1. ¿Ndáaña kúni̱ ndiʼi miíyó na̱ ndásakáʼnu Ndióxi̱ keʼéyó, ta nda̱chun? (Koto na̱ʼná ña̱ va̱xi chí nu̱ú kíxáʼaña).

TA̱ JESÚS xa̱ʼndara chiñu yóʼo nu̱ú na̱ xi̱ndiku̱nñaʼá: “Kúáʼanndó nu̱ú ndiʼi na̱ yiví ña̱ iníísaá ñuyǐví ta sanáʼa̱ndóna” (Mat. 28:19). Ndiʼi miíyó na̱ ndásakáʼnu Ndióxi̱ xíniñúʼu saxínuyó ndiʼi chiñu ña̱ ta̱xira ndaʼa̱yó (2 Tim. 4:5). Saáchi iin chiñu ña̱ ndáyáʼviní kúúña ta xíniñúʼu kama keʼéyóña. Soo sana kivi ixayo̱ʼvi̱ña xíʼinyó ña̱ taváyó tiempo ña̱ saxínuyóña táki̱ʼva kúni̱yó.

2. ¿Ndáaña kivi ixayo̱ʼvi̱ xíʼinyó ña̱ saxínuyó chiñu ña̱ ta̱xi Ndióxi̱ ndaʼa̱yó?

² Íyo inkaka chiñu ña̱ ndáyáʼvi ña̱ kéʼéyó, ta ku̱a̱ʼá tiempoyó xíʼin ndee̱yó xíniñúʼuyó xíʼinña. Sana xíniñúʼu kachíñuyó ku̱a̱ʼání hora ña̱ va̱ʼa taxiyó ña̱ xíniñúʼu na̱ veʼeyó. Á sanatu ndáayó na̱ veʼeyó, á ndeé ndóʼoyó, á xa̱ʼa̱ ña̱ kúsuchí-iniyó, á xa̱ʼa̱ ña̱ xa̱a̱ ku̱chéeyó. ¿Nda̱saa kivi ya̱ʼayó nu̱ú ndiʼi ña̱yóʼo ta saxínuyó ndiʼi chiñu ña̱ ta̱xi Ndióxi̱ ndaʼa̱yó?

3. ¿Ndáaña sakuaʼayó xíʼin ña̱ ni̱ka̱ʼa̱n ta̱ Jesús nu̱ú Mateo 13:23?

³ Va̱ása xíniñúʼu ndakava-iniyó tá va̱ása kívi kachíñuyó ku̱a̱ʼá tiempo nu̱ú Jehová. Ta̱ Jesús ku̱nda̱a̱-inira ña̱ su̱ví ndiʼina kuchiñu inkáchi kachíñu nu̱ú Ndióxi̱ (kaʼvi Mateo 13:23). * Nu̱ú Jehová ndáyáʼviní ña̱ ná chíka̱a̱yó ndee̱ ña̱ kachíñuyó nu̱úra (Heb. 6:10-12). Xa̱ʼa̱ ña̱yóʼo, nu̱ú artículo yóʼo kotoyó ndáaña kivi keʼéyó ña̱kán siʼnaka xa̱ʼa̱ chiñu Ndióxi̱ ná kundi̱ʼi̱-iniyó, saátu ndáaña kivi keʼéyó ña̱  loʼo ña̱ʼa kuumiíyó, xíʼin ña̱ viíka sanáʼa̱yó na̱ yiví. Soo siʼnaka ná ka̱ʼa̱nyó xa̱ʼa̱, ndáaña kúni̱ káchi ña̱ saxínuyó ndiʼi chiñu ña̱ ta̱xi Ndióxi̱ ndaʼa̱yó.

4. ¿Ndáaña kúni̱ kachi ña̱ saxínuyó ndiʼi chiñu ña̱ ta̱xi Ndióxi̱ ndaʼa̱yó?

