1. Nda̱a̱ táki̱ʼva káchi Mateo 11:28-30, ¿ndáaña ni̱ka̱ʼa̱n ta̱ Jesús?

TA̱ Jesús ni̱ka̱ʼa̱nra iin ña̱ va̱ʼaní xíʼin iin tiʼvi na̱ yiví na̱ xíniso̱ʼo ña̱ káʼa̱nra. Ka̱chira: “Kixindó nu̱úi̱, [...] ta yi̱ʼi̱ sandíko-inindó” (kaʼvi Mateo 11:28-30). * Soo su̱ví iin ña̱ ni̱ka̱ʼa̱n kuitíra kúúña. Ná ndakanixi̱níyó xa̱ʼa̱ ña̱ ke̱ʼéra xa̱ʼa̱ iin ñá ñaʼá ñá ndeéní ndóʼo.

2. ¿Nda̱saa chi̱ndeétáʼan ta̱ Jesús xíʼin iin ñaʼá ñá ndeé ndóʼo?

² Ñá ñaʼá yóʼo xi̱niñúʼu kamaní chindeétáʼanna xíʼinñá. Ñáyóʼo xa̱a̱ ku̱a̱ʼání nu̱ú na̱ doctor ni̱xa̱ʼa̱nñá ta xa̱a̱ yáʼaka 12 ku̱i̱ya̱ xóʼvi̱ñá ta va̱ása kúchiñu ndaʼañá. Saátu, ña̱ ley xi̱ka̱ʼa̱nña ña̱ kúúñá ñá yaku̱a̱ (Lev. 15:25). Tasaá ku̱nda̱a̱-iniñá ña̱ ta̱ Jesús sándaʼara na̱ ndeé ndóʼo, saá ku̱a̱ʼa̱nñá nandukúñára. Tá nda̱ni̱ʼíñára, ti̱inñá yuʼú ti̱ko̱to̱ra ta ndi̱ku̱n nda̱ʼañá. Soo ta̱ Jesús su̱ví ni sándaʼa kuitírañá, chi saátu nda̱taxira ña̱ si̱í-iniñá. Tá kúú, ni̱xa̱a̱ra nu̱úñá ta xíʼin ña̱ to̱ʼó ni̱ka̱ʼa̱nra xíʼinñá “siʼí”. Ñá ñaʼá kán sana ni̱kusi̱íní-iniñá ta va̱ʼaní ku̱niñá (Luc. 8:43-48).

3. ¿Ndáa pregunta ndakuiinyó nu̱ú ña̱ artículo yóʼo?

³ Ná kotoyó chi siʼna mií ñá ñaʼá yóʼo kúú ñá na̱ndukú ta̱ Jesús. Ta saátu xíniñúʼu keʼé miíyó. Xíniñúʼu chika̱a̱yó ndee̱ ña̱ kuyatinyó nu̱ú ta̱ Jesús. Tiempo vitin, va̱ása kívi sándaʼakara na̱ ndeé ndóʼo na̱ nándukúñaʼá. Soo káʼa̱nkavara xíʼinyó:  “Kixindó nu̱úi̱, [...] ta yi̱ʼi̱ sandíko-inindó”. Nu̱ú ña̱ artículo yóʼo, ndakuiinyó u̱ʼu̱n pregunta: ¿Ndáa ki̱ʼva kuyatinyó nu̱ú ta̱ Jesús? ¿Ndáaña ku̱ni kachi ta̱ Jesús tá ni̱ka̱ʼa̱nra ki̱ʼvindó ti̱xin yugoi̱? ¿Ndáaña sákuaʼayó xa̱ʼa̱ ta̱ Jesús? ¿Nda̱chun va̱ʼaní kúniyó tá kéʼéyó chiñu ña̱ ta̱xira ndaʼa̱yó? Ta, ¿nda̱saa kivi ndi̱ko-iniyó tá ná kuñuʼuyó ti̱xin yugora?

4, 5. ¿Ndáa ki̱ʼva kivi kuyatinyó nu̱ú ta̱ Jesús?

