1. ¿Nda̱chun xíka-ini ku̱a̱ʼání na̱ yiví?

ÍYO ku̱a̱ʼání religión na̱ káʼa̱n ña̱ ndíku̱nna ta̱ Cristo, ta káʼa̱nna ña̱ ndásakáʼnuna Ndióxi̱ nda̱a̱ táki̱ʼva kúni̱ miíra. Xa̱ʼa̱ ña̱yóʼo ku̱a̱ʼání na̱ yiví xíka-inina ta ndákanixi̱nína ña̱yóʼo: “¿Á íyo iin religión ña̱ nda̱a̱? ¿Á kíndo̱o-ini Ndióxi̱ xíʼin ndiʼi religión?”. Soo, ¿ndáaña ndákanixi̱ní miíyó? ¿Á kándíxayó ña̱ iinlá na̱ testigo Jehová kúú na̱ sánáʼa̱ ña̱ nda̱a̱ ta kíndo̱o-ini Ndióxi̱ xíʼin ki̱ʼva ña̱ ndásakáʼnuyóra? ¿Ndáaña chindeétáʼan xíʼinyó ña̱ kandíxayó ña̱yóʼo? Ná kotoyó ndáaña chindeétáʼan xíʼinyó.

2. ¿Nda̱chun xi̱kandíxa ta̱ apóstol Pablo ña̱ nda̱ni̱ʼíra ña̱ nda̱a̱? (1 Tesalonicenses 1:5).

² Ta̱ apóstol Pablo va̱ása níxi̱ka-inira ña̱ nda̱ni̱ʼíra ña̱ nda̱a̱ (kaʼvi 1 Tesalonicenses 1:5). * Ta ña̱ chi̱ndeétáʼan xíʼinra kandíxara ña̱ nda̱ni̱ʼíra ña̱ nda̱a̱ kúú ña̱ ka̱ʼvira tu̱ʼun Ndióxi̱. Ta̱yóʼo xi̱kandíxara ña̱ “ndiʼi ña̱ ni̱ka̱ʼyi̱ nu̱ú tutu yi̱i̱ tu̱ʼun Ndióxi̱ kúúña” (2 Tim. 3:16). Ta tá ka̱ʼviraña, nda̱ni̱ʼíra ña̱ ni̱na̱ʼa̱ nu̱úra ña̱ ndixa xi̱kuu ta̱ Jesús ta̱ Mesías. Soo na̱ xi̱niʼi yichi̱ nu̱ú na̱ judío va̱ása níxiinna ndakunina ña̱ xi̱kuu ta̱ Jesús ta̱ Mesías. Ta xi̱ka̱ʼa̱nna ña̱ xi̱sanáʼa̱na xa̱ʼa̱ Ndióxi̱, soo ndiʼi ña̱ xi̱keʼéna xi̱naʼa̱ña ña̱ su̱ví ña̱ nda̱a̱ kúúña (Tito 1:16). Soo síínva ni̱xi̱yo ta̱ apóstol Pablo nu̱ú na̱yóʼo, chi va̱ása níndaka̱xinra ndáaña kandíxara. Saáchi xi̱sanáʼa̱ra ndiʼi ña̱ va̱xi nu̱ú tu̱ʼun Ndióxi̱, ta xi̱keʼéra ña̱ xi̱kuni̱ Ndióxi̱ (Hech. 20:27).

3. ¿Á xíniñúʼu ndakuiinna ndiʼi pregunta ña̱ kúúmiíyó ña̱ va̱ʼa kandíxayó ña̱ nda̱ni̱ʼíyó ña̱ nda̱a̱? (Koto recuadro “ Ndíchiní íyo ña̱ ndákanixi̱ní Jehová ta saátu ña̱ kéʼéra”).

