Biblia chi̱ndeétáʼan xíʼinna ña̱ na̱samana

¿NDÁAÑA ke̱ʼé iin ñá loʼo ñá ni̱xo̱ʼvi̱ní tá ni̱xi̱yo loʼoñá ña̱ va̱ʼa kusi̱í-iniñá? ¿Ndáaña chi̱ndeétáʼan xíʼin iin ta̱ político ta̱ ku̱a̱chiní ni̱xi̱yo ini ta na̱samara ta vitin nátúʼunra xa̱ʼa̱ Ndióxi̱? Ná kotoyó ndáaña natúʼunna xíʼinyó.

“Xi̱kuni̱níi̱ ná kuʼvi̱-inina kunina yi̱ʼi̱” (ÑÁ INNA LEZHNINA)

KU̱I̱YA̱ ÑA̱ KA̱KUÑÁ: 1981

PAÍS: RUSIA

INKA ÑA̱ KE̱ʼÉÑÁ: NI̱XO̱ʼVI̱NÍÑÁ TÁ NI̱XI̱YO LOʼOÑÁ

ÑA̱ NDO̱ʼI̱: Na̱ yivái̱ na̱ sóʼó xi̱kuuna, ta saátu yi̱ʼi̱ ñá sóʼó xi̱kui̱. Nani tá ka̱kui̱ si̱íní ni̱xi̱yoi̱ nda̱a̱ tá ni̱xi̱nui̱ i̱ñu̱ ku̱i̱ya̱ saáchi na̱ yivái̱ nda̱tána tutu ña̱ ti̱ndaʼa̱na. Ni ñá loʼova xi̱kui̱ xi̱kunda̱a̱va-inii̱ xíʼin ña̱ xi̱ndoʼona ta ña̱yóʼo sa̱xóʼvi̱níña yi̱ʼi̱. Tá sa̱ndákootáʼanna, yivái̱ xíʼin ku̱ʼvai̱ ta̱ káʼnuka ki̱ndoona chí Troick, ta yi̱ʼi̱ ki̱ndoi̱ xíʼin siʼíi̱ chí Cheliabinsk. Tá ni̱ya̱ʼa tiempo tuku ti̱ndaʼa̱ siʼíi̱. Ta̱ ti̱ndaʼa̱ xíʼinñá xi̱xiʼiníra ndixi ta xi̱kaniníra ndi̱ʼi̱.

Tá ku̱i̱ya̱ 1993, ku̱ʼvai̱ ta̱ káʼnuka ni̱ka̱ʼa̱ra ta ni̱xi̱ʼi̱ra. Ni̱xo̱ʼvi̱ní-inindi̱. Xa̱ʼa̱ ña̱ ku̱u yóʼo siʼíi̱ ki̱xáʼañá xíʼiníñá ndixi ta saátu ki̱xáʼañá íxandi̱va̱ʼaníñá xíʼi̱n. Xi̱kunii̱ va̱ʼa koi̱ ta ná kuʼvi̱-inina kunina yi̱ʼi̱. Ki̱xáʼíi̱ xáʼi̱n veʼe-ñu̱ʼu ña̱ va̱ʼa ná chindeétáʼanna xíʼi̱n ña̱ ndi̱ko-inii̱, soo kǒo níkivi chindeétáʼanna xíʼi̱n.

BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱ ÑA̱ KÉʼÍI̱: Tá xi̱kuumiíi̱ 13 ku̱i̱ya̱, iin ñá xi̱kaʼvi xíʼi̱n escuela xi̱kuuñá testigo Jehová ta na̱túʼunñá xíʼi̱n xa̱ʼa̱ sava historia ña̱ va̱xi nu̱ú Biblia. Xi̱kutóoníi̱ ña̱ káʼa̱n Biblia xa̱ʼa̱ ta̱ Noé xíʼin ta̱ Job, chi na̱yóʼo ka̱chíñuna nu̱ú Ndióxi̱ ni yo̱ʼvi̱ní tu̱ndóʼo ni̱ya̱ʼana nu̱ú. Tá ni̱ya̱ʼa loʼo tiempo ki̱xáʼíi̱ káʼvii̱ Biblia xíʼin na̱ testigo Jehová ta ki̱xáʼa xáʼi̱n reunión.

