1. Tá kíta iinna ti̱xin ñuu Jehová, ¿ndáaña kivi kundoʼo na̱ veʼena?

TÁ KÍTA iinna ti̱xin congregación, ndeéní kúsuchí-ini na̱ veʼena. Iin ñá hermana ñá naní Hilda * káchiña: “Tá ni̱xi̱ʼi̱ yiíi̱ ndakanixi̱níi̱ ña̱ suchíní ña̱ ndo̱ʼi̱, saáchi yáʼaka 40 ku̱i̱ya̱ ni̱xi̱yoi̱ xíʼinra. Soo tá ki̱ta se̱ʼi̱ ti̱xin congregación ta sa̱ndákoora ñá síʼíra xíʼin se̱ʼe válíra, ndeéníka sa̱kúsuchí ña̱yóʼo inii̱”.

2, 3. Nda̱a̱ táki̱ʼva káchi Salmo 78:40, 41, ¿ndáaña ndóʼo Jehová tá kíta iinna ti̱xin ñuura?

² Ná ndakanixi̱níyó nda̱saaví ku̱suchí-ini Jehová tá ku̱a̱ʼání na̱ ángel va̱ása níkandíxakanara (Jud. 6). Ta saátu ku̱suchíní-inira tá xi̱nira ña̱ tuku ta tuku i̱xaso̱ʼo na̱ ñuu Israel nu̱úra (kaʼvi Salmo 78:40, 41). * Tá iin na̱ veʼún sa̱ndákoona Jehová, va̱ása kaka-iniún ña̱ kúsuchíní-ini Jehová xíʼún. Chi ta̱kán kúnda̱a̱va-inira xíʼin ña̱ ndóʼún, ta xa̱ʼa̱ ña̱ kúndáʼvi-inira xínira yóʼó chíka̱a̱ra ndee̱ xíʼún ta sándíkora-iniún.

³ Nu̱ú artículo yóʼo kotoyó ndáaña xíniñúʼu keʼéyó ña̱ va̱ʼa chindeétáʼan Jehová xíʼinyó tá kíta iin na̱ veʼeyó ti̱xin ñuura. Ta saátu kotoyó ndáaña xíniñúʼu keʼéyó ña̱ va̱ʼa chindeétáʼanyó xíʼin na̱ hermanoyó na̱ yáʼa nu̱ú táʼan ña̱yóʼo. Soo siʼna ná sakúaʼayó ndáaña va̱ása xíniñúʼu ndakanixi̱níyó tá kíta iin na̱ veʼeyó ti̱xin ñuu Jehová.

4. ¿Ndáaña ndóʼo na̱ íyo se̱ʼe tá kita se̱ʼena ti̱xin ñuu Jehová?

⁴ Tá kíta se̱ʼe iin na̱ hermano ti̱xin ñuu Jehová, túvina ña̱ va̱ása níchindeétáʼanna xíʼin se̱ʼena ña̱ ndakundeéna ndasakáʼnuna Jehová. Iin ta̱ hermano ta̱ naní Luke ni̱ka̱ʼa̱nra ña̱yóʼo tá ki̱ta se̱ʼera: “Nda̱kanixi̱níi̱ ña̱ ku̱a̱chi miíi̱ kúúña. Ta nda̱a̱ xi̱xaníi̱  xa̱ʼa̱ ña̱yóʼo. Sava yichi̱ xi̱xakui̱ ta ndeéní xi̱kusuchí-inii̱”. Saátu ndo̱ʼo iin ñá hermana ñá naní Elizabeth, tuku ta tuku xi̱ndakanixi̱níña ña̱yóʼo: “¿Ndáaña kúú ña̱ va̱ása va̱ʼa níkeʼíi̱? Nda̱kanixi̱níi̱ ña̱ va̱ása vií nísanáʼi̱ se̱ʼi̱ xa̱ʼa̱ Ndióxi̱”.

