1. ¿Ndáa ki̱ʼva chíndeétáʼan ná hermanayó xíʼin na̱ ñuu Ndióxi̱, soo ndáa tu̱ndóʼo kúú ña̱ yáʼa ku̱a̱ʼáníná nu̱ú? (Koto na̱ʼná ña̱ va̱xi chí sa̱tá tutu yóʼo).

TÁXINÍYÓ tíxa̱ʼvi xa̱ʼa̱ ña̱ íyo ku̱a̱ʼání ná hermana ti̱xin congregación ná ndeéní káchíñu. Tá kúú, táxiná comentario á kéʼéna inkaka ña̱ʼa tá xíyo reunión, nátúʼunná xíʼin na̱ yiví xa̱ʼa̱ Ndióxi̱ ta ndíʼi̱-ininá xa̱ʼa̱ na̱ congregación. Ta saátu, sava náyóʼo chíka̱a̱níná ndee̱ ña̱ kachíñuná tá ndúvií veʼe nu̱ú ndátakayó ña̱ sakuaʼayó xa̱ʼa̱ Ndióxi̱. Soo saátu yáʼaná nu̱ú tu̱ndóʼo. Savaná kíʼinná kuenta xíʼin na̱ yiváná na̱ xa̱a̱ ku̱chée. Inkaná va̱ása táxi na̱ veʼená ña̱ ndasakáʼnuná Ndióxi̱. Ta inkaná sákuaʼnu iinlá miíná se̱ʼená ta chíka̱a̱níná ndee̱ ña̱ taxiná ña̱ xíniñúʼuna.

2. ¿Nda̱chun xíniñúʼu chika̱a̱yó ndee̱ ña̱ chindeétáʼanyó xíʼin ná hermanayó?

² ¿Nda̱chun xíniñúʼu chika̱a̱yó ndee̱ ña̱ chindeétáʼanyó xíʼin ná hermanayó? Saáchi na̱ ñuyǐví yóʼo va̱ása íxato̱ʼóna ná ñaʼá. Ta saátu ña̱ Biblia káʼa̱nña xíʼinyó ña̱ ná chindeétáʼanyó xíʼinná. Tá kúú, ta̱ apóstol Pablo ni̱ka̱ʼa̱nra xíʼin na̱ congregación ña̱ ñuu Roma ña̱ viíní ná ndakiʼinna ñá Febe ta ná chindeétáʼanna xíʼinñá (Rom. 16:1, 2). Tá xi̱kuu ta̱ Pablo fariseo, xi̱kitáʼanra xíʼin na̱ yiví na̱ xi̱ndakanixi̱ní ña̱ va̱ása ndáyáʼvi ná ñaʼá. Soo tá ni̱xa̱a̱ra ndu̱ura cristiano, xi̱keʼéra nda̱a̱ táki̱ʼva xi̱keʼé ta̱ Jesús ta xi̱ ixato̱ʼóra ná ñaʼá ta va̱ʼa ni̱xi̱yo inira xíʼinná (1 Cor. 11:1).

3. ¿Ndáa ki̱ʼva xi̱keʼé ta̱ Jesús xíʼin ná ñaʼá, ta ndáaña xi̱ndoʼora xa̱ʼa̱ ná xi̱keʼé ña̱ kúni̱ Ndióxi̱?

³ Viíní xi̱keʼé ta̱ Jesús xíʼin ndiʼi ná ñaʼá (Juan 4:27). Va̱ása níxi̱yora nda̱a̱ táki̱ʼva ni̱xi̱yo na̱ xi̱niʼi yichi̱ nu̱ú na̱ veʼe-ñu̱ʼu na̱ judío tá tiempo saá. Iin enciclopedia ña̱ káʼa̱n xa̱ʼa̱ Biblia káchiña: “Nda̱a̱ ni iin ña̱ ni̱ka̱ʼa̱n ta̱ Jesús va̱ása nína̱ʼa̱ña ña̱ kǒo ndáyáʼvi ná ñaʼá”. Soo xi̱kuʼvi̱níka-inira xi̱xinira ná ñaʼá ná xi̱keʼé ña̱ kúni̱ yivára. Tá ni̱ka̱ʼa̱nra ndáana kúú na̱ veʼera ni̱ka̱ʼa̱nra xa̱ʼa̱ na̱ ta̱a xíʼin ná ñaʼá na̱ ndásakáʼnu Ndióxi̱ (Mat. 12:50).

