ARTÍCULO ÑA̱ KAʼVIYÓ 39
¿Á ni̱ka̱ʼyi̱ ki̱vi̱ún nu̱ú libro nu̱ú va̱xi ki̱vi̱ na̱ kutaku?
“Ni̱ka̱ʼa̱nra ña̱ ná ka̱ʼyi̱ iin libro nu̱ú ndakaʼánra xa̱ʼa̱ na̱ íxato̱ʼó-ñaʼá xíʼin na̱ ndákanixi̱ní xa̱ʼa̱ ki̱vi̱ra” (MAL. 3:16).
YAA 61 Chika̱a̱ndó ndée natúʼunndó
ÑA̱ KA̱ʼA̱NYÓ XA̱ʼA̱ *
Xa̱a̱ íyo tiempo, Jehová káʼyíra ki̱vi̱ na̱ yiví nu̱ú libro nu̱ú va̱xi ki̱vi̱ na̱ kutaku. (Koto párrafo 1 xíʼin 2).
1. Nda̱a̱ táki̱ʼva káchi Malaquías 3:16, ¿ndáa libro kúú ña̱ káʼyí Jehová ta ndáaña va̱xi nu̱úñá?
XA̱A̱ íyo ku̱a̱ʼání tiempo Jehová káʼyíra ki̱vi̱ na̱ yiví nu̱ú iin libro ña̱ ndáyáʼviní. Ta ta̱ siʼna va̱xi ki̱vi̱ nu̱ú libro yóʼo kúú ta̱ Abel, ta̱ nda̱kúní ni̱xi̱yo ini xíʼin Ndióxi̱ (Luc. 11:50, 51). * Ta xa̱a̱ íyo tiempo, Jehová káʼyíra ki̱vi̱ na̱ yiví nu̱ú libro yóʼo ta xa̱a̱ ku̱a̱ʼánína va̱xi ki̱vi̱ nu̱úña. Nu̱ú tu̱ʼun Ndióxi̱, ña̱ libro yóʼo naníña: “libro nu̱ú ndakaʼánra xa̱ʼa̱ na̱ íxato̱ʼó-ñaʼá”, “libro nu̱ú va̱xi ki̱vi̱ na̱ kutaku”. Nu̱ú artículo yóʼo kunaníña “libro nu̱ú va̱xi ki̱vi̱ na̱ kutaku” (kaʼvi Malaquías 3:16; * Apoc. 3:5; 17:8).
2. ¿Ndáana va̱xi ki̱vi̱ nu̱ú libro nu̱ú va̱xi ki̱vi̱ na̱ kutaku, ta ndáaña kivi keʼéyó ña̱ va̱ʼa ka̱ʼyi̱ ki̱vi̱yó nu̱ú libro yóʼo?
2 Nu̱ú libro ña̱ ndáyáʼviní yóʼo va̱xi ki̱vi̱ ndiʼi na̱ ndásakáʼnu Jehová, na̱ íxato̱ʼó-ñaʼá xíʼin na̱ kúʼvi̱-ini xíni ki̱vi̱ra. Na̱yóʼo ndátuna ndakiʼinna ña̱ kutakuna ndiʼi tiempo, kúúna na̱ ku̱ʼu̱n chí ndiví á na̱ kundoo nu̱ú ñuʼú yóʼo. Kivi kixi ki̱vi̱yó nu̱ú libro yóʼo tá chíka̱a̱níyó ndee̱ ña̱ viíní kutáʼanyó xíʼin Jehová, ta kivi xa̱a̱yó kutáʼanyó xíʼinra xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó (Juan 3:16, 36). ¿Á su̱ví ndiʼiyó kúni̱ ña̱ ná kixi ki̱vi̱yó nu̱ú libro yóʼo?
3, 4. a) Tá va̱xi ki̱vi̱yó nu̱ú libro yóʼo, ¿á ña̱yóʼo kúni̱ kachiña ña̱ xa̱a̱ kutakuyó ndiʼi tiempo? b)¿Ndáaña sakúaʼayó nu̱ú ña̱ artículo yóʼo xíʼin nu̱ú ña̱ inka?
