Xa̱ʼnui̱ iin ñuu loʼo ña̱ ndáʼviní ña̱ ndíkaa̱ chí Montreal. U̱na̱ kúú na̱ ñanii̱ ta yi̱ʼi̱ kúú ta̱ loʼoka. Tá xi̱kuumiíi̱ i̱ñu̱ yo̱o̱, yivái̱ ni̱xi̱ʼi̱ra ta̱ siʼíi̱ kúú ñá ki̱ʼi̱n kuenta xíʼinndi̱.

Nda̱a̱ tá ni̱xi̱yo loʼi̱ xi̱xiniñúʼi̱ droga, xi̱keʼíi̱ apuesta ta xi̱kutóoní kanitáʼi̱n. Xa̱ʼnui̱ xíʼin na̱ yiví na̱ xi̱keʼé ña̱ kini. Tá xi̱kuumiíi̱ u̱xu̱ ku̱i̱ya̱, xi̱ kachíñui̱ nu̱ú ná síʼi ná íxi̱kó mií. Xi̱kutóoní sandáʼvii̱ na̱ yiví. Táki̱ʼva ni̱xi̱yo droga saá ni̱xi̱yoña nu̱úi̱.

Tá ni̱xa̱i̱ xi̱kuumiíi̱ 14 ku̱i̱ya̱ va̱ʼaníka ki̱xai̱ távái̱ xu̱ʼún ndaʼa̱ na̱ yiví. Tá kúú xi̱satái̱ ku̱a̱ʼání reloj, pulsera xíʼin anillo ña̱ xi̱na̱ʼa̱ táki̱ʼva íyo ña̱ oro, ta xi̱kaʼyíi̱ 14 quilate sa̱táña ta xi̱ ixikói̱ña chí calle, estacionamiento xíʼin nu̱ú íyo tienda náʼnu. Kamaní xi̱keʼíi̱ xu̱ʼún xíʼin ña̱yóʼo, iin ki̱vi̱ kuití xi̱keʼíi̱ 10,000 dólar canadiense.

Tá xi̱kuumiíi̱ 15 ku̱i̱ya̱, ta̱vána yi̱ʼi̱ veʼe nu̱ú ni̱xi̱yoi̱. Ña̱kán xi̱kisi̱ chí calle, parque á veʼe na̱ migoi̱.

Na̱ policía ku̱a̱ʼá yichi̱ tiinna yi̱ʼi̱ ña̱ xi̱nda̱ka̱tu̱ʼúnna miíi̱ xa̱ʼa̱ ña̱ xi̱ ixikói̱. Soo ña̱ xi̱ ixi̱kói̱ su̱ví ña̱ xi̱ ixakuíʼnai̱ kúúña xa̱ʼa̱ ña̱kán va̱ása ní xixa̱ʼi̱n veʼeka̱a. Soo cha̱ʼvivai̱ multa xa̱ʼa̱ ña̱ xi̱sandáʼvii̱ na̱ yiví, xa̱ʼa̱ ña̱ xi̱tavái̱ xu̱ʼún ndaʼa̱na, xa̱ʼa̱ ña̱ xi̱ ixikói̱ ña̱ʼa ña̱ va̱ása va̱ʼa ta saátu xa̱ʼa̱ ña̱ kǒo níxi̱kuumiíi̱ permiso ña̱ xi̱kói̱. Va̱ása ní xi̱yiʼvíi̱ nu̱ú nda̱a̱ ni iinna ta̱ ni̱xa̱i̱ xi̱kachíñui̱ nu̱ú na̱ xi̱ taxi tóo xu̱ʼún ta xi̱kiʼinna si̱kíña. Ta xa̱ʼa̱ ña̱ i̱yoní ni̱xi̱yo ña̱yóʼo, sava yichi̱ xi̱xa̱ʼa̱n tu̱xi̱í xíʼi̱n. Ta saátu xi̱kachíñui̱ xíʼin na̱ yiví na̱ xi̱ ixakuíʼna.

Tá xi̱kuumiíi̱ 17 ku̱i̱ya̱ kúú yichi̱ nu̱ú ña̱ xi̱niso̱ʼi̱ xa̱ʼa̱ ña̱ Biblia. Xíʼin iin ñá noviai̱ ni̱xi̱yoi̱ ta ñáyóʼo ki̱xáʼañá káʼviñá Biblia xíʼin na̱ testigo Jehová. Soo xa̱ʼa̱ ña̱ va̱ása níxi̱kutói̱ ña̱ káʼa̱n Biblia sa̱ndákoi̱ñá ta ni̱xa̱ʼi̱n ni̱xi̱yoi̱ xíʼin inka ñá loʼo ñá xi̱xika xíʼi̱n.

