1. ¿Nda̱chun si̱í íyo ini na̱ testigo Jehová? (Koto na̱ʼná ña̱ va̱xi chí xa̱ʼa).

NA̱ TESTIGO Jehová kúúna iin ñuu na̱ si̱íní íyo ini. Tá ndátakana ña̱ nda̱sakáʼnuna Ndióxi̱ va̱ʼaní nátúʼun xíʼin táʼanna ta kúsi̱í-inina. ¿Nda̱chun si̱íní íyo inina? Si̱í íyo inina chi xíni̱na Jehová ta káchíñuna nu̱úra ta saátu kúni̱na kundiku̱nna yichi̱ra chi kúúra iin “Ndióxi̱ ta̱ si̱í-ini” (1 Tim. 1:11; Sal. 16:11). Miíra kúú ta̱ táxi ña̱ si̱í-ini, ta xa̱ʼa ña̱yóʼo kúni̱ra kusi̱í-iniyó ta káʼa̱nra xíʼinyó nda̱saa kivi keʼéyóña (Deut. 12:7; Ecl. 3:12, 13).

2, 3. a) ¿Ndáaña kúni̱ kachiña ña̱ si̱í koo iniyó? b) ¿Ndáaña kivi sandákava-iniyó?

² ¿Ndáaña kivi ka̱ʼa̱nyó xa̱ʼa miíyó? ¿Á si̱í íyo iniyó? ¿Ndáaña kivi keʼéyó ña̱ va̱ʼa si̱íka koo iniyó? Ña̱ si̱í íyo iniyó kúni̱ kachiña ña̱ va̱ʼa kúniyó xíʼin ña̱ʼa ña̱ kúúmiíyó ta kúsi̱íní-iniyó. Biblia káchiña, tá ndixa kúni̱yó si̱í koo iniyó xíniñúʼu kooyó migo Jehová. Soo tiempo vitin íxayo̱ʼvi̱vaña xíʼinyó ña̱ koo si̱í-iniyó. ¿Nda̱chun?

³ Íyo sava ña̱ íxayo̱ʼvi̱ xíʼinyó ña̱ koo si̱í-iniyó, tá kúú savana kǒo chiñu kúúmiína á nda̱koo táʼanna xíʼin yiína á ñá síʼína, á  savana kita iin na̱ veʼena ti̱xin ñuu Ndióxi̱, á inkatuna xíʼi̱ na̱ veʼena. Tá íyo iin tu̱ndóʼo ti̱xin veʼeyó, tá xáku̱ndaana miíyó escuela nu̱ú káʼviyó á nu̱ú káchíñuyó, tá kǒo xíín na̱ chíñu taxina ña̱ ndasakáʼnuyó Ndióxi̱ á tá chíka̱a̱na miíyó veʼeka̱a, ña̱yóʼo kivi sandákavaña iniyó. Saátu tá kíʼin kue̱ʼe̱ ña̱ ndeéní miíyó. Soo ta̱ Jesús, si̱í íyo inira ta xáʼndachíñura, ña̱kán kúni̱ra sándi̱kora iniyó ta kúni̱ra ná koo si̱í-ini na̱ yiví (1 Tim. 6:15; Mat. 11:28-30). Ña̱ ni̱ka̱ʼa̱nra xíʼin na̱ yiví chí yuku̱ kivi chindeétáʼan xíʼinyó ña̱ va̱ʼa si̱í koo iniyó ni tá yáʼayó nu̱ú tu̱ndóʼo nu̱ú ñuyǐví ta̱ Ndi̱va̱ʼa yóʼo.

4, 5. ¿Ndáaña xíniñúʼu keʼéyó ña̱ va̱ʼa kusi̱í-iniyó?