⁴ Iin ña̱ kivi keʼéyó ña̱ va̱ʼa kuyatinkayó nu̱ú ta̱ Jesús kúú ña̱ sakuaʼayó xa̱ʼa̱ ndiʼi ña̱ ni̱ka̱ʼa̱nra xíʼin ña̱ ke̱ʼéra (Luc. 1:1-4). Xa̱ʼa̱ ña̱kán xíniñúʼu kaʼviyó ndiʼi ña̱ káʼa̱n xa̱ʼa̱ ña̱ ke̱ʼéra. Nda̱a̱ ni iinna va̱ása kivi keʼéna ña̱yóʼo nu̱úyó. Saátu kúyatinyó nu̱ú ta̱ Jesús tá ndáka̱xinyó kooyó discípulora ta ndákuchiyó.

⁵ Inka ki̱ʼva ña̱ kuyatinyó nu̱ú ta̱ Jesús kúú ña̱ ka̱ʼa̱nyó xíʼin na̱ anciano ña̱ chindeéna miíyó tá íyo ña̱ ndóʼoyó. Na̱yóʼo kúúna iin regalo na̱ ta̱xi ta̱ Jesús ndaʼa̱yó, chi xíniñúʼurana ña̱ kundaana miíyó (Juan 21:16; Efes. 4:7, 8, 11; 1 Ped. 5:1-3). Soo va̱ása xíniñúʼu kundatuyó ña̱ na̱ anciano ná kotona ndáaña xíniñúʼuyó, chi ña̱ xíniñúʼu keʼéyó kúú ña̱ ka̱ʼa̱nyó xíʼinna ña̱ chindeétáʼanna xíʼinyó. Ná kotoyó ña̱ káʼa̱n iin ta̱ hermano ta̱ naní Julian: “Xi̱niñúʼu sandákooi̱ ña̱ kachíñui̱ Betel xa̱ʼa̱ ña̱ ndeé ndóʼi̱, ta iin ta̱ migoi̱ ni̱ka̱ʼa̱nra xíʼi̱n ña̱ ná ka̱ʼi̱n xíʼin na̱ anciano ku̱ʼu̱nna kotona yi̱ʼi̱. Tá xa̱ʼa̱ nda̱kanixi̱níi̱ ña̱ va̱ása xíniñúʼi̱ña. Soo tándi̱ʼi ni̱ka̱ʼa̱nvai̱ xíʼinna, tá ke̱ʼíi̱ ña̱yóʼo va̱ʼaní ku̱nii̱, ña̱yóʼo kúú iin regalo va̱ʼaní nda̱kiʼii̱n”. Na̱ anciano na̱ nda̱kú-ini, na̱ íyo nda̱a̱ táki̱ʼva íyo na̱ u̱vi̱ ni̱xa̱ʼa̱n xi̱to ta̱ Julian, kivi chindeétáʼanna xíʼinyó ña̱ kunda̱a̱ va̱ʼaka iniyó xa̱ʼa̱ ña̱ ndákanixi̱ní ta̱ Jesús xíʼin ña̱ kéʼéra (1 Cor. 2:16; 1 Ped. 2:21). Ña̱yóʼo kúú iin regalo ña̱ va̱ʼaní ña̱ táxina ndaʼa̱yó.

6. ¿Ndáaña ku̱ni kachi ta̱ Jesús tá ni̱ka̱ʼa̱nra: “ki̱ʼvindó ti̱xin yugoi̱”?

⁶ Tá ni̱ka̱ʼa̱n ta̱ Jesús xíʼinyó ña̱ ná ki̱ʼviyó ti̱xin yugora, sana ña̱ ku̱ni kachira kúú ña̱ ná kundiku̱nyóra. Ta sanatu ku̱ni kachira ña̱ ná ki̱ʼviyó ti̱xin yugora ta inkáchi kachíñuyó nu̱ú Jehová. Nda̱a̱ ndáaka ña̱ kúúña, soo ña̱ xíniñúʼu keʼéyó kúú ña̱ kachíñuyó.

