Iin ta̱ ta̱a káʼa̱nra xíʼin ta̱ loʼo se̱ʼera ta̱ u̱xa̱ ku̱i̱ya̱: “Xa̱a̱ íyo ku̱a̱ʼání tiempo, Ndióxi̱ i̱xava̱ʼara ñuʼú yóʼo ta saátu ndiʼi ña̱ʼa ña̱ íyo nu̱úña, saátu i̱xava̱ʼara ñu̱ʼu á ña̱ ka̱ndii, yo̱o̱, xíʼin ki̱mi”. Ta, ta̱ loʼo yóʼo kíxáʼara ndákanixi̱níra tasaá ndáka̱tu̱ʼunra yivára: “¿Ndáana i̱xava̱ʼa Ndióxi̱?”.

Tasaá ndákuiin yivára: “Kǒo nda̱a̱ ni iinna ní ixava̱ʼa Ndióxi̱ saáchi xa̱a̱ ndiʼi tiempova íyora”. Xa̱ʼa̱ ña̱ ni̱ka̱ʼa̱n yivá ta̱ loʼo yóʼo xíʼinra kúsi̱íva-inira. Soo tá ku̱a̱ʼa̱n xáʼnukara kúni̱kara kunda̱a̱-inira xa̱ʼa̱ ña̱yóʼo. Íxayo̱ʼvi̱ña xíʼinra ña̱ kunda̱a̱-inira ña̱ kǒo na̱ ní ixava̱ʼa Ndióxi̱. Ta ta̱yóʼo ndákanixi̱níra: “¿Nda̱chun va̱ʼa íyo Ndióxi̱ saá? Saáchi nda̱a̱ ña̱ʼa ña̱ íyo chí ndiví íyo iin na̱ i̱xava̱ʼaña”. Xa̱ʼa̱ ña̱kán ni ta̱ʼán kunda̱a̱ káxi inira ndáana i̱xava̱ʼa Ndióxi̱.

¿Ndáaña káʼa̱n ña̱ Biblia xa̱ʼa̱ ña̱yóʼo? Káʼa̱nña nda̱a̱ táki̱ʼva ni̱ka̱ʼa̱n ta̱ íyo se̱ʼe ta̱ sa̱kán ni̱ka̱ʼa̱nyó xa̱ʼa̱ yóʼo. Ta̱ Moisés ni̱ka̱ʼa̱nra xíʼin Jehová: “Tá kúma̱níka koo yuku̱, miíún i̱xava̱ʼa ñuyǐví xíʼin ñuʼú ña̱ kána ña̱ʼa nu̱ú, ta miíún kúú Ndióxi̱ ndiʼi tiempo” (Salmo 90:1, 2). Ta ki̱ʼva saátu íyo ña̱ ni̱ka̱ʼa̱n ta̱ profeta Isaías, ka̱chira: “¿Á xa̱a̱ xíni̱ún? ¿Á xa̱a̱ xíniso̱ʼún? Jehová kúú ta̱ i̱xava̱ʼa iníísaá ñuyǐví, ta̱yóʼo kúú Ndióxi̱ ta̱ íyo ndiʼi tiempo” (Isaías 40:28). Ta carta ña̱ ka̱ʼyí ta̱ Judas káʼa̱nña, ña̱ xa̱a̱ ndiʼi tiempova íyo Ndióxi̱ (Judas 25).

Ndiʼi versículo yóʼo káʼa̱nña, “Ndióxi̱ kúú Rey ta̱ íyo ndiʼi tiempo”, nda̱a̱ táki̱ʼva ni̱ka̱ʼa̱n ta̱ apóstol Pablo (1 Timoteo 1:17). Ña̱yóʼo kúni̱ kachiña, ña̱ ndiʼi tiempo íyo Ndióxi̱ ta ndiʼi tiempo koora (Apocalipsis 1:8). Ta kǒo nda̱a̱ ni iinna ní ixava̱ʼa Ndióxi̱, ña̱yóʼo kúú ña̱ náʼa̱ ña̱ síínva íyora.

