1. ¿Ndáaña keʼé ta̱ Jesús ti̱xin loʼo tiempo?

 IIN tiempo ña̱ ndáyáʼviní kúú ña̱ ndóoyó. Si̱lóʼo kúma̱ní ta ta̱ Jesús ndatiinra ku̱a̱chi xíʼin na̱ ndóo iníísaá nu̱ú ñuʼú. ¿Nda̱chun va̱ʼa kúnda̱a̱-iniyó ña̱ si̱lóʼo kúma̱ní? Saáchi ta̱ Jesús ni̱ka̱ʼa̱nra ña̱ xi̱nu iin profecía ta ña̱yóʼo koo señal nu̱úyó ña̱ xa̱a̱ íyora xíʼinyó, ta saátu ña̱ xa̱a̱ ndiʼi-xa̱ʼa̱ ndiʼi ña̱ʼa ña̱ va̱ása va̱ʼa íyo nu̱ú ñuʼú yóʼo (Mat. 24:3). Kivi kaʼviyó profecía yóʼo nu̱ú Mateo capítulo 24 xíʼin 25 ta saátu nu̱ú Marcos capítulo 13 xíʼin Lucas 21.

2. ¿Ndáaña sakúaʼayó nu̱ú artículo yóʼo, ta nda̱chun?

² Ña̱ va̱ʼa chindeétáʼan ta̱ Jesús xíʼinyó ña̱ koo tu̱ʼvayó, ni̱ka̱ʼa̱nra xa̱ʼa̱ u̱ni̱ ilustración: ilustración ña̱ nu̱ú kúú ña̱ káʼa̱n xa̱ʼa̱ tí ndikachi xíʼin ti̱xúʼú, ña̱ u̱vi̱ kúú ña̱ káʼa̱n xa̱ʼa̱ u̱xu̱ ná si̱ʼí kúa̱an ta ña̱ u̱ni̱ kúú ña̱ káʼa̱n xa̱ʼa̱ talento. Iin tá iin ña̱yóʼo náʼa̱ña ndáa ki̱ʼva íyo na̱ yiví ta ña̱yóʼo kúú ña̱ kiʼin ta̱ Jesús kuenta xíʼin tá ná ndatiinra ku̱a̱chi xíʼinna. Nu̱ú artículo yóʼo sakúaʼayó xa̱ʼa̱ ilustración yóʼo tasaá kotoyó ndáaña kivi sakúaʼayó xíʼinña. Ña̱ nu̱ú ña̱ ka̱ʼa̱nyó xa̱ʼa̱ kúú ña̱ káʼa̱n xa̱ʼa̱ tí ndikachi xíʼin ti̱xúʼú.

NDIKACHI XÍʼIN TI̱XÚʼÚ

3. ¿Ama kúú ña̱ ndatiin ta̱ Jesús ku̱a̱chi xíʼin na̱ yiví?

³ Ta̱ Jesús ni̱ka̱ʼa̱nra ña̱ tá ná kixaa̱ tiempo ña̱ ndatiinra ku̱a̱chi xíʼin iin tá iin na̱ yiví, kotora á xi̱niso̱ʼona tu̱ʼun Ndióxi̱ ta saátu á chi̱ndeétáʼanna xíʼin na̱ ñanira na̱ ungido (Mat. 25:​31-46). ¿Ama kúú ña̱ ka̱ʼa̱n ta̱ Jesús ña̱ iin na̱ yiví kúúna ndikachi á ti̱xúʼú? Ka̱ʼa̱nraña tá xa̱a̱ ná kundikaa̱ ña̱ gran tribulación tá si̱lóʼo kúma̱ní ña̱ kixáʼa Armagedón (Mat. 24:21). Nda̱a̱ táki̱ʼva kéʼé iin ta̱ pastor ta̱ ndátaʼví ndikachi xíʼin ti̱xúʼú, saá keʼé ta̱ Jesús, chi ndataʼvíra na̱ chíndeétáʼan xíʼin na̱ ungido xíʼin na̱ kǒo chíndeétáʼan xíʼinna.

