Na̱ káʼvi tutu yóʼo kúni̱na kunda̱a̱-inina
¿ Á sánáʼa̱ ná ñaʼá ná kúú testigo Jehová?
Sánáʼa̱vaná, ku̱a̱ʼání kúú náyóʼo íyo iníísaá nu̱ú ñuʼú. Ta náyóʼo kítáʼanná xíʼin ná xíka nátúʼun tu̱ʼun va̱ʼa xa̱ʼa̱ Reino Ndióxi̱ nda̱a̱ táki̱ʼva ni̱ka̱ʼa̱nña nu̱ú Salmo 68:11, nu̱ú ni̱ka̱ʼa̱n Jehová ña̱yóʼo: “ku̱a̱ʼání kúú ná ñaʼá ná nátúʼun xa̱ʼa̱ tu̱ʼun va̱ʼa”.
Soo ni saá chiñu ña̱ kéʼé ná kúú testigo Jehová síínva íyoña nu̱ú ña̱ kéʼé ná ñúʼu ti̱xin inka veʼe-ñu̱ʼu. ¿Ndáa ki̱ʼva síín íyoña?
Ña̱ nu̱ú, xa̱a̱ síín síín na̱ yiví káʼa̱nná xíʼin, soo ná ñaʼá ná kúúmií iin chiñu ti̱xin veʼe-ñu̱ʼu na̱ káʼa̱n ña̱ kúúna cristiano ña̱ kéʼé náyóʼo kúú ña̱ níʼiná yichi̱ ti̱xin veʼe-ñu̱ʼu nu̱ú ñúʼuná ta na̱ sánáʼa̱ná kúú na̱ ñúʼu ti̱xin veʼe-ñu̱ʼu yóʼo. Soo ná kúú testigo Jehová nátúʼunná xíʼin na̱ yiví na̱ va̱ása kúú testigo Jehová, tá kúú tá ku̱a̱ʼa̱nná veʼe tá veʼe á nda̱a̱ ndáaka nu̱ú xíkaná.
Inka ki̱ʼva ña̱ síín íyoná kúú chiñu ña̱ kéʼéná ti̱xin congregación. Ná ñaʼá ná ñúʼu ti̱xin inka veʼe-ñu̱ʼu na̱ káʼa̱n ña̱ kúúna cristiano níʼiná yichi̱ nu̱ú na̱ ñúʼu xíʼinna ta sánáʼa̱ná na̱yóʼo xa̱ʼa̱ ña̱ kándíxana. Soo ná kúú testigo va̱ása sánáʼa̱ná ti̱xin congregación tá íyo na̱ ta̱a na̱ xa̱a̱ nda̱kuchi. Na̱ sánáʼa̱ ti̱xin congregación kúú na̱ nda̱kaxinna ña̱ keʼéna chiñu yóʼo, na̱yóʼo kúú na̱ anciano (1 Timoteo 3:2; Santiago 3:1).
Nu̱ú Biblia, na̱ ta̱a kuití kúú na̱ káʼa̱nña xa̱ʼa̱ ña̱ níʼina yichi̱ nu̱ú na̱ congregación. Ta ña̱ ni̱ka̱ʼa̱n ta̱ apóstol Pablo xíʼin ta̱ Tito ta̱ xi̱niʼi yichi̱ nu̱ú na̱ congregación kítáʼanña xíʼin ña̱yóʼo, ka̱chira: “Sa̱ndákoi̱ yóʼó chí Creta ña̱ va̱ʼa [...] ndaka̱xiún na̱ koo anciano iin tá iin ñuu.” (Tito 1:5.) Ta ka̱chikara “ta̱ anciano, viíní xíniñúʼu keʼéra ta saá kǒo ni iinna ka̱ʼa̱n ña̱ va̱ása va̱ʼa xa̱ʼa̱ra, iin kuití xíniñúʼu koo ñá síʼira” (Tito 1:6). Ta saátu íyo ña̱ ni̱ka̱ʼa̱nra nu̱ú iin carta ña̱ chi̱ndaʼára ndaʼa̱ ta̱ Timoteo ka̱chira. “Tá iin ta̱a chíka̱a̱níra ndee̱ ña̱ xa̱a̱ra koora anciano, iin ña̱ va̱ʼava kúú ña̱ kúni̱ra keʼéra. Iin ta̱ anciano viíní xíniñúʼu keʼéra tasaá kǒo ni iinna ka̱ʼa̱n ña̱ va̱ása va̱ʼa xa̱ʼa̱ra, iin kuití xíniñúʼu koo ñá síʼira, [...] ta ná kuxini̱ va̱ʼara sanáʼa̱ra.” (1 Timoteo 3:1, 2.)
Soo, ¿nda̱chun na̱ ta̱a kuití kúú na̱ kivi kuniʼi yichi̱ nu̱ú na̱ congregación? Ta̱ Pablo ni̱ka̱ʼa̱nra: “Va̱ása táxii̱ ña̱ sanáʼa̱ ná ñaʼá ni ña̱ kaʼndaná chiñu nu̱ú na̱ ta̱a; nu̱úka ña̱yóʼo ná kǒo ka̱ʼa̱nná. Saáchi siʼnaka ta̱ Adán na̱kuva̱ʼa, tándi̱ʼi na̱kuva̱ʼa ñá Eva” (1 Timoteo 2:12, 13). Ña̱ xi̱kuni̱ra kachira kúú ki̱ʼva ña̱ ke̱ʼé Ndióxi̱ na̱ yiví na̱ nu̱ú, náʼa̱ña ndáana xi̱kuni̱ra ná sanáʼa̱ ta kuniʼina yichi̱ nu̱ú inkana.
Ta̱ Jesucristo kúú ta̱ níʼi yichi̱ nu̱ú ndiʼi na̱ káchíñu nu̱ú Jehová, ta na̱yóʼo kéʼéna nda̱a̱ táki̱ʼva ke̱ʼéra. Nda̱a̱ táki̱ʼva ni̱ka̱ʼa̱n ta̱ Lucas, ta̱ Jesús “nda̱kiʼinra ku̱a̱ʼa̱nra ñuu tá ñuu ña̱ natúʼunra tu̱ʼun va̱ʼa xa̱ʼa̱ Reino Ndióxi̱”. Ta, ¿ndáaña ke̱ʼé na̱ discípulora tá chi̱ndaʼárana ña̱ ná keʼéna chiñu yóʼo? “Nda̱kiʼin na̱yóʼo ku̱a̱ʼa̱nna ñuu tá ñuu nátúʼunna xa̱ʼa̱ tu̱ʼun va̱ʼa.” (Lucas 8:1; 9:2-6.)
Saátu kéʼé na̱ káchíñu nu̱ú Jehová tiempo vitin, ni kúúna ta̱a á ñaʼá xíʼin ña̱ si̱í-ini sáxi̱nuna ña̱ káʼa̱n Mateo 24:14. Nu̱ú ka̱chi ta̱ Jesús: “Natúʼunna tu̱ʼun va̱ʼa xa̱ʼa̱ Reino Ndióxi̱ iníísaá nu̱ú ñuʼú yóʼo ña̱ va̱ʼa kunda̱a̱-ini ndiʼi na̱ yiví tasaá ndiʼi-xa̱ʼa̱ ñuyǐví”.