¿Nda̱chun íxayo̱ʼvi̱níña xíʼinyó kunda̱a̱-iniyó xa̱ʼa̱ ña̱yóʼo? Xa̱ʼa̱ ña̱ loʼo kuití tiempo tákuyó, íxayo̱ʼvi̱ña xíʼinyó ña̱ ndakanixi̱níyó ña̱ ku̱a̱ʼání tiempo íyo Jehová. Tá kúú, nu̱ú Jehová mil ku̱i̱ya̱ nda̱a̱ táki̱ʼva íyo iin ki̱vi̱ saá íyoña nu̱úra, saáchi xa̱a̱ ndiʼi tiempova íyora (2 Pedro 3:8). Ná ka̱ʼa̱nyó xa̱ʼa̱ iin ejemplo. Iin tí ti̱ka 50 kuití ki̱vi̱ tákurí. ¿Á kivi kunda̱a̱-inirí ndáaña kúni̱ kachi ña̱ kutakuyó 70 á 80 ku̱i̱ya̱? Va̱ása kivi kunda̱a̱-inirí, nda̱a̱ táki̱ʼva íyo tí ti̱ka yóʼo saátu íyo miíyó tá chítáʼanyó tiempo ña̱ tákuyó xíʼin ta̱ i̱xava̱ʼa miíyó. Ta ni va̱ása inkáchi íyo ña̱ ndákanixi̱níyó xíʼin ña̱ ndákanixi̱ní ta̱ i̱xava̱ʼa miíyó (Isaías 40:22; 55:8, 9). Xa̱ʼa̱ ña̱kán íyo sava ña̱ʼa ña̱ íxayo̱ʼvi̱ xíʼinyó kunda̱a̱-iniyó, tá kúú ndáa ki̱ʼva íyo Ndióxi̱.

Ni íxayo̱ʼvi̱ña xíʼinyó ña̱ kandíxayó ña̱ ndiʼi tiempo íyo Ndióxi̱, soo kiviva kandíxayó ña̱yóʼo. Tá íyo iin na̱ i̱xava̱ʼa Ndióxi̱, na̱kán kúú na̱ i̱xava̱ʼa ndiʼi ña̱ʼa. Soo ña̱ Biblia káʼa̱nña, ña̱ mií Jehová kúú ta̱ i̱xava̱ʼa ndiʼi ña̱ʼa (Apocalipsis 4:11). Ta saátu kúnda̱a̱-iniyó ña̱ ni̱xi̱yo iin tiempo ña̱ kǒo nda̱a̱ ni iin ña̱ʼa níxi̱yo nu̱ú ñuʼú yóʼo (Génesis 1:1, 2). ¿Ndáa ki̱ʼva ki̱xáʼa íyo ña̱ʼa nu̱úña? Ña̱kán kivi kachiyó, ta̱ i̱xava̱ʼa ndiʼi ña̱ʼa xa̱a̱ ya̱chi̱ví íyora, ta saátu xa̱a̱ ya̱chi̱kaví íyora nu̱ú ndiʼi na̱ táku, ta kúú se̱ʼera ta̱ nu̱ú, ta saátu na̱ ángel (Job 38:4, 7; Colosenses 1:15). Ña̱kán kúnda̱a̱ káxi iniyó, tá kúma̱níka kixáʼa Ndióxi̱ ixava̱ʼara ndiʼi ña̱ʼa, iinlá miívara ni̱xi̱yo. Ña̱kán kǒo nda̱a̱ ni iinna ní ixava̱ʼa miíra saáchi kǒo nda̱a̱ ni iinna níxi̱yo ya̱chi̱ka nu̱ú miíra.

Ña̱ tákuyó xíʼin ndiʼi ña̱ íyo chí ndiví náʼa̱ña ña̱ íyova iin Ndióxi̱ ta̱ táku ndiʼi tiempo. Xa̱ʼa̱ ña̱ viíní íyo ndiʼi ña̱ íyo chí ndiví xíʼin nu̱ú ñuʼú yóʼo, náʼa̱ña ña̱ xa̱a̱ ndiʼiva tiempo íyo ta̱ i̱xava̱ʼaña. Xa̱ʼa̱ ña̱kán, iinlá miíra kúú ta̱ ta̱xi ña̱ tákuyó xíʼin ndiʼika ña̱ táku ña̱ íyo nu̱ú ñuʼú yóʼo (Job 33:4).