1, 2. ¿Ndáaña ni̱ka̱ʼa̱n tu̱ʼun Ndióxi̱ kuu tiempo ña̱ ndóoyó vitin?

“IIN kama ki̱xáʼa ndíva ndiʼi veʼe nu̱ú íxi̱kóna ña̱ʼa, ta saátu veʼe ña̱ súkunní”. “Ni̱yi̱ʼvíkaví na̱ yiví, ku̱a̱ʼánína ni̱ka̱ʼa̱nna ña̱ loʼova minuto ni̱xi̱yoña, soo nu̱ú yi̱ʼi̱ naʼáníva ni̱xi̱yoña”. Ña̱yóʼo kúú ña̱ ni̱ka̱ʼa̱n sava na̱ yiví na̱ ni̱ka̱ku tá ndeéní ni̱ta̱an chí Nepal tá ku̱i̱ya̱ 2015. Tá miíyó níndoʼo ña̱yóʼo, va̱ása nandósóvíyó xa̱ʼa̱ña.

² Ta ki̱ʼva saá kúu tiempo vitin, soo su̱ví iin ñuu kuití kúuña, saáchi Jehová sákanda̱ra ndiʼi ñuu ña̱ íyo iníísaá nu̱ú ñuʼú, ta xa̱a̱ ku̱a̱ʼání ku̱i̱ya̱ kéʼéraña. Ta̱ Ageo ni̱ka̱ʼa̱nra xa̱ʼa̱ ña̱ kúu tiempo vitin, ka̱chira: “Ña̱yóʼo kúú ña̱ káʼa̱n Jehová ta̱ xáʼndachíñu nu̱ú na̱ ángel: ‘Si̱lóʼo kúma̱ní ta sakánda̱ tukui̱ ndiví, ñuʼú, mar xíʼin ñuʼú yi̱chíʼ” (Ageo 2:6).

3. ¿Nda̱chun síín íyo ña̱ ni̱ka̱ʼa̱n ta̱ Ageo xa̱ʼa̱ nu̱ú ña̱ táan?

³ Ku̱a̱ʼání ña̱ʼa ndíʼi-xa̱ʼa̱ tá táan, soo tá ni̱ka̱ʼa̱n ta̱ Ageo ña̱ kanda̱ ñuʼú yóʼo, ña̱ va̱ʼava ndakiʼinyó xíʼinña. Jehová ka̱chira: “Sakánda̱i̱ ndiʼi ñuu, ta ndiʼi ña̱ʼa ña̱ ndáyáʼvi ña̱ íyo nu̱ú ñuʼú ki̱ʼviña ini veʼe yóʼo, ta sakútúi̱ña xíʼin ña̱ʼa yóʼo” (Ageo 2:7). ¿Ndáaña xi̱kuni̱ kachi profecía yóʼo tá tiempo ña̱ ni̱xi̱yo ta̱ Ageo? Ta, ¿ndáaña kúni̱ kachiña tiempo vitin? Nu̱ú artículo yóʼo ndakuiinyó pregunta yóʼo, ta sakúaʼayó ndáaña keʼéyó ña̱ va̱ʼa chindeétáʼanyó xíʼin Ndióxi̱ ña̱ sákanda̱ra na̱ ñuu.

4. ¿Ndáa chiñu ta̱xi Jehová ndaʼa̱ ta̱ profeta Ageo?

⁴ Jehová ta̱xira iin chiñu ña̱ ndáyáʼviní ndaʼa̱ ta̱ profeta Ageo. Ná kotoyó nda̱chun ta̱xira chiñu yóʼo ndaʼa̱ra. Sana chí Babilonia  ni̱xi̱yo ta̱ profeta Ageo, ta nda̱ndikóra xíʼin inkaka na̱ judío chí Jerusalén tá ku̱i̱ya̱ 537. Tá ni̱ya̱ʼa loʼo tiempo ña̱ ni̱xa̱a̱na Jerusalén, ki̱xáʼana ndásava̱ʼana veʼe Jehová (Esd. 3:8, 10). Soo ki̱xáʼa na̱ yiví sásina nu̱úna, xa̱ʼa̱ ña̱yóʼo nda̱kava-inina ta va̱ása níkachíñukana (Esd. 4:4; Ageo 1:1, 2). Ña̱kán tá ku̱i̱ya̱ 520, Jehová ni̱ka̱ʼa̱nra xíʼin ta̱ Ageo ña̱ ná chika̱a̱ra ndee̱ xíʼinna ña̱ kusi̱í tuku inina ta sandíʼina ndasava̱ʼana templo (Esd. 6:14, 15). *

