Kiʼin kuenta nda̱saa ndixi koʼún

TA̱ TONY, ta̱ xa̱a̱ ni̱ka̱ʼa̱nyó xa̱ʼa̱ nu̱ú artículo ña̱ nu̱ú, ta̱yóʼo va̱ʼava koora tá ná ndákunira tu̱ndóʼo ña̱ xi̱kuumiíra. Soo nda̱kanixi̱níra ña̱ kǒo ña̱ʼa kundoʼora ni xi̱xiʼiníra. ¿Nda̱chun nda̱kanixi̱níra saá?

Saáchi ndixi kúú tá xi̱taxi ña̱ xi̱nda̱kanixi̱níra saá. Ta kǒo níxi̱kiʼinra kuenta ta xi̱kiʼinva kue̱ʼe̱ miíra, tá kúú va̱ása níxi̱kusi̱í-inira. Ta tá xi̱xiʼiníra kǒo níxi̱kiʼinra kuenta xíʼin miíra.

Xa̱ʼa̱ ña̱ xi̱ndoʼora yóʼo kǒo níxi̱kunira keʼéra nda̱a̱ ni iin ña̱ʼa. Saátu ndo̱ʼo ta̱ Alberto. Tá xa̱ʼa̱ xi̱ ixayo̱ʼvi̱níña xíʼinra ña̱ ndakunira ña̱ xi̱keʼéra, ta̱yóʼo káchira: “Xi̱xiʼi seʼíi̱ ta tá ku̱a̱ʼáka xi̱xiʼíi̱ kǒo ní xi̱ndiʼi-inii̱ xa̱ʼa̱ ña̱yóʼo, saáchi ña̱ xi̱kuni̱i̱ kúú ña̱ koʼi̱ nda̱a̱ xi̱nii̱.” Ña̱kán ndiʼi ña̱ ni̱ka̱ʼa̱nna xíʼin na̱yóʼo, ta̱ Tony xíʼin ta̱ Alberto nda̱kanixi̱nína ña̱ kǒo ña̱ʼa kundoʼona ni xi̱ xi̱ʼinína ndixi. Soo mií ña̱ nda̱a̱ ku̱a̱ʼáníva ña̱ ke̱ʼé ndixi yóʼo xíʼinna. ¿Ndáaña kivi chindeétáʼan xíʼin na̱ ndóʼo saá?

Koto ndáaña kivi keʼún

Ku̱a̱ʼání na̱ sa̱ndákoo na̱ kǒo xíʼika ndixi ndíku̱nna consejo ta̱ Jesús ña̱ káchi: “Ña̱kán tá nduchúnu̱ú kúaʼún sándakavarí yóʼó ndaʼa̱ ku̱a̱chi, tavárí ta sákana xíkárí. Chi va̱ʼaka ná ndiʼi-xa̱ʼa̱ iin nduchúnu̱ún nu̱úka ña̱ ku̱ʼu̱n iníísaún ña̱ Gehena” (Mateo 5:29).

Ta̱ Jesús káxiní ni̱ka̱ʼa̱nra xa̱ʼa̱ ña̱yóʼo. Chi xi̱kunira chindeétáʼanra xíʼinyó ña̱ ná sandákooyó keʼéyó ndiʼi ña̱ʼa ña̱ kivi sákuxíka miíyó nu̱ú Ndióxi̱. Ta ña̱ sandákooyó ña̱yóʼo saxóʼvi̱níña miíyó ki̱ʼva xáʼndana iin táʼví ku̱ñu iin na̱ yiví, soo chindeétáʼanña xíʼinyó ña̱ kǒo koʼokayó ndixi. Tá iin na̱ yiví xa̱a̱ ni̱ka̱ʼa̱nna xíʼún ña̱ xíʼiniún ndixi, sandákoora va̱ása koʼokaúnrá. a Ni íxayo̱ʼvi̱níña xíʼún ña̱ sandákoúnrá saáchi va̱ʼaníka tá ndi̱ku̱n ná sandákoúnrá chi su̱víka ña̱ sandíʼi-xa̱ʼa̱rá ña̱ tákún.

