¿Á xa̱a̱ xíni̱ún xa̱ʼa̱ ña̱yóʼo?
Tá tiempo xi̱naʼá, ¿ndáaña xi̱niñúʼu keʼé iinna tá kúni̱na ku̱ʼu̱nna xíʼin tú barco?
TÁ TIEMPO ta̱ apóstol Pablo, va̱ása níxi̱yo barco tú ndíso na̱ yiví. Ña̱ va̱ʼa ku̱ʼu̱nna nu̱ú kúni̱na, siʼna xi̱nda̱ka̱tu̱ʼunna á íyo iin tú barco tú ndíso ña̱ʼa tú ku̱ʼu̱n chí nu̱ú kúni̱na ku̱ʼu̱nna ta á kivi ku̱ʼu̱nna xíʼinnú (Hech. 21:2, 3). Ni tá va̱ása ku̱ʼu̱n tú yóʼo chí nu̱ú kúni̱na ku̱ʼu̱nna, kiviva ndaana túyóʼo ta nda̱a̱ ndáa míí xi̱kundichinú kivi ndukúna inka tú ku̱a̱ʼa̱n yatinka nu̱ú kúni̱na ku̱ʼu̱nna (Hech. 27:1-6).
Savaví yo̱o̱ xi̱xika tú barco yóʼo, ta va̱ása níxi̱yo iin hora ña̱ keenú. Na̱ xi̱kachíñu xíʼin tú barco xi̱yi̱ʼvína xa̱ʼa̱ sava ña̱ʼa, tá kúú tá xítona ña̱ kúni̱ koon sa̱vi̱ á ña̱ ndeéní káni ta̱chí, tá saá kúu va̱ása ku̱ʼu̱nna xíʼinnú, saátu xi̱kandíxana ña̱ yíʼna, tá kúú tá xínina ndáʼyi iin tí cuervo nu̱ú tú barcona á tá xínina kándúʼu iin tú barco tú ndi̱ʼi-xa̱ʼa̱ yuʼú mar, tá saá kúu va̱ása ku̱ʼu̱nna xíʼinnú. Xáʼa̱nna xíʼinnú tá káni ta̱chí chí nu̱ú kúni̱na ku̱ʼu̱nna, chi ta̱chí kúú ña̱ chíndaʼá-ñaʼá ña̱ kivi ku̱ʼu̱nnú. Ña̱kán tá iin na̱ yiví nda̱ni̱ʼína iin tú barco tú ku̱ʼu̱n chí nu̱ú kúni̱na ku̱ʼu̱nna, xáa̱na nda̱a̱ yuʼú tá mar ta kán ndátuna nda̱a̱ ná kitanú.
Ta̱ historiador Lionel Casson káʼa̱n xa̱ʼa̱ ña̱yóʼo: “Na̱ ñuu Roma va̱ʼaní xi̱chindeétáʼanna xíʼin na̱ yiví na̱ kúni̱ ku̱ʼu̱n xíʼin tú barco, ña̱kán va̱ása kakana nandukúna iin barco tú ku̱ʼu̱nna xíʼin. Nu̱ú xi̱keenú ni̱xi̱yoña nu̱ú ndákitáʼan yu̱ta Tíber xíʼin tá mar. Ñuu ña̱ xi̱ndika̱a̱ yatin kán, ña̱ naní Ostia kúú nu̱ú ni̱xi̱yo ku̱a̱ʼání oficina. Ku̱a̱ʼá oficina yóʼo kúú nu̱ú xi̱kachíñu na̱ xáʼa̱n xíʼin tú barco: na̱ kíʼin kuenta xíʼin tú barco ñuu Narbona [chí nu̱ú kúú Francia vitin], na̱ kíʼin kuenta xíʼin tú barco ñuu Cartago [chí nu̱ú kúú Túnez vitin], [...] ta saá ni̱xi̱yo ku̱a̱ʼákaña. Na̱ kúni̱ ku̱ʼu̱n xíʼinnú xíniñúʼu ku̱ʼu̱nna nda̱ka̱tu̱ʼunna oficina na̱ kíʼin kuenta xíʼin tú barco tú ku̱ʼu̱n chí nu̱ú kúni̱na ku̱ʼu̱nna”.
Va̱ʼava ni̱xi̱yo ña̱yóʼo, chi tú barco kamaní xi̱xa̱ʼa̱nnú, soo i̱yotu ni̱xi̱yoña. Nda̱a̱ sava yichi̱ xi̱kiʼvi tú barco tú xi̱xa̱ʼa̱n ta̱ apóstol Pablo xíʼin, ti̱xin ti̱kui̱í, tá ni̱xa̱ʼa̱nra na̱túʼunra xa̱ʼa̱ Ndióxi̱ (2 Cor. 11:25).
