1. Miíyó na̱ xa̱a̱ nda̱kuchi, ¿ndáaña xíniñúʼu ndakundeéyó keʼéyó?

TÁ XA̱A̱ nda̱kuchiyó, ña̱yóʼo kúni̱ kachiña ña̱ xa̱a̱ ni̱na̱ʼa̱yó nu̱ú inkana ña̱ kándíxayó Jehová, ta íyo tu̱ʼvayó ña̱ kachíñuyó nu̱úra xíʼin na̱ ñuura. * Ña̱ nda̱a̱ kúúña xíniñúʼu ndakundeéyó kandíxakayóra ta va̱ása kaka-iniyó ña̱ xíniñúʼura na̱ ñuura ña̱ va̱ʼa saxínura ña̱ kúni̱ra.

2, 3. ¿Ndáa u̱ni̱ ña̱ʼa náʼa̱ Jehová xíʼin ki̱ʼva ña̱ níʼira yichi̱ nu̱ú na̱ ñuura?

² Ki̱ʼva ña̱ níʼi Jehová yichi̱ nu̱ú na̱ ñuura tiempo vitin náʼa̱ña ndáa ki̱ʼva íyora, ña̱ kúni̱ra keʼéra, ta saátu ña̱ kúni̱ra ná keʼéyó. Ná ka̱ʼa̱nyó xa̱ʼa̱ u̱ni̱ ña̱ va̱ʼa ña̱ kúúmií Jehová ña̱ náʼa̱ na̱ ñuura.

³ Ña̱ nu̱ú, “va̱ása ndáka̱xin Ndióxi̱ na̱ yiví” (Hech. 10:34). Xa̱ʼa̱ ña̱ kúʼvi̱-ini Jehová xínira miíyó ta̱xira se̱ʼera ña̱ ni̱xi̱ʼi̱ra xa̱ʼa̱yó ña̱ va̱ʼa sakǎkura ndiʼi miíyó na̱ yiví (Juan 3:16; 1 Tim. 2:6). Ña̱ va̱ʼa chindeétáʼanra xíʼin na̱ yiví ña̱ ndakiʼinna ña̱ va̱ʼa xa̱ʼa̱ ña̱ ni̱xi̱ʼi̱ ta̱ Jesús, Jehová xíniñúʼura na̱ ñuura ña̱ va̱ʼa natúʼunna xa̱ʼa̱ tu̱ʼun va̱ʼa xíʼin ndiʼi na̱ yiví na̱ kúni̱ kuniso̱ʼoña. Ta ña̱ u̱vi̱, Jehová kúúra iin Ndióxi̱ ta̱ viíní kéʼé chiñu, ta kúni̱ra ña̱ táxi̱n koo iniyó (1 Cor. 14:33, 40). Ña̱kán na̱ ñuura xíniñúʼu viíní kachíñuna ta táxi̱n koona. Ta ña̱ u̱ni̱, Jehová kúú ta̱ sánáʼa̱ miíyó (Is. 30:20, 21). Ña̱kán na̱ ñuura sánáʼa̱na xa̱ʼa̱ tu̱ʼunra ti̱xin congregación á ta ku̱a̱ʼa̱nna natúʼunna xíʼin na̱ yiví. ¿Ndáa ki̱ʼva ni̱na̱ʼa̱ na̱ congregación na̱ ni̱xi̱yo tá siglo nu̱ú u̱ni̱ ña̱ va̱ʼa ña̱ kúúmií Jehová? ¿Ndáa ki̱ʼva náʼa̱ na̱ ñuura ña̱yóʼo tiempo vitin? Ta, ¿ndáa ki̱ʼva chíndeétáʼan espíritu santo xíʼin miíyó na̱ káchíñu ti̱xin ñuu Jehová tiempo vitin?

4. Nda̱a̱ táki̱ʼva káchi Hechos 1:8, ¿ndáa chiñu ta̱xi ta̱ Jesús ndaʼa̱ na̱ discípulora, ta ndáaña chi̱ndeétáʼan xíʼinna ña̱ va̱ʼa ke̱ʼéna ña̱yóʼo?