 ³ Savana káʼa̱nna ña̱ na̱ religión ña̱ nda̱a̱ xíniñúʼu kuchiñuna ndakuiinna ndiʼi ña̱ ndáka̱tu̱ʼun na̱ yiví, nda̱a̱ ña̱ kǒo va̱xi nu̱ú Biblia. Soo, ¿á kivi keʼéna ña̱yóʼo? Ná ka̱ʼa̱nyó xa̱ʼa̱ ña̱ ke̱ʼé ta̱ Pablo. Ni ni̱ka̱ʼa̱nra xíʼin na̱ hermano ña̱ viíní ná nandukúna xa̱ʼa̱ ndiʼi ña̱ʼa, soo xi̱kunda̱a̱-inira ña̱ ni̱xi̱yo ku̱a̱ʼání ña̱ʼa ña̱ va̱ása níxi̱kunda̱a̱-inira xa̱ʼa̱ (1 Tes. 5:21). Ta̱yóʼo ni̱ka̱ʼa̱nra ña̱ va̱ása xíni̱yó xa̱ʼa̱ ndiʼi ña̱ʼa, ta nda̱a̱ táki̱ʼva íyo na̱ xíto “nu̱ú iin espejo ña̱ va̱ása káxi va̱ʼa náʼa̱ nu̱ú” saá íyoyó (1 Cor. 13:9, 12). Ta̱ Pablo va̱ása níxi̱xini̱ra xa̱ʼa̱ ndiʼi ña̱ʼa, ta saátu miíyó va̱ása kúnda̱a̱-iniyó xa̱ʼa̱ ndiʼi ña̱ʼa. Soo xi̱kunda̱a̱va-inira xa̱ʼa̱ ña̱ ndáyáʼvi va̱ʼa xa̱ʼa̱ Jehová, ta ña̱yóʼo chi̱ndeétáʼanña xíʼinra ña̱ kandíxara ña̱ nda̱ni̱ʼíra ña̱ nda̱a̱.

4. ¿Ndáaña keʼéyó ña̱ va̱ása kaka-iniyó ña̱ nda̱ni̱ʼíyó ña̱ nda̱a̱, ta ndáaña sakúaʼayó nu̱ú artículo yóʼo?

⁴ ¿Ndáaña kivi keʼéyó ña̱ va̱ása kaka-iniyó ña̱ nda̱ni̱ʼíyó ña̱ nda̱a̱? Iin ña̱ chindeétáʼan xíʼinyó kúú ña̱ chitáʼanyó ki̱ʼva ña̱ nda̱sakáʼnu ta̱ Jesús Ndióxi̱ xíʼin ki̱ʼva ña̱ ndásakáʼnu miíyóra tiempo vitin. Nu̱ú artículo yóʼo, sakúaʼayó xa̱ʼa̱ ku̱mí ña̱ʼa ña̱ kéʼé na̱ ndixa ndíku̱n ta̱ Jesús: Ña̱ nu̱ú, va̱ása ndásakáʼnuna inka Ndióxi̱. Ña̱ u̱vi̱, íxato̱ʼóna ki̱vi̱ Jehová. Ña̱ u̱ni̱, kúʼvi̱-inina xínina ña̱ nda̱a̱. Ta ña̱ ku̱mí, kúʼvi̱-inina xínitáʼanna.

5. ¿Ndáa ki̱ʼva nda̱sakáʼnu ta̱ Jesús Ndióxi̱, ta ndáa ki̱ʼva kundiku̱nyó yichi̱ra?

⁵ Tá ni̱xi̱yo ta̱ Jesús chí ndiví ta saátu tá ni̱xi̱yora nu̱ú ñuʼú yóʼo, iinlá Jehová nda̱sakáʼnura saáchi kúʼvi̱ní-inira xínirara (Luc. 4:8). Ta sa̱náʼa̱ra na̱ discípulora ña̱ saátu xi̱niñúʼu keʼé na̱yóʼo. Ni miíra ta ni na̱ discípulora va̱ása níxiniñúʼuna imagen ña̱ va̱ʼa  ndasakáʼnuna Ndióxi̱. Iin espíritu kúú Ndióxi̱, ña̱kán nda̱a̱ ni iin na̱ yiví va̱ása kúchiñuna ndanaʼa̱nara saáchi ku̱a̱ʼání ndee̱ kúúmiíra (Is. 46:5). Soo, ¿á va̱ʼa ndakuatiyó nu̱ú na̱ santo? Ley ña̱ ta̱xi Jehová ndaʼa̱ ta̱ Moisés káchiña: “Va̱ása keʼún na̱ʼná ndióxi̱, ni na̱ʼná ña̱ʼa ña̱ íyo chí ndiví á ña̱ íyo nu̱ú ñuʼú á ña̱ ñúʼu ti̱xin ti̱kui̱í. Va̱ása kuxítíún nu̱úña” (Éx. 20:4, 5). Na̱ kúni̱ sakúsi̱í-ini Ndióxi̱ va̱ása ndásakáʼnuna ña̱yóʼo.

