Biblia chi̱ndeétáʼan xíʼinna ña̱ na̱samana

¿NDÁAÑA sa̱ndákanda̱-ini iin ta̱a ta̱ xi̱kuumií iin chiñu va̱ʼa ta̱ ñuu Escocia? ¿Ndáaña chi̱ndeétáʼan xíʼin iin ta̱a ta̱ ñuu Brasil ña̱ sa̱ndákoora cocaína xíʼin ña̱ xi̱keʼéra ña̱ kini? ¿Ndáaña chi̱ndeétáʼan xíʼin iin ta̱ loʼo ta̱ ñuu Eslovenia ña̱ sa̱ndákoora koʼora ndixi? Miína ná ka̱ʼa̱n xíʼinyó.

“Ña̱ xi̱keʼíi̱ va̱ʼaní ni̱xi̱yoña” (TA̱ JOHN RICKETTS)

KU̱I̱YA̱ ÑA̱ KA̱KURA: 1958

PAÍS: ESCOCIA (REINO UNIDO)

INKAKA ÑA̱ KÁʼA̱N XA̱ʼA̱RA: TA̱ XI̱KUUMIÍ IIN CHIÑU VA̱ʼA

ÑA̱ NDO̱ʼI̱: Tá ni̱xi̱yo loʼi̱ kǒo níxikuma̱ní xu̱ʼún nu̱úi̱. Yivái̱ kúú ta̱ xi̱niʼi yichi̱ nu̱ú na̱ soldado británico, ña̱kán miíi̱ xíʼin na̱ veʼi̱ xa̱a̱ síín síín lugar xi̱xa̱ʼa̱nndi̱. Ni̱xi̱yondi̱ chí Escocia, Inglaterra, Alemania, Kenia, Malasia, Irlanda xíʼin Chipre. Tá xi̱kuumiíi̱ u̱na̱ ku̱i̱ya̱ xa̱a̱ síín síín internado xi̱kaʼvii̱ chí Escocia, tándi̱ʼi sa̱ndíʼi̱ ka̱ʼvii̱ Universidad ñuu Cambridge.

Tá xi̱kuumiíi̱ 20 ku̱i̱ya̱, ki̱xáʼíi̱ káchíñui̱ nu̱ú xi̱kachíñuna xíʼin petroleo ta u̱na̱ ku̱i̱ya̱ ka̱chíñui̱ kán. Siʼna ki̱xáʼíi̱ káchíñui̱ chí América ña̱ Sur, tasaá África ta nu̱ú ndíʼi ka̱chíñui̱ xi̱kuu chí Australia Occidental, yóʼo kúú nu̱ú i̱xava̱ʼi̱ iin ­empresa nu̱ú xa̱ʼnuka xu̱ʼúi̱ ta tándi̱ʼi ni̱xi̱kói̱ña.

Xa̱ʼa̱ ña̱ va̱ʼa ke̱ʼíi̱ ña̱ ni̱xi̱kói̱ ña̱yóʼo i̱xajubilái̱ tá xi̱kuumiíi̱ 40 ku̱i̱ya̱. Xa̱ʼa̱ ña̱ ku̱a̱ʼá tiempo xi̱kuumiíi̱ kixáʼíi̱ xíkai̱ xa̱a̱ síín síín ñuu. ­U̱vi̱ yichi̱ ni̱xa̱ʼi̱n chí Australia xíʼin moto ta saá ni̱xa̱ʼi̱n ndiʼi país. Ta va̱ʼaní ni̱xi̱yoi̱ túvii̱.

ÑA̱ BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱: Tá kúma̱níka ixajubilái̱, xi̱ndakanixi̱níi̱ ña̱ xi̱niñúʼu taxii̱ tíxa̱ʼvi ndaʼa̱ Ndióxi̱ xa̱ʼa̱ ña̱ va̱ʼa ni̱xi̱yoi̱. Ña̱kán ki̱xáʼa xáʼi̱n veʼe-ñu̱ʼu ña̱ Anglicana, nu̱ú sa̱náʼa̱na yi̱ʼi̱ tá ni̱xi̱yo loʼi̱, soo ti̱xin veʼe-ñu̱ʼu yóʼo kǒo nísanáʼa̱ va̱ʼana xa̱ʼa̱ tu̱ʼun Ndióxi̱. Tándi̱ʼi sa̱kúaʼi̱ xíʼin na̱ mormón, soo nda̱kava-inii̱ xa̱ʼa̱ ña̱ kǒo ní kundayáʼvi ña̱ Biblia nu̱úna.

