1. ¿Ndáaña ni̱ka̱ʼa̱n ta̱ Jesús xíʼin ku̱mí na̱ tíin ti̱a̱ká, ta ndáaña ke̱ʼéna?

TA̱ PEDRO, ta̱ Andrés, ta̱ Santiago xíʼin ta̱ Juan na̱ xi̱tiin ti̱a̱ká xi̱kuu na̱yóʼo. Sana nda̱kanda̱ní-inina tá ni̱ka̱ʼa̱n ta̱ Jesús ña̱yóʼo xíʼinna: “Kundiku̱nndó yi̱ʼi̱, ta̱ yi̱ʼi̱ chindeétáʼi̱n xíʼinndó ña̱ nandukúndó na̱ yiví nda̱a̱ táki̱ʼva nándukúndó ti̱a̱ká”. * Soo ¿ndáaña ke̱ʼéna? Ña̱ Biblia káchiña: “Ndi̱ku̱n sa̱ndákoona ñunú ña̱ tíinna ti̱a̱ká ta ki̱xáʼana ndíku̱nna sa̱tára” (Mat. 4:18-22). Tá nda̱kaxinna keʼéna ña̱yóʼo na̱sama ki̱ʼva ña̱ xi̱takuna, chi va̱ása nítiinkana ti̱a̱ká na̱ yivíva kúú na̱ ki̱xáʼana nándukúna (Luc. 5:10). Ta saátu tiempo vitin, ta̱ Jesús káʼa̱nra ña̱yóʼo xíʼin na̱ yiví na̱ kúʼvi̱-ini xíni ña̱ nda̱a̱ (Mat. 28:19, 20). Ta miíún, ¿á xa̱a̱ kéʼún ña̱ ni̱ka̱ʼa̱n ta̱ Jesús ña̱ xa̱ún koún na̱ nándukú na̱ yiví?

2. ¿Nda̱chun kúú ña̱ ndáyáʼviní ña̱ ku̱ʼu̱nyó natúʼunyó xíʼin na̱ yiví, ta ndáaña chindeétáʼan xíʼinyó ña̱ va̱ʼa keʼéyóña?

² Sana xa̱a̱ ku̱a̱ʼá tiempo sákuaʼún xa̱ʼa̱ Biblia ta xa̱a̱ kúni̱ún koún publicador, ta natúʼún xíʼin na̱ yiví xa̱ʼa̱ Ndióxi̱. ¿Á xíka-iniún keʼún ña̱ ni̱ka̱ʼa̱n ta̱ Jesús? Tá saá íyoña va̱ása ndakava-iniún. Xa̱ʼa̱ ña̱ kúnda̱a̱-iniún ña̱ ndáyáʼviní ña̱yóʼo ña̱kán yíʼviún keʼúnña. Ña̱ nda̱a̱ kúúña ña̱ Biblia káʼa̱nña xa̱ʼa̱ ta̱ Pedro xíʼin na̱ xi̱kitáʼan xíʼinra ña̱ “ndi̱ku̱n” sa̱ndákoona ñunú ña̱ tíinna ti̱a̱ká. Soo ta̱ Pedro xíʼin ta̱ Andrés ñanira, siʼna nda̱kani vií xi̱nína xa̱ʼa̱ ña̱yóʼo. Chi xa̱a̱ i̱ñu̱ yo̱o̱ xíni̱na ta̱ Jesús ta xa̱a̱ ka̱ndíxana ña̱ kúúra ta̱ Mesías (Juan 1:35-42). Sana saátu miíún, xa̱a̱ ku̱a̱ʼání ña̱ʼa sa̱kuaʼún xa̱ʼa̱ Jehová xíʼin ta̱ Jesús, ta kúni̱ún keʼékaún chiñu nu̱ú Ndióxi̱. Soo tá kúma̱níka ndaka̱xiún keʼún ña̱yóʼo, xíniñúʼu viíní ndakanixi̱níún xa̱ʼa̱ ndiʼi ña̱ keʼún. ¿Ndáaña chi̱ndeétáʼan xíʼin ta̱ Pedro, ta̱ Andrés xíʼin inkana ña̱ va̱ʼa nda̱kaxinna keʼéna ña̱yóʼo?

3. ¿Ndáa ku̱mí ña̱ʼa chindeétáʼan xíʼinyó ña̱ va̱ʼa keʼéyó ña̱ ni̱ka̱ʼa̱n ta̱ Jesús?