⁴ Ña̱ saxínuyó ndiʼi chiñu ña̱ ta̱xi Ndióxi̱ ndaʼa̱yó kúni̱ kachiña ña̱ chika̱a̱yó ndee̱ ña̱ natúʼunyó xíʼin ndiʼi na̱ yiví ta vií sanáʼa̱yóna. Soo Jehová va̱ása ndíʼi̱-inira xa̱ʼa̱ nda̱saa tiempo káchíñuyó nu̱úra, chi ña̱ ndíʼi̱ka-inira xa̱ʼa̱ kúú ña̱ nda̱chun kéʼéyóña. Tá kúʼvi̱-iniyó xíniyóra ta saátu kúʼvi̱-iniyó xíniyó na̱ yiví, saá kúú ña̱ chika̱a̱níkayó ndee̱ ña̱ saxínuyó ndiʼi chiñu ña̱ ta̱xira ndaʼa̱yó * (Mar. 12:30, 31; Col. 3:23). Xa̱ʼa̱ ña̱yóʼo kuniñúʼuyó ndiʼi ndee̱yó ña̱ keʼéyó chiñu yóʼo. Tá ndáyáʼvi chiñu Ndióxi̱ nu̱úyó, saá kúú ña̱ chika̱a̱yó ndee̱ ña̱ sanáʼa̱yó ndiʼi na̱ yiví.

5, 6. Ka̱ʼa̱n xa̱ʼa̱ iin ejemplo nda̱saa kivi saxínuyó ndiʼi chiñu ña̱ ta̱xi Ndióxi̱ ndaʼa̱yó ni tá va̱ása íyo ku̱a̱ʼá tiempo nu̱úyó.

⁵ Ná ndakanixi̱níyó xa̱ʼa̱ iin ta̱ loʼo ta̱ kútóoní kava carro, ta kéʼéra ña̱yóʼo tá íyo tiempo nu̱úra. Tá ni̱ya̱ʼa tiempo ta̱xina iin chiñu ndaʼa̱ra ña̱ kavara carro sábado xíʼin domingo. Soo xa̱ʼa̱ ña̱ va̱ása náni xu̱ʼún ña̱ satára ña̱ xíniñúʼura, káchíñura xíʼin na̱ albañil lunes iin saá nda̱a̱ viernes. Ku̱a̱ʼáníka ki̱vi̱ káchíñura xíʼin na̱yóʼo, soo ña̱ kútóoníkara kúú ña̱ kavara carro. Kúni̱ra sakuaʼa va̱ʼakara kavara túyóʼo, ta ña̱ chiñu yóʼo kúú ña̱ kúni̱ra keʼéra ndiʼi tiempo. Xa̱ʼa̱ ña̱yóʼo ki̱vi̱ íyo loʼo tiempo nu̱úra kávara carro.

⁶ Ki̱ʼva saá íyo ña̱ kéʼé miíyó, sana va̱ása kívi kuniñúʼuyó ndiʼi tiempo ña̱ kúni̱yó ña̱ sanáʼa̱yó na̱ yiví. Soo ña̱yóʼo kúú ña̱ kútóoníkayó keʼéyó. Chíka̱a̱níyó ndee̱ ña̱ vií sánáʼa̱yóna xa̱ʼa̱ Ndióxi̱. Soo xa̱ʼa̱ ña̱ íyo ku̱a̱ʼání chiñu nu̱úyó sana kivi nda̱ka̱tu̱ʼun xíʼin miíyó, ¿nda̱saa kivi saxínuyó ndiʼi chiñu ña̱ ta̱xi Ndióxi̱ ndaʼa̱yó?

7, 8. ¿Nda̱saa kivi kundiku̱nyó yichi̱ ta̱ Jesús ta keʼéyó ndiʼi chiñu ña̱ ta̱xi Ndióxi̱ ndaʼa̱yó?

⁷ Ta̱ Jesús va̱ʼaní yichi̱ sa̱ndákoora nu̱úyó xa̱ʼa̱ ña̱ va̱ʼaní ke̱ʼéra chiñu nu̱ú Ndióxi̱. Ña̱ xi̱ndayáʼvika nu̱úra kúú ña̱ natúʼunra xa̱ʼa̱ reino Ndióxi̱ (Juan 4:34, 35). Káni̱ní ni̱xa̱ʼa̱nra ña̱ va̱ʼa na̱túʼunra xíʼin ku̱a̱ʼání na̱ yiví. Ndiʼina na̱túʼunra xíʼin, veʼe tá veʼe xíʼin nu̱ú ya̱ʼvi. Tá ni̱xi̱yora nu̱ú ñuʼú yóʼo, chiñu Ndióxi̱ kúú ña̱ ni̱ndi̱ʼi̱ka-inira xa̱ʼa̱.