3 Tá ná ka̱ʼyi̱ ki̱vi̱yó nu̱ú libro yóʼo, ¿á ña̱yóʼo kúni̱ kachiña ña̱ kutakuyó ndiʼi tiempo? Nu̱ú Éxodo 32:33 va̱xi ña̱ káʼa̱n xa̱ʼa̱ ña̱yóʼo, nu̱ú ni̱ka̱ʼa̱n Jehová xíʼin ta̱ Moisés tá ka̱chira: “Na̱ ni̱ki̱ʼvi ku̱a̱chi nu̱úi̱ kúú na̱ ndakatai̱ ki̱vi̱ nu̱ú libro”. Ña̱yóʼo kúni̱ kachiña, na̱ ni̱ka̱ʼyi̱ ki̱vi̱ nu̱ú libro yóʼo kiviva ndoo ki̱vi̱na. Saáchi tiempo vitin, Jehová nda̱a̱ táki̱ʼva íyo ta̱ káʼyí ki̱vi̱yó xíʼin iin lápiz nu̱ú libro yóʼo saá íyora (Apoc. 3:5). Ta ña̱ va̱ása ndakatara ki̱vi̱yó, xíniñúʼu chika̱a̱níyó ndee̱ ña̱ keʼéyó nda̱a̱ táki̱ʼva kúni̱ra tasaá kaʼyí va̱ʼara ki̱vi̱yó ta va̱ása ndookaña.
4 Sana kivi ndakanixi̱níyó xa̱ʼa̱ pregunta yóʼo: ¿ndáaña káʼa̱n Biblia xa̱ʼa̱ na̱ ni̱ka̱ʼyi̱ ki̱vi̱ nu̱ú libro nu̱ú va̱xi ki̱vi̱ na̱ kutaku xíʼin na̱ ta̱ʼán ka̱ʼyi̱ ki̱vi̱ nu̱ú ña̱yóʼo? Na̱ ni̱ka̱ʼyi̱ ki̱vi̱ nu̱ú libro yóʼo, ¿ama ndakiʼinna ña̱ kutakuna ndiʼi tiempo? Ta na̱ va̱ása nísakúaʼa xa̱ʼa̱ Jehová tá ni̱xi̱ʼi̱na, ¿á íyo iin ña̱ va̱ʼa ndakiʼinna? ¿Á kivi kixi ki̱vi̱na nu̱ú libro nu̱ú va̱xi ki̱vi̱ na̱ kutaku? Nu̱ú ña̱ artículo yóʼo xíʼin nu̱ú ña̱ inka sakúaʼayó xa̱ʼa̱ ña̱yóʼo.
¿NDÁANA VA̱XI KI̱VI̱ NU̱Ú LIBRO YÓʼO?
5, 6. a) Nda̱a̱ táki̱ʼva káchi Filipenses 4:3, ¿ndáana va̱xi ki̱vi̱ nu̱ú libro nu̱ú va̱xi ki̱vi̱ na̱ kutaku? b) ¿Ama kúú ña̱ va̱ása ndoo ki̱vi̱na?
5 ¿Ndáana va̱xi ki̱vi̱ nu̱ú libro yóʼo? Ña̱ va̱ʼa kunda̱a̱-iniyó xa̱ʼa̱ ña̱yóʼo, ná ka̱ʼa̱nyó xa̱ʼa̱ u̱ʼu̱n grupo na̱ yiví chi sava na̱yóʼo xa̱a̱ ni̱ka̱ʼyi̱ ki̱vi̱na nu̱ú libro yóʼo ta savana va̱ása.
6 Na̱ nu̱ú grupo kúú na̱ nda̱kaxin Ndióxi̱ ku̱ʼu̱n chí ndiví ña̱ kaʼndachíñu xíʼin ta̱ Jesús. ¿Á xa̱a̱ ni̱ka̱ʼyi̱ ki̱vi̱ na̱yóʼo nu̱ú libro nu̱ú va̱xi ki̱vi̱ na̱ kutaku? Xa̱a̱ ni̱ka̱ʼyi̱vaña chi saá ni̱ka̱ʼa̱n ta̱ apóstol Pablo xíʼin na̱ hermano na̱ ñuu Filipos, na̱ xi̱chindeétáʼan xíʼinra. Ni̱ka̱ʼa̱nra ña̱ na̱ nda̱kaxin Ndióxi̱ ku̱ʼu̱n chí ndiví, na̱ kaʼndachíñu xíʼin ta̱ Jesucristo xa̱ʼa̱ ni̱ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku (kaʼvi Filipenses 4:3). Ña̱ va̱ása ndoo ki̱vi̱na nu̱ú libro yóʼo xíniñúʼu ndakundeéna nda̱kú koo inina xíʼin Ndióxi̱. Tá ná ndakiʼinna sello ña̱ so̱ndíʼi, saá kúú ña̱ va̱ása ndoo ki̱vi̱na nu̱ú libro nu̱ú va̱xi ki̱vi̱ na̱ kutaku ndiʼi tiempo. Ña̱yóʼo ndakiʼinnaña tá kúma̱níka kuvina á tá kúma̱níka kixáʼa ña̱ gran tribulación (Apoc. 7:3).