 ³ Na̱ nu̱ú xi̱kuu discípulo ta̱ Jesús xi̱kutóonína keʼéna chiñuna, xi̱kunda̱a̱-inina ndáa ki̱ʼva keʼénaña, ndakú ni̱xi̱yo inina ta viíní xi̱keʼénaña. Ña̱yóʼo chi̱ndeétáʼanña xíʼinna ña̱ va̱ʼa na̱túʼunna xíʼin na̱ yiví xa̱ʼa̱ Ndióxi̱. Ña̱ artículo yóʼo chindeétáʼanña xíʼinyó ña̱ kotoyó ndáa ki̱ʼva kivi kundiku̱nyó yichi̱na.

4. ¿Nda̱chun xi̱tiin ta̱ Pedro ti̱a̱ká?

⁴ Ta̱ Pedro xi̱tiinra ti̱a̱ká ña̱ va̱ʼa taxira ña̱ xíniñúʼu na̱ veʼera. Ta xíʼin ndiʼi níma̱ra xi̱keʼéra ña̱yóʼo chi xi̱kutóoníraña (Juan 21:3, 9-15). Saátu sa̱kuaʼara kuʼvi̱-inira kunira chiñu ña̱ natúʼunra xa̱ʼa̱ Ndióxi̱ xíʼin na̱ yiví. Xa̱ʼa̱ ña̱ chi̱ndeétáʼan Jehová xíʼinra va̱ʼaní ni̱xa̱a̱ra ke̱ʼéra chiñu yóʼo (Hech. 2:14, 41).

5. a) Nda̱a̱ táki̱ʼva káchi Lucas 5:8-11, ¿nda̱chun ni̱yi̱ʼví ta̱ Pedro? b) Tá iin na̱ sákuaʼa xa̱ʼa̱ Biblia ndóʼona nda̱a̱ táki̱ʼva ndo̱ʼo ta̱ Pedro, ¿ndáaña kivi chindeétáʼan xíʼinna?

⁵ Tá kúʼvi̱-iniyó xíniyó Jehová, ku̱ʼu̱nyó natúʼunyó xíʼin na̱ yiví. Ta ña̱yóʼo kúú ña̱ chindeétáʼan xíʼinyó tá yíʼviyó keʼéyoña. Tá ni̱ka̱ʼa̱n ta̱ Jesús xíʼin ta̱ Pedro ña̱ ná nandukúra na̱ yiví, ni̱ka̱ʼa̱nra ña̱yóʼo xíʼinra: “Va̱ása yi̱ʼvíkaún” (kaʼvi Lucas 5:8-11). * Va̱ása níyi̱ʼví ta̱ Pedro xa̱ʼa̱ ña̱ kivi kundoʼora tá ná xa̱a̱ra koora discípulo ta̱ Jesús. Soo xa̱ʼa̱ ña̱ xi̱nira ña̱ xi̱niñúʼu ta̱ Jesús ndee̱ra ña̱ va̱ʼa chi̱ndeétáʼanra xíʼinna ña̱ ti̱inna ku̱a̱ʼání ti̱a̱ká, nda̱kanda̱ní-inira ta  nda̱kanixi̱níra ña̱ va̱ása íyo tu̱ʼvara ña̱ kachíñura xíʼin ta̱ Jesús. Ta miíún, ¿á ndíʼi̱-iniún tá ndákanixi̱níún xa̱ʼa̱ ndiʼi ña̱ xíniñúʼu keʼún tá ná koún discípulo ta̱ Cristo? Tá saá íyoña, chi̱ka̱a̱ ndee̱ ña̱ kúʼvi̱ka-iniún kuniún Jehová, ta̱ Jesús xíʼin na̱ yiví, tasaá kuni̱ún keʼún ña̱ ni̱ka̱ʼa̱n ta̱ Jesús ña̱ ku̱ʼún nandukún na̱ yiví (Mat. 22:37, 39; Juan 14:15).

6. ¿Nda̱chun kúni̱yó ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱?

