¿Ndáa ki̱ʼva xi̱na̱ʼa̱ ta̱ Jesús?
Ña̱ káʼa̱n Biblia xa̱ʼa̱ ña̱yóʼo
Nda̱a̱ ni iinna va̱ása kúnda̱a̱ káxi inina ndáa ki̱ʼva ni̱xi̱yo ta̱ Jesús, saáchi Biblia va̱ása káʼa̱n káxiña xa̱ʼa̱ ña̱yóʼo. Ña̱yóʼo náʼa̱ña ña̱ va̱ása ndáyáʼvi ndáa ki̱ʼva xi̱na̱ʼa̱ra. Soo Biblia káʼa̱nña xa̱ʼa̱ sava ña̱ʼa ña̱ chíndeétáʼan xíʼinyó ña̱ kunda̱a̱-iniyó ndáa ki̱ʼva xi̱na̱ʼa̱ra.
Ki̱ʼva xi̱na̱ʼa̱ra: Ta̱ Jesús xi̱kuura judío xa̱ʼa̱ ña̱kán sana xi̱na̱ʼa̱ra nda̱a̱ táki̱ʼva náʼa̱ siʼíra ñá ki̱xi ti̱xin veʼe ta̱ Sem (Hebreos 7:14). Sana va̱ása síínníví níxi̱yora nu̱ú inkana, saáchi iin yichi̱ ke̱era ñuu Galilea ta ni̱xa̱a̱ra nda̱a̱ ñuu Jerusalén ta kǒo na̱ níndakuni miíra (Juan 7:10, 11). Sana xi̱na̱ʼa̱ra nda̱a̱ táki̱ʼva xi̱na̱ʼa̱ na̱ discípulo na̱ xi̱kitáʼan xíʼinra. Ná ndakaʼányó chi ta̱ Judas Iscariote xi̱niñúʼu na̱ʼa̱ra ndáa ta̱ kúú ta̱ Jesús tá ni̱xa̱ʼa̱n iin tiʼvi na̱ yiví ti̱innara (Mateo 26:47-49).
Yixí xi̱níra: Sana va̱ása náni̱ níxi̱yo yixí xi̱ní ta̱ Jesús, saáchi ña̱ Biblia káchiña “ña̱ va̱ása va̱ʼa koo náni̱ yixí xi̱ní iin ta̱a chi iin ña̱ kaʼan nu̱ú kúúña” (1 Corintios 11:14).
Yixí yuʼúra: Ta̱ Jesús ni̱xi̱yo yixí yuʼúra saáchi xi̱ndiku̱nra ley na̱ ñuu Israel, ña̱ xi̱ka̱ʼa̱n na̱ ta̱a va̱ása xíniñúʼu kaʼndana yixí yuʼúna (Levítico 19:27; Gálatas 4:4). Ta saátu profecía ña̱ va̱xi nu̱ú Biblia ña̱ káʼa̱n xa̱ʼa̱ ña̱ ndo̱ʼo ta̱ Jesús káʼa̱nña ña̱ koo yixí yuʼúra (Isaías 50:6).
Ku̱ñura: Ku̱a̱ʼání ña̱ káʼa̱n xa̱ʼa̱ ta̱ Jesús ña̱ ndakúva ni̱xi̱yora. Xíkání ni̱xi̱kara ña̱ na̱túʼunra xíʼin na̱ yiví xa̱ʼa̱ Ndióxi̱ (Mateo 9:35). U̱vi̱ yichi̱ ta̱vára na̱ íxi̱kó ña̱ʼa ti̱xin templo sa̱ndúvara mesana ta ta̱vára kití sa̱na̱na (Lucas 19:45, 46; Juan 2:14, 15). Ña̱ Cyclopedia de M’Clintock y Strong, volumen IV, página 884, káʼa̱nña ña̱yóʼo: “Nu̱ú ku̱mí saá ña̱ Evangelio náʼa̱ña ña̱ ndakúva ni̱xi̱yo ta̱ Jesús”.