7. Nda̱a̱ táki̱ʼva káchi Mateo 28:18-20, ¿ndáa chiñu kúúmiíyó, ta ndáaña kivi kandíxayó?

⁷ Kándíxayó ña̱ ni̱ka̱ʼa̱n ta̱ Jesús tá ndátaxi xíʼin miíyó ndaʼa̱ Jehová ta ndákuchiyó. Ta̱ Jesús káʼa̱nra ña̱yóʼo xíʼin ndiʼi na̱ yiví. Ta̱kán ndakiʼinra ndiʼi na̱ kúni̱ ndasakáʼnu Ndióxi̱ xíʼin ndiʼi níma̱na (Juan 6:37, 38). Ndiʼi na̱ ndíku̱n ta̱ Jesús kivi inkáchi kachíñuna xíʼinra ña̱ keʼéna chiñu ña̱ ta̱xi Jehová ndaʼa̱ra. Kivi kándíxayó ña̱ mií ta̱ Jesús ndiʼi tiempo chindeétáʼanra xíʼinyó ña̱ va̱ʼa keʼéyó chiñu yóʼo (kaʼvi Mateo 28:18-20). *

8, 9. a) ¿Nda̱chun va̱ʼaní xi̱kuni na̱ yiví na̱ vitá-ini xíʼin ta̱ Jesús? b) ¿Ndáaña xíniñúʼu nda̱ka̱tu̱ʼun xíʼin miíyó?

⁸ Na̱ yiví na̱ vitá-ini va̱ʼaní xi̱kuyatinna nu̱ú ta̱ Jesús (Mat. 19:13, 14; Luc. 7:37, 38). ¿Nda̱chun? Ná ndakanixi̱níyó xa̱ʼa̱ ña̱ síínní ni̱xi̱yora nu̱ú na̱ fariseo. Na̱ xi̱niʼi yichi̱ nu̱ú na̱ veʼe-ñu̱ʼu ni̱nuní xi̱kunina ta va̱ása kúʼvi̱-inina xínina na̱ yiví (Mat. 12:9-14). Soo, ta̱ Jesús xi̱kuʼvi̱-inira xi̱xinira na̱ yiví ta vitá ni̱xi̱yo inira. Na̱ fariseo xi̱kunina kundayáʼvikana nu̱ú inka na̱ yiví ta ni̱nuní xi̱kuni̱na, soo ta̱ Jesús sa̱náʼa̱ra na̱ xi̱ndiku̱nñaʼá ña̱ ná va̱ása  kuni̱na kundayáʼvina nu̱ú inkana, ta vitá koo inina ta kachíñuna nu̱ú inkana (Mat. 23:2, 6-11). Na̱ fariseo xi̱ ixandúxana xíʼin na̱ yiví ña̱ keʼéna ña̱ kúni̱na (Juan 9:13, 22). Soo ta̱ Jesús xi̱taxira ndee̱ ndaʼa̱na xíʼin ña̱ viíní xi̱ka̱ʼa̱nra xíʼinna.

⁹ ¿Ndáaña sákuaʼayó xíʼin ña̱ ke̱ʼé ta̱ Jesús? Ná nda̱ka̱tu̱ʼun xíʼin miíyó: “¿Á xíni̱ inkana ña̱ kúi̱ iin na̱ yiví na̱ vitá íyo inii̱? ¿Á chíka̱i̱ ndee̱ ña̱ keʼíi̱ sava ña̱ʼa ña̱ chindeétáʼi̱n xíʼin inkana? ¿Á vií íyo inii̱ xíʼin inkana?”.

12-14. ¿Nda̱chun ndíko-iniyó ki̱vi̱ kéʼéyó chiñu ña̱ ta̱xi ta̱ Jesús ndaʼa̱yó?

¹² ¿Nda̱chun nda̱a̱ va̱ʼa kúniyó á ndíko-iniyó ki̱vi̱ kéʼéyó chiñu ña̱ ta̱xi ta̱ Jesús ndaʼa̱yó? Ná ka̱ʼa̱nyó xa̱ʼa̱ savaña.

