1, 2. ¿Nda̱chun ndeéní ni̱ndi̱ʼi̱-ini ta̱ Jesús?

ÑUÚ tá kúma̱níka ña̱ kuvi ta̱ Jesús, ndeéní ni̱ndi̱ʼi̱-inira. Ku̱nda̱a̱-inira ña̱ si̱lóʼo kúma̱ní ña̱ ixandi̱va̱ʼana xíʼinra ta nda̱a̱ kaʼnínara. Soo ni̱xi̱yo inka ña̱ ni̱ndi̱ʼi̱ka-inira xa̱ʼa̱. Xi̱kuni̱ra sakusi̱íra-ini yivára chi xi̱kuni̱nírara. Ta xi̱kunda̱a̱-inira ña̱ tá nda̱kú ná koo inira xíʼin yivára, saá ndakiʼinra tu̱ʼunra ta ndasakáʼnura ki̱vi̱ra. Saátu xi̱kuʼvi̱ní-inira xi̱xinira na̱ yiví, ta ku̱nda̱a̱-inira ña̱ kivi kutakuna ndiʼi tiempo, tá ná koo nda̱kú-inira xíʼin yivára nda̱a̱ ná kuvira.

² Ni ni̱xi̱yo ña̱ sa̱ndíʼiní-ini ta̱ Jesús, táxinva ni̱xi̱yo inira. Tá ya̱chi̱ loʼoka, ni̱ka̱ʼa̱nra xíʼin na̱ apóstol: “Kǒo kundi̱ʼi̱-inindó” (Juan 14:27). Ndióxi̱ ta̱xi ña̱ táxin ni̱xi̱yo inira, táʼan ña̱ kúúmií na̱ kítáʼan va̱ʼa xíʼin Jehová. Ña̱yóʼo kúú ña̱ xi̱kuumií ta̱ Jesús, ña̱ ni̱xi̱yo níma̱ra xíʼin xi̱níra (Filip. 4:6, 7).

3. ¿Ndáaña ka̱ʼa̱nyó xa̱ʼa̱ nu̱ú artículo yóʼo?

³ Ni iin miíyó va̱ása ndoʼoyó táʼan ña̱ ndo̱ʼo ta̱ Jesús, ña̱ ndeéní ni̱ndi̱ʼi̱-inira. Soo ndiʼiyó na̱ ndíku̱nñaʼá ya̱ʼavayó nu̱ú ku̱a̱chi (Mat. 16:24, 25; Juan 15:20). Ta sana táki̱ʼva ndo̱ʼora, saátu miíyó, koo ña̱ sandi̱ʼi̱-iniyó. ¿Ndáaña keʼéyó ña̱kán va̱ása ndiʼi-xa̱ʼa̱ ña̱ táxin íyo iniyó ni íyo tu̱ndóʼo nu̱úyó? Ná ka̱ʼa̱nyó xa̱ʼa̱ u̱ni̱ ña̱ʼa ña̱ ke̱ʼé ta̱ Jesús tá ni̱xi̱yora nu̱ú ñuʼú yóʼo, ta nda̱saa kivi kundiku̱nyó yichi̱ra tá va̱xi tu̱ndóʼo nu̱úyó.

4. Nda̱a̱ táki̱ʼva káchi 1 Tesalonicenses 5:17, ka̱ʼa̱n xa̱ʼa̱ sava ejemplo ña̱ náʼa̱ nu̱úyó ña̱ ku̱a̱ʼání yichi̱ ni̱ka̱ʼa̱n ta̱ Jesús xíʼin Ndióxi̱ tá si̱lóʼo kúma̱ní ña̱ kuvira.