7. ¿Ndáa ki̱ʼva chíndeétáʼan Apocalipsis 7:16, 17 xíʼinyó ña̱ kunda̱a̱-iniyó ama kúú ña̱ ka̱ʼyi̱ va̱ʼa ki̱vi̱ na̱ kundoo nu̱ú ñuʼú yóʼo nu̱ú libro?
7 Na̱ inka grupo kúú ku̱a̱ʼání na̱ yiví na̱ ndátu koo nu̱ú ñuʼú yóʼo. ¿Á xa̱a̱ ni̱ka̱ʼyi̱ ki̱vi̱ na̱yóʼo nu̱ú libro nu̱ú va̱xi ki̱vi̱ na̱ kutaku? Xa̱ʼa̱ ni̱ka̱ʼyi̱vaña. ¿Á kixika ki̱vi̱na nu̱ú libro yóʼo tá ná ka̱kuna ti̱xin ña̱ Armagedón? Kixivaña (Apoc. 7:14). Ta̱ Jesús ni̱ka̱ʼa̱nra ña̱ na̱ yiví yóʼo nda̱a̱ táki̱ʼva íyo ndikachi saá íyona, ta na̱yóʼo “kutakuna ndiʼi tiempo” (Mat. 25:46). Ta na̱ ka̱ku ti̱xin ña̱ Armagedón tá ná ndiʼiña, su̱ví xa̱a̱ ndi̱ku̱n kama ndakiʼinna ña̱ kutakuna ndiʼi tiempo. Nda̱a̱ táki̱ʼva íyo na̱ ka̱ʼyi̱ ki̱vi̱ xíʼin lápiz saá koona. Ta ti̱xin ña̱ mil ku̱i̱ya̱, ta̱ Jesús kundaarana ta kuniʼira yichi̱ nu̱úna “ña̱ ku̱ʼu̱nna nu̱ú kána ku̱a̱ʼání ti̱kui̱í tá táxi ña̱ kutakuna”. Tá ná kundiku̱nna ña̱ káʼa̱n ta̱ Jesús saá kúú ña̱ kaʼyí va̱ʼa Jehová ki̱vi̱na nu̱ú libro nu̱ú va̱xi ki̱vi̱ na̱ kutaku ndiʼi tiempo (kaʼvi Apocalipsis 7:16, 17).
8. ¿Ndáana va̱ása va̱xi ki̱vi̱ nu̱ú libro nu̱ú va̱xi ki̱vi̱ na̱ kutaku, ta ndáaña kundoʼona?
8 Na̱ grupo u̱ni̱ íyona nda̱a̱ táki̱ʼva íyo ti̱xúʼu, ta na̱yóʼo kúú na̱ ndiʼi-xa̱ʼa̱ ti̱xin ña̱ Armagedón. Saáchi kǒo ki̱vi̱na va̱xi nu̱ú libro nu̱ú va̱xi ki̱vi̱ na̱ kutaku. Ta Jesús ni̱ka̱ʼa̱nra ña̱ “ndiʼi-xa̱ʼa̱ va̱ʼana” (Mat. 25:46). Ta ta̱ apóstol Pablo ni̱ka̱ʼa̱nra xa̱ʼa̱ ta̱ Jesús, ña̱ taxira castigo ndaʼa̱na ta sandíʼi-xa̱ʼa̱ra (2 Tes. 1:9; 2 Ped. 2:9). Saátu na̱ yiví na̱ káʼa̱n-ndi̱va̱ʼa xa̱ʼa̱ espíritu santo Ndióxi̱, va̱ása kutakuna ndiʼi tiempo chi na̱ ndiʼi-xa̱ʼa̱ koona. Xíʼin ña̱yóʼo kúnda̱a̱ káxi-iniyó ña̱ va̱ása ndatakuna (Mat. 12:32; Mar. 3:28, 29; Heb. 6:4-6). Vitin ná ka̱ʼa̱nyó xa̱ʼa̱ u̱vi̱ grupo na̱ yiví na̱ ndataku nu̱ú ñuʼú yóʼo.