⁴ Ña̱ nu̱ú ña̱ ni̱ka̱ʼa̱n ta̱ Jesús xa̱ʼa ndáyáʼviníña. Ta̱yóʼo ni̱ka̱ʼa̱nra: “Si̱í íyo ini na̱ xíni̱ ña̱ xíniñúʼu sakuaʼana xa̱ʼa Ndióxi̱, saáchi na̱yóʼo kúú na̱ koo nu̱ú kaʼndachíñura” (Mat. 5:3). ¿Nda̱saa náʼa̱yó ña̱ kúni̱yó sakuaʼayó xa̱ʼa Jehová ta kúni̱yó kundiku̱nyó yichi̱ra? Náʼa̱yó ña̱yóʼo tá káʼviyó Biblia, tá ndíku̱nyó ña̱ káʼa̱nra ta saátu tá kéʼéyó chiñu ña̱ táxira ndaʼa̱yó. Tá kéʼéyó ña̱yóʼo kusi̱íka iniyó, ta va̱ʼaka kandíxayó ndiʼi ña̱ káʼa̱n Ndióxi̱ taxira ndaʼa̱yó chí nu̱únínu. Saátu ña̱ káʼa̱n tu̱ʼun Ndióxi̱ ndakiʼinyó chí nu̱únínu, taxiña ndée ndaʼa̱yó ña̱ va̱ʼa ya̱ʼayó nu̱ú tu̱ndóʼo ña̱ va̱xi nu̱úyó (Tito 2:13).

⁵ Ña̱ chindeétáʼan xíʼinyó ña̱ va̱ʼa koo si̱í-iniyó kúú ña̱ va̱ʼaní kutáʼanyó xíʼin Ndióxi̱. Ta̱ apóstol Pablo ni̱ka̱ʼa̱nra: “Ndiʼi tiempo kusi̱í-inindó xíʼin Ndióxi̱ [Jehová]. Tuku ná ka̱ʼi̱n xíʼinndó: Kusi̱í-inindó” (Filip. 4:4). Ña̱ va̱ʼa kutáʼanyó xíʼin Ndióxi̱ xíniñúʼu ndíchi xa̱a̱yó kooyó. Tu̱ʼun Ndióxi̱ káchiña: “Si̱íní íyo ini na̱ yiví na̱ kúúmií ña̱ ndíchi ta saátu na̱ va̱ʼaní ndákanixi̱ní”. Ta káchituña: “Na̱ ndákiʼin ña̱ ndíchi va̱ʼa kutakuna, ta na̱ kǒo táxi ndiʼi-xa̱ʼaña kusi̱í-inina” (Prov. 3:13, 18).

6. ¿Ndáaña xíniñúʼu keʼéyó ña̱ va̱ʼa kǒo sandákooyó ña̱ kusi̱í-iniyó?

⁶ Ña̱ va̱ʼa kǒo sandákooyó ña̱ koo si̱í-iniyó xíniñúʼu kundiku̱nyó ña̱ káʼa̱n tu̱ʼun Ndióxi̱. Ta̱ Jesús ni̱ka̱ʼa̱nra ña̱ ndáyáʼviní ña̱yóʼo ta ka̱chira: “Tá kúnda̱a̱-inindó xa̱ʼa ña̱yóʼo, kusi̱íní-inindó tá ná keʼéndóña” (Juan 13:17; kaʼvi Santiago 1:25). * Ña̱yóʼo kúú ña̱ xíniñúʼu keʼéyó tá kúni̱yó sakuaʼakayó xa̱ʼa Ndióxi̱ ta kúni̱yó si̱í koo iniyó. Soo, ¿nda̱saa kivi si̱í koo iniyó ni íyo ku̱a̱ʼání tu̱ndóʼo ña̱ sákusuchí-iniyó? Ná kotoyó ña̱ ni̱ka̱ʼa̱n ta̱ Jesús xíʼin na̱ yiví chí yuku̱.

7. ¿Nda̱chun kúsi̱í-ini na̱ xóʼvi̱?

