Va̱ása. Tá chítáʼanyóña xíʼin manuscrito ña̱ ni̱ka̱ʼyi̱ xi̱naʼá kúnda̱a̱-iniyó ña̱ inkáchi káʼa̱nvaña, ni xa̱a̱ ku̱a̱ʼání ku̱i̱ya̱ kéʼéna copia tu̱ʼun Ndióxi̱ nu̱ú ña̱ʼa ña̱ ndíʼi-xa̱ʼa̱.

 Ku̱a̱ʼáníva manuscrito ña̱ ni̱ka̱ʼyi̱ ña̱ Biblia xi̱naʼá ndáni̱ʼína. Ta nu̱ú sava ña̱yóʼo nása̱mava loʼo ña̱ káʼa̱nña, ta xíʼin ña̱yóʼo kúnda̱a̱-iniyó ña̱ ni̱ya̱ʼava ndaʼa̱na tá ke̱ʼéna copiaña. Ña̱ʼa ña̱ na̱sama yóʼo su̱ví ña̱ ndáyáʼviníví kúúña ta va̱ása násamaña ña̱ káʼa̱n tu̱ʼun Ndióxi̱. Soo íyova sava ña̱ ndáyáʼvi ña̱ na̱sama nu̱úña. Saáchi sava ña̱yóʼo xa̱a̱ ku̱a̱ʼání ku̱i̱ya̱ na̱samaña i̱xaa sava na̱ yiví na̱ xi̱kuni nasama ña̱ káʼa̱n mií ña̱ original. Ná káʼa̱nyó xa̱ʼa̱ u̱vi̱ña.

1.   Nu̱ú sava traducción ña̱ Biblia ña̱ ni̱ka̱ʼyi̱ xi̱naʼá va̱xi tu̱ʼun yóʼo nu̱ú 1 Juan 5:7: “Chí ndiví: ta̱ kúú yiváyó, ta̱ kúú Verbo ta saátu Espíritu Santo, u̱ni̱ saána iin kúúna”. Soo mií manuscrito ña̱ ni̱ka̱ʼyi̱ xi̱naʼá náʼa̱ña ña̱ kǒo tu̱ʼun yóʼo va̱xi nu̱ú ña̱ original. Xa̱a̱ ku̱a̱ʼáva tiempo ni̱ya̱ʼa saá nda̱chinúunaña. a Ña̱kán Biblia ña̱ sa̱kán kána vitin ña̱ kítáʼanka xíʼin ña̱ original kǒo tu̱ʼun yóʼo va̱xi nu̱úña.

2.   Ki̱vi̱ mií Ndióxi̱ ku̱a̱ʼáníva yichi̱ va̱xiña nu̱ú manuscrito ña̱ ni̱ka̱ʼyi̱ xi̱naʼá, soo ku̱a̱ʼání na̱ sándaya̱ʼa Biblia inka tu̱ʼun násamanaña ta chínúu kuitína “Táta” á “Ndióxi̱”.

 Ku̱a̱ʼání kúú manuscrito ña̱ íyo vitin, xa̱ʼa̱ ña̱kán tá íyo iin ña̱ va̱ása va̱ʼa va̱xi nu̱ú Biblia, kamaníva ndani̱ʼíyóña. b Tá chítáʼanyó tutu yóʼo, ¿ndáaña kúnda̱a̱-iniyó xa̱ʼa̱? ¿Á kivi kandíxayó ña̱ va̱ʼa íyo ña̱ va̱xi nu̱ú Biblia ña̱ kúúmiíyó vitin?

•   Ta̱ William Henry Green ni̱ka̱ʼa̱nra ña̱yóʼo xa̱ʼa̱ ña̱ Escrituras Hebreas (ña̱ nanítu Antiguo Testamento), ka̱chira: “Kǒo nda̱a̱ ni iin tutu ña̱ ni̱ka̱ʼyi̱ xi̱naʼá ña̱ káxiní íyo nda̱a̱ táki̱ʼva íyo Biblia”.