⁶ Kúni̱yó ku̱ʼu̱nyó na̱túʼunyó xíʼin na̱ yiví xa̱ʼa̱ Ndióxi̱. Saáchi kúni̱yó keʼéyó chiñu ña̱ xa̱ʼnda ta̱ Jesús: “Kúáʼanndó ta sanáʼa̱ndó na̱ yiví” (Mat. 28:19, 20). Ta saátu, kúni̱yó keʼéyóña chi na̱ yiví xóʼvi̱na ta kǒo na̱ chíndeétáʼan xíʼinna ña̱kán xíniñúʼu sakuaʼana ña̱ nda̱a̱ xa̱ʼa̱ Reino Ndióxi̱ (Mat. 9:36). Jehová kúni̱ra ña̱ ndiʼi na̱ yiví ná xa̱a̱na sakuaʼana xa̱ʼa̱ ña̱ nda̱a̱ ta ná ka̱kuna (1 Tim. 2:4).

7. ¿Ndáa ki̱ʼva náʼa̱ Romanos 10:13-15 ña̱ ndáyáʼviní ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱?

⁷ Tá ná ndakanixi̱níyó xa̱ʼa̱ ña̱ va̱ʼa ña̱ ndakiʼin na̱ yiví tá ná ku̱ʼu̱nyó natúʼunyó xa̱ʼa̱ Ndióxi̱ xíʼinna, kutóokayó keʼéyó ña̱yóʼo. Iin na̱ tíin ti̱a̱ká kéʼéna ña̱yóʼo ña̱ va̱ʼa xi̱kónarí á kuxunarí, soo miíyó nándukúyó na̱ yiví ña̱ va̱ʼa ná ka̱kuna (kaʼvi Romanos 10:13-15; * 1 Tim. 4:16).

8, 9. ¿Ndáaña xíniñúʼu kuxini̱ iin na̱ tíin ti̱a̱ká, ta nda̱chun?

⁸ Tá tiempo ña̱ ni̱xi̱yo ta̱ Jesús, na̱ ñuu Israel na̱ xi̱tiin ti̱a̱ká xi̱xiniñúʼu kunda̱a̱-inina ndáa ti̱a̱ká kúú tí kivi tiinna (Lev. 11:9-12). Ta saátu xi̱xiniñúʼu kunda̱a̱-inina ndáa míí kivi ndani̱ʼínarí. Tíyóʼo kútóorí koorí nu̱ú íyo ku̱a̱ʼá ña̱ kaxírí xíʼin nu̱ú va̱ʼaní ti̱kui̱í. ¿Á nda̱a̱ ndáaka hora kivi ku̱ʼu̱nna tiinna ti̱a̱ká? Ná kotoyó ña̱ ni̱ka̱ʼa̱n iin ta̱ hermano ta̱ íyo nu̱ú iin isla ña̱ íyo chí Pacífico xíʼin iin ta̱ misionero. Ta̱ hermano yóʼo ni̱ka̱ʼa̱nra xíʼin ta̱ misionero ña̱ ná ku̱ʼu̱nra xíʼinra ña̱ tiinna ti̱a̱ká, ta ta̱ misionero nda̱kuiinra: “Ndakutáʼanyó ka̱a̱ i̱i̱n xi̱ta̱an”. Soo ta̱ hermano yóʼo ni̱ka̱ʼa̱nra xíʼinra: “Su̱ví saá íyoña. Xíniñúʼu ku̱ʼu̱nyó hora ña̱ kivi ndani̱ʼíyó ti̱a̱ká, su̱ví hora ña̱ kúni̱ miíyó”.

⁹ Ki̱ʼva saá íyo ña̱ ke̱ʼé na̱ xi̱nandukú na̱ yiví tá siglo nu̱ú, chi xi̱xa̱ʼa̱nna xi̱nandukúna na̱ yiví hora xíʼin nu̱ú kivi ndani̱ʼínana. Tá kúú, na̱ discípulo ta̱ Jesús xi̱natúʼunna chí templo, chí sinagoga, veʼe tá veʼe xíʼin nu̱ú ya̱ʼvi (Hech. 5:42; 17:17; 18:4). Ta saátu miíyó xíniñúʼu kuxini̱yó costumbre ña̱ kúúmií na̱ yiví na̱ íyo nu̱ú nátúʼunyó. Xíniñúʼu nasamayó ña̱ kéʼéyó ña̱ va̱ʼa ku̱ʼu̱nyó nandukúyóna nu̱ú kivi ndani̱ʼíyóna xíʼin hora ña̱ kivi ndani̱ʼíyóna (1 Cor. 9:19-23).