5. Tá kíta iinna ti̱xin ñuu Jehová, ¿ndáana kúúmií ku̱a̱chi xa̱ʼa̱ ña̱yóʼo?

⁵ Ná ndakaʼányó chi Jehová táxira ña̱ ná ndaka̱xinyó ndáaña keʼéyó. Ña̱kán, iin tá iinyó kivi ndaka̱xinyó á kandíxayóra á va̱ása. Sava na̱ va̱lí va̱ása nísanáʼa̱ na̱ yivánana xa̱ʼa̱ Jehová, soo chi̱ka̱a̱-inina ña̱ ndasakáʼnunara ta nda̱kú koo inina xíʼinra. Soo síínva xa̱ʼnu inkana chi na̱ yivána chi̱ka̱a̱na ndee̱ ña̱ sa̱náʼa̱nana nda̱a̱ táki̱ʼva káʼa̱n tu̱ʼun Ndióxi̱, soo tá xa̱ʼnuna ku̱xíkána nu̱ú Jehová. Xa̱ʼa̱ ña̱yóʼo, iin tá iinvayó ndáka̱xinyó á kachíñuyó nu̱ú Jehová á va̱ása (Jos. 24:15). Ña̱kán, tá ki̱ta se̱ʼendó ti̱xin ñuu Jehová, va̱ása chika̱a̱ndó ku̱a̱chi miíndó xa̱ʼa̱ ña̱yóʼo.

6. ¿Ndáaña kivi kundoʼo na̱ va̱lí tá kíta na̱ yivána ti̱xin ñuu Ndióxi̱?

⁶ Sava yichi̱ yivána á siʼína kúú na̱ kíta ti̱xin ñuu Jehová ta nda̱a̱ sándakoona na̱ veʼena (Sal. 27:10). Tá kúu ña̱yóʼo ndákavaní-ini na̱ va̱lí se̱ʼena, saáchi va̱ʼaní xi̱ndiku̱nna yichi̱ na̱ yivána. Iin ñá hermana ñá naní Esther nátúʼunñá ndáaña ndo̱ʼoñá tá ki̱ta yiváñá ti̱xin ñuu Jehová, káchiñá: “Xi̱xakuníi̱, saáchi ki̱ʼi̱n kuenta ña̱ su̱ví loʼo tá loʼo níkuxíká yivái̱ nu̱ú Jehová, saáchi iin kamava ni̱ka̱ʼa̱nra ña̱ va̱ása kúni̱kara koora testigo Jehová. Kúni̱níi̱ xínii̱ yivái̱, ña̱kán tá kitara ti̱xin ñuu Ndióxi̱, ni̱ndi̱ʼi̱ní-inii̱ xa̱ʼa̱ra ta xa̱ʼa̱ ña̱yóʼo nda̱a̱ ki̱ʼin kue̱ʼe̱ yi̱ʼi̱”.

7. ¿Ndáaña ndóʼo Jehová xa̱ʼa̱ na̱ va̱lí tá kíta na̱ yivána ti̱xin ñuura?

⁷ Na̱ va̱lí, tá kúsuchíní-inindó xa̱ʼa̱ ña̱ ki̱ta iin na̱ yivándó ti̱xin ñuu Ndióxi̱, saátu ndi̱ʼi̱ kúsuchíní-inii̱ xíʼinndó. Ta saátu Jehová kúnda̱a̱-inira xíʼin ña̱ ndóʼondó. Kúʼvi̱ní-inira xínira ndóʼó ta kúsi̱íní-inira xa̱ʼa̱ ña̱ ndákundeéndó ndásakáʼnundóra, ta nda̱kú íyo inindó xíʼinra. Ta saátu ndi̱ʼi̱ kúsi̱íní-inindi̱ xíʼinndó. Ta ndakaʼánndó ña̱ su̱ví ku̱a̱chi ndóʼó kúú ña̱ ki̱ta na̱ yivándó ti̱xin ñuu Jehová. Saáchi nda̱a̱ táki̱ʼva xa̱a̱ ni̱ka̱ʼa̱nyó, Jehová táxira ña̱ ná ndaka̱xinyó á ndasakáʼnuyóra. Iin tá iin na̱ xa̱a̱ nda̱taxi mií ndaʼa̱ Ndióxi̱ ta nda̱kuchina, ndakuiinna xa̱ʼa̱ ña̱ kéʼéna (Gál. 6:5).