Ku̱a̱ʼání ña̱ʼa ña̱ livi sa̱kuaʼi̱ nu̱ú tu̱ʼun Ndióxi̱. Ni̱kusi̱íní-inii̱ tá ku̱nda̱a̱-inii̱ ña̱ íyo ki̱vi̱ Ndióxi̱ (Salmo 83:18). Nda̱kanda̱ní-inii̱ tá ku̱nda̱a̱-inii̱ ña̱ káʼa̱n Biblia xa̱ʼa̱ ndáa ki̱ʼva koo “ki̱vi̱ nu̱ú ndíʼi” (2 Timoteo 3:​1-5). Ta saátu ku̱si̱íní-inii̱ tá ku̱nda̱a̱-inii̱ ña̱ ndataku na̱ ni̱xi̱ʼi̱. Ña̱kán ndátuníi̱ kunii̱ ku̱ʼvai̱ ta̱ ni̱xi̱ʼi̱ tá ná ndatakura (Juan 5:​28, 29).

Su̱ví ndiʼivína níkusi̱í-ini xa̱ʼa̱ ña̱ ki̱xáʼíi̱ sákuaʼi̱ xíʼin na̱ Testigo. Siʼíi̱ xíʼin ta̱ yivá ndáʼvii̱ xi̱sa̱a̱-inina xi̱xinina na̱yóʼo, ta ni̱ka̱ʼa̱nna xíʼi̱n ña̱ ná sandákoi̱ kaʼvii̱ Biblia. Soo yi̱ʼi̱, xi̱kutóonívai̱ ña̱ xi̱sakuaʼi̱ ta va̱ása níxi̱ndakanixi̱níi̱ ña̱ sandákoi̱ ña̱yóʼo.

I̱xayo̱ʼvi̱níña xíʼi̱n xa̱ʼa̱ ña̱ xi̱sasi na̱ veʼi̱ nu̱úi̱ ña̱ kaʼvii̱. Tasaá ki̱xi inkaka tu̱ndóʼo nu̱úi̱: ku̱ʼvai̱ ta̱ loʼo ta̱ xi̱xa̱ʼa̱n xíʼi̱n reunión ni̱ka̱ʼa̱ra ta ni̱xi̱ʼi̱tu ta̱yóʼova. Soo, kǒo nísandákoondaʼa̱ na̱ Testigo yi̱ʼi̱. Ni̱na̱ʼa̱na ña̱ kúʼvi̱-inina xínina yi̱ʼi̱, ta mií ña̱yóʼo kúú ña̱ xi̱kunii̱ ná keʼéna xíʼi̱n. Ki̱ʼi̱n kuenta ña̱ ndixa ndásakáʼnuna Ndióxi̱, xa̱ʼa̱ ña̱yóʼo tá ku̱i̱ya̱ 1996 nda̱kuchii̱ ta ndu̱i̱ testigo Jehová.

ÑA̱ VA̱ʼA ÑA̱ NDA̱KIʼI̱N: Xa̱a̱ íyo i̱ñu̱ ku̱i̱ya̱ ña̱ ti̱ndaʼíi̱ xíʼin iin ta̱a ta̱ va̱ʼaní-ini ta̱ naní Dmitry. U̱vi̱ saándi̱ káchíñundi̱ ti̱xin sucursal na̱ testigo Jehová ña̱ íyo chí San Petersburgo. Tá ni̱ya̱ʼa tiempo, na̱ yivái̱ na̱samana ña̱ ndákanixi̱nína xa̱ʼa̱ ña̱ sákuaʼi̱.

Táxiníi̱ tíxa̱ʼvi ndaʼa̱ Jehová xa̱ʼa̱ ña̱ ta̱xira ña̱ ku̱yatii̱n nu̱úra ta vitin kúsi̱í-inii̱ ña̱ káchíñui̱ nu̱úra.

“Xi̱kuni̱i̱ kunda̱a̱-inii̱ xa̱ʼa̱ ku̱a̱ʼání ña̱ʼa” (TA̱ RAUDEL RODRÍGUEZ RODRÍGUEZ)

KU̱I̱YA̱ ÑA̱ KA̱KURA: 1959

PAÍS: CUBA

INKA ÑA̱ KE̱ʼÉRA: NI̱KI̱ʼVIRA XÍʼIN ÑA̱ POLÍTICA TA KǑO NÍ XI̱ IXATO̱ʼÓRA NA̱ CHÍÑU

ÑA̱ NDO̱ʼI̱: Ka̱kui̱ chí Habana (Cuba), ta xa̱ʼnui̱ iin ñuu ndáʼvi nu̱ú xi̱kutóoní na̱ yiví kanitáʼanna. Tá ni̱xi̱yo loʼi̱ ki̱xáʼa kútóoníi̱ ku̱ʼi̱n kotoi̱ nu̱ú kánitáʼanna.