5. Tu̱ʼun ña̱ ni̱ka̱ʼa̱n ta̱ Ageo xíʼin na̱ ñuu Ndióxi̱, ¿nda̱chun va̱ʼaní chi̱kaa̱ña ndee̱ xíʼinna?

⁵ Ña̱ na̱túʼun ta̱ Ageo xíʼin na̱ judío, chi̱kaa̱ña ndee̱ xíʼinna ña̱ kandíxakana Jehová. Xíʼin ndinuʼu-ini ta̱ profeta Ageo ni̱ka̱ʼa̱nra tu̱ʼun yóʼo xíʼin na̱ nda̱kava-ini: “Ndiʼi ndóʼó na̱ yiví ndakú koo inindó ta kachíñundó, káchi Jehová. Chi yi̱ʼi̱ íyoi̱ xíʼinndó, káchi Jehová ta̱ xáʼndachíñu nu̱ú na̱ ángel” (Ageo 2:4). Tá ni̱ka̱ʼa̱n ta̱ Ageo “Jehová ta̱ xáʼndachíñu nu̱ú na̱ ángel”, ña̱yóʼo chi̱ka̱a̱níña ndee̱ xíʼin na̱ judío kán. Saáchi tá xi̱kuni̱na vií kana chiñu ña̱ keʼéna, xi̱niñúʼu kundaa-inina Jehová chi xíʼin ta̱yóʼo íyo ku̱a̱ʼání na̱ ángel.

6. ¿Ndáaña ku̱u xa̱ʼa̱ ña̱ ni̱ka̱ʼa̱n ta̱ Ageo?

⁶ Ña̱ ni̱ka̱ʼa̱n Jehová xíʼin ta̱ profeta Ageo ka̱ʼa̱nra xíʼin na̱ judío, nda̱a̱ táki̱ʼva íyo ña̱ sa̱kánda̱ ndiʼi ñuu saá ni̱xi̱yoña. Tu̱ʼun yóʼo chi̱ka̱a̱níña ndee̱ xíʼin na̱ judío na̱ va̱ása níxiinka ndasava̱ʼa veʼe Jehová, saáchi ku̱nda̱a̱-inina ña̱ sakánda̱ Jehová na̱ ñuu Persia, chi na̱ ñuu yóʼo xi̱xaʼndachíñuna nu̱ú ku̱a̱ʼání na̱ ñuu tiempo saá. ¿Ndáaña ku̱u xa̱ʼa̱ ña̱yóʼo? Na̱ ñuu Ndióxi̱ ku̱chiñuna sa̱ndíʼina nda̱sava̱ʼana veʼe Jehová. Ta saátu nda̱a̱ na̱ yiví na̱ va̱ása níxi̱kuu judío nda̱kutáʼanna xíʼin na̱yóʼo, ta ki̱xáʼana ndásakáʼnuna Jehová ti̱xin templo xa̱á kán. Tu̱ʼun yóʼo chi̱kaa̱níña ndee̱ xíʼin na̱ judío kán (Zac. 8:9).

7. ¿Ndáa chiñu kúú ña̱ kéʼéyó tiempo vitin xíʼin Jehová?

