1. ¿Nda̱saa náʼa̱ miíyó ña̱ ndásakáʼnu Ndióxi̱ ña̱ kúʼvi̱-iniyó xíni táʼanyó?

MIÍYÓ na̱ ndásakáʼnu Ndióxi̱ kúʼvi̱-iniyó xíni táʼanyó (1 Juan 4:16, 21). Su̱ví kuití chíndeétáʼanyó xíʼinna, chi ndiʼi tiempo íyo ña̱ kéʼéyó xa̱ʼana, káʼa̱nyó ta kéʼéyó ña̱ va̱ʼa xíʼinna. Tá vií íyo ña̱ kéʼéyó xíʼin inkana saá náʼa̱yó ña̱ “ndíku̱nyó yichi̱ Ndióxi̱, chi miíyó kúú se̱ʼera na̱ kúni̱níra” (Efes. 5:1).

2. ¿Nda̱saa xi̱ndiku̱n ta̱ Jesús yichi̱ yivára?

² Ta̱ Jesús va̱ʼaní xi̱ndiku̱nra yichi̱ yivára. Viíní xi̱keʼéra xíʼin na̱ yiví. Miíra ni̱ka̱ʼa̱n: “Kixindó nu̱úi̱, ndiʼi ndóʼó na̱ ku̱naa, ta nda̱a̱ táki̱ʼva íyo na̱ ndíso ña̱ʼa ve̱e saá íyondó, ta yi̱ʼi̱ sandi̱ko-inindó”. Ta ni̱ka̱ʼa̱nkara: “Ki̱ʼvindó ti̱xin yugoi̱ ta sákuaʼandó xa̱ʼíi̱, saáchi ta̱ vitá-ini kúi̱, ta va̱ʼa inii̱” (Mat. 11:28, 29). Tá ndíku̱nyó yichi̱ra ta ‘va̱ʼa íyo iniyó xíʼin na̱ ndáʼviʼ, Ndióxi̱ kúsi̱íní-inira tá kéʼéyó ña̱yóʼo ta saátu miíyó kúsi̱í-iniyó (Sal. 41:1). Ná kotoyó nda̱saa kivi keʼéyó tasaá viíní ke̱ʼéyó xíʼin na̱ veʼeyó, na̱ congregación ta saátu na̱ sánáʼa̱yó xa̱ʼa Ndióxi̱.

3. ¿Nda̱saa xíniñúʼu keʼé ta̱ ta̱a xíʼin ñá síʼíra? (Koto na̱ʼná ña̱ va̱xi chí xa̱ʼa).

³ Ti̱xin na̱ veʼeyó na̱ siʼna xíniñúʼu vií keʼé xíʼin inkana kúú na̱ íyo ñá síʼí (Efes. 5:25; 6:4). Biblia káʼa̱nña xíʼinna ña̱ xíniñúʼu kunda̱a̱-inina xíʼin ña̱ ndóʼo ñá síʼína (1 Ped. 3:7). Tá kúni̱yó vií keʼéyó xíʼin inkana xíniñúʼu kunda̱a̱-iniyó ndáaña ndóʼona. Ta̱a ta̱ íyo ñá síʼí kúnda̱a̱-inira ña̱ síín íyora nu̱ú ñá síʼíra, soo kúnda̱a̱-inira ña̱ ndáyáʼviní ñáyóʼo (Gén. 2:18). Ña̱kán ndíʼi-inira xa̱ʼa ña̱ ndóʼoñá ta íxato̱ʼórañá. Iin ñá hermana ñá ñuu Canadá ni̱ka̱ʼa̱nñá: “Yiíi̱ ndíʼi̱ní-inira xa̱ʼa ña̱ ndóʼi̱ ta va̱ása káʼa̱nra xíʼi̱n: ‘Va̱ása xíniñúʼu ndoʼún saáʼ. Saátu va̱ʼaní xíniso̱ʼora ña̱ nátúʼi̱n xíʼinra. Tá chíndeétáʼanra xíʼi̱n, viíní keʼéraña”.