Iin ki̱vi̱, na̱ testigo Jehová ka̱nindaʼa̱na yéʼíi̱. Ndi̱ku̱n kama ki̱ʼin kuenta ña̱ sánáʼa̱ na̱ testigo nu̱ú tu̱ʼun Ndióxi̱ távánaña. Iin texto ña̱ ka̱ʼvina nu̱úi̱ xi̱kuu 1 Timoteo 2:​3, 4, nu̱ú káʼa̱nña “chi ña̱ kúni̱ra kúú ña̱ ná ka̱ku ndiʼi na̱ yiví, ta ná xa̱a̱na kunda̱a̱ káxi inina mií ña̱ nda̱a̱ xa̱ʼa̱ra”. Nda̱kanda̱ní-inii̱, chi na̱ Testigo va̱ása ndíʼi kuití-inina ña̱ kuxini̱na xa̱ʼa̱ Biblia, chi ña̱ kúni̱na kúú ña̱ ná kunda̱a̱ káxi ini na̱ yiví xíʼin ña̱ káʼa̱nña.

Tá ki̱xáʼíi̱ káʼvii̱ xíʼinna, saá kúú ña̱ ki̱xáʼíi̱ kúnda̱a̱-inii̱ xa̱ʼa̱ ña̱ nda̱a̱. Ku̱a̱ʼání ña̱ʼa sa̱kúaʼi̱, ta ni̱kusi̱íní-inii̱ tá ku̱ndaa̱-inii̱ Ndióxi̱ xíʼin ta̱ Jesús su̱ví inkáchi kúúna ta va̱ása kítáʼanna xa̱ʼa̱ ña̱ káʼa̱nna xa̱ʼa̱ ña̱ trinidad (Juan 14:28; 1 Corintios 11:​3). Nda̱kanixi̱níi̱, ña̱ ku̱a̱ʼání tiempo na̱ndukúi̱ xa̱ʼa̱ ña̱ xi̱kuni̱ kunda̱a̱-inii̱ ndáaña kúú ña̱ trinidad. Soo va̱ása yo̱ʼvi̱ví kunda̱a̱-iniyó xa̱ʼa̱ ña̱ nda̱a̱ ña̱ sánáʼa̱ Biblia.

Tá ni̱ya̱ʼa loʼo ki̱xáʼíi̱ xáʼi̱n reunión xíʼin na̱ Testigo. Nda̱kanda̱ní-inii̱ xa̱ʼa̱ ña̱ va̱ʼaní-inina xíʼin ña̱ ndíku̱nna ña̱ káʼa̱n Biblia. Ta ndakanixi̱níi̱ iin na̱ yi̱i̱ kúúna. Xa̱ʼa̱ ña̱ ndixa kúʼvi̱-inina xínitáʼanna ku̱ndaa̱-ini ña̱ kúúna iin religión ña̱ nda̱a̱ (Juan 13:35).

ÑA̱ VA̱ʼA ÑA̱ NDA̱KIʼI̱N: Tá nda̱kuchii̱ xi̱nitáʼi̱n xíʼin ñá Diane, iin ñaʼá va̱ʼa xi̱kuuñá saáchi tá loʼovíñá xa̱a̱ kúúña testigo Jehová. Ta xa̱ʼa̱ ña̱ va̱ʼa ña̱ kúúmiíña ku̱tóoní miíñá, ta tá ni̱ya̱ʼa loʼo tiempo ti̱ndaʼa̱ndi̱. Iin bendición Jehová xi̱kuu ña̱yóʼo saáchi va̱ʼaní xi̱kitáʼanndi̱.

Xi̱kuni̱níndi̱ ku̱ʼu̱nndi̱ inka ñuu, nu̱ú íxama̱ní na̱ natúʼun xa̱ʼa̱ tu̱ʼun va̱ʼa, tá ku̱i̱ya̱ 2010 ni̱xa̱a̱ndi̱ chí Belice, ña̱ Centroamérica. Yóʼo na̱túʼunndi̱ xíʼin na̱ yiví na̱ kúʼvi̱ní-ini xíni Ndióxi̱ ta xi̱kuni̱nína kunda̱a̱-inina xa̱ʼa̱ra.