NA̱ NDATAKU
9. ¿Ndáa u̱vi̱ grupo na̱ yiví kúú na̱ ndataku nu̱ú ñuʼú yóʼo, ta nda̱chun síín íyo iin iin na̱yóʼo? (Hechos 24:15).
9 Tu̱ʼun Ndióxi̱ káʼa̱nña xa̱ʼa̱ u̱vi̱ grupo na̱ yiví na̱ ndataku ta kivi ni̱ʼína ña̱ kutakuna ndiʼi saá tiempo nu̱ú ñuʼú yóʼo: “na̱ ke̱ʼé ña̱ va̱ʼa” xíʼin “na̱ ke̱ʼé ña̱ va̱ása va̱ʼa” (kaʼvi Hechos 24:15). “Na̱ ke̱ʼé ña̱ va̱ʼa” kúú na̱ nda̱kúní ni̱xi̱yo ini xíʼin Jehová nda̱a̱ tá ni̱xi̱ʼi̱na. Ta̱ “na̱ ke̱ʼé ña̱ va̱ása va̱ʼa” kúú na̱ va̱ása níxa̱a̱ ndasakáʼnu Jehová. Saáchi ke̱ʼéna ku̱a̱ʼání ña̱ʼa ña̱ va̱ása níxi̱kutóo Jehová. Xa̱ʼa̱ ña̱ ndataku u̱vi̱ saá grupo yóʼo, ¿á kúni̱ kachi ña̱yóʼo ña̱ va̱xi ki̱vi̱na nu̱ú libro nu̱ú va̱xi ki̱vi̱ na̱ kutaku? Ña̱ va̱ʼa ndakuiinyó pregunta yóʼo, ná kunda̱a̱ va̱ʼaka iniyó xa̱ʼa̱ u̱vi̱ saá grupo na̱ yiví yóʼo.
10. ¿Nda̱chun ndataku “na̱ ke̱ʼé ña̱ va̱ʼa”, ta ndáa chiñu kuumií sava na̱yóʼo? (Koto artículo ña̱ va̱xi nu̱ú tutu yóʼo ña̱ naní “Pregunta ña̱ kéʼé na̱ káʼvi tutu yóʼo” ña̱ káʼa̱n xa̱ʼa̱ na̱ ndataku nu̱ú ñuʼú yóʼo).
10 Na̱ grupo ku̱mí kúú “na̱ ke̱ʼé ña̱ va̱ʼa”. Tá kúma̱níka kuvina xa̱a̱ ni̱ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku. ¿Á ndo̱o ki̱vi̱na nu̱ú libro tá ni̱xi̱ʼi̱na? Va̱ása, saáchi nu̱ú Jehová tákukavana. “Ta̱yóʼo su̱ví Ndióxi̱ na̱ ni̱xi̱ʼi̱ kúúra, chi Ndióxi̱ na̱ táku kúúra, saáchi nu̱ú ta̱yóʼo ndiʼi na̱kán na̱ táku kúúna nu̱úra” (Luc. 20:38). Ña̱yóʼo kúni̱ kachiña ña̱ tá ná ndataku na̱ ke̱ʼé ña̱ va̱ʼa nu̱ú ñuʼú yóʼo, kixiva ki̱vi̱na nu̱ú libro nu̱ú va̱xi ki̱vi̱ na̱ kutaku. Soo ki̱vi̱ na̱yóʼo nda̱a̱ táki̱ʼva koo ña̱ ka̱ʼyi̱ xíʼin lápiz saá kooña (Luc. 14:14). Sava na̱ ndataku nu̱ú ñuʼú yóʼo, Ndióxi̱ taxira chiñu ña̱ ndáyáʼviní ndaʼa̱na ña̱ koona príncipe (Sal. 45:16).
11. ¿Ndáaña sakúaʼa na̱ keʼé ña̱ va̱ása va̱ʼa ña̱ ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku?