4. Nda̱a̱ táki̱ʼva káchi Isaías 11:​3, 4, ¿nda̱chun kivi kandíxayó ña̱ nda̱kúní ndatiin ta̱ Jesús ku̱a̱chi xíʼin na̱ yiví? (Koto na̱ʼná ña̱ va̱xi chí nu̱ú kíxáʼa tutu yóʼo).

 ⁴ Jehová nda̱kaxinra ta̱ Jesús ña̱ koora juez, ta Biblia káʼa̱nña ña̱ nda̱kúní ndatiin ta̱ Jesús ku̱a̱chi (kaʼvi Isaías 11:​3, 4). a Ta̱ Jesús kíʼinra kuenta xíʼin ña̱ ndákanixi̱ní na̱ yiví, ña̱ káʼa̱nna xíʼin ña̱ kéʼéna ta saátu xítora ndáa ki̱ʼva kéʼéna xíʼin na̱ ñanira na̱ ungido (Mat. 12:​36, 37; 25:40). Kunda̱a̱-inira ndáana chi̱ndeétáʼan xíʼin na̱ ungido ña̱ ke̱ʼéna chiñu ña̱ ta̱xina ndaʼa̱na. b Iin ña̱ ndáyáʼviní kivi keʼéyó ña̱ va̱ʼa chindeétáʼanyó xíʼin na̱ ungido kúú ña̱ natúʼunyó xíʼin na̱ yiví xa̱ʼa̱ tu̱ʼun Ndióxi̱. Tá ná chindeétáʼanyó xíʼin na̱ ungido, saá kúú ña̱ ka̱ʼa̱n ta̱ Jesús ña̱ kúúyó na̱ yiví va̱ʼa ta kivi kutakuyó nu̱ú ñuʼú yóʼo ndiʼi tiempo (Mat. 25:46; Apoc. 7:​16, 17). Tá nda̱kú ná koo iniyó xíʼin Jehová tá ná kundikaa̱ ña̱ gran tribulación ta saátu tá xa̱a̱ ná ndiʼiña, saá kúú ña̱ kǒo ndakatara ki̱vi̱yó nu̱ú libro nu̱ú va̱xi ki̱vi̱ na̱ kutaku (Apoc. 20:15). Va̱ʼaní ña̱ ndakiʼinyó tá nda̱kú ná koo iniyó xíʼin Jehová.

5. ¿Ndáaña sákuaʼayó xíʼin ilustración ña̱ káʼa̱n xa̱ʼa̱ ndikachi xíʼin ti̱xúʼú, ta ndáana xíniñúʼu kuniso̱ʼo ña̱ ni̱ka̱ʼa̱n ta̱ Jesús?

⁵ Na̱ʼa̱ ña̱ nda̱kú íyo iniún xíʼin Jehová. Ilustración ña̱ káʼa̱n xa̱ʼa̱ tí ndikachi xíʼin ti̱xúʼú káʼa̱nña xa̱ʼa̱ na̱ koo nu̱ú ñuʼú yóʼo ndiʼi tiempo. Na̱yóʼo náʼa̱na ña̱ nda̱kú íyo inina xíʼin Jehová chi chíndeétáʼanna xíʼin na̱ ungido ña̱ natúʼunna xíʼin na̱ yiví xa̱ʼa̱ tu̱ʼun Ndióxi̱, ta saátu xíniso̱ʼona iin tiʼvi loʼo na̱ ungido na̱ nda̱kaxin ta̱ Jesús (Mat. 24:45). Saátu na̱ ku̱ʼu̱n chí ndiví xíniñúʼu kuniso̱ʼona ña̱ ni̱ka̱ʼa̱n ta̱ Jesús nu̱ú ilustración yóʼo. ¿Nda̱chun? Saáchi kíʼinní ta̱ Jesús kuenta xíʼin ña̱ káʼa̱nna, ña̱ ndákanixi̱nína xíʼin ña̱ kéʼéna. Ña̱kán saátu na̱yóʼo xíniñúʼu na̱ʼa̱na ña̱ nda̱kú íyo inina xíʼin Jehová. Vitin ná ka̱ʼa̱nyó xa̱ʼa̱ inka u̱vi̱ ilustración ña̱ va̱xi nu̱ú Mateo capítulo 25 ta yóʼo sakúaʼayó ndáaña xíniñúʼu kiʼinní na̱ ungido kuenta xíʼin, chi xa̱ʼa̱ na̱yóʼo ni̱ka̱ʼa̱n ta̱ Jesús. Ná ka̱ʼa̱nyó xa̱ʼa̱ ilustración ña̱ káʼa̱n xa̱ʼa̱ 10 ná si̱ʼí kúa̱an.