⁴ Tá siglo nu̱ú. Ña̱ sa̱náʼa̱ ta̱ Jesús chi̱ndeétáʼanña xíʼin na̱ yiví ña̱ kundatuna ndakiʼinna iin ña̱ va̱ʼa chí nu̱únínu (Luc. 4:43). Ni̱ka̱ʼa̱nra xíʼin na̱ discípulora ña̱ ná ndakundeéna keʼéna chiñu ña̱ ki̱xáʼara xíʼin ta ná ku̱ʼu̱nna natúʼunna xíʼin ndiʼi na̱ yiví iníísaá ñuyǐví (kaʼvi Hechos 1:8). * Ña̱ nda̱a̱ kúúña, va̱ása kuchiñu iinlá miína keʼéna chiñu yóʼo. Ña̱kán xi̱niñúʼu chindeétáʼan espíritu santo xíʼinna, ta xa̱a̱ ni̱ka̱ʼa̱nva ta̱ Jesús ña̱ chindeétáʼan ña̱yóʼo xíʼinna (Juan 14:26; Zac. 4:6).

5, 6. ¿Ndáa ki̱ʼva chi̱ndeétáʼan espíritu santo xíʼin na̱ discípulo ta̱ Jesús?

⁵ Na̱ discípulo ta̱ Jesús nda̱kiʼinna espíritu santo tá Pentecostés ña̱ ku̱i̱ya̱ 33. Xa̱ʼa̱ ña̱ chi̱ndeétáʼan espíritu santo xíʼinna ndi̱ku̱n ki̱xáʼana nátúʼunna xa̱ʼa̱ Ndióxi̱ xíʼin na̱ yiví, ta tá ni̱ya̱ʼa loʼo tiempo ku̱a̱ʼánína ni̱xa̱a̱na ka̱ndíxana ña̱ na̱túʼunna xíʼinna (Hech. 2:41; 4:4). Ta tá ki̱xáʼana íxandi̱va̱ʼana xíʼinna, va̱ása níyi̱ʼvína. Ndu̱kúna ndee̱ nu̱ú Ndióxi̱ ta ni̱ka̱ʼa̱nna xíʼinra: “Chindeétáʼan xíʼin na̱ káchíñu nu̱ún ña̱ va̱ʼa ndakú koo inina ña̱ ndakundeéna natúʼunna xa̱ʼa̱ tu̱ʼún”. Ta xa̱ʼa̱ ña̱ nda̱kiʼinna espíritu santo ndakú ni̱xi̱yo inina ta nda̱kundeéna na̱túʼunna xa̱ʼa̱ tu̱ʼun Ndióxi̱ (Hech. 4:18-20, 29, 31).

⁶ Soo ni̱xi̱yo inka ña̱ i̱xayo̱ʼvi̱ xíʼinna. Tá kúú, su̱ví ndiʼi na̱ yiví níxikuumií tu̱ʼun Ndióxi̱ ta ni va̱ása níxikuumiína ña̱ kivi chindeétáʼan xíʼinna ña̱ kunda̱a̱-inina xíʼin tu̱ʼun Ndióxi̱, táʼan ña̱ kúúmiíyó tiempo vitin. Ta saátu xi̱natúʼunna xíʼin inka na̱ yiví na̱ xi̱ka̱ʼa̱n inka tu̱ʼun. Soo ni saá na̱ discípulo yóʼo ku̱chiñuvana ke̱ʼéna iin chiñu ña̱ káʼnuní: tá ni̱ya̱ʼa loʼo ku̱i̱ya̱ xa̱a̱ ku̱chiñuvana na̱túʼunna xíʼin ndiʼi na̱ yiví na̱ íyo nu̱ú ñuʼú yóʼo (Col. 1:6, 23).

7. ¿Ndáa ki̱ʼva ni̱xa̱a̱ na̱ hermano na̱ ni̱xi̱yo tá ya̱chi̱ ku̱nda̱a̱-inina xa̱ʼa̱ ña̱ xi̱kuni̱ Jehová keʼéna, ta ndáaña ke̱ʼéna?

