̱ʼo tu̱ʼun va̱ʼa xa̱ʼa̱ Reino Ndióxi̱. Ná kotoyó xa̱a̱ nda̱saa kúú na̱ nátúʼun xa̱ʼa̱ Reino Ndióxi̱, íyo iníísaá ñuyǐví tiempo vitin. Tá ku̱i̱ya̱ 1914, ni̱xi̱yo 5,155 na̱ publicador nu̱ú 43 país. Ta tiempo vitin, xa̱a̱ 8,500,000 kúúyó nu̱ú 240 país xíʼin ñuu válí. Soo ta̱ʼánví ndiʼi ña̱ nátúʼunyó xa̱ʼa̱ Ndióxi̱. Xíniñúʼu ndakundeéyó natúʼunyó xíʼin na̱ yiví, ña̱ iinlá Reino Ndióxi̱ kivi sandiʼi-xa̱ʼa̱ tu̱ndóʼo ña̱ íyo ñuyǐví yóʼo (Sal. 145:11-13).

9. ¿Nda̱chun xíniñúʼu ndakundeékayó natúʼunyó xa̱ʼa̱ Ndióxi̱?

⁹ Ndakundeékavayó natúʼunyó, nda̱a̱ ná ka̱ʼa̱n mií Jehová xíʼinyó ña̱ va̱ása natúʼunkayó. ¿Nda̱saaka tiempo íyo nu̱ú na̱ yiví ña̱ xa̱a̱na kunda̱a̱-inina xa̱ʼa̱ Jehová xíʼin ta̱ Jesús? (Juan 17:3). Va̱ása xíni̱yó. Soo ña̱ kúnda̱a̱-iniyó kúú, ña̱ nani ta̱ʼán kixaa̱ ña̱ gran tribulación, ndiʼi na̱ yiví na̱ kúni̱ kutaku ndiʼi tiempo kiviva sakuaʼana xa̱ʼa̱ Ndióxi̱ (Hech. 13:48). ¿Nda̱saa kivi chindeétáʼanyó xíʼin na̱ yiví yóʼo tá íyoka tiempo?

10. ¿Ndáaña táxi Jehová ndaʼa̱yó ña̱ va̱ʼa sanáʼa̱yó ña̱ nda̱a̱ na̱ yiví?

¹⁰ Jehová xíniñúʼura na̱ ñuura ña̱ va̱ʼa taxina ndiʼi ña̱ xíniñúʼuyó, ña̱ sanáʼa̱yó na̱ yiví xa̱ʼa̱ra. Tá kúú, ndiʼi semana sánáʼa̱ra miíyó ti̱xin reunión ña̱ xíyo ma̱ʼñú semana, kán sákuaʼayó ndáaña ka̱ʼa̱nyó yichi̱ nu̱ú, ta ndáaña ka̱ʼa̱nyó tá ná ndikóyó, ta saátu ndáa ki̱ʼva kaʼviyó xíʼin na̱ yiví. Ta saátu, na̱ ñuu Ndióxi̱ táxina ku̱a̱ʼání ña̱ va̱ʼa ndaʼa̱yó tá kúú nu̱ú va̱xi tutu ña̱ xíniñúʼuyó. Ña̱yóʼo kivi chindeétáʼanña xíʼinyó:

• ña̱ kixáʼayó ka̱ʼa̱nyó xíʼin na̱ yiví,

• ña̱ chindeétáʼanyó xíʼinna ña̱ kúni̱na kunda̱a̱-inina,

• ña̱ kuni̱na kunda̱a̱ka-inina xa̱ʼa̱ ña̱ káʼa̱n Biblia,

• ña̱ sanáʼa̱yó ña̱ nda̱a̱ tá káʼviyó xíʼinna

• ña̱ ka̱ʼa̱nyó xíʼin na̱ kúni̱ kunda̱a̱ka-ini ña̱ ki̱ʼvina nu̱ú sitio ña̱ Internet á ña̱ ku̱ʼu̱nna Salón nu̱ú ndátakayó.

 Ta ni xa̱a̱ kúúmiíyó ndiʼi ña̱yóʼo, xíniñúʼu kuniñúʼuyóña. * Tá kúú, tá nátúʼunyó xíʼin iin na̱ yiví na̱ va̱ʼaní xíniso̱ʼo sándakooyó iin tratado á iin revista ndaʼa̱na, saá kivi kaʼvikana xa̱ʼa̱ ña̱ na̱túʼunyó xíʼinna nda̱a̱ ná ndikóyó inka yichi̱ nu̱úna. Iin tá iin miíyó xíniñúʼu ndakundeéyó natúʼunyó xíʼin na̱ yiví ndiʼi yo̱o̱.