10 NÁ SI̱ʼÍ KÚA̱AN

6. ¿Ndáa ki̱ʼva ni̱na̱ʼa̱ u̱ʼu̱n ná si̱ʼí kúa̱an ña̱ ndíchiníná? (Mateo 25:​6-10).

⁶ Nu̱ú ilustración yóʼo ni̱ka̱ʼa̱n ta̱ Jesús xa̱ʼa̱ 10 ná si̱ʼí kúa̱an ná ke̱e ña̱ va̱ʼa ndakutáʼanna xíʼin ta̱ tíndaʼa̱ (Mat. 25:​1-4). Xi̱kuni̱ 10 saáná ki̱ʼviná xíʼinra nu̱ú íyo vikó. Ta̱ Jesús ni̱ka̱ʼa̱nra ña̱ u̱ʼu̱n náyóʼo ná ndíchi kúúná ta inka u̱ʼu̱nná ná kíʼvi kúúná. Ná ñaʼá ndíchi xa̱a̱ ni̱xi̱yo tu̱ʼvaná ña̱ kundatunára ni xa̱a̱ ñuúní ná kixaa̱ra. Ña̱kán níʼiná lampara ña̱ aceite ku̱a̱ʼa̱n xíʼinná ña̱ va̱ʼa kutuu̱nña nu̱úná tá xa̱a̱ ñuú. Ta ku̱a̱ʼá aceite xi̱niʼiná ku̱a̱ʼa̱n xíʼinná ña̱ va̱ʼa kuniñúʼunará tá ná kuachi̱ka ta̱ tíndaʼa̱. Ta xa̱ʼa̱ ña̱ ke̱ʼéná ña̱yóʼo, ni ná kuachi̱ra kǒo nda̱ʼva̱ lámpara ña̱ níʼiná (kaʼvi Mateo 25:​6-10). Tá ki̱xaa̱ ta̱ tíndaʼa̱ ná si̱ʼí ná ndíchi ni̱ki̱ʼviná xíʼinra nu̱ú íyo vikó. Ki̱ʼva saá koo xíʼin na̱ ku̱ʼu̱n chí ndiví. Ndiʼi na̱ nda̱kú ná koo ini xíʼin Jehová ta kunditona nda̱a̱ ná kixi ta̱ Jesús, ki̱ʼvina  kaʼndachíñuna xíʼinra ti̱xin Reino Ndióxi̱ (Apoc. 7:​1-3). c Ta, ¿ndáaña kuu xíʼin u̱ʼu̱n ná si̱ʼí ná kíʼvi?

7. ¿Ndáaña ku̱u xíʼin u̱ʼu̱n ná si̱ʼí ná kíʼvi, ta nda̱chun?