⁷ Tiempo vitin. Jehová ndákundeéra níʼira yichi̱ nu̱ú na̱ ñuura, ta táxira ndee̱ ndaʼa̱na ta xíniñúʼura tu̱ʼunra ña̱ va̱ʼa kuniʼira yichi̱ nu̱úna, nu̱ú ña̱yóʼo ni̱ka̱ʼyi̱ ña̱ ke̱ʼé ta̱ Jesús ta saátu chiñu ña̱ xa̱ʼndara nu̱ú na̱ discípulora ña̱ ná ndakundeéna keʼéna chiñu ña̱ xa̱a̱ ki̱xáʼara xíʼin (Mat. 28:19, 20). Tá julio ña̱ ku̱i̱ya̱ 1881 ña̱ revista yóʼo ni̱ka̱ʼa̱nña: “Va̱ása níkanana miíyó á nda̱kaxinna miíyó ña̱ ndukáʼnuyó á ña̱ kuumiíyó ku̱a̱ʼání ña̱ ku̱i̱ká, chi ka̱nana miíyó ña̱ va̱ʼa kuniñúʼuyó ña̱ kúúmiíyó xíʼin ndiʼi ndee̱yó, ta saátu ña̱ natúʼunyó xíʼin na̱ yiví xa̱ʼa̱ tu̱ʼun va̱ʼa”. Folleto ña̱ nani To Whom the Work Is Entrusted (A quienes se les confía la obra), ña̱ ka̱na tá ku̱i̱ya̱ 1919, ni̱ka̱ʼa̱nña ña̱yóʼo: “Íyo ku̱a̱ʼání chiñu keʼéyó, soo xa̱ʼa̱ ña̱ kúúña chiñu ta̱ táta, taxivara ndee̱ ndaʼa̱yó ña̱ keʼéyóña”. Nda̱a̱ táki̱ʼva ke̱ʼé na̱ cristiano na̱ ni̱xi̱yo tá siglo nu̱ú, saá ke̱ʼé na̱ hermano yóʼo chi ndakúní ni̱xi̱yo inina ña̱ ke̱ʼéna chiñu Ndióxi̱ ta ka̱ndíxana ña̱ chindeétáʼan espíritu santo xíʼinna ña̱ va̱ʼa natúʼunna xíʼin ndiʼi na̱ yiví. Ta ña̱yóʼo kándíxatu miíyó tiempo vitin.

8, 9. ¿Ndáaña xa̱a̱ xíniñúʼu na̱ ñuu Ndióxi̱ ña̱ va̱ʼa natúʼunna xíʼin na̱ yiví xa̱ʼa̱ra?

⁸ Na̱ ñuu Jehová, xíniñúʼuna ku̱a̱ʼání ña̱ʼa ña̱ va̱ʼa ku̱ʼu̱nna natúʼunna xíʼin na̱ yiví xa̱ʼa̱ Ndióxi̱. Tá kúú, tá ya̱chi̱ ki̱xáʼana távána tutu, xi̱niñúʼuna “Foto-Drama de la Creación”, gramófono, carro tú ndíso bocina, xíʼin programa ña̱ radio, ta tiempo vitin xíniñúʼuna Internet xíʼin computadora. Ta saátu, iinlá na̱ ñuu Ndióxi̱ kúú na̱ sándaya̱ʼa ku̱a̱ʼání nu̱ú tu̱ʼun tutu ña̱ kúúmiína. ¿Nda̱chun kéʼéyó ña̱yóʼo? Saáchi kúni̱yó ña̱ ndiʼi na̱ yiví ná kunda̱a̱-inina xa̱ʼa̱ tu̱ʼun va̱ʼa, soo tu̱ʼun miína ná kooña. Jehová va̱ása ndáka̱xinra na̱ yiví, ña̱kán ni̱ka̱ʼa̱nra ña̱ ndiʼi na̱  yiví ni “nda̱a̱ ndáaka ñuuna nda̱a̱ ndáaka tu̱ʼun káʼa̱nna” kunda̱a̱-inina xa̱ʼa̱ tu̱ʼun va̱ʼa (Apoc. 14:6, 7). Chi kúni̱ra ná kunda̱a̱-ini na̱ yiví xa̱ʼa̱ Reinora.

