Biblia káʼa̱nña ña̱ kǒo kúni̱ Ndióxi̱ ná ki̱ʼviyó “ku̱a̱chi kini” (1 Tesalonicenses 4:3). Tá káʼa̱n Biblia xa̱ʼa̱ “ku̱a̱chi kini”, káʼa̱nña xa̱ʼa̱ na̱ kísi̱ xíʼin na̱ kǒo nítindaʼa̱ xíʼinna, káʼa̱nña xa̱ʼa̱ ta̱a ta̱ kísi̱ xíʼin inka ta̱a, ñaʼá ñá kísi̱ xíʼin inka ñaʼá, ta saátu na̱ kísi̱ xíʼin táʼan soo ta̱ʼán tindaʼa̱na.

•  ¿Nda̱chun ndáyáʼviní nu̱ú Ndióxi̱ ña̱ tindaʼa̱ iin ta̱a xíʼin iin ñaʼá?

•  ¿Á va̱ʼa koo xíʼin táʼan na̱ ta̱ʼán tindaʼa̱ ña̱ va̱ʼa kotona á va̱ʼa kitáʼanna?

•  ¿Ndáaña kivi keʼéna ña̱ va̱ʼa vií koo xíʼin táʼanna tá ná tindaʼa̱na?

•   Ndióxi̱ chi̱ndúʼú xa̱ʼa̱ ña̱ tíndaʼa̱ na̱ yiví. Ke̱ʼéra ña̱yóʼo tá sa̱tíndaʼa̱ra na̱ yiví na̱ nu̱ú na̱ ni̱xi̱yo nu̱ú ñuʼú yóʼo (Génesis 2:22-24). Ndióxi̱ kǒo níxikuni̱ra ña̱ ná koo xíʼin táʼan iin ta̱a xíʼin iin ñaʼá na̱ ta̱ʼán tindaʼa̱.

•   Ndióxi̱ xíni̱ra ndáaña keʼéyó ña̱ va̱ʼa vií kooyó. Miíra chi̱ndúʼú ña̱ tíndaʼa̱na ña̱ va̱ʼa koo iin ta̱a xíʼin iin ñaʼá ndiʼi tiempo. Ndióxi̱ xi̱kuni̱ra ña̱ ná tindaʼa̱na, chi saá kúú ña̱ ndakiʼin na̱ veʼena ña̱ va̱ʼa. Ndakanixi̱ní xa̱ʼa̱ ña̱yóʼo: ña̱ va̱ʼa ndachitáʼan viíyó iin mueble, xíniñúʼu kundiku̱nyó ña̱ káʼa̱n na̱ i̱xava̱ʼa túyóʼo, ta saátu tá kúni̱yó si̱í kooyó xíʼin na̱ veʼeyó xíniñúʼu kundiku̱nyó ndiʼi ña̱ káʼa̱n Ndióxi̱ xíʼinyó keʼéyó. Ta ndiʼi tiempo va̱ʼa kooyó tá ndíku̱nyó ña̱yóʼo (Isaías 48:17, 18).

•   Ku̱a̱ʼání tu̱ndóʼo kivi kixi nu̱ú na̱ kísi̱ xíʼin na̱ ta̱ʼán tindaʼa̱ xíʼinna. Tá kúú, kivi ke̱e se̱ʼena, kivi kiʼinna kue̱ʼe̱ ta saátu kivi sandíʼi ña̱ xínitúni̱na miína.

•   Ndióxi̱ ta̱xira iin regalo ndaʼa̱ na̱ yiví: ña̱ kivi koo se̱ʼena tá ná ku̱su̱n xíʼin táʼanna. Iin regalo ña̱ ndáyáʼviní kúú ña̱yóʼo. Ná ndakanixi̱níyó chi ndáyáʼviní ña̱yóʼo nu̱ú Ndióxi̱. Xa̱ʼa̱ ña̱kán kúni̱ra ná kuniñúʼu viíyó regalo yóʼo ta ná kuniñúʼuyóña xíʼin na̱ yiví na̱ ti̱ndaʼa̱yó xíʼin. Saá kúú ña̱ íxato̱ʼóyó ña̱ ti̱ndaʼa̱yó (Hebreos 13:4).

 Ña̱ va̱ʼa si̱í koo na̱ xa̱a̱ ti̱ndaʼa̱, “va̱ása xíniñúʼu koo xíʼin táʼanna tá kúma̱níka tindaʼa̱na” ña̱ va̱ʼa kotona á va̱ʼa kítáʼan xíʼin táʼanna á va̱ʼaka sandákoo táʼanna. Ña̱ kivi chindeé miína kúú ña̱ chikaa̱na ndee̱ ta inkáchi ndasaviína ku̱a̱chi ña̱ kúúmiína. a Ta ña̱ kivi chindeé miína kúú ña̱ tindaʼa̱na (Mateo 19:6).

 Koova ku̱a̱chi nu̱ú na̱ xa̱a̱ ti̱ndaʼa̱. Soo kiviva kusi̱í-ini na̱ xa̱a̱ ti̱ndaʼa̱ tá ndíku̱nna consejo ña̱ táxi Biblia. Ná kotoyó savaña:

•   Kundi̱ʼi-ini xa̱ʼa̱ ña̱ ndóʼo ñá síʼún á yii̱ún nu̱úka ña̱ kundi̱ʼi-iniún xa̱ʼa̱ miíún (1 Corintios 7:3-5; Filipenses 2:3, 4).

•   Ndakundeéndó kuʼvi̱-inindó kunitáʼanndó ta ixato̱ʼó táʼanndó ndiʼi ki̱vi̱ (Efesios 5:25, 33).

•   Siʼna xíniñúʼu vií ndakanixi̱níndó tá kúma̱níka ka̱ʼa̱nndó iin ña̱ʼa (Proverbios 12:18).

•   Kúee koo inindó ta kama ixakáʼnu-inindó xa̱ʼa̱ táʼanndó (Colosenses 3:13, 14).