10. ¿Ndáaña táxi na̱ ñuu Jehová ndaʼa̱yó?

¹⁰ Na̱ tíin ti̱a̱ká xíniñúʼu kuumiína ña̱ʼa ña̱ kivi kuniñúʼuna ña̱ va̱ʼa tiinnarí, ta xíniñúʼu kuxini̱na kuniñúʼunaña. Ta saátu xíniñúʼu keʼé miíyó. Ná ndakaʼányó chi ta̱ Jesús káxiní ni̱ka̱ʼa̱nra xíʼin na̱ discípulora ndáa ki̱ʼva nandukúna na̱ yiví. Ni̱ka̱ʼa̱nra ndáa ña̱ʼa ku̱ʼu̱n xíʼinna, ndáa míí natúʼunna ta ndáaña ka̱ʼa̱nna (Mat. 10:5-7; Luc. 10:1-11). Tiempo vitin, na̱ ñuu Jehová táxina nu̱ú va̱xi tutu ña̱ xíniñúʼuyó, ña̱ va̱ʼaní chíndeétáʼan xíʼinyó ta saátu sánáʼa̱na miíyó ndáa ki̱ʼva kuniñúʼuyóña. * Ta ña̱yóʼo chíndeétáʼanña xíʼinyó ña̱ va̱ása yi̱ʼvíyó natúʼunyó xíʼin na̱ yiví, ta viíní natúʼunyó xíʼinna (2 Tim. 2:15).

11. ¿Nda̱chun xíniñúʼu ndakú koo ini miíyó na̱ nándukú na̱ yiví?

¹¹ Na̱ tíin ti̱a̱ká, xíniñúʼu ndakú koo inina,  saáchi kamaní nása̱ma ña̱ kúu nu̱ú tá mar. Ku̱a̱ʼá yichi̱ xíniñúʼu kachíñuna nda̱a̱ ñuú, ta iin kama kivi kixáʼa kuun sa̱vi̱ kini. Saátu miíyó na̱ nándukú na̱ yiví xíniñúʼu ndakú koo iniyó. Saáchi tá kíxáʼayó nátúʼunyó xíʼin na̱ yiví xa̱ʼa̱ Ndióxi̱ ta káʼa̱nyó ña̱ kúúyó testigo Jehová, sana kíxáʼa íyo tu̱ndóʼo nu̱úyó, tá kúú na̱ veʼeyó va̱ása táxina keʼéyó ña̱yóʼo, na̱ migoyó kúsi̱kindaana miíyó ta va̱ása xíín na̱ yiví kuniso̱ʼona ña̱ nátúʼunyó. Soo va̱ása ndákanda̱-iniyó xíʼin ña̱yóʼo, saáchi ta̱ Jesús ni̱ka̱ʼa̱nra ña̱ chindaʼára na̱ ndíku̱nñaʼá tañu na̱ yiví na̱ va̱ása kandíxa kuniso̱ʼo ña̱ natúʼunna (Mat. 10:16).

12. Nda̱a̱ táki̱ʼva káchi Josué 1:7-9, ¿ndáaña chindeétáʼan xíʼinyó ña̱ ndakú koo iniyó?

¹² ¿Ndáaña chindeétáʼan xíʼún ña̱ ndakú koo iniún? Xíniñúʼu kandíxaún ña̱ níʼi ta̱ Jesús yichi̱ nu̱úyó tá ku̱a̱ʼa̱nyó natúʼunyó xíʼin na̱ yiví (Juan 16:33; Apoc. 14:14-16). Ta saátu xíniñúʼu ndakundeéún kandíxaún ña̱ saxínu Jehová ña̱ ni̱ka̱ʼa̱nra kundaara yóʼó (Mat. 6:32-34). Tá kándíxaníkaún Ndióxi̱ ndakúka koo iniún. Ta̱ Pedro xíʼin na̱ xi̱kitáʼan xíʼinra ni̱na̱ʼa̱na ña̱ xi̱kandíxanína Ndióxi̱ tá sa̱ndákoona chiñu ña̱ xi̱kuumiína ña̱ va̱ʼa kundiku̱nna ta̱ Jesús. Ta saátu miíún ni̱na̱ʼún ña̱yóʼo tá ni̱ka̱ʼún xíʼin na̱ migoún saátu xíʼin na̱ veʼún ña̱ ki̱xáʼún káʼviún Biblia xíʼin na̱ testigo Jehová, ta xáʼún reunión. Ta na̱samaún ki̱ʼva ña̱ tákún xíʼin ña̱ kéʼún ña̱ va̱ʼa ixato̱ʼún ña̱ káʼa̱n Jehová. Tasaá ni̱na̱ʼún ña̱ kándíxaún Ndióxi̱ ta ndakú íyo iniún. Tá ná ndakundeéún chika̱a̱ún ndee̱ ña̱ ndakú koo iniún, kivi kandíxaún ña̱ koo  Jehová xíʼún nda̱a̱ ndáaka nu̱ú ná ku̱ʼún (kaʼvi Josué 1:7-9). *

