TEMA ÑA̱ VA̱XI CHÍ NU̱Ú KÍXÁʼAÑA | KIVI KUSI̱ÍKA-INIÚN ÑA̱ KAʼVIÚN ÑA̱ BIBLIA
¿Á chindeétáʼan Biblia xíʼi̱n?
Síínní íyo Biblia nu̱ú inka libro. Nu̱ú ña̱yóʼo va̱xi consejo ña̱ táxi ta̱ i̱xava̱ʼa miíyó (2 Timoteo 3:16). Ña̱ káʼa̱nña kivi chindeétáʼanníña xíʼún. Saáchi mií Biblia káchiña ña̱yóʼo: “Tu̱ʼun Ndióxi̱ ña̱ táku kúúña ta kúúmiíníña ndee̱” (Hebreos 4:12). Táxiña consejo ña̱ chindeétáʼan xíʼún ndiʼi ki̱vi̱, ta saátu chindeétáʼanña xíʼún ña̱ kuxini̱ún Ndióxi̱ ta saátu ña̱ keʼéra chí nu̱únínu (1 Timoteo 4:8; Santiago 4:8).
Táxiña consejo ña̱ chíndeétáʼan xíʼún ndiʼi ki̱vi̱. Biblia táxiña consejo ndaʼa̱yó xa̱ʼa̱ ña̱ kivi keʼéyó, ta íyo ku̱a̱ʼáníka ña̱ káʼa̱nña xa̱ʼa̱ tá kúú:
Ña̱ vií kutáʼanyó xíʼin inkana (Efesios 4:31, 32; 5:22, 25, 28, 33).
Ña̱ va̱ása kiʼin kue̱ʼe̱ miíyó ta saátu ña̱ kusi̱í-iniyó (Salmo 37:8; Proverbios 17:22).
Ña̱ kǒo keʼéyó ña̱ va̱ása va̱ʼa (1 Corintios 6:9, 10).
Ña̱ káʼa̱n xa̱ʼa̱ xu̱ʼún (Proverbios 10:4; 28:19; Efesios 4:28). *
Iin na̱ ti̱ndaʼa̱ na̱ íyo chí Asia ki̱ʼinna kuenta ña̱ consejo ña̱ táxi Biblia va̱ʼaní chíndeétáʼanña xíʼinna. Nda̱a̱ táki̱ʼva ndóʼo na̱ sa̱kán tíndaʼa̱, na̱yóʼo i̱xayo̱ʼvi̱ña xíʼinna ña̱ vií kutáʼanna ta saátu ña̱ nátúʼun xíʼin táʼanna. Soo ki̱xáʼana kéʼéna ña̱ sákuaʼana nu̱ú Biblia. ¿Ndáa ki̱ʼva chi̱ndeétáʼan ña̱yóʼo xíʼinna? Ta̱ Vicent káchira: “Ña̱ ka̱ʼvii̱ nu̱ú Biblia chi̱ndeétáʼanña xíʼi̱n ña̱ na̱ʼi̱ ña̱ kúʼvi̱-inii̱ xínii̱ ñá síʼíi̱ ni yáʼandi̱ nu̱ú tu̱ndóʼo. Xa̱ʼa̱ ña̱ kéʼéndi̱ ña̱ káʼa̱n Biblia si̱í íyondi̱”. Ñá síʼíra ñá Annalou káchiñá: “Ña̱ kaʼvindi̱ xa̱ʼa̱ na̱ káʼa̱n Biblia xa̱ʼa̱, chi̱ndeétáʼanníña xíʼinndi̱. Vitin si̱í íyoi̱ xíʼin yiíi̱, ta kusi̱í-inii̱ chi inkáchi íyo chiñu ña̱ kéʼéndi̱”.
Ña̱ kivi chindeétáʼan xíʼinyó ña̱ kuxini̱kayó Ndióxi̱. Ta̱ Vicent káchikara: “Xa̱ʼa̱ ña̱ káʼvii̱ Biblia chíndeétáʼanña xíʼi̱n ña̱ yatinníka íyoi̱ nu̱ú Jehová”. Íyo iin ña̱ ndáyáʼviní sákuaʼayó xíʼin ña̱ ni̱ka̱ʼa̱nra yóʼo: Ña̱ Biblia kivi chindeétáʼanña xíʼún ña̱ kuxini̱kaún Ndióxi̱. Tá ná kaʼviúnña ndakiʼún consejo ña̱ táxiña ta saátu xa̱ún koún migo Ndióxi̱. Saátu Biblia káʼa̱nña xa̱ʼa̱ ña̱ va̱ʼaní kooyó chí nu̱únínu, nu̱ú kusi̱í-iniyó kutakuyó ndiʼi tiempo (1 Timoteo 6:19). Iinlá nu̱ú Biblia kúú nu̱ú kivi kunda̱a̱-iniún xa̱ʼa̱ ña̱yóʼo.