Soo, ¿ndáaña kivi keʼé na̱ xíʼiní ta kǒo xíʼina nda̱a̱ xínina? ¿Ndáaña xíniñúʼu keʼéna ña̱ va̱ása koʼo ku̱a̱ʼánína ndixi?

Mií kivi ndani̱ʼína ña̱ kivi chindeétáʼan xíʼinna

1. Ka̱ʼa̱n xíʼin Ndióxi̱ ndiʼi ki̱vi̱. Ndiʼi na̱ kándíxa Ndióxi̱ ta kúni̱na sakúsi̱ína inira, Biblia káʼa̱n ña̱yóʼo xíʼinna: “Nu̱úka ña̱yóʼo nda̱a̱ ndáaka ña̱ ndóʼondó ka̱ʼa̱nndó xíʼin Ndióxi̱ xa̱ʼa̱ña, kuakundáʼvindó nu̱úra ta taxindó tíxa̱ʼvi ndaʼa̱ra ta ndukúndó ña̱ xíniñúʼundó nu̱úra, tá ná keʼéndó ña̱yóʼo, Ndióxi̱ va̱ʼaní sandíkora-inindó, ta nda̱a̱ miíndó kǒo kunda̱a̱-ini ndáa ki̱ʼva sandíkora-inindó. Ta saá kúú ña̱ kundaara níma̱ndó xíʼin ña̱ ndákanixi̱níndó, nani ndíku̱nndó ta̱ Cristo Jesús” (Filipenses 4:​6, 7). Soo ¿ndáaña kivi ka̱ʼún xíʼin Ndióxi̱ ña̱ va̱ʼa táxi̱n koo iniún?

Ña̱ va̱ʼa sandákoún ña̱yóʼo xíniñúʼu sandákoún ndixi ta kixáʼún keʼún chiñu ña̱ xíniñúʼu keʼún. Tá ná ka̱ʼún xíʼin Ndióxi̱ ndáaña kúni̱ún keʼún ta̱kán chindeétáʼanra xíʼún ña̱ sandákoún ña̱ va̱ása koʼokaún ta saá kǒo kixi tu̱ndóʼo nu̱ún. Proverbios 28:13 káʼa̱nña xa̱ʼa̱ ña̱yóʼo: “Na̱ sási yuʼú xa̱ʼa̱ ku̱a̱china kǒo ña̱ va̱ʼa ndakiʼinna, soo na̱ náʼma̱ ku̱a̱china ta va̱ása kéʼékanaña koo káʼnuva-ini Ndióxi̱ xa̱ʼa̱na”. Ta̱ Jesús ni̱ka̱ʼa̱nra ña̱ ná ka̱ʼa̱nyó ña̱yóʼo xíʼin Ndióxi̱: “Ta kǒo taxiún ndakavandi̱ ndaʼa̱ ku̱a̱chi ta sakǎku ndi̱ʼi̱ ndaʼa̱ ta̱ Ndi̱va̱ʼa” (Mateo 6:​13). ¿Ña̱kán ndáaña xíniñúʼu keʼún ña̱ va̱ʼa na̱ʼún ña̱ xíʼin ndiʼi-iniún káʼún xíʼin Ndióxi̱? Ta ¿Ndáa míí ndani̱ʼún ña̱ kúni̱ún kunda̱a̱-iniún xa̱ʼa̱?

2. Taxi ná chindeétáʼan consejo ña̱ va̱xi nu̱ú Biblia xíʼún Ndakaʼán chi tu̱ʼun Ndióxi̱ káʼa̱nña: “Tu̱ʼun Ndióxi̱ ña̱ táku kúúña ta kúúmiíníña ndee̱, [...] ta kivi na̱ʼa̱ña ndáaña ndákanixi̱níyó ta saátu ña̱ ñúʼu níma̱yó (Hebreos 4:12). Iin ña̱ chíndeétáʼan xíʼin ku̱a̱ʼání na̱ xi̱xiʼi ndixi kúú ña̱ ndiʼi ki̱vi̱ xi̱kaʼvina versículo ña̱ va̱xi nu̱ú Biblia ta xi̱ndakanixi̱nína xa̱ʼa̱ ña̱yóʼo. Táki̱ʼva saá ni̱ka̱ʼa̱n iin ta̱ káʼyí salmo, “Si̱íní íyo na̱ va̱ása ndíku̱n consejo na̱ yiví na̱ kéʼé ña̱ kini, [...] ña̱ kútóokana kaʼvina kúú ley Jehová, ñuú xíʼin káʼñu káʼvinaña ta ndákanixi̱nína xa̱ʼa̱ña”. Ta ña̱yóʼo káʼa̱nkaña: “Ndiʼi ña̱ keʼéna va̱ʼaní kanaña” (Salmo 1:1-3).