⁴ (Kaʼvi 1 Tesalonicenses 5:17). * Tá kúma̱níka ña̱ kuvi  ta̱ Jesús ku̱a̱ʼání yichi̱ ni̱ka̱ʼa̱nra xíʼin yivára. Tá sa̱náʼa̱ra na̱ xi̱ndiku̱nñaʼá ndáa ki̱ʼva keʼéna ña̱ ndakaʼánna xa̱ʼa̱ra tá ná kuvira, siʼna ni̱ka̱ʼa̱nra xíʼin Ndióxi̱ saáví sa̱yáʼara si̱táva̱ʼa ndaʼa̱na, ta tuku ni̱ka̱ʼa̱nra saáví ta̱xira tá vino ndaʼa̱na (1 Cor. 11:23-25). Saátu ni̱ka̱ʼa̱nra xíʼin Ndióxi̱ tá kúma̱ní kitana ini veʼe nu̱ú xi̱xina ña̱ pascua (Juan 17:1-26). Tá ni̱xa̱a̱na nu̱ú yukú ña̱ Olivos, ku̱a̱ʼáníka yichi̱ ni̱ka̱ʼa̱nra xíʼin yivára kán (Mat. 26:36-39, 42, 44). Saátu ni̱ka̱ʼa̱nra xíʼin yivára tá xa̱a̱ ku̱nu̱mí ña̱ kuvira (Luc. 23:46). Táki̱ʼva xa̱a̱ ni̱ka̱ʼa̱nyó, ta̱ Jesús ni̱ka̱ʼa̱nra xíʼin Jehová ku̱a̱ʼání yichi̱ mií ki̱vi̱ ña̱ ndáyáʼviní.

5. ¿Nda̱chun va̱ása ndakú níxi̱yo ini na̱ apóstol?

⁵ Ta̱ Jesús ku̱ndeé-inira saáchi va̱ása nísandákoora ña̱ ka̱ʼa̱nra xíʼin yivára ña̱ ná chindeétáʼanra xíʼinra. Soo na̱ apóstol va̱ása níkeʼéna ña̱yóʼo ñuú saá, ña̱kán tá ki̱xaa̱ tu̱ndóʼo nu̱úna va̱ása ndakú níxi̱yo inina (Mat. 26:40, 41, 43, 45, 56). ¿Ndáaña sákuaʼayó xíʼin ña̱yóʼo? Ña̱ va̱ʼa nda̱kú koo iniyó xíʼin Ndióxi̱ xíniñúʼu ka̱ʼa̱n ni̱ʼiyó xíʼinra, táki̱ʼva ke̱ʼé ta̱ Jesús. Soo, ¿ndáaña ndukúyó nu̱ú Jehová tá káʼa̱nyó xíʼinra?

6. ¿Nda̱chun kivi chindeé ña̱ kándíxayó Ndióxi̱ miíyó ña̱ táxin koo iniyó?

⁶ Kivi ka̱ʼa̱nyó xíʼin Jehová ña̱ ná chindeétáʼanra xíʼinyó ña̱ ndakú ná koo ña̱ kándíxayóra (Luc. 17:5; Juan 14:1). Ta xíniñúʼuyó ña̱yóʼo, saáchi ta̱ Ndi̱va̱ʼa kotondosóra ndiʼi na̱ ndíku̱n ta̱ Jesús (Luc. 22:31). Ña̱ ndinuʼu-iniyó kándíxayó Ndióxi̱ chindeétáʼanña xíʼinyó ña̱ táxin koo iniyó ni ná kixi ku̱a̱ʼá tu̱ndóʼo nu̱úyó. ¿Nda̱chun? Saáchi, tá xa̱a̱ ke̱ʼéyó ndiʼi ña̱ xíni̱yó  ta va̱ása kúndeéka-iniyó, saá kúú ña̱ ndakooyó ña̱yóʼo ndaʼa̱ Jehová. Ña̱ kándíxayó ña̱ miíra kuchiñu xíʼinña, chindeétáʼanña xíʼinyó ña̱ táxin koo níma̱yó ta saátu ña̱ ndákanixi̱níyó (1 Ped. 5:6, 7).

7. ¿Ndáaña sákuaʼayó xíʼin ña̱ nátúʼun ta̱ Robert?

⁷ Tá ná ka̱ʼa̱nyó xíʼin Ndióxi̱ ná chindeétáʼanra xíʼinyó, ña̱ táxin koo iniyó, ni nda̱a̱ ndáaka ña̱ ná ndoʼoyó. Ná kotoyó ndáaña ndo̱ʼo ta̱ Robert, iin ta̱ anciano ta̱ nda̱kú íyo ini xíʼin Ndióxi̱, ta̱ xa̱a̱ kúúmií yáʼaka 80 ku̱i̱ya̱. Káʼa̱nra ndáaña kéʼéra ña̱ táxin íyo inira: “Ña̱ chíndeétáʼanní xíʼi̱n kúú consejo ña̱ va̱xi nu̱ú Filipenses 4:6, 7 ña̱ va̱ʼa kuchiñui̱ xíʼin ndiʼi tu̱ndóʼo ña̱ ndóʼi̱. Sava xi̱kuma̱ní xu̱ʼún nu̱úi̱, ta ni̱xi̱yo iin tiempo ña̱ va̱ása níxikuukai̱ anciano”. Ta káʼa̱nkara: “Káʼi̱n xíʼin Ndióxi̱ tá kíxáʼa ndíʼi̱-inii̱. Ki̱vi̱ káʼi̱n xíʼinra, saá kúú ña̱ táxinníka íyo inii̱”.

