Ña̱ káʼa̱n Biblia xa̱ʼa̱ ña̱yóʼo

 Ña̱ ndakuchi na̱ yiví kúni̱ kachiña ña̱ ki̱ʼvi níína ini ti̱kui̱í. a Biblia káʼa̱nña xa̱ʼa̱ ku̱a̱ʼá na̱ yiví na̱ nda̱kuchi (Hechos 2:41). Káʼa̱ntuña xa̱ʼa̱ ña̱ nda̱kuchi ta̱ Jesús ini yu̱ta Jordán (Mateo 3:13, 16). Tá ni̱ya̱ʼa ku̱i̱ya̱, iin ta̱a ta̱ Etiopía nda̱kuchira, “nu̱ú ñúʼu ku̱a̱ʼání ti̱kui̱í” (Hechos 8:36-40).

 Ta̱ Jesús ni̱ka̱ʼa̱nra ña̱ tá iinna kúni̱na koona discípulora xíniñúʼu ndakuchina (Mateo 28:19, 20). Saátu ni̱ka̱ʼa̱n ta̱ apóstol Pedro xa̱ʼa̱ ña̱yóʼo (1 Pedro 3:21).

Ti̱xin artículo yóʼo ka̱ʼa̱nyó xa̱ʼa̱:

•  Ña̱ kúni̱ kachi ña̱ ndakuchiyó

•  ¿Á sánáʼa̱ Biblia ña̱ xíniñúʼu ndakuchi na̱ lée válí?

•  ¿Ndáaña kúni̱ kachi ña̱ ndakuchiyó xíʼin ki̱vi̱ yiváyó, xíʼin ki̱vi̱ se̱ʼera ta saátu xíʼin ki̱vi̱ espíritu santo?

•  ¿Á iin ku̱a̱chi ndee̱ kúú ña̱ tuku ndakuchiyó?

•  Ña̱ káʼa̱n Biblia xa̱ʼa̱ inka ki̱ʼva ña̱ nda̱kuchina

•  Ña̱ va̱ása va̱ʼa ndákanixi̱nína xa̱ʼa̱ ña̱ ndákuchi na̱ ndíku̱n ta̱ Cristo

 Ña̱ kúni̱ kachi ña̱ ndakuchiyó

 Tá ndákuchi iin na̱ yiví náʼa̱na ña̱ nda̱ndikó-inina xa̱ʼa̱ ku̱a̱china ta kúni̱na saxínuyó ña̱ kúni̱ Ndióxi̱. Tá ndákuchi iin na̱ yiví náʼa̱na ña̱ kúni̱na kuniso̱ʼona ndiʼi ña̱ káʼa̱n Jehová xíʼin ta̱ Jesús. Ña̱yóʼo kúú ña̱ nu̱ú xíniñúʼu keʼé na̱ yiví na̱ kúni̱ kutaku ndiʼi tiempo.

 Ña̱ sáʼvi níí iin na̱ yiví ini ti̱kui̱í tá ndákuchina náʼa̱ña ña̱ na̱samana ña̱ kéʼéna. Biblia chítáʼanña ña̱ ndakuchiyó xíʼin ña̱ ndúxu̱n iin na̱ yiví (Romanos 6:4; Colosenses 2:12) Tá ndákuchi iin na̱ yiví chíkaa̱ níínana ini ti̱kui̱í ta nda̱a̱ táki̱ʼva íyo na̱ xíʼi̱ saá íyona chi sándákoona ndiʼi ña̱ va̱ása va̱ʼa ña̱ xi̱keʼéna tá ya̱chi̱. Ta, tá ki̱tana ti̱xin ti̱kui̱í saá kúú ña̱ kíxáʼana kéʼéna ña̱ kúni̱ Jehová.

 ¿Á sánáʼa̱ Biblia ña̱ xíniñúʼu ndakuchi na̱ lée válí?

