1, 2. ¿Ndáa ki̱ʼva kaʼviyó Biblia? Ka̱ʼa̱n xa̱ʼa̱ iin ejemplo.

 NDAKANIXI̱NÍ ña̱ kúni̱ún satáún iin veʼe. ¿Ndáaña xíniñúʼu keʼún ña̱ va̱ʼa kunda̱a̱-iniún á satáún veʼe yóʼo á va̱ása? ¿Á satáún veʼe yóʼo tá ná na̱ʼa̱ kuitína na̱ʼnáña nu̱ún? Sana va̱ásaví, chi sana kuni̱ún ku̱ʼu̱n kotoún ndáa ki̱ʼva káaña, ndáa ki̱ʼva íyo cuartoña. Nda̱a̱ sana kuni̱ún nda̱ka̱tu̱ʼún na̱ i̱xava̱ʼa veʼe yóʼo ña̱ va̱ʼa kunda̱a̱-iniún ndáa ki̱ʼva i̱xava̱ʼanaña.

² Ki̱ʼva saá xíniñúʼu keʼéyó tá káʼviyó Biblia. Iin ta̱ xíni̱ va̱ʼa xa̱ʼa̱ Biblia ni̱ka̱ʼa̱nra ña̱yóʼo “Biblia íyoña nda̱a̱ táki̱ʼva íyo iin veʼe ña̱ káʼnuní, ña̱ ndíka̱ní, ña̱ súkunní ta va̱ʼaní kútu̱ ku̱vaʼa xa̱ʼa̱ña”. Ña̱kán, ¿ndáa ki̱ʼva kunda̱a̱-iniyó xíʼin ndiʼi ña̱ va̱xi nu̱ú Biblia? Tá kamaní káʼviyóña, va̱ása kivi kunda̱a̱-iniyó xa̱ʼa̱ inkaka ña̱ʼa ña̱ ndáyáʼvi va̱xi nu̱úña (Heb. 5:12). Ña̱kán tá káʼviyóña, viíní ná nandukúyó xa̱ʼa̱ña ña̱ va̱ʼaní kunda̱a̱-iniyó xíʼinña. Ta ná kotoyó ndáa ki̱ʼva kítáʼanña xíʼin inkaka ña̱ va̱xi nu̱úña. Ña̱kán, su̱ví xíniñúʼu kandíxa kuitíyó ña̱ va̱xi nu̱úña, chi saátu xíniñúʼu kunda̱a̱-iniyó ndáa xa̱ʼa̱ kúú ña̱ kándíxayóña.

3. ¿Ndáaña ni̱ka̱ʼa̱n ta̱ Pablo xíʼin na̱ cristiano keʼéna, ta nda̱chun? (Efesios 3:​14-19).

 ³ Ña̱ va̱ʼa kunda̱a̱-iniyó xíʼin ña̱ va̱xi nu̱ú Biblia xíniñúʼu viíní kaʼviyóña ta viíní nandukúyó xa̱ʼa̱ ña̱ káʼviyó. Ta̱ apóstol Pablo ni̱ka̱ʼa̱nra xíʼin na̱ cristiano ña̱ ná chika̱a̱na ndee̱ ña̱ va̱ʼaní kunda̱a̱-inina xíʼin tu̱ʼun Ndióxi̱ “ndáa ki̱ʼva ndíka̱ña, ndáa ki̱ʼva káni̱ña, ndáa ki̱ʼva súkunña, ta ndáa ki̱ʼva kúnuña”. Tá ná keʼéna ña̱yóʼo, saá kúú ña̱ kandíxakana Ndióxi̱ (kaʼvi Efesios 3:​14-19). Ki̱ʼva saá xíniñúʼu keʼéyó tá káʼviyó Biblia. Ná kotoyó ndáa ki̱ʼva viíní kaʼviyó ña̱ va̱xi nu̱úña, tasaá va̱ʼaní kunda̱a̱-iniyó xíʼinña.

4. ¿Ndáaña xíniñúʼu keʼéyó ña̱ va̱ʼaníka kutáʼanyó xíʼin Jehová? Ka̱ʼa̱n xa̱ʼa̱ sava ejemplo.