⁷ “Si̱íní íyo ini na̱ xóʼvi̱, chi Ndióxi̱ sándi̱kora inina” (Mat. 5:4). Sava na̱ yiví sana ndákanixi̱nína: “¿Nda̱saa kivi kusi̱í-ini na̱ xóʼvi̱?”. Ta̱ Jesús va̱ása níka̱ʼa̱nra xa̱ʼa na̱ yiví na̱ káʼa̱n kúáchi xa̱ʼa ndiʼi ña̱ ndóʼona. Nda̱a̱ na̱ yiví na̱ kéʼé ña̱ va̱ása va̱ʼa xóʼvi̱-inina xa̱ʼa tu̱ndóʼo ña̱ íyo tiempo vitin (2 Tim. 3:1). Soo ni kéʼéna ña̱yóʼo va̱ása íyo yatinna nu̱ú Jehová ta va̱ása íyo si̱í-inina. Na̱ ni̱ka̱ʼa̱n ta̱ Jesús xa̱ʼa kúú na̱ yiví na̱ ndákuni ña̱ xíniñúʼu sakuaʼana xa̱ʼa Ndióxi̱, ta xa̱ʼa ña̱yóʼo ndákunina ña̱ xíkaní íyo na̱ yiví nu̱ú Ndióxi̱. Kúnda̱a̱-inina ña̱ kúúna na̱ yiví ku̱a̱chi, ta xa̱ʼa ña̱yóʼo íyoní tu̱ndóʼo nu̱úna ti̱xin ña̱ ñuyǐví yóʼo. Jehová xítora ndáana kúú na̱ yiví na̱ va̱ʼa ta sándi̱kora-inina xíʼin Biblia, ta chíndeétáʼanra xíʼinna ña̱ va̱ʼa si̱í koo inina, ta saátu taxira ña̱ kutakuna  ndiʼi tiempo chí nu̱únínu (kaʼvi Ezequiel 5:11; * 9:4). *

8. ¿Nda̱chun si̱íní íyo na̱ vitá-ini?

⁸ “Si̱íní íyo na̱ vitá-ini chi na̱yóʼo kúú na̱ ndakiʼin ñuʼú” (Mat. 5:5). ¿Nda̱chun si̱í íyo na̱ vitá-ini? Sava na̱ yiví tá ta̱ʼánka sakuaʼana xa̱ʼa Ndióxi̱ kue̱ʼe̱ ni̱xi̱yo inina, ta xi̱kanitáʼanna xíʼin inkana. Soo tá sa̱kuaʼana xa̱ʼa Ndióxi̱ na̱samana miína ta ki̱xaʼána ‘kéʼéna ña̱ va̱ʼaʼ. Vitin kúʼvi̱-inina xínina inkana, va̱ʼa íyo inina, vitá íyo inina, ta kǒo sáa̱ kamana (Col. 3:9-12). Xa̱ʼa ña̱yóʼo va̱ʼa kítáʼanna xíʼin inkana ta si̱í íyo inina. Tu̱ʼun Ndióxi̱ kachiña ña̱ kundoo na̱yóʼo nu̱ú ñuʼú yóʼo (Sal. 37:8-10, 29).

9. a) ¿Ndáaña kúni̱ kachi ña̱ ndakiʼin na̱ vitá-ini ñuʼú yóʼo? b) ¿Nda̱chun kivi kusi̱í-ini na̱ kúni̱ ná koo ña̱ va̱ʼa?

⁹ ¿Ndáaña kúni̱ kachi ña̱ ndakiʼin na̱ vitá-ini ñuʼú yóʼo? Na̱ nda̱ka̱xin Ndióxi̱ ku̱ʼu̱n chí ndiví, ndakiʼinna ñuʼú yóʼo tá ná koona su̱tu̱ ta saátu tá ná kaʼndachíñuna xíʼin ta̱ Jesús (Rev. 20:6). Ta saátu millón na̱ yiví na̱ va̱ása ku̱ʼu̱n chí ndiví, ndakiʼinna ñuʼú yóʼo tá ná kundoona ndiʼi tiempo nu̱úña, tasaá va̱ʼaní kundoona ta si̱íní koona. Xa̱ʼa u̱vi̱ grupo yóʼo ta̱ Jesús ni̱ka̱ʼa̱nra: “Si̱íní íyo ini na̱ kúni̱ ná koo ña̱ va̱ʼa” (Mat. 5:6). Ña̱ kúni̱ na̱yóʼo xi̱nuña nu̱ú ñuyǐví xa̱á (2 Ped. 3:13). Tá ná sandiʼi-xa̱ʼa Ndióxi̱ ndiʼi ña̱ kini, na̱ yiví na̱ va̱ʼa kusi̱íní-inina, ta va̱ása xo̱ʼvi̱kana xíʼin tu̱ndóʼo ni xíʼin ña̱ va̱ása va̱ʼa ña̱ íyo vitin (Sal. 37:17).

