1, 2. a) ¿Ndáaña xa̱a̱ ku̱nu̱mí ka̱ʼa̱n na̱ chíñu? b) ¿Ndáa pregunta xíniñúʼu ndakuiinyó?

NÁ NDAKANIXI̱NÍYÓ ña̱ sa̱kán ni̱ka̱ʼa̱n na̱ chíñu xa̱ʼa̱ ña̱ “va̱ʼaní kundooyó vitin ta va̱ása yi̱ʼvíkayó”. Ta sana nda̱a̱ kivi ni̱nuní kunina, xa̱ʼa̱ ña̱ ku̱chiñuna ta̱xina ña̱ va̱ʼa kundoo na̱ yiví iníísaá ñuyǐví. Ta kuni̱na sandáʼvina miíyó, ña̱ kandíxayó ña̱ ku̱chiñuna ta̱xina ña̱ kundoo va̱ʼayó. Soo mií ña̱ nda̱a̱, va̱ása kuchiñuna xíʼin ña̱ kixaa̱ tá ná ndiʼi. ¿Nda̱chun va̱ása kuchiñuna? Saáchi ña̱ Biblia káchiña ña̱ “iin kama kixaa̱ ña̱ ndiʼi-xa̱ʼa̱na, [...] ta va̱ása ka̱kuna nu̱ú ña̱yóʼo” (1 Tes. 5:3).

² Xa̱ʼa̱ ña̱yóʼo, íyo sava pregunta ña̱ ndáyáʼviní ña̱ xíniñúʼu ndakuiinyó: ¿Ndáaña kuu ti̱xin ña̱ gran tribulación? ¿Ndáaña ndátu Jehová keʼéyó? Ta, ¿ndáaña xíniñúʼu keʼéyó vitin, ña̱ va̱ʼa nda̱kú koo iniyó ti̱xin ña̱ gran tribulación? (Mat. 24:21).

3. Nda̱a̱ táki̱ʼva káchi Apocalipsis 17:5, 15-18, ¿nda̱saa sandiʼi-xa̱ʼa̱ Jehová “Babilonia ña̱ káʼnu”?

³ (Kaʼvi Apocalipsis 17:5, * 15-18). * “Babilonia ña̱ káʼnu” ndiʼi-xa̱ʼa̱ña. Nda̱a̱ táki̱ʼva xa̱a̱ ni̱ka̱ʼa̱nyó, na̱ ñuyǐví va̱ása kuchiñuna  kasina ña̱ kuu ña̱yóʼo. ¿Nda̱chun va̱ása kuchiñuna? Saáchi mií Ndióxi̱ “chika̱a̱ra níma̱na ña̱ ná keʼéna ña̱ kúni̱ra”. ¿Ndáaña koo ña̱yóʼo? Ña̱ sandiʼi-xa̱ʼa̱na ndiʼi na̱ veʼe-ñu̱ʼu vatá, xíʼin na̱ káʼa̱n kúú cristiano. Ndióxi̱ chika̱a̱ra ña̱yóʼo níma̱ u̱xu̱ ndiki̱ tí kití yukú tí color kúaʼa. Ña̱ u̱xu̱ ndiki̱ yóʼo kúú na̱ chíñu na̱ chíndeétáʼan xíʼin tí kití yukú, á na̱ kúú na̱ Naciones Unidas (Apoc. 17:3, 11-13; 18:8). Tá ná kixáʼa na̱ chíñu yóʼo kanitáʼanna xíʼin na̱ veʼe-ñu̱ʼu vatá, saá kúú ña̱ kixáʼa ña̱ gran tribulación. Ta ña̱yóʼo iin kama kixaa̱ña sa̱tá na̱ ñuyǐví, ta i̱yoní kooña.

4. a) ¿Ndáaña sana ka̱ʼa̱n na̱ chíñu tá ná kixáʼana sandiʼi-xa̱ʼa̱na Babilonia ña̱ káʼnu? b) ¿Ndáaña sana keʼé na̱ xi̱kitáʼan xíʼin na̱ veʼe-ñu̱ʼu vatá?