⁷ ¿Ndáaña kúni̱ kachi profecía ña̱ ni̱ka̱ʼa̱n ta̱ Ageo tiempo vitin? Tuku sákanda̱ Jehová ndiʼi na̱ ñuu tiempo vitin, ta chíndeétáʼanyó xíʼinra keʼéra ña̱yóʼo. Ná ndakanixi̱níyó xa̱ʼa̱ ña̱yóʼo: tá ku̱i̱ya̱ 1914, Jehová nda̱sara ta̱ Jesucristo Rey ti̱xin Reinora ña̱ íyo chí ndiví (Sal. 2:6). Soo tá ki̱xáʼa ta̱ Jesús xáʼndachíñura, su̱ví ña̱ va̱ʼaví níxi̱yo ña̱yóʼo nu̱ú na̱ chíñu na̱ íyo nu̱ú ñuʼú yóʼo. Saáchi nda̱a̱ táki̱ʼva káchi Lucas 21:24, saá kúú ña̱ ni̱xi̱nu tiempo ña̱ ta̱xina ndaʼa̱ na̱ inka ñuu. Ña̱yóʼo kúni̱ kachiña ña̱ va̱ása kivi kaʼndachíñu nda̱a̱ ndáaka na̱ yiví tá su̱ví Ndióxi̱ níndaka̱xinna. Ta xa̱ʼa̱ ña̱yóʼo nda̱a̱ tá ku̱i̱ya̱ 1919, na̱ ñuu Jehová ki̱xáʼana nátúʼunna xíʼin na̱ yiví ña̱ iinlá Reino Ndióxi̱ kúú ña̱ kivi chindeétáʼan xíʼinna. Ta ña̱ nátúʼunna xíʼin na̱ yiví xa̱ʼa̱ Reino Ndióxi̱, táki̱ʼva íyo ña̱ sákanda̱ iníísaá ñuyǐví saá íyoña (Mat. 24:14).

8. Nda̱a̱ táki̱ʼva káchi Salmo 2:1-3, ¿ndáaña kéʼé ku̱a̱ʼánína tá nátúʼunyó xíʼinna xa̱ʼa̱ Reino Ndióxi̱?

⁸ ¿Ndáaña ndóʼo na̱ yiví tá xíniso̱ʼona xa̱ʼa̱ Reino Ndióxi̱? Ku̱a̱ʼánína va̱ása xíínna kuniso̱ʼona (kaʼvi Salmo 2:1-3). * Na̱ yiví nátúʼun kúáchina ta va̱ása xíínna ña̱ ná kaʼndachíñu Rey ta̱ nda̱kaxin Jehová nu̱úna. Ña̱ nátúʼunyó xa̱ʼa̱ Reino Ndióxi̱ su̱ví ña̱ va̱ʼa kúúña nu̱úna. Ta nda̱a̱ sava na̱ chíñu va̱ása xíínna taxina ña̱ natúʼunyó xa̱ʼa̱ ña̱yóʼo. Ta ni ku̱a̱ʼání na̱ chíñu káʼa̱nna ña̱ ndásakáʼnuna Ndióxi̱, soo va̱ása  xíínna sandákoona chiñu ña̱ kúúmiína. Na̱ chíñu yóʼo kéʼéna nda̱a̱ táki̱ʼva ke̱ʼé na̱ chíñu na̱ ni̱xi̱yo tá tiempo ta̱ Jesús, saáchi ku̱a̱ʼa̱nna contrara tá íxandi̱va̱ʼana xíʼin na̱ káchíñu nu̱ú Jehová (Hech. 4:25-28).

9. ¿Ndáaña káʼa̱n Jehová xíʼin na̱ yiví xa̱ʼa̱ ña̱ va̱ása xíín na kuniso̱ʼona ña̱ nátúʼunyó xíʼinna?