4. ¿Nda̱saa náʼa̱ iin ta̱ ta̱a ña̱ vií kéʼéra xíʼin ñá síʼíra tá káʼa̱nra xíʼin inka ná ñaʼá?

⁴ Ta̱ íyo ñá síʼí, kíʼinra kuenta xíʼin ña̱ ndóʼo ñá síʼíra ta va̱ása náʼa̱ra ña̱ kúni̱ra xínira inka ñaʼá, ta ni va̱ása kútóoraná. Ni tá xíniñúʼura Internet, va̱ása kéʼéra ña̱yóʼo (Job 31:1). Va̱ása sándáʼvira ñá síʼíra, soo su̱ví xa̱ʼa ña̱ kúni̱ kuitírañá kéʼéraña, chi saátu xa̱ʼa ña̱ kúʼvi̱-inira xínira Ndióxi̱ kéʼéraña, tasaá náʼa̱ra ña̱ kúndasíra xínira ña̱ kini (kaʼvi Salmo 19:14; * 97:10). *

5. ¿Nda̱saa kivi na̱ʼa̱ ná ñaʼá ña̱ vií íyo inina xíʼin yiíná?

⁵ Tá ndíku̱n ta̱ íyo ñá síʼí yichi̱ ta̱ Jesús, saá chíndeétáʼanra xíʼin ñá síʼíra ña̱ va̱ʼa ixato̱ʼóñára (Efes. 5:22-25, 33). Tasaá viíní keʼé ñáyóʼo xíʼinra, tá kúú tá xíniñúʼu kachíñura ku̱a̱ʼáka tiempo ti̱xin congregación á tá íyo ña̱ sándi̱ʼi̱-inira. Iin ta̱ hermano ta̱ íyo chí ñuu Gran Bretaña káchira: “Sava yichi̱ tá xíto ñá síʼíi̱ ña̱ íyo iin ña̱ sándi̱ʼi̱-ini̱i̱. Saá ndíku̱nñá ña̱ káʼa̱n Proverbios 20:5, ta sava xíniñúʼu kundatuñá loʼo tiempo ta saáví natúʼi̱n xíʼinñá xa̱ʼa ña̱ sándi̱ʼi̱-inii̱”.

6. ¿Nda̱saa kivi sanáʼa̱yó na̱ va̱lí ña̱ vií keʼéna xíʼin inkana, ta ndáaña va̱ʼa ndakiʼinna xa̱ʼa ña̱yóʼo?

⁶ Tá vií kéʼé tá íyo ñá síʼí xíʼin ñá síʼíra ta saátu ñáyóʼo vií kéʼéñá xíʼinra va̱ʼaní yichi̱ taxina nu̱ú se̱ʼena. Soo saátu xíniñúʼu sanáʼa̱na se̱ʼena ña̱ vií ná keʼéna xíʼin inkana. Kivi ka̱ʼa̱nna xíʼin se̱ʼena ná kǒo kununa ini veʼe nu̱ú ndátakayó. Á tá kéʼéna iin vikó ti̱xin congregación, ná ka̱ʼa̱nyó xíʼinna, ña̱ ná taxina ná kíʼin na̱ xa̱a̱ chée ña̱ kuxuna ta saáví kiʼin miína ña̱ kuxuna. Tá iin na̱ va̱lí kéʼéna iin ña̱ va̱ʼa xa̱ʼayó á xúnana yéʼé nu̱úyó ña̱ va̱ʼa ki̱ʼviyó, xíniñúʼu ka̱ʼa̱nyó xíʼinna ña̱ va̱ʼaní kéʼéna. Va̱ʼaní kunina tá ná ka̱ʼa̱nyó ña̱yóʼo xíʼinna, ta saá va̱ása nandosóna “tá táxiyó ña̱ʼa ndaʼa̱ inkana ndeéka kúsi̱í-iniyó ta su̱víka ña̱ ndákiʼinyóña” (Hech. 20:35).

7. ¿Nda̱saa ni̱na̱ʼa̱ ta̱ Jesús ña̱ vií ni̱xi̱yo inira xíʼin iin ta̱ kǒo xíniso̱ʼo ta ndáaña sákuaʼayó xíʼin ña̱yóʼo?

