Ku̱i̱ya̱ 1934 ka̱kui̱. Na̱ ñuu Suiza ni̱xi̱yo na̱ veʼi̱, soo nda̱kiʼinna ku̱a̱ʼa̱nna chí ñuu Timmins. Ku̱a̱ʼání mina ni̱xi̱yo ñuu kán ta xi̱kindooña chí Ontario (Canadá). Ku̱i̱ya̱ 1939 siʼíi̱ ki̱xáʼañá káʼviñá tutu La Atalaya ta saátu ki̱xáʼañá xáʼa̱nñá reunión na̱ testigo Jehová. Ta miíi̱ xíʼin inka i̱ñu̱ na̱ ku̱ʼvai̱ xíʼin ñanii̱ xi̱xa̱ʼa̱nndi̱ xíʼinñá. Loʼo kuití ku̱i̱ya̱ ni̱ya̱ʼa tasaá nda̱kuchiñá.

Kǒo níkutóo yivái̱ ña̱ kaʼvi siʼíi̱, soo ndakúní ni̱xi̱yo iniñá ta kǒo nísandákooñá ña̱ sakúaʼañá xa̱ʼa̱ Jehová. Tá ki̱xáʼa ku̱i̱ya̱ 1940 kǒo nítaxikana ña̱ natúʼun na̱ testigo xa̱ʼa̱ Ndióxi̱ chí ñuu Canadá. Soo, ndiʼi tiempo kán viíní xi̱kaʼa̱n siʼíi̱ xíʼi̱n yivái̱ ta xi̱ ixato̱ʼóñára. Soo, miíra ku̱a̱ʼání ña̱ kini xi̱ka̱ʼa̱nra xíʼinñá. Xa̱ʼa̱ ña̱ va̱ʼaní yichi̱ chi̱núuñá nu̱úndi̱, miíi̱ xíʼin ndiʼi na̱ ku̱ʼvai̱ xíʼin ñanii̱ ndu̱undi̱ testigo Jehová. Tá ni̱ya̱ʼa tiempo na̱samava yivái̱ ta vií ki̱xáʼara kéʼéra xíʼinndi̱.

Ku̱i̱ya̱ 1950 ni̱xa̱ʼi̱n chí ñuu Nueva York ña̱ va̱ʼa ku̱ʼi̱n asamblea ña̱ xi̱naní “Aumento de la Teocracia”. Kán xi̱nitáʼi̱n xíʼin ku̱a̱ʼání na̱ hermano na̱ íyo iníísaá ñuyǐví, ta kán xi̱xinisoʼi̱ experiencia ña̱ liviní ña̱ xi̱natúʼun na̱ hermano na̱ xa̱a̱ ni̱xa̱ʼa̱n Escuela ña̱ Galaad. Xa̱ʼa̱ ña̱kán, xi̱kuni̱i̱ kachíñui̱ ku̱a̱ʼáka tiempo nu̱ú Jehová. Xa̱a̱ ya̱chi̱ví nda̱kanixi̱níi̱ ña̱ kachíñui̱ ku̱a̱ʼáka tiempo nu̱úra, soo tá xi̱niso̱ʼi̱ experiencia kán chi̱kaa̱níña ndee̱ xíʼi̱n ña̱ kachíñui̱ ku̱a̱ʼáka tiempo nu̱ú Jehová. Tá ndi̱kói̱ veʼi̱ ndi̱ku̱n kama sa̱ndákutúi̱ solicitud ña̱ va̱ʼa koi̱ precursor regular. Na̱ hermano na̱ ñúʼu Betel ña̱ Canadá ni̱ka̱ʼa̱nna xíʼi̱n ña̱ siʼna xi̱niñúʼu  ndakuchii̱ ña̱ va̱ʼa koi̱ precursor regular. Ña̱kán, nda̱kuchii̱ 1 tí octubre ña̱ ku̱i̱ya̱ 1950. Tá ni̱ya̱ʼa iin yo̱o̱, xa̱a̱ ndu̱i̱ precursor regular ta chi̱ndaʼána yi̱ʼi̱ ku̱a̱ʼi̱n ñuu Kapuskasing. Ta xíkaní xi̱kindoo ñuu yóʼo nu̱ú ni̱xi̱yoi̱.