Ta̱ Alberto, xi̱chika̱a̱níra ndee̱ ña̱ va̱ása koʼokara saáchi xi̱kaʼvira Biblia xíʼin na̱ testigo Jehová, ta̱yóʼo káchira: “Kúnda̱a̱ káxi inii̱ Biblia kúú ña̱ chi̱ndeétáʼan xíʼi̱n ña̱ va̱ása koʼokai̱, chi tá kǒo ña̱yóʼo ná chíndeétáʼan xíʼi̱n sana xa̱a̱ ni̱xi̱ʼi̱vai̱”.

3. Chikaa̱ ndee̱ ña̱ ka̱ʼnu̱ iniún. Biblia káʼa̱nña ña̱ savana, tá ta̱ʼán sakúaʼana xa̱ʼa̱ Ndióxi̱ xi̱xiʼinína soo “espíritu santo Ndióxi̱” chi̱ndeétáʼan xíʼinna ña̱ sa̱ndákoona ña̱ kǒo xíʼikana (1 Corintios 6:​9-11). ¿Ndáa ki̱ʼva sa̱ndákoona ña̱ va̱ása xíʼikana? Espíritu santo Ndióxi̱ kúú ña̱ chi̱ndeétáʼan xíʼinna ña̱ sa̱ndákoona ña̱yóʼo. Tu̱ʼun Ndióxi̱ káʼa̱nña ña̱yóʼo: “Va̱ása xi̱niindó xíʼin vino, [...] nu̱úka ña̱yóʼo ndakundeéndó ndakiʼinndó espíritu santo Ndióxi̱”. (Efesios 5:18; Gálatas 5:​21-23). Ña̱yóʼo ni̱ka̱ʼa̱n ta̱ Jesucristo “yivándó ta̱ íyo chí ndiví taxivara espíritu santo ndaʼa̱ na̱ ndúkúña nu̱úra”. Ña̱kán ni̱ka̱ʼa̱nra ña̱yóʼo: “Ndakundeéndó ndukúndó ña̱ va̱ʼa nu̱ú Ndióxi̱ ta taxiraña ndaʼa̱ndó” (Lucas 11:9, 13).

Ña̱kán, na̱ kúni̱ sakúsi̱í-ini Ndióxi̱ xíniñúʼu ka̱ʼnu̱-inina. Ta iin ña̱ kivi keʼéna kúú ña̱ kaʼvina Biblia ta ndakanixi̱nína xa̱ʼa̱ ña̱ káʼa̱nña ta ndiʼi tiempo ka̱ʼa̱nna xíʼin Ndióxi̱. Tá ndákava-iniyó ná ndakaʼányó xa̱ʼa̱ tu̱ʼun yóʼo: “soo tá ná keʼéyó ña̱ kúni̱ espíritu santo Ndióxi̱ xa̱a̱yó kutakuyó ndiʼi tiempo. Ná kǒo sandákooyó keʼéyó ña̱ va̱ʼa, chi tá ná chika̱a̱níyó ndee̱ ña̱ keʼéyóña ndakiʼinvayó ña̱ va̱ʼa” (Gálatas 6:​8, 9).

4. Kiʼin kuenta ndáana kútáʼún xíʼin. Proverbios 13:20 káʼa̱nña ña̱yóʼo: “Na̱ kítáʼan xíʼin na̱ ndíchi, ndíchi koona, soo na̱ kítáʼan xíʼin na̱ kíʼvi kǒo ña̱ va̱ʼa ndakiʼinna”. Va̱ʼaníka tá ná ka̱ʼún xíʼin na̱ migoún ña̱ va̱ása koʼokaún ndixi. Ta kǒo ndakanda̱-iniún tá káʼa̱n kúáchina xa̱ʼún ta saátu tá íxandúxana xíʼún ña̱ koʼún. Biblia xa̱a̱ ni̱ka̱ʼa̱nvaña ña̱ káʼa̱n kúáchina xa̱ʼún tá ná sandákoún koʼún ndixi (1 Pedro 4:​3, 4). Tásaá kéʼéna xíʼún va̱ʼaka sandákoo ña̱ kǒo kitáʼankaún xíʼinna.