⁷ Iin yichi̱ tá íyo ta̱ Jesús chí ñuu Decápolis, “ki̱xa̱a̱ iin ta̱a xíʼinna ta̱ kǒo xíniso̱ʼo ta ni kǒo kívi ka̱ʼa̱nra” (Mar. 7:31-35). Ni̱xa̱ʼa̱nra xíʼinra nu̱ú kǒo ku̱a̱ʼá na̱ yiví ta kán sa̱ndáʼarara. ¿Nda̱chun va̱ása nísandáʼarara nu̱ú ndiʼi na̱ yiví? Saáchi sana xi̱nira ña̱ kúkaʼan nu̱ú ta̱ ta̱a yóʼo nu̱ú chútú na̱ yiví. Miíyó va̱ása kivi keʼéyó milagro. Soo va̱ʼava chindeétáʼanyó xíʼin na̱ hermano ta kundi̱ʼi̱-iniyó xa̱ʼana. Ta̱ apóstol Pablo ni̱ka̱ʼa̱nra: “Ná kundi̱ʼi̱-iniyó xa̱ʼa táʼanyó ta ná kuʼvi̱ka-iniyó kuni táʼanyó ta keʼéyó ña̱ va̱ʼa xíʼin táʼanyó” (Heb. 10:24).  ¿Nda̱saa kivi kundiku̱nyó yichi̱ ta̱ Jesús xa̱ʼa ña̱ viíní ke̱ʼéra xíʼin ta̱ ta̱a yóʼo?

8, 9. ¿Ndáaña kivi keʼéyó xa̱ʼa na̱ xa̱a̱ chée á na̱ kúúmií kue̱ʼe̱? Ka̱ʼa̱n xa̱ʼa sava ejemplo.

⁸ Viíní ná keʼéyó xíʼin na̱ xa̱a̱ chée á na̱ kúúmií iin kue̱ʼe̱. Ña̱ ndáyáʼvi va̱ʼaka kúú ña̱ kuʼvi̱-iniyó kuni táʼanyó, ta su̱ví ña̱ keʼé kamayó iin chiñu ti̱xin ñuu Ndióxi̱ (Juan 13:34, 35). Ña̱ kúʼvi̱-iniyó xíni táʼanyó kúú, ña̱ chíndaʼá miíyó ña̱ chindeétáʼanyó xíʼin na̱ xa̱a̱ chée, á na̱ kúúmií iin kue̱ʼe̱ ta íxayo̱ʼvi̱ña xíʼinna ña̱ ku̱ʼu̱nna reunión, á ña̱ ku̱ʼu̱nna natúʼunna xa̱ʼa Ndióxi̱. Ni kǒo kivi keʼéna ndiʼi ña̱ kúni̱na xa̱ʼa Ndióxi̱, soo miíyó chíndeétáʼanyó xíʼinna (Mat. 13:23). Ta̱ Michael, va̱ása kivi kakara, ta táxiníra tixaʼvi ndaʼa̱ na̱ veʼera, xíʼin na̱ hermano na̱ xáʼa̱n xíʼinra tá ku̱a̱ʼa̱nra sanáʼa̱ra na̱ yiví xa̱ʼa Ndióxi̱. Káchira: “Va̱ʼaní ña̱ kéʼéna xa̱ʼíi̱, chi saá va̱ʼa xáʼi̱n ndiʼi reunión, ta xáʼi̱n sánáʼi̱ na̱ yiví xa̱ʼa Ndióxi̱. Ña̱ kútóokai̱ kúú ña̱ sanáʼi̱ nu̱ú íyo ku̱a̱ʼá na̱ yiví”.