4. ¿Ndáaña ka̱ʼa̱nyó xa̱ʼa̱ nu̱ú ña̱ artículo yóʼo?

⁴ Ndiʼi tiempo ni̱xi̱yo tu̱ʼva ta̱ Jesús ña̱ chindeétáʼanra xíʼin ná ñaʼá ná xi̱ndasakáʼnu Ndióxi̱. Ta saátu xi̱ndayáʼviná nu̱úra ta xi̱ndakiʼinra  tu̱ʼunná. Ná kotoyó ndáa ki̱ʼva kivi kundiku̱nyó yichi̱ra ta vií keʼéyó xíʼin ná hermana.

5. ¿Nda̱chun kivi ixayo̱ʼvi̱ña xíʼin sava ná hermana ña̱ kitáʼanná xíʼin inkana?

⁵ Ni kúúyó ta̱a á ñaʼá ndiʼiyó xíniñúʼu kitáʼanyó xíʼin inkana. Soo íyo sava ná hermana ná íxayo̱ʼvi̱ña xíʼin. ¿Nda̱chun? Ná ka̱ʼa̱nyó xa̱ʼa̱ ña̱yóʼo. Iin ñá hermana ñá naní Jordan * káchiñá: “Xa̱ʼa̱ ña̱ ta̱ʼán tindaʼi̱, ku̱a̱ʼání yichi̱ íxayo̱ʼvi̱ña xíʼi̱n ña̱ kotoi̱ ndáa chiñu kúú ña̱ kúúmiíi̱ ti̱xin congregación, ta túvii̱ ña̱ va̱ása kúi̱ táʼan na̱ congregación”. Ñá Kristen iin ñá kúú precursora ñá ku̱a̱ʼa̱n koo inka lugar ña̱ va̱ʼa natúʼunñá xa̱ʼa̱ Ndióxi̱, káchiñá: “Tá sa̱kán xáún iin congregación kivi kuni mitúʼún”. Na̱ íyo xíʼin na̱ veʼena na̱ va̱ása kúú testigo Jehová kivi ndakanixi̱nína ña̱ va̱ása yatin íyona xíʼin na̱ veʼena ni xíʼin na̱ congregación. Ta saátu na̱ ndeé ndóʼo kivi kuni mitúʼunna xa̱ʼa̱ ña̱ va̱ása kívi kitana veʼena, saátu na̱ ndáa iin na̱ veʼena na̱ ndeé ndóʼo kivi kuni mitúʼunna. Iin ñá hermana ñá naní Annette káchiñá: “Tá xi̱kana na̱ hermano yi̱ʼi̱, va̱ása níkivi ku̱ʼi̱n saáchi yi̱ʼi̱ kúú ñá xi̱ndaa siʼíi̱”.

6. Nda̱a̱ táki̱ʼva káchi Lucas 10:38-42, ¿ndáa ki̱ʼva chi̱ndeétáʼan ta̱ Jesús xíʼin ñá Marta ta saátu xíʼin ñá María?

⁶ Ta̱ Jesús xi̱niñúʼura tiempora ña̱ va̱ʼa xi̱táʼanra xíʼin ná ñaʼá ná xi̱kachíñu nu̱ú Ndióxi̱. Ná ndakanixi̱níyó xa̱ʼa̱ ña̱ va̱ʼaní xi̱kitáʼanra xíʼin ñá María ta saátu xíʼin ñá Marta, náyóʼo ná kúa̱an ni̱xi̱yoná (kaʼvi Lucas 10:38-42). * Náyóʼo va̱ʼaní xi̱kuniná xíʼin ña̱ xi̱keʼé ta̱ Jesús ta saátu xíʼin ki̱ʼva ña̱ xi̱ka̱ʼa̱nra xíʼinná. Ñá María va̱ása níyi̱ʼvíñá ña̱ kooñá yatin xa̱ʼa̱ ta̱ Jesús ña̱ va̱ʼa sakuaʼañá xíʼin ña̱ xi̱sanáʼa̱ra. * Ta saátu ñá Marta va̱ása níyi̱ʼvíñá ña̱ ka̱ʼa̱nñá xíʼin ta̱ Jesús xa̱ʼa̱ ña̱ ni̱sa̱a̱ñá xíʼin ñá María chi va̱ása níchindeétáʼanñá xíʼinñá. Xi̱niñúʼura ña̱ ku̱u yóʼo ña̱ va̱ʼa sa̱náʼa̱raná xa̱ʼa̱ sava ña̱ʼa ña̱ ndáyáʼviní. Ta saátu ni̱na̱ʼa̱ra ña̱ xi̱ndi̱ʼi̱-inira xa̱ʼa̱ná xíʼin xa̱ʼa̱ ki̱ʼvaná ta̱ Lázaro tá xi̱xa̱ʼa̱nra xi̱xitorana (Juan 12:1-3). Xa̱ʼa̱ ña̱yóʼo tá ki̱ʼin kue̱ʼe̱ ta̱ Lázaro, ndi̱ku̱n ni̱ka̱ʼa̱nná xíʼin ta̱ Jesús ña̱ ná chindeétáʼanra xíʼinná (Juan 11:3, 5).