8. Táki̱ʼva káchi Juan 8:29, ¿ndáa xa̱ʼa̱ inkaka ña̱ʼa táxin ni̱xi̱yo ini ta̱ Jesús?

⁸ (Kaʼvi Juan 8:29). * Táxin ni̱xi̱yo ini ta̱ Jesús ni chi̱ka̱a̱na ku̱a̱chira. ¿Nda̱chun? Saáchi ku̱nda̱a̱-inira ña̱ sákusiíra-ini yivára. Ka̱ndíxa ndiʼira ña̱ ni̱ka̱ʼa̱n yivára ni tá ki̱xi tu̱ndóʼo nu̱úra. Xa̱ʼa̱ ña̱ xi̱kuni̱níra Jehová, chi̱ka̱a̱ra ndee̱ ña̱ kachíñura nu̱úra. Tá kúma̱níka ña̱ kixira nu̱ú ñuʼú yóʼo, chi̱ndeétáʼanra xíʼin yivára (Prov. 8:30). Ta, tá ki̱xira nu̱ú ñuʼú yóʼo, si̱í ni̱xi̱yo inira tá na̱túʼunra xa̱ʼa̱ yivára (Mat. 6:9;  Juan 5:17). Ni̱kusi̱íní-inira xíʼin chiñu yóʼo (Juan 4:34-36).

9. ¿Nda̱chun táxin íyo iniyó tá ndíʼi̱ka-iniyó ña̱ natúʼunyó xa̱ʼa̱ Ndióxi̱?

⁹ Ndíku̱nyó yichi̱ ta̱ Jesús tá ná chika̱a̱yó ndee̱ ña̱ keʼéyó chiñu Ndióxi̱ ta ndi̱ʼi̱ka-iniyó xa̱ʼa̱ña (1 Cor. 15:58). Na̱ cristiano na̱ ndíʼi̱-ini xa̱ʼa̱ chiñu Ndióxi̱ síínva ndákanixi̱nína xa̱ʼa̱ ku̱a̱chi ña̱ ndóʼona (Hech. 18:5). Saáchi xíni̱yó ña̱ ndeéka íyo ku̱a̱chi nu̱ú na̱ yiví na̱ nátúʼunyó xíʼin xa̱ʼa̱ Ndióxi̱. Soo tá xáa̱na kúnda̱a̱-inina xa̱ʼa̱ Jehová ta kúʼvi̱-inina xíninara, kéʼéna ña̱ káʼa̱nra ta si̱íka íyona. Tá xíniyó ña̱yóʼo, saá kándíxakayó Jehová ña̱ kundaavara miíyó. Ta xa̱ʼa̱ ña̱ kándíxayóra kúú ña̱ táxin íyo iniyó. Saá ndóʼo iin ñá hermana ñá chíka̱a̱ní ndee̱ saáchi ndákavaní-iniñá ta ndákanixi̱níñá ña̱ va̱ása ndáyáʼviñá. Ñáyóʼo nátúʼunñá: “Ña̱ ndíʼi̱-inii̱ xa̱ʼa̱ ña̱ kakai̱ natúʼi̱n xa̱ʼa̱ Ndióxi̱ chíndeétáʼanña xíʼi̱n ña̱ va̱ása ndakavaní-inii̱ ta kusi̱íka-inii̱. Túvii̱ ña̱ xa̱ʼa̱ ña̱ íyo yatinkai̱ nu̱ú Jehová kúúña”.

10. ¿Ndáaña sákuaʼayó xíʼin ña̱ nátúʼun ñá Brenda?