⁸ Ná chika̱a̱yó ndee̱ ña̱ kundiku̱nyó yichi̱ ta̱ Jesús ta ka̱ʼa̱nyó xíʼin na̱ yiví xa̱ʼa̱ Ndióxi̱ nda̱a̱ ndáaka nu̱ú íyona ta nda̱a̱ ndáaka hora kúúña. Ná ka̱ʼnu̱-iniyó xíʼin ña̱ kúni̱ miíyó ña̱ va̱ʼaka keʼéyó chiñu ña̱ ta̱xi Ndióxi̱ ndaʼa̱yó (Mar. 6:31-34; 1 Ped. 2:21). Sava na̱ hermano ti̱xin congregación kivi koona precursor especial, regular á auxiliar. Inkatuna sákuaʼana inka tu̱ʼun á inkatuna ku̱a̱ʼa̱nna nu̱ú xíniñúʼukana na̱ natúʼun xa̱ʼa̱ Ndióxi̱. Ta saátu íyo na̱ publicador na̱ ndeéní chíka̱a̱ ndee̱ ña̱ sánáʼa̱na na̱ yiví. Nda̱a̱ ndáaka chiñu kúú ña̱ kúúmiíyó, Jehová va̱ása ndúkúra nu̱úyó ña̱ keʼéyó iin ña̱ va̱ása kuchiñuyó xíʼin. Ndióxi̱ ta̱ si̱íní-ini kúúra ta kúni̱ra si̱í ná koo iniyó tá ku̱a̱ʼa̱nyó natúʼunyó xíʼin na̱ yiví (1 Tim. 1:11; Deut. 30:11).

9. a) ¿Ndáaña ke̱ʼé ta̱ Pablo ña̱ ni̱ndi̱ʼi̱ka-inira xa̱ʼa̱ chiñu Ndióxi̱ ni xi̱niñúʼu kachíñura? b) ¿Ndáaña káʼa̱n Hechos 28:16, 30, 31 xa̱ʼa̱ ña̱ va̱ʼaní ke̱ʼé ta̱ Pablo chiñu Ndióxi̱?

⁹ Saátu ta̱ apóstol Pablo, va̱ʼaní yichi̱ sa̱ndákoora nu̱úyó. Tá ni̱xi̱yora chí ñuu Corinto, ña̱ yichi̱ u̱vi̱ ña̱ ni̱xa̱ʼa̱nra xi̱tora na̱ congregación, ndeéní ka̱chíñura, chi va̱ása níxi̱yo ku̱a̱ʼá xu̱ʼúnra. Soo su̱ví chiñu yóʼo kúú ña̱ níxindayáʼvika nu̱úra. Ke̱ʼéra chiñu yóʼo ña̱ va̱ʼa kiʼinra loʼo xu̱ʼún ña̱ kuniñúʼura, ña̱ va̱ʼa natúʼunra xa̱ʼa̱ Ndióxi̱ xíʼin na̱ ñuu Corinto tasaá va̱ása taxina xu̱ʼún ndaʼa̱ra ña̱ kuniñúʼura (2 Cor. 11:7). Ni xi̱niñúʼu kachíñura, ni̱ndi̱ʼi̱níka-inira xa̱ʼa̱ chiñu Ndióxi̱ ta xi̱natúʼunra xa̱ʼa̱ Ndióxi̱ ndiʼi sábado. Soo tá ni̱ya̱ʼa loʼo tiempo “ki̱xáʼara ndeéní chíka̱a̱ra ndee̱ ña̱ natúʼunra xa̱ʼa̱ Ndióxi̱, ta na̱túʼunra xíʼin na̱ judío ña̱ va̱ʼa kandíxana ña̱ kúú ta̱ Jesús, ta̱ Cristo” (Hech. 18:3-5; 2 Cor. 11:9). Tá ni̱ya̱ʼa tiempo, tá nda̱kasinara u̱vi̱ ku̱i̱ya̱ ti̱xin iin veʼe ña̱ ñuu Roma, nda̱a̱ kán na̱túʼunra xíʼin na̱ xi̱xa̱ʼa̱n xi̱xitoñaʼá ta saátu xi̱kaʼyira sava carta (kaʼvi Hechos 28:16, * 30, 31). * Chi̱ka̱a̱-inira ña̱ nda̱a̱ ni iin ña̱ʼa ná va̱ása kasi nu̱úra ña̱ natúʼunra xa̱ʼa̱ Ndióxi̱. Ña̱kán ka̱ʼyíra ña̱yóʼo: “Xa̱ʼa̱ ña̱ va̱ʼaní-ini Ndióxi̱ ta̱xira chiñu yóʼo ndaʼa̱yó, ta va̱ása ndákava-iniyó” (2 Cor. 4:1). Nda̱a̱ táki̱ʼva ke̱ʼé ta̱ Pablo, saátu miíyó kivi saxínuyó chiñu ña̱ ta̱xi Ndióxi̱ ndaʼa̱yó, ni íyoní chiñu nu̱úyó.