⁷ Ná si̱ʼí kíʼvi kǒo níkeʼéná nda̱a̱ táki̱ʼva ke̱ʼé ná si̱ʼí ndíchi, chi kǒo níxi̱yo tu̱ʼvaná tá ki̱xaa̱ ta̱ tíndaʼa̱. Ta̱ Jesús ni̱ka̱ʼa̱nra ña̱ tá xi̱niso̱ʼoná ña̱ xa̱a̱ ku̱nu̱mí kixaa̱ ta̱ tíndaʼa̱, ki̱ʼinná kuenta ña̱ xa̱a̱ ku̱nu̱mí nda̱ʼva̱ lampara ña̱ níʼiná. Ta xa̱ʼa̱ ña̱ kǒoka aceite kúúmiíná ke̱ena ku̱a̱ʼa̱nná ña̱ kueenná á satáná aceite. Tá xa̱a̱ ki̱xaa̱ ta̱ tíndaʼa̱, náyóʼo ta̱ʼán ndikóvíná. Ña̱kán, “ná si̱ʼí kúa̱an ná xa̱a̱ íyo tu̱ʼva ndátuñaʼá ni̱ki̱ʼviná xíʼinra vikó tíndaʼa̱ ta nda̱si yéʼé” (Mat. 25:10). Tándi̱ʼi, ná si̱ʼí kíʼvi ndi̱kóná ta xi̱kuni̱ná ki̱ʼviná vikó tíndaʼa̱, soo ta̱ tíndaʼa̱ ni̱ka̱ʼa̱nra xíʼinná: “Ña̱ nda̱a̱ káʼi̱n xíʼinndó ña̱ va̱ása xíni̱i̱ ndóʼó” (Mat. 25:​11, 12). Ta̱ tíndaʼa̱ ni̱kuachi̱vara soo náyóʼo kǒo níxi̱yo tu̱ʼvaná ña̱ kundatunára. ¿Ndáaña sákuaʼa na̱ ungido xíʼin ilustración yóʼo?

8, 9. ¿Ndáaña sákuaʼa na̱ ungido xíʼin ilustración ña̱ káʼa̱n xa̱ʼa̱ 10 ná si̱ʼí kúa̱an? (Koto na̱ʼná).

⁸ Na̱ʼa̱ ña̱ xa̱a̱ íyo tu̱ʼvaún. Kǒo níxikuni̱ kachi ta̱ Jesús ña̱ íyo u̱vi̱ tiʼvi na̱ ungido: na̱ koo tu̱ʼva nda̱a̱ tá ná kixaa̱ra ta inkana va̱ása koo tu̱ʼvana. Chi ña̱ xi̱kuni̱ra ka̱ʼa̱nra xíʼin na̱ ungido kúú ña̱ tá kǒo íyo tu̱ʼvana ta kǒo íyo nda̱kú-inina nda̱a̱ ná kixaa̱ra, kǒo ndakiʼinna ña̱ va̱ʼa (Juan 14:​3, 4). Ndáyáʼviní ña̱ ni̱ka̱ʼa̱n ta̱ Jesús. Ni ndátuyó ku̱ʼu̱nyó chí ndiví á ni ndátuyó kooyó nu̱ú ñuʼú yóʼo, ndiʼiyó xíniñúʼu kuniso̱ʼoyó ilustración ña̱ ni̱ka̱ʼa̱n ta̱ Jesús xa̱ʼa̱ 10 ná si̱ʼí kúa̱an. Ña̱kán, ndiʼiyó xíniñúʼu koo tu̱ʼva ta ndakú koo iniyó nda̱a̱ ná kixaa̱ra (Mat. 24:13).

⁹ Nda̱a̱ táki̱ʼva xa̱a̱ sa̱kúaʼayó, tá ni̱ka̱ʼa̱n ta̱ Jesús xa̱ʼa̱ ilustración ña̱ káʼa̱n xa̱ʼa̱ 10 ná si̱ʼí kúa̱an, ni̱ka̱ʼa̱nra ña̱ xíniñúʼu koo  tu̱ʼvayó ta kunditoní nu̱úyó. Tándi̱ʼi, ni̱ka̱ʼa̱nra xa̱ʼa̱ ilustración ña̱ káʼa̱n xa̱ʼa̱ talento ta xíʼin ña̱yóʼo sákuaʼayó ña̱ xíniñúʼu kama kooyó ta va̱ása kuxúxányó.