Ku̱i̱ya̱ 1951, na̱ hermano na̱ ñúʼu Betel ni̱ka̱ʼa̱nna xíʼin na̱ hermano na̱ xíni̱ ka̱ʼa̱n tu̱ʼun francés ña̱ ná ku̱ʼu̱nna kachíñuna nu̱ú Jehová ñuu Quebec, chi kán káʼa̱nna tu̱ʼun francés ta loʼoní na̱ Testigo ni̱xi̱yo. Yi̱ʼi̱ xíni̱i̱ ka̱ʼi̱n tu̱ʼun francés xíʼin inglés, ña̱kán ni̱ka̱ʼi̱n xíʼinna ña̱ kiviva ku̱ʼi̱n ta chi̱ndaʼána yi̱ʼi̱ chí ñuu Rouyn. Kǒo níxixini̱i̱ ni iin na̱ yiví ñuu kán, soo ta̱xina iin dirección ndaʼíi̱ nu̱ú kivi xa̱i̱. Tándi̱ʼi, va̱ʼaní ni̱xa̱i̱ ki̱táʼi̱n xíʼin ta̱ Marcel. Ta ni̱kusi̱íní-inii̱ ña̱ ka̱chíñui̱ ku̱mí ku̱i̱ya̱ ñuu Quebec. Tá ni̱ya̱ʼa tiempo, ni̱ka̱ʼa̱nna xíʼi̱n ña̱ koi̱ precursor especial.

Tá íyoi̱ ñuu Quebec, ni̱ka̱ʼa̱nna xíʼi̱n ña̱ ku̱ʼi̱n clase 26 ña̱ Galaad, ta ña̱yóʼo ni̱xi̱yoña ñuu South Lansing (Nueva York). Ni̱kusi̱íní-inii̱ ta sa̱ndíʼi̱ ka̱ʼvii̱ ña̱ escuela yóʼo 12 tí febrero ña̱ ku̱i̱ya̱ 1956, ta ni̱ka̱ʼa̱nna xíʼi̱n ña̱ ku̱ʼi̱n ñuu Ghana, b ña̱ ndíkaa̱ chí África Occidental. Soo xi̱niñúʼu ndikói̱ ñuu Canadá, chi kǒo níxi̱yo tu̱ʼva tutui̱ ña̱ kitai̱ ñuu yóʼo. Nda̱kanixi̱níi̱ ña̱ loʼo kuití semana kundatui̱.

Soo u̱xa̱ yo̱o̱ví ni̱xi̱yoi̱ ñuu Toronto chi xi̱kuma̱ní nduvií tutui̱ ña̱ va̱ʼa ku̱ʼi̱n inka ñuu. Tiempo kán ni̱xi̱yoi̱ veʼe na̱ matrimonio Cripps. Ta ni̱xi̱yo iin ñá loʼo se̱ʼena ñá xi̱naní Sheila, ta ku̱tóotáʼanndi̱. Tá xa̱a̱ si̱lóʼo kúma̱ní ña̱ ka̱ʼi̱n xíʼinñá ña̱ ti̱ndaʼa̱ñá xíʼi̱n saá ki̱xaa̱ visai̱. Ña̱kán ni̱ka̱ʼa̱nndi̱ xíʼin Jehová tasaá ki̱ndoondi̱ ña̱ ku̱ʼi̱n ñuu nu̱ú ni̱ka̱ʼa̱nna xíʼi̱n. Soo, xi̱chindaʼávandi̱ carta nu̱ú táʼanndi̱ ña̱ va̱ʼa kunda̱a̱-inindi̱ á kivi tindaʼa̱ndi̱ chí nu̱únínu. Ni i̱xayo̱ʼvi̱níña xíʼinndi̱, soo tándi̱ʼi ki̱ʼinndi̱ kuenta ña̱ va̱ʼaníva ña̱ nda̱kaxinndi̱ keʼéndi̱.