10, 11. ¿Nda̱saa kivi saxínuyó ndiʼi chiñu ña̱ ta̱xi Ndióxi̱ ndaʼa̱yó ni tá ndeé ndóʼoyó?

¹⁰ ¿Ndáaña kivi keʼéyó tá xa̱a̱ ku̱chéeyó á ndeé ndóʼoyó ta va̱ása kívi kitayó natúʼunyó xa̱ʼa̱ Ndióxi̱ nda̱a̱ táki̱ʼva kúni̱yó? Tá saá ndóʼoyó, íyo inkaka ña̱ kivi keʼéyó ña̱ va̱ʼa natúʼunyó. Na̱ cristiano na̱ ni̱xi̱yo tá siglo nu̱ú, na̱túʼunna xíʼin na̱ yiví nda̱a̱ ndáaka nu̱ú ni̱xi̱yona. Chi̱ka̱a̱na ndee̱ ña̱ natúʼunna xíʼin na̱ yiví veʼe tá veʼe, ta saátu nda̱a̱ ndáaka nu̱ú íyo na̱ yiví (Hech. 17:17; 20:20). Ta, ¿ndáaña kivi keʼéyó tá va̱ása  kívi kakaníyó? Kivi kooyó nu̱ú yáʼa ku̱a̱ʼá na̱ yiví ta natúʼunyó xíʼinna xa̱ʼa̱ Ndióxi̱. Ta saátu kivi natúʼunyó xíʼinna xíʼin teléfono á xíʼin carta. Ku̱a̱ʼá na̱ publicador na̱ ndeé ndóʼo kúsi̱í-inina ña̱ kéʼéna ña̱yóʼo ña̱ va̱ʼa nátúʼunna xíʼin na̱ yiví.

¹¹ Ña̱kán kuchiñuvayó saxínuyó ndiʼi chiñu ña̱ ta̱xi Ndióxi̱ ndaʼa̱yó ni ndeé ndóʼoyó. Ná ka̱ʼa̱n tukuyó xa̱ʼa̱ ña̱ ke̱ʼé ta̱ apóstol Pablo. Ta̱yóʼo ni̱ka̱ʼa̱nra: “Ndiʼi ña̱ʼa va̱ʼa kéʼíi̱ña chi Ndióxi̱ táxi ndee̱ ndaʼíi̱” (Filip. 4:13). Xi̱niñúʼura ndee̱ yóʼo tá ni̱xa̱ʼa̱nra na̱túʼunra xa̱ʼa̱ Ndióxi̱ ta ndeé ndo̱ʼora. Ni̱ka̱ʼa̱nra xíʼin na̱ ñuu Galacia: “Kúnda̱a̱-inindó xa̱ʼa̱ ña̱ ndeé ndo̱ʼíi̱, ta ni saá na̱túʼi̱n xíʼinndó xa̱ʼa̱ Ndióxi̱ ña̱ yichi̱ nu̱ú” (Gál. 4:13). Saátu miíyó tá ndeé ndóʼoyó kivi natúʼunyó xa̱ʼa̱ Ndióxi̱ xíʼin na̱ doctor, ná enfermera á inkaka na̱ káchíñu hospital. Ku̱a̱ʼá na̱ yiví yóʼo va̱ása ndóona veʼena tá ku̱a̱ʼa̱nyó natúʼunyó xíʼinna.

12. ¿Ndáaña kúni̱ kachi ña̱ iinlá ña̱ʼa kotoyó nu̱ú?

