Ña̱ Armagedón kooña tá ná kanitáʼan Ndióxi̱ xíʼin na̱ chíñu ñuyǐví yóʼo. Na̱ chíñu yóʼo ta saátu na̱ kítáʼan xíʼinna sáa̱-inina xínina Ndióxi̱ saáchi va̱ása kándíxana ña̱ kaʼndachíñura nu̱úna (Salmo 2:2). Tá ná kuu guerra ña̱ Armagedón ndiʼi-xa̱ʼa̱ na̱ chíñu ñuyǐví yóʼo (Daniel 2:44).

 Tu̱ʼun Armagedón káʼyi̱tuña Har–Magedón, ta iinlá kuití yichi̱ va̱xiña nu̱ú Biblia ta iinlá nu̱ú tutu Apocalipsis va̱xiña, ta nu̱ú iin profecía ña̱ va̱xi nu̱ú libro yóʼo káchiña: “Na̱ rey na̱ íyo nu̱ú ñuʼú kanitáʼanna xíʼin Ndióxi̱ ta̱ kúúmií ndiʼi ndee̱ tá ná kixaa̱ ki̱vi̱ káʼnura” ta ña̱yóʼo kooña “iin lugar ña̱ naní Armagedón” (Apocalipsis 16:14, 16).

 ¿Ndáana kanitáʼan ti̱xin guerra ña̱ Armagedón? Ndiʼi na̱ ángel na̱ íyo chí ndiví ta̱ Jesucristo kúú ta̱ kuniʼi yichi̱ nu̱ú na̱yóʼo ta sandíʼi-xa̱ʼa̱na na̱ sáa̱-ini xíni Ndióxi̱ (Apocalipsis 19:11-16, 19-21). Ta na̱ ndiʼi-xa̱ʼa̱ yóʼo kúú na̱ sáa̱-ini xíni ña̱ xáʼndachíñu Ndióxi̱ ta va̱ása íxato̱ʼónaña (Ezequiel 39:7).

 ¿Á iin táʼví nu̱ú ñuʼú yóʼo kanitáʼanna tá ná koo ña̱ Armagedón? Va̱ása. Ña̱ Armagedón kooña iníísaá nu̱ú ñuʼú, ta su̱ví iin táʼví loʼo nu̱úña kooña (Jeremías 25:32-34; Ezequiel 39:17-20).

 Tu̱ʼun Armagedón (ña̱ hebreo, Har Meghiddóhn) kúni̱ kachiña “Yuku̱ ña̱ Meguidó”. Meguidó kúú iin ñuu ña̱ ni̱xi̱yo nu̱ú ñuʼú ña̱ xi̱kuu kuenta na̱ ñuu Israel. Ta yóʼo kúú nu̱ú ni̱xi̱yo sava ku̱a̱chi ña̱ ndeéní, Biblia káʼa̱nña xa̱ʼa̱ sava ña̱yóʼo (Jueces 5:19, 20; 2 Reyes 9:27; 23:29). Soo ña̱ Armagedón va̱ása káʼa̱nña xa̱ʼa̱ iin lugar ña̱ ni̱xi̱yo chí Meguidó chi nu̱ú ña̱yóʼo kǒo iin yuku̱ íyo. Ta saátu yoso̱ ña̱ Jezreel va̱ása nani ña̱yóʼo ña̱ koo ndiʼi na̱ kanitáʼan xíʼin Ndióxi̱. Soo mií ña̱ nda̱a̱ ña̱ Armagedón kúú ña̱ koo iníísaá nu̱ú ñuʼú ta ná ndakutáʼan ndiʼi na̱ chíñu nu̱ú ñuʼú yóʼo ña̱ kanitáʼanna xíʼin Reino Ndióxi̱.

 ¿Ndáaña kuu tá ná koo ña̱ Armagedón? Va̱ása xíniyó ndáa ki̱ʼva kuniñúʼu Ndióxi̱ ndee̱ra, soo xíni̱yó kuniñúʼura ña̱ xa̱a̱ xi̱xiniñúʼura tá ya̱chi̱ ta kúú: ñíí, ña̱ ta̱an, ña̱ ndeéní kuun sa̱ví, ña̱ kóyo ñuʼu̱ chí ndiví xíʼin azufre, ña̱ ndeéní ko̱yo taxa ta saátu koo kue̱ʼe̱ xíkun (Job 38:22, 23; Ezequiel 38:19, 22; Habacuc 3:10, 11; Zacarías 14:12). Xa̱ʼa̱ ña̱ va̱ása kunda̱a̱-inina ndáaña kuu, ku̱a̱ʼání na̱ sáa̱-ini xíni Ndióxi̱ kaʼní-táʼanna miína, soo tándi̱ʼi saá kúú ña̱ kunda̱a̱-inina ña̱ xíʼin Ndióxi̱ kúú ña̱ kanitáʼanna (Ezequiel 38:21, 23; Zacarías 14:13).

 ¿Á sandíʼi-xa̱ʼa̱ ña̱ Armagedón ñuʼú ña̱ ndóoyó yóʼo? Ñuʼú va̱ása ndiʼi-xa̱ʼa̱ña tá ná ki̱xaa̱ ña̱ Armagedón. Ñuʼú na̱kuva̱ʼaña ña̱ kundooyó nu̱úña ndiʼi tiempo (Salmo 37:29; 96:10; Eclesiastés 1:4). Xa̱ʼa̱ ña̱kán Armagedón va̱ása sandíʼi-xa̱ʼa̱ña ndiʼi ña̱ʼa. Saáchi sakákuña ku̱a̱ʼání na̱ yiví na̱ nda̱kú íyo ini káchíñu nu̱ú Ndióxi̱ (Apocalipsis 7:9, 14; Salmo 37:34).

 Soo, ¿á va̱ása sánáʼa̱ Biblia ña̱ Armagedón “sandíʼi-xa̱ʼa̱ ña̱ ñuyǐví”? Ña̱ nda̱a̱ kúúña sava versículo ña̱ va̱xi nu̱ú Biblia xíniñúʼuña tu̱ʼun ñuyǐví ña̱ ka̱ʼa̱nña xa̱ʼa̱ ñuʼú nu̱ú ndóoyó yóʼo. Soo nu̱ú Biblia xíniñúʼuña tu̱ʼun yóʼo ña̱ va̱ʼa ka̱ʼa̱nña xa̱ʼa̱ na̱ yiví na̱ íyo contra xíʼin Ndióxi̱ (1 Juan 2:15-17). Xíʼin ña̱yóʼo kúnda̱a̱-iniyó ña̱ Armagedón sandíʼi-xa̱ʼa̱ña “ñuyǐví” (Mateo 24:3).

 ¿Ama kixaa̱ guerra ña̱ Armagedón? Tá ni̱ka̱ʼa̱n ta̱ Jesús xa̱ʼa̱ “tu̱ndóʼo ña̱ káʼnu” ña̱ koo tá kúma̱ní ña̱ kixaa̱ ña̱ Armagedón ka̱chira: “Ni iinna va̱ása xíni̱ hora xíʼin ki̱vi̱, ni na̱ ángel na̱ íyo chí ndiví ni yi̱ʼi̱; mitúʼun yivái̱ xíni̱” (Mateo 24:21, 36). Xíʼin ndiʼi ña̱yóʼo Biblia káʼa̱nña xíʼinyó ama koo ña̱ Armagedón ta ña̱yóʼo kooña tá xa̱a̱ ná koo ta̱ Jesús xíʼinyó, ta Jesús ki̱xáʼa̱ íyora xíʼinyó nani tá ku̱i̱ya̱ 1914 (Mateo 24:37-39).