• KU̱I̱YA̱ ÑA̱ KA̱KURA: 1941

• PAÍS: BENÍN

• INKA ÑA̱ KE̱ʼÉRA: KU̱A̱ʼÁNÍ ÑÁ SÍʼÍRA NI̱XI̱YO TA XI̱SA̱A̱-INIRA XI̱XINIRA NA̱ TESTIGO JEHOVÁ

ÑA̱ NDO̱ʼI̱:

Ka̱kui̱ chí Cotonou, iin ñuu káʼnu ña̱ íyo chí Benín. Na̱ católico xi̱kuundi̱ soo va̱ása níxi̱xa̱ʼa̱nndi̱ misa. Ku̱a̱ʼání na̱ católico ku̱a̱ʼání ñá síʼína ni̱xi̱yo, chi tiempo kán iin ña̱ va̱ʼava kúú ña̱ koo ku̱a̱ʼání ñá síʼí na̱ ta̱a. Saátu yi̱ʼi̱, ni̱xa̱i̱ xi̱kuumiíi̱ ku̱mí ñá síʼíi̱.

Tá ku̱i̱ya̱ 1970 ka̱ku ku̱a̱chi chí Benín. Xi̱kuni̱i̱ chindeétáʼi̱n xíʼin na̱ ñui̱ ta xa̱ʼa̱ ña̱yóʼo, ni̱ki̱ʼvii̱ xíʼin ña̱ política. Na̱ sa̱káku ku̱a̱chi kán xi̱sa̱a̱-inina xi̱xinina na̱ testigo Jehová chi va̱ása níxi̱chindeétáʼanna xíʼinna, ta nda̱a̱ yi̱ʼi̱ chi̱ndeétáʼan xíʼinna ña̱ i̱xandi̱va̱ʼana xíʼin na̱ Testigo. Tá ku̱i̱ya̱ 1976 ta̱vána ku̱a̱ʼání na̱ Testigo ta nda̱kanixi̱níi̱ ña̱ va̱ása ndikókana ñuu yóʼo.

BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱ ÑA̱ KÉʼÍI̱:

Ndiʼi ku̱a̱chi ña̱ ni̱xi̱yo ñuu yóʼo ndi̱ʼiña tá ku̱i̱ya̱ 1990, ta nda̱kanda̱ní-inii̱ tá xi̱nii̱ ña̱ ki̱xáʼa ndándikó tuku na̱ Testigo. Ki̱xáʼa ndákanixi̱níi̱ ña̱ sana mií Ndióxi̱ kúú ta̱ íyo xíʼinna. Tiempo saá na̱samai̱ chiñu ña̱ xi̱kuumiíi̱. Iin ta̱ xi̱kachíñu xíʼi̱n, testigo Jehová xi̱kuura, ta ki̱xáʼara nátúʼunra xíʼi̱n xa̱ʼa̱ ña̱ kándíxara. Ka̱ʼvira sava versículo nu̱úi̱ nu̱ú káʼa̱nña xa̱ʼa̱ Jehová ña̱ kúúra iin Ndióxi̱ ta̱ nda̱kúní-inii̱ ta kúʼvi̱ní-inira xínira miíyó (Deuteronomio 32:4; 1 Juan 4:8). Ku̱tóoníi̱ ña̱ ni̱ka̱ʼa̱nra xa̱ʼa̱ ndáa ki̱ʼva íyo Ndióxi̱, ta xa̱ʼa̱ ña̱ xi̱kuni̱i̱ kunda̱a̱ka-inii̱ xa̱ʼa̱ ña̱yóʼo ki̱xáʼara káʼvira xíʼi̱n.

Tasaá ndi̱ku̱n ki̱xáʼíi̱ xáʼi̱n reunión xíʼin na̱ testigo Jehová ta nda̱kanda̱ní-inii̱ xa̱ʼa̱ ña̱ kúʼvi̱ní-inina xínitáʼanna. Va̱ása níxi̱ndaka̱xinna na̱ yiví na̱ kutáʼan xíʼinna. Tá ku̱a̱ʼáka tiempo xi̱kitáʼi̱n xíʼin na̱yóʼo ni̱xa̱i̱ ki̱ʼii̱n kuenta ña̱ ndixa ndíku̱nna ta̱ Jesús (Juan 13:35).