⁹ ¿Ta ndáaña keʼéyó ña̱ va̱ʼa chindeétáʼanyó xíʼin na̱ yiví na̱ va̱ása kívi natúʼunyó xíʼin xa̱ʼa̱ ña̱ ndóona veʼe ña̱ va̱ása kívi ki̱ʼviyó? Ña̱ va̱ʼa sakuaʼana xa̱ʼa̱ Jehová, chi̱ndeétáʼanra xíʼin na̱ ñuura ña̱ va̱ʼa ki̱xáʼana nátúʼunna chí nu̱ú íyo ku̱a̱ʼá na̱ yiví. Tá kúú, tá ku̱i̱ya̱ 2001 na̱ Cuerpo Gobernante ni̱ka̱ʼa̱nna ña̱ kivi kuniñúʼuna carro válí á inkaka nu̱ú chindósona tutu ña̱ va̱ʼa natúʼunna xíʼin na̱ yiví chí ñuu Francia, tá ni̱ya̱ʼa loʼo tiempo ki̱xáʼana kéʼéna ña̱yóʼo inkaka lugar. Ta ña̱yóʼo va̱ʼaníva ka̱naña. Ta tá ku̱i̱ya̱ 2011 ki̱xáʼana kéʼéna ña̱yóʼo chí ñuu Nueva York (Estados Unidos) nu̱ú yáʼa ku̱a̱ʼání na̱ yiví. Tá ni̱ya̱ʼa iin ku̱i̱ya̱ xa̱xána 102,129 libro xíʼin 68,911 revista, ta saátu 4,701 na̱ yiví ndu̱kúna ña̱ ná sanáʼa̱nana xa̱ʼa̱ Biblia. Ña̱yóʼo káxi náʼa̱ña ña̱ espíritu santo Ndióxi̱ kúú ña̱ chi̱ndeétáʼan xíʼinna ña̱ va̱ʼa ke̱ʼéna ña̱yóʼo. Ña̱kán na̱ Cuerpo Gobernante ni̱ka̱ʼa̱nna ña̱ kivi kixáʼa na̱ publicador na̱ íyo iníísaá ñuyǐví kuniñúʼuna carro válí ña̱ natúʼunna xíʼin na̱ yiví.

10. ¿Ndáaña kivi keʼéyó ña̱ viíka kachíñuyó nu̱ú Ndióxi̱?

¹⁰ Ña̱ kivi keʼéyó. Ná chika̱a̱yó ndee̱ ña̱ vií kuniñúʼuyó ndiʼi ña̱ sánáʼa̱ Jehová miíyó ti̱xin reunión, ná kee ni̱ʼiyó xíʼin na̱ grupoyó ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱. Tá íyo iin ña̱ xíniñúʼu viíka keʼéyó, na̱ hermano na̱ ñúʼu ti̱xin grupoyó kúú na̱ chindeétáʼan xíʼinyó, ta kivi chika̱a̱na ndee̱ xíʼinyó xíʼin ña̱ kéʼéna. Ná ndakundeéyó natúʼunyó xíʼin na̱ yiví xa̱ʼa̱ Ndióxi̱ ni íyo tu̱ndóʼo nu̱úyó. Nda̱a̱ táki̱ʼva káchi texto nu̱ú ka̱na ña̱ artículo yóʼo kéʼéyó ña̱ kúni̱ Ndióxi̱ xa̱ʼa̱ ña̱ chíndeétáʼan espíritu santo xíʼinyó, ta su̱ví xíʼin ndee̱ miíyó kéʼéyóña (Zac. 4:6). Saáchi ndiʼi ña̱yóʼo chiñu Ndióxi̱ kúúña.

11. ¿Ndáa ki̱ʼva vií ka̱chíñu na̱ cuerpo gobernante na̱ ni̱xi̱yo tá siglo nu̱ú ña̱ va̱ʼa vií kutáʼan na̱ ñuu Ndióxi̱?