⁹ ¿Ndáaña káʼa̱n Jehová xíʼin na̱ yiví tá xítora ña̱ va̱ása xíínna kuniso̱ʼona ña̱ nátúʼunyó xíʼinna? Salmo 2:10-12 káchiña: “Ndóʼó na̱ xáʼndachíñu, ndíchi koondó; ta ndóʼó na̱ ndátiin ku̱a̱chi nu̱ú ñuʼú yóʼo, kuniso̱ʼondó consejo. Kachíñundó nu̱ú Jehová xa̱ʼa̱ ña̱ íxato̱ʼóndóra, kusi̱í-inindó xa̱ʼa̱ ña̱ íxato̱ʼóndóra. Ixato̱ʼóndó se̱ʼe Ndióxi̱; chi tá va̱ása kéʼéndó ña̱yóʼo, sa̱a̱ní Ndióxi̱ xíʼinndó, ta kuvindó chí yichi̱, saáchi kamaní sáa̱ra. Si̱íní íyo ini na̱ ndáa-iniñaʼá”. Jehová va̱ʼaní-inira ta táxira tiempo ndaʼa̱ na̱ va̱ása xíʼin kandíxa, ña̱ va̱ʼa ná nasamana ña̱ kéʼéna ta taxina ná kaʼndachíñu se̱ʼera nu̱úna. Soo xa̱a̱ ku̱a̱ʼa̱n ndíʼi tiempo nu̱úna saáchi “ki̱vi̱ nu̱ú ndíʼi” kúú ña̱ ndóoyó (2 Tim. 3:1; Is. 61:2). Kǒoka tiempo íyo, ña̱kán iin ña̱ númi̱ní kúú ña̱ ná sakúaʼana xa̱ʼa̱ Jehová ta chika̱a̱-inina ña̱ ndasakáʼnunara.

10. Nda̱a̱ táki̱ʼva káchi Ageo 2:7-9, ¿ndáaña keʼé sava na̱ yiví tá ná sakánda̱ Jehová ndiʼi ñuu?

¹⁰ Ta̱ Ageo ni̱ka̱ʼa̱nra xa̱ʼa̱ Jehová ña̱ sakánda̱ra ndiʼi ñuu, ta ña̱yóʼo chindeétáʼanña xíʼin sava na̱ yiví. Ta̱yóʼo ni̱ka̱ʼa̱nra ña̱ sankánda̱ Jehová ndiʼi ñuu “ta ndiʼi ña̱ʼa ña̱ ndáyáʼvi ña̱ íyo nu̱ú ñuʼú ki̱ʼviña ini veʼe Jehová”, ta ña̱ʼa ña̱ ndáyáʼvi yóʼo kúú ndiʼi na̱ yiví na̱ va̱ʼa-ini na̱ kíxáʼa ndásakáʼnu Jehová (kaʼvi Ageo 2:7-9). * * Ta saátu ta̱ profeta Isaías xíʼin ta̱ Miqueas ni̱ka̱ʼa̱nna ña̱ kuu ña̱yóʼo  “ki̱vi̱ nu̱ú ndíʼi” (Is. 2:2-4, nota; Miq. 4:1, 2, nota).

11. ¿Ndáaña ke̱ʼé iin ta̱ hermano tá na̱túʼunna xíʼinra xa̱ʼa̱ Reino Ndióxi̱?

¹¹ Ná kotoyó ndáaña ke̱ʼé ta̱ hermano Ken, ta̱ káchíñu ti̱xin central mundial tá na̱túʼunna xíʼinra xa̱ʼa̱ Ndióxi̱. Ni xa̱a̱ 40 ku̱i̱ya̱ ni̱ya̱ʼa ña̱ na̱túʼunna xíʼinra soo va̱ʼaníva ndákaʼánra xa̱ʼa̱ ña̱yóʼo. Káchira: “Tá na̱túʼunna xíʼi̱n xa̱ʼa̱ tu̱ʼun Ndióxi̱, ni̱kusi̱íní-inii̱ tá ku̱nda̱a̱-inii̱ ña̱ ndóoyó ki̱vi̱ nu̱ú ndíʼi. Ni̱xa̱i̱ ku̱nda̱a̱-inii̱ ña̱ va̱ʼa sakúsi̱íi̱-ini Ndióxi̱ ta ndakiʼi̱n ña̱ kutakui̱ ndiʼi tiempo, xi̱niñúʼu sandákoi̱ ndiʼi ña̱ íyo nu̱ú ñuyǐví yóʼo ta kixáʼíi̱ ndasakáʼnui̱ Jehová. Ni̱ka̱ʼi̱n xíʼin Jehová ña̱ ná chindeétáʼanra xíʼi̱n, ta kama sa̱ndákoi̱ ña̱ íyo nu̱ú ñuyǐví yóʼo. Tasaá nda̱kundiku̱i̱n Reino Ndióxi̱, chi ña̱yóʼo va̱ása ndiʼi-xa̱ʼa̱ña”.