¹³ Kúúmiíyó superintendente na̱ va̱ʼaní. Ni mií Jehová kúú ta̱ superintendente ta̱ káʼnu, va̱ása kue̱ʼe̱ra ta táxira tíxa̱ʼvi ndaʼa̱yó. Ndáyáʼviní chiñu ña̱ kéʼéyó nu̱úra (Heb. 6:10). Ta miíra táxira ndee̱ ndaʼa̱yó ña̱ va̱ʼa keʼéyó chiñu ña̱ kúúmiíyó (2 Cor. 4:7; Gál. 6:5). Ta̱ Jesús, táxira iin yichi̱ va̱ʼaní nu̱úyó xa̱ʼa̱ ndáa ki̱ʼva keʼéyó xíʼin inkana (Juan 13:15). Ta na̱ anciano na̱ níʼi yichi̱ nu̱úyó chíka̱a̱na ndee̱ ña̱ kundiku̱nna yichi̱ ta Jesús, ta̱ va̱ʼaní níʼi yichi̱ (Heb. 13:20; 1 Ped. 5:2). Chíka̱a̱na ndee̱ ña̱ káʼa̱nna tu̱ʼun va̱ʼa xíʼinyó, vií íyo inina xíʼinyó ta saátu ndakúní íyo inina ña̱ sánáʼa̱na miíyó ta ndáana miíyó.

¹⁴ Kúúmiíyó na̱ va̱ʼaní kítáʼan xíʼinyó nu̱ú káchíñuyó. Nda̱a̱ ni iin na̱ íyo ñuyǐví yóʼo, va̱ása vií kítáʼanna ta ni kǒo kúʼvi̱-inina xíni táʼanna nda̱a̱ táki̱ʼva kéʼé miíyó na̱ ndásakáʼnu Ndióxi̱. Ná ndakanixi̱níyó xa̱ʼa̱ ña̱yóʼo: káchíñuyó xíʼin na̱ yiví na̱ kéʼé ña̱ káʼa̱n Ndióxi̱, soo va̱ása ndákanixi̱nína ña̱ va̱ʼaka ña̱ kéʼéna nu̱ú inkana. Xíni̱na keʼéna ku̱a̱ʼá ña̱ʼa soo vitá íyo inina, ta xítona inkana ña̱ ndáyáʼvikana nu̱úna. Va̱ása xítona miíyó ña̱ kúú kuitíyó na̱ káchíñu xíʼinna, chi kúúyó migona. Ta xa̱ʼa̱ ña̱ kúʼvi̱ní-inina xínina miíyó nda̱a̱ kivi kuvina xa̱ʼa̱yó.

15. ¿Nda̱chun xíniñúʼu kusi̱í-iniyó xíʼin chiñu ña̱ kéʼéyó?

¹⁵ Ná chika̱a̱yó ndee̱ keʼéyó chiñu ña̱ va̱ʼaní. Sánáʼa̱yó na̱ yiví ña̱ nda̱a̱ xa̱ʼa̱ Jehová ta nátúʼunyó xa̱ʼa̱ ña̱ vatá ña̱ káʼa̱n ta̱ Ndi̱va̱ʼa (Juan 8:44). Ta̱ Ndi̱va̱ʼa sáxo̱ʼvi̱ra na̱ yiví xíʼin ña̱ vatá ña̱ káʼa̱nra. Tá kúú, kúni̱ra ná kandíxayó ña̱ va̱ása kúkáʼnu-ini Ndióxi̱ xáa̱ ku̱a̱chiyó, ta saátu káʼa̱nra ña̱ va̱ása xíniñúʼu kuʼvi̱-inina kunina miíyó. Ña̱yóʼo kúúña iin ña̱ vatá káʼnuní ta sándakavaña-ini na̱ yiví. Tá kúyatinyó nu̱ú ta̱ Jesús, saa kúú ña̱ kúkáʼnu-inira xa̱ʼa̱ ku̱a̱chiyó, ta Jehová kúʼvi̱ní-inira xínira miíyó (Rom. 8:32, 38, 39). Kúsi̱íní-iniyó ña̱  sánáʼa̱yó na̱ yiví ña̱ ná kandíxana Jehová ta saátu tá xítoyó nda̱saa chíndeétáʼan tu̱ʼunra xíʼinna.