Ku̱nda̱a̱-inii̱ ña̱ tá kúnii̱ kachíñui̱ nu̱ú Jehová, xi̱niñúʼu sandákoi̱ veʼe-ñu̱ʼu nu̱ú xi̱xaʼi̱n. I̱xayo̱ʼvi̱vaña xíʼi̱n chi xi̱ndi̱ʼi̱ní-inii̱ xa̱ʼa̱ ndáaña ka̱ʼa̱n inkana xa̱ʼíi̱. Ni ni̱ya̱ʼa tiempo, mií Jehová chi̱ndeétáʼan xíʼi̱n ña̱ va̱ása yi̱ʼvíi̱ ta sa̱ndákoi̱ veʼe-ñu̱ʼu nu̱ú xi̱xaʼi̱n.

Soo ni̱xi̱yo inkaka ña̱ xi̱niñúʼu keʼíi̱. Sa̱kuaʼi̱ nu̱ú Biblia ña̱ va̱ása kútóo Ndióxi̱ koo ku̱a̱ʼá ñá síʼí na̱ ta̱a (Génesis 2:​18-​24; Mateo 19:​4-6). Ni̱xa̱i̱ ku̱nda̱a̱-inii̱ ña̱ xíniñúʼu kindo̱i̱ xíʼin ñá nu̱ú íyo xíʼi̱n, ña̱kán ti̱ndaʼíi̱ xíʼinñá, xa̱ʼa̱ ña̱yóʼo ndiʼika ná ni̱xi̱yo xíʼi̱n, ni̱ka̱ʼi̱n xíʼinná ña̱ ná ku̱ʼu̱nná, soo xi̱taxii̱ xu̱ʼún ña̱ kuniñúʼu náyóʼo ña̱ kuxuná. Tá ni̱ya̱ʼa tiempo, u̱vi̱ náyóʼo ndu̱uná testigo Jehová.

ÑA̱ VA̱ʼA ÑA̱ NDA̱KIʼI̱N:

Ñá síʼíi̱ táʼan kúúkavañá católica, soo táxivañá ña̱ ndasakáʼnui̱ Jehová, ta inkáchi ki̱ʼinndi̱ kuenta ña̱ va̱ʼaka ta̱ yiví ndu̱i̱ vitin.

Tá ya̱chi̱ nda̱kanixi̱níi̱ ña̱ tá ná ki̱ʼvii̱ xíʼin ña̱ política kivi chindeétáʼi̱n xíʼin na̱ yiví na̱ ndóo yatin xíʼi̱n soo su̱ví saá níxi̱yoña. Vitin xa̱a̱ kúnda̱a̱-inii̱ ña̱ iinlá Reino Ndióxi̱ kúú ña̱ kivi ndasavií ku̱a̱chi ña̱ íyo nu̱ú ñuʼú yóʼo (Mateo 6:⁠9, 10). Táxiníi̱ tíxa̱ʼvi ndaʼa̱ Jehová chi sa̱náʼa̱ra yi̱ʼi̱ ña̱ keʼíi̱ ña̱ va̱ʼa ta ña̱yóʼo sákusi̱íníña-inii̱.

• KU̱I̱YA̱ ÑA̱ KA̱KURA: 1977

• PAÍS: BRASIL

• INKA ÑA̱ KE̱ʼÉRA: XI̱KUURA PASTOR PENTECOSTAL

ÑA̱ NDO̱ʼI̱:

Xa̱ʼnui̱ iin ñuu loʼo ña̱ naní Itu ña̱ íyo chí São Paulo, ñuu yóʼo íyoní na̱ yiví na̱ kéʼé ña̱ va̱ása va̱ʼa.

Xi̱keʼéníi̱ ku̱a̱chi kini ta xi̱ ixandi̱va̱ʼaníi̱ xíʼin inkana, saátu xi̱xikói̱ droga. Ta ki̱ʼii̱n kuenta ña̱ xa̱ʼa̱ ña̱ xi̱keʼíi̱ yóʼo kivi ku̱ʼi̱n veʼeka̱a á nda̱a̱ i̱yo kuvii̱, ña̱kán sa̱ndákoi̱ ña̱ keʼíi̱ ndiʼi ña̱yóʼo tasaá ki̱xáʼíi̱ xáʼi̱n veʼe-ñu̱ʼu ña̱ naní Pentecostal, ta nda̱a̱ ni̱xa̱i̱ ndu̱i̱ pastor.