8. ¿Ndáaña kivi keʼé sava na̱ hermano nani ndátuna ña̱ ndikó na̱ veʼena ti̱xin ñuu Jehová? (Koto recuadro ña̱ naní “ Jehová kúni̱ra ña̱ ná ndikóún nu̱úra”).

⁸ Tá iin na̱ kúʼvi̱ní-iniún xíniún ki̱tana ti̱xin ñuu Jehová, ndátún ña̱ ndikó tukuna ndasakáʼnunara. ¿Ndáaña kivi keʼún nani ndátún ña̱ ndikóna? Ndakundeún keʼún sava ña̱ʼa ña̱ sákuyatinka yóʼó nu̱ú Jehová. Saáchi tá ná keʼún ña̱yóʼo, va̱ʼaní yichi̱ chinúún nu̱ú na̱ veʼún ta saátu nu̱ú na̱ ki̱ta ti̱xin ñuu Jehová. Ta ña̱yóʼo taxiña ndee̱ ndaʼún ña̱ kundeé-iniún xa̱ʼa̱ ña̱ xóʼvi̱ún xíʼin xa̱ʼa̱ ña̱ kúsuchí-iniún. Ná kotoyó sava ña̱ kivi keʼún ña̱ va̱ʼa ndakundeún kandíxakaún Ndióxi̱.

9. ¿Ndáaña chindeétáʼan xíʼún ña̱ kandíxakaún Ndióxi̱? (Koto recuadro ña̱ naní “ Texto ña̱ chika̱a̱ ndee̱ xíʼún tá ki̱ta iin na̱ veʼún ti̱xin ñuu Ndióxi̱”).

⁹ Ndakundeún keʼún ña̱ʼa ña̱ chindeétáʼan xíʼún ña̱ kandíxakaún Ndióxi̱. Ndáyáʼviní ña̱ ndakundeún kutáʼún xíʼin Ndióxi̱, ta saátu xíʼin na̱ veʼún. ¿Ndáa ki̱ʼva keʼún ña̱yóʼo? Iin ña̱ chindeétáʼan xíʼún ña̱ kandíxakaún Ndióxi̱ kúú  ña̱ kaʼviún tu̱ʼunra, ta ndakanixi̱níún xa̱ʼa̱ña, ta saátu ña̱ ku̱ʼún reunión. Ná ndakanixi̱níyó xa̱ʼa̱ ña̱ kéʼé ñá Joanna. Saáchi yiváñá xíʼin ku̱ʼvi̱ñá ke̱ena ti̱xin ñuu Jehová. Ñáyóʼo káchiñá: “Va̱ʼaní kúnii̱ tá káʼvii̱ xa̱ʼa̱ ñá Abigaíl, ñá Ester, ta̱ Job, ta̱ José xíʼin ta̱ Jesús. Ña̱ ke̱ʼé na̱yóʼo va̱ʼaní chíndeétáʼanña xíʼi̱n ña̱ vií ndakanixi̱níi̱ ta va̱ása kusuchíníka-inii̱. Ta saátu yaa ña̱ kána ti̱xin JW Broadcasting va̱ʼaní chíka̱a̱ña ndee̱ xíʼi̱n”.

10. Nda̱a̱ táki̱ʼva káchi Salmo 32:6-8, ¿ndáaña kivi keʼéyó tá ndíʼi̱ní-iniyó?

¹⁰ Ka̱ʼa̱n xíʼin Jehová xa̱ʼa̱ ndiʼi ña̱ ndóʼún. Ta ndíʼi̱ní-iniún, va̱ása sandákoún ña̱ ka̱ʼún xíʼinra. Ka̱ʼa̱n xíʼinra ña̱ ná chindeétáʼanra xíʼún kotoún tu̱ndóʼo ña̱ ndóʼún nda̱a̱ táki̱ʼva xíto miíraña, ta ná taxira ña̱ ndíchi ndaʼún. Ta saátu ná na̱ʼa̱ra nu̱ún ndáa yichi̱ kúú ña̱ xíniñúʼu kakaún (kaʼvi Salmo 32:6-8). * Sana ixayo̱ʼvi̱ña xíʼún natúʼún xíʼin Jehová xa̱ʼa̱ ña̱ ndóʼún. Soo kúnda̱a̱va-inira xíʼin ña̱ ndóʼún. Ta̱yóʼo kúʼvi̱ní-inira xínira yóʼó, ta káʼa̱nra xíʼún ña̱ ná natúʼún xíʼinra xa̱ʼa̱ ndiʼi ña̱ ndóʼún (Éx. 34:6; Sal. 62:7, 8).