 Biblia va̱ása káʼa̱nña ña̱ xíniñúʼu ndakuchi na̱ lée válí. b Ña̱ sánáʼa̱ Biblia kúú ña̱ tá kúni̱yó ndakuchiyó xíniñúʼu keʼéyó sava ña̱ʼa. Ña̱ nu̱ú xíniñúʼu keʼéyó kúú ña̱ kunda̱a̱-iniyó xa̱ʼa̱ sava ña̱ sánáʼa̱ Biblia ta kundiku̱nyó ña̱ káʼa̱nña. Saátu xíniñúʼu ndandikó-iniyó xa̱ʼa̱ ku̱a̱chiyó ta saátu xíniñúʼu keʼéyó iin oración ta ka̱ʼa̱nyó xíʼin Ndióxi̱ ña̱ ndátaxiyó miíyó ndaʼa̱ra (Hechos 2:38, 41; 8:12). Na̱ lée válí á na̱ va̱lí, va̱ása kivi keʼéna nda̱a̱ ni iin ña̱yóʼo.

¿Ndáaña kúni̱ kachi ña̱ ndakuchiyó xíʼin ki̱vi̱ yiváyó, xíʼin ki̱vi̱ se̱ʼera ta saátu xíʼin ki̱vi̱ espíritu santo?

  Ta̱ Jesús ni̱ka̱ʼa̱nra xíʼin na̱ discípulora: “Kúáʼanndó nu̱ú ndiʼi na̱ yiví [...] ta sanáʼa̱ndóna ña̱ ná kundiku̱nna yi̱ʼi̱. Ta sandákuchindóna xíʼin ki̱vi̱ yivái̱ xíʼin ki̱vi̱ se̱ʼera ta saátu xíʼin ki̱vi̱ espíritu santo. Sanáʼa̱ndóna ná keʼéna ndiʼi ña̱ʼa ña̱ sa̱náʼi̱ ndóʼó” (Mateo 28:19, 20). Tá ni̱ka̱ʼa̱n ta̱ Jesús ña̱ ndakuchiyó xíʼin ki̱vi̱ yivára, kúni̱ kachiña ña̱ ndakuniyó ña̱ mií Jehová kúú ta̱ xáʼndachíñu, ta ndakunituyó ndáa chiñu kúú ña̱ ta̱xi Jehová ndaʼa̱ ta̱ Jesús, ta saátu ndáa ki̱ʼva xíniñúʼu Jehová espíritu santora ña̱ saxínura ña̱ kúni̱ra. Tá si̱lóʼo sandáʼa ta̱ apóstol Pedro iin ta̱a ta̱ kǒo kívi kaka xi̱niñúʼura tu̱ʼun xíʼin ki̱vi̱. Ka̱chira: “Xíʼin ki̱vi̱ ta̱ Jesucristo ta̱ ñuu Nazaret káʼi̱n xíʼún: kaka” (Hechos 3:6) ¿Nda̱chun xi̱niñúʼu ta̱ Pedro tu̱ʼun yóʼo? Saáchi xi̱kunda̱a̱-inira ña̱ iinlá ta̱ Jesús kúú ta̱ kúúmií nda̱yí ña̱ keʼéra milagro, ña̱kán kúú ña̱ ni̱ka̱ʼa̱nra ki̱vi̱ ta̱ Jesús tá ke̱ʼéra milagro kán.

•   Xíʼin ki̱vi̱ “yivái̱”, káʼa̱nña xa̱ʼa̱ Jehová c Ndióxi̱. Jehová kúú ta̱ i̱xava̱ʼa miíyó ta ta̱xira ña̱ tákuyó, saátu íyoní ndee̱ra. Ña̱kán, Jehová kúú ta̱ kúúmií nda̱yí ña̱ keʼéra ndiʼi ña̱ʼa (Génesis 17:1; Apocalipsis 4:11).

•   Xíʼin ki̱vi̱ “se̱ʼera” káʼa̱nña xa̱ʼa̱ ta̱ Jesucristo ta̱ ni̱xi̱ʼi̱ xa̱ʼa̱yó (Romanos 6:23) Ña̱ va̱ʼa ka̱kuyó xíniñúʼu kunda̱a̱-iniyó ndáa chiñu kúú ña̱ kéʼé ta̱ Jesús ña̱ va̱ʼa saxínura ña̱ kúni̱ Ndióxi̱ taxira ndaʼa̱ na̱ yiví chí nu̱únínu (Juan 14:6; 20:31; Hechos 4:8-12).