⁴ Va̱ása xíni̱yó ndáaña ka̱ʼa̱n na̱ chíñu ña̱ va̱ʼa kixáʼana sandiʼi-xa̱ʼa̱na Babilonia ña̱ káʼnu. Sana ka̱ʼa̱nna ña̱ na̱ veʼe-ñu̱ʼu sásina nu̱úna ña̱ kundoo va̱ʼana, chi na̱yóʼo kíʼvinína xíʼin ña̱ política. Á kivitu ka̱ʼa̱nna xa̱ʼa̱na ña̱ kúúmiína ku̱a̱ʼání ña̱ ku̱i̱ká (Apoc. 18:3, 7). Soo ña̱yóʼo, va̱ása kúni̱ kachiña ña̱ sandiʼi-xa̱ʼa̱na ndiʼi na̱ kítáʼan xíʼin na̱ veʼe-ñu̱ʼu yóʼo. Chi ña̱ keʼéna kúú ña̱ va̱ása taxikana ña̱ ndakutáʼan na̱ veʼe-ñu̱ʼu vatá. Tá xa̱a̱ ná ndiʼi-xa̱ʼa̱ ña̱yóʼo, na̱ xi̱kitáʼan xíʼin na̱ veʼe-ñu̱ʼu yóʼo kiʼinna kuenta ña̱ va̱ása níkuchiñu na̱ xi̱niʼi yichi̱ nu̱úna, ta xa̱ʼa̱ ña̱yóʼo kuxíkana nu̱ú na̱ veʼe-ñu̱ʼu.

5. ¿Ndáaña ni̱ka̱ʼa̱n Jehová xa̱ʼa̱ ña̱ gran tribulación, ta nda̱chun?

⁵ Ña̱ Biblia va̱ása káʼa̱nña nda̱saa tiempo sandiʼi-xa̱ʼa̱na Babilonia ña̱ káʼnu, soo ña̱ kúnda̱a̱-iniyó kúú ña̱ loʼova tiempo kooña (Apoc. 18:10, 21). Jehová ni̱ka̱ʼa̱nra ña̱ loʼova tiempo koo ña̱ gran tribulación, ña̱ va̱ʼa ka̱ku na̱ nda̱ka̱xinra xíʼin ndiʼi na̱ ndásakáʼnu-ñaʼá (Mar. 13:19, 20). Ña̱kán, ¿ndáaña ndátu Jehová keʼéyó tá ná kixáʼa ña̱ gran tribulación xíʼin ña̱ Armagedón?

6. ¿Ndáaña ndátu Jehová ná keʼéyó?

⁶ Nda̱a̱ táki̱ʼva xa̱ʼa̱ sa̱kuaʼayó nu̱ú artículo ña̱ ni̱ya̱ʼa, Jehová kúni̱ra ña̱ ni loʼo ná va̱ása kitáʼanyó xíʼin Babilonia ña̱ káʼnu. Soo íyo inka ña̱ xíniñúʼu keʼéyó. Ná ndakundeéyó  ndasakáʼnuyó Jehová. Ná kotoyó u̱vi̱ ki̱ʼva ña̱ kivi keʼéyóña.

7. a) ¿Ndáa ki̱ʼva náʼa̱yó ña̱ kándíxayó ndiʼi ña̱ káʼa̱n Jehová? b) Nda̱a̱ táki̱ʼva káchi Hebreos 10:24, 25, ¿nda̱chun ndáyáʼviní ña̱ ndakutáʼanyó vitin?

