Chí yéʼé templo ni̱xi̱yo cuarto yóʼo ta xi̱yaʼana ña̱yóʼo ña̱ va̱ʼa xa̱a̱na chí cuarto ña̱ naní ña̱ Yi̱i̱. ¿Nda̱saa súkun ni̱xi̱yoña? Tá kúma̱níka kotona ña̱ káʼa̱n Traducción del Nuevo Mundo ña̱ tu̱ʼun sáʼán tá ku̱i̱ya̱ 2023, nu̱ú 2 Crónicas 3:4 xi̱ka̱ʼa̱nña: “Cuarto ña̱ ni̱xi̱yo chí yéʼé inkáchi 20 codos ndíka̱ ni̱xi̱yoña xíʼin mií templo yóʼo: ta 120 súkun ni̱xi̱yoña”. Sava Biblia káʼa̱nña ña̱ cuarto yóʼo “120 codos” súkun ni̱xi̱yoña. Ña̱yóʼo kúni̱ kachiña ña̱ 53 metro súkun ni̱xi̱yoña.

Tá ku̱i̱ya̱ 2023 versículo yóʼo na̱samaña nu̱ú ña̱ Traducción del Nuevo Mundo ña̱ tu̱ʼun sáʼán ta vitin káchiña: “20 codos súkun ni̱xi̱yoña” ña̱yóʼo kúni̱ kachiña 9 metro. a Ná kotoyó nda̱chun na̱sama ña̱yóʼo.

Nu̱ú 1 Reyes ta̱ Jeremías káʼa̱nra nda̱saa káni ta ndíka̱ ni̱xi̱yoña soo kǒo káʼa̱nra nda̱saa súkun ni̱xi̱yoña. Soo nu̱ú 1 Reyes 6:3 viíní káʼa̱nra xa̱ʼa̱ ña̱ ni̱xi̱yo chí yéʼé ña̱ templo, ta kúú Mar ña̱ cobre, u̱xu̱ carro válí tú cobre ta saátu u̱vi̱ nama̱ ña̱ cobre ña̱ ni̱xi̱yo chí yéʼé ña̱ templo (1 Rey. 7:​15-37). Tá yáʼaka 50 metro súkun níxi̱yo cuarto loʼo yóʼo, súkunníka kunaʼa̱ña nu̱ú templo. Tá saá, ¿nda̱chun kǒo níka̱ʼa̱n ta̱ Jeremías xa̱ʼa̱ña? Soo tá ni̱ya̱ʼa tiempo na̱ judío na̱ xíni̱va̱ʼa xa̱ʼa̱ historia káʼa̱nna ña̱ kǒo súkun níxi̱yoña nu̱ú templo ña̱ i̱xava̱ʼa ta̱ Salomón.

Sava na̱ xíni̱va̱ʼa káʼa̱nna ña̱ nama̱ ña̱ templo kǒo kundeévíña kuisoña iin cuarto ña̱ súkun ki̱ʼva 120 codos. Tiempo xi̱naʼá veʼe ña̱ xi̱ ixava̱ʼana xíʼin yu̱u̱ á ndo̱ʼo ndíka̱ xi̱ ixava̱ʼana xa̱ʼa̱ña, soo chí nu̱úña níi̱ ni̱xi̱yoña. Saá ni̱xi̱yo yéʼé templo ña̱ ñuu Egipto, soo templo ña̱ i̱xava̱ʼa ta̱ Salomón su̱ví saá ní ixava̱ʼanaña. Sava na̱ xíni̱va̱ʼa túvina ña̱ nama̱ ña̱ xi̱kuumiíña ki̱ʼva 6 codos (2.7 metro) ndíka̱ ni̱xi̱yoña. Ta̱ Theodor Busink ta̱ xíni̱va̱ʼa ndáa ki̱ʼva xi̱ ixava̱ʼana veʼe tá ya̱chi̱ káʼa̱nra ña̱yóʼo: “Xa̱ʼa̱ ña̱ kǒo ndíka̱ní ní ixava̱ʼana cuarto ña̱ ni̱xi̱yo yéʼé templo kǒo kivi ka̱ʼa̱nyó ña̱ xi̱kuumiíña 120 codos”.

Sana kǒo vií nísandáya̱ʼana 2 Crónicas 3:4. Sava nu̱ú manuscrito ña̱ yatání versículo yóʼo káchiña “120” ta inka manuscrito ña̱ viíní ka̱ʼyína káchiña “20 codos”. Tá kúú ña̱ Códice alejandrino (ña̱ ni̱ka̱ʼyi̱ 1,500 ku̱i̱ya̱ chí sa̱tá) ta saátu ña̱ Códice ambrosiano (ña̱ ni̱ka̱ʼyi̱ 1,400 ku̱i̱ya̱ chí sa̱tá). ¿Nda̱chun kǒo vií nísandáya̱ʼanaña? Nu̱ú tu̱ʼun hebreo ña̱ tu̱ʼun cien xíʼin ña̱ tu̱ʼun codo inkáchi náʼa̱ña. Ña̱kán tá sa̱ndáya̱ʼanaña sana ka̱ʼyína “120” nu̱úka ña̱ kaʼyína “20 codos”.

Iin ña̱ va̱ʼava kúú ña̱ kuni̱yó kunda̱a̱-iniyó xíʼin ndiʼi ña̱yóʼo, ta saátu ña̱ kotoyó ndáa ki̱ʼva ni̱xi̱yo templo ña̱ i̱xava̱ʼa ta̱ Salomón. Soo ña̱ ndáyáʼvika kunda̱a̱-iniyó xíʼin kúú ña̱ xi̱ndanaʼa̱ ña̱ templo yóʼo; saáchi xi̱ndanaʼa̱ña templo espiritual. Táxiníyó tíxa̱ʼvi ndaʼa̱ Jehová xa̱ʼa̱ ña̱ ka̱nara miíyó ña̱ ndasakáʼnuyóra ti̱xin templora (Heb. 9:​11-14; Apoc. 3:12; 7:​9-17).