10. ¿Ndáaña kúni̱ kachiña ña̱ va̱ʼa koo iniyó?

¹⁰ “Si̱íní íyo ini na̱ va̱ʼa-ini, chi saátu Ndióxi̱ va̱ʼa koo inira xíʼinna” (Mat. 5:7). Iin tu̱ʼun hebreo ña̱ kítáʼan xíʼin ña̱yóʼo kúni̱ kachiña “ña̱ náʼa̱yó ña̱ kúni̱níyó xíniyó inkana” á “kúndáʼvi-iniyó xíniyó inkana”. Saátu tu̱ʼun griego káʼa̱nña xa̱ʼa ña̱ kundáʼvi-iniyó kuniyó inkana. Soo nu̱ú Biblia tá káʼa̱nña xa̱ʼa ña̱yóʼo su̱ví kuití káʼa̱nña ña̱ xíniñúʼu kundáʼvi-iniyó kuniyó na̱ yiví. Chi káʼa̱nña xíʼinyó ña̱ ná keʼéyó iin ña̱ʼa ña̱ va̱ʼa chindeéyóna.

11. ¿Ndáaña sákuaʼayó xíʼin ña̱ ke̱ʼé ta̱ samaritano?

¹¹ (Kaʼvi Lucas 10:30-37). * Parábola ña̱ káʼa̱n xa̱ʼa ta̱a ta̱ ñuu Samaria sánáʼa̱ña miíyó ndáaña kúni̱ kachi ña̱ va̱ʼa koo iniyó xíʼin inkana. Tá xi̱ni̱ ta̱ ñuu Samaria iin ta̱a ta̱ ka̱nina, kundáʼvi-inira xi̱nirara ta chi̱ndeéra ta̱yóʼo. Tá sa̱ndíʼi ta̱ Jesús ni̱ka̱ʼa̱nra parábola yóʼo, ni̱ka̱ʼa̱nra ña̱ saátu xíniñúʼu keʼé miíyó. Ña̱kán xíniñúʼu nda̱ka̱tu̱ʼun xíʼin miíyó: “¿Á kéʼíi̱ táki̱ʼva ke̱ʼé ta̱ samaritano? ¿Á kúndáʼvi-inii̱ xínii̱ inkana? Tá xítoi̱ ña̱ xóʼvi̱ na̱ yiví, ¿á chíndeétáʼi̱n xíʼinna? ¿Ndáaka ña̱ kivi keʼíi̱ ña̱ va̱ʼa chindeétáʼi̱n xíʼinna? Tá kúú ti̱xin congregación, ¿á chíndeétáʼi̱n xíʼin na̱ hermano na̱ xa̱a̱ chée, á ná hermana ná kǒo yií, á na̱ va̱lí na̱ ndásakáʼnu Ndióxi̱ soo yivána kǒo kéʼéna ña̱yóʼo? ¿Á kivi chindeétáʼi̱n xíʼin na̱ ndákava-ini?” (1 Tes. 5:14; Sant. 1:27).

12. ¿Nda̱chun kúsi̱í-iniyó tá chíndeétáʼanyó xíʼin inkana?