13. Tá ná ka̱ʼún xíʼin Jehová ta ndakanixi̱níún xa̱ʼa̱ ña̱ ke̱ʼéra, ¿ndáa ki̱ʼva chindeétáʼan ña̱yóʼo xíʼún ña̱ ndakúka koo iniún?

¹³ ¿Ndáaña kivika chindeétáʼan xíʼún ña̱ ndakúka koo iniún? Ka̱ʼa̱n xíʼin Jehová ña̱ ná taxira ndee̱ ndaʼún (Hech. 4:29, 31). Ta̱yóʼo ndakuiinra ña̱ ka̱ʼún xíʼinra ta nda̱a̱ ni iin yichi̱ va̱ása sandákoora yóʼó. Ndiʼi tiempo koora xíʼún ña̱ chindeétáʼanra xíʼún. Ndakanixi̱ní xa̱ʼa̱ ña̱ ke̱ʼé Jehová ña̱ va̱ʼa sa̱kǎkura na̱ xi̱kachíñu nu̱úra tá tiempo xi̱naʼá. Ta saátu ndakanixi̱ní xa̱ʼa̱ ki̱ʼva ña̱ xa̱a̱ chíndeétáʼanra xíʼún ña̱ yáʼún nu̱ú tu̱ndóʼo, ta ndáa ki̱ʼva ta̱xira ndee̱ ndaʼún ña̱ na̱samaún sava ña̱ʼa ña̱ xi̱keʼún. Tá ku̱chiñura chi̱ndeétáʼanra xíʼin na̱ ñuura ña̱ ni̱ko̱so̱kavana tá mar Rojo, va̱ása kaka-iniún chi saátu kuchiñura chindeétáʼanra xíʼún ña̱ xa̱ún koún discípulo ta̱ Cristo (Éx. 14:13). Ta kivi kandíxaún Jehová nda̱a̱ táki̱ʼva ke̱ʼé iin ta̱ salmista, ta̱ ni̱ka̱ʼa̱n: “Jehová íyora xíʼi̱n, va̱ása yi̱ʼvíi̱. ¿Ndáaña kivi keʼé na̱ yiví xíʼi̱n?” (Sal. 118:6).

14. ¿Ndáaña sákuaʼún xíʼin ña̱ ndo̱ʼo ñá Masae xíʼin ñá Tomoyo?