6. Miíyó na̱ testigo Jehová, ¿ndáana ndíku̱nyó yichi̱ tiempo vitin?

⁶ Na̱ nátúʼun xa̱ʼa̱ ña̱ ku̱u xi̱naʼá káʼa̱nna ña̱ iinlá Ndióxi̱ xi̱ndasakáʼnu na̱ cristiano na̱ xi̱ndoo tá siglo nu̱ú. Iin libro ña̱ káʼa̱n xa̱ʼa̱ na̱ cristiano na̱ xi̱ndoo tá siglo nu̱ú, káʼa̱nña ña̱ ni loʼoví va̱ása níxiniñúʼuna imagen ña̱ va̱ʼa ndasakáʼnuna Ndióxi̱ (History of the Christian Church). Ta tiempo vitin ndíku̱nyó yichi̱na. Saáchi ni va̱ása ndákuatiyó nu̱ú na̱ santo, ni nu̱ú na̱ ángel ta ni nu̱ú ta̱ Jesús. Saátu va̱ása chíndeéyó bandera, ta ni va̱ása ndásakáʼnuyó na̱ chíñu. Ta ni nda̱a̱ ndáaka ña̱ ná ka̱ʼa̱nna xíʼinyó, chíka̱a̱-iniyó ña̱ kundiku̱nyó ña̱ ni̱ka̱ʼa̱n ta̱ Jesús: “Jehová Ndióxi̱ún ndasakáʼnún” (Mat. 4:10).

7. ¿Ndáa ki̱ʼva íyo ña̱ kéʼé miíyó na̱ testigo Jehová nu̱ú ña̱ kéʼé na̱ inka veʼe-ñu̱ʼu?

⁷ Tiempo vitin ku̱a̱ʼání na̱ yiví ndíku̱nna na̱ su̱tu̱ ta nda̱a̱ kúni̱na ndasakáʼnuna na̱yóʼo. Ku̱a̱ʼánína xáʼa̱n veʼe-ñu̱ʼuna, ta sátána libro ña̱ tává na̱yóʼo, ta savana táxina ku̱a̱ʼání xu̱ʼún ña̱ va̱ʼa chindeétáʼanna xíʼin veʼe-ñu̱ʼu yóʼo. Savana kándíxanína ndiʼi ña̱ káʼa̱nna. Ta ni ná kuninu̱úna ta̱ Jesús va̱ása kusi̱íní-inina xíʼinra nda̱a̱ táki̱ʼva kúsi̱í-inina xíʼin na̱ su̱tu̱ yóʼo. Soo miíyó na̱ ndásakáʼnu Jehová, va̱ása ndíku̱nyó nda̱a̱ ni iin na̱ yiví na̱ íyo nu̱ú ñuʼú yóʼo. Ta ni íxato̱ʼóyó na̱ níʼi yichi̱ nu̱úyó ti̱xin congregación, soo ndíku̱nyó ña̱ sa̱náʼa̱ ta̱ Jesús tá ka̱chira: “Ñani kúú ndiʼivandó” (Mat. 23:8-10). Ta ni va̱ása ndásakáʼnuyó nda̱a̱ ni iin na̱ yiví, kúúna na̱ níʼi yichi̱ ti̱xin veʼe-ñu̱ʼu á na̱ chíñu. Ta tá kúni̱na keʼéna iin ña̱ʼa, va̱ása chíndeétáʼanyó xíʼinna, saáchi va̱ása kíʼviyó xíʼin ña̱ política ta ni xíʼin na̱ veʼe-ñu̱ʼu. Ku̱a̱ʼání na̱ káʼa̱n ña̱ ndíku̱nna ta̱ Jesús kéʼéna ña̱yóʼo, soo miíyó va̱ása kéʼéyóña (Juan 18:36).