¹² ¿Nda̱chun kúsi̱í-iniyó tá chíndeétáʼanyó  xíʼin inkana? Tá chíndeétáʼanyó xíʼin inkana, saá kúnda̱a̱-iniyó “tá táxiyó ña̱ʼa ndaʼa̱ inkana ndeéka kúsi̱í-iniyó ta su̱víka ña̱ ndákiʼinyóña”. Saátu kúnda̱a̱-iniyó, tá kéʼéyó ña̱yóʼo sákúsi̱íyó ini Jehová (Hech. 20:35; kaʼvi Hebreos 13:16). * Ña̱yóʼo ni̱ka̱ʼa̱n ta̱ rey David xa̱ʼa na̱ chíndeétáʼan xíʼin inkana: “Mií Jehová chindeétáʼan xíʼinna ta sakákurana. Kusi̱íní-inina nu̱ú ñuʼú” (Sal. 41:1, 2). Tá va̱ʼa íyo iniyó xíʼin inkana, saátu Jehová va̱ʼa koo inira xíʼinyó, ta ña̱yóʼo taxi ña̱ si̱í koo iniyó ndiʼi tiempo (Sant. 2:13).

13, 14. ¿Nda̱chun si̱í íyo ini na̱ yiví na̱ kúúmií iin níma̱ ña̱ va̱ʼa?

¹³ Ta̱ Jesús ni̱ka̱ʼa̱nra: “Si̱íní íyo ini na̱ kúúmií iin níma̱ ña̱ va̱ʼa, chi na̱yóʼo kunina Ndióxi̱” (Mat. 5:8). Tá kúni̱yó va̱ʼa koo níma̱yó, xíniñúʼu va̱ʼa koo ña̱ ndákanixi̱níyó xíʼin ña̱ kúni̱yó keʼéyó. Ndáyáʼviní ña̱yóʼo tá kúni̱yó kusi̱í-ini Jehová xíʼin ña̱ kéʼéyó (kaʼvi 2 Corintios 4:2; * 1 Tim. 1:5).

¹⁴ Na̱ yiví na̱ kúúmií iin níma̱ ña̱ va̱ʼa si̱í íyo níma̱na saáchi kúsi̱í-ini Jehová xíʼin ña̱ kéʼéna ña̱ ni̱ka̱ʼa̱nra: “Si̱íní íyo ini na̱ ndákata ti̱ko̱to̱ káni̱ ña̱ kúúmiína” (Rev. 22:14). ¿Ndáaña kúni̱ kachi ña̱ ndákatana ti̱ko̱to̱ káni̱ ña̱ kúúmiína? Ña̱ kúni̱ kachiña kúúña, na̱ ku̱ʼu̱n chí ndiví, Jehová xítora ña̱ ndií ná koo ña̱ kéʼéna, tasaá taxira koona ndiʼi tiempo chí ndiví ta va̱ása kuvikana. Ta na̱ ku̱ndoo nu̱ú ñuʼú yóʼo, xítora ña̱ ná keʼéna ña̱ va̱ʼa tasaá xa̱a̱na koona migora. Biblia káchiña xa̱ʼana, “nda̱katana ti̱ko̱to̱ káni̱na ta nda̱sayaanaña xíʼin ni̱i̱ ta̱ kúú ndikachi” (Rev. 7:9, 13, 14).

15, 16. ¿Nda̱saa kivi kuni na̱ kúúmií iin níma̱ va̱ʼa Ndióxi̱?

¹⁵ Biblia káchiña ña̱ ni iin na̱ yiví kǒo kivi kunina Ndióxi̱ ta kutakuna (Éx. 33:20). Soo, ¿nda̱chun ni̱ka̱ʼa̱n ta̱ Jesús, na̱ kúúmií iin níma̱ ña̱ va̱ʼa “kunina Ndióxi̱”? Nu̱ú tu̱ʼun griego ña̱ tu̱ʼun “kunina”, kúni̱ kachiña “ndakanixi̱níyó, kunda̱a̱-iniyó, kuxini̱yó”. Na̱ xíto ndáa ki̱ʼva íyo Ndióxi̱ xíʼin níma̱na, xáa̱na kúnda̱a̱ va̱ʼa-inina xa̱ʼara ta chíndayáʼvina ña̱ va̱ʼa ña̱ kúúmiíra (Efes. 1:18). Ta̱ Jesús ke̱ʼéra nda̱a̱ táki̱ʼva kéʼé mií Ndióxi̱. Ña̱kán ni̱ka̱ʼa̱nra: “Na̱ xa̱a̱ xi̱ni yi̱ʼi̱ xa̱a̱ xi̱nituna Yivávai̱” (Juan 14:7-9).