Ki̱ʼva ña̱ xi̱na̱ʼa̱ nu̱úra: Va̱ʼa ni̱xi̱yo ini ta̱ Jesús ta xi̱kundáʼvi-inira xi̱xinirana, ta nda̱a̱ nu̱úra xi̱na̱ʼa̱ ña̱ saá ni̱xi̱yora (Mateo 11:28, 29). Ndiʼi na̱ yiví xi̱nandukúnara ña̱ va̱ʼa sandíkora-inina ta chindeétáʼanra xíʼinna (Lucas 5:12, 13; 7:37, 38). Nda̱a̱ na̱ va̱lí va̱ʼa xi̱kunina tá xi̱xa̱ʼa̱nna nu̱úra (Mateo 19:13-15; Marcos 9:35-37).
Ña̱ va̱ása va̱ʼa ndákanixi̱nína xa̱ʼa̱ ki̱ʼva ña̱ xi̱na̱ʼa̱ ta̱ Jesús
Ña̱ ndákanixi̱nína: Savana ndákanixi̱nína xa̱ʼa̱ ta̱ Jesús ña̱ ki̱xira ti̱xin raza na̱ tu̱ún, saáchi libro ña̱ Apocalipsis chítáʼanña yixí xi̱níra xíʼin yixí yaa ta xa̱ʼa̱ra “íyoña nda̱a̱ táki̱ʼva íyo cobre ña̱ va̱ʼa” (Apocalipsis 1:14, 15).
Ña̱ nda̱a̱: Ña̱ tutu Apocalipsis káʼa̱nña xa̱ʼa̱ ña̱ kuuva (Apocalipsis 1:1). Tá káʼa̱nña xa̱ʼa̱ yixí xi̱ní ta̱ Jesús xíʼin xa̱ʼa̱ra ña̱ ndána̱ʼa̱ kuitíva kúúña ta káʼa̱nña xa̱ʼa̱ ña̱ va̱ʼa ña̱ kúúmiíra tá xa̱a̱ nda̱takura. Ta va̱ása káʼa̱nña xa̱ʼa̱ ki̱ʼva ña̱ xi̱na̱ʼa̱ra tá ki̱xira nu̱ú ñuʼú. Tá káʼa̱n Apocalipsis 1:14 xa̱ʼa̱ yixí xi̱níra “yaaníña, ndeéní yaa ña̱yóʼo”, káʼa̱n kuitíña xa̱ʼa̱ color ña̱ kúúmiívaña. Ña̱ ya̱a̱ yixí xi̱ní ta̱ Jesús náʼa̱ña ña̱ ndíchiníra chi xa̱a̱ ku̱a̱ʼání ku̱i̱ya̱ tákura (Apocalipsis 3:14). Ña̱ versículo yóʼo va̱ása chítáʼanña yixí xi̱ní ta̱ Jesús xíʼin yixí ndikachi, ni va̱ása chítáʼanñaña xíʼin ña̱ nieve.
Ña̱ “xa̱ʼa̱ra íyoña nda̱a̱ táki̱ʼva íyo cobre ña̱ va̱ʼa, ña̱ ndeéní yéʼe̱ tá ndíka̱a̱ña ini horno” (Apocalipsis 1:15). Ta saátu “nu̱úra nda̱a̱ táki̱ʼva káa ñu̱ʼu ña̱ ndeéní yéʼe̱ saá káaña” (Apocalipsis 1:16). Ndiʼi ña̱ ni̱ka̱ʼa̱nña xa̱ʼa̱ iin ña̱ ndána̱ʼa̱ kuitíva kúúña, saáchi kǒo nda̱a̱ ni iin na̱ yiví na̱ náʼa̱ nda̱a̱ táki̱ʼva íyo ña̱ ni̱ka̱ʼa̱nña xa̱ʼa̱. Ña̱ versículo yóʼo káʼa̱nña xa̱ʼa̱ ta̱ Jesús tá xa̱a̱ nda̱takura ta “íyora nu̱ú íyo iin luz ña̱ ndeéní táxa” (1 Timoteo 6:16).