⁴ Miíyó na̱ ndásakáʼnu Jehová, chíkaa̱yó ndee̱ ña̱ sakúaʼakayó xa̱ʼa̱ ña̱ va̱xi nu̱ú Biblia. Ta espíritu santo kúú ña̱ chíndeétáʼan xíʼinyó ña̱ va̱ʼa kunda̱a̱-iniyó xa̱ʼa̱ ña̱ ndíchi ña̱ sánáʼa̱ Ndióxi̱ miíyó (1 Cor. 2:​9, 10). Iin ña̱ kivi chindeétáʼan xíʼinyó ña̱ va̱ʼaka kutáʼanyó xíʼin Jehová kúú, ña̱ keʼéyó iin programa ta kundiku̱nyóña. Íyo ku̱a̱ʼání ña̱ kivi kaʼviyó xa̱ʼa̱ tá kúú, kivi kaʼviyó xa̱ʼa̱ ndáa ki̱ʼva ni̱na̱ʼa̱ Jehová ña̱ xi̱kuʼvi̱-inira xi̱nira na̱ xi̱ndasakáʼnu miíra tiempo xi̱naʼá ta ndáa ki̱ʼva kúʼvi̱ní-inira xínira miíyó tiempo vitin. Kivi kaʼviyó xa̱ʼa̱, ndáaña xi̱niñúʼu Jehová tasaá va̱ʼa nda̱sakáʼnu na̱ ñuu Israel miíra táki̱ʼva xi̱kuni̱ra, ta kotoyó ndáa ki̱ʼva kítáʼan ña̱yóʼo xíʼin ki̱ʼva ña̱ ndásakáʼnuyóra tiempo vitin. Saátu kivi kaʼviyó xa̱ʼa̱ profecía ña̱ sa̱xínu ta̱ Jesús tá ki̱xira nu̱ú ñuʼú yóʼo.

5. ¿Ndáaña kúni̱ún kaʼviún xa̱ʼa̱?

⁵ Sava na̱ hermano na̱ kútóo kaʼvi Biblia ni̱ka̱ʼa̱nna ndáaña kúni̱na kunda̱a̱ka-inina xa̱ʼa̱. Ta nu̱ú recuadro ña̱ naní “ Ña̱ kivi kaʼviún xa̱ʼa̱”, va̱xi sava ña̱ ni̱ka̱ʼa̱nna. Ta ña̱ va̱ʼa kunda̱a̱-iniún xíʼin ña̱yóʼo kivi kuniñúʼún Índice de las publicaciones Watch Tower xíʼin ña̱ Guía de estudio para los testigos de Jehová. Ña̱yóʼo chindeétáʼan xíʼún  ña̱ kunda̱a̱ka-iniún xa̱ʼa̱ Ndióxi̱ ta kandíxakaúnra (Prov. 2:​4, 5). Vitin ná sakúaʼayó xa̱ʼa̱ ña̱ ndáyáʼviní va̱xi nu̱ú Biblia.

6. ¿Nda̱chun va̱ʼa kándíxayó ña̱ káʼa̱n Ndióxi̱ keʼéra? (Efesios 3:11).

⁶ Ná ndakanixi̱níyó xa̱ʼa̱ ña̱ kúni̱ Jehová keʼéra. Ndiʼi ña̱ káʼa̱nra keʼéra ña̱ nda̱a̱ kúúña. ¿Nda̱chun káʼa̱nyó ña̱yóʼo? Saáchi tá kúni̱ra keʼéra iin ña̱’a kivi kuniñúʼura nda̱a̱ ndáaka ña̱ʼa ña̱ va̱ʼa saxínuraña. Íyo iin ña̱ ndáyáʼviní káʼa̱n Jehová keʼéra ta táxiníyó tíxa̱ʼvi ndaʼa̱ra chi loʼo tá loʼo káʼa̱nra xíʼinyó xa̱ʼa̱ ña̱yóʼo (Efes. 3:11). “Jehová xíniñúʼura ndiʼi ña̱ i̱xava̱ʼara ña̱ xi̱nu ña̱ kúni̱ra” (Prov. 16:4). Ta ndiʼi ña̱ káʼa̱nra keʼéra, kooña ndiʼi tiempo. Ña̱kán, ¿ndáaña kúni̱ Jehová keʼéra, ta ndáaña xa̱a̱ kéʼéra ña̱ va̱ʼa xi̱nuña?