12. ¿Ndáa ki̱ʼva xáa̱ ndiʼi ña̱ʼa ña̱ ndáyáʼvi patio veʼe Jehová tiempo vitin?

¹² Íyo ña̱ náʼa̱ káxi nu̱úyó ña̱ chíndeétáʼanva Jehová xíʼin na̱ ñuura. Saáchi xítoyó ña̱ ku̱a̱ʼa̱n ndúku̱a̱ʼání na̱ yiví na̱ ndásakáʼnu Jehová. Tá ku̱i̱ya̱ 1914 loʼova xi̱kuuyó soo vitin xa̱a̱ yáʼa u̱na̱ millón kúúyó, ta ndiʼi ku̱i̱ya̱ ku̱a̱ʼáníka na̱ yiví ndákutáʼanna xíʼinyó ña̱ va̱ʼa ndakaʼányó xa̱ʼa̱ ña̱ ni̱xi̱ʼi̱ ta̱ Jesús. Tasaá kúú ña̱ ndiʼi ña̱ʼa ña̱ ndáyáʼvi ña̱ íyo nu̱ú ñuʼú xáa̱ña patio veʼe Jehová, ña̱yóʼo kúni̱ kachiña ña̱ ku̱a̱ʼání na̱ yiví kíxáʼana ndásakáʼnuna Jehová nda̱a̱ táki̱ʼva kúni̱ miíra. Ta saátu tá kíxáʼa na̱ yiví yóʼo sándakoona ña̱ va̱ása va̱ʼa kéʼéna, ndásakáʼnuna ki̱vi̱ Jehová (Efes. 4:22-24).

13. ¿Ndáa inkaka profecía xínu xa̱ʼa̱ ña̱ kúu tiempo vitin? (Koto na̱ʼná ña̱ va̱xi chí sa̱tá tutu yóʼo).

¹³ Xa̱ʼa̱ ña̱ kúu tiempo vitin xínutu profecía ña̱ va̱xi nu̱ú Isaías capítulo 60. Tá kúú, versículo 22 káchiña: “Na̱ loʼoní xa̱a̱na koona mil, ta na̱ va̱ása ndáyáʼvi xa̱a̱na koona iin ñuu ña̱ ndakúní. Yi̱ʼi̱ Jehová, kúú ta̱ kama keʼé ña̱yóʼo”. Ta xa̱ʼa̱ ña̱ ku̱a̱ʼa̱n xáʼnuní na̱ ñuu Ndióxi̱, kúu iin ña̱ʼa ña̱ ndáyáʼviní: saáchi iin tá iin na̱yóʼo xa̱a̱ síín síín íyo ña̱ xíni̱na keʼéna, ta saátu kúsi̱í-inina nátúʼunna xíʼin na̱ yiví xa̱ʼa̱ Reino Ndióxi̱. Ta xa̱ʼa̱ ña̱yóʼo na̱ ñuu Ndióxi̱ viíní xíniñúʼuna ña̱ xíni̱na keʼéna, tasaá kúú ña̱ xínu ña̱ ni̱ka̱ʼa̱n ta̱ profeta Isaías ña̱ kuniñúʼuyó “leche tá kúúmií na̱ ñuyǐví” (Is. 60:5, 16). Ndiʼi na̱ ñúʼu ti̱xin ñuu Ndióxi̱ va̱ʼaní káchíñuna saáchi  xa̱a̱ 240 país kúú ña̱ nátúʼunna xa̱ʼa̱ Ndióxi̱, ta xa̱a̱ yáʼaka 1,000 nu̱ú tu̱ʼun sándaya̱ʼana tutu ña̱ tává na̱ ñuura.

14. ¿Ndáaña xíniñúʼu ndaka̱xin na̱ yiví keʼéna tiempo vitin?