Ña̱ ndákanixi̱nína: Ta̱ Jesús vitá ni̱xi̱yora ta kǒo ndee̱ra níxi̱yo.
Ña̱ nda̱a̱: Ta̱ Jesús va̱ása vitá níxi̱yora, saáchi ni̱xi̱yo ndee̱ra ta ndakúní ni̱xi̱yo inira. Tá kúú, va̱ása níyi̱ʼvíra nu̱ú na̱ yiví na̱ ni̱xa̱a̱ ti̱in miíra (Juan 18:4-8). Ta saátu ndakúní ni̱xi̱yo ta̱ Jesús saáchi chiñu ña̱ xi̱kachíñura xi̱kuu ña̱ carpintero saáchi xi̱niñúʼu kuniñúʼuníra ndee̱ ña̱ va̱ʼa keʼéra ña̱yóʼo (Marcos 6:3).
Tásaá, ¿nda̱chun xi̱niñúʼu chindeétáʼanna xíʼin ta̱ Jesús ña̱ kuniʼina yitu̱n tú katikaanara ndaʼa̱? ¿Ta nda̱chun siʼnaka miíra ni̱xi̱ʼi̱ nu̱ú na̱ ka̱tikaana xíʼinra? (Lucas 23:26; Juan 19:31-33). Tá kúma̱níka katikaanara xa̱a̱ ku̱vitáníra. Iníísaá ñuú va̱ása níki̱sira saáchi xi̱kunda̱a̱-inira ña̱ ndeéní xo̱ʼvi̱ra (Lucas 22:42-44). Na̱ judío i̱xandi̱va̱ʼana xíʼinra iníísaá ñuú, tá inka ki̱vi̱ na̱ soldado ñuu Roma i̱xandi̱va̱ʼana xíʼinra (Mateo 26:67, 68; Juan 19:1-3). Ta sana xa̱ʼa̱ ña̱yóʼo kúú ña̱ kamaka ni̱xi̱ʼi̱ra.
Ña̱ ndákanixi̱nína: Ta̱ Jesús ndiʼi tiempo xi̱kusuchí-inira ta̱ xi̱ndakava-inira.
Ña̱ nda̱a̱: Ta̱ Jesús viíní ni̱na̱ʼa̱ra ña̱ va̱ʼa ña̱ kúúmií yivára ta̱ íyo chí ndiví, Jehová, ta̱ káʼa̱n Biblia xa̱ʼa̱ ña̱ kúúra iin “Ndióxi̱ ta̱ si̱í-ini” (1 Timoteo 1:11; Juan 14:9). Ta saátu ta̱ Jesús sa̱náʼa̱ra inkana ndáa ki̱ʼva si̱í koona (Mateo 5:3-9; Lucas 11:28). Xa̱ʼa̱ ña̱yóʼo kivi ka̱ʼa̱nyó ña̱ nu̱ú ta̱ Jesús xi̱na̱ʼa̱ña ña̱ xi̱kusi̱íva-inira.
Sanatu kutóún ña̱yóʼo
Ña̱ káʼa̱n xa̱ʼa̱ ña̱ va̱xi nu̱ú Biblia
¿Nda̱chun xíniñúʼu kandíxayó ña̱ nda̱a̱ kúú ña̱ káʼa̱n Biblia?
Tá ndixa tu̱ʼun Ndióxi̱ kúú ña̱ va̱xi nu̱ú Biblia, síínva kooña nu̱ú ndiʼika libro.
ÑA̱ KÁʼA̱N XA̱ʼA̱NDI̱
Ka̱ʼa̱n xíʼin iinna ña̱ ná ku̱ʼu̱nna kotona yóʼó
Sakúaʼa ndáaña káʼa̱n Biblia xa̱ʼa̱ iin ña̱ʼa á sákuaʼaka xa̱ʼa̱ na̱ testigo Jehová.