11 Vitin ná ka̱ʼa̱nyó xa̱ʼa̱ grupo so̱ndíʼi: “na̱ ke̱ʼé ña̱ va̱ása va̱ʼa”. Na̱yóʼo sana va̱ása níxi̱xini̱na ña̱ xi̱ka̱ʼa̱n ley Jehová ta kǒo ña̱ va̱ʼa níxi̱keʼéna tá xi̱takuna. Ña̱kán, va̱ása va̱xi ki̱vi̱ na̱yóʼo nu̱ú libro nu̱ú va̱xi ki̱vi̱ na̱ kutaku. Soo tá ná sandátaku Jehová na̱yóʼo, taxira ña̱ ná sakúaʼana xa̱ʼa̱ra ta tá ná ya̱ʼa tiempo saá kúú ña̱ ka̱ʼyi̱ ki̱vi̱na nu̱ú libro yóʼo. Ña̱kán xíniñúʼu chindeétáʼanníyó xíʼin na̱yóʼo ti̱xin ñuyǐví xa̱á. Tá kúma̱ní kuvina, sava na̱yóʼo ku̱a̱ʼání ña̱ va̱ása va̱ʼa xi̱keʼéna. Ña̱kán kúú ña̱ xíniñúʼu sakúaʼana xa̱ʼa̱ Jehová ta keʼéna ña̱ kúni̱ra. Ña̱ va̱ʼa chindeétáʼanyó xíʼin ndiʼi na̱ yiví yóʼo, ta̱ Jesús ta̱ kúú rey ti̱xin Reino Ndióxi̱ kúú ta̱ kuniʼi yichi̱ nu̱úyó ña̱ va̱ʼa sanáʼa̱yó ndiʼi na̱yóʼo.
12. a) ¿Ndáana sanáʼa̱ na̱ ke̱ʼé ña̱ va̱ása va̱ʼa? b) ¿Ndáaña kundoʼo iinna tá va̱ása ná keʼéna ña̱ sakúaʼana?
12 Na̱ ke̱ʼé ña̱ va̱ʼa na̱ ndataku ti̱xin ñuyǐví xa̱á xíʼin na̱ ka̱ku ti̱xin ña̱ Armagedón, na̱yóʼo kúú na̱ chindeétáʼan xíʼin na̱ ke̱ʼé ña̱ va̱ása va̱ʼa ña̱ xa̱a̱na sakúaʼana xa̱ʼa̱ Ndióxi̱. ¿Ndáaña xíniñúʼu keʼé na̱ ke̱ʼé ña̱ va̱ása va̱ʼa tá kúni̱na ka̱ʼyi̱ ki̱vi̱na nu̱ú libro nu̱ú va̱xi ki̱vi̱ na̱ kutaku? Xíniñúʼu xa̱a̱na kutáʼan viína xíʼin Jehová ta iinlá ta̱yóʼo kachíñuna nu̱ú. Tá xa̱a̱ ná kaʼndachíñu ta̱ Jesús ta saátu na̱ ku̱ʼu̱n chí ndiví, viíní kiʼinna kuenta á xa̱a̱ chíka̱a̱ na̱yóʼo ndee̱ ña̱ sákuaʼana xa̱ʼa̱ Jehová (Apoc. 20:4). Tá iinna va̱ása xíínna keʼéna ña̱yóʼo, na̱ ndiʼi-xa̱ʼa̱ koona ni kúúmiína 100 ku̱i̱ya̱ (Is. 65:20). Jehová xíʼin ta̱ Jesús kotora ña̱ ndíka̱a̱ níma̱na ta va̱ása taxira keʼéna nda̱a̱ ni iin ña̱ va̱ása va̱ʼa nu̱ú ñuyǐví xa̱á (Is. 11:9; 60:18; 65:25; Juan 2:25).
NA̱ KE̱ʼÉ ÑA̱ VA̱ʼA NDATAKUNA TA SAÁTU NA̱ KE̱ʼÉ ÑA̱ VA̱ÁSA VA̱ʼA
13, 14. a) ¿Ndáa ki̱ʼva xi̱kunda̱a̱-iniyó xíʼin ña̱ ni̱ka̱ʼa̱n ta̱ Jesús nu̱ú Juan 5:29? b) ¿Ndáaña xíniñúʼu kiʼinyó kuenta xíʼin tá káʼviyó ña̱yóʼo?
13 Ta̱ Jesús ni̱ka̱ʼa̱ntura xa̱ʼa̱ na̱ ndataku nu̱ú ñuʼú yóʼo. Ta̱yóʼo ka̱chira: “Va̱xi hora ta ndiʼi na̱ ni̱xi̱ʼi̱ na̱ ñúʼu ti̱xin ya̱vi̱ kuniso̱ʼona tu̱ʼunra ta keena: na̱ ke̱ʼé ña̱ va̱ʼa ndatakuna, ta na̱ ke̱ʼé ña̱ va̱ása va̱ʼa ndatakuna ta ndatiinna ku̱a̱chi xíʼinna” (Juan 5:28, 29). ¿Ndáaña xi̱kuni̱ kachi ta̱ Jesús xíʼin ña̱yóʼo?
