Nu̱ú Biblia va̱ása va̱xi tu̱ʼun ña̱ káʼa̱n xa̱ʼa̱ ña̱ sánuuna se̱ʼena, soo íyo ku̱a̱ʼáva versículo ña̱ chíndeétáʼan xíʼinyó ña̱ va̱ʼa kunda̱a̱-iniyó ndáa ki̱ʼva ndákanixi̱ní Jehová xa̱ʼa̱ ña̱ táku iin na̱ yiví ta saátu ña̱ táku iin ña̱ loʼo ña̱ kúma̱ní kaku.

 Ña̱ tákuyó iin regalo Ndióxi̱ kúúña (Génesis 9:6; Salmo 36:9). Ndáyáʼviní ña̱ tákuyó nu̱ú Ndióxi̱. Saátu ña̱ táku iin ña̱ lée loʼo ña̱ kúma̱ní kaku, ña̱kán na̱ xáʼní kúú iin na̱ yiví na̱ sánuu se̱ʼena.

 Ley ña̱ ta̱xi Ndióxi̱ ndaʼa̱ na̱ ñuu Israel káʼa̱nña ña̱yóʼo: “Tá u̱vi̱ na̱ ta̱a kánitáʼanna ta sátukue̱ʼe̱na iin ñaʼá ñá ñúʼu se̱ʼe, ta ka̱ku se̱ʼeñá ni ta̱ʼán kixaa̱ ki̱vi̱ ña̱ kakuña, soo kǒo nda̱a̱ ni iinna xíʼi̱, na̱ sa̱túkue̱ʼe̱-ñaʼá xíniñúʼu chaʼvina ña̱ ná ndukú yii̱ ñáyóʼo xa̱ʼa̱ ña̱ ndo̱ʼoñá. Ta na̱ ndatiin ku̱a̱chi xa̱ʼa̱ ña̱ ku̱u, na̱yóʼo kúú na̱ ka̱ʼa̱n nda̱saa xíniñúʼu chaʼvina. Soo tá ná kuvi ñá ñaʼá yóʼo á ña̱ loʼo se̱ʼeñá, xíniñúʼu kuvi na̱ kúúmií ku̱a̱chi xa̱ʼa̱ ña̱yóʼo” (Éxodo 21:22, 23). a

•  ¿Ama kíxáʼa táku iin na̱ yiví?

•  ¿Á kivi ixakáʼnu-ini Ndióxi̱ xa̱ʼa̱ na̱ sa̱núu se̱ʼe?

•  ¿Á va̱ʼa sanúu iin ñaʼá se̱ʼeñá tá i̱yo kuvi miíñá á ña̱ loʼo se̱ʼeñá?

 Nu̱ú Ndióxi̱, ña̱ táku iin na̱ yiví kíxáʼaña tá kée se̱ʼe iin ñaʼá. Nu̱ú Biblia káʼa̱nña ña̱ na̱ lée válí na̱ kúma̱níka kaku, xa̱a̱ iin na̱ yiví kúúna nu̱ú Ndióxi̱. Ná kotoyó sava ejemplo ña̱ náʼa̱ ña̱ inkáchi íyo na̱ lée válí na̱ ta̱ʼán kaku xíʼin na̱ sa̱kán káku nu̱ú Ndióxi̱.

•   Ta̱ David ni̱ka̱ʼa̱nra tu̱ʼun yóʼo xíʼin Ndióxi̱: “Miíún xi̱toún tá sa̱kán ni̱kei̱” (Salmo 139:16). Ña̱kán, nu̱ú Ndióxi̱ xa̱a̱ iin na̱ yiví xi̱kuu ta̱ David tá kúma̱níka kakura.

•   Ná ka̱ʼa̱nyó xa̱ʼa̱ inkaña. Tá kúma̱níka kaku ta̱ Jeremías, Ndióxi̱ xa̱a̱ nda̱kaxinra ndáa chiñu taxira ndaʼa̱ra. Ndióxi̱ ni̱ka̱ʼa̱nra xíʼinra: “Tá kúma̱níka ixava̱ʼi̱ yóʼó ti̱xin siʼún, xa̱a̱ xi̱xini̱vai̱ yóʼó; ta tá kúma̱níka kakún, xa̱a̱ nda̱sayi̱i̱vai̱ yóʼó. Nda̱kaxii̱n yóʼó ña̱ koún profeta nu̱ú na̱ inka ñuu” (Jeremías 1:5).

•   Ta̱ Lucas, iin ta̱ ka̱ʼyí Biblia ta xi̱kuura doctor, inkáchi tu̱ʼun griego xi̱niñúʼura tá ni̱ka̱ʼa̱nra xa̱ʼa̱ iin ña̱ lée loʼo ña̱ kúma̱ní kaku xíʼin ña̱ sa̱kán ka̱ku (Lucas 1:41; 2:12, 16).

 Kiviva ixakáʼnu-ini Ndióxi̱ xa̱ʼa̱ na̱ sa̱núu se̱ʼe. Tá kíxáʼa ndákanixi̱nína nda̱a̱ táki̱ʼva ndákanixi̱ní Ndióxi̱ xa̱ʼa̱ ña̱ tákuyó, kǒo xíniñúʼuví kusuchíní-inina á ndakava-inina xa̱ʼa̱ ña̱ ke̱ʼéna. Biblia káchiña: “Jehová iin Ndióxi̱ va̱ʼaní kúúra ta kúndáʼviní-inira xínira na̱ ndóʼo tu̱ndóʼo [...]. Nda̱a̱ táki̱ʼva xíká kíndo̱o nu̱ú kána ñu̱ʼu xíʼin nu̱ú kíʼviña saá xíká ndákoora ku̱a̱chiyó” (Salmo 103:8-12). b Jehová íxakáʼnu-inira xa̱ʼa̱ na̱ ndándikó-ini xa̱ʼa̱ ña̱ kini ña̱ ke̱ʼéna tá ya̱chi̱, ta nda̱a̱ na̱ sa̱núu se̱ʼe ixakáʼnu-inira xa̱ʼa̱ (Salmo 86:5).

 Vitin ña̱ xa̱a̱ kúnda̱a̱-iniyó ña̱ káʼa̱n Biblia xa̱ʼa̱ na̱ lée válí na̱ kúma̱níka kaku, kǒo kivi sanúu iin ñaʼá se̱ʼeñá ni i̱yo kuvi miíñá á ña̱ lée loʼo se̱ʼeñá.

 Soo, ¿ndáaña kuu tá ná kuu iin tu̱ndóʼo tá káku iin ña̱ lée loʼo ta xíniñúʼu ndaka̱xinna ndáana sakǎkuna á ña̱ lée loʼo a siʼíña? Sava kuití yichi̱ kúú ña̱yóʼo, soo tá kúú ña̱yóʼo, na̱ ñúʼu ndaʼa̱ tu̱ndóʼo yóʼo kúú na̱ ndaka̱xin ndáana sakǎkuna.