¹⁶ ¿Ndáaka ña̱ kivi keʼéyó ña̱ va̱ʼa kuniyó Ndióxi̱? Ná kotoyó ndáaña kéʼéra ña̱ va̱ʼa chíndeétáʼanra xíʼinyó (Job 42:5). Saátu kivi kuniyora tá ná ndakanixi̱níyó xa̱ʼa ña̱ va̱ʼa taxira ndaʼa̱yó chí nu̱únínu, tá va̱ʼa íyo ña̱ kéʼéyó ta saátu tá nda̱kú íyo iniyó. Ta saátu na̱ ku̱a̱ʼa̱n chí ndiví xítona  Jehová tá ndátakuna chí ndiví (1 Juan 3:2).

17. ¿Nda̱chun si̱í íyo ini na̱ va̱ʼa kítáʼan xíʼin inka na̱ yiví?

¹⁷ Ta̱ Jesús ni̱ka̱ʼa̱nra: “Si̱í íyo ini na̱ va̱ʼa kítáʼan xíʼin inka na̱ yiví” á na̱ va̱ása kánitáʼan xíʼin inkana (Mat. 5:9). Ku̱a̱ʼáníva xa̱ʼa kúú ña̱ va̱ʼa si̱í koo iniyó, ta̱ discípulo Santiago ni̱ka̱ʼa̱nra: “Na̱ kéʼé ña̱ va̱ʼa chíʼina ña̱ va̱ʼa ta ndátuna ndakiʼinna ña̱ va̱ʼa xa̱ʼa ña̱ kéʼéna” (Sant. 3:18). Tá kúúmiíyó iin ku̱a̱chi xíʼin iin na̱ hermano na̱ congregacionyó á xíʼin iin na̱ veʼeyó, ná ka̱ʼa̱nyó xíʼin Jehová ná chindeéra miíyó ña̱ va̱ʼa tuku kutáʼanyó xíʼinna. Miíra taxi espíritu santo ndaʼa̱yó ta chindeétáʼanra xíʼinyó ña̱ keʼéyó ña̱ va̱ʼa tasaá si̱íka koo iniyó. Ta̱ Jesús ni̱ka̱ʼa̱nra ña̱ ndáyáʼviní ña̱ kitáʼan va̱ʼayó xíʼin inkana ña̱kán ka̱chira: “Tá níʼún iin ña̱ʼa ku̱a̱ʼún taxiún ndaʼa̱ Jehová ta nda̱kaʼún ña̱ íyo iin na̱ kúúmiíún ku̱a̱chi xíʼin, sandákoo na̱ʼa ña̱ níʼún ku̱a̱ʼún taxiún ndaʼa̱ Ndióxi̱ ta kúaʼan; siʼnaka ndasavií ku̱a̱chi ña̱ kúúmiíún xíʼin ñaniún, tándi̱ʼi saá ndikóún ta taxiún ña̱ kúni̱ún ndaʼa̱ Ndióxi̱” (Mat. 5:23, 24).

18, 19. ¿Nda̱chun si̱í íyo ini na̱ hermano ni tá xóʼvi̱na?

¹⁸ “Kusi̱í-inindó tá kúndi̱va̱ʼana xíʼinndó ta káʼa̱nna nina tu̱ʼun vatá xa̱ʼandó xa̱ʼa ña̱ ndíku̱nndó yi̱ʼi̱”. ¿Nda̱chun ni̱ka̱ʼa̱n ta̱ Jesús ña̱yóʼo? Miíra ka̱chi: “Kusi̱í-inindó ta ndavandó xa̱ʼa ña̱ kúsi̱í-inindó, saáchi ku̱a̱ʼání ña̱ va̱ʼa ndakiʼinndó chí ndiví; saáchi saá ku̱ndi̱va̱ʼana xíʼin na̱ profeta na̱ ni̱xi̱yo xi̱naʼá” (Mat. 5:11, 12). Tá ka̱nina na̱ apóstol ta ni̱ka̱ʼa̱nna xíʼinna ña̱ ná kǒo natúʼunkana xa̱ʼa Ndióxi̱, tá ke̱ena nu̱ú Sanedrín ku̱si̱íkaví-inina. Va̱ása níkusi̱í-inina xa̱ʼa ña̱ ka̱ninana, soo ku̱si̱í-inina chi ku̱ndi̱va̱ʼana xíʼinna xa̱ʼa ki̱vi̱ ta̱ Jesús (Hech. 5:41).