8. ¿Nda̱chun va̱ʼa kúnda̱a̱-iniyó ña̱ kúni̱ Jehová ná ndasakáʼnuyó ki̱vi̱ra ta natúʼunyó xíʼin inkana xa̱ʼa̱ña?

⁸ Iin yichi̱ ni̱ka̱ʼa̱n ta̱ Jesús ña̱yóʼo xíʼin yivára: “Yivá ndasakáʼnu ki̱vi̱ún”. Ta nda̱a̱ chí ndiví ni̱ka̱ʼa̱n Jehová xíʼin ta̱ Jesús ña̱ ndasakáʼnuvara ki̱vi̱ra (Juan 12:28). Ta tá ni̱xi̱yo ta̱ Jesús nu̱ú ñuʼú yóʼo, ndiʼi tiempo nda̱sakáʼnura ki̱vi̱ yivára (Juan 17:26). Ña̱kán, na̱ ndíku̱n sa̱tá ta̱ Cristo kúsi̱íní-inina tá xíniñúʼuna ki̱vi̱ Jehová, ta saátu kúsi̱íní-inina tá nátúʼunna xíʼin inkana xa̱ʼa̱ ña̱yóʼo.

9. ¿Ndáa ki̱ʼva ni̱na̱ʼa̱ na̱ cristiano na̱ xi̱ndoo tá siglo nu̱ú ña̱ xi̱ ixato̱ʼóna ki̱vi̱ Ndióxi̱?

⁹ Tá siglo nu̱ú, tá sa̱kán ki̱xáʼa íyo congregación, Jehová nda̱kaʼánra xa̱ʼa̱ na̱ inka ñuu ta ti̱xin na̱kán ta̱vára iin ñuu ña̱ va̱ʼa kuniʼi ki̱vi̱ra (Hech. 15:14). Na̱ cristiano kán xi̱kusi̱íní-inina tá xi̱xiniñúʼuna ki̱vi̱ Jehová, ta xi̱kuni̱na natúʼunna xa̱ʼa̱ña xíʼin inkana. Tá xi̱natúʼunna xíʼin na̱ yiví xa̱ʼa̱ Ndióxi̱, xi̱xiniñúʼuna ki̱vi̱ra, ta saátu xi̱niñúʼunaña tá ka̱ʼyína ña̱ va̱xi nu̱ú Biblia. * Tasaá ni̱na̱ʼa̱na ña̱ kúúna iin ñuu ña̱ níʼi ki̱vi̱ Ndióxi̱ (Hech. 2:14, 21).

10. ¿Ndáaña náʼa̱ nu̱úyó ña̱ iinlá na̱ testigo Jehová kúú na̱ xíniñúʼu ki̱vi̱ra?

¹⁰ ¿Á iinlá na̱ testigo Jehová kúú na̱ xíniñúʼu ki̱vi̱ra tiempo vitin? Ná ka̱ʼa̱nyó xa̱ʼa̱ña. Ku̱a̱ʼání na̱ níʼi yichi̱ ti̱xin veʼe-ñu̱ʼu va̱ása nátúʼunna  xíʼin na̱ yiví ña̱ íyo ki̱vi̱ Ndióxi̱. Ta ni va̱ása kúni̱na ña̱ ná kunda̱a̱-ini na̱ yiví xa̱ʼa̱ ña̱yóʼo. Sa̱kútaʼana ki̱vi̱ra nu̱ú Biblia, ta saátu va̱ása kúni̱na ná kuniñúʼu na̱ yiví ki̱vi̱ra ti̱xin veʼe-ñu̱ʼuna. * Soo iinlá miíyó na̱ testigo Jehová kúú na̱ ndásakáʼnu ki̱vi̱ra ta íxato̱ʼóyóña. Ta saátu chíka̱a̱níyó ndee̱ ña̱ sanáʼa̱yó ndiʼi na̱ yiví xa̱ʼa̱ ki̱vi̱ Ndióxi̱, ta kǒo inka veʼe-ñu̱ʼu kéʼé ña̱yóʼo. Ta tá chíka̱a̱yó ndee̱ ña̱ natúʼunyó xa̱ʼa̱ ki̱vi̱ Jehová, saá sáxi̱nuyó ña̱ kúni̱ kachi ki̱vi̱yó (Is. 43:10-12). Saátu xa̱a̱ yáʼaka 240 millón copia ña̱ Traducción del Nuevo Mundo táváyó, ta nu̱ú ña̱yóʼo va̱xi ki̱vi̱ Ndióxi̱ nu̱ú xíniñúʼu kixiña. Ta saátu xa̱a̱ yáʼaka 1,000 nu̱ú tu̱ʼun táváyó tutu ña̱ nátúʼun xa̱ʼa̱ ki̱vi̱ Jehová.