¹² Ta̱ Jesús ni̱ka̱ʼa̱nra: “Nduchúnu̱úyó kúú ñuʼu̱ ña̱ túu̱n ku̱ñuyó. Ña̱kán, tá káxi va̱ʼa xítoún [á iinlá ña̱ʼa xítoún nu̱ú, táki̱ʼva káchi nota], yéʼé koo ndiʼi ku̱ñuún” (Mat. 6:22). ¿Ndáaña kúni̱ kachi tu̱ʼun yóʼo? Ña̱ va̱ása ndi̱ʼiní-iniyó ña̱ koo ku̱a̱ʼá ña̱ʼayó, chi iinlá ña̱ ndáyáʼvika kundi̱ʼi̱-iniyó xa̱ʼa̱, ta va̱ása taxiyó ña̱ inka ña̱ʼa kasi nu̱úyó ña̱ keʼéyó ña̱ kúni̱ Ndióxi̱. Saá ke̱ʼé ta̱ Jesús ta sa̱náʼa̱ra na̱ xi̱ndiku̱nñaʼá ña̱ ná ndi̱ʼi̱-inina xa̱ʼa̱ chiñu Jehová. Ndíku̱nyó yichi̱ ta̱ Jesús tá siʼnaka reino Ndióxi̱ nándukúyó, ta kéʼéyó ña̱ kúni̱ra (Mat. 6:33).

13. ¿Ndáaña kivi chindeétáʼan xíʼinyó ña̱ ndi̱ʼika-iniyó xa̱ʼa̱ chiñu Ndióxi̱?

 ¹³ Iin ña̱ kivi keʼéyó kúú ña̱ kuumiíyó loʼo ña̱ʼa, tasaá va̱ʼaka chindeétáʼanyó xíʼin inkana ña̱ ná xa̱a̱na sakuaʼana xa̱ʼa̱ Jehová. * ¿Á kivi loʼo hora kachíñuyó tasaá ku̱a̱ʼáka tiempo ku̱ʼu̱nyó natúʼunyó xíʼin na̱ yiví? ¿Á kivi sandákooyó sava ña̱ʼa ña̱ sásikiyó ña̱ kíndaa ku̱a̱ʼá tiempoyó?

14. ¿Ndáaña ke̱ʼé iin na̱ matrimonio ña̱ va̱ʼa ku̱a̱ʼáka tiempo natúʼunna xa̱ʼa̱ Ndióxi̱?

¹⁴ Ná kotoyó ña̱ ke̱ʼé iin ta̱ anciano, ta̱ naní Elías xíʼin ñá síʼíra. Káchira: “Va̱ása níkivi koondi̱ precursor tiempo saá, soo xi̱niñúʼu kixáʼandi̱ keʼéndi̱ sava ña̱ʼa. Ña̱kán ki̱xáʼandi̱ ke̱ʼéndi̱ savaña, ña̱ va̱ʼa keekandi̱ ku̱a̱ʼá tiempo sanáʼa̱ndi̱ na̱ yiví. Tá kúú, sa̱ndákoondi̱ ña̱ va̱ása kusikindi̱ ku̱a̱ʼání xu̱ʼún; saátu ki̱xáʼandi̱ loʼo hora xíniñúʼundi̱ ña̱ keʼéndi̱ inka ña̱ʼa ña̱ va̱ása ndáyáʼvi, chi ku̱nda̱a̱-inindi̱ ña̱ xi̱kindaaña ku̱a̱ʼání tiempondi̱, saátu ni̱ka̱ʼa̱nndi̱ xíʼin na̱ káchíñundi̱ xíʼin ña̱ ná taxina kachíñundi̱ loʼo hora. Tíxa̱ʼvi ña̱yóʼo va̱ʼa xi̱keendi̱ ña̱ natúʼundi̱ xa̱ʼa̱ Ndióxi̱ tá xi̱ku̱aá, ta xi̱kaʼvindi̱ xíʼin ku̱a̱ʼáka na̱ yiví, saátu xi̱xa̱ʼa̱nndi̱ xi̱natúʼunndi̱ xa̱ʼa̱ Ndióxi̱ ma̱ʼñú semana nda̱a̱ u̱vi̱ yichi̱ ña̱ iin yo̱o̱. Ni̱kusi̱íní-inindi̱”.

15, 16. Xa̱ʼa̱ ña̱ káʼa̱n 1 Timoteo 4:13, 15, ¿nda̱saa kivi viíka sanáʼa̱yó na̱ yiví? (Koto recuadro “ Ña̱ chindeétáʼan xíʼinyó ña̱ saxínuyó ndiʼi chiñu Ndióxi̱”).