14 Tá ya̱chi̱ síínva xi̱ndakanixi̱níyó xa̱ʼa̱ ña̱yóʼo, saáchi xi̱ndakanixi̱níyó ña̱ na̱ yiví na̱ ndataku nu̱ú ñuyǐví xa̱á, savana keʼéna ña̱ va̱ʼa ta savana keʼéna ña̱ va̱ása va̱ʼa. Soo su̱ví ña̱yóʼo kúú ña̱ ni̱ka̱ʼa̱n ta̱ Jesús, chi ña̱ ni̱ka̱ʼa̱nra xa̱ʼa̱ kúú ña̱ʼa ña̱ ke̱ʼéna tá ya̱chi̱ tá kúma̱níka kuvina, ka̱chira “na̱ ke̱ʼé ña̱ va̱ʼa ndatakuna, ta na̱ ke̱ʼé ña̱ va̱ása va̱ʼa ndatakuna”. Ña̱kán, ña̱ʼa ña̱ ke̱ʼéna tá kúma̱ní kuvivana kúú ña̱ ni̱ka̱ʼa̱nra xa̱ʼa̱. Saáchi nu̱ú ñuyǐví xa̱á va̱ása taxiví Ndióxi̱ ña̱ keʼéna ña̱ va̱ása va̱ʼa. Ña̱kán, ¿ndáaña xi̱kuni̱ kachi ta̱ Jesús tá ni̱ka̱ʼa̱nra “na̱ ke̱ʼé ña̱ va̱ʼa ndatakuna, ta na̱ ke̱ʼé ña̱ va̱ása va̱ʼa ndatakuna ta ndatiinna ku̱a̱chi xíʼinna”?
15. ¿Nda̱chun kixi ki̱vi̱ savana nu̱ú libro nu̱ú va̱xi ki̱vi̱ na̱ kutaku?
15 Na̱ ke̱ʼé ña̱ va̱ʼa tá kúma̱níka kuvina, ndatakuna ta kixi ki̱vi̱na nu̱ú libro nu̱ú va̱xi ki̱vi̱ na̱ kutaku. Ña̱kán, “na̱ ke̱ʼé ña̱ va̱ʼa” na̱ káʼa̱n Juan 5:29 xa̱ʼa̱, iin kúúna xíʼin na̱ káʼa̱n Hechos 24:15 xa̱ʼa̱. Saáchi Romanos 6:7 káchiña: “Na̱ xa̱a̱ ni̱xi̱ʼi̱ xa̱a̱ ndo̱ova ku̱a̱china”. Ña̱kán tá iin na̱ ke̱ʼé ña̱ va̱ʼa ni̱xi̱ʼi̱na, xa̱a̱ ndo̱ova ku̱a̱china nu̱ú Jehová. Soo va̱ása nandósó-inira xa̱ʼa̱ ndiʼi chiñu ña̱ va̱ʼa ña̱ ke̱ʼéna nu̱úra (Heb. 6:10). Soo ni saá, xíniñúʼu ndakundeéna nda̱kú koo inina xíʼin Ndióxi̱ ña̱ va̱ása ndoo ki̱vi̱na nu̱ú libro nu̱ú va̱xi ki̱vi̱ na̱ kutaku.
16. ¿Ndáaña kúni̱ kachi ña̱ “ndatakuna ta ndatiinna ku̱a̱chi xíʼinna”?
16 ¿Ndáaña kundoʼo na̱ ke̱ʼé ña̱ va̱ása va̱ʼa? Ni ndo̱ova ku̱a̱china tá níxi̱ʼi̱na, soo na̱yóʼo va̱ása níndasakáʼnuna Jehová ta kǒo ki̱vi̱na nu̱ú libro nu̱ú va̱xi ki̱vi̱ na̱ kutaku. Ña̱kán, na̱ ke̱ʼé ña̱ va̱ása va̱ʼa, na̱ ndataku yóʼo, iin kúúna xíʼin na̱ ke̱ʼé ña̱ va̱ása va̱ʼa na̱ káʼa̱n Hechos 24:15 xa̱ʼa̱. Ta tá ná ndatakuna, ndatiinna ku̱a̱chi xíʼinna. * Ta̱ Jesús kotora ndáa ki̱ʼva íyo ña̱ kéʼéna ti̱xin ñuyǐví xa̱á (Luc. 22:30). Ta saáví ndaka̱xinra á ka̱ʼyi̱ ki̱vi̱ na̱yóʼo nu̱ú libro nu̱ú va̱xi ki̱vi̱ na̱ kutaku. Chi ña̱ va̱ʼa ka̱ʼyi̱ ki̱vi̱na nu̱ú libro yóʼo, xíniñúʼu sandákoona ña̱ va̱ása va̱ʼa xi̱keʼéna ta kachíñuna nu̱ú Jehová.