11. Nda̱a̱ táki̱ʼva káchi Hebreos 12:11, tá kíta iinna ti̱xin ñuu Ndióxi̱, ¿ndáaña náʼa̱ra xíʼin ña̱yóʼo? (Koto recuadro ña̱ naní “ Tá kíta iinna ti̱xin ñuu Ndióxi̱ saá náʼa̱ra ña̱ kúʼvi̱-inira xínirana”).

¹¹ Ixato̱ʼó ña̱ nda̱kaxin na̱ anciano keʼéna. Tá kíta iinna ti̱xin ñuu Jehová saá náʼa̱ra ña̱ kúʼvi̱-inira xínirana, ta kéʼéraña xa̱ʼa̱ ña̱ kúni̱ra kundaara na̱ congregación ta saátu ña̱ va̱ʼa chindeétáʼanra xíʼin na̱ ki̱ta kán (kaʼvi Hebreos 12:11). * Sava na̱ hermano kivi ka̱ʼa̱nna ña̱ su̱ví  ña̱ va̱ʼa kúú ña̱ níndaka̱xin na̱ anciano keʼéna, ta va̱ása natúʼunvína xíʼún xa̱ʼa̱ ndiʼi ña̱ va̱ása va̱ʼa ke̱ʼé na̱ ki̱ta, ta saátu va̱ása kúnda̱a̱ví-iniún xa̱ʼa̱ ndiʼi ña̱ ku̱u. Ña̱kán va̱ása kaka-iniún ña̱ viíva nda̱tiin na̱ anciano ku̱a̱chi yóʼo nda̱a̱ táki̱ʼva kúni̱ mií Jehová ta xi̱ndiku̱nna ndiʼi ña̱ káʼa̱n tu̱ʼunra (2 Crón. 19:6).

12. ¿Ndáaña va̱ʼa nda̱kiʼin iin na̱ matrimonio xa̱ʼa̱ ña̱ xi̱ndiku̱nna ña̱ káʼa̱n Jehová?

¹² Tá íxato̱ʼún ña̱ nda̱kaxin na̱ anciano keʼéna, ña̱ ta̱vána iin na̱ veʼún ti̱xin ñuu Jehová, ña̱yóʼo chindeétáʼan xíʼinna ña̱ kixáʼa tukuna ndasakáʼnunara. Ñá Elizabeth ñá ni̱ka̱ʼa̱nyó xa̱ʼa̱ nu̱ú párrafo 4 káchiñá: “I̱xayo̱ʼvi̱níña xíʼi̱n ña̱ va̱ása ka̱ʼa̱nkai̱ xíʼin ta̱ loʼo se̱ʼi̱ tá ki̱tara ti̱xin ñuu Ndióxi̱. Soo tá ndi̱kóra ni̱ka̱ʼa̱nra ña̱ va̱ʼava kúú ña̱ nda̱kaxin na̱ anciano ke̱ʼéna. Ta tá ni̱ya̱ʼa tiempo ni̱ka̱ʼa̱nra ña̱ ku̱a̱ʼání ña̱ sa̱kúaʼara. Xíʼin ña̱yóʼo sa̱kúaʼi̱ ña̱ tá kíta iinna ti̱xin ñuu Jehová, saá kúú ña̱ náʼa̱ra ña̱ kúʼvi̱-inira xínirana”. Yiíñá ta̱ Mark káchira: “Tá ni̱ya̱ʼa ku̱i̱ya̱, ta̱ loʼo se̱ʼendi̱ na̱túʼunra xíʼi̱n ña̱ iin ña̱ chi̱ndeétáʼan xíʼinra ña̱ ndi̱kóra nu̱ú Jehová kúú ña̱ xi̱nira xi̱ndiku̱nndi̱ ndiʼi ña̱ káʼa̱n Jehová. Táxiníi̱ tíxa̱ʼvi ndaʼa̱ Jehová xa̱ʼa̱ ña̱ chi̱ndeétáʼanra xíʼindi̱ ña̱ xi̱ndiku̱nndi̱ ndiʼi ña̱ káʼa̱nra”.