¹⁵ Inka ña̱ kivi keʼéyó ña̱ va̱ʼa saxínuyó ndiʼi chiñu ña̱ ta̱xi Ndióxi̱ ndaʼa̱yó kúú ña̱ vií ná sanáʼa̱yó. Sava na̱ ka̱ʼvi va̱ʼa káʼa̱nna xíʼinna ña̱ ná sakuaʼakana ña̱ va̱ʼaka keʼéna  chiñuna. Saátu xíniñúʼu keʼé miíyó ña̱ sakuaʼakayó ña̱ va̱ʼa viíka sanáʼa̱yó (Prov. 1:5; kaʼvi 1 Timoteo 4:13, 15). *

¹⁶ ¿Nda̱saa kivi keʼéyó ña̱yóʼo? Xíniñúʼu kuniso̱ʼo va̱ʼayó ndiʼi ña̱ káʼa̱nna xíʼinyó ti̱xin reunión ña̱ naní Ña̱ Kéʼéyó na̱ Ndásakáʼnu Ndióxi̱. Ti̱xin reunión yóʼo sánáʼa̱kana miíyó nda̱saa viíka sanáʼa̱yó na̱ yiví. Tá kúú, tá táxi ta̱ presidente consejo ndaʼa̱ na̱ ni̱ya̱ʼa iin asignación, xíniñúʼu kuniso̱ʼo va̱ʼayó ña̱ káʼa̱nra xíʼinna ña̱ va̱ʼa sakuaʼakayó. Tasaá ná keʼéyó tá ku̱a̱ʼa̱nyó natúʼunyó xa̱ʼa̱ Ndióxi̱. Inkaka ña̱ kivi keʼéyó kúú ña̱ ka̱ʼa̱nyó xíʼin ta̱ kíʼin kuenta xíʼin grupo nu̱ú kítayó nátúʼunyó ña̱ ná chindeétáʼanra xíʼinyó á ña̱ ná ku̱ʼu̱nra xíʼinyó natúʼunyó xa̱ʼa̱ Ndióxi̱. Saátu kivi ka̱ʼa̱nyó xíʼin inka na̱ xíni̱ va̱ʼaka ná kitana xíʼinyó, tá kúú iin na̱ precursor á ta̱ superintendente ña̱ circuito. Ndiʼi ña̱yóʼo chindeétáʼanña xíʼinyó ña̱ kuniñúʼu viíyó tutu xíʼin video ña̱ va̱ʼa sanáʼa̱yó na̱ yiví. Saá kusi̱íníka-iniyó ña̱ kitayó sanáʼa̱yó ta kaʼviyó xíʼin na̱ yiví.

17. ¿Nda̱saa kúniyó tá sáxi̱nuyó ndiʼi chiñu ña̱ ta̱xi Ndióxi̱ ndaʼa̱yó?

¹⁷ Iin ña̱ va̱ʼaní kúú ña̱ táxi Jehová ña̱ káchíñuyó xíʼinra (1 Cor. 3:9). Ki̱vi̱ ndíʼi̱ka-iniyó xa̱ʼa̱ chiñu ña̱ ndáyáʼvi, ta chíka̱a̱yó ndee̱ ña̱ kéʼéyó chiñu Ndióxi̱ saá kúú ña̱ si̱íka íyo iniyó (Filip. 1:10; Sal. 100:2). Miíyó na̱ káchíñu nu̱ú Ndióxi̱ kándíxayó ña̱ taxira ndee̱ ndaʼa̱yó ña̱ va̱ʼa saxínuyó chiñu ña̱ ta̱xira ndaʼa̱yó ni íyo tu̱ndóʼo nu̱úyó (2 Cor. 4:1, 7; 6:4). Ni loʼo á ku̱a̱ʼá tiempo kachíñuyó nu̱ú Jehová, soo tá xíʼin ndiʼi níma̱yó kéʼéyóña, saá kusi̱íníka-iniyó (Gál. 6:4). Tá sáxi̱nuyó ndiʼi chiñu ña̱ ta̱xi Ndióxi̱ ndaʼa̱yó, saá náʼa̱yó ña̱ kúʼvi̱ní-iniyó xíniyóra ta saátu kúʼvi̱-iniyó xíniyó na̱ yiví. ¿Ndáaña va̱ʼa ndakiʼinyó xa̱ʼa̱ ña̱yóʼo? Ña̱ Biblia káchiña: “Saá sakǎkún miíún ta saátu ka̱ku na̱ xíniso̱ʼo ña̱ sánáʼún” (1 Tim. 4:16).