5. Ndakaxin ndáaña va̱ása xíniñúʼu keʼún. Romanos 12:2 káchiña: “Ta va̱ása taxindó ña̱ nasama ña̱ ñuyǐví yóʼo miíndó; va̱ʼaka taxindó ña̱ ná nasama Ndióxi̱ ña̱ ndákanixi̱níndó, tasaá kunda̱a̱-inindó ndáaña kúú ña̱ kúni̱ Ndióxi̱ keʼéndó ta ndáaña kúú ña̱ va̱ʼa ta ndáaña kúú ña̱ kútóora.” ¿Á kúni̱ún sakúsi̱íún ini Ndióxi̱? Ña̱kán kuniso̱ʼo consejo ña̱ va̱xi nu̱ú Biblia, ta su̱ví ña̱ káʼa̱n na̱ yiví yóʼo. Soo ¿ndáa ki̱ʼva kunda̱a̱-iniún ndáaña va̱ása xíniñúʼu keʼún?

Ña̱ xíniñúʼu keʼún: tá xa̱a̱ nda̱ñúʼu ña̱ xínitúni̱ún ta va̱ása kúnda̱a̱ka-iniún kúni̱ kachiña ña̱ ku̱a̱ʼání xi̱ʼún. Ña̱kán tá kúni̱ún koʼún ya̱chi̱ka ndakanixi̱níún nda̱saa ndixi koʼún. Ta kiʼún kuenta míí ndíka̱ún. Ta ndakaʼán: va̱ʼaka kiʼún kuenta su̱víka ña̱ xi̱niún.

6. Xíniñúʼu sakúaʼún ka̱ʼún va̱ása. Tu̱ʼun Ndióxi̱ káʼa̱nña, “Tá xa̱a̱ káʼa̱nndó keʼéndó iin ña̱ʼa, keʼéndóña. Tá xa̱a̱ káʼa̱nndó ña̱ kǒo keʼéndóña, va̱ása keʼéndóña” (Mateo 5:37). Tá iin na̱ yiví káʼa̱nna xíʼún ña̱ koʼún ndixi, ka̱ʼa̱n va̱ása. Soo xíʼin ña̱ to̱ʼó ka̱ʼún xíʼinna, nda̱a̱ táki̱ʼva káʼa̱n Colosenses 4:6: “Nda̱a̱ táki̱ʼva ndúya̱si̱n iin ña̱ʼa ña̱ xíxina tá kíta ñi̱i̱ xíʼinña saá xíniñúʼu koo tu̱ʼun ña̱ ka̱ʼa̱nndó, viíní ná kooña ña̱ va̱ʼa kunda̱a̱-inindó ndáa ki̱ʼva ndakuiinndó yuʼú iin iinna”.

7. Ndukú na̱ kivi chindeétáʼan xíʼún. Ka̱ʼa̱n xíʼin na̱ migoún na̱ kúnda̱a̱-ini xíʼin tu̱ʼun Ndióxi̱ ña̱ chindeétáʼanna xíʼún ña̱ va̱ása koʼokaún ndixi. Tu̱ʼun Ndióxi̱ káʼa̱nña: “Va̱ʼaníka u̱vi̱na nu̱úka iinlána, chi ku̱a̱ʼání ña̱ va̱ʼa ndakiʼinna xa̱ʼa̱ chiñuna. Saáchi tá iinna ná ndakavana, na̱ kítáʼan xíʼinna kivi ndaniʼinana” (Eclesiastés 4:​9, 10; Santiago 5:​14, 16). Iin Institución ña̱ naní Nacional sobre el Abuso del Alcohol y el Al­coholismo, ña̱ íyo chí Estados Unidos, ni̱ka̱ʼa̱nña ña̱yóʼo: “Tá ndeéní kúni̱ún koʼún ka̱ʼa̱n xíʼin iin na̱ migoún á xíʼin iin na̱ veʼún ña̱ ná chindeétáʼanna xíʼún”.