11. ¿Nda̱chun íyo ña̱ káʼviyó xíʼin na̱ yiví nu̱ú Internet?

¹¹ Ná kotoyó ndáa inka ki̱ʼva chíndeétáʼan Jehová xíʼin na̱ yiví ña̱ kunda̱a̱-inina ña̱ nda̱a̱ xa̱ʼa̱ra. Nu̱ú jw.org^®, va̱ʼa kaʼviyó xíʼin na̱ yiví. * ¿Nda̱chun íyo ña̱yóʼo? Ndiʼi yo̱o̱, ku̱a̱ʼání na̱ yiví na̱ íyo iníísaá ñuyǐví kíʼvina nu̱ú Internet ta ndúkúna ña̱ kaʼvina xíʼinna. Ta na̱ kíʼvi yóʼo kivi sanáʼa̱nana ña̱ nda̱a̱ xa̱ʼa̱ tu̱ʼun Ndióxi̱. Sava na̱ yiví na̱ káʼa̱nyó xíʼin, sana xíínna ña̱ kaʼviyó Biblia xíʼinna. Tá saá, ná ka̱ʼa̱nyó xíʼinna ña̱ ki̱ʼvina nu̱ú sitioyó á ña̱ ki̱ʼvina nu̱ú kivi ndani̱ʼína tutu ña̱ íyo tu̱ʼun ña̱ kúnda̱a̱-inina.

12. ¿Ndáaña kivi sakuaʼa na̱ yiví tá káʼviyó xíʼinna nu̱ú Internet?

¹² Tá káʼviyó xíʼin na̱ yiví nu̱ú Internet kivi ka̱ʼa̱nyó xíʼinna xa̱ʼa̱ Biblia ta saátu ndáana xíʼin tu̱ʼun ña̱yóʼo, ta ndáaña va̱ʼa káʼa̱nña xíʼinyó. Tá ná kaʼviyó ña̱yóʼo xíʼin na̱ yiví kán kivi kunda̱a̱-inina xa̱ʼa̱ ña̱yóʼo:

• nda̱saa chíndeétáʼan Biblia xíʼinyó,

• ndáa ta̱ kúú Jehová ta̱ Jesús xíʼin na̱ ángel,

• nda̱chun i̱xava̱ʼa Ndióxi̱ na̱ yiví,

• nda̱chun íyoní tu̱ndóʼo xíʼin ña̱ kini.

Ta saátu kivi kunda̱a̱-inina xa̱ʼa̱ ña̱yóʼo:

• ndáaña keʼé Jehová ña̱ sandiʼi-xa̱ʼa̱ra tu̱ndóʼo xíʼin ña̱ xíʼi̱yó,

• ndáa ki̱ʼva sandátakura na̱ ni̱xi̱ʼi̱,

• ta ndáa ki̱ʼva nasamara na̱ chíñu na̱ íyo ñuyǐví yóʼo xíʼin Reinora.

13. Tá xa̱a̱ káʼviyó xíʼin na̱ yiví nu̱ú Internet, ¿á kúni̱ kachiña ña̱ va̱ása xíniñúʼuka kaʼviyó xíʼinna veʼena?

¹³ Ni xa̱a̱ káʼviyó xíʼin na̱ yiví nu̱ú Internet va̱ása kúni̱ kachiña, ña̱ va̱ása xíniñúʼuka kaʼviyó xíʼin na̱ yiví veʼena. Ta̱ Jesús ni̱ka̱ʼa̱nra ña̱ ná ku̱ʼu̱nyó natúʼunyó xíʼin na̱ yiví ña̱ xa̱a̱na koona discípulora. Kúni̱yó ña̱ ndiʼi na̱ yiví na̱ kúni̱ kunda̱a̱-ini ná kaʼvina xíʼinyó nu̱ú Internet, ta ná kundayáʼvi ña̱yóʼo nu̱úna, ta ná kuni̱kana kunda̱a̱-inina. Tá ná kuu ña̱yóʼo, sana kandíxana ña̱ ku̱ʼu̱n iin na̱ publicador kaʼvina Biblia xíʼinna veʼena. Tá xa̱a̱ ndíʼi káʼvina iin lección, káʼa̱nna xíʼinna ña̱ kivi ka̱ʼa̱nna xíʼin iinna ña̱ ná ku̱ʼu̱nna kotonana ta chindeétáʼanna xíʼinna ña̱ kunda̱a̱ka-inina. Ndiʼi ki̱vi̱, nu̱ú Internet ndákiʼinyó ki̱ʼva 230 solicitud na̱ yiví na̱ íyo iníísaá ñuyǐví na̱ kúni̱ sakuaʼa xa̱ʼa̱ Biblia. Ndáyáʼviní ña̱ ná kaʼviyó xíʼin iin tá iin na̱ yiví.