7. ¿Ndáa ki̱ʼva kivi chika̱a̱yó ndee̱ xíʼin ná hermana?

⁷ Sava ná hermana, tá xíyo reunión kúú ña̱ kivi ndakutáʼanná xíʼin inkaka na̱ hermano. Tá ki̱xaa̱ná reunión ná ka̱ʼa̱nyó tu̱ʼun va̱ʼa xíʼinná, ná natúʼunyó xíʼinná ta ná na̱ʼa̱yó ña̱ ndíʼi̱-iniyó xa̱ʼa̱ná. Ñá Jordan ñá xa̱a̱ ni̱ka̱ʼa̱nyó xa̱ʼa̱, káchiñá: “Va̱ʼaní kúnii̱ tá káʼa̱nna tu̱ʼun va̱ʼa xíʼi̱n xa̱ʼa̱ comentario ña̱ táxii̱ ti̱xin reunión, tá káʼa̱nna xíʼi̱n ña̱ ku̱ʼi̱n xíʼinna ña̱ natúʼunndi̱ xa̱ʼa̱ Ndióxi̱ á tá kéʼéna inkaka ña̱ʼa ña̱ náʼa̱ ña̱ ndíʼi̱-inina xa̱ʼíi̱”. Ná na̱ʼa̱yó ña̱ ndáyáʼvi ná hermana nu̱úyó. Iin ñá hermana ñá naní Kia káchiñá: “Tá va̱ása kívi ku̱ʼi̱n iin reunión, xa̱a̱ kúnda̱a̱-inii̱ ña̱ chindaʼána iin mensaje nu̱úi̱ ña̱ va̱ʼa ndaka̱tu̱ʼunna yi̱ʼi̱ á íyo va̱ʼi̱. Ña̱yóʼo náʼa̱ña ña̱ kíʼin na̱ congregación kuenta xíʼi̱n”.

8. ¿Ndáa inkaka ki̱ʼva kivi kundiku̱nyó yichi̱ ta̱ Jesús?

⁸ Ná keʼéyó nda̱a̱ táki̱ʼva ke̱ʼé ta̱ Jesús ta ná taváyó tiempo ña̱ kitáʼanyó xíʼin ná hermana. Kivi kanayóná ña̱ ku̱ʼu̱nná veʼeyó kuxuná á ña̱ koo si̱íyó iin rato loʼo. Ta ná ka̱ʼa̱nyó xa̱ʼa̱ ña̱ʼa ña̱ kivi chika̱a̱ ndee̱ xíʼinná (Rom. 1:11, 12). Ta saátu na̱ anciano xíniñúʼu ndakanixi̱nína nda̱a̱ táki̱ʼva ndákanixi̱ní ta̱ Jesús. Ta̱yóʼo xi̱kunda̱a̱-inira ña̱  koo sava ña̱ʼa ña̱ ixayo̱ʼvi̱ xíʼin na̱ ta̱ʼán tindaʼa̱. Soo káxiní ni̱na̱ʼa̱ra ña̱ su̱ví ña̱ tindaʼa̱yó á ña̱ koo se̱ʼeyó kúú ña̱ sákusi̱í-iniyó, chi ña̱ káchíñuyó nu̱ú Jehová kúú ña̱ sákusi̱í-iniyó (Mat. 19:12; Luc. 11:27, 28).

9. ¿Ndáa ki̱ʼva kivi chindeétáʼan na̱ anciano xíʼin ná hermana?