13. ¿Ndáaña chindeétáʼan xíʼún ña̱ va̱ása kusuchíníka-iniún?

¹³ Ka̱ʼa̱n xíʼin na̱ migoún na̱ va̱ʼaní kúnda̱a̱-ini xíʼin ña̱ ndóʼún. Tavá tiempo ña̱ kutáʼún xíʼin na̱ hermano na̱ chindeétáʼan xíʼún ña̱ va̱ása kusuchíníka-iniún (Prov. 12:25; 17:17). Ñá Joanna ñá ni̱ka̱ʼa̱nyó xa̱ʼa̱ nu̱ú párrafo 9 káchiñá: “Xi̱kuni mitúʼunníi̱, soo iin ña̱ chi̱ndeétáʼanní xíʼi̱n kúú ña̱ xi̱natúʼi̱n xíʼin migoi̱”. Soo, ¿ndáaña keʼún tá iin na̱ hermano ni̱ka̱ʼa̱nna xíʼún iin tu̱ʼun ña̱ sa̱ndákavaka-iniún?

14. ¿Nda̱chun xíniñúʼu ndakundeéyó kundeé-iniyó xíʼin ña̱ kéʼé inkana xíʼinyó ta ixakáʼnu-iniyó xa̱ʼa̱na?

¹⁴ Kúee koo iniún xíʼin na̱ hermano. Saáchi su̱ví ndiʼivína vií koo tu̱ʼun ña̱ ka̱ʼa̱nna xíʼún (Sant. 3:2). Ndiʼiyó kúúyó na̱ yiví ku̱a̱chi, ña̱kán va̱ása ndakanda̱-iniún tá ná ka̱ʼa̱nna tu̱ʼun ña̱ sáxo̱ʼvi̱ yóʼó á tá va̱ása xíni̱na ndáaña ka̱ʼa̱nna xíʼún. Ndakaʼán xa̱ʼa̱ ña̱ ni̱ka̱ʼa̱n ta̱ apóstol Pablo: “Kǒo sandákoondó ña̱ kundeé-inindó xíʼin ña̱ kéʼé inkana xíʼinndó ta xíʼin ndiʼi níma̱ndó koo káʼnu-inindó xa̱ʼa̱na, ni íyo iin ña̱ va̱ása va̱ʼa ke̱ʼéna xíʼinndó” (Col. 3:13). Iin ñá hermana nátúʼunñá ndáaña ku̱u tá ki̱ta iin na̱ veʼeñá ti̱xin ñuu Ndióxi̱, káchiñá: “Jehová chi̱ndeétáʼanra xíʼi̱n ña̱ i̱xakáʼnu-inii̱ xa̱ʼa̱ na̱ hermano na̱ xi̱kuni̱ sandíko-inii̱, soo xa̱ʼa̱ ña̱ kúúna na̱ yiví ku̱a̱chi na̱ sa̱xóʼvi̱kava kúúna yi̱ʼi̱ xíʼin ña̱ ni̱ka̱ʼa̱nna”. Vitin ná kotoyó ndáaña kivi keʼé na̱ congregación ña̱ va̱ʼa chindeétáʼanna xíʼin na̱ hermano tá kíta iin na̱ veʼena ti̱xin ñuu Ndióxi̱.

15. ¿Ndáa ki̱ʼva chindeétáʼanyó xíʼin na̱ hermano tá sa̱kán ki̱ta iin na̱ veʼena ti̱xin ñuu Ndióxi̱?