XU̱ʼÚN ÑA̱ TA̱XINA NDAʼA̱ U̱NI̱ TA̱A

10. ¿Ndáa ki̱ʼva ni̱na̱ʼa̱ u̱vi̱ na̱ esclavo ña̱ nda̱kú ni̱xi̱yo inina xíʼin ta̱ xi̱kachíñuna nu̱ú? (Mateo 25:​19-23).

¹⁰ Nu̱ú ilustración yóʼo ta̱ Jesús ni̱ka̱ʼa̱nra xa̱ʼa̱ u̱vi̱ na̱ esclavo na̱ nda̱kú ni̱xi̱yo ini xíʼin ta̱ káchíñuna nu̱ú, ta saátu ni̱ka̱ʼa̱nra xa̱ʼa̱ iin ta̱ esclavo ta̱ kǒo níxi̱yo nda̱kú-ini (Mat. 25:​14-18). Tá kúma̱níka ku̱ʼu̱n ta̱ káchíñuna nu̱ú inka ñuu, ta̱xira ku̱a̱ʼání xu̱ʼún ndaʼa̱na. U̱vi̱ na̱ esclavo ni̱na̱ʼa̱na ña̱ nda̱kú íyo inina xíʼin ta̱ káchíñuna nu̱ú ta chi̱kaa̱nína ndee̱ ña̱ kachíñuna ña̱ va̱ʼa kuaʼnu si̱kí xu̱ʼún ña̱ ta̱xira ndaʼa̱na. Ña̱kán tá xa̱a̱ ndi̱kó ta̱ káchíñuna nu̱ú, ku̱a̱ʼáníka xu̱ʼún xi̱kuumiína nu̱ú ña̱ ta̱xira ndaʼa̱na. Ña̱kán, ta̱ xi̱kachíñuna nu̱ú ni̱kusi̱íní-inira ta ni̱ka̱ʼa̱nra xíʼin iin tá iinna: “Naʼa ta kusi̱í-iniún xíʼi̱n” (kaʼvi Mateo 25:​19-23). Ta, ¿ndáaña ke̱ʼé inka ta̱ esclavo xíʼin xu̱ʼún ña̱ ta̱xina ndaʼa̱ra?

11. ¿Ndáaña ndo̱ʼo ta̱ esclavo ta̱ xúxán, ta nda̱chun?

¹¹ Iin talento nda̱kiʼin inka ta̱ esclavo ña̱ va̱ʼa kachíñura xíʼinña ta koo si̱kíña. Soo ta̱ esclavo yóʼo xúxánní ni̱xi̱yora ta ka̱anra iin yavi̱ ta kán sa̱ndúxu̱nraña. Ta tá ndi̱kó ta̱ káchíñura nu̱ú sa̱ndándikóraña ndaʼa̱ra. Nu̱úka ña̱ ndukúra ña̱ káʼnu-ini nu̱ú ta̱ xi̱kachíñura nu̱ú, chi kǒo si̱kíña nítaxira ndaʼa̱ra, ni̱ka̱ʼa̱nra ña̱ va̱ása va̱ʼa xíʼinra, ña̱ kúúra iin ta̱a ta̱ ndúkú ku̱a̱ʼání ña̱ʼa. Xa̱ʼa̱ ña̱yóʼo, ta̱ káchíñura nu̱ú ni̱nda̱ʼyi̱ra nu̱úra, ki̱ndaara talento ndaʼa̱ra ta ta̱xínrara (Mat. 25:​24, 26-30).

12. ¿Ndáana ndánaʼa̱ u̱vi̱ na̱ esclavo na̱ nda̱kú ni̱xi̱yo ini?