¹⁰ Saátu ná kotoyó ña̱ ndóʼo iin ñá hermana ñá naní Brenda. Miíñá ta saátu ñá se̱ʼeñá ndóʼoná iin kue̱ʼe̱ ña̱ ndeéní ña̱ naní esclerosis múltiple. Ñá Brenda ta̱yi̱ tú ñúʼu llanta xa̱ʼa̱ níndúʼuñá ta ni kǒo ndee̱ñá. Sava xáʼa̱nñá sánáʼa̱ñá xa̱ʼa̱ Ndióxi̱ veʼe tá veʼe, soo ku̱a̱ʼáka yichi̱ káʼyiñá carta. Ñáyóʼo nátúʼunñá: “Tá ku̱nda̱a̱-inii̱ ña̱ va̱ása kivi ndaʼi̱ ti̱xin ñuyǐví yóʼo, ta nda̱kaniníxi̱níi̱ xa̱ʼa̱ ña̱yóʼo, saá ki̱xáʼi̱ chíka̱a̱i̱ ndee̱ ña̱ keʼékai̱ chiñu Ndióxi̱. Ña̱ sánáʼi̱ xa̱ʼa̱ Ndióxi̱ chíndeétáʼanníña xíʼi̱n ña̱ va̱ása ndi̱ʼi̱ní-inii̱. Chíndeétáʼantuña xíʼi̱n ña̱ ndi̱ʼi̱-inii̱ xa̱ʼa̱ na̱ yiví na̱ nátúʼi̱n xíʼin. Saátu sándakaʼánña yi̱ʼi̱ xa̱ʼa̱ ña̱ ndátui̱n koo chí nu̱únínu”.

11-13. a) ¿Nda̱saa ni̱na̱ʼa̱ na̱ apóstol ta̱ Jesús xíʼin inkakana ña̱ xi̱kuuna migora? b) ¿Nda̱saa chi̱ndeétáʼanna xíʼinra?

¹¹ Tá ni̱xi̱ka ta̱ Jesús sa̱náʼa̱ra nu̱ú ñuʼú yóʼo, ku̱a̱ʼání ña̱ʼa ndo̱ʼora. Soo na̱ apóstol, na̱ ni̱xi̱yo nda̱kú-ini xíʼinra, ni̱na̱ʼa̱na ña̱ ndixa kúúna migora, táʼan na̱ ka̱ʼa̱n Proverbios 18:24 xa̱ʼa̱, káchiña: “Íyo migo na̱ va̱ʼaníka kítáʼan xíʼinyó nu̱úka na̱ veʼeyó”. Nu̱ú ta̱ Jesús xi̱ndáyáʼviní na̱yóʼo. Ná ndakaʼányó chi tá tiempo saá, na̱ ñanira va̱ása níxikandíxanara (Juan 7:3-5). Ta ki̱xaa̱ iin tiempo ña̱ nda̱kanixi̱ní na̱ veʼera ña̱ ta̱ sána kúúra (Mar. 3:21). Soo síínní ni̱xi̱yo na̱ apóstol, na̱ nda̱kú ni̱xi̱yo ini xíʼinra. Ñuú tá kúma̱níka ña̱ kuvi ta̱ Jesús, ni̱ka̱ʼa̱nra xíʼinna: “Ndóʼó kúú na̱ íyo xíʼi̱n ndiʼi tiempo ni tá yáʼi̱ nu̱ú tu̱ndóʼo” (Luc. 22:28).

¹² Ni sava yichi̱ sa̱ndákavana-inira xíʼin ña̱ xi̱keʼéna, soo va̱ása níkiʼinníra kuenta xíʼin ña̱yóʼo, chi ña̱ xi̱kiʼinra kuenta xíʼin kúú ña̱ xi̱kandíxanara (Mat. 26:40; Mar. 10:13, 14; Juan 6:66-69). Ñuú tá kúma̱níka ña̱ kuvira, ni̱ka̱ʼa̱nra xíʼinna: “Kúúndó migoi̱, saáchi ndiʼi ña̱ sa̱náʼa̱ yivái̱ yi̱ʼi̱ sa̱náʼi̱ña ndóʼó” (Juan 15:15). Ña̱ nda̱a̱va kúúña, na̱ migora nda̱sandakúnína-inira. Ña̱ chi̱ndeétáʼanna xíʼinra ña̱ ni̱xi̱kara na̱túʼunra xa̱ʼa̱ Ndióxi̱ sa̱kúsi̱íníña-inira (Luc. 10:17, 21).