8. Chika̱a̱ iniún ña̱ va̱ása koʼokaún. Santiago 1:​22, 25 káchiña: “Va̱ása kuniso̱ʼo kuitíndó ña̱ káʼa̱n tu̱ʼun Ndióxi̱, chi xíniñúʼu keʼéndó ña̱ káʼa̱n ña̱yóʼo ta va̱ása sandáʼvindó miíndó xíʼin ña̱ vatá ña̱ ndákanixi̱níndó. Ley Ndióxi̱ va̱ʼaní íyoña, ta sáñáña na̱ yiví. Na̱ ndákaniníxi̱ní xa̱ʼa̱ ña̱yóʼo ta kéʼéna ña̱ káʼa̱nña, va̱ása íyona nda̱a̱ táki̱ʼva íyo na̱ yiví na̱ xíniso̱ʼo kuití ta nándósó-inina xa̱ʼa̱ ña̱ káʼa̱nña, chi na̱yóʼo kéʼéna chiñu Ndióxi̱ ta si̱íní xa̱a̱na koona xa̱ʼa̱ ña̱ kéʼénaña”.

Ña̱ va̱ʼa sandákoún ña̱ kǒo koʼokaún

Su̱ví ndiʼiví na̱ xíʼi loʼo ndixi xáa̱na xíʼi ku̱a̱ʼánará. Na̱ xíʼi ni̱ʼi ndixi, xáa̱ iin tiempo ña̱ kǒo kúni̱kana sandákoonara, ña̱ va̱ʼa sandákoona ña̱ va̱ása koʼokana xíniñúʼu taxina ña̱ ná chindeétáʼan inkana xíʼinna ta saátu xíniñúʼu taxina ña̱ chindeé táʼan tu̱ʼun Ndióxi̱ xíʼinna. Ña̱yóʼo ni̱ka̱ʼa̱n ta̱ Alberto, “Tá xi̱kuni̱ ña̱ va̱ása koʼokai̱ xi̱kiʼviní ku̱ñui̱ xa̱ʼa̱ ña̱ xi̱kuni̱ koʼo tukui̱rá. Ni xa̱a̱ va̱ʼaní chíndeétáʼan tu̱ʼun Ndióxi̱ xíʼi̱n saátu ku̱ndaa̱-inii̱ ña̱ xi̱niñúʼu koʼi̱ sava ta̱tán.”

Ña̱yóʼo káʼa̱n ku̱a̱ʼání na̱ xi̱xiʼiní ndixi. b Ña̱ va̱ʼa sakúsi̱ína ini Ndióxi̱ ta va̱ása koʼokana sava na̱yóʼo nda̱a̱ ni̱xa̱ʼa̱nna hospital xa̱ʼa̱ ña̱ xi̱xiʼinína á ña̱ nda̱kiʼinna ta̱tán xa̱ʼa̱ ña̱ ki̱ʼin kue̱ʼe̱ miína xa̱ʼa̱ ña̱ xi̱xiʼinína ndixi. Ta nda̱a̱ ta̱ Jesús ni̱ka̱ʼa̱nra ña̱yóʼo: “Na̱ íyo va̱ʼa kǒo xíniñúʼuna iin doctor, chi na̱ ndeéndóʼova kúú na̱ xíniñúʼu iin doctor” (Marcos 2:17).