7. Tá i̱xaso̱ʼo ta̱ Adán xíʼin ñá Eva, ¿ndáaña xi̱niñúʼu Ndióxi̱ ña̱ va̱ʼa keʼéra ña̱ kúni̱ra? (Mateo 25:34).

⁷ Ña̱yóʼo ni̱ka̱ʼa̱n Ndióxi̱ xíʼin ta̱ Adán xíʼin ñá Eva keʼéna: “Kaku se̱ʼendó ta ku̱a̱ʼá ná koona, ta sakutúndó nu̱ú ñuʼú, ta kundaandóña, ta kiʼinndó kuenta xíʼin kití tí ñúʼu ini mar, xíʼin ndiʼi tí ndáchí, xíʼin ndiʼi tí íyo nu̱ú ñuʼú” (Gén. 1:28). Tá i̱xaso̱ʼo ta̱ Adán xíʼin ñá Eva, ndiʼi na̱ se̱ʼena ni̱xa̱a̱na ndu̱una na̱ yiví ku̱a̱chi, soo kǒo nítaxi Jehová kasi ña̱yóʼo nu̱úra ña̱ sáxi̱nura ña̱ kúni̱ra. Ndi̱ku̱n kama ni̱ka̱ʼa̱nra ña̱ koo iin Reino chí ndiví ta ña̱yóʼo kúú ña̱ chindeétáʼan xíʼin na̱ yiví ña̱ koona nda̱a̱ táki̱ʼva xi̱kuni̱ra tá xa̱ʼa̱ (kaʼvi Mateo 25:34). Tá ni̱ya̱ʼa tiempo Jehová ni̱na̱ʼa̱ra ña̱ kúʼvi̱ní-inira xínira miíyó, saáchi chi̱ndaʼára se̱ʼera ta̱ nu̱ú ña̱ kixira nu̱ú ñuʼú yóʼo ña̱ na̱túʼunra xa̱ʼa̱ Reino Ndióxi̱ ta kuvira xa̱ʼa̱yó ña̱ va̱ʼa ndatavára miíyó nu̱ú ku̱a̱chi. Tándi̱ʼi, nda̱takura ña̱ va̱ʼa kaʼndachíñura chí ndiví. Soo íyo inkaka ña̱ kivi sákuaʼayó xa̱ʼa̱ ña̱ káʼa̱n Ndióxi̱ keʼéra ta ndáyáʼviní ña̱ ndakanixi̱níyó xa̱ʼa̱ ña̱yóʼo.

8. a) ¿Ndáaña kúúmií ña̱ ndáyáʼvika káʼa̱n Biblia xa̱ʼa̱? b) Táki̱ʼva káʼa̱n Efesios 1:​8-11, ¿ndáaña keʼéka Jehová? (Koto na̱ʼná ña̱ va̱xi chí nu̱ú kíxáʼa tutu yóʼo).

⁸ Ña̱yóʼo kúúmií ña̱ ndáyáʼvika káʼa̱n Biblia xa̱ʼa̱: Jehová ndasayi̱i̱ra ki̱vi̱ra tá ná sáxi̱nura ña̱ kúni̱ra, ta ta̱ Jesús kúú ta̱ chindeétáʼan xíʼinra ña̱ va̱ʼa keʼéra ña̱yóʼo. Nda̱a̱ ni iin ña̱ʼa va̱ása kivi kasiña nu̱ú Jehová ña̱ sáxi̱nura ña̱ kúni̱ra. Saáchi miíra káʼa̱n ña̱ keʼévaraña (Is. 46:​10, 11, nota; Heb. 6:​17, 18). Tá ná ya̱ʼa tiempo, ñuʼú yóʼo xa̱a̱ña nduuña iin ñuʼú livi ta ndiʼi na̱ se̱ʼe ta̱ Adán xíʼin ñá Eva kǒoka ku̱a̱chi kuumiína ta kutakuna ndiʼi tiempo (Sal. 22:26). Ta inka ña̱ kúni̱ Jehová keʼéra kúú: ndiʼi na̱ ángel na̱ íyo chí ndiví xíʼin na̱ yiví na̱ íyo nu̱ú ñuʼú yóʼo iin familia xa̱a̱na kuuna ta inkáchi ndasakáʼnunara (kaʼvi Efesios 1:​8-11). Ndákanda̱ní-iniyó xíʼin ki̱ʼva ña̱ sáxi̱nu Jehová ña̱ kúni̱ra keʼéra.