¹³ Su̱ví nda̱saa na̱ apóstol níxikuu migora, chi ni̱xi̱yo inka ná ñaʼá xíʼin inka na̱ ta̱a na̱ chi̱ndeétáʼanní xíʼinra ña̱ sa̱náʼa̱ra xa̱ʼa̱ Ndióxi̱. Savana ka̱nanara ña̱ ku̱ʼu̱nra kuxura xíʼinna (Luc. 10:38-42; Juan 12:1, 2). Inkatuna ni̱xa̱ʼa̱nna xíʼinra, ta xi̱niñúʼuna xu̱ʼúnna ña̱ chindeétáʼanna xíʼinra (Luc. 8:3). ¿Nda̱chun va̱ʼaní ni̱xi̱yo ini na̱ migo ta̱ Jesús? Saáchi saá  ni̱xi̱yo ini miíra xíʼinna. Ke̱ʼéra ku̱a̱ʼá ña̱ʼa xa̱ʼa̱na ta va̱ása níndukúra nu̱úna ña̱ va̱ása kuchiñuna xíʼin. Ni xi̱kuuna na̱ yiví ku̱a̱chi, ni saá ta̱xivara tíxa̱ʼvi ndaʼa̱na xa̱ʼa̱ ña̱ chi̱ndeétáʼanna xíʼinra. Ta saátu chi̱ndeétáʼanna xíʼinra ña̱ táxin ni̱xi̱yo inira.

14, 15. a) ¿Nda̱saa kivi ndani̱ʼíyó migoyó na̱ va̱ʼa? b) ¿Nda̱saa chindeétáʼanna xíʼinyó?

¹⁴ Tá íyo migoyó na̱ va̱ʼa-ini, chindeétáʼanna xíʼinyó ña̱ nda̱kú koo iniyó xíʼin Jehová. Ta ña̱ va̱ʼa koo migoyó na̱ va̱ʼa, xíniñúʼu va̱ʼa koo iniyó xíʼinna (Mat. 7:12). Tá kúú, tu̱ʼun Ndióxi̱ káʼa̱nña xíʼinyó ña̱ ná taxiyó miíyó ña̱ chindeétáʼanyó xíʼin inkana, soo xíniñúʼu chindeétáʼankayó xíʼin na̱ kúma̱ní ña̱ʼa nu̱ú á na̱ yáʼa iin tu̱ndóʼo (Efes. 4:28). Ná ndakanixi̱níyó xa̱ʼa̱ na̱ hermano ti̱xin congregación, na̱ xíniñúʼu ña̱ chindeétáʼanyó xíʼinna. ¿Á íyo iin na̱ publicador na̱ va̱ása kívi kita sa̱tá iin ña̱ʼa? ¿Á kivi ku̱ʼu̱nyó satáyó ña̱ʼa ña̱ xíniñúʼuna? ¿Á kivitu taxiyó loʼo ña̱ xíxiyó ndaʼa̱ na̱ kǒo xu̱ʼún nu̱ú? Ta, ¿á xíni̱yó kuniñúʼuyó sitio jw.org^® xíʼin ña̱ aplicación JW Library^®? Chi saá kivi chindeétáʼanyó xíʼin na̱ hermano ña̱ sakuaʼana ña̱ va̱xi nu̱úña. Tá ná ndi̱ʼi̱ka-iniyó xa̱ʼa̱ ña̱ chindeétáʼanyó xíʼin inkana, saá kúú ña̱ si̱íka koo iniyó (Hech. 20:35).

¹⁵ Na̱ migoyó, kivi chindeétáʼanna xíʼinyó tá ná ya̱ʼayó nu̱ú tu̱ndóʼo, tasaá táxin koo iniyó. Táki̱ʼva ke̱ʼé ta̱ Elihú, chi xi̱niso̱ʼora ña̱ ni̱ka̱ʼa̱n ta̱ Job xa̱ʼa̱ ña̱ʼa ña̱ sándi̱ʼi̱-inira, saátu na̱ migoyó kuniso̱ʼona miíyó tá ná ka̱ʼa̱nyó xíʼinna xa̱ʼa̱ ña̱ sándi̱ʼi̱-iniyó (Job 32:4). Soo va̱ása  xíniñúʼu kundatuyó ña̱ ná ka̱ʼa̱nna xíʼinyó ndáaña ndaka̱xinyó keʼéyó, soo kuniso̱ʼovayó consejo ña̱ taxina ndaʼa̱yó ña̱ va̱xi nu̱ú Biblia (Prov. 15:22). Ta, tá ná kixaa̱ iin ki̱vi̱ ña̱ kǒo ni loʼo xu̱ʼún ndaʼa̱yó, ná keʼéyó táki̱ʼva ke̱ʼé ta̱ rey David, ña̱ ta̱xira chi̱ndeétáʼan na̱ migora xíʼinra (2 Sam. 17:27-29). Ña̱ nda̱a̱ kúúña, táʼan na̱yóʼo kúú na̱ ndixa kúú migoyó (Sant. 1:17).