Va̱ʼaní tá ná kuniso̱ʼondó ña̱ káʼa̱n tu̱ʼun Ndióxi̱

Consejo ña̱ va̱xi nu̱ú Biblia tu̱ʼun Ndióxi̱ ta̱ nda̱a̱ kúúña. Ta̱kán kúni̱ra ña̱ viíní ná kundooyó ndiʼi tiempo. Ta̱ Alberto ta̱ xa̱a̱ veinticuatro ku̱i̱ya̱, sa̱ndákoora ña̱ kǒo xíʼikara ndixi, ta̱yóʼo ndákaʼánra ta káchira: “Nda̱kanda̱ní-inii̱ tá ku̱ndaa̱-inii̱ ña̱ kiviva nasamai̱ ña̱ va̱ása va̱ʼa xi̱keʼíi̱ saáchi Jehová xi̱kuni̱ra chindeétáʼanra xíʼi̱n, ta̱kán kúnda̱a̱va-inira xíʼin ña̱ ndo̱ʼi̱ ta ndíʼi-inira xa̱ʼíi̱ ta ki̱vi̱ xíniñúʼi̱ na̱ chindeétáʼan xíʼi̱n ta̱kán chíndeétáʼanníra xíʼi̱n. Táxiní tíxa̱ʼvi ndaʼa̱ra xa̱ʼa̱ ña̱ xi̱keʼéra xa̱ʼíi̱.”

Ña̱kán tá xíʼiníún ndixi kǒo ndakava-iniún saáchi ki̱ʼva ndóʼo miíún saá ndo̱ʼo ta̱ Alberto. Ta̱yóʼo ku̱chiñura sa̱ndákoora ndixi ta saátu na̱ xa̱a̱ sa̱ndákoo ndixi va̱ása ndándikó inina ña̱ sa̱ndákoona táyóʼo, ta saá kivi kundoʼo miíún.

Tá xa̱a̱ nda̱kanixi̱níún ña̱ loʼo kuitíra koʼún á ni va̱ása koʼokaúnra, ndakaʼán ña̱ káʼa̱n Jehová ña̱yóʼo: “Tá ndixa ná kuniso̱ʼún ña̱ káʼi̱n xíʼún. Tasaá va̱ʼaní koún nda̱a̱ táki̱ʼva íyo iin yu̱ta, ta ña̱ nda̱kú kéʼún kooña nda̱a̱ táki̱ʼva íyo tá mar” (Isaías 48:18).

[Nota]

[Cuadro xíʼin na̱ʼná]

 “¿Á xa̱a̱ ku̱a̱ʼa̱n sándakoi̱ ndixi?”

Ndakatu̱’ún ña̱yó’o miíún:

• “¿Á ku̱a̱ʼáka ndixi xíʼi̱ vitin?”

• “¿Á ndiʼi yichi̱ xíʼi̱?”

• “¿Á ndakúka tá xíʼi̱ vitin?”

• “¿Á xíʼi̱ xa̱ʼa̱ ña̱ ndíʼi̱-inii̱ á ña̱ va̱ʼa nadósoi̱ xa̱ʼa̱ tu̱ndóʼo ña̱ kúúmiíi̱?”

• “¿Á xa̱ʼa̱ káʼa̱n iin na̱ veʼi̱ xíʼi̱n á iin na̱ migoi̱ xa̱ʼa̱ ña̱ ku̱a̱ʼání xíʼi̱?”

• “¿Á táxi ndixi tu̱ndóʼo ndaʼíi̱ ti̱xin veʼi̱, nu̱ú káchíñui̱ á tá ku̱a̱ʼi̱n iinka ñuu?”

• “¿Á íxayo̱ʼvi̱ña xíʼi̱n tá kǒo xíʼi̱ iin semana?”

• “¿Á va̱ása va̱ʼa kúnii̱ tá kǒo xíʼi inkana xíʼi̱n?”

• “¿Á va̱ása káʼi̱n xíʼin inkana nda̱saa ndixi xíʼi̱?”

Tá ku̱a̱ʼá ña̱ va̱xi yóʼo kéʼékaún, xíniñúʼu kiʼún kuenta ña̱ xíniñúʼu loʼo ndixi koʼún.

[Cuadro xíʼin na̱ʼná]

Ña̱ va̱ʼa kǒo ndikó-iniún

Tá kúma̱níka koʼún ndixi, ndakanixi̱ní xa̱ʼa̱ ña̱yóʼo:

• “¿Á xíniñúʼu koʼi̱ ndixi, á va̱ása koʼi̱rá?”

Ña̱ xíniñúʼu keʼún: Tá kúnda̱a̱-iniún ña̱ íxayo̱ʼvi̱ña xíʼún sandákoún koʼún, va̱ʼaka va̱ása koʼún.

• “¿Nda̱saa ndixi xíniñúʼu koʼi̱?”