⁷ Ña̱ nu̱ú, xíniñúʼu kandíxayó ndiʼi ña̱ káʼa̱n Jehová xíʼinyó. Va̱ása xíniñúʼu keʼéyó táʼan ña̱ kéʼé na̱ ñuyǐví yóʼo. Tá kúú, ña̱ kini va̱ása va̱ʼaña nu̱úyó, ña̱ tíndaʼa̱ iin ta̱a xíʼin inka ta̱a á ñaʼá xíʼin ñaʼá, á inkaka ña̱ kini ña̱ kéʼéna (Mat. 19:4, 5; Rom. 1:26, 27). Ña̱ u̱vi̱, xíniñúʼu ndakundeéyó ndasakáʼnuyó Ndióxi̱ xíʼin na̱ hermanoyó. Ta kéʼéyóña nda̱a̱ ndáaka nu̱ú kivi, kúúña ti̱xin Salón, á inkaka veʼe ta saátu nda̱a̱ nu̱ú se̱ʼé. Nda̱a̱ ndáaka ña̱ ná kuu, va̱ása sandákooyó ña̱ ndakutáʼanyó ña̱ ndasakáʼnuyó Ndióxi̱yó. Ta xíniñúʼuníka keʼéyó ña̱yóʼo vitin, saáchi xa̱a̱ ku̱yatin kixaa̱ ki̱vi̱ Jehová (kaʼvi Hebreos 10:24, 25). *

8. ¿Ndáa ki̱ʼva kivi nasa̱ma ña̱ nátúʼunyó xa̱ʼa̱ Ndióxi̱?

⁸ Sana nasa̱ma ki̱ʼva ña̱ nátúʼunyó xa̱ʼa̱ Ndióxi̱, tá ná kixaa̱ ña̱ gran tribulación. Tiempo vitin nátúʼunyó xíʼin na̱ yiví xa̱ʼa̱ Reino Ndióxi̱, ta chíka̱a̱yó ndee̱ xíʼinna ña̱ kundiku̱nna ta̱ Jesús. Soo tá ná kixaa̱ ña̱ gran tribulación, sana káxiní natúʼunyó xíʼin na̱ yiví xa̱ʼa̱ ña̱ kundoʼona, ta ña̱ Biblia chítáʼanña ña̱yóʼo xíʼin ñíʼin á ñíí ña̱ ndeéní (Apoc. 16:21). Sana ka̱ʼa̱nyó xíʼinna ña̱ xa̱a̱ ku̱nu̱mí ndiʼi-xa̱ʼa̱ ñuyǐví ta̱ Ndi̱va̱ʼa. Tá ná ya̱ʼa loʼo tiempo, saá kúú ña̱ kunda̱a̱ káxi iniyó ndáaña ka̱ʼa̱nyó xíʼinna ta ndáa ki̱ʼva ka̱ʼa̱nyóña. ¿Á kuniñúʼukayó ndiʼi ña̱ xa̱a̱ yáʼaka 100 ku̱i̱ya̱ xíniñúʼuyó ña̱ natúʼunyó, á nasamavayóña? Xíniñúʼu kundatuyó saá kunda̱a̱-iniyó xa̱ʼa̱ña. Ta nda̱a̱ ndáaka ña̱ ná kuu, xíniñúʼu ndakúní koo iniyó ña̱ ku̱ʼu̱nyó natúʼunyó xa̱ʼa̱ ña̱ káʼa̱n Jehová keʼéra (Ezeq. 2:3-5).

9. ¿Ndáaña kuni̱ na̱ chíñu keʼéna tá ná kuniso̱ʼona ña̱ natúʼunyó, ta ndáaña kivi kandíxayó?

⁹ Sana na̱ chíñu sa̱a̱nína xa̱ʼa̱ ña̱ ka̱ʼa̱nyó tá ná kixáʼayó natúʼunyó, ta kuni̱na sandiʼi-xa̱ʼa̱na miíyó. Soo, nda̱a̱ táki̱ʼva kándíxayó ña̱ chíndeétáʼan Jehová xíʼinyó tá ku̱a̱ʼa̱nyó nátúʼunyó vitin, saátu ná kandíxayóra tá ná kixaa̱ tiempo kán. Ta ná kandíxayó ña̱ mií Ndióxi̱yó taxi ndee̱ ndaʼa̱yó ña̱ keʼéyó ña̱ kúni̱ra (Miq. 3:8).