16. ¿Nda̱chun xa̱a̱ síín íyo chiñu ña̱ káʼa̱n ta̱ Jesús xíʼinyó keʼéyó nu̱ú inkaka chiñu?

¹⁶ Chiñu ña̱ káʼa̱n ta̱ Jesús xíʼinyó keʼéyó xa̱a̱ síín íyoña nu̱ú inkaka chiñu. Tá kúú, tándíʼi hora ña̱ káchíñuyó ku̱a̱ʼáníyó su̱ví kuití kúnaayó chi saátu va̱ása kúsi̱í-iniyó. Soo chiñu ña̱ kéʼéyó nu̱ú Jehová xíʼin ta̱ Jesús sákusi̱íníña-iniyó. Sana tándíʼi káchíñuyó iníí ki̱vi̱ kúnaaníyó ta ni saá chíka̱a̱yó ndee̱ ña̱ ku̱ʼu̱nyó reunión. Soo, ¿á su̱ví ña̱ nda̱a̱ kúú ña̱ kúsi̱íní-iniyó tá ndándikóyó veʼeyó ta nda̱a̱ va̱ʼa kúniyó? Ta saátu ndóʼoyó ki̱vi̱ chíka̱a̱yó ndee̱ ña̱ ku̱ʼu̱nyó natúʼunyó xíʼin na̱ yiví á ña̱ kaʼvi iinlá miíyó Biblia, tasaá va̱ʼaní kúniyó ta kúsi̱í-iniyó.

17. ¿Ndáaña xíniñúʼu kunda̱a̱-iniyó xa̱ʼa̱, ta ndáaña xíniñúʼu kiʼinyó kuenta xíʼin?

¹⁷ Xíniñúʼu kunda̱a̱-iniyó ña̱ xa̱a̱ síín íyo ndee̱ ña̱ kúúmií iin iinyó. Ña̱kán xíniñúʼu viíní ndakanixi̱níyó ndáa ki̱ʼva kuniñúʼuyó ndee̱yó. Ta kúú, kivi va̱ása vií kuniñúʼuyóña ña̱ kachíñuyó ña̱ va̱ʼa kuumiíyó ku̱a̱ʼání ña̱ʼa. Ná kotoyó ña̱ ni̱ka̱ʼa̱n ta̱ Jesús xíʼin iin ta̱ ku̱i̱ká ta̱ ni̱nda̱ka̱tu̱ʼun-ñaʼá xa̱ʼa̱ ndáaña xíniñúʼu keʼéra ña̱ va̱ʼa ndakiʼinra ña̱ kutakura ndiʼi tiempo. Ta̱ ta̱a yóʼo xi̱ ixato̱ʼóvara ley ta sana va̱ʼava ni̱xi̱yo inira, chi ña̱ evangelio ña̱ Marcos káʼa̱nña ña̱ ku̱ndáʼvi-ini ta̱ Jesús xi̱nirara. Xa̱ʼa̱ ña̱kán ni̱ka̱ʼa̱nra ña̱yóʼo xíʼinra: “Kúáʼan, ta xi̱kóún ndiʼi ña̱ʼa ña̱ kúúmiíún, [...] ta kixiún kundiku̱n yi̱ʼi̱”. Ta̱yóʼo i̱xayo̱ʼvi̱ña xíʼinra ña̱ ndaka̱xinra ña̱ keʼéra, chi va̱ása ndinuʼu-inira kúni̱ra kundiku̱nra ta̱ Jesús ña̱kán va̱ása nísandákoora ña̱ xi̱kuumiíra (Mar. 10:17-22). Xa̱ʼa̱ ña̱ va̱ása níxiinra ki̱ʼvira ti̱xin yugo ta̱ Jesús xi̱kuura iin esclavo nu̱ú ña̱ ku̱i̱ká (Mat. 6:24). Tá miíyó níxi̱yo ta̱kán, ¿ndáaña ndaka̱xinyó keʼéyó?

18. ¿Ndáaña xíniñúʼu keʼéyó sava yichi̱, ta nda̱chun?