Xa̱ʼa̱ ña̱ kúnda̱a̱-inii̱ xa̱ʼa̱ ña̱ nda̱a̱ xíʼin xa̱ʼa̱ Biblia, va̱ʼaní kúnii̱. Ña̱ ku̱a̱ʼání tiempo káchíñui̱ nu̱ú Ndióxi̱, xa̱a̱ chíndeétáʼi̱n xíʼin ku̱a̱ʼání na̱ yiví ña̱ kunda̱a̱-inina xa̱ʼa̱ Ndióxi̱. Kúsi̱íní-inii̱ ña̱ kúnda̱a̱-inii̱ ña̱ Biblia kivi chindeétáʼanña xíʼin na̱ yiví ña̱ nasamana nda̱a̱ táki̱ʼva ndo̱ʼo miíi̱. Nda̱a̱ vitin kúnda̱a̱-inii̱ ndáa ki̱ʼva taxii̱ tíxa̱ʼvi ndaʼa̱ Jehová xa̱ʼa̱ ña̱ tákui̱.

“Va̱ʼaní ni̱xi̱yo inina xíʼi̱n” (TA̱ MAURÍCIO ARAÚJO)

KU̱I̱YA̱ ÑA̱ KA̱KURA: 1967

PAÍS: BRASIL

INKAKA ÑA̱ KÁʼA̱N XA̱ʼA̱RA: ÑA̱ KINI ÑA̱ KEʼÍI̱

ÑA̱ NDO̱ʼI̱: Chí Avaré xa̱ʼnui̱, iin ñuu loʼo ña̱ ndíkaa̱ chí estado ña̱ São Paulo ta na̱ yiví na̱ íyo kán na̱ káchíñu ndáʼvi kúúna.

Yivái̱ ni̱xi̱ʼi̱ra tá kúma̱níka kakúi̱. Tá ni̱xi̱yo loʼi̱ xi̱ndixíi̱ ti̱ko̱to̱ siʼíi̱ tá kǒoñá níxíyo. Ta saá ki̱xáʼíi̱ kéʼíi̱ nda̱a̱ táki̱ʼva kéʼé ná ñaʼá, ta na̱ yiví xi̱ka̱ʼa̱nna ña̱ xi̱kutói̱ ta̱a. Tá ni̱ya̱ʼa tiempo kixáʼíi̱ kísi̱ xíʼin ta̱ va̱lí ta saátu xíʼin ta̱a ta̱ xa̱a̱ chée.

Tá ni̱xi̱yo kúai̱n xi̱xaʼi̱n nu̱ú xi̱keʼéna vikó tá ñuu tá kúú, bar ta saátu veʼe-ñu̱ʼu ña̱ ndukúi̱ ta̱a xíʼi ná ñaʼá ña̱ kusui̱ xíʼinna. Ta tá xi̱keʼéna ña̱ carnaval, xi̱ndixíi̱ ti̱ko̱to̱ ná ñaʼá ta xi̱tixáʼi̱ desfile ña̱ escuela ña̱ samba. Ta va̱ʼaní xi̱kana ndiʼi ña̱ xi̱keʼíi̱.

Na̱ xi̱kitáʼan xíʼi̱n kúú na̱ ta̱a na̱ xi̱kisi̱ xíʼin táʼan mií, ná ñaʼá ná xi̱kisi̱ xíʼin ku̱a̱ʼání ta̱a ta saátu na̱ xi̱xiniñúʼu droga. Sava na̱yóʼo xi̱ka̱ʼa̱nna xíʼi̱n ña̱ ná kaʼmii̱ crack (cocaína ña̱ káʼa̱nna xíʼin yu̱u̱), ta ki̱xáʼavai̱ xáʼmii̱ ña̱yóʼo. Sava yichi̱ iníí saá ñuú xi̱xa̱ʼmindi̱ña; ta sava yichi̱ iníí ki̱vi̱ xi̱xaʼmiña. Ta xa̱ʼa̱ ña̱ kininí xi̱naʼi̱ na̱ yiví xi̱ndakanixi̱nína ña̱ xi̱kuumiíi̱ sida.

ÑA̱ BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱: Saá kúú ña̱ xi̱ni táʼi̱n xíʼin na̱ testigo Jehová. Va̱ʼaní ni̱xi̱yo inina xíʼi̱n. Ka̱ʼvina nu̱úi̱ Romanos 10:​13, nu̱ú káʼa̱nña “ndiʼi na̱ xíniñúʼu ki̱vi̱ Jehová ña̱ káʼa̱nna xíʼinra ña̱ ná chindeétáʼanra xíʼinna, ka̱kuna”. Saá ku̱ndaa̱-inii̱ ña̱ ndáyáʼviní kuniñúʼi̱ ki̱vi̱ Ndióxi̱. Ñuú tá xi̱sandíʼi̱ xi̱xaʼmii̱ ña̱ crack, xi̱xunái̱ ventana ta xi̱xitoi̱ chí ndiví ta xi̱xakui̱ xi̱ka̱ʼi̱n xíʼin Jehová ña̱ ná chindeétáʼanra xíʼi̱n.