¹² U̱vi̱ na̱ esclavo na̱ nda̱kú ni̱xi̱yo ini ndánaʼa̱na na̱ ungido na̱ ku̱ʼu̱n chí ndiví. Ta̱ Jesús káʼa̱nra xíʼin iin tá iin na̱yóʼo: “Naʼa ta kusi̱í-iniún xíʼi̱n”. Ña̱yóʼo kúni̱ kachiña ña̱ ku̱ʼu̱nna koona xíʼinra chí ndiví tá ná ndatakuna (Mat. 25:​21,  23; Apoc. 20:5a). Soo íyo iin ña̱ sákuaʼa na̱ ungido xíʼin ña̱ ke̱ʼé ta̱ esclavo xúxán. Ná kotoyó ndáaña kúúña.

13, 14. ¿Ndáaña sákuaʼa na̱ ungido xíʼin ilustración ña̱ talento? (Koto na̱ʼná).

¹³ Chikaa̱ ndee̱ ña̱ va̱ʼaní kachíñún. Tá ni̱ka̱ʼa̱n ta̱ Jesús xa̱ʼa̱ ilustración ña̱ talento, kǒo níxi̱kuni̱ kachira ña̱ nduu na̱ ungido na̱ xúxán. Chi nda̱a̱ táki̱ʼva ke̱ʼéra tá ni̱ka̱ʼa̱nra xa̱ʼa̱ ilustración ña̱ káʼa̱n xa̱ʼa̱ 10 ná si̱ʼí kúa̱an, iin consejova xi̱kuni̱ra taxira. Ni̱ka̱ʼa̱nra xíʼinna ña̱ tá ná sandákoona ña̱ nda̱kú koo inina xíʼinra, kǒo ki̱ʼvina ti̱xin Reino Ndióxi̱ (2 Ped. 1:10).

¹⁴ Xíʼin ilustración ña̱ káʼa̱n xa̱ʼa̱ 10 ná si̱ʼí kúa̱an ta saátu ña̱ káʼa̱n xa̱ʼa̱ ña̱ talento, ta̱ Jesús ni̱ka̱ʼa̱nra ña̱ ndiʼi na̱ ungido xíniñúʼu koo tu̱ʼvana ta kunditoní nu̱úna ta kǒo xíniñúʼu kuxúxánna. Soo su̱ví ña̱yóʼo kuití kúú ña̱ níka̱ʼa̱n ta̱ Jesús xíʼin na̱ ungido. Nu̱ú Mateo 24:​40, 41 va̱xi inka ña̱ ni̱ka̱ʼa̱nra xíʼinna. Ná ka̱ʼa̱nyó xa̱ʼa̱ versículo yóʼo.

¿NDÁANA NDAKIʼIN NDIÓXI̱ KU̱ʼU̱N XÍʼINRA?

15, 16. Nda̱a̱ táki̱ʼva káchi Mateo 24:​40, 41, ¿nda̱chun xíniñúʼu koo tu̱ʼvaní na̱ ungido?

¹⁵ Tá kúma̱níka ka̱ʼa̱n ta̱ Jesús xa̱ʼa̱ u̱ni̱ ilustración ña̱ sa̱kúaʼayó vitin, ni̱ka̱ʼa̱nra ña̱ ndatiinna ku̱a̱chi xíʼin na̱ ungido tasaá kunda̱a̱-inina ndáana ku̱ʼu̱n chí ndiví ta ndáana kǒo kívi ku̱ʼu̱n. Ni̱ka̱ʼa̱nra xa̱ʼa̱ u̱vi̱ ta̱a na̱ káchíñu yuku̱ ta saátu xa̱ʼa̱ u̱vi̱ ná ñaʼá ná ndíko xíʼin molino ndaʼa̱. Ku̱mí saá na̱yóʼo inkáchi íyo ña̱ kéʼévana. Soo ta̱ Jesús ni̱ka̱ʼa̱nra: “Ndióxi̱ ndakiʼinra iinra ta inkara sandákoora” (kaʼvi Mateo 24:​40, 41). Nu̱ú inka versículo, ta̱ Jesús ni̱ka̱ʼa̱nra xíʼin na̱ discípulora: “Ndiʼi tiempo kundito va̱ʼa nu̱úndó, saáchi va̱ása xíni̱ndó ndáa ki̱vi̱ kixi tátandó” (Mat. 24:42). Ta kítáʼanní tu̱ʼun yóʼo xíʼin ña̱ ni̱ka̱ʼa̱n ta̱ Jesús tá sa̱ndíʼira ni̱ka̱ʼa̱nra xa̱ʼa̱ ilustración ña̱ káʼa̱n xa̱ʼa̱ 10 ná si̱ʼí kúa̱an (Mat. 25:13). Inkáchi kúni̱ kitáʼanva u̱vi̱ saá tu̱ʼun yóʼo. Ña̱kán, nda̱saa na̱ ndixa kúú ungido ta nda̱kú íyo inina xíʼin Jehová, kúú na̱ ndakiʼin ta̱ Jesús ku̱ʼu̱n kaʼndachíñu xíʼinra (Juan 14:3).