⁹ Ti̱xin sava Betel íyo ku̱a̱ʼá na̱ hermano na̱ xa̱a̱ chée ta kúúmiína kue̱ʼe̱. ¿Nda̱saa náʼa̱ na̱ anciano ña̱ kúʼvi̱-inina xínina na̱yóʼo? Chíndeétáʼanna xíʼinna ña̱ va̱ʼa sanáʼa̱na xa̱ʼa Ndióxi̱ xíʼin carta á xíʼin teléfono. Iin ta̱ hermano ta̱ naní Bill kúúmiíra 86 ku̱i̱ya̱, ta káʼyíra carta ku̱a̱ʼa̱n ndaʼa̱ na̱ yiví na̱ íyo xíka, miíra káchi: “Kúsi̱íní-inindi̱ ña̱ káʼyíndi̱ carta”. Ñá Nancy kúúmiíñá 90 ku̱i̱ya̱ ta káchiñá: “Nu̱ú miíi̱ ña̱ káʼyíi̱ carta su̱ví kuití ña̱ chika̱i̱ tutu ini iin sobre kúúña. Chi ña̱ xíniñúʼi̱ ña̱ nátúʼi̱n xa̱ʼa Ndióxi̱ kúúña. Xíniñúʼu kunda̱a̱-ini na̱ yiví xa̱ʼa Ndióxi̱”. Ñá Ethel ñá ka̱ku ku̱i̱ya̱ 1921 káchiñá: “Ndiʼi tiempo xóʼvi̱níi̱ xíʼin kue̱ʼe̱ ña̱ kúúmiíi̱. Sava ni kǒo kivi ndakundixi̱ ti̱ko̱to̱i̱”. Soo ni ndóʼoñá ña̱yóʼo kúsi̱íní-iniñá tá káʼa̱nñá xíʼin na̱ yiví xa̱ʼa Ndióxi̱ xíʼin teléfono, ta kúúmiíñá sava revisita. Ñá Barbara kúúmiíñá 85 ku̱i̱ya̱, ta káchiñá: “Xa̱ʼa ña̱ kúúmií kue̱ʼe̱, íxayo̱ʼvi̱ña xíʼin ña̱ kei̱ ku̱a̱ʼá kivi ña̱ sanáʼi̱ na̱ yiví xa̱ʼa Ndióxi̱. Soo xíniñúʼi̱ teléfono ña̱ va̱ʼa ka̱ʼi̱n xíʼinna. Tixaʼviún Jehová”. Ki̱ʼva ti̱xin ña̱ iin ku̱i̱ya̱, iin grupo loʼo na̱ hermano na̱ xa̱a̱ chée, na̱túʼunna xa̱ʼa Ndióxi̱ 1,228 hora, ka̱ʼyína 6,265 carta, ta yáʼaka 2,000 llamada ke̱ʼéna, ña̱ ni̱ka̱ʼa̱nna xíʼin na̱ yiví xa̱ʼa Ndióxi̱, ta ta̱xina 6,315 tutu ña̱ káʼa̱n xa̱ʼa Ndióxi̱. Kúsi̱íníva ini Jehová xíʼin ña̱ kéʼéna (Prov. 27:11).

10. ¿Nda̱saa kivi chindeétáʼanyó xíʼin na̱ hermanoyó ña̱ va̱ʼa sakuaʼana ti̱xin reunión?

¹⁰ Viíní ná keʼéyó tá ku̱a̱ʼa̱nyó reunión. Tá vií íyo ña̱ kéʼéyó xíʼin na̱ hermanoyó, va̱ʼa chindeétáʼanyó xíʼinna ña̱ va̱ʼa sakuaʼana tá xáʼa̱nyó reunión. ¿Ndáaña kivi keʼéyó? Iin ña̱ kivi keʼéyó kúú ña̱ ya̱chi̱ kixa̱a̱yó, tasaá taxiyó ña̱ va̱ʼa kuniso̱ʼona. Sana sava yichi̱ íyo iin ña̱ kivi kundoʼoyó ta xi̱kua kixa̱a̱yó, soo su̱ví ndiʼi tiempo keʼéyó ña̱yóʼo. Soo tá kúúmiíyó costumbre ña̱ xi̱kua kixa̱a̱yó, xíniñúʼu chika̱a̱yó ndée ña̱ va̱ʼa ya̱chi̱ kixa̱a̱yó, tasaá na̱ʼa̱yó ña̱ kíʼinyó kuenta xíʼin na̱ hermanoyó. Ná ndakaʼányó chi Jehová xíʼin ta̱ Jesús kúú na̱ kána miíyó ña̱ va̱xiyó reunión (Mat. 18:20). Ta xíniñúʼu ixato̱ʼóyó na̱yóʼo.