Iin yo̱o̱ xi̱ndikai̱ yichi̱ ta ni̱xa̱ʼi̱n xíʼin tren, xíʼin barco ta saátu xíʼin avión. Tasaáví ni̱xa̱i̱  ñuu Accra, ña̱ kúú capital ña̱ Ghana. Saá ni̱ka̱ʼa̱nna xíʼi̱n ña̱ koi̱ superintendente ña̱ distrito. Ta iníí chí ñuu Ghana xi̱niñúʼu ku̱ʼi̱n, saátu Costa de Marfil xíʼin Togolandia (vitin naníña Togo). Na̱ sucursal ta̱xina iin carro ndaʼíi̱ ña̱ va̱ʼa ku̱ʼi̱n. Iinlá miíi̱ xi̱xaʼa̱n ta xi̱kusi̱íní-inii̱ ña̱ xi̱xaʼi̱n xi̱xitoi̱ na̱ hermano kán.

Tá xi̱xiyo asamblea ña̱ circuito, ku̱a̱ʼání chiñu xi̱keʼíi̱. Xa̱ʼa̱ ña̱ kǒo Salón ña̱ Asamblea níxikuumiíndi̱, yitu̱n tú bambú xi̱xaʼnda na̱ hermano ña̱ ixava̱ʼana xi̱ní veʼe. Ta xi̱xaʼndana ñu̱u̱ ña̱ va̱ʼa ndakasina xi̱níña. Xa̱ʼa̱ ña̱ kǒo refrigerador níxi̱yo ñuu kán, kǒo níxikivi ndataán va̱ʼandi̱ ña̱ xi̱xixindi̱. Ña̱kán, na̱ hermano na̱ xi̱kiʼin kuenta xíʼin asamblea, xi̱xaʼnína kití sa̱na̱na ña̱ va̱ʼa keʼéna ña̱ kuxu ndiʼi na̱ xi̱xa̱ʼa̱n asamblea.

Tá xi̱xiyo asamblea sava yichi̱ xi̱kuu ña̱ʼa ña̱ xi̱sakúaku̱ní miíndi̱. Ndákaʼíi̱n ña̱ iin ki̱vi̱, iin ta̱ misionero ta̱ xi̱naní Herb Jennings, c táxira discurso ta iin kama ni̱ya̱ʼa iin si̱ndi̱ki̱ loʼo ti̱xin veʼe nu̱ú xi̱ñuʼundi̱. Kǒo níxi̱kunda̱a̱-ini tí si̱ndi̱ki̱ loʼo kán ndáaña keʼérí ta ta̱ Herb iin ku̱a̱ʼa̱n va̱ʼa inira chi kǒo níxi̱kunda̱a̱-inira ndáaña keʼéra. Tándi̱ʼi, ku̱mí na̱ hermano na̱ ndakúní ta̱vánarí ta ndiʼina ki̱xáʼa kátindaʼa̱na á kánindaʼa̱na.

Ma̱ʼñú semana xi̱chikai̱ película La Sociedad del Nuevo Mundo en acción xi̱xito na̱ yiví na̱ xi̱ndoo yatin kán. Ta xi̱kusi̱íní-ini na̱ yiví tá xi̱xitona ña̱yóʼo. Ku̱a̱ʼánína yichi̱ nu̱ú kúú ña̱ xi̱xitonaña, ta xi̱katíndaʼa̱na á xi̱kanindaʼa̱na tá xi̱xitona ña̱ xi̱yaʼa na̱ yiví na̱ xi̱ndakuchi. Ña̱ película yóʼo chi̱ndeétáʼanña xíʼinna ña̱ kundaa̱-inina ña̱ iníísaá ñuyǐví íyo na̱ ndásakáʼnu Jehová.