¹⁴ Tiempo vitin kúú ña̱ sákanda̱ Jehová ndiʼi na̱ ñuu, xa̱ʼa̱ ña̱yóʼo ndiʼi na̱ yiví xíniñúʼu ndaka̱xinna keʼéna iin ña̱ ndáyáʼviní: ¿á chindeétáʼanna xíʼin Reino Ndióxi̱ á na̱ chíñu na̱ íyo nu̱ú ñuʼú yóʼova kundaa-inina? Ku̱a̱ʼání na̱ ndásakáʼnu Jehová kándíxavana ley ña̱ íyo país nu̱ú ndóona, soo va̱ása kíʼvina xíʼin ña̱ política (Rom. 13:1-7). Saáchi kúnda̱a̱-inina ña̱ iinlá Reino Ndióxi̱ kúú ña̱ kuchiñu sandíʼi-xa̱ʼa̱ tu̱ndóʼo ña̱ íyo nu̱ú na̱ yiví, ta ña̱ Reino yóʼo su̱ví nu̱ú ñuʼú yóʼo íyoña (Juan 18:36, 37).

15. ¿Ndáaña káʼa̱n libro ña̱ Apocalipsis xa̱ʼa̱ ña̱ kundoʼo na̱ ñuu Ndióxi̱?

¹⁵ Libro ña̱ Apocalipsis káʼa̱nña xa̱ʼa̱ ki̱vi̱ nu̱ú ndíʼi, ña̱ ixayo̱ʼvi̱ña xíʼin ña̱ ñuu Ndióxi̱ ña̱ nda̱kú koo inina xíʼinra. Ña̱yóʼo kúni̱ kachiña ña̱ ndakundeéva na̱ yiví ixandi̱va̱ʼana xíʼinyó. Na̱ chíñu na̱ íyo nu̱ú ñuʼú yóʼo ixandúxana xíʼinyó ña̱ ndasakáʼnuyóna, ta kuni̱na ña̱ chindeétáʼanyó xíʼinna, soo tá ná va̱ása keʼéyó ña̱yóʼo ixandi̱va̱ʼa xíʼinyó (Apoc. 13:12, 15). Ta ixandúxana “xíʼin ndiʼina ña̱ ná kanina tuni̱ ndaʼa̱ kúaʼana á chí te̱ʼéna ni kúúna na̱ va̱lí á na̱ náʼnu, ni kúúna na̱ ku̱i̱ká á na̱ ndáʼvi ni kúúna na̱ yiví libre á esclavo” (Apoc. 13:16). Tá tiempo xi̱naʼá, na̱ yiví na̱ xi̱kachíñu ndáʼvi xi̱kuumiína iin tuni̱ ña̱ xi̱na̱ʼa̱ ndáana káchíñuna nu̱ú. Ta ki̱ʼva saátu kúu tiempo vitin, ku̱a̱ʼání na̱ yiví kúúmiína iin tuni̱ ndaʼa̱na á te̱ʼéna. Ña̱yóʼo kúni̱ kachiña, ña̱ ndiʼi na̱yóʼo náʼa̱na xíʼin ña̱ kéʼéna á xíʼin ña̱ ndákanixi̱nína ña̱ chíndeétáʼanna xíʼin na̱ chíñu na̱ íyo nu̱ú ñuʼú yóʼo.

16. ¿Nda̱chun xíniñúʼu chika̱a̱yó ndee̱ ña̱ nda̱kú koo iniyó xíʼin Jehová?

