Ka̱kui̱ chí Santo Domingo, capital ña̱ República Dominicana; ti̱xin veʼi̱ ku̱mí kúúndi̱ ta yi̱ʼi̱ kúú ta̱ loʼoka. Na̱ yivái̱ ka̱ʼvi va̱ʼana ta xi̱kuni̱na ña̱ saátu koo ndi̱ʼi̱. Tá kúma̱níka kakui̱ xa̱a̱ ku̱mí ku̱i̱ya̱, na̱ yivái̱ xíni̱na na̱ kúú misionero Mormón nda̱kanda̱ní-inina xa̱ʼa̱ ña̱ va̱ʼaní íyona ta saátu xa̱ʼa̱ ña̱ limpionína. Tá ni̱ya̱ʼa loʼo tiempo na̱ veʼi̱ kúú na̱ nu̱ú nda̱kutáʼan xíʼin Iglesia de Jesucristo de los Santos de los Últimos Días, chí República Dominicana ta saátu káʼa̱nna xíʼinna Iglesia Mormona.

Yi̱ʼi̱ ndiʼi yichi̱ xi̱keʼíi̱ ña̱ xi̱keʼé na̱ veʼe-ñu̱ʼu yóʼo, soo ña̱ xi̱kutóoníi̱ kúú ña̱ xi̱ndayáʼviní na̱ familia nu̱úna ta xi̱ka̱ʼa̱nna ña̱ ná keʼéyó ña̱ va̱ʼa. Xi̱kusi̱íní-inii̱ ña̱ xi̱kui̱ Mormón ta chi̱ka̱a̱-inii̱ ña̱ koi̱ misionero.

Tá ni̱xi̱nui̱ 18 ku̱i̱ya̱, na̱ veʼi̱ ku̱a̱ʼa̱nna koona chí Estados Unidos ña̱ va̱ʼa ku̱ʼi̱n iin universidad ña̱ va̱ʼa. Tá ni̱ya̱ʼa iin ku̱i̱ya̱ na̱ xitoi̱ na̱ kúú testigo Jehová ki̱xina xi̱tona ndi̱ʼi̱ chí Florida ta ni̱ka̱ʼa̱nna xíʼinndi̱ ña̱ ná kundi̱ʼi̱ xíʼinna iin asamblea. Nda̱kanda̱ní-inii̱ tá xi̱nii̱ ña̱ ndiʼina nándukúna texto ña̱ va̱xi nu̱ú Biblia ta xi̱kaʼyína ña̱ xi̱xiniso̱ʼona, ta saátu ke̱ʼé yi̱ʼi̱.

Tándi̱ʼi asamblea na̱ xitoi̱ ni̱ka̱ʼa̱nna xíʼi̱n xa̱ʼa̱ ña̱ kúni̱i̱ koi̱ misionero, xi̱kuni̱na chindeétáʼanna xíʼi̱n ña̱ va̱ʼa kunda̱a̱ va̱ʼaka-inii̱ xa̱ʼa̱ Biblia. Xi̱kuni̱vai̱ ña̱ ná chindeétáʼanna xíʼi̱n, chi xi̱kunda̱a̱ka-inii̱ xa̱ʼa̱ Libro ña̱ Mormón nu̱úka Biblia.

Tá nda̱ndikó na̱ xitoi̱ veʼena ki̱xáʼakandi̱ nátúʼunndi̱ xa̱ʼa̱ Biblia xíʼin teléfono. Ndiʼi tiempo xi̱ka̱ʼa̱nna xíʼi̱n ña̱ ná chitáʼi̱n ña̱ kándixai̱ xíʼin ña̱ káʼa̱n Biblia. Xi̱kuni̱na ña̱ ná ndani̱ʼí miíi̱ ña̱ nda̱a̱.