11. ¿Nda̱chun xíniñúʼu kundiku̱n na̱ hermano na̱ yáʼa ti̱xin reunión ña̱ káʼa̱n 1 Corintios 14:40?

¹¹ Inka ña̱ kivi keʼéyó xíʼin na̱ hermanoyó kúú ña̱ viíní ná keʼéyó chiñu ti̱xin congregación (1 Cor. 14:40). Sava na̱ hermano ná yáʼa ti̱xin reunión xíniñúʼu viíní kuniñúʼuna tiempo ña̱ yáʼana, ña̱kán va̱ása sayaʼana tiempo ña̱ xíniñúʼu ya̱ʼana. Saá náʼa̱na ña̱ ndíʼi-inina xa̱ʼa inka na̱ ya̱ʼa, ta saátu náʼa̱na ña̱ ndíʼi-inina xa̱ʼa na̱ hermano na̱ congregación. ¿Nda̱chun? Saáchi sava na̱ hermano xíkaní íyona, á savana kǒoka carro  níʼi̱na ña̱ nu̱ʼu̱na veʼena, á inkana íyo na̱ veʼena na̱ va̱ása káʼvi, ta ndátuna ña̱ kixa̱a̱ na̱yóʼo.

12. ¿Nda̱chun xíniñúʼu viíní keʼéyó xíʼin na̱ anciano ta kuʼvi̱-iniyó kuniyóna? (Koto recuadro “ Viíní ná keʼéyó xíʼin na̱ níʼi yichi̱ nu̱úyó ti̱xin ñuu Ndióxi̱”).

¹² Na̱ anciano na̱ íyo ti̱xin congregación, ndéení káchíñuna, ta va̱ʼaní yichi̱ chínúuna nu̱ú inkana tá kéena sánáʼa̱na xa̱ʼa Ndióxi̱, ta xa̱ʼa ña̱yóʼo xíniñúʼu chindayáʼviníyó na̱yóʼo (kaʼvi 1 Tesalonicenses 5:12, 13). * Táxiníyó tixaʼvi xa̱ʼa ndiʼi ña̱ kéʼé na̱yóʼo xa̱ʼayó. Ña̱kán xíniñúʼu chindeétáʼanyó xíʼinna. Saáchi ‘na̱yóʼo kúú na̱ taxi kuenta xa̱ʼayó nu̱ú Ndióxi̱ʼ (Heb. 13:7, 17).

13. ¿Ndáaña sákuaʼayó xa̱ʼa ña̱ viíní ke̱ʼé ta̱ Jesús xíʼin na̱ yiví?

¹³ Ta̱ profeta Isaías ni̱ka̱ʼa̱nra ña̱yóʼo xa̱ʼa ta̱ Jesús: “Va̱ása ka̱ʼnu̱ra ndo̱o̱ tú xa̱a̱ ni̱ta̱ʼnu; ta va̱ása ndaʼvara ña̱ mecha ña̱ xa̱a̱ kúni̱ nda̱ʼva̱” (Is. 42:3). Ta̱ Jesús xi̱kuʼvi̱ní-inira xi̱xinira na̱ yiví, ta xa̱ʼa ña̱yóʼo xi̱ndakanixi̱níra xa̱ʼa ña̱ xi̱ndoʼona. Xi̱kunda̱a̱-inira ndáaña xi̱ndoʼo na̱ íyo táki̱ʼva íyo iin ndo̱o̱ tú xa̱a̱ ni̱ta̱ʼnu, á na̱ íyo táki̱ʼva íyo iin mecha ña̱ íyo ti̱xin iin lampara ña̱ aceite ña̱ xa̱a̱ kúni̱ nda̱ʼva̱. Ña̱kán viíní xi̱keʼéra xíʼinna ta kúee ni̱xi̱yo inira xíʼinna. Nda̱a̱ na̱ va̱lí xi̱kutóona ku̱ʼu̱nna nu̱úra (Mar. 10:14). Ña̱ ndixava, miíyó va̱ása íyoyó táki̱ʼva ni̱xi̱yo ta̱ Jesús, chi va̱ása kúnda̱a̱-iniyó ndáaña ndóʼo na̱ yiví, á  ña̱ sanáʼa̱yó táki̱ʼva xi̱sanáʼa̱ra. Soo kiviva vií keʼéyó xíʼinna tá sánáʼa̱yóna xa̱ʼa Ndióxi̱. Ná kotoyó nda̱saa kivi káʼa̱nyó xíʼinna, ama káʼa̱nyó xíʼinna, ta nda̱saa tiempo káʼa̱nyó xíʼinna.