¹⁶ Soo, ¿ndáaña keʼé miíyó? ¿Á taxiyó ña̱ ná kanina tuni̱ yóʼo miíyó ta chindeétáʼanyó xíʼin na̱ chíñu na̱ íyo nu̱ú ñuʼú yóʼo? Tá ná va̱ása kandíxayó ndakiʼinyó ña̱ tuni̱ yóʼo, ya̱ʼayó nu̱ú tu̱ndóʼo ña̱ i̱yoní. Libro ña̱ Apocalipsis káʼa̱ntuña ña̱yóʼo: “Ta nda̱a̱ ni iinna kǒo kívi satána á xi̱kóna tá kǒo tuni̱ yóʼo kúúmiína” (Apoc. 13:17). Soo miíyó na̱ ndásakáʼnu Ndióxi̱ kúnda̱a̱-iniyó ña̱ sandíʼi-xa̱ʼa̱ra na̱ yiví na̱ kuumií tuni̱ yóʼo (Apoc. 14:9, 10). Xa̱ʼa̱ ña̱kán va̱ása kuumiíyó tuni̱ kán, saáchi ndaʼa̱vayó ka̱ʼyi̱ tu̱ʼun yóʼo: “Kuenta Jehová kúi̱” (Is. 44:5). Ña̱kán, vitin kúú ña̱ xíniñúʼu chika̱a̱yó ndee̱ ña̱ nda̱kú koo iniyó xíʼin Jehová. Tá saá ná keʼéyó, kusi̱íní-inira ka̱ʼa̱nra ña̱ kúúyó kuentara.

17. ¿Á ndiʼi tiempo kúee koo ini Jehová?

¹⁷ Tiempo vitin Jehová náʼa̱ra ña̱ kúee íyo inira ta ndátura, saáchi va̱ása kúni̱ra ña̱ ná ndiʼi-xa̱ʼa̱ ndiʼi na̱ yiví (2 Ped. 3:9). Táxira tiempo ndaʼa̱ ndiʼina ña̱ va̱ʼa ndandikó-inina ta vií ndaka̱xinna ña̱ keʼéna. Soo kixaa̱ iin ki̱vi̱ ña̱ va̱ása keʼékara ña̱yóʼo. Tá ná va̱ása ndaka̱xin viína ña̱ keʼéna, kundoʼona nda̱a̱ táki̱ʼva ndo̱ʼo ta̱ faraón tá tiempo ta̱ Moisés. Ña̱yóʼo ni̱ka̱ʼa̱n Jehová xíʼinra: “Xa̱a̱ ku̱a̱ʼá tiempo chí sa̱tá kivi chindaʼíi̱ iin kue̱ʼe̱ ña̱ ndeéní sa̱táún xíʼin sa̱tá na̱ ñuún, tá saá níkeʼíi̱ kǒokaviún íyo nu̱ú ñuʼú yóʼo. Soo va̱ása nísandíʼi-xa̱ʼíi̱ yóʼó ña̱ va̱ʼa na̱ʼi̱ ndee̱ ña̱ kúúmiíi̱ nu̱ún, ta saátu ña̱ va̱ʼa ndukáʼnu ki̱víi̱ nu̱ú ndiʼi na̱ yiví na̱ ndóo nu̱ú ñuʼú yóʼo” (Éx. 9:15, 16). Ndiʼi na̱ yiví xa̱a̱na kunda̱a̱-inina ña̱ iinlá Jehová kúú Ndióxi̱ ta̱ nda̱a̱ (Ezeq. 38:23). ¿Ndáa ki̱ʼva kuu ña̱yóʼo?

18. a) ¿Ndáa inka ña̱ káʼa̱n Ageo 2:20-22 xa̱ʼa̱? b) ¿Nda̱chun va̱ʼa kúnda̱a̱-iniyó ña̱ chí nu̱únínu xi̱nu tu̱ʼun ña̱ ni̱ka̱ʼa̱n ta̱ Ageo?