¹⁶ Ná koo tu̱ʼvayó. Tá iin na̱ ungido va̱ása chíkaa̱na ndee̱ ña̱ keʼéna ndiʼi ña̱ káʼa̱n Ndióxi̱, va̱ása kivi ku̱ʼu̱nna chí ndiví xíʼin inka na̱ ungido (Mat. 24:31). Soo saátu ndiʼi na̱ kúni̱ koo nu̱ú ñuʼú yóʼo xíniñúʼu kuniso̱ʼona ña̱ káʼa̱n ta̱ Jesús, nda̱kú koo inina xíʼin Ndióxi̱ ta koo tu̱ʼvanína.

17. ¿Nda̱chun kǒo xíniñúʼu ndi̱ʼi-iniyó tá ndáka̱xinka Jehová na̱ ku̱ʼu̱n chí ndiví?

¹⁷ Miíyó xíni̱ va̱ʼayó Jehová ña̱kán kǒo xíka-iniyó xíʼin ña̱ kéʼéra. Ña̱kán kǒo xíniñúʼu ndi̱ʼi-iniyó d tá ndáka̱xinka Jehová na̱ ku̱ʼu̱n chí ndiví. Ná ndakaʼányó xa̱ʼa̱ ña̱ ni̱ka̱ʼa̱n ta̱ Jesús xa̱ʼa̱ ta̱ chíʼi tú uva (Mat. 20:​1-16). Na̱ ki̱xáʼa káchíñu tá so̱ndíʼi, inkáchi cha̱ʼvirana xíʼin na̱ ki̱xáʼa káchíñu tá xi̱ta̱a̱n. Ta ki̱ʼva saá íyoña xíʼin na̱ ku̱ʼu̱n chí ndiví, ndiʼi na̱ nda̱kú ni̱xi̱yo ini xíʼin Jehová ku̱ʼu̱nna chí ndiví, ni xa̱a̱ ku̱a̱ʼá tiempo nda̱kaxinnana á sa̱kán nda̱kaxinnana.

KUNISO̱ʼO CONSEJO ÑA̱ KÁʼA̱N TA̱ JESÚS

18, 19. ¿Ndáaña sa̱kúaʼayó ta ndáa consejo ta̱xi ta̱ Jesús ndaʼa̱yó nu̱ú artículo yóʼo?

¹⁸ ¿Ndáaña sa̱kúaʼayó nu̱ú artículo yóʼo? Ilustración ña̱ káʼa̱n xa̱ʼa̱ tí ndikachi xíʼin ti̱xúʼú náʼa̱ña nu̱ú ndiʼiyó na̱ koo nu̱ú ñuʼú yóʼo ña̱ ndáyáʼviní nda̱kú koo iniyó xíʼin Ndióxi̱ tiempo vitin ta saátu tá ná  kundikaa̱ ña̱ grán tribulación. Tá ná kixaa̱ tiempo kán, ta̱ Jesús ndaka̱xinra na̱ nda̱kú ni̱xi̱yo ini xíʼin Ndióxi̱ ta na̱kán kúú na̱ taxira koo ndiʼi tiempo (Mat. 25:46).