Xi̱kandíxai̱ ndiʼi ña̱ xi̱sanáʼa̱ na̱ Mormón yi̱ʼi̱, soo va̱ása níxi̱kunda̱a̱-inii̱ á xi̱kitáʼan ña̱yóʼo xíʼin ña̱ sánáʼa̱ Biblia. Xixii̱ chi̱ndaʼáñá revista ¡Despertad!, nu̱úi̱ ña̱ ka̱na 8 tí noviembre ku̱i̱ya̱ 1995, ña̱ tává na̱ testigo Jehová ta nu̱ú ña̱yóʼo va̱xi u̱vi̱ artículo ña̱ káʼa̱n xa̱ʼa̱ na̱ Mormón. Nda̱kanda̱ní-inii̱ tá ki̱ʼi̱n kuenta ña̱ va̱ása níxi̱xinii̱ ña̱ xi̱sanáʼa̱ na̱ veʼe-ñu̱ʼii̱, ña̱kán na̱ndukui̱ nu̱ú Internet sitio ña̱ kúúmií na̱ Mormón ña̱ va̱ʼa kunda̱a̱-inii̱. Á ña̱ ndixa kúú ña̱ káʼa̱n revista yóʼo. Ta ña̱ ndixa kúúvaña, ta nda̱ni̱ʼíkai̱ ña̱ káʼa̱n xa̱ʼa̱ na̱yóʼo tá ni̱xa̱ʼi̱n museo ña̱ kúúmií na̱ Mormón chí estado ña̱ Utah.

Xi̱ndakanixi̱níi̱ ña̱ xi̱kitáʼan ña̱ káʼa̱n Biblia xíʼin Libro na̱ Mormón. Soo tá ki̱xáʼíi̱ káʼvii̱ Biblia xíʼin ndinuʼu-inii̱ ña̱ va̱ása kítáʼanña xíʼin ña̱ káʼa̱n Libro na̱ Mormón. Tá kúú nu̱ú Ezequiel 18:4, Biblia káʼa̱nña ña̱ tá xíʼi̱ na̱ yiví va̱ása ndóoka níma̱na. Soo nu̱ú Libro na̱ Mormón nu̱ú Alma 42:9 káʼa̱nña ña̱ tá xíʼi̱ na̱ yiví ndóova níma̱na.

Saátu xi̱xika-inii̱ xa̱ʼa̱ ña̱ xi̱ndakanixi̱ní na̱ Mormón xa̱ʼa̱ na̱ inka ñuu. Iin ña̱ sánáʼa̱ na̱ Mormón kúú ña̱ jardín ña̱ Edén ni̱xi̱yoña chí Jackson (Misuri, Estados Unidos). Ta na̱ profeta ña̱ veʼe-ñu̱ʼu yóʼo ni̱ka̱ʼa̱nna, “ña̱ tá ná kaʼndachíñu Reino Ndióxi̱, na̱ Gobierno ña̱ Estados Unidos kúú na̱ kaʼndachíñu nu̱ú iníísaá ñuyǐví”.

Xi̱ndakanixi̱níi̱ ndáaña kuu xíʼin país miíi̱ xíʼin inkaka país tá ná kuu ña̱yóʼo. Iin xi̱ku̱aá iin ta̱ xíni̱i̱ ta̱ kúni̱ xa̱a̱ koo misionero ni̱ka̱ʼa̱nra xíʼi̱n xíʼin teléfono. Ta ni̱nda̱ka̱tu̱ʼíi̱nra: “Tá país ña̱ íyoún ná kanitáʼanña xíʼin inka país, ¿á kanitáʼún xíʼin na̱ Mormón na̱ íyo país kán?”. Iin nda̱kanda̱-inii̱ tá ni̱ka̱ʼa̱nra ña̱ kanitáʼanvara xíʼinna. Ki̱xáʼa nándukúkai̱ xa̱ʼa̱ ña̱ sánáʼa̱ na̱ Mormón ta ni̱nda̱ka̱tu̱ʼíi̱n sava na̱ xi̱niʼi yichi̱ nu̱ú na̱ veʼe-ñu̱ʼu kán, ni̱ka̱ʼa̱nna xíʼi̱n ña̱ kǒo kivi ndakuiinna ña̱ ni̱nda̱ka̱tu̱ʼíi̱nna soo kixaa̱ iin tiempo ña̱ kunda̱a̱-inii̱ xa̱ʼa̱ña.