11. ¿Ndáa ki̱ʼva ni̱na̱ʼa̱ na̱ cristiano na̱ xi̱ndoo tá siglo nu̱ú ña̱ xi̱kuʼvi̱-inina xi̱xinina ña̱ nda̱a̱?

¹¹ Ta̱ Jesús xi̱kuʼvi̱-inira xi̱xinira ña̱ nda̱a̱ xa̱ʼa̱ Ndióxi̱ ta saátu ña̱ káʼa̱nra keʼéra chí nu̱únínu. Xíʼin ki̱ʼva ña̱ xi̱takura ni̱na̱ʼa̱ra ña̱ xi̱kandíxara ña̱ nda̱a̱, ta saátu sa̱náʼa̱ra inka na̱ yiví xa̱ʼa̱ña (Juan 18:37). Ta saátu na̱ xi̱ndiku̱n sa̱tá ta̱ Jesús xi̱kuʼvi̱ní-inina xi̱xinina ña̱ nda̱a̱ (Juan 4:23, 24). Ta̱ apóstol Pedro ni̱ka̱ʼa̱nra xa̱ʼa̱ na̱ cristiano ña̱ xi̱ndiku̱nna ña̱ nda̱a̱ (2 Ped. 2:2). Na̱yóʼo xi̱kuʼvi̱ní-inina xi̱xinina ña̱ nda̱a̱, ña̱kán va̱ása níkandíxana ña̱ xi̱sanáʼa̱ na̱ inka veʼe-ñu̱ʼu. Ta saátu va̱ása níxi̱ndiku̱nna costumbre na̱ yiví, ta va̱ása níxi̱kandíxana ña̱ xi̱ka̱ʼa̱nna (Col. 2:8). Ki̱ʼva saá kéʼé miíyó na̱ ndíku̱n ta̱ Jesús tiempo vitin, saáchi ndíku̱nyó  ña̱ nda̱a̱ (3 Juan 3, 4). ¿Ndáa ki̱ʼva kéʼéyó ña̱yóʼo? Chíka̱a̱yó ndee̱ ña̱ kundiku̱nyó ndiʼi ña̱ káʼa̱n tu̱ʼun Ndióxi̱ ta kándíxayóña.

12. ¿Ndáaña kéʼé na̱ hermano na̱ níʼi yichi̱ nu̱úyó tá kíʼinna kuenta ña̱ xíniñúʼu nasamana iin ña̱ʼa, ta nda̱chun kéʼénaña?