Tá ni̱ya̱ʼa u̱vi̱ ku̱i̱ya̱ ña̱ ni̱xi̱yoi̱ África, ni̱xa̱ʼi̱n asamblea internacional ña̱ ni̱xi̱yo ku̱i̱ya̱ 1958 ñuu Nueva York. Ta ni̱kusi̱íní-inii̱ chi kán nda̱kutáʼi̱n xíʼin ñá Sheila. Precursora especial ni̱xi̱yoñá ñuu Quebec ta saátu ñáyóʼo ni̱xa̱ʼa̱nñá asamblea kán. Xi̱chindaʼándi̱ carta nu̱ú táʼanndi̱, soo tá xa̱a̱ nda̱kutáʼi̱n xíʼinñá ni̱ka̱ʼi̱n xíʼinñá ña̱ tindaʼa̱ñá xíʼi̱n ta ka̱ndíxavañá. Saá ni̱nda̱ka̱tu̱ʼíi̱n ta̱ hermano Knorr d á kivi ku̱ʼu̱nñá Galaad, ta tándi̱ʼi ná ku̱ʼu̱nñá África, ta ka̱ndíxavara. Tá ni̱xa̱a̱  ñá Sheila ñuu Ghana, ti̱ndaʼa̱ndi̱ 3 tí octubre ña̱ ku̱i̱ya̱ 1959 ñuu Accra. Túvindi̱ ña̱ mií Jehová kúú ta̱ chi̱ndeétáʼan xíʼinndi̱ saáchi siʼna chiñu miíra ni̱ndi̱ʼi̱-inindi̱ xa̱ʼa̱.

Tá ku̱i̱ya̱ 1961 ni̱ka̱ʼa̱nna xíʼinndi̱ ku̱ʼu̱nndi̱ ñuu Camerún, ta ni̱ka̱ʼa̱nna xíʼi̱n ña̱ chindeétáʼi̱n xíʼin na̱ hermano kán ña̱ kuva̱ʼa iin Betel xa̱á. Ku̱a̱ʼání ña̱ʼa xi̱niñúʼu keʼíi̱ ta saátu ni̱ka̱ʼa̱nna xíʼi̱n kiʼi̱n kuenta xíʼin Betel kán, ña̱kán ni̱xi̱yo ku̱a̱ʼání ña̱ xi̱niñúʼu sakúaʼi̱. Ku̱i̱ya̱ 1965 ni̱ke̱e se̱ʼe ñá Sheila, ta i̱xayo̱ʼvi̱níña xíʼindi̱ tá xi̱ndakanixi̱níndi̱ ndáa ki̱ʼva kundaandi̱ ña̱ loʼo se̱ʼendi̱. Soo tá xa̱a̱ ki̱xáʼa va̱ʼa kúni̱ndi̱ ta ki̱xáʼandi̱ ndátaánva̱ʼandi̱ ña̱ʼa ña̱ va̱ʼa ndikóndi̱ ñuu Canadá, ku̱u iin ña̱ʼa ña̱ sa̱kúsuchíní-inindi̱.

Nu̱u se̱ʼe ñá síʼíi̱ ta ta̱ doctor ni̱ka̱ʼa̱nra xíʼi̱n ña̱ iin ta̱a loʼo xi̱kuura. Ni xa̱a̱ ni̱ya̱ʼa 50 ku̱i̱ya̱, kǒo nándósó-inindi̱ xa̱ʼa̱ ña̱ ku̱u. Ni ku̱suchíní-inindi̱ chi̱kaa̱-inindi̱ ña̱ kindo̱ondi̱ ñuu kán chi xi̱kutóoníndi̱ kachíñundi̱ nu̱ú Jehová.