⁹ Na̱ anciano xíniñúʼu kotona ná hermana nda̱a̱ táki̱ʼva íyo siʼína á ki̱ʼvana (1 Tim. 5:1, 2). Xíniñúʼu chika̱a̱na ndee̱ ña̱ tavána tiempo tá kúma̱níka kixáʼa reunión á tá xa̱a̱ ndíʼiña ña̱ va̱ʼa natúʼunna xíʼinná. Ñá Kristen káchiñá: “Iin ta̱ anciano ki̱ʼinra kuenta ña̱ íyoní chiñu nu̱úi̱ ta ni̱ka̱ʼa̱nra xíʼi̱n ña̱ ná ka̱ʼi̱n xíʼinra ndáa ki̱ʼva íyo ndiʼi ña̱ kéʼíi̱. Ta̱xiníi̱ tíxa̱ʼvi xa̱ʼa̱ ña̱ ni̱na̱ʼa̱ra ña̱ ndíʼi̱-inira xa̱ʼíi̱”. Ki̱vi̱ tává na̱ anciano tiempo ña̱ natúʼunna xíʼin ná hermana náʼa̱na ña̱ ndíʼi̱-inina xa̱ʼa̱ná. * Ñá Annette káʼa̱nñá xa̱ʼa̱ ña̱ va̱ʼa ña̱ nda̱kiʼinñá tá ke̱ʼé na̱ anciano ña̱yóʼo: “Va̱ʼaníka xíni̱i̱na ta saátu miína va̱ʼaníka xíni̱na yi̱ʼi̱. Ta tá yáʼi̱ nu̱ú iin tu̱ndóʼo va̱ása íxayo̱ʼvi̱ña xíʼi̱n ña̱ ka̱ʼi̱n xíʼinna ña̱ chindeétáʼanna xíʼi̱n”.

10. ¿Ndáaña kúú ña̱ kivi chindeétáʼan xíʼin ná hermana ña̱ va̱ʼa kuniná?

¹⁰ Ndiʼiyó va̱ʼa kúniyó tá xíto inkana ndáaña  kúú ña̱ va̱ʼa kéʼéyó ta káʼa̱nna xíʼinyó ña̱ chíndayáʼvina chiñu ña̱ kéʼéyó. Tá kǒo kéʼéna ña̱yóʼo ndákava-iniyó. Iin ñá precursora ñá ta̱ʼán tindaʼa̱ ñá naní Abigaíl káchiñá ña̱ sava yichi̱ túviñá ña̱ va̱ása kíʼin inkana kuenta xíʼinñá: “Savana xíni̱ kuitína ndáana kúú na̱ veʼi̱ soo va̱ása xíni̱na yi̱ʼi̱, túvii̱ ña̱ va̱ása ndíʼi-inina xa̱ʼíi̱”. Ná kotoyó ña̱ ni̱ka̱ʼa̱n iin ñá hermana ñá ta̱ʼán tindaʼa̱ ñá naní Pam, ku̱a̱ʼání ku̱i̱ya̱ ni̱xi̱yoñá misionera soo tá ni̱ya̱ʼa tiempo nda̱ndikóñá veʼeñá ña̱ va̱ʼa kundaañá na̱ yiváñá. Vitin xa̱a̱ yáʼaka 70 ku̱i̱ya̱ kúúmiíñá ta kúúkañá precursora, káchiñá: “Ña̱ chíndeétáʼanníka xíʼi̱n kúú ña̱ káʼa̱n inkana xíʼi̱n ña̱ ndáyáʼviníi̱ nu̱úna”.

11. ¿Ndáa ki̱ʼva ni̱na̱ʼa̱ ta̱ Jesús ña̱ xi̱chindayáʼvira ná ñaʼá ná xi̱xa̱ʼa̱n xíʼinra tá xi̱natúʼunra xa̱ʼa̱ Ndióxi̱?

¹¹ Sava ná ñaʼá xi̱xiniñúʼuná ña̱ʼa ña̱ xi̱kuumiíná ña̱ va̱ʼa chindeétáʼanná xíʼin ta̱ Jesús ta xi̱ndayáʼviní ña̱yóʼo nu̱úra (Luc. 8:1-3). Ta su̱ví ña̱yóʼo kuití nítaxira keʼéná xíʼinra chi saátu na̱túʼunra xíʼinná xa̱ʼa̱ ña̱ʼa ña̱ ndáyáʼviní. Tá kúú ni̱ka̱ʼa̱nra xíʼinná ña̱ kuvira ta ndatakura (Luc. 24:5-8). Nda̱a̱ táki̱ʼva ke̱ʼéra xíʼin na̱ apóstolra saá ke̱ʼéra xíʼin ná ñaʼá yóʼo, chi chi̱ndeétáʼanra xíʼinná ña̱ kundeé-ininá tá ná kuniná xo̱ʼvi̱ra ta kuvira (Mar. 9:30-32; 10:32-34). Tá ti̱inna ta̱ Jesús na̱ apóstolra xi̱nuna, soo sava ná ñaʼá yóʼo va̱ása nísandákoonára tá xi̱tikaara ndaʼa̱ yitu̱n (Mat. 26:56; Mar. 15:40, 41).

