Kivi ki̱ʼviyó ku̱a̱chi xíʼin ña̱ kéʼéyó, ña̱ ndóʼoyó á ña̱ ndákanixi̱níyó tá va̱ása kítáʼanña xíʼin ña̱ kúni̱ Ndióxi̱ (1 Juan 3:4; 5:17). Biblia káchiña kíʼviyó ku̱a̱chi tá kéʼéyó ña̱ va̱ása va̱ʼa á ña̱ va̱ása kútóo Ndióxi̱ (Santiago 4:17).

 Tu̱ʼun ña̱ ni̱ka̱ʼyi̱ña tá xa̱ʼa̱ nu̱ú Biblia, tu̱ʼun “ku̱a̱chi” kúni̱ kachiña ña̱ va̱ása kivi kanina nu̱ú kúni̱na kanina, á va̱ása saxínuna ña̱ kúni̱na keʼéna. Tá kúú iin tiʼvi na̱ soldado na̱ ni̱xi̱yo ñuu Israel va̱ʼaní xi̱xiniñúʼuna honda ta xi̱kanina yu̱u̱ mií nu̱ú xi̱kuni̱na kaninaña. Tá ná sandáya̱ʼana tu̱ʼun yóʼo nda̱a̱ táki̱ʼva xi̱kachiña, ki̱ʼva siaʼa kachiña: va̱ása kíʼvina ku̱a̱chi (Jueces 20:16). Ña̱kán tá kíʼviyó ku̱a̱chi va̱ása sáxi̱nuyó ña̱ kúni̱ Ndióxi̱.

 Xa̱ʼa̱ ña̱ i̱xava̱ʼa Ndióxi̱ na̱ yiví, íyo derechora ña̱ ka̱ʼa̱nra xíʼinna ndáaña keʼéna (Apocalipsis 4:11). Ta miíyó xíniñúʼu ndataxiyó kuenta xa̱ʼa̱ ña̱ kéʼéyó ndaʼa̱ra (Romanos 14:12).

¿Á íyo iin na̱ va̱ása kíʼvi ku̱a̱chi?

 Va̱ása, chi Biblia káchiña “ndiʼina ni̱ki̱ʼvina ku̱a̱chi ta kǒo kívi na̱ʼa̱na ña̱ va̱ʼa ña̱ kúúmií Ndióxi̱” (Romanos 3:23; 1 Reyes 8:46; Eclesiastés 7:20; 1 Juan 1:8). ¿Nda̱chun kúu ña̱yóʼo?

 Tá xa̱ʼa̱ ta̱ Adán xíʼin ñá Eva va̱ása níxi̱kiʼvina ku̱a̱chi, saáchi kǒo ku̱a̱chi níxikuumiína, ta ni̱xi̱yona nda̱a̱ táki̱ʼva íyo Ndióxi̱ (Génesis 1:27). Soo ni̱ki̱ʼvina ku̱a̱chi tá i̱xaso̱ʼona nu̱ú ta̱ i̱xava̱ʼa miína (Génesis 3:5, 6, 17-19). Ta tá ni̱xi̱yo se̱ʼe na̱yóʼo sa̱yáʼana ku̱a̱chi ndaʼa̱ na̱yóʼo (Romanos 5:12). Nda̱a̱ táki̱ʼva ni̱ka̱ʼa̱n ta̱ rey David: “Tá ka̱kuvíi̱ kúúmiíi̱ ku̱a̱chi” (Salmo 51:5).

¿Á íyo iin ku̱a̱chi ña̱ ndeé nu̱ú inkaña?

 Biblia káchiña na̱ ta̱a na̱ ni̱xi̱yo chí Sodoma “ndi̱va̱ʼaní-inina ta ku̱a̱ʼání ña̱ kini” ke̱ʼéna ta ndeéní ku̱a̱chi ni̱kiʼvina (Génesis 13:13; 18:20). Ná kotoyó u̱ni̱ ña̱ náʼa̱ nda̱saa ndeé iin ku̱a̱chi.