Kiʼi̱n kuenta ña̱ xi̱ndi̱ʼi̱ní-ini siʼíi̱ xa̱ʼíi̱, ña̱kán sa̱ndákoi̱ xi̱xaʼmii̱ droga. Tá ni̱ya̱ʼa loʼo tiempo ki̱xáʼíi̱ káʼvii̱ Biblia xíʼin na̱ Testigo. Na̱yóʼo ni̱ka̱ʼa̱nna xíʼi̱n ña̱ Biblia chindeétáʼan xíʼi̱n ña̱ sandákoi̱ ña̱ xáʼmii̱, ta saá ku̱uva.

Tá xi̱ka̱ʼvikai̱ Biblia ki̱ʼi̱n kuenta ña̱ xi̱niñúʼu nasamakai̱ ña̱ xi̱keʼíi̱. Ta ña̱ i̱xayo̱ʼvi̱ka xíʼi̱n kúú ña̱ sa̱ndákoi̱ ña̱ ku̱su̱i̱n xíʼin inka na̱ ta̱a, saáchi nani tá loʼoví ki̱xáʼíi̱ kéʼíi̱ ña̱yóʼo. Ña̱ va̱ʼa sandákoi̱ ña̱ xi̱keʼíi̱, xi̱niñúʼu sandákoi̱ kitáʼíi̱ xíʼin sava na̱ yiví, ta ni va̱ása níxa̱ʼa̱nkai̱ bar ni nu̱ú xi̱tixáʼana tá ñuú.

Ni i̱xayo̱ʼvi̱ña xíʼi̱n ña̱ sandákoi̱ keʼíi̱ ña̱yóʼo, tá xi̱ndakanixi̱níi̱ ña̱ xi̱chindayáʼviní Jehová ña̱ xi̱chikaa̱i̱ ndee̱ xi̱keʼíi̱ ña̱yóʼo sa̱ndíkoníña inii̱ (1 Juan 3:​19, 20). Tá ku̱i̱ya̱ 2002 sa̱ndákoi̱ ña̱ xi̱kisi̱ xíʼin inka na̱ ta̱a ta saá nda̱kuchii̱ ta ndu̱i̱ testigo Jehová.

ÑA̱ VA̱ʼA ÑA̱ NDA̱KIʼI̱N: Siʼíi̱ nda̱kanda̱ní-iniñá xa̱ʼa̱ ña̱ na̱samai̱ ta saátu ñá yóʼo ki̱xáʼañá káʼviñá Biblia. Ki̱ʼinñá iin kue̱ʼe̱ ña̱ ndeéní ña̱ naní infarto cerebral. Ñáyóʼo chíkaa̱níñá ndee̱ ña̱ ku̱ʼvi-iniñá kuniñá Jehová xíʼin tu̱ʼunra.

Xa̱a̱ íyo u̱na̱ ku̱i̱ya̱ kúú ña̱ sanáʼi̱ na̱ yiví xa̱ʼa̱ ña̱ nda̱a̱ ña̱ káʼa̱n Biblia. Soo kúnda̱a̱-inii̱ ta chíkaa̱níi̱ ndee̱ ña̱ kǒo ndikói̱ keʼé tukui̱ ña̱ kini ña̱ xi̱keʼíi̱, saáchi kúnda̱a̱-inii̱ tá ná kǒo ndikói̱ keʼíi̱ña, sakúsi̱í-ini Jehová.

Ña̱ ku̱yati̱n nu̱ú Ndióxi̱ ta keʼíi̱ ña̱ kútóora ña̱yóʼo chíndeétáʼanña xíʼi̱n ña̱ ixato̱ʼíi̱ miíi̱. Ta vitin kivi ka̱ʼi̱n ña̱ si̱íní íyoi̱.