Xa̱ʼa̱ ña̱ va̱ʼaní calificación xi̱tavái̱ escuela, na̱ yivái̱ ni̱ka̱ʼa̱nna xíʼi̱n ña̱ ná ku̱ʼi̱n universidad. Saá kúú ña̱ ki̱xáʼa ndákanixi̱níi̱ ña̱ xíniñúʼu nasa̱ma ki̱ʼva ña̱ xáʼndachíñu na̱ político ñuu nu̱ú íyoi̱ ta va̱ása ní ixato̱ʼókai̱ na̱ chíñu. Yi̱ʼi̱ xíʼin iin ta̱ xi̱kaʼvi xíʼi̱n escuela nda̱kutáʼanndi̱ ta ki̱ndaandi̱ tu̱xi̱í ndaʼa̱ iin ta̱ policía ta saátu sa̱túkue̱ʼe̱ndi̱ xi̱níra. Xa̱ʼa̱ ña̱yóʼo ta̱ánna ndi̱ʼi̱ veʼeka̱a ta ni̱ka̱ʼa̱nna ña̱ xíniñúʼu kuvindi̱ xa̱ʼa̱ ña̱ ke̱ʼéndi̱. Sa̱kán 20 kuití ku̱i̱ya̱ kúúmiíi̱ ta xa̱a̱ kaʼnína yi̱ʼi̱.

Tá ndíka̱a̱ mitúʼun miíi̱ ini veʼeka̱a, ki̱xáʼa ndákanixi̱níi̱ ndáaña keʼíi̱ tá xa̱a̱ ná kuniʼina yi̱ʼi̱ ña̱ ku̱ʼu̱nna kaʼnína, saáchi va̱ása níxi̱kuni̱i̱ na̱ʼi̱ ña̱ yíʼvii̱ kuvii̱ soo saátu ni̱xi̱yo ku̱a̱ʼání ña̱ʼa ña̱ xi̱kuni̱i̱ kunda̱a̱-inii̱ xa̱ʼa̱. Tá kúú xi̱ndakanixi̱níi̱ nda̱chun kúú ña̱ íyoní na̱ kéʼé ña̱ va̱ása va̱ʼa nu̱ú ñuʼú yóʼo ta saátu á kixaa̱ iin ki̱vi̱ ña̱ koo va̱ʼayó.

BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱ ÑA̱ KÉʼÍI̱: Tá ni̱ya̱ʼa tiempo ni̱ka̱ʼa̱nna xíʼinndi̱ ña̱ va̱ása kaʼníkana ndi̱ʼi̱ soo xi̱niñúʼu kuñuʼundi̱ o̱ko̱ u̱xu̱ ku̱i̱ya̱ veʼeka̱a. Yóʼo kúú nu̱ú xi̱nitáʼi̱n xíʼin na̱ testigo Jehová, chi̱ka̱a̱na na̱yóʼo veʼeka̱a xa̱ʼa̱ ña̱ kándíxana Ndióxi̱. Nda̱kanda̱ní-inii̱ xa̱ʼa̱ ña̱ ndakúní-inina ta táxi̱n íyo inina. Ni kǒo ku̱a̱chi níxikuumií na̱yóʼo ta ta̱ánnana veʼeka̱a, va̱ása níxi̱sa̱a̱na xa̱ʼa̱ ña̱yóʼo.

Na̱yóʼo sa̱náʼa̱na yi̱ʼi̱ ña̱ íyo iin ña̱ va̱ʼaní taxi Ndióxi̱ ndaʼa̱ na̱ yiví chí nu̱únínu. Sa̱náʼa̱na yi̱ʼi̱ ña̱ va̱xi nu̱ú Biblia, nu̱ú káʼa̱nña ña̱ ndasalivi tuku Ndióxi̱ ñuʼú yóʼo ta va̱ása kooka ku̱a̱chi nu̱úña, nina na̱ yiví va̱ʼa koo nu̱ú ña̱yóʼo ta kivi xa̱a̱na kutakuna ndiʼi tiempo nu̱úña (Salmo 37:29).

Xi̱kutóonívai̱ ña̱ xi̱sanáʼa̱na yi̱ʼi̱ soo ki̱ʼva ña̱ ni̱xi̱yoi̱ ni loʼo va̱ása níxi̱kitáʼanña xíʼin ki̱ʼva ña̱ ni̱xi̱yo na̱yóʼo. Nda̱kanixi̱níi̱ ña̱ va̱ása kivi koo nda̱kú-inii̱ xíʼin Ndióxi̱ ta va̱ása kivi ki̱ʼvii̱ xíʼin ña̱ política ta saátu nda̱kanixi̱níi̱ ña̱ va̱ása kundeé-inii̱ tá ná ixandi̱va̱ʼa inka na̱ yiví xíʼi̱n, ña̱kán nda̱kaxii̱n ña̱ iinlá miívai̱ kaʼvi Biblia. Tándi̱ʼi ka̱ʼvii̱ña ku̱nda̱a̱-inii̱ ña̱ iinlá na̱ testigo Jehová kúú na̱ kéʼé táki̱ʼva xi̱keʼé na̱ xi̱ndasakáʼnu Ndióxi̱ tiempo xi̱naʼá.

