¿Á xa̱a̱ xíni̱ún xa̱ʼa̱ ña̱yóʼo?
¿Á xi̱ndayáʼvi yaa nu̱ú na̱ ñuu Israel?
XI̱NDAYÁʼVIVA yaa nu̱ú na̱ ñuu Israel. Ku̱a̱ʼání yichi̱ Biblia káʼa̱nña xa̱ʼa̱ na̱ xi̱xita á na̱ xi̱sakáʼa. Iin táʼví ña̱ va̱xi nu̱ú Biblia yaa kúúña. Tá kúú ña̱ va̱xi nu̱ú Salmo, El Cantar de los Cantares xíʼin Lamentaciones, ta ka̱ʼyína ña̱yóʼo ña̱ va̱ʼa katanaña. Libro ña̱ naní Music in Biblical Life (La música en la vida bíblica) káʼa̱nña xa̱ʼa̱ Biblia “ña̱ káxiníva káʼa̱nña xa̱ʼa̱ na̱ yiví ña̱ xi̱kutóonína yaa ta ndiʼi ki̱vi̱ xi̱xitanaña”.
Xi̱xiniñúʼuna yaa ña̱ va̱ʼa ka̱ʼa̱nna xa̱ʼa̱ ña̱ xi̱ndoʼona. Na̱ israelita xi̱xitana yaa ña̱ va̱ʼa na̱ʼa̱na ndáa ki̱ʼva xi̱ndoʼona (Is. 30:29). Ná ñaʼá xi̱xitaná, xi̱tixáʼaná ta xi̱sakáʼaná pandereta tá xi̱ndaka̱xinna iin na̱ koo rey, tá xi̱xiyo vikó ta saátu tá xi̱kuchiñuna xíʼin na̱ xi̱kanitáʼan xíʼinna (Juec. 11:34; 1 Sam. 18:6, 7; 1 Rey. 1:39, 40). Ta saátu tá xi̱xiʼi̱ iin na̱ yiví, na̱ israelita xi̱xitana iin yaa ña̱ va̱ʼa na̱ʼa̱na ña̱ kúsuchí-inina (2 Crón. 35:25). Nda̱a̱ táki̱ʼva káʼa̱n tutu ña̱ Cyclopedia, de McClintock y Strong, “na̱ hebreo xi̱kutóonína kuniso̱ʼona yaa”.
Yaa ña̱ xi̱xiniso̱ʼo na̱ rey. Xi̱kutóoní na̱ rey ñuu Israel kuniso̱ʼona yaa. Ta̱ rey Saúl nda̱kaxinra ta̱ David ña̱ va̱ʼa sákaʼara tú arpa nu̱úra (1 Sam. 16:18, 23). Tá xa̱a̱ ndu̱u ta̱ David rey i̱xava̱ʼara ku̱a̱ʼáka ña̱ʼa ña̱ va̱ʼa sakáʼana yaa, ku̱a̱ʼání yaa livi ka̱ʼyíra ta saátu ni̱ka̱ʼa̱nra ña̱ koo na̱ sakáʼa ta katana ini templo Jehová (2 Crón. 7:6; Amós 6:5). Ta ti̱xin templo nu̱ú ni̱xi̱yo ta̱ Salomón ni̱xi̱yo na̱ ta̱a xíʼin ná ñaʼá na̱ xi̱xita (Ecl. 2:8).
Xi̱xitana yaa ña̱ va̱ʼa ndasakáʼnuna Jehová. Ini templo ña̱ Jerusalén ni̱xi̱yo 4,000 na̱ xi̱xini̱ní kata, ta saátu xi̱sakáʼana címbalo, arpa, trompeta xíʼin inkaka ña̱ xi̱sakáʼana (1 Crón. 23:5; 2 Crón. 5:12). Soo su̱ví na̱yóʼo kuití kúú na̱ níxi̱xiniñúʼu yaa ña̱ va̱ʼa ndasakáʼnuna Jehová. Chi saátu ku̱a̱ʼání na̱ israelita xi̱xitana tá xi̱ndaana ñuu Jerusalén ña̱ va̱ʼa ndasakáʼnuna Jehová (Sal. 120-134). Ta sava tutu ña̱ káʼa̱n xa̱ʼa̱ na̱ judío káʼa̱nña ña̱ na̱ israelita xi̱xitana yaa ña̱ naní Hallel a tá xi̱xiyo vikó ña̱ Pascua.
Nda̱a̱ tiempo vitin ndáyáʼviní yaa nu̱ú na̱ ñuu Jehová (Sant. 5:13). Xítayó yaa ña̱ va̱ʼa ndasakáʼnuyó Jehová (Efes. 5:19). Kúsi̱íní-iniyó tá xítayó xíʼin na̱ hermano ta yaa yóʼo chíkaa̱ña ndee̱ xíʼinyó ña̱ kundeé-iniyó ya̱ʼayó nu̱ú tu̱ndóʼo (Hech. 16:25; Col. 3:16). Tá xítayó saá náʼa̱yó ña̱ kándíxaníyó Jehová ta saátu ña̱ kúni̱níyó xíniyóra.
a Na̱ judío xi̱ka̱ʼa̱nna Hallel xíʼin ña̱ va̱xi nu̱ú Salmo 113 nda̱a̱ 118 ta xi̱xitanaña ña̱ va̱ʼa ndasakáʼnuna Jehová.