9. ¿Ndáaña xáa̱yó kúnda̱a̱-iniyó tá káʼviyó Biblia?

⁹ Ná ndakanixi̱níyó xa̱ʼa̱ profecía ña̱ ni̱ka̱ʼa̱n Jehová nu̱ú jardín ña̱ Edén ña̱ va̱xi nu̱ú Génesis 3:15. b Profecía yóʼo káʼa̱nña xa̱ʼa̱ ña̱ kúni̱ Ndióxi̱ keʼéra, ta tá ná ya̱ʼa ku̱a̱ʼá tiempo saá xi̱nuña. Káʼa̱nña ña̱ ti̱xin na̱ veʼe ta̱ Abrahán kaku iin ta̱ xa̱a̱ koo Mesías (Gén. 22:​15-18). Tá ku̱i̱ya̱ 33 saá kúú ña̱  ni̱xi̱nu iin táʼví profecía yóʼo, saáchi saá kúú ña̱ xa̱ʼnína ta̱ Jesús (Hech. 3:​13-15). Ta ti̱xin ña̱ mil ku̱i̱ya̱, saá kúú ña̱ xi̱nu inka táʼví profecía yóʼo tá ná sandíʼi-xa̱ʼa̱ ta̱ Jesús ta̱ Ndi̱va̱ʼa (Apoc. 20:​7-10). Tiempo vitin na̱ kítáʼan xíʼin ta̱ Ndi̱va̱ʼa sáa̱-inina xínina na̱ ñuu Jehová, soo Biblia káʼa̱nkaña xa̱ʼa̱ ndáaña kuu xíʼin na̱yóʼo tá kúma̱níka kixaa̱ ki̱vi̱ káʼnu Jehová.

10. a) ¿Ndáaña xa̱a̱ ku̱nu̱mí kuu? b) ¿Ndáaña chindeétáʼan xíʼinyó ña̱ koo tu̱ʼvayó? (Koto ña̱ káʼa̱n nota).

¹⁰ Ndakanda̱ní-iniyó tá ná kixáʼa na̱ yiví ka̱ʼa̱nna: “Vitin va̱ʼaní ndóo ndiʼiyó ta kǒoka ña̱ sándi̱ʼi̱-iniyó” (1 Tes. 5:​2, 3). Tá ná kuu ña̱yóʼo, na̱ chíñu xíʼin na̱ yiví kixáʼana sándiʼi-xa̱ʼa̱na ndiʼi na̱ religión vatá, tasaá kixáʼa ña̱ gran tribulación (Apoc. 17:16). Tándi̱ʼi, sana ndakanda̱ní-inina tá ná kunina ku̱a̱ʼání ña̱ kuu chí ndiví, “kunina ta̱ kúú se̱ʼe ta̱a ña̱ va̱xira chí nu̱ú vi̱kó ña̱ íyo chí ndiví xíʼin ndiʼi ndee̱ra” (Mat. 24:30). Tándi̱ʼi, ta̱ Jesús ndatiinra ku̱a̱chi xíʼin na̱ yiví, ta ndataʼvíra na̱ yiví nda̱a̱ táki̱ʼva ndátaʼvína tí ndikachi xíʼin tí ti̱xúʼu (Mat. 25:​31-33, 46). Soo xa̱ʼa̱ ña̱ sáa̱ní ta̱ Ndi̱va̱ʼa, chika̱a̱ra-ini ku̱a̱ʼání na̱ yiví ña̱ ixandi̱va̱ʼana xíʼin na̱ ñuu Jehová. Biblia káʼa̱nña xa̱ʼa̱ iin tiʼvi na̱ yiví yóʼo ña̱ nanína: “Gog ña̱ ke̱e nu̱ú ñuʼú ña̱ Magog” (Ezeq. 38:​2, 10, 11). Tá kúma̱níka kixáʼa ña̱ gran tribulación, na̱ ungido na̱ kíndo̱oka nu̱ú ñuʼú yóʼo ndakutáʼanna xíʼin ta̱ Jesús chí ndiví xíʼin inkaka na̱ ángel, tasaá kúú ña̱ kixáʼa ña̱ Armagedón (Mat. 24:31; Apoc. 16:​14, 16). c Tándi̱ʼi, saá kúú ña̱ kixáʼa mil ku̱i̱ya̱ ña̱ kaʼndachíñu ta̱ Jesús (Apoc. 20:6).