12. ¿Ndáa chiñu ta̱xi ta̱ Jesús ndaʼa̱ sava ná ñaʼá?

¹² Ta̱ Jesús ta̱xira chiñu ña̱ ndáyáʼvi ndaʼa̱ sava ná ñaʼá. Tá kúú, tá nda̱takura ná ñaʼá kúú na̱ siʼna ku̱nda̱a̱-ini xa̱ʼa̱ ña̱yóʼo. Ta ni̱ka̱ʼa̱nra xíʼinná ña̱ ná ku̱ʼu̱nná natúʼunná xíʼin na̱ apóstolra ña̱ xa̱a̱ nda̱takura (Mat. 28:5, 9, 10). Ta, tá Pentecostés ña̱ ku̱i̱ya̱ 33, tá nda̱kiʼinna espíritu santo sana ni̱xi̱yotu ná ñaʼá tá ku̱u ña̱yóʼo. Tá saá ni̱xi̱yoña, ná ñaʼá ná nda̱kaxin Ndióxi̱ ña̱ ku̱ʼu̱nná chí ndiví ki̱xáʼaná nátúʼunná xa̱ʼa̱ra ku̱a̱ʼá nu̱ú tu̱ʼun (Hech. 1:14; 2:2-4, 11).

13. a) ¿Ndáa ki̱ʼva káchíñu ná hermana nu̱ú Jehová tiempo vitin? b) ¿Ndáa ki̱ʼva kivi na̱ʼa̱yó ña̱ táxiyó tíxa̱ʼvi ndaʼa̱ná xa̱ʼa̱ ndiʼi ña̱ kéʼéná?

¹³ Xíniñúʼu taxiyó tíxa̱ʼvi ndaʼa̱ ná hermana xa̱ʼa̱ ndiʼi chiñu ña̱ kéʼéná nu̱ú Jehová. Tá kúú, káchíñuná nu̱ú kúva̱ʼa veʼe ña̱ xíniñúʼu na̱ ñuu Ndióxi̱ á ña̱ nduvií veʼe yóʼo, chíndeétáʼanná xíʼin grupo nu̱ú káʼa̱nna inka tu̱ʼun, ta káchíñuná sava ki̱vi̱ ti̱xin Betel. Ta saátu chíndeétáʼanná xíʼin na̱ hermano tá kúu iin tu̱ndóʼo, inkaná sándaya̱ʼaná tutu ña̱ kúúmiíyó inka nu̱ú tu̱ʼun, kúúná precursora á misionera. Ta nda̱a̱ táki̱ʼva kéʼé na̱ hermano, saátu náyóʼo xáʼa̱nná Escuela nu̱ú Sákuaʼa na̱ Precursor, Escuela nu̱ú Sákuaʼa na̱ Nátúʼun xa̱ʼa̱ ña̱ Kaʼndachíñu Ndióxi̱ á Escuela ña̱ Galaad. Ta saátu íyo ná hermana ná xa̱a̱ ti̱ndaʼa̱ ná chíndeétáʼan xíʼin yiíná ña̱ vií keʼéna chiñu ña̱ kúúmiína ti̱xin congregación á xíʼin na̱ ñuu Ndióxi̱. Xa̱ʼa̱ ña̱ chíndeétáʼanná xíʼin yiíná, na̱yóʼo viíní kéʼéna chiñuna ta nda̱a̱ táki̱ʼva íyo iin regalo saá íyona nu̱ú na̱ congregación (Efes. 4:8).