¹⁵ Viíní ná keʼéyó xíʼin na̱ hermano tá ki̱ta iin na̱ veʼena ti̱xin ñuu Ndióxi̱. Iin ñá hermana ñá naní Míriam káʼa̱nñá ña̱ ni̱yi̱ʼvíñá ku̱ʼu̱nñá reunión tá ki̱ta ki̱ʼvañá ti̱xin ñuu Ndióxi̱. Káchiñá: “Xi̱yiʼvíi̱ xa̱ʼa̱ ña̱ kivi ka̱ʼa̱nna xíʼi̱n, soo ni̱xi̱yo sava na̱ hermano na̱ xi̱kusuchí-ini xa̱ʼa̱ ña̱ ki̱ta ki̱ʼvai̱ ta va̱ása níka̱ʼa̱nna nda̱a̱ ni  iin ña̱ va̱ása va̱ʼa xa̱ʼa̱ra”. Inka ñá hermana káchiña: “Tá ki̱ta se̱ʼendi̱ ti̱xin ñuu Ndióxi̱, ki̱xi na̱ hermano ta̱ va̱ʼaní sa̱ndíkona-inindi̱. Savana va̱ása níxi̱kunda̱a̱-inina ndáaña ka̱ʼa̱nna xíʼinndi̱. Soo ni̱xi̱yotu na̱ xa̱ku xíʼi̱n. Ta inkana chi̱ndaʼána carta ndaʼíi̱. Ta ndiʼi ña̱ ke̱ʼéna va̱ʼaní chi̱ndeétáʼanña xíʼi̱n”.

16. ¿Ndáaña kivi keʼé na̱ congregación ña̱ va̱ʼa chindeétáʼanna xíʼin na̱ hermano tá ki̱ta na̱ veʼena ti̱xin ñuu Ndióxi̱?

¹⁶ Ná ndakundeéyó chindeétáʼanyó xíʼin na̱ hermano tá kíta iin na̱ veʼena ti̱xin ñuu Jehová. Saáchi tá ndóʼona ña̱yóʼo saá kúú ña̱ xi̱niñúʼuníka na̱ʼa̱yó ña̱ kúʼvi̱-iniyó xíniyóna ta chika̱a̱yó ndee̱ xíʼinna (Heb. 10:24, 25). Savana káʼa̱nna ña̱ va̱ása xíínka na̱ hermano ka̱ʼa̱nna xíʼinna, ta nda̱a̱ táki̱ʼva kéʼéna xíʼin na̱ ki̱ta ti̱xin ñuu Ndióxi̱ saá kéʼéna xíʼinna. Nda̱a̱ ni iin yichi̱ ná va̱ása keʼéyó ña̱yóʼo. Ta na̱ va̱lí kúú na̱ xíniñúʼu chika̱a̱níkayó ndee̱ xíʼin tá kíta iin na̱ veʼena ti̱xin ñuu Ndióxi̱, ta ka̱ʼa̱nyó tu̱ʼun va̱ʼa xíʼinna. Iin ñá hermana ñá naní María káʼa̱nñá ndáaña ku̱u tá ki̱ta yiíñá ti̱xin ñuu Ndióxi̱, ta sa̱ndákoora miíñá xíʼin se̱ʼeñá. Káchiñá: “Sava na̱ hermano na̱ va̱ʼaní kítáʼi̱n xíʼin, ki̱xina veʼi̱ ta ke̱ʼéna ña̱ʼa xi̱xindi̱, ta saátu chi̱ndeétáʼanna xíʼi̱n ña̱ ka̱ʼvii̱ xíʼin na̱ va̱lí se̱ʼi̱. Inkáchi ku̱suchí-inina xíʼi̱n ta xa̱kuna xíʼi̱n. Ta saátu nda̱kiʼinna tu̱ʼi̱n tá ni̱ka̱ʼa̱n sava na̱ yiví ña̱ vatá xa̱ʼíi̱. Ta ña̱yóʼo chi̱ka̱a̱níña ndee̱ xíʼi̱n” (Rom. 12:13, 15).

17. ¿Ndáaña kivi keʼé na̱ anciano ña̱ va̱ʼa sandíkona-ini na̱ xóʼvi̱?