10. Nda̱a̱ táki̱ʼva káchi Lucas 21:25-28, ¿ndáaña kundoʼo na̱ yiví tá ná kunina ña̱ kúu ti̱xin ña̱ gran tribulación?

¹⁰ (Kaʼvi Lucas 21:25-28). * Ti̱xin ña̱ gran tribulación, na̱ yiví yi̱ʼvínína tá ná kunina ña̱ ndíʼi-xa̱ʼa̱ ndiʼi na̱ xi̱kandíxana, tá kúú na̱ político xíʼin inkakana. Na̱yóʼo ndi̱ʼi̱ní-inina ta yi̱ʼvína xa̱ʼa̱ ña̱ kuvina, saáchi iin tiempo ña̱ i̱yoní kooña (Sof. 1:14, 15). Ta ña̱ kutakuna yo̱ʼvi̱níka kooña, ta saátu nda̱a̱ nu̱ú miíyó na̱ ndásakáʼnu Ndióxi̱. Ta sana xo̱ʼvi̱yó xa̱ʼa̱ ña̱ va̱ása kúúyó táʼan na̱ ñuyǐví yóʼo. Ta nda̱a̱ kivi kuma̱ní sava ña̱ʼa ña̱ kuniñúʼuyó.

11. a) ¿Nda̱chun ndiʼina ka̱ʼa̱n xa̱ʼa̱ miíyó? b) ¿Nda̱chun va̱ása xíniñúʼu yi̱ʼvíyó ña̱ gran tribulación?

¹¹ Kixaa̱ iin tiempo ña̱ na̱ yiví na̱ xi̱ni ña̱ ndi̱ʼi-xa̱ʼa̱ ndiʼi veʼe-ñu̱ʼuna, sa̱a̱nína xa̱ʼa̱ ña̱ ndákundeéka miíyó ndásakáʼnuyó Jehová. Ta sana ndiʼina ka̱ʼa̱n xa̱ʼa̱ ña̱yóʼo, ta nda̱a̱ nu̱ú Internet kana ña̱yóʼo. Na̱ chíñu xíʼin ta̱ Ndi̱va̱ʼa ta̱ níʼi yichi̱ nu̱úna, sa̱a̱-inina kunina miíyó chi ndáa iinlá religión miíyó kúú ña̱ ni̱ndo̱o. Ta va̱ása  níkuchiñuna sandiʼi-xa̱ʼa̱na religión ña̱ ndíku̱nyó. Ña̱kán ndiʼina ka̱ʼa̱n xa̱ʼa̱ miíyó. Saá kúú ña̱ ndakunaní na̱ chíñu Gog ña̱ Magog. * Na̱yóʼo ndakutáʼanna ña̱ ixandi̱va̱ʼana xíʼin na̱ ñuu Jehová (Ezeq. 38:2, 14-16). Ta xa̱ʼa̱ ña̱ va̱ása kúnda̱a̱ káxi iniyó xa̱ʼa̱ña, sana kivi kundi̱ʼi̱ní-iniyó xa̱ʼa̱ ña̱ kuu. Soo íyo iin ña̱ kúnda̱a̱-iniyó: va̱ása xíniñúʼu yi̱ʼvíyó ña̱ gran tribulación, chi mií Jehová ka̱ʼa̱n xíʼinyó ndáaña keʼéyó ña̱ va̱ʼa ka̱kuyó (Sal. 34:19). Ndaku̱itayó ta ndaniʼiyó xi̱níyó xíʼin ña̱ si̱í-ini, chi kúnda̱a̱-iniyó ña̱ xa̱a̱ kuyatin ka̱kuyó. *

12. ¿Ndáa ki̱ʼva xa̱a̱ chíndeétáʼan na̱ esclavo fiel y prudente xíʼinyó ña̱ ya̱ʼayó nu̱ú ña̱ kuu chí nu̱únínu?