14. Nda̱a̱ táki̱ʼva káchi Salmo 68:11, ¿ndáaña kéʼé na̱ anciano?

¹⁴ Na̱ anciano kúnda̱a̱-inina ña̱ ku̱a̱ʼání kúú ná hermana ná kúni̱ kachíñu nu̱ú Jehová, ta ku̱a̱ʼání náyóʼo va̱ʼaní nátúʼunná xa̱ʼa̱ Ndióxi̱ (kaʼvi Salmo 68:11). * Ña̱kán na̱ anciano chíka̱a̱na ndee̱ ña̱ sakuaʼana xíʼin ña̱ xíni̱ ná hermana yóʼo keʼéná. Ñá Abigaíl ñá xa̱a̱ ni̱ka̱ʼa̱nyó xa̱ʼa̱, va̱ʼaní kúniñá tá ndáka̱tu̱ʼun na̱ hermano miíñá ndáaña kúú ña̱ chíndeétáʼan xíʼinñá ña̱ va̱ʼa kixáʼañá natúʼunñá xíʼin na̱ yiví xa̱ʼa̱ Ndióxi̱. Ñáyóʼo káchiñá: “Ña̱yóʼo chíndeétáʼanña xíʼi̱n ña̱ kotoi̱ ña̱ ta̱xi Jehová iin chiñu ndaʼíi̱ ti̱xin ñuura”. Ta saátu, na̱ anciano kúnda̱a̱-inina ña̱ ná hermana ná nda̱kú íyo ini xíʼin Ndióxi̱ kivi chindeétáʼanná xíʼin ná hermana ná válíka xíʼin tu̱ndóʼo ña̱ yáʼaná nu̱ú (Tito 2:3-5). Ña̱yóʼo náʼa̱ña ña̱ xíniñúʼu taxiyó tíxa̱ʼvi ndaʼa̱ ná hermanayó ta kuʼvi̱-iniyó kuniyóná.

15. ¿Ama kúú ña̱ xíniñúʼu chindeétáʼanyó xíʼin ná hermana ta ndakiʼinyó tu̱ʼunná?

¹⁵ Sava ná hermana xíniñúʼu chindeétáʼanyó xíʼinná á ndakiʼinyó tu̱ʼunná (Is. 1:17). Tá kúú, iin ñá hermana ñá ni̱xi̱ʼi̱ yií á ñá va̱ása íyoka xíʼin yií, sana xíniñúʼuñá ña̱ ná ndakiʼinna tu̱ʼunñá á keʼéna iin chiñu ña̱ xi̱keʼé yiíñá. Ta, iin ñá hermana ñá xa̱a̱ ku̱chée sana xíniñúʼu chindeétáʼanna xíʼinñá ña̱ ka̱ʼa̱nna xíʼin na̱ médico xa̱ʼa̱ñá. Ta iin ñá precursora ñá kéʼé inkaka chiñu xíʼin na̱ ñuu Ndióxi̱, sana xíniñúʼu ndakiʼinna tu̱ʼunñá tá káʼa̱nna ña̱ va̱ása va̱ʼa xa̱ʼa̱ñá chi va̱ása kíta ni̱ʼiñá nátúʼunñá xíʼin na̱ yiví nda̱a̱ táki̱ʼva kéʼé inka na̱ precursor. ¿Ndáaña kivi keʼéyó xa̱ʼa̱ná? Ná ka̱ʼa̱n tukuyó xa̱ʼa̱ ña̱ ke̱ʼé ta̱ Jesús.