“Ku̱a̱ʼání ndixi xi̱xiʼi̱ ni kǒo níxi̱chutú inii̱” (TA̱ LUKA ŠUC)

KU̱I̱YA̱ ÑA̱ KA̱KURA: 1975

PAÍS: ESLOVENIA

INKAKA ÑA̱ KÁʼA̱N XA̱ʼA̱RA: KU̱A̱ʼÁNÍ NDIXI XI̱XIʼI̱

ÑA̱ NDO̱ʼI̱: Chí Liubliana ka̱kui̱, capital ña̱ Eslovenia. Tá loʼi̱ va̱ʼaní xa̱ʼnui̱, tá kúúmií ku̱mí ku̱i̱ya̱, yivái̱ xa̱ʼníra miíra. Xa̱ʼa̱ ña̱ ndo̱ʼondi̱ ña̱yóʼo, siʼíi̱ ndeéní ka̱chíñuñá ña̱ va̱ʼa taxiná ña̱ kuxu na̱ ñanii̱ xíʼin miíi̱.

Tá xi̱kuumií 15 ku̱i̱ya̱ ki̱xaʼíi̱ íyoi̱ xíʼin xi̱tái̱. Xi̱kutóoní koi̱ xíʼin ñá yóʼo saáchi kán xi̱xiyo na̱ va̱ʼaní xi̱kitáʼan xíʼi̱n ta va̱ʼa xi̱keʼíi̱ ña̱ xi̱kuni̱ miíi̱. Ta tá xi̱kuumiíi̱ 16 ku̱i̱ya̱ ki̱xáʼíi̱ kítáʼi̱n xíʼin na̱ yiví na̱ xi̱kee xi̱xiʼi tá xi̱ndiʼi semana. Sa̱kúaʼnui̱ yixí xi̱níi̱ ta kininí ki̱xáʼíi̱ ndíxii̱, ta tá ni̱ya̱ʼa loʼo ki̱xáʼi̱ xáʼmii̱.

Ku̱a̱ʼání nu̱ú droga xi̱niñúʼi̱, soo ña̱ xi̱kutóonikai̱ kúú ña̱ xi̱xiʼi̱ ndixi. Tá ni̱ya̱ʼa loʼo tiempo ki̱xáʼíi̱ xíʼi̱ copa tá vino soo ki̱xaa̱ tiempo ña̱ xi̱xiʼi̱ iníí botella táyóʼo. Ta nda̱a̱ ni iinna kǒo níxi̱kunda̱a̱-ini ña̱ xi̱xini̱. Sava yichi̱ xíʼin xiko̱ yuʼíi̱ xi̱kunda̱a̱-inina xa̱ʼa̱ ña̱ xi̱xiʼiníi̱ ndixi, soo kǒo níxi̱kunda̱a̱-inina ña̱ xi̱xiʼi̱ ku̱a̱ʼání litro tá vino á cerveza tá xi̱ndasa̱ka xíʼin tá vodka.

Ku̱a̱ʼání yichi̱ tá xi̱xa̱ʼa̱nndi̱ discoteca miíi̱ xi̱ chindeétáʼan xíʼin na̱ migoi̱ ña̱ va̱ása nduvana, soo miíi̱ kúú ta̱ xi̱xiʼiníka nu̱ú na̱yóʼo. Iin ki̱vi̱ xi̱niso̱ʼi̱ na̱ migoi̱ káʼa̱nna xíʼin inkana ña̱ yi̱ʼi̱ ku̱a̱ʼání ndixi xi̱xiʼi̱ ni kǒo níxi̱chutú inii̱. nda̱kavaní-inii̱ xíʼin ña̱ ni̱ka̱ʼa̱nna yóʼo, chi saá xi̱ka̱ʼa̱nna xíʼin na̱ xi̱xiʼiní ndixi chí Eslovenia.

Tasaá nda̱kanixi̱níi̱ ndáaña kéʼíi̱ xíʼin ña̱ tákui̱. Xi̱ndiʼiní-inii̱ xa̱ʼa̱ ña̱ kǒo ña̱ va̱ʼa níxi̱keʼíi̱. Ta ña̱ xi̱keʼíi̱ va̱ása ní sákusi̱íña-inii̱.