¹² Na̱ esclavo fiel y prudente xa̱a̱ chíndeétáʼannína xíʼinyó ña̱ nda̱kú koo iniyó ti̱xin ña̱ gran tribulación (Mat. 24:45). Xa̱a̱ ku̱a̱ʼání ki̱ʼva kéʼénaña, ná ndakanixi̱níyó xa̱ʼa̱ savaña: tá kúú ña̱ asamblea regional ña̱ ni̱xi̱yo tá ku̱i̱ya̱ 2016 nda̱a̱ 2018. Ña̱yóʼo chi̱ka̱a̱níña ndee̱ xíʼinyó ña̱ va̱ʼa ndakúka koo iniyó tá ná kixaa̱ ki̱vi̱ Jehová. Ná ndakaʼántukuyó xa̱ʼa̱ña.

13. ¿Ndáa ki̱ʼva keʼéyó ña̱ nda̱kúka koo iniyó xíʼin Jehová, ta nda̱chun xíniñúʼu keʼéyóña vitin?

¹³ Ña̱ nda̱kú-ini. Ña̱ asamblea ña̱ ni̱xi̱yo tá ku̱i̱ya̱ 2016 xi̱naníña “Seamos leales a Jehová”. Ña̱yóʼo sa̱náʼa̱ña miíyó ña̱ kivi nda̱kú koo iniyó tá va̱ʼa kítáʼanyó xíʼin Jehová. Sa̱ndákaʼánña miíyó, ña̱ tá káʼa̱nyó xíʼin Jehová xíʼin ndiʼi níma̱yó kúyatinkayó nu̱úra, ta saátu tá káʼviyó tu̱ʼunra. Ña̱yóʼo taxi ndee̱ ndaʼa̱yó ña̱ ya̱ʼayó nda̱a̱ ndáaka nu̱ú tu̱ndóʼo. Xa̱ʼa̱ ña̱ xa̱a̱ ku̱a̱ʼa̱n kuyatin ki̱vi̱ ña̱ ndiʼi-xa̱ʼa̱ ñuyǐví ta̱ Ndi̱va̱ʼa, ixayo̱ʼvi̱níkaña xíʼinyó ña̱ nda̱kú koo iniyó xíʼin Ndióxi̱ xíʼin ña̱ chíñura. Ta ku̱a̱ʼání na̱ yiví ndakundeékana ku̱a̱ku̱ndaana miíyó (2 Ped. 3:3, 4). Ta keʼéna ña̱yóʼo xíʼinyó, xa̱ʼa̱ ña̱ va̱ása kíʼviyó xíʼin nda̱a̱ ni iin na̱ chíñu na̱ íyo ñuyǐví yóʼo. Vitin kúú ña̱ xíniñúʼu ndasandakúkayó-iniyó, ña̱kán va̱ʼa nda̱kú koo iniyó ti̱xin ña̱ gran tribulación.

14. a) ¿Ndáa ki̱ʼva nasa̱ma chiñu ña̱ kúúmií na̱ Cuerpo Gobernante? b) ¿Nda̱chun xíniñúʼu nda̱kú koo iniyó tá ná kuu ña̱yóʼo?

¹⁴ Ti̱xin ña̱ gran tribulación, nasa̱ma chiñu ña̱ kúúmií na̱ níʼi yichi̱ nu̱úyó nu̱ú ñuʼú yóʼo. Saá kúú ña̱ ku̱ʼu̱n ndiʼi na̱ nda̱ka̱xin Ndióxi̱ na̱ kíndo̱o nu̱ú ñuʼú yóʼo chí ndiví, ña̱ kanitáʼanna ti̱xin ña̱ Armagedón (Mat. 24:31; Apoc. 2:26, 27). Ña̱yóʼo kúni̱ kachiña ña̱ va̱ása kooka na̱ Cuerpo Gobernante xíʼinyó. Soo ni saá, na̱ gran muchedumbre inkáchiva kutáʼanna. Ta na̱ hermano na̱ xíni̱ va̱ʼa na̱ kundoo nu̱ú ñuʼú yóʼo kúú na̱ kuniʼi yichi̱ nu̱úyó. Saá kúú ña̱ na̱ʼa̱yó á nda̱kú íyo iniyó ta chindeétáʼanyó xíʼin na̱ hermano yóʼo, ta kuniso̱ʼoyóna tá ná ka̱ʼa̱nna xíʼinyó xa̱ʼa̱ ña̱ kúni̱ Ndióxi̱. Tá xíniso̱ʼoyó ña̱ káʼa̱nna saá kúú ña̱ ka̱kuyó.