16. Nda̱a̱ táki̱ʼva káchi Filipenses 4:6, 7, ¿nda̱saa kivi ni̱ʼíyó ña̱ táxin koo iniyó? Ka̱ʼa̱n xa̱ʼa̱ña.

¹⁶ (Kaʼvi Filipenses 4:6, 7). * ¿Nda̱chun káʼa̱n Jehová ña̱ kivi taxira ña̱ táxin koo iniyó, soo “xa̱ʼa̱ ta̱ Cristo Jesús” taxira ña̱yóʼo ndaʼa̱yó? Saáchi, ña̱ va̱ʼa táxin koo xi̱níyó xíʼin níma̱yó, xíniñúʼu kunda̱a̱-iniyó xa̱ʼa̱ chiñu ña̱ kúúmií ta̱ Jesús ña̱ ta̱xi Ndióxi̱ ndaʼa̱ra, ta ndinuʼu-iniyó ná kandíxayóra. Ña̱ kúnda̱a̱-iniyó ña̱ kúkáʼnu-ini Ndióxi̱ xa̱ʼa̱ ku̱a̱chiyó tíxa̱ʼvi ña̱ ni̱xi̱ʼi̱ ta̱ Jesús xa̱ʼa̱yó, sándi̱koña-iniyó (1 Juan 2:12). Saátu ña̱ kúnda̱a̱-iniyó ña̱ kúú ta̱ Jesús rey ta̱ nda̱ka̱xin Ndióxi̱ kaʼndachíñu ta ndasaviíra ndiʼi ña̱ va̱ása va̱ʼa ña̱ kéʼé ta̱ Ndi̱va̱ʼa xíʼin ñuyǐvíra, saá kúú ña̱ ndátuyó koo ña̱ va̱ʼa chí nu̱únínu (Is. 65:17; 1 Juan 3:8; Rev. 21:3, 4). Saátu ña̱ kúnda̱a̱-iniyó ña̱ íyo ta̱ Jesús xíʼinyó tá nátúʼunyó xa̱ʼa̱ Ndióxi̱, chíndeétáʼanña xíʼinyó ña̱ ndakúka íyo iniyó (Mat. 28:19, 20). Ña̱ ndixa kúúña chi tá íyo ña̱ sándi̱ko-iniyó, ña̱ va̱ʼa ña̱ ndátuyó ta saátu ña̱ ndakú íyo iniyó, saá kúú ña̱ ndixa táxinní koo iniyó.

17. a) ¿Nda̱saa kivi táxin koo iniyó? b) Nda̱a̱ táki̱ʼva káchi Juan 16:33, ¿ndáaña kuchiñuyó keʼéyó?

¹⁷ Tá saá, ¿ndáaña keʼéyó ña̱kán táxin koo iniyó ni tá yáʼayó nu̱ú tu̱ndóʼo? Xíniñúʼu kundiku̱nyó yichi̱ ta̱ Jesús. Ña̱ nu̱ú, va̱ása xíniñúʼu sandákooyó ña̱ ka̱ʼa̱n ni̱ʼiyó xíʼin Ndióxi̱. Ña̱ u̱vi̱, ná kandíxayó ña̱ káʼa̱n Jehová ta ná natúʼunyó xíʼin ña̱ si̱í-ini ni tá va̱xi tu̱ndóʼo nu̱úyó. Ta ña̱ u̱ni̱, ná taxiyó chindeétáʼan na̱ migoyó xíʼinyó. Saá kúú ña̱ va̱ʼa koo xi̱níyó xíʼin níma̱yó chi Ndióxi̱ taxi ña̱ táxin kooña. Ta, nda̱a̱ táki̱ʼva ke̱ʼé ta̱ Jesús, kuchiñuyó ya̱ʼayó nu̱ú nda̱a̱ ndáaka tu̱ndóʼo ná kixi nu̱úyó (kaʼvi Juan 16:33). *