17, 18. ¿Ndáaña xíniñúʼu keʼé na̱ ndataku nu̱ú ñuyǐví xa̱á? Apocalipsis 20:12, 13 káʼa̱nña ña̱ ndatiinna ku̱a̱chi xíʼinna xa̱ʼa̱ ña̱ keʼéna, ¿ama ke̱ʼéna ku̱a̱chi yóʼo?
17 Ni ke̱ʼéna ña̱ va̱ʼa á ni ke̱ʼéna ña̱ va̱ása va̱ʼa, na̱ ndataku yóʼo xíniñúʼu kundiku̱nna ley ña̱ va̱xi nu̱ú rollo xa̱á, ña̱ ndanu̱ná ti̱xin ña̱ 1,000 ku̱i̱ya̱. Ta̱ apóstol Juan ni̱ka̱ʼa̱nra xa̱ʼa̱ visión ña̱ xi̱nira yóʼo, ka̱chira: “Xi̱nii̱ na̱ ni̱xi̱ʼi̱, na̱ náʼnu xíʼin na̱ va̱lí ña̱ ndítana nu̱ú trono ta ni̱nu̱ná rollo. Soo ni̱nu̱ná inka rollo: ña̱yóʼo kúú rollo nu̱ú va̱xi ki̱vi̱ na̱ kutaku. Ta nda̱a̱ táki̱ʼva íyo ña̱ ni̱ka̱ʼyi̱ nu̱ú rollo, saá ni̱xi̱yo ña̱ nda̱tiinna ku̱a̱chi xíʼin ndiʼi na̱ ni̱xi̱ʼi̱ xa̱ʼa̱ ña̱ ke̱ʼéna” (Apoc. 20:12, 13).
18 ¿Ndáa xa̱ʼa̱ kúú ña̱ ndatiinna ku̱a̱chi xíʼinna? ¿Á xa̱ʼa̱ ña̱ ke̱ʼéna tá kúma̱ní kuvina kúúña? Va̱ása. Ná ndakaʼányó chi xa̱a̱ ndo̱ova ku̱a̱china tá ni̱xi̱ʼi̱na. Ña̱kán, su̱ví xa̱ʼa̱ ña̱ ke̱ʼéna tá kúma̱ní kuvina kúú ña̱ ndatiinna ku̱a̱chi xíʼinna. Chi ña̱ kiʼin Jehová kuenta xíʼin kúú ña̱ ndáa ki̱ʼva kundiku̱nna ña̱ sakúaʼana nu̱ú ñuyǐví xa̱á. Ta nda̱a̱ na̱ nda̱kúní ni̱xi̱yo ini xíʼin Ndióxi̱ tiempo xi̱naʼá xíniñúʼu kundiku̱nna ña̱ sakúaʼana. Tá kúú, ta̱ Noé, ta̱ Samuel, ta̱ David xíʼin ta̱ Daniel, na̱yóʼo xa̱a̱na sakúaʼana xa̱ʼa̱ ta̱ Jesucristo ta xíniñúʼu na̱ʼa̱na ña̱ kándíxana ña̱ ni̱xi̱ʼi̱ra xa̱ʼa̱yó. Tá nda̱a̱ na̱yóʼo xíniñúʼu sakúaʼaníka, kachikaví na̱ ke̱ʼé ña̱ va̱ása va̱ʼa.
19. ¿Ndáaña kundoʼo na̱ va̱ása kandíxa sakúaʼa?
19 ¿Ndáaña kundoʼo na̱ va̱ása kandíxa sakúaʼa? Apocalipsis 20:15 káchiña: “Na̱ kǒo ki̱vi̱ va̱xi nu̱ú libro nu̱ú va̱xi ki̱vi̱ na̱ kutaku, sa̱kánana na̱yóʼo nu̱ú xíxi̱ ñuʼu̱”. Ña̱yóʼo kúni̱ kachiña ña̱ na̱ ndiʼi-xa̱ʼa̱va kúúna. Ña̱kán xíniñúʼu chika̱a̱níyó ndee̱ ña̱ va̱ʼa kixi ki̱vi̱yó nu̱ú va̱xi ki̱vi̱ na̱ kutaku.