15. ¿Ndáaña kivi keʼéyó ña̱ ndakúka koo iniyó, ta nda̱chun ndáyáʼviní keʼéyó ña̱yóʼo vitin?

¹⁵ Ña̱ ndakú-ini. Ña̱ asamblea ña̱ ni̱xi̱yo tá ku̱i̱ya̱ 2017 xi̱naníña, “Ndakú koo inindó”. Chi̱ndeétáʼanña xíʼinyó ña̱ ndakú koo iniyó nu̱ú tu̱ndóʼo. Sa̱kuaʼayó ña̱ su̱ví kuití tiempo va̱ʼa xíniñúʼu na̱ʼa̱yó ña̱ ndakú íyo iniyó, chi saátu kivi ndasandakúyóña tá kándíxayó Jehová (Rom. 12:12). Ná va̱ása nandósóyó ña̱ ni̱ka̱ʼa̱n ta̱ Jesús: “Na̱ ku̱ndeé-ini nda̱a̱ ki̱vi̱ nu̱ú ndíʼi, na̱kán kúú na̱ ka̱ku” (Mat. 24:13). Ña̱yóʼo kúni̱ kachiña ña̱ xíniñúʼu nda̱kú koo iniyó nu̱ú nda̱a̱ ndáaka tu̱ndóʼo ná kixi nu̱úyó. Ña̱ kundeé-iniyó vitin chindeétáʼanña xíʼinyó ña̱  ndakúka koo iniyó, tá ná kixaa̱ ña̱ gran tribulación.

16. ¿Ndáaña chindeétáʼan xíʼinyó ña̱ va̱ása yi̱ʼvíyó, ta nda̱saa kivi ndasandakúyó ña̱yóʼo vitin?

¹⁶ Ña̱ va̱ása yi̱ʼvíyó. Asamblea ña̱ ni̱xi̱yo tá ku̱i̱ya̱ 2018, xi̱naníña “Va̱ása yi̱ʼvíndó”. Sa̱ndákaʼánña miíyó, ña̱ su̱ví xa̱ʼa̱ ña̱ kandíxayó ndee̱ miíyó kúú ña̱ va̱ása yi̱ʼvíyó, chi ña̱ chindeétáʼan xíʼinyó kúú ña̱ kandíxayó Jehová, chi saátu chíndeétáʼanra xíʼinyó ña̱ ndakú koo iniyó. ¿Ndáaña xíniñúʼu keʼéyó ña̱ va̱ʼa kandíxakayó Jehová? Kaʼviyó Biblia ndiʼi ki̱vi̱, ta ndakanixi̱níyó xa̱ʼa̱ ndáa ki̱ʼva sa̱kǎku Ndióxi̱ na̱ nda̱sakáʼnu-ñaʼá tá tiempo xi̱naʼá (Sal. 68:20; 2 Ped. 2:9). Tá ná kixáʼa na̱ chíñu ixandi̱va̱ʼana xíʼinyó ti̱xin ña̱ gran tribulación, saá kúú ña̱ xíniñúʼu na̱ʼa̱níkayó ña̱ va̱ása yíʼviyó ta kándíxaníyó Jehová (Sal. 112:7, 8; Heb. 13:6). Tá kándíxayó miíra vitin, ndakú koo iniyó ta va̱ása yi̱ʼvíyó tá ná ixandi̱va̱ʼa ña̱ Gog xíʼinyó. *

17. ¿Nda̱chun va̱ása xíniñúʼu yi̱ʼvíyó ña̱ Armagedón? (Koto na̱ʼná ña̱ va̱xi chí nu̱ú kíxáʼaña).