¹⁷ Ndóʼó na̱ anciano, chika̱a̱ndó ndee̱ xíʼin na̱ hermano yóʼo. Ndóʼó kúúmiíndó chiñu ña̱ sandíkondó-ini na̱ hermano tá ki̱ta iin na̱ veʼena ti̱xin ñuu Ndióxi̱ (1 Tes. 5:14). Siʼna miíndó kuyatin nu̱úna ta chika̱a̱ndó ndee̱ xíʼinna tá sa̱kán kíxáʼa reunión á tá xa̱a̱ ndíʼiña. Ku̱ʼu̱nndó kotondóna veʼena ta ka̱ʼa̱nndó xa̱ʼa̱na xíʼin Ndióxi̱. Ta saátu keendó natúʼunndó xa̱ʼa̱ Ndióxi̱ xíʼinna á kivitu kanandóna tá káʼvindó xíʼin na̱ veʼendó. Xíniñúʼu kundaandó na̱ hermano na̱ ndíʼi̱-ini, kuʼvi̱-inindó kunindóna ta saátu kundáʼvi-inindó kunindóna (1 Tes. 2:7, 8).

18. Nda̱a̱ táki̱ʼva káchi 2 Pedro 3:9, ¿ndáaña kúni̱ Jehová ná keʼé na̱ ke̱e ti̱xin ñuura?

¹⁸ Jehová va̱ása “kúni̱ra ña̱ ná ndiʼi-xa̱ʼa̱ nda̱a̱ ni iinna saáchi ña̱ kúni̱ra kúúña ná ndikó-inina”  (kaʼvi 2 Pedro 3:9). * Ni ke̱ʼé iin na̱ hermano ña̱ va̱ása va̱ʼa soo ndáyáʼvinívana nu̱úra, saáchi Jehová ta̱xira se̱ʼera ña̱ ni̱xi̱ʼi̱ra xa̱ʼa̱ iin tá iinyó. Xa̱ʼa̱ ña̱ kúʼvi̱ní-ini Ndióxi̱ xínira na̱ ki̱ta ti̱xin ñuura, ndúkúra ki̱ʼva ña̱ va̱ʼa ndikóna nu̱úra ta kúni̱ra ña̱ ná chika̱a̱-inina ña̱ ndikóna nu̱úra nda̱a̱ táki̱ʼva ke̱ʼé ta̱ loʼo ta̱ nda̱ñúʼu, ta̱ na̱túʼun ta̱ Jesús xa̱ʼa̱ (Luc. 15:11-32). Ku̱a̱ʼání na̱ ke̱e ti̱xin ñuu Ndióxi̱ nda̱ndikóna nu̱úra, ta viíní nda̱kiʼin na̱ congregación na̱yóʼo. Ñá Elizabeth ñá xa̱a̱ ni̱ka̱ʼa̱nyó xa̱ʼa̱, ku̱si̱íní-iniñá tá nda̱ndikó se̱ʼeñá. Ñáyóʼo káchiña: “Táxiníi̱ tíxa̱ʼvi ndaʼa̱ na̱ hermano na̱ ni̱ka̱ʼa̱nní xíʼi̱n ña̱ ná va̱ása ndakava-inii̱ chi ndandikóva se̱ʼi̱”.

19. ¿Nda̱chun kivi ndakundeéyó kandíxayó Jehová?

¹⁹ Ndiʼi tiempo kivi kandíxayó Jehová. Ta̱yóʼo va̱ása ka̱ʼa̱nra xíʼinyó keʼéyó iin ña̱ʼa ña̱ kivi saxóʼvi̱ miíyó. Va̱ʼaní-inira xíʼinyó ta kúndáʼviní-inira xínira miíyó, ta saátu kúʼvi̱ní-inira xínira na̱ kúʼvi̱-ini xíniñaʼá ta ndásakáʼnunara. Ta ná kandíxayó ña̱ va̱ása sandákoondaʼa̱ Jehová miíyó tá yáʼayó nu̱ú tu̱ndóʼo (Heb. 13:5, 6). Ta̱ Mark, ta̱ ni̱ka̱ʼa̱nyó xa̱ʼa̱ nu̱ú párrafo 12 káchira: “Va̱ása sándakoondaʼa̱ Jehová ndi̱ʼi̱, ndiʼi tiempo íyora xíʼinndi̱ tá yáʼandi̱ nu̱ú tu̱ndóʼo”. Ndióxi̱ ndakundeéra taxira ndee̱ ndaʼa̱yó (2 Cor. 4:7). Ña̱kán, kiviva ndakundeéyó kandíxayó Ndióxi̱ ni ná kita iin na̱ veʼeyó ti̱xin ñuura, ta saátu kandíxayó ña̱ ndikóvana nu̱úra.