•   Ta̱ Frederick Bruce ka̱ʼyíra ña̱yóʼo xa̱ʼa̱ ña̱ Escrituras Griegas Cristianas, á ña̱ Nuevo Testamento: “Ku̱a̱ʼáníkava kúú ña̱ náʼa̱ ña̱ ndixa kúú ña̱ ni̱ka̱ʼyi̱ nu̱ú ña̱ Nuevo Testamento [...] nu̱ú ndiʼika inka tutu ña̱ ka̱ʼyína tá xi̱naʼá, ta ni iinna kǒo xíka-inina xa̱ʼa̱ ña̱yóʼo”.

•   Ta̱ Sir Frederic Kenyon, ta̱ xíni̱ va̱ʼa xa̱ʼa̱ manuscrito ña̱ Biblia ni̱ka̱ʼa̱nra ña̱yóʼo “na̱ yiví kivi kuumiína iin Biblia ta ni loʼo va̱ása kaka-inina ña̱ ndixa tu̱ʼun Ndióxi̱ kúúña, ta ni va̱ása nínasa̱ma ña̱ káʼa̱nña ni xa̱a̱ ku̱a̱ʼání ku̱i̱ya̱ ni̱ya̱ʼa”.

•   Na̱ judío ta saátu na̱ xi̱ndiku̱n ta̱ Cristo tá siglo nu̱ú na̱ xi̱keʼé copia tu̱ʼun Ndióxi̱, nda̱a̱ ña̱ʼa ña̱ va̱ása va̱ʼa ña̱ xi̱keʼé na̱ ñuu Ndióxi̱ xi̱chinúuna nu̱ú copia ña̱ xi̱keʼéna, ta va̱ása nísakútaʼanaña (Números 20:12; 2 Samuel 11:2-4; Gálatas 2:11-14). c Ta saátu va̱ása nísakútaʼa ña̱ ni̱ka̱ʼa̱n Ndióxi̱ kundoʼo na̱ judío xa̱ʼa̱ ña̱ va̱ása níxiniso̱ʼona ña̱ xi̱ka̱ʼa̱nra, ta saátu xi̱ka̱ʼa̱nna xa̱ʼa̱ ña̱ʼa ña̱ va̱ása va̱ʼa ña̱ xi̱sanáʼa̱ mií na̱ yiví (Oseas 4:2; Malaquías 2:8, 9; Mateo 23:8, 9; 1 Juan 5:21). Na̱yóʼo ni̱na̱ʼa̱na ña̱ kúúna ta̱a na̱ nda̱kúní-ini ta ndáyáʼviní tu̱ʼun Ndióxi̱ nu̱úna chi ni loʼo va̱ása nínasamana ña̱ va̱xi nu̱úña.

•   ¿Á va̱ása náʼa̱ káxi ña̱yóʼo nu̱úyó ña̱ mií Ndióxi̱ kúú ta̱ ndáa tu̱ʼunra ña̱ va̱xi nu̱ú Biblia ña̱ va̱ʼa kǒo nasa̱maña? (Isaías 40:8; 1 Pedro 1:24, 25). d Saáchi su̱ví na̱ xi̱ndoo tá xi̱naʼá kuití kúú na̱ níxi̱kuni̱ra ña̱ ná chindeétáʼanña xíʼin chi ta̱kán kúni̱ra ña̱ ndiʼiyó ná chindeétáʼanña xíʼin (1 Corintios 10:11). “Saáchi ndiʼi ña̱ ni̱ka̱ʼyi̱ xi̱naʼá ni̱ka̱ʼyi̱ña ña̱ va̱ʼa sanáʼa̱ña miíyó, chi tu̱ʼun Ndióxi̱ chíndeétáʼanña xíʼinyó ña̱ va̱ʼa ndakú koo iniyó, ta sándi̱koña-iniyó ña̱ va̱ʼa kundatuyó ña̱ taxi Ndióxi̱ ndaʼa̱yó chí nu̱únínu” (Romanos 15:4).

•   Ta̱ Jesús xíʼin na̱ xi̱ndiku̱n sa̱tára xi̱xiniñúʼuna copia ña̱ Escrituras Hebreas ta ni loʼo va̱ása níxi̱xika-inina ña̱ na̱sama ña̱ va̱xi nu̱úña (Lucas 4:16-21; Hechos 17:1-3).