Tá ná kixaa̱ tu̱ndóʼo yóʼo, ku̱a̱ʼání na̱ yiví ndi̱ʼi̱ní-inina saáchi nda̱a̱ ni iin yichi̱ ta̱ʼán kuu táʼan ña̱yóʼo. Nda̱a̱ táki̱ʼva káʼa̱n Biblia, ña̱yóʼo kúúña “ki̱vi̱ nu̱ú ndíʼi” á “ki̱vi̱ so̱ndíʼi” (2 Timoteo 3:1; Daniel 12:4). Marcos 13:19 káchiña: “Saáchi ki̱vi̱ saá ki̱vi̱ tu̱ndóʼo kooña. Nda̱a̱ tá ki̱xáʼa xa̱ʼa̱ ñuyǐví ña̱ i̱xava̱ʼa Ndióxi̱ ta nda̱a̱ vitin ta̱ʼán koo táʼan ña̱yóʼo ta ni iin ki̱vi̱ va̱ása ndikókaña” (Daniel 12:1; Mateo 24:21, 22).

¿Ndáaña kuu tá ná kixáʼa tu̱ndóʼo káʼnu yóʼo?

•   Ndiʼi-xa̱ʼa̱ veʼe-ñu̱ʼu vatá. Kamaní ndiʼi-xa̱ʼa̱ ndiʼi veʼe-ñu̱ʼu vatá (Apocalipsis 17:1, 5; 18:9, 10, 21). Tá ná keʼé na̱ chíñu ña̱yóʼo, na̱ naní Naciones Unidas, saá kúú ña̱ saxínuna ña̱ kúni̱ Ndióxi̱ (Apocalipsis 17:3, 15-18). a

•   Ixandi̱va̱ʼana xíʼin na̱ ñuu Ndióxi̱. Iin tiʼvi na̱ ñuu na̱ xi̱ni ta̱ Ezequiel nu̱ú iin visión na̱ naní “Gog ta̱ ke̱e nu̱ú ñuʼú ña̱ Magog”, kuni̱na sandíʼi-xa̱ʼa̱na religión ña̱ nda̱a̱. Soo Ndióxi̱ va̱ása taxira ña̱ sandíʼi-xa̱ʼa̱na na̱ ñuura (Ezequiel 38:1, 2, 9-12, 18-23).

•   Ndatiinna ku̱a̱chi xíʼin na̱ ndóo nu̱ú ñuʼú. Ta̱ Jesús ndatiinra ku̱a̱chi xíʼin na̱ yiví ta “ndataʼvíra na̱ yiví táki̱ʼva kéʼé ta̱ pastor ña̱ ndátaʼvíra tí ndikachi xíʼin tí ti̱xúʼu” (Mateo 25:31-33). Tá ná ndatiinra ku̱a̱chi xíʼinna kiʼinra kuenta á chi̱ndeétáʼanna xíʼin na̱ “ñani” ta̱ Cristo, á na̱ ku̱ʼu̱n kaʼndachíñu xíʼinra chí ndiví (Mateo 25:34-46).

•   Sandátakana na̱ kaʼndachíñu xíʼin ta̱ Jesús ti̱xin Reinora. Ndiʼi na̱ nda̱kaxin Ndióxi̱ ña̱ ku̱ʼu̱nna kaʼndachíñuna xíʼin ta̱ Cristo, na̱ nda̱kúní íyo ini, xíniñúʼu kuvina nu̱ú ñuʼú yóʼo tasaá ndatakuna ña̱ koona chí ndiví (Mateo 24:31; 1 Corintios 15:50-53; 1 Tesalonicenses 4:15-17).

•   Kixaa̱ ña̱ Armagedón. Tá káʼa̱n Biblia xa̱ʼa̱ ña̱ Armagedón, káʼa̱ntuña ña̱ naníña ki̱vi̱ káʼnu Ndióxi̱ ta̱ kúúmií ndiʼi ndee̱ ta saátu “ki̱vi̱ Jehová” (Apocalipsis 16:14, 16; Isaías 13:9; 2 Pedro 3:12). Na̱ va̱ása kíndo̱o-ini ta̱ Cristo xíʼin ña̱ kéʼé, ndiʼi-xa̱ʼa̱na tá ná kixaa̱ ki̱vi̱ yóʼo (Sofonías 1:18; 2 Tesalonicenses 1:6-10). Ta saátu ndiʼi-xa̱ʼa̱ ndiʼi na̱ chíñu na̱ íyo nu̱ú ñuʼú yóʼo, na̱ káʼa̱n Biblia xa̱ʼa̱ ña̱ kúúna iin kití yukú tí kúúmií u̱xa̱ xi̱ní (Apocalipsis 19:19-21).

¿Ndáaña kuu tá ná ndiʼi kuu tu̱ndóʼo káʼnu?

•   Ndakasina ta̱ Ndi̱va̱ʼa xíʼin na̱ ta̱chí ndi̱va̱ʼa. Iin ta̱ ángel ta̱ ndakúní ndakasira ta̱ Ndi̱va̱ʼa xíʼin na̱ ta̱chí ndi̱va̱ʼa ini iin “ya̱vi̱ naá” (Apocalipsis 20:1-3). Tá ná kuñuʼuna ini ya̱vi̱ yóʼo va̱ása kivi keʼéna nda̱a̱ ni iin ña̱ʼa, xa̱ʼa̱ ña̱kán koona nda̱a̱ táki̱ʼva íyo na̱ ni̱xi̱ʼi̱. Saátu koona nda̱a̱ táki̱ʼva íyo na̱ ñúʼu veʼeka̱a, ña̱kán va̱ása kivika kita ta̱ Ndi̱va̱ʼa ña̱ sandáʼvira na̱ yiví (Apocalipsis 20:7).

•   Kixáʼa ña̱ mil ku̱i̱ya̱. Tiempo saá kixáʼa Reino Ndióxi̱ kaʼndachíñuña mil ku̱i̱ya̱ ta xa̱ʼa̱ ña̱yóʼo ku̱a̱ʼání ña̱ va̱ʼa ndakiʼin na̱ yiví (Apocalipsis 5:9, 10; 20:4, 6). Ku̱a̱ʼání na̱ yiví ka̱kuvana ti̱xin tu̱ndóʼo káʼnu ta kunina tá ná kixáʼa ña̱ mil ku̱i̱ya̱ (Apocalipsis 7:9, 14; Salmo 37:9-11).