•   Xíʼin ki̱vi̱ “espíritu santo”, káʼa̱nña xa̱ʼa̱ ndee̱ ña̱ xíniñúʼu Ndióxi̱. d Ndióxi̱ xi̱niñúʼura ndee̱ra ña̱ ke̱ʼéra ku̱a̱ʼání ña̱ʼa, ña̱ i̱xava̱ʼara miíyó, ña̱ va̱ʼa ka̱ʼa̱nra xíʼin na̱ profeta ta saátu ña̱ va̱ʼa ka̱ʼa̱nra xíʼin inka na̱ yiví, ta̱xitura ndee̱ra ndaʼa̱na ña̱ va̱ʼa saxínuna ña̱ kúni̱ra (Génesis 1:2; Job 33:4; Romanos 15:18, 19) Xi̱niñúʼutu Ndióxi̱ espíritu santo ña̱ va̱ʼa ka̱ʼa̱nra xíʼin sava na̱ ta̱a ña̱ ndákanixi̱níra ta kaʼyina ña̱yóʼo nu̱ú tu̱ʼunra (2 Pedro 1:21).

¿Á iin ku̱a̱chi ndee̱ kúú ña̱ tuku ndakuchiyó?

  Ku̱a̱ʼání na̱ yiví násamana religión ña̱ ndíku̱nna. Soo tá xa̱a̱ nda̱kuchi iin na̱ yiví, ¿a iin ku̱a̱chi ndee̱ kúú ña̱ tuku ndakuchina xíʼin inka religión? Savana káchina ña̱ iin ku̱a̱chi ndee̱ kúú ña̱yóʼo xa̱ʼa̱ ña̱ káʼa̱n Efesios 4:5 chi yóʼo káchiña “Iin kuití kúú tátayó, iin kuití kúú ña̱ kándíxa ndiʼiyó ta iin ki̱ʼva íyo ña̱ ndákuchi ndiʼiyó”. Soo versículo yóʼo, kǒo kúni̱ kachiña ña̱ va̱ása xíniñúʼu tuku ndakuchi iin na̱ yiví. ¿Nda̱chun va̱ʼa xíni̱yó ña̱yóʼo?

 Ña̱ káʼa̱n inkaka versículo. Tá ná kotoyó ndiʼi ña̱ káʼa̱n Efesios 4:5, kivi kunda̱a̱-iniyó ña̱ ni̱ka̱ʼa̱n ta̱ apóstol Pablo xa̱ʼa̱ ña̱ ndáyáʼviní vií kutáʼanyó. Ña̱kán inkáchi xíniñúʼu koo ña̱ kándíxayó (Efesios 4:1-3, 16). Viíní kítáʼanyó tá ndíku̱nyó yichi̱ ta̱ Jesús, tá kándíxayó ña̱ sa̱náʼa̱ra á tá inkáchi kúnda̱a̱-iniyó xa̱ʼa̱ ña̱ sánáʼa̱ Biblia, saá kivi xa̱a̱yó keʼéyó ña̱ kúni̱ Ndióxi̱ ta ndakuchiyó.

 Saátu ta̱ apóstol Pablo ni̱ka̱ʼa̱nra xíʼin sava na̱ xa̱a̱ nda̱kuchi ña̱ kivi ndakuchi tukuna, saáchi tá kúma̱níka ndakuchi na̱ yiví yóʼo ta̱ʼán xa̱a̱na kunda̱a̱ va̱ʼa inina xa̱ʼa̱ ña̱ sánáʼa̱ Biblia (Hechos 19:1-5).

 Ndáa ki̱ʼva xíniñúʼu ndakuchiyó. Ña̱ va̱ʼa kusi̱í-ini Ndióxi̱ tá ndákuchiyó, xíniñúʼu sakúaʼayó ndáaña kúú ña̱ ndixa sánáʼa̱ Biblia (1 Timoteo 2:3, 4). Tá iin na̱ yiví nda̱kuchina soo kǒo nísakúaʼana ña̱ nda̱a̱ ña̱ káʼa̱n Biblia, nu̱ú Ndióxi̱ kǒo ndáyáʼviví ña̱ nda̱kuchina (Juan 4:23, 24). Sana xíʼin ndinuʼu-ini iin na̱ yiví yóʼo nda̱kuchina soo kǒo níkunda̱a̱ va̱ʼa inina ndáaña kúú ña̱ kúni̱ Ndióxi̱ keʼéna (Romanos 10:2). Ña̱ va̱ʼa kusi̱í-ini Ndióxi̱ xíʼinna, xíniñúʼu sakúaʼana ña̱ káʼa̱n Biblia, keʼéna ña̱ sákuaʼana, ndataxina miína ndaʼa̱ Ndióxi̱ ta tuku ndakuchina. Tá ná keʼéna ña̱yóʼo va̱ása kíʼvina iin ku̱a̱chi ndeé.