14. Nda̱a̱ táki̱ʼva káchi ña̱ ni̱ka̱ʼa̱n ta̱ Jesús nu̱ú Mateo 28:19, 20, ¿ndáaña chíka̱a̱yó ndee̱ keʼéyó, ta nda̱chun?

¹⁴ (Kaʼvi Mateo 28:19, 20). * Tá káʼviyó xíʼin na̱ yiví, xíniñúʼu chika̱a̱yó ndee̱ ña̱ chindeétáʼanyó xíʼinna ña̱ kundiku̱nna ta̱ Jesús ta sanáʼa̱yóna ña̱ kuniso̱ʼona ndiʼi ña̱ ni̱ka̱ʼa̱nra. Xíniñúʼu chindeétáʼanyó xíʼinna ña̱ kunda̱a̱-inina ña̱ ndáyáʼviní sakuaʼana xa̱ʼa̱ Jehová ta kundiku̱nna ña̱ chíñura. Ña̱yóʼo kúni̱ kachiña, ña̱ chika̱a̱yó ndee̱ xíʼinna ña̱ keʼéna ña̱ sakuaʼana, ta ndataxina miína ndaʼa̱ Jehová ta ndakuchina. Saá kúú ña̱ kivi ka̱kuna tá ná kixaa̱ ki̱vi̱ Jehová (1 Ped. 3:21).

15. ¿Ndáaña kǒoka tiempo nu̱úyó keʼéyó, ta nda̱chun?

¹⁵ Nda̱a̱ táki̱ʼva xa̱a̱ ku̱nda̱a̱-iniyó, ndáa si̱lóʼo kúma̱ní ña̱ ndiʼi-xa̱ʼa̱ ñuyǐví. Xa̱ʼa̱ ña̱yóʼo, kǒoka  tiempo nu̱úyó ña̱ kaʼviyó xíʼin na̱ yiví na̱ va̱ása chíka̱a̱ ndee̱ ña̱ kundiku̱nna ta̱ Jesús (1 Cor. 9:26). Xíniñúʼu kamaní keʼéyó chiñuyó, chi íyo ku̱a̱ʼáníka na̱ yiví na̱ kúma̱níka kunda̱a̱-ini xa̱ʼa̱ Ndióxi̱, tá íyoka tiempo nu̱úna vitin.

16. Nda̱a̱ táki̱ʼva káchi Apocalipsis 18:2, 4, 5, 8, ¿ndáaña xíniñúʼu keʼé ndiʼiyó? (Koto nota).

¹⁶ (Kaʼvi Apocalipsis 18:2, * 4, 5, * 8). * Ña̱ versículo yóʼo káʼa̱nña xa̱ʼa̱ ndáaka ña̱ kúni̱ Jehová ná keʼéyó. Ndiʼi miíyó na̱ ndásakáʼnu Jehová xíniñúʼu kuxíkayó nu̱ú Babilonia ña̱ káʼnu. Sava na̱ káʼviyó xíʼin, sana xi̱xa̱ʼa̱nna iin veʼe-ñu̱ʼu vatá, tá kúma̱níka sakuaʼana ña̱ nda̱a̱, ta xi̱keʼéna táʼan ña̱ kéʼé na̱kán, á xi̱taxina xu̱ʼún. Tá kúma̱níka ña̱ ka̱ʼa̱nna xíʼinna ña̱ kiviva koona publicador, xíniñúʼu sandákoona ña̱ kutáʼanna xíʼin na̱ veʼe-ñu̱ʼu vatá. Xíniñúʼu keʼéna iin carta ña̱ ka̱ʼa̱n xíʼin na̱ veʼe-ñu̱ʼu nu̱ú xi̱xa̱ʼa̱nna ña̱ va̱ásaka kutáʼanna xíʼinna, á xíʼin inkaka ña̱ kítáʼan xíʼin Babilonia ña̱ káʼnu. *

17. ¿Ndáa chiñu kúú ña̱ va̱ása xíniñúʼu keʼéyó, ta nda̱chun?