Nda̱kanixi̱níi̱ ña̱ tá ná kundika̱i̱ xíʼinna veʼe-ñu̱ʼu yóʼo kivi chindeétáʼi̱n xíʼin na̱ ñuui̱, xa̱ʼa̱ ña̱yóʼo ki̱xáʼíi̱ sándaya̱ʼi̱ iin programa ti̱xin radio ña̱ sánáʼa̱ na̱ veʼe-ñu̱ʼu nu̱ú xi̱xaʼi̱n, tasaá ku̱a̱ʼání na̱ yiví ki̱xáʼa xíni̱ yi̱ʼi̱. Ta loʼo tá loʼo ki̱xáʼa kíʼi̱n kuenta ña̱ na̱ veʼe-ñu̱ʼu nu̱ú xi̱xaʼi̱n va̱ása níxindi̱ʼi̱-inina xa̱ʼa̱ na̱ xi̱xa̱ʼa̱n xíʼinndi̱ veʼe-ñu̱ʼu yóʼo ta ni va̱ása ní xi̱ ixato̱ʼóna Ndióxi̱. Ña̱ xi̱ndi̱ʼi̱níka-ini na̱yóʼo xa̱ʼa̱ kúú ña̱ tavána xu̱ʼún ndaʼa̱ na̱ yiví, ña̱kán va̱ása níxa̱ʼa̱nkai̱ veʼe-ñu̱ʼu yóʼo.

BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱ ÑA̱ KÉʼÍI̱:

Tá ki̱xáʼíi̱ káʼvii̱ xíʼin na̱ testigo Jehová, ki̱ʼi̱n kuenta ña̱ síín íyo na̱yóʼo nu̱ú na̱ inka veʼe-ñu̱ʼu. U̱vi̱ ña̱ʼa kúú ña̱ nda̱kanda̱ní-inii̱ xíʼin. Ña̱ nu̱ú, va̱ása káʼa̱n kuitína ña̱ kúʼvi̱-inina xínina Ndióxi̱ xíʼin na̱ yiví chi náʼa̱na ña̱yóʼo xíʼin ña̱ kéʼéna, ña̱ u̱vi̱, kǒo kíʼvina xíʼin ña̱ política ta ni kǒo xáʼa̱nna nu̱ú ku̱a̱chi (Isaías 2:4). U̱vi̱ ña̱yóʼo kúú ña̱ chi̱ndeétáʼan xíʼi̱n ña̱ kunda̱a̱-inii̱ ña̱ nda̱ni̱ʼíi̱ religión ña̱ nda̱a̱, ta ña̱yóʼo kúú ña̱ chindeétáʼan xíʼi̱n ña̱ xa̱i̱ kutakui̱ ndiʼi tiempo (Mateo 7:​13, 14).

Ku̱nda̱a̱-inii̱ ña̱ tá kúnii̱ sákusi̱íi̱-ini Ndióxi̱ xíniñúʼu nasamai̱ ndiʼi ña̱ kéʼíi̱. Tá kúú, xi̱niñúʼu vitá koo inii̱ ta ku̱a̱ʼáka tiempo ya̱ʼi̱ xíʼin na̱ veʼi̱. I̱xayo̱ʼvi̱vaña xíʼi̱n ña̱ nasamai̱ ña̱ kéʼíi̱, soo mií Jehová kúú ta̱ chi̱ndeétáʼan xíʼi̱n. Xa̱ʼa̱ ña̱ na̱samai̱, nda̱kanda̱ní-ini ñá síʼíi̱, ta ña̱yóʼo chi̱ndeétáʼan xíʼinñá ña̱ ni̱xa̱a̱ñá sa̱kuaʼakañá xa̱ʼa̱ Ndióxi̱. Tá ni̱ya̱ʼa loʼo tiempo, nda̱kaxinndi̱ xa̱a̱ndi̱ koondi̱ testigo Jehová. Ta iin ki̱vi̱, nda̱kuchi u̱vi̱ saándi̱.

ÑA̱ VA̱ʼA ÑA̱ NDA̱KIʼI̱N:

Miíi̱ xíʼin ñá síʼi̱ kúsi̱íní-inindi̱ chíndeétáʼanndi̱ xíʼin u̱ni̱ se̱ʼendi̱ ña̱ va̱ʼa viíka kutáʼanna xíʼin Jehová. Si̱íní íyondi̱. Táxii̱ tíxa̱ʼvi ndaʼa̱ Jehová xa̱ʼa̱ ña̱ chi̱ndeétáʼanra xíʼi̱n ña̱ ku̱nda̱a̱-inii̱ xa̱ʼa̱ ña̱ nda̱a̱. Biblia chíndeétáʼanña xíʼin na̱ yiví ña̱ nasamana ta yi̱ʼi̱ kúú iin ta̱ chi̱ndeétáʼanña xíʼin.