¹⁴ Inka ña̱ kivi chindeétáʼan xíʼún kúú ña̱ ndakanixi̱níún ndáa ki̱ʼva xa̱a̱ chi̱ndeétáʼan Jehová xíʼin na̱ kúkaʼan nu̱ú ña̱ ndakú koo inina. Ná kotoyó ña̱ ndo̱ʼo iin ñá hermana ñá naní Masae. Xa̱ʼa̱ ña̱ xi̱kukaʼanní nu̱úñá, xi̱ndakanixi̱níñá ña̱ va̱ása kuchiñuñá ka̱ʼa̱nñá xíʼin na̱ yiví xa̱ʼa̱ Ndióxi̱. Xi̱ ixayo̱ʼvi̱ña xíʼinñá ña̱ ka̱ʼa̱nñá xíʼin na̱ yiví na̱ va̱ása xíni̱ñá, nda̱a̱ táki̱ʼva íyo ña̱ ndaañá iin yuku̱ ña̱ súkunní saá ni̱xi̱yoña nu̱úñá. Chi̱ka̱a̱ñá ndee̱ ña̱ kuʼvi̱níka-iniñá kuniñá Ndióxi̱ xíʼin na̱ yiví. Nda̱kanixi̱níñá xa̱ʼa̱ tiempo ña̱ ndóoyó vitin ña̱ ndáyáʼviní ña̱ ku̱ʼu̱nñá natúʼunñá xíʼin na̱ yiví xa̱ʼa̱ Ndióxi̱, ta ni̱ka̱ʼa̱nñá xíʼinra ña̱ ná chindeétáʼanra xíʼinñá ña̱ kutóokañá natúʼunñá xíʼin na̱ yiví xa̱ʼa̱ra. Tasaá ku̱chiñuñá ke̱ʼéñá ña̱ xi̱yiʼvíñá keʼéñá, ta nda̱a̱ ni̱xi̱yoñá precursora regular. Saátu kivi chindeétáʼan Jehová xíʼin na̱ publicador xa̱á ña̱ ndakú koo inina, nda̱a̱ táki̱ʼva káchi Josué 1:7, 9. Ná kotoyó ndáaña ndo̱ʼo iin ñá hermana ñá naní Tomoyo. Tá ki̱xáʼañá nátúʼunñá xa̱ʼa̱ Ndióxi̱ veʼe tá veʼe, veʼe ña̱ nu̱ú ni̱xa̱a̱ñá ki̱ta iin ñá nána ta ni̱nda̱ʼyi̱ñá nu̱úñá ta ka̱chiñá: “Va̱ása kúni̱i̱ natúʼun na̱ testigo Jehová xíʼi̱n”, ta ndeéní nda̱kasiñá yéʼé. Ñá Tomoyo va̱ása níndakava-iniñá chi ni̱ka̱ʼa̱nñá xíʼin ñá hermana ñá ku̱a̱ʼa̱n xíʼinñá: “¿Á xi̱niún ña̱ ku̱u? Kǒo nda̱a̱ ni iin tu̱ʼun níka̱ʼi̱n, ta ñá nána káa xa̱a̱ xíni̱ñá ña̱ kúi̱ testigo Jehová. Kúsi̱íní-inii̱”. Ñá Tomoyo precursora regular kúúñá vitin.

15. ¿Ndáaña kúni̱ kachi ña̱ vií keʼéyó iin chiñu, ta nda̱chun ndáyáʼvi keʼé na̱ cristiano ña̱yóʼo?

¹⁵ Ña̱ viíní keʼéyó iin chiñu kúni̱ kachiña, ña̱ xíniñúʼu chika̱a̱níyó ndee̱ ña̱ keʼéyóña. Iin na̱ tíin ti̱a̱ká xíniñúʼu chika̱a̱nína ndee̱ ña̱ ya̱chi̱ ndako̱ona, ña̱ sandíʼina keʼéna chiñuna saátu ña̱ ndakundeéna tiinna ti̱a̱ká ni kúun sa̱vi̱. Ta saátu miíyó na̱ cristiano xíniñúʼu viíní keʼéyó chiñuyó ña̱ va̱ʼa kundeéyó sandíʼiyóña (Mat. 10:22).

16. ¿Ndáaña chindeétáʼan xíʼinyó ña̱ keʼéyó chiñu ña̱ íxayo̱ʼvi̱ xíʼinyó?

¹⁶ Miíyó na̱ yiví kútóokayó keʼéyó chiñu ña̱ va̱ása yo̱ʼvi̱. Soo sava yichi̱ iin chiñu ña̱ ndáyáʼvi yo̱ʼvi̱va keʼéyóña. Xa̱ʼa̱ ña̱yóʼo xíniñúʼu chika̱a̱níyó ndee̱ keʼéyóña. Ña̱kán, tá kúni̱yó keʼéyó iin chiñu ña̱ íxayo̱ʼvi̱ xíʼinyó xíniñúʼu chindeétáʼanna xíʼinyó. Ta mií Jehová kúú ta̱ kivi kuniñúʼu espíritu santora ña̱ va̱ʼa chindeétáʼanra xíʼinyó (Gál. 5:22, 23).