Na̱ chíñu ñuu Camerún i̱xandi̱va̱ʼanína xíʼin na̱ hermano xa̱ʼa̱ ña̱ kǒo níxiinna ki̱ʼvina xíʼin ña̱ política. Ta kininíka xi̱keʼéna xíʼinna tá tiempo ña̱ xi̱nasa̱ma na̱ chíñu. Tá 13 tí mayo ña̱ ku̱i̱ya̱ 1970 ku̱u iin ña̱ʼa ña̱ sa̱kúsuchíní-inindi̱: na̱ chíñu ni̱ka̱ʼa̱nna ña̱ kǒo kívika natúʼun na̱ Testigo xa̱ʼa̱ Ndióxi̱ ñuu Camerún. Nda̱kiʼinna Betel ña̱ xi̱kuumiíndi̱ ta ki̱ʼva u̱ʼu̱n yo̱o̱ kuití xi̱niñúʼundi̱ ña̱yóʼo. Ti̱xin iin semana ta̱vána ndiʼi na̱ misionero na̱ ni̱xi̱yo ñuu kán. Ku̱suchíní-inindi̱ saáchi kǒo níkivika kotondi̱ na̱ hermano ta xi̱ndi̱ʼi̱-inindi̱ xa̱ʼa̱na.

I̱ñu̱ yo̱o̱ ni̱xi̱yondi̱ Betel ña̱ ndíkaa̱ chí Francia, ta ni ni̱xi̱yoi̱ kán xi̱chindeétáʼi̱n xíʼin na̱ hermano na̱ ñuu Camerún, míí ku̱i̱ya̱ saá yo̱o̱ diciembre chi̱ndaʼána ndi̱ʼi̱ ku̱a̱ʼa̱nndi̱ Betel ña̱ Nigeria, chi ña̱yóʼo kúú ña̱ ki̱xáʼa kíʼin kuenta xíʼin ña̱ xi̱keʼé na̱ ñuu Camerún. Va̱ʼaní nda̱kiʼin na̱ hermano na̱ ñuu Nigeria ndi̱ʼi̱ ta ndiʼi ku̱i̱ya̱ ña̱ ni̱xi̱yondi̱ xíʼinna ni̱kusi̱íní-inindi̱.

Tá ku̱i̱ya̱ 1973 ni̱xi̱yo iin ña̱ yo̱ʼvi̱ní nda̱kaxinndi̱ keʼéndi̱. Ñá Sheila va̱ása va̱ʼa níxikuniñá saáchi xi̱kuumiíñá kue̱ʼe̱. Ni̱xa̱ʼa̱nndi̱ asamblea ña̱ ni̱xi̱yo ñuu Nueva York ta nani ñúʼundi̱ kán xáku ñá Sheila ni̱ka̱ʼa̱nñá xíʼi̱n: “Kǒo kúndeéka-inii̱, ndiʼi ki̱vi̱ ndeé ndóʼi̱ ta ku̱naání”. Xa̱a̱ 14 ku̱i̱ya̱ xi̱ñuʼundi̱ chí África Occidental ta xi̱kusi̱íní-inii̱ xíʼin ña̱ xi̱keʼé ñá síʼíi̱, soo xi̱niñúʼu nasamandi̱ ña̱ kéʼéndi̱ na̱túʼun xíʼin táʼanndi̱ xa̱ʼa̱ ña̱yóʼo ta ni̱ka̱ʼa̱nndi̱ xíʼin Jehová xa̱ʼa̱ ndiʼi ña̱ kúu, nda̱kaxinndi̱ ndikóndi̱ ñuu Canadá chí kán kivika ku̱ʼu̱n ñá Sheila nu̱ú doctor. I̱xayo̱ʼvi̱níña xíʼinndi̱ chi sa̱ndákoondi̱ chiñu ña̱ xi̱keʼéndi̱ ta kǒo níkivika kachíñundi̱ ndiʼi tiempo nu̱ú Jehová.