14. ¿Nda̱chun xíniñúʼu kiʼinníyó kuenta tá káʼa̱nyó xíʼin na̱ yiví?

¹⁴ Nda̱saa kivi ka̱ʼa̱nyó xíʼin na̱ yiví. Tiempo vitin, ku̱a̱ʼání na̱ yiví xóʼvi̱na xa̱ʼa ña̱ kéʼé na̱ chíñu xíʼinna, na̱ político, á na̱ níʼi yichi̱ nu̱úna ti̱xin veʼe-ñu̱ʼu (Mat. 9:36). Ku̱a̱ʼánína kǒo kándíxana ni iin ña̱ʼa, ta kǒo kándíxatuna ni iin na̱ yiví, ta ni kǒo ña̱ ndátuna ndakiʼinna chí nu̱únínu. Ña̱kán ndáyáʼviní vií ndakaxinyó tu̱ʼun ña̱ ka̱ʼa̱nyó xíʼinna, vií ka̱ʼa̱nyó xíʼinna tasaá kunina ña̱ kúndáʼvi-iniyó xíniyóna. Sava yichi̱ na̱ yiví xíniso̱ʼona miíyó, su̱ví kuití xa̱ʼa ña̱ xíniyó xa̱ʼa Biblia, á xa̱ʼa ña̱ va̱ʼaní sánáʼa̱yóna, chi saátu xa̱ʼa ña̱ íxato̱ʼóyóna ta ndíʼi-iniyó xa̱ʼana.

15. ¿Nda̱chun xíniñúʼu viíní keʼéyó xíʼin na̱ yiví tá sánáʼa̱yóna xa̱ʼa Ndióxi̱?

¹⁵ Íyo ku̱a̱ʼání ña̱ kivi keʼéyó tasaá na̱ʼa̱yó ña̱ ndíʼi-iniyó xa̱ʼa na̱ yiví. Tá kúú tá ndáka̱tu̱ʼunyóna, xíniñúʼu viíní ndakanixi̱níyó ña̱ nda̱ka̱tu̱ʼunyóna, ta xíʼin ña̱ to̱ʼó keʼéyóña. Iin ta̱ precursor ni̱xi̱yora iin ñuu nu̱ú íyo na̱ yiví na̱ kǒo kútóo ña̱ nda̱ka̱tu̱ʼunnana. Xa̱ʼa ña̱yóʼo ku̱nda̱a̱-inira ña̱ va̱ása xíniñúʼu nda̱ka̱tu̱ʼunrana xa̱ʼa ña̱ʼa ña̱ kivi sakúkaʼan nu̱úna, á ña̱ va̱ása kivi ndakuiinna. Va̱ása níxi̱nda̱ka̱tu̱ʼunra na̱yóʼo á xínina nda̱saa naní Ndióxi̱, á ndáaña kúú reino Ndióxi̱. Va̱ʼaka xi̱ka̱ʼa̱nra xíʼinna: “Nu̱ú Biblia sa̱kuáʼi̱ ña̱ íyo ki̱vi̱ Ndióxi̱. ¿Á kivi na̱ʼi̱ña nu̱ún?”. Xa̱a̱ síín síín íyo ña̱ kéʼé na̱ yiví, ta xa̱a̱ síín síín íyo ña̱ kéʼé na̱ ñuuna, ña̱kán va̱ása kivi ka̱ʼa̱nyó xíʼinna ndáaña keʼéna. Soo ndiʼi tiempo xíniñúʼu vií keʼéyó xíʼinna ta ixato̱ʼóyóna, xa̱ʼa ña̱yóʼo xíniñúʼu kunda̱a̱-iniyó nda̱saa íyo na̱ yiví nu̱ú ndóoyó.