¹⁸ Tá ni̱ya̱ʼa ku̱a̱ʼá tiempo ña̱ ni̱xi̱ʼi̱ ta̱ Ageo,  Jehová xi̱niñúʼura ta̱ apóstol Pablo ña̱ va̱ʼa ni̱na̱ʼa̱ra ña̱ tá ná ya̱ʼa tiempo, saá xi̱nu profecía ña̱ va̱xi nu̱ú Ageo 2:6, * 20-22 * (kaʼviña). Ña̱yóʼo ka̱ʼyí ta̱ Pablo: “Vitin káʼa̱nra ña̱yóʼo: ‘Tuku sakánda̱i̱ ñuʼú yóʼo, soo su̱ví ña̱yóʼo kuití chi nda̱a̱ ndiví sakánda̱i̱ʼ. Soo tá káchiña ‘tukuʼ ña̱yóʼo káʼa̱nña xa̱ʼa̱ ña̱ ndiʼi-xa̱ʼa̱ ña̱ʼa ña̱ kánda̱, ta ña̱yóʼo kúú ña̱ʼa ña̱ kǒo ní ixava̱ʼa Ndióxi̱, soo ña̱ʼa ña̱ va̱ása kánda̱ va̱ása ndiʼi-xa̱ʼa̱ña” (Heb. 12:26, 27). Síínva koo ña̱ káʼa̱n Ageo 2:20-22 nu̱ú ña̱ káʼa̱n Ageo 2:7 xa̱ʼa̱, saáchi na̱ yiví na̱ kéʼé nda̱a̱ táki̱ʼva ke̱ʼé ta̱ faraón, ña̱ va̱ása xíínna ndakunina ña̱ iinlá Jehová kúú ta̱ xíniñúʼu kaʼndachíñu, Jehová sandíʼi-xa̱ʼa̱rana.

19. ¿Ndáaña va̱ása kanda̱, ta nda̱chun va̱ʼa kúnda̱a̱-iniyó ña̱yóʼo?

¹⁹ ¿Ndáa ña̱ʼa kúú ña̱ va̱ása kanda̱ á ña̱ ndiʼi-xa̱ʼa̱? Ta̱ Pablo ka̱chira: “Xa̱ʼa̱ ña̱ ndakiʼinyó iin Reino ña̱ kǒo kívi kanda̱, ná ndakundeéyó taxiyó ña̱ na̱ʼa̱ Ndióxi̱ ña̱ va̱ʼaní-inira xíʼinyó, chi ña̱yóʼo kúú ña̱ chindeétáʼan xíʼinyó ña̱ ndasakáʼnuyóra nda̱a̱ táki̱ʼva kúni̱ miíra, ta yi̱ʼvíníyó kuniyó Ndióxi̱ ta ixato̱ʼóníyóra” (Heb. 12:28). Ña̱kán, tá ná sankánda̱ Ndióxi̱ ñuʼú yóʼo, ña̱yóʼo kúni kachiña ña̱ sandíʼi-xa̱ʼa̱ra ndiʼi na̱ yiví na̱ va̱ása xíín kundiku̱nñaʼá, ta iinlá Reinora kúú ña̱ va̱ása ndiʼi-xa̱ʼa̱ (Sal. 110:5, 6; Dan. 2:44).

20. ¿Ndáaña xíniñúʼu ndaka̱xin na̱ yiví keʼéna, ta ndáa ki̱ʼva chindeétáʼanyó xíʼinna?

²⁰ Si̱lóʼoní tiempo kíndo̱o nu̱ú na̱ yiví, ña̱kán xíniñúʼu ndaka̱xinna ndáaña keʼéna. ¿Á ndakundeéna keʼéna ña̱ va̱ása va̱ʼa ta ndiʼi-xa̱ʼa̱na? ¿Á nasamana ña̱ kéʼéna ta kixáʼana keʼéna ña̱ kúni̱ Ndióxi̱ ña̱ va̱ʼa ndakiʼinna ña̱ kutakuna ndiʼi tiempo? (Heb. 12:25). Tá nátúʼunyó xíʼin na̱ yiví xa̱ʼa̱ Ndióxi̱, saá kúú ña̱ chíndeétáʼanyó xíʼinna ña̱ ndaka̱xinna ña̱ keʼéna. Ña̱kán, ná ndakundeéyó chindeétáʼanyó xíʼin Ndióxi̱ ña̱ va̱ʼa ku̱a̱ʼáka na̱ yiví kixáʼana kandíxana Reinora. Ta ná va̱ása nandósó-iniyó xa̱ʼa̱ tu̱ʼun ña̱ ni̱ka̱ʼa̱n tátayó Jesús tá ka̱chira: “Ta natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú yóʼo ña̱ va̱ʼa kunda̱a̱-ini ndiʼi na̱ yiví tasaá ndiʼi-xa̱ʼa̱ ñuyǐví” (Mat. 24:14).