Nda̱kava-inii̱ xa̱ʼa̱ ña̱ ni̱ka̱ʼa̱nna xíʼi̱n. Tasaá ki̱xáʼa ndákanixi̱níi̱ nda̱chun xi̱kuni̱i̱ koi̱ misionero tasaá ki̱ʼi̱n kuenta ña̱ íyoña nda̱a̱ táki̱ʼva íyo ña̱ chíndeétáʼan kuitíyó xíʼin na̱ yivíva, ta saátu xi̱kuni̱i̱ ña̱ ná ka̱ʼa̱n va̱ʼanína xa̱ʼíi̱. Soo loʼoníva xi̱kunda̱a̱-inii̱ xa̱ʼa̱ Ndióxi̱. Ni xa̱a̱ ku̱a̱ʼá yichi̱ xi̱kaʼvii̱ sava ña̱ va̱xi nu̱ú Biblia, soo va̱ása níxi̱ndayáʼvi va̱ʼa ña̱yóʼo nu̱úi̱. Ta saátu va̱ása níxi̱kunda̱a̱-inii̱ xa̱ʼa̱ ña̱ kúni̱ Ndióxi̱ keʼéra nu̱ú ñuʼú ta saátu xíʼin na̱ yiví.

Tá ki̱xáʼa sa̱kuaʼi̱ xa̱ʼa̱ Biblia xíʼin na̱ testigo Jehová ku̱a̱ʼání ña̱ʼa sa̱kuaʼi̱: ndáaña kúú ki̱vi̱ Ndióxi̱, ndáaña ndóʼoyó tá xíʼi̱yó, ndáa chiñu kúú ña̱ ta̱xi Ndióxi̱ ndaʼa̱ ta̱ Jesús ña̱ va̱ʼa saxínura ña̱ kúni̱ra... Tasaá ki̱xáʼa kúnda̱a̱ va̱ʼa-inii̱ xa̱ʼa̱ ña̱ káʼa̱n Biblia. Ta xi̱kutóoní ka̱ʼi̱n xa̱ʼa̱ ña̱ nda̱a̱ ña̱ sa̱kuaʼi̱ xíʼin inkana. Xi̱kunda̱a̱va-inii̱ ña̱ íyo Ndióxi̱, soo vitin kivi ka̱ʼi̱n xíʼinra nda̱a̱ táki̱ʼva káʼi̱n xíʼin iin na̱ va̱ʼaní kítáʼan xíʼi̱n. Tá 12 tí julio ña̱ ku̱i̱ya̱ 2004 nda̱kuchii̱ ta ni̱xa̱i̱ ndu̱i̱ testigo Jehová tá ni̱ya̱ʼa i̱ñu̱ yo̱o̱ ki̱xáʼa káchíñui̱ ku̱a̱ʼáka tiempo nu̱ú Ndióxi̱.

U̱ʼu̱n ku̱i̱ya̱ ka̱chíñui̱ sede mundial na̱ testigo Jehová, ña̱ íyo chí Brooklyn (Nueva York). Ku̱si̱íní-inii̱ chi chi̱ndeétáʼi̱n ña̱ kana ku̱a̱ʼá Biblia ta saátu inkaka tutu ña̱ tává na̱ ñuu Ndióxi̱ ña̱ va̱ʼa chindeétáʼanña xíʼin ku̱a̱ʼání na̱ yiví na̱ íyo iníísaá ñuyǐví. Ndeéní kúsi̱í-inii̱ chi xa̱a̱ ku̱a̱ʼání ku̱i̱ya̱ káchíñui̱ nu̱ú Ndióxi̱ ta chíndeétáʼi̱n xíʼin na̱ yiví ña̱ kunda̱a̱-inina xa̱ʼa̱ra.