Ña̱ káʼa̱n Biblia xa̱ʼa̱ inka ki̱ʼva ña̱ nda̱kuchina

  Biblia káʼa̱nña xa̱ʼa̱ inka ki̱ʼva ña̱ ndákuchi na̱ yiví ta xa̱a̱ síín íyo ña̱yóʼo nu̱ú ña̱ ndákuchi iin na̱ ndíku̱n ta̱ Jesús tá kíʼvina ini ti̱kui̱í. Ná kotoyó savaña:

 Ña̱ xi̱sandákuchi ta̱ Juan. e Tá xi̱xaʼa̱n iin na̱ judío á iin na̱ ndu̱u judío nu̱ú ta̱ Juan ña̱ va̱ʼa sandákuchirana, xi̱keʼéna ña̱yóʼo chi saá xi̱naʼa̱na ña̱ nda̱ndikó-inina xa̱ʼa̱ ku̱a̱chi ña̱ ni̱ki̱ʼvina tá xi̱yaʼandosóna ña̱ xi̱kaʼa̱n ley ña̱ ta̱xi Ndióxi̱ ndaʼa̱ ta̱ Moisés. Tá xi̱sandákuchi ta̱ Juan na̱ yiví saá xi̱chindeétáʼanra xíʼinna ña̱ ndakunina ta̱ Jesús ña̱ kúúra ta̱ Mesías ta kandíxanara (Lucas 1:13-17; 3:2, 3; Hechos 19:4).

 Ña̱ nda̱kuchi ta̱ Jesús. Ta̱ Juan kúú ta̱ sa̱ndákuchi ta̱ Jesús, soo xa̱a̱ síín ni̱xi̱yo ña̱ nda̱kuchi ta̱ Jesús nu̱ú ña̱ ndákuchi inka na̱ xi̱ndiku̱nñaʼá. ¿Nda̱chun? Saáchi ta̱ Jesús va̱ása níxikuumiíra ku̱a̱chi ta ke̱ʼéra nina ña̱ va̱ʼa (1 Pedro 2:21, 22). Ña̱kán tá nda̱kuchi ta̱ Jesús, va̱ása níkeʼéraña xa̱ʼa̱ ña̱ nda̱ndikó-inira xa̱ʼa̱ ku̱a̱chira ta kǒo níxiniñúʼu ndukúra nu̱ú Ndióxi̱ ña̱ viíní koo ña̱ xínitúni̱ra (1 Pedro 3:21). Tá nda̱kuchi ta̱ Jesús nda̱taxira miíra ndaʼa̱ Ndióxi̱ ña̱ va̱ʼa keʼéra ña̱ kúni̱ra tasaá ndu̱ura ta̱ Mesías á ta̱ Cristo, ña̱kán xi̱niñúʼu kuvira xa̱ʼa̱yó (Hebreos 10:7-10).

 Ña̱ ndakuchina xíʼin espíritu santo. Ta̱ Jesús ta saátu ta̱ Juan ni̱ka̱ʼa̱nna xa̱ʼa̱ ña̱ ndakuchina xíʼin espíritu santo (Mateo 3:11; Lucas 3:16; Hechos 1:1-5). Ña̱yóʼo va̱ása kítáʼanña xíʼin ña̱ ndakuchina xíʼin ki̱vi̱ espíritu santo (Mateo 28:19). ¿Nda̱chun?

 Loʼova kúú na̱ ndíku̱n ta̱ Jesús na̱ ndákuchi xíʼin espíritu santo. Na̱yóʼo ndákiʼinna espíritu santo saáchi ndáka̱xinnana ña̱ ku̱ʼu̱nna chí ndiví ta kán kaʼndachíñuna xíʼin ta̱ Jesús ta saátu koona su̱tu̱ f (1 Pedro 1:3, 4; Apocalipsis 5:9, 10). ¿Ta ndáana kaʼndachíñuna nu̱ú? Kaʼndachíñuna nu̱ú ku̱a̱ʼání na̱ ndíku̱n ta̱ Jesús na̱ kundoo nu̱ú ñuʼú yóʼo tá ná nduuña iin ñuʼú livi (Mateo 5:5; Lucas 23:43).