• KU̱I̱YA̱ ÑA̱ KA̱KUÑÁ: 1957

• PAÍS: AUSTRALIA

• INKA ÑA̱ KE̱ʼÉÑÁ: NI̱XO̱ʼVI̱ÑÁ TÁ NI̱XI̱YO LOʼOÑÁ

ÑA̱ NDO̱ʼI̱:

Ti̱xin veʼi̱ u̱xa̱ kúúndi̱ ka̱ku ta yi̱ʼi̱ kúú ñá káʼnuka, ta xa̱ʼnui̱ chí Newcastle (Nueva Gales del Sur). Yivái̱ kue̱ʼe̱ní ni̱xi̱yora ta xi̱kutóoníra koʼora ndixi. Saátu siʼíi̱ kue̱ʼe̱ní ni̱xi̱yoñá, ta xi̱ka̱ʼa̱n-ndi̱va̱ʼañá xíʼi̱n ta saátu xi̱kaniñá yi̱ʼi̱. Ndiʼi ki̱vi̱ xi̱ka̱ʼa̱nñá xíʼi̱n ña̱ ndi̱va̱ʼaní-inii̱ ta xa̱ʼa̱ ña̱kán ku̱ʼi̱n ndayá. Xi̱yiʼviníi̱ xíʼin ña̱ xi̱ka̱ʼa̱nñá xíʼin.

Ku̱a̱ʼání yichi̱ sa̱túkue̱ʼe̱ siʼíi̱ yi̱ʼi̱ ta xa̱ʼa̱ ña̱kán kúú ña̱ va̱ása níxikivika ku̱ʼi̱n escuela. Tá xi̱kuumiíi̱ 11 ku̱i̱ya̱, na̱ chíñu ki̱ndaana yi̱ʼi̱ ndaʼa̱ na̱ yivái̱ ta nda̱kiʼinna yi̱ʼi̱ ku̱a̱ʼa̱n xíʼinna. Tándi̱ʼi chi̱ka̱a̱na yi̱ʼi̱ ini iin veʼe nu̱ú ndóo ná monja, soo tá ni̱xi̱nui̱ 14 ku̱i̱ya̱ xi̱nui̱. Xa̱ʼa̱ ña̱ kǒo níxii̱n ndikói̱ veʼi̱, ki̱xáʼa íyoi̱ calle ña̱ naní Kings Cross (ña̱ íyo chí Sydney).

Tá ki̱xáʼíi̱ íyoi̱ chí calle, ki̱xáʼíi̱ xíniñúʼi̱ droga, ki̱xáʼíi̱ xíʼii̱ ndixi, ki̱xáʼíi̱ xítoi̱ nu̱ú kíta na̱ yiví chálá ta ki̱xáʼíi̱ kísi̱ xíʼin ku̱a̱ʼání na̱ ta̱a. Iin yichi̱ ndeéní ni̱yi̱ʼvíi̱. Ki̱ndoi̱ veʼe iin ta̱ ta̱a ta̱ kúúmií iin discoteca, tasaá iin ñuú ki̱xaa̱ u̱vi̱ na̱ ta̱a veʼera. Ta̱kán chi̱ndaʼára yi̱ʼi̱ ña̱ ná ku̱ʼi̱n ku̱su̱i̱n soo xi̱niso̱ʼovai̱ ña̱ nátúʼun táʼanna. Ni̱ka̱ʼa̱nra ña̱ xi̱kóra yi̱ʼi̱ nu̱ú u̱vi̱ na̱ ta̱a yóʼo ta na̱yóʼo chise̱ʼéna yi̱ʼi̱ ini iin tú barco ta kundakana yi̱ʼi̱ ku̱ʼi̱n nda̱a̱ Japón ña̱ va̱ʼa kachíñui̱ ini iin bar. Ni̱yi̱ʼvíníi̱, xa̱ʼa̱ ña̱yóʼo ndu̱kúi̱ ki̱ʼva ña̱ kitai̱ ti̱xin veʼe kán ta xi̱nui̱ ña̱ ndukúi̱ na̱ chindeétáʼan xíʼi̱n.

Nda̱ni̱ʼíi̱ iin ta̱a ta̱ sa̱kán ni̱xa̱a̱ ñuu kán ta ni̱ka̱ʼi̱n xíʼinra xa̱ʼa̱ ña̱ ndóʼi̱. Nda̱kanixi̱níi̱ ña̱ taxira xu̱ʼún ndaʼíi̱ soo nu̱úka ña̱yóʼo ni̱ka̱ʼa̱nra xíʼi̱n ña̱ ná ku̱ʼi̱n veʼera ña̱ va̱ʼa kuchii̱ ta saátu ña̱ kuxui̱. Ki̱ndoi̱ veʼera, ta tá ni̱ya̱ʼa iin ku̱i̱ya̱ ti̱ndaʼa̱ndi̱.

BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱ ÑA̱ KÉʼÍI̱:

Tá xi̱kaʼvii̱ xíʼin na̱ testigo Jehová, ku̱a̱ʼání nu̱ú ña̱ ndo̱ʼi̱. Ni̱sa̱a̱ní tá ku̱nda̱a̱-inii̱ ña̱ mií ta̱ Ndi̱va̱ʼa kúú ta̱ sákaku ku̱a̱chi, chi ku̱a̱ʼání yichi̱ xi̱ka̱ʼa̱nna xíʼi̱n, Ndióxi̱ kúú ta̱ sáxo̱ʼvi̱ na̱ yiví. Soo saátu va̱ʼaní ku̱nii̱ tá ku̱nda̱a̱-inii̱ ña̱ su̱ví Ndióxi̱ kúú ta̱ sáxo̱ʼvi̱ miíyó ta va̱ása chíndaʼára na̱ yiví ndayá nda̱a̱ táki̱ʼva sa̱náʼa̱na yi̱ʼi̱ tá loʼi̱.

Nda̱kanda̱ní-inii̱ tá xi̱nii̱ ña̱ chíndáyáʼviní na̱ testigo Jehová ña̱ va̱xi nu̱ú Biblia ta kéʼéna nda̱a̱ táki̱ʼva káʼa̱nña. Xi̱ ixayo̱ʼvi̱ña xíʼi̱n ña̱ vií koo inii̱ xíʼinna soo va̱ʼaní ni̱xi̱yo inina xíʼi̱n ta xi̱ ixato̱ʼóna yi̱ʼi̱.

Ña̱ i̱xayo̱ʼvi̱ka xíʼi̱n kúú ña̱ sandákoi̱ ña̱ ndakanixi̱níi̱ ña̱ va̱ása va̱ʼa xa̱ʼíi̱. Xi̱ndakanixi̱níi̱ ña̱ va̱ása ndáyáʼvíi̱ ta xi̱sa̱a̱-inii̱ xi̱xini̱ miíi̱, ni xa̱a̱ nda̱kuchii̱ soo xi̱ndakanikaxi̱níi̱ xa̱ʼa̱ ña̱yóʼo. Xi̱kuʼvi̱va-inii̱ xi̱xinii̱ Ndióxi̱ soo xi̱ndakanixi̱níi̱ ña̱ miíra va̱ása kivi xa̱a̱ra kuʼvi̱-inira kunira yi̱ʼi̱.

Tá ni̱ya̱ʼa xa̱ʼu̱n ku̱i̱ya̱ ña̱ nda̱kuchii̱, tá ni̱xa̱ʼi̱n iin reunión xi̱niso̱ʼi̱ iin discurso ña̱ ta̱xi iin ta̱ hermano ta ni̱ka̱ʼa̱nra xa̱ʼa̱ Santiago 1:​23 xíʼin 24. Nu̱ú versículo yóʼo chítáʼanña tu̱ʼun Ndióxi̱ xíʼin iin espejo nu̱ú kivi kotoyó miíyó nda̱a̱ táki̱ʼva xíto Jehová miíyó. Ki̱xáʼa ndákanixi̱níi̱ á inkáchi íyo ña̱ ndákanixi̱ní miíi̱ xíʼin ña̱ ndákanixi̱ní Jehová xa̱ʼa̱ ndáa ki̱ʼva íyoi̱. I̱xayo̱ʼvi̱níña xíʼi̱n kunda̱a̱-inii̱ ña̱ ndixa kúʼvi̱-inira xínira yi̱ʼi̱.

Tá ni̱ya̱ʼa loʼo ki̱vi̱ ka̱ʼvii̱ iin texto ña̱ chi̱ndeétáʼan xíʼi̱n ña̱ nasamai̱ ki̱ʼva ña̱ ndákanixi̱níi̱. Ña̱yóʼo kúú Isaías 1:​18, yóʼo káʼa̱n Jehová xíʼinyó: “Naʼandó ná ndasaviíyó ku̱a̱chi ña̱ kúúmiíyó [...]. Ni táki̱ʼva íyo color kúaʼa saá íyo ku̱a̱chindó, nduyaaña táki̱ʼva yaa nieve”. Nda̱kanixi̱níi̱ ña̱ mií Jehová kúú ta̱ káʼa̱n ña̱yóʼo xíʼi̱n: “Naʼa Vicky, ná ndasaviíyó ku̱a̱chi. Kúnda̱a̱va-inii̱ ndáa ki̱ʼva íyoún, kúnda̱a̱va-inii̱ ndáa ku̱a̱chi ni̱ki̱ʼviún, kúnda̱a̱-inii̱ ndáaña ndíka̱a̱ níma̱ún ta kúʼvi̱-inii̱ xínii̱ yóʼó”.