¹¹ Tá siglo nu̱ú. Na̱ cuerpo gobernante, na̱ ni̱xi̱yo chí ñuu Jerusalén, inkáchi ka̱chíñuna ña̱ va̱ʼa vií kutáʼan na̱ ñuu Ndióxi̱ ta táxi̱n koona (Hech. 2:42). Tá ku̱i̱ya̱ 49 tá ni̱xi̱yo ku̱a̱chi xa̱ʼa̱ á xíniñúʼu ta̱ʼnda̱ nu̱ú yi̱i̱ na̱ ta̱a, na̱ cuerpo gobernante ndu̱kúna espíritu santo nu̱ú Ndióxi̱  ña̱ va̱ʼa vií ndatiinna ku̱a̱chi kán. Tá níndataʼví na̱ congregación xa̱ʼa̱ ku̱a̱chi kán, va̱ása kivi ku̱ʼu̱nna natúʼunna xíʼin na̱ yiví xa̱ʼa̱ Ndióxi̱. Ni na̱ judío xi̱kuu na̱ apóstol xíʼin na̱ anciano va̱ása níxindiku̱nna ña̱ xi̱keʼé na̱ ñuuna ni ña̱ xi̱sanáʼa̱na. Va̱ʼaka na̱ndukúna ndáaña káʼa̱n tu̱ʼun Ndióxi̱ ta ndu̱kúna espíritu santo nu̱úra ña̱ va̱ʼa chindeétáʼanña xíʼinna ña̱ vií ndaka̱xinna ña̱ keʼéna (Hech. 15:1, 2, 5-20, 28). Xa̱ʼa̱ ña̱ ke̱ʼéna ña̱yóʼo Jehová ta̱xira bendición ndaʼa̱na, na̱ congregación táxi̱n ni̱xi̱yona ta inkáchi xi̱kitáʼanna, ta nda̱kundeéna na̱túʼunna xíʼin na̱ yiví xa̱ʼa̱ra (Hech. 15:30, 31; 16:4, 5).

12. ¿Nda̱chun káʼa̱nyó ña̱ táxi̱n íyo na̱ ñuu Jehová ta vií kítáʼanna?

¹² Tiempo vitin. Na̱ ñuu Jehová chíka̱a̱na ndee̱ ña̱ vií kutáʼanna ta táxi̱n koona. Tá ku̱i̱ya̱ 1895, táʼan revista yóʼo ña̱ ka̱na tu̱ʼun inglés tá 15 tí noviembre, ni̱ka̱ʼa̱nña xa̱ʼa̱ iin artículo ña̱ ka̱na nu̱ú 1 Corintios 14:40 ta ña̱yóʼo xi̱naníña “Decentemente y con orden”. Ña̱yóʼo ni̱ka̱ʼa̱nña: “Na̱ apóstol ta̱xina consejo ndaʼa̱ na̱ hermano na̱ ni̱xi̱yo tá siglo nu̱ú ña̱ va̱ʼa vií kutáʼanna [...]. Ña̱kán xíniñúʼu kandíxayó ña̱ xa̱a̱ ni̱ka̱ʼyi̱ ña̱ va̱ʼa sakuaʼayó xíʼinña” (Rom. 15:4). Na̱ ñuu Jehová chíka̱a̱na ndee̱ ña̱ vií kutáʼanna ta táxi̱n koona nda̱a̱ táki̱ʼva ke̱ʼé na̱ cristiano na̱ ni̱xi̱yo tá siglo nu̱ú. Tá kúú, tá ná ku̱ʼu̱nyó reunión xíʼin inka congregación á inka país, xa̱a̱ kunda̱a̱va-iniyó ndáa ki̱ʼva sayáʼana Tutu Ña̱ Nátúʼun xíʼinyó ta ndáa artículo kaʼvina, ta xa̱ʼa̱ ña̱yóʼo va̱ʼa kuniyó. Va̱ʼa kítáʼanyó tíxa̱ʼvi ña̱ chíndeétáʼan espíritu santo Ndióxi̱ xíʼinyó (Sof. 3:9, nota).

13. Nda̱a̱ táki̱ʼva káchi Santiago 3:17, ¿ndáaña xíniñúʼu ndakanixi̱níyó xa̱ʼa̱?

¹³ Ña̱ kivi keʼéyó. Jehová kúni̱ra ña̱ vií ná kitáʼanyó (Efes. 4:1-3). Ña̱kán ná ndakanixi̱níyó xa̱ʼa̱ ña̱yóʼo: “¿Á chíndeétáʼi̱n xíʼin na̱ congregación ña̱ táxi̱n koona ta vií kitáʼanna? ¿Á xíniso̱ʼi̱ ña̱ káʼa̱n na̱ hermano na̱ níʼi yichi̱ nu̱ú na̱ congregación? ¿Á kivi kandíxa na̱ hermano yi̱ʼi̱, tá kúú tá kúúmiíi̱ iin chiñu ti̱xin congregación? ¿Á kúi̱ iin na̱ yiví na̱ ya̱chi̱ xáa̱, á chíndeétáʼi̱n xíʼin inkana, ta á kútói̱ kachíñui̱?” (kaʼvi Santiago 3:17). * Tá xítoyó ña̱ xíniñúʼu viíka  keʼéyó ña̱yóʼo, ná ndukúyó espíritu santo nu̱ú Jehová. Tá ná taxiyó nasamaña ki̱ʼva ña̱ íyoyó xíʼin ña̱ kéʼéyó, saá kúú ña̱ kuʼvi̱níka-ini na̱ hermano kunina miíyó ta kundayáʼvikayó nu̱úna.