¹⁷ Miíyó na̱ ndásakáʼnu Ndióxi̱ xíniñúʼu kiʼinyó kuenta ña̱ chiñu ña̱ kéʼéyó ná va̱ása kitáʼanña xíʼin Babilonia ña̱ káʼnu (2 Cor. 6:14-17). Tá kúú, va̱ása kachíñuyó xíʼin na̱ veʼe-ñu̱ʼu vatá. Ta saátu, tá kachíñuyó xíʼin iin empresa va̱ása keʼéyó nda̱a̱ ni iin chiñu ña̱ kítáʼan xíʼin veʼe-ñu̱ʼu vatá. Soo tá kúúmiíyó iin negocio, va̱ása kachíñuyó á kiʼinyó iin chiñu ña̱ táxina ndaʼa̱yó ña̱ kítáʼan xíʼin Babilonia ña̱ káʼnu. ¿Nda̱chun va̱ása kéʼéyó nda̱a̱ ni iin ña̱yóʼo? Saáchi va̱ása kúni̱yó kítáʼanyó xíʼin na̱ veʼe-ñu̱ʼu vatá á keʼéyó ña̱ kéʼéna chi ña̱ yaku̱a̱ kúú ña̱yóʼo nu̱ú Jehová (Is. 52:11). *

18. ¿Ndáaña ke̱ʼé iin ta̱ hermano tá ni̱ka̱ʼa̱nna xíʼinra ña̱ keʼéra iin chiñu ti̱xin veʼe-ñu̱ʼu?

¹⁸ Xa̱a̱ íyo ku̱a̱ʼání ku̱i̱ya̱, iin ta̱ ndúkú na̱ kachíñu ni̱ka̱ʼa̱nra xíʼin iin ta̱ anciano tá kúúmií iin negocio, ña̱ ná keʼéra iin chiñu ña̱ carpintería ti̱xin iin veʼe-ñu̱ʼu ña̱ íyo ñuu nu̱ú íyora. Ta̱ ndúkú na̱ kachíñu yóʼo, xa̱a̱ kúnda̱a̱va-inira ña̱  ta̱ hermano yóʼo va̱ása xíínra keʼéra chiñu ti̱xin nda̱a̱ ni iin veʼe-ñu̱ʼu. Soo ta̱ ta̱a yóʼo xa̱a̱ xíniñúʼuníra iin na̱ keʼé ña̱ chiñu yóʼo. Ta ni saá, ta̱ hermano yóʼo i̱xato̱ʼóra ña̱ káʼa̱n Biblia ta va̱ása níxiinra keʼéra ña̱ chiñu yóʼo. Tá inka semana, nu̱ú iin periódico ña̱ ka̱na ñuu kán, va̱xi na̱ʼná inka ta̱ carpintero ña̱ chínundaara iin cruz iin veʼe-ñu̱ʼu. Tá níkeʼé ta̱ hermano ña̱ chiñu yóʼo, sana ta̱yóʼo kúú ta̱ kita nu̱ú ña̱ periódico. Ta ná ndakanixi̱níyó ndáaña kundoʼo na̱ congregación xa̱ʼa̱ ña̱yóʼo, ta ndáaña kundoʼo Jehová.

19, 20. a) ¿Ndáaña xa̱a̱ sa̱kuaʼayó? b) ¿Ndáa inkaka ña̱ xíniñúʼu sakuaʼayó?

¹⁹ Nda̱a̱ táki̱ʼva káchi profecía ña̱ va̱xi nu̱ú Biblia, ña̱ ndáyáʼviní ña̱ ka̱ʼa̱n na̱ chíñu kúú ña̱ “va̱ʼaní kundooyó vitin ta va̱ása yi̱ʼvíkayó”. Soo Jehová sánáʼa̱ra miíyó ña̱ na̱ chíñu, va̱ása kuchiñuna taxina ña̱ va̱ʼaní koo na̱ yiví ndiʼi tiempo. ¿Ndáaña xíniñúʼu keʼéyó tá kúma̱níka kuu ña̱yóʼo, á tá ná ndiʼi-xa̱ʼa̱ ña̱ ñuyǐví yóʼo? Ndióxi̱ kúni̱ra ña̱ ná ndakundeéyó natúʼunyó xa̱ʼa̱ra, ta chika̱a̱yó ndee̱ ña̱ chindeétáʼanyó xíʼin na̱ yiví ña̱ kundiku̱nna ta̱ Jesús. Ta saátu, ña̱ kuxíkayó nu̱ú ña̱ veʼe-ñu̱ʼu vatá. Ña̱yóʼo kúni̱ kachiña, ña̱ sandákooyó ña̱ kutáʼanyó xíʼin na̱ veʼe-ñu̱ʼu vatá, ta saátu chiñu ña̱ keʼéyó ná va̱ása kitáʼanña xíʼin Babilonia ña̱ káʼnu.

²⁰ Íyo ku̱a̱ʼáka ña̱ kuu “ki̱vi̱ nu̱ú ndíʼi” ta saátu íyo ku̱a̱ʼáka ña̱ ndátu Jehová ná keʼéyó. ¿Ndáaña kúúña? Ta, ¿nda̱saa kivi koo tu̱ʼvayó nu̱ú ndiʼi ña̱ kuu chí nu̱únínu? Nu̱ú ña̱ inka artículo kunda̱a̱-iniyó xa̱ʼa̱ña.