Ñuú saá ni loʼo kǒo níkivi ku̱su̱i̱n. Xi̱xikaka-inii̱ á ndixa kúʼvi̱-ini Ndióxi̱ xínira yi̱ʼi̱, soo ki̱xáʼa ndákanixi̱níi̱ xa̱ʼa̱ ña̱ ni̱xi̱ʼi̱ ta̱ Jesús xa̱ʼa̱yó. Saá ki̱ʼi̱n kuenta ña̱ xa̱a̱ ku̱a̱ʼání tiempo kúee íyo ini Jehová xíʼi̱n ta ku̱nda̱a̱-inii̱ ña̱ ku̱a̱ʼání yichi̱ ni̱na̱ʼa̱ra ña̱ kúʼvi̱-inira xínira yi̱ʼi̱. Xíʼin ña̱ xi̱ndakanixi̱níi̱ nda̱a̱ táki̱ʼva íyo ñá xi̱ka̱ʼa̱n ña̱yóʼo xíʼin Jehová saá xi̱kui̱: “Va̱ása kiviví xa̱ún kuʼvi̱-iniún kuniún yi̱ʼi̱. Ña̱ ta̱xiún se̱ʼún ni̱xi̱ʼi̱ra xa̱ʼíi̱, va̱ása kiviví chindeétáʼanña xíʼi̱n ña̱ ndoo ku̱a̱chii̱”. Xíʼin ña̱ xi̱ndakanixi̱níi̱ xi̱na̱ʼi̱ ña̱ va̱ása níxi̱chindayáʼvíi̱ ña̱ ni̱xi̱ʼi̱ ta̱ Jesús xa̱ʼíi̱. Soo vitin xa̱ʼa̱ ña̱ ndákanixi̱níi̱ xa̱ʼa̱ ña̱ va̱ʼa ña̱ ke̱ʼé Jehová xa̱ʼíi̱ kúnda̱a̱-inii̱ ña̱ ndixa kúʼvi̱-inira xínira yi̱ʼi̱.

ÑA̱ VA̱ʼA ÑA̱ NDA̱KIʼI̱N:

Va̱ʼaní kúnii̱ vitin ta va̱ása ndákavaka-inii̱ xa̱ʼa̱ ña̱ ke̱ʼíi̱ tá ya̱chi̱. Va̱ʼaní íyoi̱ xíʼin yiíi̱ vitin ta kúsi̱íní-inii̱ chi xíʼin ña̱ ndo̱ʼi̱ kivi chindeétáʼi̱n xíʼin inkana. Vitin túvii̱ ña̱ ki̱vi̱ tá ki̱vi̱ yatinka íyoi̱ nu̱ú Jehová.

• KU̱I̱YA̱ ÑA̱ KA̱KURA: 1974

• PAÍS: RUSIA

• INKA ÑA̱ KE̱ʼÉRA: XI̱KUTÓONÍRA KUNISO̱ʼORA YAA ÑA̱ HEAVY METAL

ÑA̱ NDO̱ʼI̱:

Ka̱kui̱ chí Vótkinsk ta na̱ veʼi̱, na̱ nda̱ʼví xi̱kuuna, yóʼotu ka̱ku iin ta̱ xi̱kaʼyí yaa ta̱ naní Piotr Ilič Chaikovski. Yivái̱ va̱ʼava ta̱ yiví xi̱kuura soo xi̱xiʼiníra ta xa̱ʼa̱ ña̱yóʼo xi̱kakuní ku̱a̱chi ti̱xin veʼi̱.

Xi̱ ixayo̱ʼvi̱ña xíʼi̱n kaʼvii̱ escuela, ta tá ni̱ya̱ʼa ku̱i̱ya̱, nda̱kanixi̱níi̱ ña̱ va̱ása kúchiñui̱ keʼíi̱ nda̱a̱ ni iin ña̱ʼa. Xa̱ʼa̱ ña̱yóʼo xi̱kukaʼanní nu̱úi̱ ta va̱ása níxi̱kandíxai̱ inkana ta xa̱ʼa̱ ña̱yóʼo va̱ása níxi̱kutói̱ ku̱ʼi̱n escuela. Tá kúú tá xi̱ka̱ʼa̱nna xíʼi̱n ña̱ ya̱ʼi̱ nu̱ú ndiʼi na̱ káʼvi xíʼi̱n ña̱ ka̱ʼi̱n xa̱ʼa̱ tarea ña̱ ke̱ʼíi̱, xi̱ ixayo̱ʼvi̱níña xíʼi̱n keʼíi̱ ña̱yóʼo nu̱ú ndiʼi na̱ káʼvi xíʼi̱n. Tá káʼvii̱ secundaria ta ndi̱ʼi iin ku̱i̱ya̱, nda̱taxina iin tutu ndaʼíi̱ ta ka̱ʼyína nu̱úña: “Íxayo̱ʼvi̱ña xíʼinra ña̱ ka̱ʼa̱nra nu̱ú chútú”. Ña̱yóʼo sa̱ndákavaníña-inii̱. Ki̱xáʼíi̱ ndákanixi̱níi̱ nda̱chunví tákui̱.