¹⁹ Saátu ni̱ka̱ʼa̱nyó xa̱ʼa̱ u̱vi̱ ilustración ña̱ káʼa̱n xa̱ʼa̱ na̱ ungido ña̱ xíniñúʼu koo tu̱ʼvanína. Ta xíʼin ilustración ña̱ káʼa̱n xa̱ʼa̱ 10 ná si̱ʼí kúa̱an, sa̱kúaʼayó ña̱ u̱ʼu̱n náyóʼo ndíchiní ni̱xi̱yoná ta ni̱xi̱yo tu̱ʼvaná xi̱ndatuná ta̱ tíndaʼa̱ ni xa̱a̱ ñuúní ki̱xaa̱ra. Soo u̱ʼu̱n nákán kǒo níxi̱yo tu̱ʼvaná ña̱ kundatuná ta̱ tíndaʼa̱ ña̱ ki̱ʼviná xíʼinra nu̱ú íyo vikó. Ña̱ sákuaʼayó xíʼin ña̱yóʼo kúú ña̱ xíniñúʼu koo tu̱ʼvayó ta kundatuyó nda̱a̱ ná kixi ta̱ Jesús ña̱ sandíʼi-xa̱ʼa̱ra ndiʼi ña̱ kini íyo nu̱ú ñuʼú yóʼo. Xíʼin ilustración ña̱ káʼa̱n xa̱ʼa̱ talento sa̱kúaʼayó ña̱ kamaní ni̱xi̱yo u̱vi̱ na̱ esclavo xa̱ʼa̱ ña̱ nda̱kúní ni̱xi̱yo inina ta ku̱chiñuna sa̱kúaʼnuna xu̱ʼún ta̱ xi̱kachíñuna nu̱ú. Xa̱ʼa̱ ña̱yóʼo, ta̱ xi̱kachíñuna nu̱ú ni̱kusi̱íní-inira, soo ta̱xínra ta̱ esclavo xúxán. Ña̱ sákuaʼayó xíʼin ña̱yóʼo kúú ña̱ xíniñúʼu chikaa̱níyó ndee̱ ña̱ kachíñuyó nu̱ú Jehová nda̱a̱ so̱ndíʼi. Saátu sa̱kúaʼayó ña̱ xíniñúʼu koo tu̱ʼvaní na̱ ungido ña̱ va̱ʼa ku̱ʼu̱nna chí ndiví. Na̱ ungido xa̱a̱ kúni̱nína ná kixaa̱ ki̱vi̱ ña̱ ndakutáʼanna xíʼin ta̱ Jesús chí ndiví. Tá ná ndiʼi guerra ña̱ Armagedón, na̱ ungido kúú na̱ ndánaʼa̱ ñá tindaʼa̱ xíʼin ta̱ Jesús (2 Tes. 2:1; Apoc. 19:9).

20. ¿Ndáaña keʼé Jehová tá ná kuniso̱ʼoyó ña̱ káʼa̱nra xíʼinyó?

²⁰ Si̱lóʼo kúma̱ní ta ndatiin ta̱ Jesús ku̱a̱chi xíʼin na̱ yiví, soo va̱ása xíniñúʼu yi̱ʼvíyó. Tá nda̱kú ná koo iniyó mií Jehová taxi espíritu santo ndaʼa̱yó ña̱ va̱ʼa ndakú koo iniyó kunditayó nu̱ú ta̱ Jesús (2 Cor. 4:7; Luc. 21:36). Ña̱kán ni ndátuyó kooyó nu̱ú ñuʼú yóʼo á chí ndiví, ná kuniso̱ʼoyó consejo ña̱ ta̱xi ta̱ Jesús. Tá saá ná keʼéyó, kusi̱íní-ini Jehová xíʼinyó ta kaʼyira ki̱vi̱yó nu̱ú libro nu̱ú va̱xi ki̱vi̱ na̱ kutaku (Dan. 12:1; Apoc. 3:5).