16. Nda̱a̱ táki̱ʼva káchi Marcos 14:3-9, ¿ndáa ki̱ʼva nda̱kiʼin ta̱ Jesús tu̱ʼun ñá María?

¹⁶ Ta̱ Jesús xi̱ndakiʼinra tu̱ʼun ná ñaʼá ná xi̱kachíñu nu̱ú Ndióxi̱ tá xi̱ka̱ʼa̱nna ña̱ va̱ása va̱ʼa xa̱ʼa̱ná. Tá kúú, nda̱kiʼinra tu̱ʼun ñá María tá ni̱ka̱ʼa̱n kúáchi ñá Marta xa̱ʼa̱ñá (Luc. 10:38-42). Ta saátu nda̱kiʼinra tu̱ʼunñá tá ni̱ka̱ʼa̱nna xíʼinñá ña̱ ke̱ʼéñá iin ña̱ va̱ása va̱ʼa (kaʼvi Marcos 14:3-9). * Ta̱ Jesús xi̱kunda̱a̱-inira nda̱chun kúú ña̱ ke̱ʼéñá saá. Ña̱kán ni̱ka̱ʼa̱nra ña̱yóʼo: “Iin ña̱ va̱ʼaníva kúú ña̱ ke̱ʼéñá xíʼi̱n. [...] Ke̱ʼéñá xíʼi̱n ña̱ kivi keʼévañá”. Ta nda̱a̱ ni̱ka̱ʼa̱nra ña̱ profecía yóʼo: “Iníísaá ñuyǐví, nda̱a̱ ndáaka nu̱ú ná natúʼunna xa̱ʼa̱ tu̱ʼun va̱ʼa ña̱ káʼa̱n xa̱ʼa̱ Ndióxi̱, ka̱ʼa̱nna xa̱ʼa̱ ña̱ ke̱ʼé ñáyóʼo”. Va̱ʼaní ku̱ni ñá María tá ni̱ka̱ʼa̱nra ña̱yóʼo. Ta liviní ña̱ ke̱ʼé ta̱ Jesús saáchi chi̱táʼanra ña̱ va̱ʼa-ini ñá María xíʼin ña̱ kakana natúʼunna xa̱ʼa̱ Ndióxi̱ iníí saá ñuyǐví.

17. Ka̱ʼa̱n xa̱ʼa̱ iin ejemplo ña̱ náʼa̱ ama kúú ña̱ xíniñúʼu ndakiʼinyó tu̱ʼun iin ñá hermana.

¹⁷ ¿Á ndákiʼinyó tu̱ʼun ná hermanayó tá xíniñúʼunáña? Ná kachiyó ña̱ ku̱a̱ʼá na̱ hermano kíʼinna kuenta ña̱ xi̱ku̱aání xáa̱ iin ñá hermana reunión, ñá íyo yií ta̱ va̱ása kúú testigo Jehová ta ndi̱ku̱n tá ndíʼiña ndákiʼinñá ku̱a̱ʼa̱nñá. Ta saátu, va̱ása xáʼa̱n ni̱ʼi na̱ va̱lí se̱ʼeñá xíʼinñá. Xa̱ʼa̱ ña̱yóʼo kíxáʼana káʼa̱nna ña̱ va̱ása va̱ʼa xa̱ʼa̱ñá, ta ndákanixi̱nína nda̱chun kúú ña̱ va̱ása káʼa̱nñá xíʼin yiíñá ña̱ ná taxira na̱ va̱lí yóʼo ku̱ʼu̱n xíʼinñá. Soo mií ña̱ nda̱a̱ chíka̱a̱nívañá ndee̱. Chi su̱ví iinlá miíñá kúú ñá ndáka̱xin ña̱ kivi keʼéñá xíʼin tiempoñá á ña̱ keʼé na̱ va̱lí se̱ʼeñá. ¿Ndáaña kivi keʼéyó tá kúnda̱a̱-iniyó xa̱ʼa̱ ña̱yóʼo? Tá ná ka̱ʼa̱nyó tu̱ʼun va̱ʼa xíʼinñá xa̱ʼa̱ ña̱ kéʼéñá ta natúʼunyó xíʼin inkana xa̱ʼa̱ ña̱ va̱ʼaní kéʼéñá, saá kǒo ka̱ʼa̱nkana ña̱ va̱ása va̱ʼa xa̱ʼa̱ñá.

18. ¿Ndáa inkaka ki̱ʼva kivi chindeétáʼanyó xíʼin ná hermanayó?

¹⁸ Inka ki̱ʼva ña̱ na̱ʼa̱yó ña̱ ndáyáʼvi ná hermanayó nu̱úyó kúú ña̱ chindeétáʼanyó xíʼinná (1 Juan 3:18). Ñá Annette, ñá xi̱ndaa siʼíñá ñá ndeé ndóʼo, káchiñá: “Sava yichi̱ xi̱chindeétáʼan na̱ migoi̱ xíʼi̱n ña̱ va̱ʼa keʼíi̱ inkaka ña̱ʼa á xi̱taxina ña̱ kuxui̱. Xíʼin ña̱yóʼo ku̱nda̱a̱-inii̱ ña̱ kúʼvi̱-inina xínina yi̱ʼi̱ ta kúi̱ táʼan na̱ congregación”. Ta iin ta̱ hermano chi̱ndeétáʼanra xíʼin ñá Jordan, chi ni̱ka̱ʼa̱nra xíʼinñá ndáa ki̱ʼva kivi kundaañá carro tú kúúmiíñá. Ñáyóʼo káchiñá: “Va̱ʼaní kúnii̱ tá kúnda̱a̱-inii̱ ña̱ ndíʼi-ini na̱ hermano xa̱ʼíi̱ ta va̱ása kúni̱na ndoʼi̱ iin tu̱ndóʼo”.