14. Nda̱a̱ táki̱ʼva káchi Colosenses 1:9, 10, ¿ndáa ki̱ʼva chi̱ndeétáʼan Jehová xíʼin na̱ xi̱kachíñu nu̱úra tá siglo nu̱ú ña̱ ni̱xa̱a̱na ku̱nda̱a̱-inina xa̱ʼa̱ ña̱ kúni̱ra?

¹⁴ Tá siglo nu̱ú. Jehová kútóoníra sanáʼa̱ra na̱ ñuura (Sal. 32:8). Kúni̱ra ña̱ ndiʼi na̱ se̱ʼera ná kunda̱a̱-inina xa̱ʼa̱ra, ná kuʼvi̱-inina kuninara, ta ná kutakuna ndiʼi tiempo. Ta va̱ʼa xa̱a̱yó keʼéyó ña̱yóʼo xa̱ʼa̱ ña̱ sánáʼa̱ra miíyó (Juan 17:3). Tá siglo nu̱ú, xi̱niñúʼura na̱ congregación ña̱ va̱ʼa sa̱náʼa̱ra na̱ ñuura (kaʼvi Colosenses 1:9, 10). * Ta xi̱niñúʼura espíritu santo ña̱ va̱ʼa chi̱ndeétáʼanra xíʼinna, nda̱a̱ táki̱ʼva xa̱a̱ ni̱ka̱ʼa̱n ta̱ Jesús (Juan 14:16). Ña̱yóʼo chi̱ndeétáʼanña xíʼin na̱ discípulora ña̱ ku̱nda̱a̱-inina xíʼin tu̱ʼun Ndióxi̱, ta saátu sa̱ndákaʼánñana xa̱ʼa̱ ndiʼi ña̱ sa̱náʼa̱ ta̱ Jesús xíʼin ña̱ ke̱ʼéra, ta tándi̱ʼi ni̱ka̱ʼyi̱ña nu̱ú ña̱ Evangelio. Ña̱ sa̱kuaʼana chi̱ndeétáʼanña xíʼinna ña̱ kandíxakana Ndióxi̱, ña̱ kuʼvi̱-inina kunina miíra, se̱ʼera xíʼin na̱ hermano.

15. ¿Á xa̱a̱ xítoún xínu profecía ña̱ ni̱ka̱ʼa̱n Jehová ña̱ va̱xi nu̱ú Isaías 2:2, 3?

¹⁵ Tiempo vitin. Jehová ni̱ka̱ʼa̱nra, ña̱ ki̱vi̱ nu̱ú ndíʼi ku̱a̱ʼání na̱ yiví ku̱ʼu̱nna yuku̱ ña̱ kúú kuentara, ña̱yóʼo kúni̱ kachiña ña̱ ndakutáʼanna xíʼin na̱ ndásakáʼnu-ñaʼá ña̱ va̱ʼa sanáʼa̱rana (kaʼvi Isaías 2:2, 3). * Tiempo vitin  xínu ña̱ profecía yóʼo. Ña̱ ndásakáʼnuyó Ndióxi̱ ta̱ nda̱a̱, va̱ʼaníka íyoña nu̱ú ña̱ ndásakáʼnuna ndióxi̱ vatá. Ta ku̱a̱ʼání ña̱ʼa táxi Jehová ndaʼa̱yó ña̱ va̱ʼa kunda̱a̱-iniyó xíʼin tu̱ʼunra (Is. 25:6). Xíniñúʼura “ta̱ esclavo ta̱ ndíchiní ta̱ nda̱kúní káchíñu” ña̱ va̱ʼa taxira ña̱ xíniñúʼuyó, ta ku̱a̱ʼá nu̱ú kúú ña̱yóʼo tá kúú artículo ña̱ kána nu̱ú tutu, discurso, video ña̱ xíto miíyó ta saátu na̱ va̱lí (Mat. 24:45). Ndóʼoyó nda̱a̱ táki̱ʼva ndo̱ʼo ta̱ Elihú ta̱ xi̱kuu migo ta̱ Job ta̱ ni̱ka̱ʼa̱n ña̱ kǒo nda̱a̱ ni iin na̱ sánáʼa̱ nda̱a̱ táki̱ʼva kéʼé Jehová (Job 36:22).