¹⁹ Tiempo vitin miíyó nda̱kú íyo iniyó tá ndásakáʼnuyó Jehová, ta miíra chíndeétáʼan xíʼinyó tá yáʼayó nu̱ú tu̱ndóʼo tasaá va̱ása sandákooyó ña̱ si̱í koo iniyó (kaʼvi Santiago 1:2-4). * Va̱ása kútóoví miíyó xo̱ʼvi̱yó. Soo tá ndakú íyo iniyó tá yáʼayó nu̱ú iin tu̱ndóʼo, Jehová taxi ndée ndaʼa̱yó ña̱ va̱ʼa kundeé-iniyó. Ná ka̱ʼa̱nyó xa̱ʼa iin ejemplo. Tá yo̱o̱ agosto ña̱ kui̱ya̱ 1944 na̱ chíñu chi̱ka̱a̱na ta̱ Henryk Dornik xíʼin ñanira veʼeka̱a. Na̱ saá-ini xíniñaʼá ni̱ka̱ʼa̱nna: “Va̱ása keʼéna ña̱ kúni̱yó. Náʼa̱ ña̱ kútóona xo̱ʼvi̱na”. Soo ta̱ hermano Dornik káchira: “Yi̱ʼi̱ va̱ása níxi̱kutoi̱ xo̱ʼvi̱i̱; soo xi̱kusi̱í-ini̱ chi ndiʼi tu̱ndóʼo ña̱ ku̱ndeé-inii̱ ni̱ya̱ʼi̱ nu̱ú, ke̱ʼíi̱ña xa̱ʼa ña̱ kúni̱ ndakú koo ini xíʼin Jehová”. Ta ka̱chira: “Ña̱ chi̱ndeéní yi̱ʼi̱ kúú ña̱ xi̱ka̱ʼi̱n xíʼin Jehová ta ña̱yóʼo chi̱ndeé yi̱ʼi̱ ña̱ ku̱yatinkai̱ nu̱úra. Míira kúú ta̱ chi̱ndeétáʼaní xíʼi̱n”.

20. ¿Nda̱chun si̱íní íyo iniyó tá káchíñuyó nu̱ú Ndióxi̱ ta̱ si̱í-ini?

²⁰ Tá kúsi̱í-ini Ndióxi̱ xíʼin ña̱ kéʼéyó, saátu miíyó kúsi̱í-iniyó ni sava yichi̱ kǒo xíín na̱ chíñu taxina ña̱ natúʼunyó xa̱ʼa Ndióxi̱, á sava na̱ veʼeyó kǒo kúni̱na ña̱ ndasakáʼnuyó Ndióxi̱, á savatu ndeé ndóʼoyó á xa̱a̱ ku̱chéevayó (1 Tim. 1:11). Saátu si̱í íyo iniyó chi Ndióxi̱ “kǒo kívi sandáʼvira miíyó” ta sáxi̱nura ña̱ ni̱ka̱ʼa̱nra (Tito 1:2). Tá ná keʼéraña ku̱a̱ʼání ña̱ va̱ʼa ndakiʼinyó, ta ni va̱ása ndakaʼánkayó xa̱ʼa tu̱ndóʼo ña̱ yáʼayó nu̱ú tiempo vitin. Ku̱a̱ʼání ña̱ va̱ʼa taxi Jehová ndaʼa̱yó nu̱ú ñuʼú livi ti̱xin ña̱ ñuyǐví xa̱á. Va̱ʼaní kundooyó ta kusi̱íní-iniyó (Sal. 37:11).