TEMA ÑA̱ VA̱XI CHÍ NU̱Ú KÍXÁʼAÑA | KIVI KUSI̱ÍKA-INIÚN ÑA̱ KAʼVIÚN ÑA̱ BIBLIA
Ña̱ kivi keʼún tá káʼviún Biblia
Ña̱ ndáka̱xiún keʼún kúú ña̱ chindeétáʼan xíʼún ña̱ kutóún kaʼviún Biblia. Ña̱ kivi keʼún tá xa̱a̱ káʼviún Biblia.
Nda̱kaxin iin Biblia ña̱ kúúmií tu̱ʼun ña̱ káʼa̱nna tiempo vitin. Tá ná ndani̱ʼún tu̱ʼun ña̱ íxayo̱ʼvi̱ xíʼún kúnda̱a̱-iniún xíʼin á ña̱ va̱ása xíniñúʼukana, ixayo̱ʼvi̱ña xíʼún ña̱ kunda̱a̱-iniún xíʼin ña̱ káʼviún. Xa̱ʼa̱ ña̱kán ndukú iin Biblia ña̱ kúúmií tu̱ʼun ña̱ kúnda̱a̱-iniún xíʼin ta xáa̱ña nda̱a̱ níma̱ún. Ta saátu ná kǒo nasa̱ma ña̱ káʼa̱nña xa̱ʼa̱, ta káxi ná kooña. *
Kuniñúʼu ña̱ʼa ña̱ íyo tiempo vitin. Tiempo vitin Biblia ku̱a̱ʼá ki̱ʼva kivi kuumiíyóña, nda̱a̱ kivi kuumiíyóña nu̱ú celular á tableta. Kivi kaʼviúnña nu̱ú internet á sánuúnña nu̱ú iin computadora á inkaka ña̱ʼa. Ta savaña nda̱a̱ kivi kotoún ndáaña káʼa̱n inka Biblia xa̱ʼa̱ versículo yóʼo á chitáʼún iin versículo xíʼin inka versículo. Tá va̱ása kúni̱ún kaʼviúnña, kivitu kuniso̱ʼúnña saáchi xa̱a̱ kúúmiíña audio. Ku̱a̱ʼánína kútóona kuniso̱ʼonaña tá ku̱a̱ʼa̱nna kachíñuna, tá ku̱a̱ʼa̱nna xíʼin carro, tá ndakatana ti̱ko̱to̱ á tá kéʼéna inkaka chiñu. ¿Ndáaña chindeétáʼanka xíʼún túviún? ¿Á kúni̱ún keʼúnña?
Nandukúka xa̱ʼa̱ ña̱ káʼviún. Tutu ña̱ káʼa̱n xa̱ʼa̱ ña̱ kúni̱ kachi Biblia chindeétáʼanña xíʼún ña̱ kunda̱a̱ka-iniún xa̱ʼa̱ ña̱ káʼviún. Tá kúú, íyo mapa nu̱ú va̱xi lugar ña̱ káʼa̱n Biblia xa̱ʼa̱, ta chindeétáʼanña xíʼún ña̱ kunda̱a̱-iniún xa̱ʼa̱ ña̱ káʼa̱nña. Savatu ña̱ kána nu̱ú artículo yóʼo va̱xiña ti̱xin táʼví ña̱ naní “Ña̱ sánáʼa̱ Biblia” nu̱ú sitio ña̱ Internet jw.org, ta ña̱yóʼo chindeétáʼanña xíʼún ña̱ kunda̱a̱-iniún xíʼin ku̱a̱ʼání ña̱ va̱xi nu̱ú Biblia.
Xa̱a̱ síín síín ki̱ʼva kaʼviúnña. Sana ndákanixi̱níún ña̱ kaʼviún Biblia nu̱ú kíxáʼaña iinsaá nda̱a̱ nu̱ú ndíʼiña íxayo̱ʼvi̱ña xíʼún, soo tá ná ndaka̱xiún iin ña̱ kútóún, ña̱yóʼo va̱ʼaní chindeétáʼanña xíʼún. Iin ña̱ kivi keʼún kúú ña̱ kaʼviún xa̱ʼa̱ iin na̱ káʼa̱n Biblia xa̱ʼa̱ nu̱ú recuadro ña̱ naní “ Sakúaʼa xa̱ʼa̱ ña̱ káʼa̱n Biblia kuxini̱ na̱ káʼa̱nña xa̱ʼa̱”, ña̱yóʼo kivi chindeétáʼanña xíʼún ña̱ kunda̱a̱-iniún xa̱ʼa̱ iin na̱ yiví na̱ káʼa̱n Biblia xa̱ʼa̱. Kivi kaʼviún iin tá iin ña̱ káʼa̱nña xa̱ʼa̱ á kaʼviúnña nda̱a̱ táki̱ʼva ku̱u ña̱ káʼa̱nña xa̱ʼa̱. ¿Á kivi keʼún iin ña̱yóʼo?
^ párr. 4 Ku̱a̱ʼání na̱ káʼvi ña̱ Traducción del Nuevo Mundo de las Santas Escrituras káʼa̱nna ña̱ va̱ása nása̱ma ña̱ káʼa̱nña, kivi kandíxayó ña̱ káʼa̱nña ta va̱ása yo̱ʼvi̱ kaʼviyóña. Biblia yóʼo na̱ testigo Jehová kúú na̱ táváña, ta xa̱a̱ íyoña yáʼaka 130 nu̱ú tu̱ʼun. Kivi sánuúnña nu̱ú sitio ña̱ Internet jw.org á sánuún ña̱ aplicación JW Library. Á tá kúni̱ún iin na̱ testigo Jehová kivi taxina iinña ndaʼún.