Ña̱ ka̱ʼvii̱ Biblia chi̱ndeétáʼanña xíʼi̱n ña̱ nasamai̱ ku̱a̱ʼá ña̱ʼa ña̱ va̱ása va̱ʼa xi̱keʼíi̱. Xi̱niñúʼu nasamai̱ tu̱ʼun ña̱ xi̱ka̱ʼi̱n, saáchi ku̱a̱ʼá yichi̱ xi̱ka̱ʼi̱n tu̱ʼun kini. Saátu xi̱niñúʼu sandákoi̱ ña̱ kaʼmii̱ ta va̱ása ki̱ʼvikai̱ xíʼin ña̱ política. I̱xayo̱ʼvi̱níña xíʼi̱n ña̱ sandákoi̱ keʼíi̱ ña̱yóʼo soo mií Jehová kúú ta̱ chi̱ndeétáʼan xíʼi̱n, ta loʼo tá loʼo ku̱chiñuvai̱.

Iin ña̱ íxayo̱ʼvi̱níka xíʼi̱n kúú ña̱ nasamai̱ ña̱ kamaní sái̱. Nda̱a̱ vitin káʼi̱n xíʼin Jehová ña̱ ná chindeétáʼanra xíʼi̱n ña̱ va̱ása sa̱a̱ kamai̱. Ña̱ chíndeétáʼanní xíʼi̱n kúú ña̱ káʼa̱n Proverbios 16:​32, yóʼo káchiña: “Ta̱ kǒo sáa̱ kama va̱ʼaka ta̱a kúú ta̱yóʼo nu̱ú iin ta̱a ta̱ ndakú, ta iin ta̱ xáʼnu̱-ini va̱ʼaníka ta̱yóʼo nu̱ú ta̱ xáʼndachíñu nu̱ú iin ñuu”.

Nda̱kuchii̱ ku̱i̱ya̱ 1991 tá ndíka̱a̱kai̱ veʼeka̱a, ti̱xin iin barril ta̱ánna ti̱kui̱í ta kán nda̱kuchii̱. Tá ni̱ya̱ʼa iin ku̱i̱ya̱ ki̱tai̱ veʼeka̱a xíʼin inkaka na̱ xi̱ñuʼu xíʼi̱n ta chi̱ndaʼána ndi̱ʼi̱ chí España xa̱ʼa̱ ña̱ íyo na̱ veʼendi̱ kán. Tá ni̱xa̱i̱ kán ki̱xáʼa xáʼi̱n reunión xíʼin na̱ testigo Jehová, ta na̱yóʼo va̱ʼaní nda̱kiʼinna yi̱ʼi̱ ni kǒo níxi̱xini̱na yi̱ʼi̱ ta chi̱ndeétáʼannína xíʼi̱n ña̱ kusi̱í-inii̱ koi̱ lugar kán.

ÑA̱ VA̱ʼA ÑA̱ NDA̱KIʼI̱N: Vitin kúsi̱í-inii̱ káchíñui̱ nu̱ú Ndióxi̱ xíʼin ñá síʼíi̱ ta saátu xíʼin ná se̱ʼi̱. Saátu xíniñúʼi̱ ku̱a̱ʼá tiempoi̱ ña̱ sánáʼi̱ inkana xa̱ʼa̱ ña̱ va̱xi nu̱ú Biblia. Tá ndákaʼíi̱n xa̱ʼa̱ ña̱ ndo̱ʼi̱ tá ya̱chi̱ ña̱ si̱lóʼo kaʼnína yi̱ʼi̱, táxiníi̱ tíxa̱ʼvi ndaʼa̱ Jehová xa̱ʼa̱ ña̱ chi̱ndeétáʼanníra xíʼi̱n ña̱ na̱samai̱. Saáchi tíxa̱ʼvi ta̱kán tákui̱ ta íyo iin ña̱ va̱ʼa ndakiʼii̱n chí nu̱únínu. Xa̱a̱ kúni̱níi̱ koi̱ ñuyǐví xa̱á chi kán kúú nu̱ú va̱ʼaní kooyó ta va̱ása kuvikayó (Apocalipsis 21:​3, 4).

[Comentario]

“Ni̱kusi̱íní-inii̱ tá ku̱nda̱a̱-inii̱ ña̱ íyo ki̱vi̱ Ndióxi̱”

[Comentario]

Yi̱ʼi̱ xíʼin yiíi̱ kútóoníndi̱ natúʼunndi̱ xíʼin na̱ yiví na̱ sóʼó xa̱ʼa̱ Ndióxi̱