Ta saátu inka ñá xi̱xika xíʼi̱n yóʼo ki̱xáʼaña káʼviñá xíʼin na̱ testigo Jehová. Nda̱ka̱nda̱a̱ní-inii̱ ña̱ na̱samañá, saáchi vitáka ni̱xi̱yo iniñá ta saátu kúeeka ni̱xi̱yo iniñá. Iin ki̱vi̱ ni̱ka̱ʼa̱nñá xíʼi̱n ña̱ ku̱ʼi̱n xíʼinñá reunión ña̱ xíkuumiína, ta ni̱xa̱ʼa̱nvai̱. Ta kán nda̱kutáʼi̱n xíʼin na̱ yiví na̱ va̱ʼaní-ini ta va̱ʼaní nda̱kiʼinna yi̱ʼi̱. Ta va̱ʼaní ku̱nii̱ ki̱vi̱ saá. Tá ni̱xi̱yo loʼi̱ va̱ása níxi̱kuʼvi̱-inina kunina yi̱ʼi̱, ta va̱ása ní xi̱ndayáʼvíi̱ nu̱ú na̱ veʼi̱. Ta na̱ testigo Jehová ni̱na̱ʼa̱na ña̱ ndixa ndíʼi̱-inina xa̱ʼíi̱ ta míí ña̱kán kúú míí ña̱ xi̱xiniñúʼuvai̱. Tá ni̱ka̱ʼa̱nna xíʼi̱n ña̱ ka̱ʼvii̱ Biblia xíʼinna, ndi̱ku̱n ki̱xáʼavai̱ káʼvii̱ xíʼinna.

Ña̱ sa̱kúaʼi̱ kúú ña̱ sa̱káku yi̱ʼi̱. Na̱túʼun táʼi̱n xíʼin inka u̱vi̱ na̱ ku̱íʼna ña̱ ku̱ʼu̱nndi̱ ixakuíʼnandi̱, saáchi xi̱xiniñúʼíi̱ 50,000 dólar ña̱ va̱ʼa chaʼvii̱ ña̱ níkái̱ nu̱ú xa̱a̱ sasíkíi̱. Soo ndikó-inii̱ ta kǒo níkeʼíi̱ ña̱yóʼo soo na̱ inka u̱vi̱ ni̱xa̱ʼa̱nvana i̱xakuíʼnana, iinra xa̱ʼnína ta inkara chi̱ka̱a̱nara veʼeka̱a.

Ta ña̱ xi̱sakúaʼi̱ nu̱ú Biblia chi̱ndeétáʼanña xíʼi̱n ña̱ kiʼi̱n kuenta ña̱ xi̱xiniñúʼu nasamakai̱ ña̱ xi̱keʼíi̱. Tá kúú nu̱ú Biblia ña̱ 1 Corintios 6:​10 káchiña: “Na̱ kui̱ʼná, na̱ kútóo koo ku̱a̱ʼá ña̱ʼa, na̱ xíʼi nda̱a̱ xíniina, na̱ káʼa̱n-ndi̱va̱ʼa xíʼin inkana, na̱ kéʼé ña̱ va̱ása va̱ʼa xíʼin iinna ña̱ kindaana ña̱ kúúmiína, ndiʼi na̱yóʼo va̱ása ki̱ʼvina ti̱xin Reino Ndióxi̱”. Tá ka̱ʼvii̱ texto yóʼo, ki̱xáʼíi̱ xákui̱. Chi xi̱xiniñúʼu nasamai̱ ndiʼi ña̱ va̱ása va̱ʼa xi̱keʼíi̱ (Romanos 12:⁠2). Ni̱xi̱yoi̱ iin ta̱a ta̱ kininí xi̱keʼé, xikutóní sandáʼvíi̱ ta va̱ása va̱ʼa níxikuu ña̱ xi̱keʼíi̱.

Sakúaʼi̱ ña̱ va̱ʼaní-ini Jehová ta íxakáʼnu inira xa̱ʼa̱yó (Isaías 1:18). Ña̱kán ni̱ka̱ʼa̱n ndáʼvíi̱ xíʼinra xíʼin ndinuʼu-inii̱, ni̱ka̱ʼii̱n xíʼinra ña̱ ná chindeétáʼanra xíʼi̱n ña̱ sandákoi̱ ña̱ va̱ása va̱ʼa xi̱keʼíi̱ ta nasamai̱ ki̱ʼva ña̱ ni̱xi̱yoi̱. Ta miíra chi̱ndeétáʼan xíʼi̱n ña̱ loʼo tá loʼo sa̱ndákoi̱ ña̱yóʼo. Ta ña̱ ndáyáʼvi ke̱ʼíi̱ kúú ña̱ ti̱ndaʼíi̱ xíʼin ñá xi̱xika xíʼi̱n.