Ki̱xáʼíi̱ xíʼii̱ ndixi. Tá xa̱ʼa̱, va̱ʼava xi̱kuni̱i̱. Soo tá ku̱a̱ʼání ndixi xi̱xiʼi̱, xi̱sandíʼi̱ní ña̱yóʼo inii̱. Va̱ása níxi̱kunda̱a̱-inii̱ ndáa xa̱ʼa̱ kúú ña̱ tákui̱. Xi̱kusuchíní-inii̱, sava yichi̱ xi̱ndakasi̱ miíi̱ veʼi̱ ku̱a̱ʼá ki̱vi̱ ta va̱ása níxi̱kitai̱. Ki̱xáʼíi̱ ndákanixi̱níi̱ ña̱ kaʼní miíi̱.

Tá ni̱xi̱nui̱ 20 ku̱i̱ya̱, ki̱xáʼa kútói̱ kuniso̱ʼi̱ yaa ña̱ heavy metal. Tá xi̱xiniso̱ʼi̱ña, xi̱taxiníña ndee̱ ndaʼíi̱ túvii̱. Ki̱xáʼa kítáʼi̱n xíʼin na̱ xíniso̱ʼo táʼan yaa yóʼo, ta̱xii̱ ña̱ kuaʼnu yixí xi̱níi̱, ka̱i̱n so̱ʼi̱ ta ki̱xáʼa ndíxii̱ táki̱ʼva ndíxi na̱ xíta yaa yóʼo. Loʼo tá loʼo ki̱xáʼa va̱ása yíʼvikai̱ na̱ yiví, ta ndu̱kue̱ʼe̱níi̱ ta ña̱yóʼo ku̱a̱ʼání ku̱a̱chi sa̱kákuña xíʼin na̱ veʼi̱.

Ki̱xáʼa ku̱a̱ʼa̱n nása̱maníi̱. Nda̱kanixi̱níi̱ ña̱ tá ná kuniso̱ʼi̱ yaa yóʼo si̱íníka koi̱ soo su̱ví saá níxi̱yoña. Ta tá ku̱nda̱a̱-inii̱ ña̱ su̱ví ña̱ va̱ʼa kúú ña̱ kéʼé na̱ xíta yaa ña̱ xíniso̱ʼi̱, nda̱kavaní-inii̱.

Ta vitin, chi̱ka̱a̱-inii̱ ña̱ kaʼníi̱ miíi̱, soo va̱ása níkeʼíi̱ña chi ki̱xáʼíi̱ ndákanixi̱níi̱ xa̱ʼa̱ siʼíi̱. Ñáyóʼo xi̱kuʼvi̱ní-iniñá xi̱xiniñá yi̱ʼi̱ ta va̱ʼaní xi̱chindeétáʼanñá xíʼi̱n. Xi̱xoʼvi̱níi̱: va̱ása níxi̱kuni̱kai̱ kutakui̱ soo va̱ása níxikivi kaʼníi̱ miíi̱.

Ña̱ va̱ʼa ya̱ʼa inii̱ ki̱xáʼa káʼvii̱ libro na̱ ñuu Rusia. Nu̱ú iin libro ña̱ ka̱ʼvii̱ xi̱ka̱ʼa̱nña xa̱ʼa̱ iin ta̱ xi̱niʼi yichi̱ nu̱ú iin veʼe-ñu̱ʼu. Tasaá ki̱xáʼa kúnii̱ kachíñui̱ nu̱ú Ndióxi̱ ta chindeétáʼi̱n xíʼin na̱ yiví. Ke̱ʼíi̱ iin ña̱ʼa ña̱ nda̱a̱ ni iin yichi̱ ta̱ʼán keʼíi̱. Xíʼin ndiʼi níma̱i̱ ni̱ka̱ʼi̱n xíʼin Ndióxi̱ ña̱ ná chindeétáʼanra xíʼi̱n ña̱ kusi̱í-inii̱ kutakui̱. Tá káʼi̱n xíʼinra va̱ʼaní ki̱xáʼa kúnii̱. Tá ni̱ya̱ʼa u̱vi̱ hora nda̱kanda̱ní-inii̱ xíʼin iin ña̱ʼa ña̱ ku̱u. Iin ta̱ testigo Jehová ka̱nindaʼa̱ra yéʼi̱, ta ni̱ka̱ʼa̱nra xíʼi̱n á kúni̱ kaʼvii̱ Biblia. Nda̱kanixi̱níi̱ ña̱ saá nda̱kuiin Ndióxi̱ oración ña̱ ke̱ʼíi̱ nu̱úra. Nani saá ki̱xáʼa si̱íní kúnii̱ ta si̱íní íyoi̱.

BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱ ÑA̱ KÉʼÍI̱:

Ni i̱xayo̱ʼvi̱níña xíʼi̱n, sa̱kánai̱ ndiʼi ña̱ʼa ña̱ xi̱kuumiíi̱ ña̱ xi̱kitáʼan xíʼin ña̱ heavy metal. Ni saá va̱ása nínandósó kama inii̱ xa̱ʼa̱ yaa yóʼo. Tá xi̱yaʼi̱ nu̱ú xi̱xita yaa yóʼo xi̱ndakanixi̱níi̱ xa̱ʼa̱ ña̱ va̱ása va̱ʼa. Va̱ása níxi̱kuni̱i̱ sakái̱ ndiʼi ña̱ va̱ása va̱ʼa yóʼo xíʼin ndiʼi ña̱ va̱ʼa ña̱ xa̱a̱ sa̱kuaʼi̱, saáchi ña̱yóʼo kivi sakáña xi̱níi̱ xíʼin níma̱i̱. Xa̱ʼa̱ ña̱yóʼo va̱ása níxi̱yaʼakai̱ lugar kán. Tá xi̱ndakaʼíi̱n xa̱ʼa̱ ña̱ ke̱ʼíi̱ tá ya̱chi̱, xi̱ka̱ʼa̱nníi̱ xíʼin Jehová. Tasaá kúú ña̱ ki̱ʼi̱n kuenta ña̱ va̱ʼaní sa̱ndíko Ndióxi̱ inii̱ (Filipenses 4:7).

Tá xi̱kaʼvii̱ Biblia ki̱ʼi̱n kuenta ña̱ ndiʼi na̱ ndásakáʼnu Ndióxi̱ xíniñúʼu ka̱ʼa̱nna xa̱ʼa̱ ña̱ kándíxana xíʼin inka na̱ yiví (Mateo 28:​19, 20). Nda̱kanixi̱níi̱ ña̱ va̱ása kivi keʼíi̱ ña̱yóʼo, soo ki̱ʼi̱n kuenta ña̱ xi̱sakuaʼi̱ va̱ʼaní xi̱chindeétáʼanña xíʼi̱n, saáchi xi̱sandíkoña-inii̱ ta xi̱kusi̱í-inii̱. Ku̱nda̱a̱-inii̱ ña̱ saátu inka na̱ yiví xíniñúʼu kunda̱a̱-inina xa̱ʼa̱ ña̱ nda̱a̱. Ña̱kán ni xi̱yiʼvíníi̱ keʼíi̱ ña̱yóʼo, ki̱xáʼa káʼi̱n xíʼin inka na̱ yiví xa̱ʼa̱ ña̱ kándíxai̱. Ña̱yóʼo nda̱sandakúníña-inii̱ ta chi̱ndeétáʼanña xíʼi̱n ña̱ va̱ása nandósó-inii̱ xa̱ʼa̱ ndiʼi ña̱ xa̱a̱ sa̱kuaʼi̱.

ÑA̱ VA̱ʼA ÑA̱ NDA̱KIʼI̱N:

Vitin kúsi̱íní-inii̱ íyoi̱ xíʼin ñá síʼi̱, saátu kúsi̱íní-inii̱ ña̱ xa̱a̱ chíndeétáʼi̱n xíʼin ku̱a̱ʼá na̱ yiví ña̱ sakúaʼana xa̱ʼa̱ Ndióxi̱, tá kúú chi̱ndeétáʼi̱n xíʼin ku̱ʼvai̱ xíʼin siʼíi̱. Ña̱ káchíñui̱ nu̱ú Ndióxi̱ xíʼin ña̱ chindeétáʼi̱n xíʼin inkana ña̱ sakúaʼana xa̱ʼa̱ra, sákusi̱íníña-inii̱.