11. Tá káʼa̱n Biblia xa̱ʼa̱ ña̱ kutakuyó ndiʼi tiempo, ¿ndáaña ndákanixi̱níún? (Koto na̱ʼná).

¹¹ Ná ndakanikaxi̱níyó xa̱ʼa̱ ndiʼika ña̱ koo chí nu̱únínu. Biblia káʼa̱nña ña̱ mií Ndióxi̱ “chi̱kaa̱ra-ini na̱ yiví ña̱ kutóona kutakuna ndiʼi tiempo” (Ecl. 3:11). Ndakanixi̱ní ña̱ va̱ʼaníka xa̱ún kutáʼún xíʼin Jehová. Libro ña̱ naní Acerquémonos a Jehová, página 319, káchiña: “Tá xa̱a̱ ná kutakuyó cien ku̱i̱ya̱,  mil ku̱i̱ya̱, millón ku̱i̱ya̱ á ku̱a̱ʼáníka millón ku̱i̱ya̱, saá kúú ña̱ sákuaʼayó ku̱a̱ʼáníka ña̱ʼa xa̱ʼa̱ Jehová nu̱úka ña̱ xa̱a̱ xíni̱yó tiempo vitin. Soo ni saá, kookava ku̱a̱ʼání ña̱ sakúaʼayó xa̱ʼa̱ra. […] Liviní koo ña̱ kutakuyó nu̱ú ñuyǐví xa̱á. Soo ña̱ ndáyáʼvi va̱ʼaka kúú ña̱: va̱ʼaníka xa̱a̱yó kutáʼanyó xíʼin Jehová”. Nani ndátuyó kixaa̱ ki̱vi̱ yóʼo, ¿ndáaka ña̱ kivi sakúaʼayó nu̱ú Biblia?

12. ¿Ndáaña kúni̱ kachiña ña̱ kotoyó chí ndiví? Ka̱ʼa̱n xa̱ʼa̱ ña̱yóʼo.

¹² Biblia chíndeétáʼanña xíʼinyó ña̱ ndakanixi̱níyó ndáa ki̱ʼva káa nu̱ú íyo Jehová chí ndiví (Is. 33:5). Saátu káʼa̱nña xíʼinyó xa̱ʼa̱ ña̱ va̱ʼa ña̱ kúúmií Jehová xíʼin familiara na̱ íyo chí ndiví (Is. 6:​1-4; Dan. 7:​9, 10; Apoc. 4:​1-6). Tá kúú, kivi kaʼviyó xa̱ʼa̱ ña̱ʼa ña̱ ndáyáʼviní xi̱ni ta̱ profeta Ezequiel, tá xi̱nira ña̱ nda̱kuná chí ndiví ta xi̱nira visión ña̱ ta̱xi Ndióxi̱ (Ezeq. 1:1).

13. ¿Ndáaña ndóʼún tá ndákanixi̱níún xa̱ʼa̱ chiñu ña̱ kéʼé ta̱ Jesús chí ndiví? (Hebreos 4:​14-16).

¹³ Ná ndakanixi̱níyó xa̱ʼa̱ chiñu ña̱ kéʼé ta̱ Jesús chí ndiví, ña̱ kúúra Rey xíʼin su̱tu̱ káʼnu ta kúndáʼviní-inira xínira miíyó. Tíxa̱ʼvi ta̱ Jesús, kivi kuyatinyó nu̱ú Jehová ta ka̱ʼa̱nyó xíʼinra “chi ta̱yóʼo kúú ta̱ náʼa̱ ña̱ va̱ʼaní-inira xíʼinyó ta kúndáʼvi-inira xínira miíyó, tasaá kúú ña̱ kivi na̱ʼa̱ra ña̱ va̱ʼaní-inira xíʼinyó mií tiempo ña̱ xíniñúʼuyóña” (kaʼvi Hebreos 4:​14-16). Ná kǒo taxiyó ya̱ʼa ni iin ki̱vi̱ ña̱ ndakanixi̱níyó xa̱ʼa̱ ndiʼi ña̱ xa̱a̱ ke̱ʼé Jehová xíʼin ta̱ Jesús xa̱ʼa̱yó xíʼin ña̱ kéʼékana xa̱ʼa̱yó tiempo vitin. Xa̱ʼa̱ ña̱ kúʼvi̱-inina xínina miíyó, ña̱yóʼo chíndeétáʼanña xíʼinyó ña̱ kachíñukayó nu̱ú Jehová xíʼin ña̱ si̱í-ini (2 Cor. 5:​14, 15).