¹⁷ Nda̱a̱ táki̱ʼva xa̱a̱ ku̱nda̱a̱-iniyó nu̱ú artículo ña̱ ni̱ya̱ʼa, ndiʼi miíyó nda̱a̱ tá ka̱kuvíyó xa̱a̱ ndóoyó ki̱vi̱ so̱ndíʼi. Ta saátu ndátuyó ka̱kuyó ti̱xin ña̱ gran tribulación. Guerra ña̱ Armagedón sandiʼi-xa̱ʼa̱ña ña̱ ñuyǐví yóʼo. Soo, va̱ása xíniñúʼu yi̱ʼvíyó chi ña̱yóʼo guerra Ndióxi̱ kooña (Prov. 1:33; Ezeq. 38:18-20; Zac. 14:3). Tá ná ka̱ʼa̱n Jehová xíʼin ta̱ Jesús, saá kúú ña̱ kixáʼara kanitáʼanra. Ta na̱ kutáʼan xíʼinra kúú na̱ nda̱ka̱xin Ndióxi̱ na̱ ndataku chí ndiví, xíʼin ku̱a̱ʼání na̱ ángel. Ndiʼi na̱yóʼo, kanitáʼanna xíʼin ta̱ Ndi̱va̱ʼa, na̱ ta̱chí ndi̱va̱ʼa xíʼin na̱ yiví na̱ kítáʼan xíʼinna (Dan. 12:1; Apoc. 6:2; 17:14).

18. a) ¿Ndáaña káʼa̱n Jehová xíʼinyó? b) ¿Nda̱saa chíndeétáʼan ña̱ káʼa̱n Apocalipsis 7:9, 13-17 xíʼinyó xa̱ʼa̱ ña̱ koo chí nu̱únínu?

¹⁸ Jehová káʼa̱nra ña̱yóʼo xíʼinyó: “Nda̱a̱ ndáakaña ná kuni̱na keʼéna xíʼún kǒo kuchiñuna xíʼún” (Is. 54:17). Ku̱a̱ʼání na̱ nda̱kú íyo ini ndásakáʼnu Jehová ka̱kuna ti̱xin ña̱ gran tribulación, ta ndakundeéna ndasakáʼnunara  (kaʼvi Apocalipsis 7:9, * 13-17). * Ña̱ káʼa̱n Biblia xíʼinyó xa̱ʼa̱ ña̱ koo chí nu̱únínu ndásandakúníña-iniyó. Kúnda̱a̱-iniyó ña̱ mií Jehová ndáara na̱ nda̱kú íyo ini (Sal. 31:23). Ndiʼi miíyó na̱ kúʼvi̱-ini xíni Jehová kusi̱íní-iniyó tá ná ndasakáʼnura ki̱vi̱ra (Ezeq. 38:23).

19. ¿Ndáaña ndátuyó ndakiʼinyó chí nu̱únínu?

¹⁹ Ná ndakanixi̱níyó xa̱ʼa̱ ndáa ki̱ʼva ka̱ʼa̱n 2 Timoteo 3:2-5 xa̱ʼa̱ na̱ yiví na̱ kundoo ñuyǐví xa̱á, nu̱ú va̱ása kooka na̱ kéʼé ña̱ kúni̱ ta̱ Ndi̱va̱ʼa (koto recuadro “ ¿Ndáa ki̱ʼva koo na̱ yiví chí nu̱únínu?”). Ta̱ hermano George Gangas, * ta̱ xi̱kuu Cuerpo Gobernante, ni̱ka̱ʼa̱nra ña̱yóʼo: “Liviní koo nu̱ú ñuʼú yóʼo tá ndiʼina ná ndasakáʼnuna Jehová. Si̱lóʼo kúma̱ní ña̱ ndakiʼinna ña̱ kundoona nu̱ú ñuyǐví xa̱á. Ta kutakuna nda̱a̱ táki̱ʼva íyo mií Jehová. Ta ndiʼi tiempo kutakuyó”. ¿Á su̱ví iin ña̱ va̱ʼaní kúú ña̱yóʼo?