Tá ni̱xa̱a̱ndi̱ ñuu Canadá ki̱xáʼíi̱ káchíñui̱ xíʼin iin ta̱ migoi̱, ta̱yóʼo xi̱kuumiíra iin negocio ña̱ xi̱xikóra carro iin ñuu loʼo ña̱ kíndo̱o chí norte ña̱ Toronto. I̱xarentai̱ iin veʼe loʼo  xíʼin ñá síʼíi̱ ta sa̱tándi̱ mueble tú xa̱a̱ xi̱niñúʼuna tasaá nda̱kiʼinndi̱ ku̱a̱ʼa̱nndi̱ koondi̱ kán ta kǒo níxi̱níkándi̱ chi xi̱kuni̱ndi̱ loʼo ña̱ʼa kuumiíndi̱ ña̱ va̱ʼa ndikóndi̱ kachíñundi̱ ndiʼi tiempo nu̱ú Jehová chí nu̱únínu. Ta kamaní ki̱xáʼa tukundi̱ kachíñundi̱ nu̱ú Jehová.

Ñuu Norval (Ontario) ki̱xáʼana íxava̱ʼana iin Salón ña̱ Asamblea ña̱kán ki̱vi̱ sábado xi̱xaʼi̱n xi̱kachíñui̱ kán. Tá ni̱ya̱ʼa tiempo ni̱ka̱ʼa̱nna xíʼi̱n koi̱ superintendente ña̱ Salón ña̱ Asamblea kán. Ta xa̱ʼa̱ ña̱ xa̱a̱ va̱ʼa loʼo kúni ñá síʼíi̱ nda̱kanixi̱níndi̱ ña̱ kiviva keʼéndi̱ chiñu yóʼo. Ña̱kán junio ña̱ ku̱i̱ya̱ 1974 nda̱kiʼinndi̱ ku̱a̱ʼa̱nndi̱ koondi̱ veʼe loʼo ña̱ ni̱xi̱yo salón kán. Ku̱si̱íní-inindi̱ chi ki̱xáʼa tukundi̱ káchíñundi̱ ku̱a̱ʼá tiempo nu̱ú Jehová.

Va̱ʼaka xi̱kuni ñá síʼíi̱, tá ni̱ya̱ʼa u̱vi̱ ku̱i̱ya̱ ni̱ka̱ʼa̱nna xíʼi̱n ña̱ koi̱ superintendente ña̱ circuito ta ka̱ndíxandi̱ keʼéndi̱ chiñu yóʼo ta ni̱xa̱ʼa̱nndi̱ xi̱tondi̱ congregación ña̱ íyo chí Manitoba iin ñuu ña̱ ni̱xi̱yo chí Canadá ta vi̱xinní ñuu kán. Soo va̱ʼaní xi̱kuni̱ndi̱ saáchi va̱ʼaní xi̱ndakiʼin na̱ hermano ndi̱ʼi̱. Ña̱ sa̱kuaʼandi̱ kúú ña̱ nda̱a̱ ndáaka chiñu kéʼéyó nu̱ú Jehová ña̱ ndáyáʼvika kúú ña̱ xíʼin ndinuʼu-iniyó ná keʼéyóña.