Iin ta̱ hermano nátúʼunra xa̱ʼa̱ Ndióxi̱ xíʼin na̱ yiví ti̱xin ña̱ mil ku̱i̱ya̱ (Koto párrafo 20).
20. ¿Ndáa chiñu kúú ña̱ keʼéyó ti̱xin ña̱ mil ku̱i̱ya̱? (Koto na̱ʼná ña̱ va̱xi chí sa̱tá tutu yóʼo).
20 Ti̱xin ña̱ mil ku̱i̱ya̱ liviní koo ta ku̱a̱ʼáníka koo na̱ yiví na̱ sanáʼa̱yó, káʼnuníka koo chiñu yóʼo nu̱úka ña̱ kéʼéyó tiempo vitin. Ta tiempo saátu kúú ña̱ ndatiin ta̱ Jesús ku̱a̱chi xíʼin na̱ ke̱ʼé ña̱ va̱ʼa ta saátu na̱ ke̱ʼé ña̱ va̱ása va̱ʼa (Is. 26:9; Hech. 17:31). ¿Ndáa ki̱ʼva sanáʼa̱yó ndiʼi na̱ yiví kán? Nu̱ú inka artículo sakúaʼayó xa̱ʼa̱ ña̱yóʼo, ta sakúaʼatuyó ndáaña chindeétáʼan xíʼinyó ña̱ chindayáʼviyó chiñu yóʼo.
YAA 147 Ndióxi̱ taxira kundooyó ndiʼi tiempo
^ Nu̱ú artículo yóʼo sakúaʼayó ndáaña xi̱kuni̱ kachi ta̱ Jesús tá ni̱ka̱ʼa̱nra ña̱ va̱xi nu̱ú Juan 5:28, 29 ña̱ “na̱ ke̱ʼé ña̱ va̱ʼa ndatakuna” ta “na̱ ke̱ʼé ña̱ va̱ása va̱ʼa ndatakuna ta ndatiinna ku̱a̱chi xíʼinna”. Sakúaʼayó ndáa ki̱ʼva koo ña̱yóʼo ta ndáa na̱ yiví kúú na̱ ndataku.
^ Nda̱a̱ “tá ki̱xáʼa xa̱ʼa̱ ñuyǐví”, tiempo saáví ki̱xáʼa Ndióxi̱ káʼyíra ki̱vi̱ na̱ ndakiʼin ña̱ kutakuna xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó (Mat. 25:34; Apoc. 17:8). Ña̱kán, sana ki̱vi̱ ta̱ Abel ta̱ nda̱kúní ni̱xi̱yo ini xíʼin Ndióxi̱ kúú ña̱ siʼna va̱xi nu̱ú ña̱ libro yóʼo.
^ Malaquías 3:16: “Tiempo kán na̱ xi̱ ixato̱ʼó Jehová ni̱ka̱ʼa̱nna xíʼin táʼanna ta xi̱niso̱ʼova Jehová ña̱ ni̱ka̱ʼa̱nna. Ta ni̱ka̱ʼa̱nra ña̱ ná ka̱ʼyi̱ iin libro nu̱ú ndakaʼánra xa̱ʼa̱ na̱ íxato̱ʼó-ñaʼá xíʼin na̱ ndákanixi̱ní xa̱ʼa̱ ki̱vi̱ra”.
^ Tá ya̱chi̱ xi̱ndakanixi̱níyó tu̱ʼun ña̱ “ndatiinna ku̱a̱chi xíʼinna” kúni̱ kachiña ña̱ ixandi̱va̱ʼana xíʼinna á ña̱ kǒoka nda̱a̱ ni iin ña̱ʼa ña̱ kivi sakǎku miína. Soo mií ña̱ nda̱a̱ ku̱a̱ʼáva ña̱ kúni̱ kachiña. Soo nu̱ú texto yóʼo ña̱ xi̱kuni̱ kachi ta̱ Jesús kúúña ña̱ kotona ndáa ki̱ʼva íyo ña̱ kéʼé iin na̱ yiví, á ña̱ va̱ʼa kúúña á ña̱ va̱ása va̱ʼa kúúña. Iin diccionario ña̱ tu̱ʼun griego ña̱ ndákani xa̱ʼa̱ sava texto káchiña: ña̱ tu̱ʼun “ndatiinna ku̱a̱chi xíʼinna” kúni̱ kachituña ña̱ kotona ndáa ki̱ʼva íyo ña̱ kéʼé iin na̱ yiví.