17. Nda̱a̱ táki̱ʼva káchi 1 Corintios 9:25-27, ¿ndáaña xi̱niñúʼu keʼé ta̱ Pablo ña̱ va̱ʼa vií kana chiñura?

 ¹⁷ Ta̱ apóstol Pablo chi̱ka̱a̱níra ndee̱ ña̱ vií ke̱ʼéra chiñura, soo nda̱kunira ña̱ xi̱niñúʼu ixandúxara ña̱ va̱ʼa keʼéra ña̱ nda̱kú (kaʼvi 1 Corintios 9:25-27). * Ta ni̱ka̱ʼa̱nra xíʼin na̱ cristiano ña̱ ná chika̱a̱na ndee̱ ña̱ viíní ná keʼéna chiñuna (1 Cor. 14:40). Xíniñúʼu chika̱a̱níyó ndee̱ ña̱ vií keʼéyó chiñuyó ña̱ ku̱ʼu̱nyó natúʼunyó xíʼin na̱ yiví xa̱ʼa̱ Ndióxi̱, tá saá ná keʼéyó ndakundeéyó ndasakáʼnuyó Jehová (Hech. 2:46).

18. ¿Ndáaña xíniñúʼu keʼéyó ña̱ va̱ʼa kusi̱í-ini Jehová xíʼin chiñu ña̱ kéʼéyó?

¹⁸ Iin na̱ tíin ti̱a̱ká kúnda̱a̱-inina ña̱ viíní ke̱ʼéna chiñuna tá ku̱a̱ʼá ti̱a̱ká ti̱inna. Soo xa̱a̱ síín íyo ña̱ kéʼé miíyó, ni ku̱a̱ʼá kúú na̱ yiví na̱ chíndeétáʼanyó xíʼin ña̱ xa̱a̱na koona testigo Jehová á va̱ása, su̱ví ña̱yóʼo kúú ña̱ náʼa̱ á vií kéʼéyó chiñuyó (Luc. 8:11-15). Tá ná ndakundeéyó natúʼunyó xa̱ʼa̱ Ndióxi̱ xíʼin na̱ yiví ta sanáʼa̱yóna, kusi̱í-ini Jehová xíʼin chiñu ña̱ kéʼéyó. ¿Nda̱chun? Saáchi kándíxayó ña̱ káʼa̱nra ta saátu ña̱ káʼa̱n se̱ʼera (Mar. 13:10; Hech. 5:28, 29).

19, 20. ¿Ndáa inka xa̱ʼa̱ kúú ña̱ xíniñúʼu ku̱ʼu̱nyó natúʼunyó xíʼin na̱ yiví tiempo vitin?

¹⁹ Sava país táxina ña̱ ná tiinna ti̱a̱ká loʼo yo̱o̱ nu̱ú iin ku̱i̱ya̱. Tá kúyatin ndiʼi tiempo ña̱ tíinna ti̱a̱ká, na̱yóʼo kúnda̱a̱-inina ña̱ xíniñúʼu kamaka keʼéna chiñuna. Ta saátu miíyó íyo inka xa̱ʼa̱ kúú ña̱ xíniñúʼu ku̱ʼu̱nyó natúʼunyó xíʼin na̱ yiví tiempo vitin: saáchi xa̱a̱ ku̱yatinní ndiʼi-xa̱ʼa̱ ña̱ íyo nu̱ú ñuyǐví yóʼo. Ndáa si̱lóʼo tiempo kíndo̱o ña̱ va̱ʼa keʼéyó chiñu ña̱ sakǎku na̱ yiví. Va̱ása ndakanixi̱níún ña̱ xíniñúʼu koo iin tiempo ña̱ va̱ʼaka ta saáví kixáʼún keʼún chiñu yóʼo (Ecl. 11:4).

²⁰ Vitin kúú ña̱ xíniñúʼu kuni̱kayó keʼéyó chiñu yóʼo, ña̱ kuxini̱kayo xa̱ʼa̱ ña̱ káʼa̱n Biblia, ña̱ ndakú koo iniyó ta sakuaʼayó vií keʼéyó chiñu yóʼo. Tá ná ndakutáʼún xíʼin yáʼaka u̱na̱ millón na̱ nándukú na̱ yiví na̱ íyo iníí saá nu̱ú ñuʼú, Jehová taxira ña̱ sákusi̱í-iniún (Neh. 8:10). Xíniñúʼu chika̱a̱-iniún ña̱ ndakundeéún keʼún chiñu yóʼo nda̱a̱ ná ka̱ʼa̱n Jehová ña̱ va̱ása keʼékayóña. Nu̱ú ña̱ inka artículo ka̱ʼa̱nyó xa̱ʼa̱ u̱ni̱ ña̱ xíniñúʼu keʼéyó ña̱ va̱ʼa kuni̱kayó natúʼunyó xíʼin na̱ yiví xa̱ʼa̱ Reino Ndióxi̱.