¹⁸ Sava yichi̱ ná nda̱ka̱tu̱ʼun xíʼin miíyó ndáa ña̱ʼa kúú ña̱ ndáyáʼvika nu̱úyó. ¿Nda̱chun? Saáchi saá kúú ña̱ kunda̱a̱-iniyó á xíniñúʼu viíyó ndee̱ ña̱ kúúmiíyó. Ná kotoyó ña̱ ndo̱ʼo ta̱ Mark. Ta̱yóʼo káchira: “Xa̱a̱ ku̱a̱ʼání ku̱i̱ya̱ xi̱ndakanixi̱níi̱ ña̱ loʼo ña̱ʼa kúú ña̱ kúúmiíi̱. Soo ni xi̱kui̱ precursor nina xa̱ʼa̱ xu̱ʼún xi̱ndakanixi̱níi̱ xíʼin ña̱ kuumiíkai̱ ku̱a̱ʼá ña̱ʼa. Xi̱nda̱ka̱tu̱ʼun xíʼin miíi̱ nda̱chun kúú ña̱ íxayo̱ʼvi̱níña xíʼi̱n. Tasaá ki̱ʼii̱n kuenta ña̱ ku̱a̱ʼáka tiempo xi̱xiniñúʼui̱ ña̱ keʼíi̱ inkaka ña̱ʼa nu̱úka ña̱ kachíñui̱ nu̱ú Jehová”. Ta̱ Mark na̱samara ki̱ʼva ña̱ ndákanixi̱níra, ta ki̱xáʼara káchíñura ku̱a̱ʼáka tiempo nu̱ú Ndióxi̱. Káchira: “Sava yichi̱, ndíʼi̱ní-inii̱ ta ndákava-inii̱. Soo, mií Jehová xíʼin ta̱ Jesús chíndeétáʼannína xíʼi̱n, ta chíka̱i̱ ndee̱ ña̱ kachíñukai̱ nu̱úra”.

19. ¿Nda̱chun xíniñúʼu ndákani va̱ʼa xíniyó xa̱ʼa̱ ndáaña kivi kundoʼoyó?

¹⁹ Kiviva ndakundeéyó ndi̱ko-iniyó ti̱xin yugo ta̱ Jesús tá ná keʼéyó u̱ni̱ ña̱ʼa. Ña̱ nu̱ú, viíní ná ndákanixi̱níyó xa̱ʼa̱ ña̱ kivi kundoʼoyó. Miíyó kéʼéyó chiñu Jehová, ña̱kán xíniñúʼu keʼéyóña nda̱a̱ táki̱ʼva kúni̱ra. Chi kúúyó na̱ káchíñu nu̱ú Jehová ta miíra kúú ta̱ níʼi yichi̱ nu̱úyó (Luc. 17:10). Tá ná keʼéyó chiñura nda̱a̱ táki̱ʼva kúni̱ miíyó, sáxo̱ʼvi̱yó miíyó xíʼin yugo. Nda̱a̱ iin si̱ndi̱ki̱ tí ndakúní kivi sátukue̱ʼe̱rí miírí xíʼin yugo ta kunaarí, tá kúni̱rí ku̱ʼu̱nrí chí nu̱ú kúni̱ miírí ta su̱ví nu̱ú kúni̱ ta̱ níʼi yichi̱ nu̱úrí. Saátu kivi keʼéyó ku̱a̱ʼání ña̱ʼa ña̱ va̱ʼa, ta kivi ya̱ʼayó nda̱a̱ ndáaka nu̱ú ña̱ sási nu̱úyó tá ná keʼéyó ña̱ káʼa̱n Jehová. Ná ndakaʼányó chi nda̱a̱ ni iinna va̱ása kivi kasi nu̱ú Jehová ña̱ saxínura ña̱ kúni̱ra (Rom. 8:31; 1 Juan 4:4).

20. ¿Nda̱a̱ xa̱ʼa̱ kúú ña̱ kéʼéyó chiñuyó?