Tá ná kixáʼún kaʼviún Biblia ta saátu ná kaʼviún ña̱yóʼo ndiʼi ki̱vi̱, ña̱yóʼo chindeétáʼanña xíʼún ña̱ viíka koún ta saátu ña̱ kuxini̱kaún Ndióxi̱. Sana ku̱a̱ʼání ña̱ ndaka̱tu̱ʼún miíún tá ná kixáʼún kaʼviúnña. Tá ná ndoʼún saá ndakaʼán xa̱ʼa̱ iin ta̱ chíñu ta̱ ni̱xi̱yo ñuu Etiopía xa̱a̱ yáʼaka ki̱ʼva u̱vi̱ mil ku̱i̱ya̱ chí sa̱tá. Ku̱a̱ʼání ña̱ʼa xi̱kuni̱ ta̱yóʼo kunda̱a̱-inira xa̱ʼa̱ tu̱ʼun Ndióxi̱. Ta̱ Felipe ta̱ xi̱kuu discípulo ta̱ Jesús ni̱nda̱ka̱tu̱ʼunra ta̱ ta̱a ñuu Etiopía á kúnda̱a̱-inira xíʼin ña̱ káʼvira, ta ta̱yóʼo nda̱kuiinra: “¿Ndáa ki̱ʼva kunda̱a̱-inii̱ xíʼinña tá kǒo ni iinna sánáʼa̱ yi̱ʼi̱?”. * Soo xa̱ʼa̱ ña̱ xi̱xini̱ ta̱ Felipe xa̱ʼa̱ ña̱yóʼo ta̱xira ña̱ ná chindeétáʼanra xíʼinra (Hechos 8:30, 31, 34). Saátu tá kúni̱kaún kunda̱a̱-iniún xa̱ʼa̱ ña̱ sánáʼa̱ Biblia, káʼa̱nndi̱ xíʼún ña̱ ná ki̱ʼviún nu̱ú Internet nu̱ú sitio jw.org sandákutún iin tutu, á kivitu kaʼyíún iin tutu ña̱ ku̱ʼu̱n dirección ña̱ va̱xi sa̱tá revista yóʼo ña̱ yatinka kíndo̱o nu̱ú íyoún. Kivitu ka̱ʼún xíʼin na̱ testigo Jehová na̱ íyo yatin nu̱ú íyoún á ku̱ʼún nu̱ú íyo iin Salón ña̱ Reino. Káʼa̱nndi̱ xíʼún ña̱ ná ndukún iin Biblia ta ná taxiún ña̱ chindeétáʼan ña̱yóʼo xíʼún ña̱ viíka koún.
Tá xíka-iniún á kivi kandíxayó ña̱ káʼa̱n Biblia, koto video ¿Ndachun xíniñúʼu kandíxayó ndiʼi tu̱ʼun ña̱ va̱xi nu̱ú Biblia? Ña̱ va̱ʼa ndani̱ʼún ña̱yóʼo kuniñúʼu código ña̱ va̱xi yóʼo á ki̱ʼvi nu̱ú sitio jw.org ta katavi ndaʼa̱ nu̱ú káʼa̱nña “Nandukúña” ta kaʼyí ki̱vi̱ video yóʼo.
^ párr. 8 Ndani̱ʼíkaún ndáa ki̱ʼva chindeétáʼan consejo ña̱ káʼa̱n Biblia xíʼún nu̱ú sitio ña̱ kúúmiíndi̱ nu̱ú Internet jw.org, nu̱ú ña̱ naní ÑA̱ SÁNÁʼA̱ BIBLIA > ÑA̱ KÚNI̱NA KUNDA̱A̱-ININA XA̱ʼA̱ BIBLIA.
^ párr. 11 Kivitu kaʼviún artículo ña̱ naní “¿Á ndáyáʼvi kunda̱a̱ va̱ʼa iniyó xíʼin ña̱ káʼa̱n Biblia?”, ña̱ va̱xi nu̱ú revista yóʼo.