14. ¿Ndáa ki̱ʼva na̱ʼa̱yó ña̱ táxiyó tíxa̱ʼvi ndaʼa̱ Jehová xíʼin ta̱ Jesús? (Koto na̱ʼná).

 ¹⁴ Iin ki̱ʼva ña̱ na̱ʼa̱yó ña̱ táxiyó tíxa̱ʼvi ndaʼa̱ Jehová xíʼin ta̱ Jesús kúú: ña̱ ná chindeétáʼanyó xíʼin na̱ yiví ña̱ xa̱a̱na koona testigora ta kundiku̱nna ta̱ Jesús (Mat. 28:​19, 20). Ta ña̱kán kúú ña̱ ke̱ʼé ta̱ apóstol Pablo. Saáchi xi̱kunda̱a̱-inira ña̱ kúni̱ Jehová kúú “ña̱ ná ka̱ku ndiʼi na̱ yiví, ta ná xa̱a̱na kunda̱a̱ káxi inina mií ña̱ nda̱a̱ xa̱ʼa̱ra” (1 Tim. 2:​3, 4). Ta̱ apóstol Pablo chi̱kaa̱níra ndee̱ ña̱ natúʼunra xíʼin na̱ yiví xa̱ʼa̱ Ndióxi̱ tasaá chi̱ndeétáʼanra xíʼin savana ña̱ ka̱kuna (1 Cor. 9:​22, 23).

15. Táki̱ʼva káchi Salmo 1:​2, ¿ndáaña kivi sakúsi̱í-iniyó?

¹⁵ Ña̱ ndixaní kúú ña̱ ni̱ka̱ʼa̱n ta̱ salmista tá ka̱chira ña̱ si̱íní íyo na̱ káʼvi ley Jehová, ñuú xíʼin káʼñu ta ndákanixi̱nína xa̱ʼa̱ña (Sal. 1:​1-3). Iin ta̱ sándaya̱ʼa ña̱ va̱xi nu̱ú Biblia inka tu̱ʼun ta̱ naní Joseph Rotherham, ni̱ka̱ʼa̱nra ña̱yóʼo, “iin na̱ káʼvi Biblia xíniñúʼu kutóonína consejo ña̱ va̱xi nu̱úña, ña̱kán va̱ʼa nandukúnaña, sakúaʼanaña, ta ndakanixi̱nína xa̱ʼa̱ña”. Ta káchikara: “Tá kǒo níxa̱a̱na kunda̱a̱-inina xíʼin ña̱ ka̱ʼvina nu̱ú Biblia, xíniñúʼu ndakanixi̱nína ña̱ nda̱a̱ táki̱ʼva íyo na̱ ka̱ʼvi sána mií saá íyona” (Studies in the Psalms, Joseph Rotherham). Saátu miíyó kivi kusi̱í-iniyó tá káʼviyó Biblia ta ná nandukú va̱ʼayó xa̱ʼa̱ña ta kotoyó ndáa ki̱ʼva kítáʼanña xíʼin inkaka ña̱ va̱xi nu̱úña. Kusi̱íní-iniyó tá ná kaʼviyó Biblia ta ndakanixi̱níyó xa̱ʼa̱ ña̱ va̱xi nu̱úña.

16. ¿Ndáaña sakúaʼayó nu̱ú inka artículo?

¹⁶ Ndiʼiyó kivi xa̱a̱yó kunda̱a̱-iniyó xa̱ʼa̱ ndiʼi ña̱ nda̱a̱ ña̱ sánáʼa̱ Jehová miíyó nu̱ú tu̱ʼunra. Nu̱ú inka artículo sakúaʼayó xa̱ʼa̱ templo espiritual Jehová, ña̱ ni̱ka̱ʼa̱n ta̱ Pablo xa̱ʼa̱ nu̱ú carta ña̱ ka̱ʼyíra ku̱a̱ʼa̱n nu̱ú na̱ hebreo. Ku̱a̱ʼání ña̱ sakúaʼayó tá ná kaʼviyó ña̱yóʼo.