 ²⁰ Ña̱ u̱vi̱, ¿ndáa xa̱ʼa̱ kúú ña̱ kéʼéyó chiñuyó? Ña̱ kúni̱yó kúú ña̱ ndasakáʼnuyó yiváyó Jehová. Tá siglo nu̱ú, ni̱xi̱yo na̱ yiví na̱ ke̱ʼé ku̱a̱ʼání ña̱ʼa xa̱ʼa̱ ña̱ xi̱kuni̱na kundayáʼvina nu̱ú inkana. Soo va̱ása níkusi̱í-inina xíʼin ña̱yóʼo ta sa̱ndákoona ña̱ kundiku̱nna yugo ta̱ Jesús á ña̱ keʼéna ña̱ kúni̱ra (Juan 6:25-27, 51, 60, 66; Filip. 3:18, 19). Ta saátu, ni̱xi̱yo inka na̱ ke̱ʼé ku̱a̱ʼáka ña̱ʼa xa̱ʼa̱ ña̱ kúʼvi̱-inina xínina Ndióxi̱ xíʼin inkakana. Na̱yóʼo ni̱kusi̱íní-inina xa̱ʼa̱ ña̱ vií ke̱ʼéna chiñuna tá ni̱xi̱yona nu̱ú ñuʼú yóʼo, ta nda̱kiʼinna ña̱ kutakuna chí ndiví xíʼin ta̱ Jesús. Saátu kivi kusi̱í-iniyó tá viíní ná keʼéyó ña̱ kúni̱ ta̱ Jesús á ña̱ kundiku̱nyó yugora.

21. Nda̱a̱ táki̱ʼva káchi Mateo 6:31-33, ¿ndáaña kandíxayó keʼé Jehová?

²¹ Ña̱ u̱ni̱, ná kandíxayó ña̱ chindeé Jehová miíyó. Miíyó kúú na̱ nda̱ka̱xin ña̱ xo̱ʼvi̱yó. Ta mií ta̱ Jesús xa̱a̱ ni̱ka̱ʼa̱nra xíʼinyó ña̱ ixandi̱va̱ʼana xíʼinyó. Soo kiviva kándíxayó ña̱ mií Jehová táxi ndee̱ ndaʼa̱yó, ña̱ va̱ʼa kundeé-iniyó ya̱ʼayó nu̱ú nda̱a̱ ndáaka tu̱ndóʼo. Ta ná kundeé-iniyó saa kúú ña̱ ndakúníka koo iniyó (Sant. 1:2-4). Saátu kivi kandíxayó ña̱ mií Jehová táxi ña̱ xíniñúʼuyó, ta saátu ña̱ kuniʼi ta̱ Jesús yichi̱ nu̱úyó ta na̱ hermanoyó chika̱a̱na-ndee̱ xíʼinyó (kaʼvi Mateo 6:31-33; * Juan 10:14; 1 Tes. 5:11). Kúúmiíyó ndiʼi ña̱ kivi chindeétáʼan xíʼinyó ña̱ va̱ʼa ndakú koo iniyó.

22. ¿Ndáa xa̱ʼa̱ kúú ña̱ kivi kusi̱í-iniyó?

²² Ñá ñaʼá ñá sa̱ndáʼa ta̱ Jesús mií ki̱vi̱ saá va̱ʼaní kúni̱ñá. Soo tá ni ndaka̱xinñá ña̱ kundiku̱nñá ta̱ Jesús saá kúú ña̱ va̱ása kiʼinka kue̱ʼe̱ miíñá. ¿Ndáaña ke̱ʼéñá? Tá nda̱ka̱xinñá ña̱ kundiku̱nñá ta̱ Jesús, nda̱kiʼinñá iin ña̱ va̱ʼaní ña̱ kooñá xíʼinra chí ndiví. Nda̱a̱ ndáaka ña̱ ke̱ʼéñá va̱ása kítáʼanña xíʼin ña̱ ndakiʼinñá. Nda̱á ndáaka ña̱ ndátuyó, kúúyó na̱ ku̱ʼu̱n kundoo chí ndiví á nu̱ú ñuʼú yóʼo, kivi kusi̱í-iniyó xa̱ʼa̱ ña̱ ka̱ndíxayó ña̱ ni̱ka̱ʼa̱n ta̱ Jesús xíʼinyó: “Kixindó nu̱úi̱”.