Ña̱ xíniñúʼu keʼún: Ya̱chi̱ka ndakanixi̱níún ña̱ sandákoún koʼún ndixi.

• “¿Ama koʼi̱ ndixi?”

Ña̱ xíniñúʼu keʼún: Va̱ása kavaún carro tá xa̱a̱ xíʼún á inkaka chiñu ña̱ xíniñúʼu kiʼún kuenta xíʼin, ni tá ndásakáʼnún Ndióxi̱. Ni tá ñúʼu se̱ʼún á xíʼún ta̱tán.

• “¿Míí xíniñúʼu koʼi̱?”

Ña̱ xíniñúʼu keʼún: Kǒo koʼún lugar nu̱ú va̱ása va̱ʼa, ni kǒo koʼo seʼún ni nu̱ú na̱ yiví na̱ va̱ása kútóo koʼo ndixi.

• “¿Ndáana xíniñúʼu koʼi̱ xíʼin?”

Ña̱ xíniñúʼu keʼún: Xíʼin na̱ migoún á xíʼin na̱ veʼún na̱ xíni ka̱ʼnu̱-ini, ta kǒo koʼún xíʼin na̱ kútóoní koʼo ndixi.

[Cuadro xíʼin na̱ʼná]

Inka ña̱ ndixa ku̱u

Ta̱ Supot, ta̱ íyo chí Tailandia, ta̱yóʼo xi̱xiʼiníra. Tá xa̱ʼa̱ ñuú kuití xi̱xiʼira, soo loʼo tá loʼo ki̱xáʼara xíʼira xi̱ta̱a̱n iinsaá nda̱a̱ xi̱kuaá. Ta ki̱xáʼara xíʼira nda̱a̱ xínira. Ta̱yóʼo ki̱xáʼara káʼvira Biblia xíʼin na̱ testigo Jehová ta ki̱xaa̱ra ku̱ndaa̱-inira ña̱ va̱ása kutóo Ndióxi̱ na̱ xíʼi ta nda̱a̱ xínina. Ña̱kán kǒo níxiʼikara loʼo tiempo. Tá xi̱ni na̱ veʼera ña̱ ki̱xáʼa tukura xíʼinra nda̱kavaní-inina.

Soo ni̱xa̱a̱vara xi̱kuʼvi̱-inira xi̱nira Jehová ta ndásakáʼnurara nda̱a̱ tá ki̱ʼva kúni̱ miíra. Migora na̱ ndásakáʼnu Jehová chi̱ndeétáʼan xíʼinra ta saátu chi̱ndeétáʼanna xíʼin na̱ veʼera ña̱ ná kǒo nandóso inina xa̱ʼa̱ra ta ku̱a̱ʼá tiempo ná ya̱ʼana xíʼinra. Ki̱ʼinra kuenta ña̱ káʼa̱n 1 Corintios 6:10 na̱ xíʼiní ndixi kǒo ki̱ʼvina ti̱xin Reino Ndióxi̱, ña̱yóʼo chi̱ndeétáʼan xíʼinra ña̱ sa̱ndákoora ndixi. Ta saátu ki̱ʼinra kuenta ña̱ va̱ása va̱ʼa íyo ña̱ kéʼéra.

Ku̱ndaa̱-inira ña̱ xíniñúʼu sandákoora ña̱ xíʼiníra. Tíxa̱ʼvi ña̱ espíritu santo Ndióxi̱ ña̱ xi̱niʼiña yichi̱ nu̱úra, ña̱ chi̱ndeétáʼan na̱ veʼera xíʼinra, ña̱ chindeétáʼan na̱ hermano xíʼinra, ndiʼi ña̱yóʼo chi̱kaa̱níña ndee̱ xíʼinra ña̱ sa̱ndákoora ndixi. Na̱ veʼera ku̱si̱íní-inina tá xi̱nina ña̱ nda̱kuchira. Ta vitin ta̱ Supot va̱ʼaní ndákutáʼanra xíʼin Ndióxi̱ ta ña̱yóʼo kúú ña̱ xi̱kuni̱ra tá xa̱ʼa̱ví ta saátu kúni̱ra chindeétáʼanra xíʼin inka na̱ yiví ña̱ ná sakúaʼana xa̱ʼa̱ Ndióxi̱.