1.   Ki̱ʼva ña̱ íyoña. Biblia káchiña na̱ kísi̱ xíʼin na̱ kǒo nítindaʼa̱ xíʼinna, na̱ ndásakáʼnu ndióxi̱ vatá, na̱ íxakúiʼná, na̱ xíʼi nda̱a̱ xíniina, na̱ kéʼé ña̱ va̱ása va̱ʼa xíʼin iinna ña̱ kindaana ña̱ kúúmiína, xíʼin na̱ kéʼé ña̱ kuenta na̱ ta̱chí ndi̱va̱ʼa, ña̱yóʼo kúú ku̱a̱chi ña̱ ndeé ña̱ va̱ása xíniñúʼu keʼéyó (1 Corintios 6:9-11; Apocalipsis 21:8). Biblia náʼa̱ña ña̱ síín íyo ku̱a̱chi yóʼo nu̱ú inkaña, ña̱ ke̱ʼéna soo va̱ása níkuni̱na keʼénaña ta kǒo níndakanixi̱nína xa̱ʼa̱ ña̱yóʼo, tá kúú, ña̱ ni̱ka̱ʼa̱nna ta sa̱xóʼvi̱ña inkana (Proverbios 12:18; Efesios 4:31, 32). Soo Biblia káʼa̱n xíʼinyó ña̱ ná va̱ása ndakanixi̱níyó ña̱ va̱ása ndeéví iin ku̱a̱chi, saáchi kivi xa̱a̱yó keʼéyó inka ku̱a̱chi ndeé (Mateo 5:27, 28).

2.   Ndáa xa̱ʼa̱ kúú ña̱ kéʼénaña. Savana kíʼvina ku̱a̱chi xa̱ʼa̱ ña̱ va̱ása kúnda̱a̱-inina xa̱ʼa̱ ña̱ káʼa̱n Ndióxi̱ (Hechos 17:30; 1 Timoteo 1:13). Ni va̱ása káʼa̱n Biblia xa̱ʼa̱ ña̱yóʼo ña̱ va̱ʼaña, soo síín íyo ña̱yóʼo nu̱ú ña̱ kéʼé na̱ xa̱a̱ xíni̱ ña̱ káʼa̱n Ndióxi̱ (Números 15:30, 31). Biblia káʼa̱nña na̱ yiví na̱ kíʼvi ku̱a̱chi xa̱ʼa̱ ña̱ kúni̱ miína náʼa̱na ña̱ kúúmiína iin níma̱ ña̱ va̱ása va̱ʼa (Jeremías 16:12).

3.   Nda̱saa yichi̱ kéʼénaña. Biblia káxi káʼa̱nña ña̱ síín íyo ña̱ ki̱ʼvina ku̱a̱chi iin yichi̱, xíʼin ña̱ tuku ta tuku keʼénaña (1 Juan 3:4-8). Ndióxi̱ ndatiinra ku̱a̱chi xíʼin na̱ kíʼviní ku̱a̱chi ni xa̱a̱ xíni̱na ndáaña kúú ña̱ va̱ʼa (Hebreos 10:26, 27).

 Na̱ yiví na̱ ni̱ki̱ʼvi iin ku̱a̱chi ndeé sana ndíʼi̱ní-inina xa̱ʼa̱ ña̱ ke̱ʼéna. Ta kúú ta̱ rey David ka̱ʼyíra ña̱yóʼo: “Ndiʼi yichi̱ ndákanixi̱níi̱ xa̱ʼa̱ ña̱ va̱ása va̱ʼa kéʼíi̱, íyoña nda̱a̱ táki̱ʼva íyo ña̱ ndísoi̱ ta ndeéní ve̱eña túvii̱” (Salmo 38:4). Soo Biblia káʼa̱nña ña̱yóʼo: “Na̱ yiví na̱ ndi̱va̱ʼa-ini ná sandákoona ña̱ kéʼéna, ta na̱ kéʼé ña̱ va̱ása va̱ʼa ná va̱ása ndakanikaxi̱nína xa̱ʼa̱ña” (Isaías 55:7).