Xa̱a̱ ku̱a̱ʼá ku̱i̱ya̱ xi̱kui̱ superintendente ña̱ circuito, soo tá ku̱i̱ya̱ 1978 ni̱ka̱ʼa̱nna xíʼinndi̱ ña̱ ku̱ʼu̱nndi̱ kachíñundi̱ Betel ña̱ Canadá. Tá ni̱ya̱ʼa loʼo sa̱kúaʼi̱ iin ña̱ʼa soo i̱xayo̱ʼvi̱níña xíʼi̱n. Ñuu Montreal ni̱xi̱yo iin reunión especial ta ni̱ka̱ʼa̱nna xíʼi̱n ña̱ taxii̱ iin discurso ña̱ iin hora sava tu̱ʼun francés. Soo va̱ása vií nítaxii̱ ña̱ discurso yóʼo ña̱kán iin ta̱ hermano ta̱ ndíkaa̱ Departamento ña̱ Servicio ni̱ka̱ʼa̱nra xíʼi̱n xa̱ʼa̱ ña̱yóʼo. Tiempo saá kǒo níxi̱kuni̱i̱ ndakunii̱ ña̱ xi̱ ixayo̱ʼvi̱níña xíʼi̱n taxii̱ discurso. Soo kǒo níkutói̱ ña̱ ni̱ka̱ʼa̱n ta̱ hermano kán xíʼi̱n ta nda̱kanixi̱níi̱ ña̱ va̱ása kivi kitáʼanndi̱ ta kǒo ña̱ va̱ʼa níka̱ʼa̱nra xa̱ʼa̱ discurso ña̱ ta̱xii̱. Ta va̱ása níxiniso̱ʼi̱ consejo ña̱ ta̱xira ndaʼíi̱ chi kǒo níkutói̱ ndáa ki̱ʼva ni̱ka̱ʼa̱nra xíʼi̱n.

Tá ni̱ya̱ʼa loʼo ki̱vi̱, iin ta̱ hermano ta̱ ndíkaa̱ xíʼin na̱ Comité ña̱ Sucursal ni̱ka̱ʼa̱nra xíʼi̱n. Nda̱kunii̱ ña̱ va̱ása va̱ʼa ke̱ʼíi̱ tándi̱ʼi ni̱xa̱ʼi̱n ndukúi̱ ña̱ káʼnu-ini nu̱ú ta̱ hermano ta̱ ta̱xi consejo ndaʼíi̱ ta i̱xakáʼnuva-inira xa̱ʼíi̱, ña̱ ndo̱ʼi̱ yóʼo chi̱ndeétáʼan xíʼi̱n ña̱ sa̱kúaʼi̱ iin ña̱ ndáyáʼviní ña̱ xíniñúʼu vitá koo inii̱ (Prov. 16:18). Xa̱a̱ ku̱a̱ʼání yichi̱ káʼi̱n xíʼin Jehová xa̱ʼa̱ ña̱ ke̱ʼíi̱, nani saá tá táxina iin consejo ndaʼi̱ xíniso̱ʼovai̱ña.

Xa̱a̱ yáʼaka 40 ku̱i̱ya̱ káchíñui̱ Betel ña̱ Canadá, ta ku̱i̱ya̱ 1985 ki̱xáʼíi̱ káchíñui̱ xíʼin na̱ Comité ña̱ Sucursal. Yo̱o̱ febrero ña̱ ku̱i̱ya̱ 2021 ni̱xi̱ʼi̱ ñá síʼíi̱ ta ndákaʼánníi̱ xa̱ʼa̱ñá. Saátu yi̱ʼi̱ ka̱ni kue̱ʼe̱ miíi̱ ta ndeé ndóʼi̱, soo xa̱ʼa̱ ña̱ ku̱a̱ʼání chiñu kéʼíi̱ nu̱ú Jehová kamaní yáʼa ki̱vi̱ nu̱úi̱ túvii̱ (Ecl. 5:​20, nota). Ku̱a̱ʼáníva kúú tu̱ndóʼo ña̱ ni̱ya̱ʼi̱ nu̱ú, soo ku̱a̱ʼáníka kúú bendición ña̱ táxi Jehová ndaʼíi̱ ta kúsi̱íní-inii̱. Xa̱a̱ 70 ku̱i̱ya̱ kúú ña̱ káchíñui̱ nu̱ú Jehová ta iinlá chiñu miíra kúú ña̱ ndíʼi̱ka-inii̱ xa̱ʼa̱. Káʼi̱n xíʼin Jehová ña̱ ná chindeétáʼanra xíʼin ndiʼi na̱ va̱lí kúa̱an ña̱ kachíñuna nu̱ú iinlá miíra chi kúnda̱a̱-inii̱ ña̱ tá ná keʼéna ña̱yóʼo kusi̱íní-inina ta va̱ʼaní koona.