¹² Miíyó na̱ testigo Jehová va̱ása káʼa̱nyó ña̱ va̱ʼaní kúnda̱a̱-iniyó xíʼin ña̱ káʼa̱n Biblia. Saáchi sava yichi̱ va̱ása vií níxi̱ndakaniyó xa̱ʼa̱ña, á va̱ása viíní níxi̱keʼéyó sava chiñu ti̱xin congregación. Soo va̱ása ndákanda̱-iniyó xíʼin ña̱yóʼo, saáchi tu̱ʼun Ndióxi̱ káʼa̱nña xa̱ʼa̱ na̱ ñuura ña̱ loʼo tá loʼo xa̱a̱na kunda̱a̱-inina xa̱ʼa̱ ña̱ káʼa̱n tu̱ʼunra (Col. 1:9, 10). Loʼo tá loʼo chíndeétáʼan Jehová xíʼinyó kunda̱a̱-iniyó xa̱ʼa̱ ña̱ nda̱a̱, ña̱kán kúee ná koo iniyó ta kundatuyó ña̱ ná na̱ʼa̱ Jehová ña̱ nda̱a̱ nu̱úyó (Prov. 4:18). Sava yichi̱, na̱ hermano na̱ níʼi yichi̱ nu̱úyó xáa̱na kíʼinna kuenta ña̱ xíniñúʼu nasamayó ki̱ʼva ña̱ kúnda̱a̱-iniyó xíʼin iin ña̱ʼa, á nasamayó ki̱ʼva ña̱ keʼéyóña. Ku̱a̱ʼání na̱ veʼe-ñu̱ʼu, násamana ki̱ʼva ña̱ sánáʼa̱na ti̱xin veʼe-ñu̱ʼuna ña̱ va̱ʼa sakúsi̱ína-ini na̱ yiví. Soo miíyó na̱ testigo Jehová, násamayó ki̱ʼva ña̱ kúnda̱a̱-iniyó xíʼin iin ña̱ʼa ña̱ va̱ʼa koo yatinkayó nu̱úra, ta ndasakáʼnuyóra nda̱a̱ táki̱ʼva sa̱náʼa̱ ta̱ Jesús (Sant. 4:4). Va̱ása násamayó iin ña̱ʼa xa̱ʼa̱ ña̱ kúni̱yó kitáʼan kuitíña xíʼin ki̱ʼva ña̱ sánáʼa̱ na̱ ñuyǐví yóʼo, kéʼéyóña saáchi ni̱xa̱a̱yó ku̱nda̱a̱ káxi-iniyó xa̱ʼa̱ ña̱ káʼa̱n Biblia, ta kéʼéyóña saáchi kúʼvi̱-iniyó xíniyó ña̱ nda̱a̱ (1 Tes. 2:3, 4).

13. ¿Ndáaña kéʼé na̱ ndixa ndíku̱n ta̱ Cristo, ta ndáa ki̱ʼva náʼa̱ miíyó na̱ testigo Jehová ña̱yóʼo?

¹³ Na̱ cristiano na̱ ni̱xi̱yo tá siglo nu̱ú ku̱a̱ʼání ña̱ va̱ʼa xi̱kuumiína, soo ña̱ ndáyáʼvika xi̱kuumiína kúú ña̱ xi̱kuʼvi̱-inina xi̱xinitáʼanna. Ta̱ Jesús ka̱chira: “Tasaá kúú ña̱ kunda̱a̱-ini ndiʼina ña̱ kúúndó discípuloi̱: tá kúʼvi̱-inindó xínitáʼanndó” (Juan 13:34, 35). Tiempo vitin miíyó na̱ testigo Jehová na̱ íyo iníísaá nu̱ú ñuʼú, kúʼvi̱-iniyó xínitáʼanyó ta viíní kítáʼanyó. Ta síín íyoyó nu̱ú inkaka religión, saáchi ni kúúyó na̱ ku̱i̱ká á na̱ nda̱ʼví, ni nda̱a̱ ndáaka raza kúúyó á ni nda̱a̱ ndáaka ñuu ke̱eyó, va̱ʼaní kítáʼanyó. Ta nda̱a̱ táki̱ʼva íyo na̱ veʼeyó saá íyo ndiʼi na̱ hermanoyó nu̱úyó. Ta ti̱xin reunión xíʼin asamblea kúú nu̱ú náʼa̱yó ña̱ kúʼvi̱-iniyó xínitáʼanyó. Ta tá xítoyó ña̱yóʼo saá kúú ña̱ va̱ása xíka-iniyó ña̱ iinlá miíyó kúú na̱ ndásakáʼnu Jehová nda̱a̱ táki̱ʼva kúni̱ra.

14. Nda̱a̱ táki̱ʼva káchi Colosenses 3:12-14, ¿ndáa ki̱ʼva náʼa̱yó ña̱ kúʼvi̱-iniyó xínitáʼanyó?

¹⁴ Ña̱ Biblia káchiña: “Kuʼvi̱ní-inindó kunitáʼanndó” (1 Ped. 4:8). Ta iin ki̱ʼva ña̱ na̱ʼa̱yó ña̱ kúʼvi̱-iniyó xínitáʼanyó kúú ña̱ ixakáʼnu-iniyó xa̱ʼa̱ táʼanyó, ta kundeé-iniyó xíʼin ña̱ kéʼé inkana xíʼinyó. Ta saátu ndúkúyó ki̱ʼva ña̱ va̱ʼa koo iniyó xíʼin ndiʼi na̱ hermanoyó, nda̱a̱ na̱ ke̱ʼé iin ña̱ va̱ása va̱ʼa xíʼinyó (kaʼvi Colosenses 3:12-14). * Xa̱ʼa̱ ña̱ kúʼvi̱-iniyó xínitáʼanyó, náʼa̱yó ña̱ ndixa ndíku̱nyó ta̱ Cristo.