19. ¿Ndáa inka ki̱ʼva kivi chindeétáʼan na̱ anciano xíʼin ná hermana?

¹⁹ Ta saátu, xíniñúʼu kiʼin na̱ anciano kuenta ndáaña kúú ña̱ xíniñúʼu ná hermana. Kúnda̱a̱-inina  ña̱ xíto Jehová ndáa ki̱ʼva kéʼéna xíʼinná (Sant. 1:27). Xa̱ʼa̱ ña̱yóʼo na̱ anciano ndíku̱nna yichi̱ ta̱ Jesús ta vií ndákanixi̱nína. Kéʼéna ña̱yóʼo tá va̱ása káʼa̱nna xíʼinná ndáaña kúú ña̱ xíniñúʼu keʼéná chi va̱ʼa íyo inina xíʼinná ta kúnda̱a̱-inina xíʼin ña̱ ndóʼoná (Mat. 15:22-28). Tá chíndeétáʼanna xíʼinná ña̱ kúni̱na kúú ña̱ ná kunda̱a̱-ininá ña̱ ndíʼi̱-ini Jehová xa̱ʼa̱ná xíʼin na̱ ñuura. Ña̱yóʼo kúú ña̱ ndo̱ʼo ñá Kia tá ku̱a̱ʼa̱nñá kooñá inka veʼe. Tá ku̱nda̱a̱-ini ta̱ kíʼin kuenta xíʼin grupo nu̱ú ndíka̱a̱ñá, ndi̱ku̱n ndu̱kúra ki̱ʼva ña̱ chindeétáʼan na̱ hermano xíʼinñá. Ñáyóʼo káchiñá: “Xíʼin ña̱ ke̱ʼéna chi̱ndeétáʼanna xíʼi̱n ña̱ va̱ása níndi̱ʼi̱ka-inii̱. Ta xíʼin ña̱ ni̱ka̱ʼa̱n na̱ anciano xíʼi̱n ta saátu xa̱ʼa̱ ña̱ chi̱ndeétáʼanna xíʼi̱n ku̱nda̱a̱-inii̱ ña̱ ndáyáʼviníi̱ nu̱ú na̱ congregación, ta va̱ása íyo mitúʼi̱n ña̱ yaʼi̱ nu̱ú tu̱ndóʼo”.

20, 21. ¿Ndáa ki̱ʼva kivi na̱ʼa̱yó ña̱ ndáyáʼvi ndiʼi ná hermana nu̱úyó?

²⁰ Ti̱xin congregación íyo ku̱a̱ʼání ná hermana ná ndeéní káchíñu ta xíniñúʼu chindeétáʼanyó xíʼinná. Xíʼin yichi̱ ña̱ sa̱ndákoo ta̱ Jesús nu̱úyó sa̱kuaʼayó ña̱ xíniñúʼu chika̱a̱yó ndee̱ ña̱ taváyó tiempo ña̱ kutáʼanyó xíʼin ná hermana ta kuxi̱ni̱yóná, ta taxiyó tíxa̱ʼvi ndaʼa̱ná xa̱ʼa̱ ña̱ káchíñuníná nu̱ú Ndióxi̱. Ta xíniñúʼu ndakiʼinyó tu̱ʼunná.

²¹ Tándi̱ʼi ka̱ʼyí ta̱ Pablo carta ña̱ ku̱a̱ʼa̱n nu̱ú na̱ ñuu Roma ni̱ka̱ʼa̱nra xa̱ʼa̱ i̱i̱n ná ñaʼá ná xi̱kachíñu nu̱ú Ndióxi̱ (Rom. 16:1, 3, 6, 12, 13, 15). Tá xi̱niso̱ʼoná ña̱ chíndeéraná ta káʼa̱nra ña̱ va̱ʼa xa̱ʼa̱ná, ña̱yóʼo chi̱ka̱a̱níña ndee̱ xíʼinná. Ta saátu miíyó tá chíndeétáʼanyó xíʼin ndiʼi ná hermana, náʼa̱yó ña̱ ndáyáʼviná nu̱úyó ta nda̱a̱ táki̱ʼva íyo na̱ veʼeyó saá íyoná.