16. ¿Ndáaña kivi keʼéyó ña̱ va̱ʼa kuaʼnukayó xíʼin tu̱ʼun Ndióxi̱?

¹⁶ Ña̱ kivi keʼéyó. Espíritu santo kúú ña̱ chindeétáʼan xíʼinyó ña̱ keʼéyó ndiʼi ña̱ káʼviyó á sákuaʼayó nu̱ú tu̱ʼun Ndióxi̱. Nda̱a̱ táki̱ʼva ke̱ʼé ta̱ salmista ná ndukúyó ña̱yóʼo nu̱ú Jehová: “Sanáʼa̱ yi̱ʼi̱ yichi̱ miíún Jehová. Kundiku̱i̱n yichi̱ún ña̱ nda̱a̱. Iin ndasaún níma̱i̱ ña̱ va̱ʼa ná yi̱ʼvíi̱ kunii̱ ki̱vi̱ún” (Sal. 86:11). Ña̱kán ná ndakundeéyó kaʼviyó tu̱ʼunra ta saátu tutu ña̱ tavá na̱ ñuura. Va̱ása kúni̱ kuitíyó sákuaʼayó xa̱ʼa̱ ña̱ nda̱a̱ chi ña̱ kúni̱yó kúú ña̱ ná xa̱a̱ña nda̱a̱ níma̱yó ta keʼéyó ña̱yóʼo. Espíritu Jehová kúú ña̱ chindeétáʼan xíʼinyó ña̱ va̱ʼa keʼéyó ña̱yóʼo. Ná chika̱a̱yó ndee̱ xíʼin na̱ hermanoyó saáchi nda̱a̱ táki̱ʼva íyo na̱ veʼeyó saá íyona (Heb. 10:24, 25). Ná ka̱ʼa̱nyó xíʼin Ndióxi̱ ña̱ ná taxira espíritu santo ndaʼa̱yó ña̱ va̱ʼa chindeétáʼanña xíʼinyó taxiyó comentario ti̱xin reunión ta saátu viíní keʼéyó iin asignación ña̱ táxina ndaʼa̱yó. Tá ná keʼéyó ndiʼi ña̱yóʼo na̱ʼa̱yó nu̱ú Jehová ta saátu se̱ʼera ña̱ kúʼvi̱-iniyó xíniyó na̱ hermano (Juan 21:15-17).

17. ¿Ndáa ki̱ʼva kivi na̱ʼa̱yó ña̱ chíndeétáʼanyó xíʼin na̱ ñuu Jehová?

¹⁷ Si̱lóʼo kúma̱ní, ta iinlá na̱ ñuu Ndióxi̱ kúú na̱ kindo̱o koo nu̱ú ñuʼú yóʼo. Xa̱ʼa̱ ña̱yóʼo xíʼin ña̱ si̱í-ini ná kachíñuyó xíʼinna. Tá ndiʼi na̱ yiví ná natúʼunyó xíʼin xa̱ʼa̱ tu̱ʼun va̱ʼa na̱ʼa̱yó ña̱ kúʼvi̱-iniyó xíniyóna, ta va̱ása ndaka̱xinyóna chi va̱ása kéʼé Ndióxi̱ ña̱yóʼo. Ná chika̱a̱yó ndee̱ ña̱ vií kutáʼan na̱ congregación nda̱a̱ táki̱ʼva kúni̱ Ndióxi̱. Ná kuniso̱ʼoyó ña̱ sánáʼa̱ Jehová miíyó, ta vií ná kuniñúʼuyó ña̱ táxira ndaʼa̱yó ña̱ sakuaʼayó xa̱ʼa̱ra. Tasaá va̱ása yi̱ʼvíyó tá ná ndiʼi-xa̱ʼa̱ ñuyǐví ta̱ Ndi̱va̱ʼa. Chi ndakú koo iniyó kitáʼanyó xíʼin na̱ ñuu Jehová.