 Ña̱ ndákuchina xa̱ʼa̱ ta̱ Cristo Jesús ta saátu ña̱ ndákuchina xa̱ʼa̱ ña̱ ni̱xi̱ʼi̱ra. Na̱ ndákuchi xíʼin espíritu santo saátu ndákuchina “xa̱ʼa̱ ta̱ Cristo Jesús” (Romanos 6:3). Ña̱kán na̱ ndákuchi xa̱ʼa̱ ta̱ Cristo kúú na̱ ndíku̱n ta̱ Jesús na̱ nda̱kaxin Ndióxi̱ ña̱ kaʼndachíñuna xíʼinra chí ndiví. Tá ndákuchina xa̱ʼa̱ ta̱ Cristo Jesús, saá xáa̱na ndúuna nda̱a̱ táki̱ʼva íyo iin táʼví ku̱ñura: ta̱ Jesús kúú xi̱ní, ta na̱yóʼo íyona nda̱a̱ táki̱ʼva íyo ku̱ñura (1 Corintios 12:12, 13, 27; Colosenses 1:18).

 Saátu na̱ nda̱kaxin Ndióxi̱ ku̱ʼu̱n chí ndiví ndákuchina “xa̱ʼa̱ ña̱ ni̱xi̱ʼi̱ ta̱ Jesús” (Romanos 6:3, 4). Na̱yóʼo ndíku̱nna yichi̱ ta̱ Jesús, saáchi chíkaa̱na ndee̱ ña̱ keʼéna ña̱ kúni̱ Ndióxi̱ ta xíniso̱ʼona ndiʼi ña̱ káʼa̱nra, saátu xa̱a̱ chi̱kaa̱-inina ña̱ va̱ása kutakuna ndiʼi tiempo nu̱ú ñuʼú yóʼo. Tá xíʼi̱na ta ndátakuna ña̱ koona chí ndiví xínu ña̱ nda̱kuchina xa̱ʼa̱ ña̱ ni̱xi̱ʼi̱ ta̱ Jesús (Romanos 6:5; 1 Corintios 15:42-44).

 Ña̱ ndákuchina xíʼin ñuʼu̱. Ta̱ Juan ta̱ xi̱sandákuchi na̱ yiví ni̱ka̱ʼa̱nra: “Ta̱kán [ta̱ Jesús] sandákuchira ndóʼó xíʼin espíritu santo xíʼin ñuʼu̱. Íyo iin ña̱ʼa ña̱ ndíkaa̱ ndaʼa̱ra ña̱ ndativira trigo. Ndakayara trigora ta ndataán va̱ʼaraña ti̱xin ya̱ka̱, ta xe̱ʼe̱ ña̱ trigo yóʼo kaʼmiraña xíʼin ñuʼu̱ ña̱ kǒo kívi nda̱ʼva̱” (Mateo 3:11, 12). Xíʼin tu̱ʼun yóʼo kúnda̱a̱-iniyó ña̱ ndakuchina xíʼin ñuʼu̱ xa̱a̱ síín íyoña nu̱ú ña̱ ndakuchina xíʼin espíritu santo. ¿Ndáaña kúni̱ kachi ña̱ ni̱ka̱ʼa̱n ta̱ Juan?

 Trigo ndánaʼa̱ña na̱ xíniso̱ʼo ña̱ káʼa̱n ta̱ Jesús ta kéʼéna ña̱ káʼa̱nra. Na̱yóʼo kivi xa̱a̱na ndakuchina xíʼin espíritu santo. Xe̱ʼe̱ ña̱ trigo ndánaʼa̱ña na̱ kǒo xíniso̱ʼo ña̱ káʼa̱n ta̱ Jesús. Na̱yóʼo ndakuchina xíʼin ñuʼu̱ saáchi ndiʼi-xa̱ʼa̱ va̱ʼana (Mateo 3:7-12; Lucas 3:16, 17).