16, 17. a) Tá kúni̱yó vií keʼéyó xíʼin na̱ yiví, ¿ama kúú ña̱ ku̱ʼu̱nyó veʼena ña̱ sanáʼa̱yóna? b) Tá kúni̱yó vií keʼéyó xíʼin na̱ yiví, ¿nda̱saa tiempo ka̱ʼa̱nyó xíʼinna?

¹⁶ Ama xíniñúʼu ka̱ʼa̱nyó xíʼin na̱ yiví. Tá ku̱a̱ʼa̱nyó veʼe tá veʼe, na̱ yiví va̱ása ndátuna miíyó chi va̱ása níkanana miíyó ña̱ ku̱ʼu̱nyó veʼena. Ña̱kán ndáyáʼviní ña̱ ndaka̱xin va̱ʼayó ndáa hora ndani̱ʼíyóna tasaá kivi natúʼunyó xíʼinna (Mat. 7:12). ¿Á xi̱ku̱aáka ndákoo na̱ yiví nu̱ú ndóoyó ki̱vi̱ sábado á domingo? Tásaá íyoña, sana kivi kixáʼayó natúʼunyó xíʼinna nda̱a̱ mií nu̱ú xíkana, á xíʼin tú carro válí, á kivitu keʼéyó revisita xíʼin na̱ xa̱a̱ xíni̱yó ya̱chi̱ ndákoo.

¹⁷ Nda̱saa tiempo xíniñúʼu ka̱ʼa̱nyó xíʼin na̱ yiví. Vitin kǒo íyo tiempo nu̱ú na̱ yiví, ña̱kán xíniñúʼu loʼo tiempo ka̱ʼa̱nyó xíʼinna tá yichi̱ nu̱ú ña̱ sánáʼa̱yóna. Va̱ʼaka loʼo ná ka̱ʼa̱nyó xíʼinna nu̱úka ña̱ ka̱ʼa̱nyó ku̱a̱ʼá tiempo xíʼinna (1 Cor. 9:20-23). Tá xíto na̱ yiví ña̱ ndíʼi-iniyó xa̱ʼa ña̱ ndóʼona, á xa̱ʼa tiempo ña̱ kúúmiína, sana inka yichi̱ va̱ʼa kuniso̱ʼona ña̱ ku̱a̱ʼa̱nyó sánáʼa̱yóna. Tá kúúmiíyó ña̱ va̱ʼa ña̱ kúúmií espíritu santo, viíní ‘kachíñuyó xíʼin Ndióxi̱ʼ. Nda̱a̱ kivi kuniñúʼura miíyó ña̱ chindeéyó inkana ña̱ ndasakáʼnuna miíra (1 Cor. 3:6, 7, 9).

18. ¿Ndáaña va̱ʼa ndakiʼinyó ta vií ná keʼéyó xíʼin inkana?

¹⁸ Ña̱kán ná chika̱a̱níyó ndée ña̱ vií keʼéyó xíʼin na̱ veʼeyó, na̱ congregación, ta saátu na̱ sánáʼa̱yó xa̱ʼa Ndióxi̱. Tásaá ná keʼéyó niʼíyó ku̱a̱ʼání ña̱ va̱ʼa vitin, ta saátu chí nu̱únínu. Salmo 41:1, 2 káchiña: “Si̱íní íyo na̱ va̱ʼa-ini xíʼin na̱ ndáʼvi; chi tá ná kixi tu̱ndóʼo nu̱úna, Jehová saka̱kurana”. Ta saátu “kusi̱íní-inina koona nu̱ú ñuʼú”.