15. ¿Ndáa inka ki̱ʼva ndíku̱nyó yichi̱ na̱ cristiano na̱ ni̱xi̱yo tá siglo nu̱ú?

¹⁵ Íyo inkaka ki̱ʼva ña̱ ndíku̱nyó yichi̱ na̱ cristiano na̱ xi̱ndoo tá siglo nu̱ú. Tá kúú, chiñu ña̱ kúúmií na̱ superintendente, na̱ anciano xíʼin na̱ siervo ministerial, táki̱ʼva íyo chiñu ña̱ xi̱kuumií na̱ apóstol na̱ ni̱xi̱yo tá siglo nu̱ú saá íyo ña̱yóʼo (Filip. 1:1; Tito 1:5). Táki̱ʼva xi̱ndakanixi̱ní na̱ cristiano kán saátu ndákanixi̱ní miíyó xa̱ʼa̱ ña̱ kini ña̱ kéʼé na̱ yiví, ta  saátu ña̱ xíniñúʼu keʼé na̱ ti̱ndaʼa̱, saátu íxato̱ʼóyó ni̱i̱ ta kúni̱yó kundaayó na̱ congregación nu̱ú na̱ ni̱ki̱ʼvi iin ku̱a̱chi ndeé ta va̱ása xíínna ndandikó-inina (Hech. 15:28, 29; 1 Cor. 5:11-13; 6:9, 10; Heb. 13:4).

16. ¿Ndáaña sánáʼa̱ Efesios 4:4-6 miíyó?

¹⁶ Ta̱ Jesús ni̱ka̱ʼa̱nra ña̱ ku̱a̱ʼání na̱ yiví ka̱ʼa̱nna ña̱ kúúna discípulora, soo su̱ví ndiʼina xa̱a̱ koo discípulora (Mat. 7:21-23). Ta saátu tu̱ʼun Ndióxi̱ ni̱ka̱ʼa̱nña ña̱ ki̱vi̱ nu̱ú ndíʼi, ku̱a̱ʼánína ka̱ʼa̱nna ña̱ ndásakáʼnuna Ndióxi̱ soo su̱ví ña̱ nda̱a̱ koo ña̱yóʼo (2 Tim. 3:1, 5). Soo káxiní káʼa̱n tu̱ʼun Ndióxi̱ xíʼinyó ña̱ iin kuitíva kúú na̱ kíndo̱o-inira xíʼin (kaʼvi Efesios 4:4-6). *

17. ¿Ndáana kúú religión ña̱ nda̱a̱ ta ndíku̱nna yichi̱ ta̱ Jesús tiempo vitin?

¹⁷ Tá saá, ¿ndáa religión kúú ña̱ nda̱a̱ tiempo vitin? Xa̱a̱ ni̱ka̱ʼa̱nyó xa̱ʼa̱ ña̱ xíniñúʼu keʼé na̱yóʼo, ta saátu xa̱a̱ ni̱ka̱ʼa̱nyó xa̱ʼa̱ yichi̱ ña̱ sa̱ndákoo ta̱ Jesús, ta ndáa ki̱ʼva xi̱ndiku̱n na̱ cristiano na̱ xi̱ndoo tá siglo nu̱ú yichi̱ra. Ña̱kán kúnda̱a̱ káxi-iniyó ña̱ na̱ testigo Jehová kúú religión ña̱ nda̱a̱. Iin bendición káʼnuní kúú ña̱ kúúmiíyó chi kúúyó táʼan na̱ ñuu Ndióxi̱, ta saátu kúnda̱a̱-iniyó xa̱ʼa̱ Jehová xíʼin ña̱ kúni̱ra keʼéra chí nu̱únínu. Xa̱ʼa̱ ña̱yóʼo ná chika̱a̱-iniyó ña̱ va̱ása sandákooyó ña̱ nda̱a̱.