Tá tiempo saá, tá kúúmiíi̱ 24 ku̱i̱ya̱, xa̱a̱ u̱ni̱ ni̱xi̱yo se̱ʼendi̱. Xi̱niñúʼu ndukúi̱ iin chiñu kachíñui̱ ña̱ va̱ʼa taxii̱ ña̱ kuxu na̱ veʼi̱. Soo xa̱ʼa̱ ña̱ kǒo níxixaʼi̱n escuela va̱ása níxixinii̱ ku̱a̱ʼá chiñu. Ku̱a̱ʼá yichi̱ xi̱ka̱ʼi̱n xíʼin Jehová ña̱ ná chindeétáʼanra xíʼi̱n tá ku̱a̱ʼi̱n ndukúi̱ chiñu kachíñui̱. Ta nu̱ú xi̱nda̱ka̱tu̱ʼúnna yi̱ʼi̱ ña̱ va̱ʼa ki̱ʼvii̱ kachíñui̱, xi̱ka̱ʼi̱n xíʼinna ña̱ kúnii̱ nasamai̱ ki̱ʼva ña̱ íyoi̱ ta kǒo ixakuíʼnai̱. Ta sava yichi̱ xi̱ka̱ʼi̱n xíʼinna ña̱ káʼvii̱ Biblia ña̱ va̱ʼaka na̱ yiví koi̱. Soo nda̱a̱ ni iinna kǒo níxiin kuni yi̱ʼi̱. Soo tá ndiʼi na̱túʼi̱n ndáa ki̱ʼva ni̱xi̱yoi̱ xíʼin ña̱ xi̱keʼíi̱ ta̱ ta̱a kán ni̱ka̱ʼa̱nra xíʼi̱n: “Va̱ása kúnda̱a̱-inii̱ soo xíniñúʼu kanai̱ yóʼó ña̱ kixiún kachíñu”. Kúnda̱a̱ káxi inii̱ ña̱ mií Jehová kúú ta̱ nda̱kuiin oración ña̱ keʼíi̱ nu̱úra. Tá ni̱ya̱ʼa tiempo ñá síʼi̱ xíʼin yi̱ʼi̱ ndu̱undi̱ testigo Jehová.

Tákui̱ vitin xa̱ʼa̱ ña̱ ndíku̱i̱n consejo ña̱ va̱xi nu̱ú Biblia ta saátu ña̱ ndíku̱i̱n yichi̱ ta̱ Cristo. Vitin va̱ʼaní íyoi̱ xíʼin na̱ veʼi̱, va̱ʼa íyo ña̱ xínitúnii̱ saáchi kúnda̱a̱-inii̱ mií Jehová i̱xakáʼnu-inira xa̱ʼíi̱.

Xa̱a̱ u̱xu̱ ku̱mi̱ ku̱i̱ya̱ kúú ña̱ chíndeétáʼi̱n xíʼin na̱ ñuu Jehová: xíniñúʼi̱ ku̱a̱ʼá tiempo ña̱ chindeétáʼi̱n xíʼin inkana ña̱ kunda̱a̱-inina xa̱ʼa̱ Biblia. Ta xa̱a̱ íyo loʼo tiempo saátu ñá síʼi̱ ki̱xáʼañá kéʼéñá chiñu yóʼo. Ta ti̱xin o̱ko̱ u̱xu̱ ku̱i̱ya̱ yóʼo, xa̱a̱ chíndeétáʼi̱n xíʼin 22 na̱ káchíñui̱ xíʼin ña̱ xa̱a̱na koona testigo Jehová. Xáʼa̱nvai̱ tienda náʼnu soo va̱ása sándaʼvikai̱ na̱ yiví nda̱a̱ táki̱ʼva xi̱keʼíi̱ tá ya̱chi̱, ta ndiʼi tiempo káʼi̱n xíʼin na̱ yiví xa̱ʼa̱ iin regalo ña̱ ndátuyó ndakiʼinyó ña̱ kooyó iin ñuyǐví ña̱ va̱ʼaní nu̱ú va̱ása koo na̱ kui̱ʼná. (Salmo 37:​10, 11).