ÑA̱ BIBLIA CHI̱NDEÉTÁʼANÑA XÍʼI̱N ÑA̱ NA̱SAMAI̱: Tiempo saá ki̱ʼi̱n kuenta ña̱ iin ta̱ loʼo ta̱ xi̱kaʼvi xíʼi̱n na̱samara ña̱ xi̱keʼéra, saáchi va̱ʼaní ki̱xáʼara kéʼéra. Xi̱kuni̱ kunda̱a̱-inii̱ xa̱ʼa̱ ña̱ ke̱ʼéra, ña̱kán ka̱nai̱ra ña̱ ku̱ʼu̱nndi̱ koʼondi̱ iin café ña̱ va̱ʼa natúʼun loʼondi̱. Ni̱ka̱ʼa̱nra xíʼi̱n ña̱ ki̱xáʼara káʼvira Biblia xíʼin na̱ ­testigo Jehová. Ta saátu ni̱ka̱ʼa̱nra xíʼi̱n xa̱ʼa̱ ña̱ sakúaʼara. Xa̱ʼa̱ ña̱ kǒo níxi̱xinii̱ xa̱ʼa̱ ndiʼi ña̱ káʼa̱n Biblia, ndiʼi ña̱ xi̱ka̱ʼa̱nra ña̱ va̱ʼava kúúña nu̱úi̱. Ki̱xáʼíi̱ xáʼi̱n reunión xíʼin na̱ Testigo ta saátu ki̱xáʼíi̱ káʼvii̱ Biblia xíʼinna.

Saá kúú ña̱ ki̱xáʼíi̱ sákuaʼi̱ ña̱ nda̱a̱ ña̱ káʼa̱n Biblia. Ta ku̱ndaa̱-inii̱ ña̱ íyoyó “tiempo ña̱ so̱ndíʼi” ña̱ káʼa̱n Biblia xa̱ʼa̱ ta ti̱xin loʼo tiempo Ndióxi̱ sandíʼi-xa̱ʼa̱ra na̱ yiví na̱ kéʼé ña̱ va̱ása va̱ʼa, soo na̱ yiví na̱ kéʼé ña̱ va̱ʼa taxira ña̱ koona ndiʼi tiempo nu̱ú ñuʼú livi (2 Timoteo 3:​1-5; Salmo 37:29). Ta ki̱xáʼíi̱ násamai̱ ña̱ kéʼíi̱ ña̱ va̱ʼa koi̱ nu̱ú ñuʼú livi.

Tá na̱túʼíi̱ xíʼin na̱ xi̱kitáʼan xíʼi̱n xa̱ʼa̱ ña̱ xa̱a̱ sa̱kúaʼi̱, na̱yóʼo ni̱xa̱ku̱ndaana miíi̱. Saáchi ku̱ndaa̱-inii̱ ña̱ su̱ví ndixa na̱ migoi̱ kúú na̱yóʼo. ta saátu ku̱ndaa̱-inii̱ ña̱ xi̱kitáʼi̱n xíʼin na̱yóʼo kúú ña̱ xi̱xiʼiníi̱ ndixi. Ta xi̱kuni̱nína ña̱ ná ndiʼi semana ña̱ va̱ʼa koʼona ndixi.

Sa̱ndákoi̱ ña̱ xi̱kitáʼi̱n xíʼin na̱yóʼo ta̱ ki̱xáʼíi̱ kítáʼi̱n xíʼin na̱ testigo Jehová. Na̱yóʼo su̱ví iinlá kuití níchíkaa̱na ndee̱ xíʼi̱n chi xi̱kuʼvi̱ní-inina xi̱xinina Jehová xíʼin ndiʼi níma̱na ta saátu xi̱keʼéna ña̱ kúni̱ miíra. Xa̱ʼa̱ ña̱ ni̱xa̱i̱ kúi̱ migona va̱ʼaní chi̱ndeétáʼanña xíʼi̱n, ta tá ni̱ya̱ʼa tiempo sa̱ndákoi̱ ndixi.

ÑA̱ VA̱ʼA ÑA̱ NDA̱KIʼI̱N: Táxii̱ tíxa̱ʼvi ndaʼa̱ Jehová saáchi kǒo xíniñúʼi̱ koʼokavíi̱ ndixi ta saáví kusi̱í-inii̱. Tá va̱ása nínásamai̱ ña̱ xi̱keʼíi̱ ni kǒo xínii̱ ndáaña kundoʼi̱ ndukú. Soo vitin kúsi̱íní-inii̱.

Xa̱a̱ ki̱ʼva u̱xa̱ ku̱i̱ya̱ káchíñui̱ ti̱xin betel na̱ testigo Jehová chí Eslovenia. Ña̱ sa̱kúaʼi̱ xa̱ʼa̱ Jehová ta káchíñui̱ nu̱úra sákusi̱íníña-inii̱ ta kúnda̱a̱-inii̱ ndáa xa̱ʼa̱ kúú ña̱ tákui̱.