•   ¿Ndasaa kúni̱ún tá ka̱ʼa̱n inkana tu̱ʼun kini?

  •  Ni loʼo kǒo kíʼi̱n kuenta xíʼinña; chi xa̱a̱ ni̱ka̱a̱i̱n xíniso̱ʼi̱ káʼa̱nna tu̱ʼun kini.

  •  Kǒo kútói̱; soo kǒo nda̱a̱ ni iin ña̱ʼa kivi keʼíi̱.

  •  Ni loʼo kǒo kútói̱ tá káʼa̱nna tu̱ʼun kini.

•   ¿Á káʼún tu̱ʼun kini sava yichi̱?

  •  Va̱ása.

  •  Sava yichi̱.

  •  Ku̱a̱ʼání yichi̱ káʼi̱n tu̱ʼun kini.

•   ¿Á iin ku̱a̱chi kúú ña̱ ka̱ʼa̱nyóña?

  •  Va̱ása, íyo ña̱ kininíka.

  •  Iin ku̱a̱chi ndeé kúúña.

 ¿Á iin ku̱a̱chi ndeé kúú ña̱ ka̱ʼa̱nyó tu̱ʼun kini túviún? Sana túviún ña̱ va̱ásaví. “Íyo ña̱ kininíka. Ndiʼi na̱ yiví káʼa̱nna tu̱ʼun kini”. Soo, ¿Á ña̱ nda̱a̱ kúú ña̱yóʼo?

 Sana ndakanda̱ní-iniún xíʼin ña̱yóʼo, soo sava na̱ yiví chíkaa̱na ndee̱ ña̱ va̱ása ka̱ʼa̱nna tu̱ʼun kini. Saáchi kíʼinna kuenta xíʼin inka ña̱ʼa ña̱ va̱ása chíndayáʼvi inka na̱ yiví. Tá kúú:

•  Su̱ví ña̱ káʼa̱n kuitíyó kúú ña̱ kini. Ndiʼi ña̱ káʼún náʼa̱ ndáaña ndíkaa̱ níma̱ún. Tá káʼún tu̱ʼun kini náʼún ña̱ va̱ása ndíʼi̱-iniún xa̱ʼa̱ ña̱ ndóʼo inka na̱ yiví. Ndakanixi̱ní: ¿á ndixa saá íyoún?

   Biblia káʼa̱nña:“Ndiʼi ña̱ kée yuʼú iin na̱ yiví chí níma̱na va̱xiña” (Mateo 15:18).

•  Tá káʼún tu̱ʼun kini inka na̱ yiví va̱ása va̱ʼa ndakanixi̱nína xa̱ʼún. Libro ña̱ naní Cuss Control káʼa̱nña: “Ndiʼi ña̱ káʼún náʼa̱ña ndáana xa̱a̱ koo migoún, á ixato̱ʼó na̱ veʼún á na̱ káchíñu xíʼún, ndáa ki̱ʼva kítáʼún xíʼin inka na̱ yiví, tu̱ʼun ña̱ káʼún á chindeétáʼanña xíʼin inka na̱ yiví, á ni̱ʼún chiñu kachíñún á taxina iin chiñu va̱ʼaka ndaʼún ta ndáaña kivi ndakanixi̱ní inka na̱ yiví xa̱ʼún ni va̱ása xíni̱na yóʼó”. Libro yóʼo káchikaña: “Nda̱ka̱tu̱ʼún miíún, tá ná sandákoún ka̱ʼún tu̱ʼun kini ndáa ki̱ʼva chindeétáʼan ña̱yóʼo xíʼin na̱ migoún”.

   Biblia káʼa̱nña: “Va̱ása nda̱ʼyi̱ nu̱ú táʼanndó, va̱ása ka̱ʼa̱nndó tu̱ʼun ña̱ sáxo̱ʼvi̱-ini inkana” (Efesios 4:31).

•  Tá káʼún tu̱ʼun kini va̱ása va̱ʼa xa̱a̱ña nda̱a̱ táki̱ʼva túvi miíún. Nu̱ú libro ña̱ nani ¡Qué maleducado!, ta̱ doctor Alex Packer káʼa̱nra ña̱ na̱ yiví kúxúxanna kuniso̱ʼona na̱ yiví na̱ káʼa̱n tu̱ʼun kini ndiʼi tiempo ta tá káʼa̱nna tu̱ʼun kini va̱ása náʼa̱na ña̱ kúúna na̱ yiví “na̱ ndíchiní, ni na̱ xíni̱ní á ni va̱ása náʼa̱na ña̱ kúnda̱a̱-inina xíʼin ña̱ ndóʼo inkana”. Ta káchikara: “Tá káʼún tu̱ʼun kini á ña̱ va̱ása vií íyo ña̱ káʼún, saátu íyo ña̱ ndákanixi̱níún”.

   Biblia káʼa̱nña: “Kǒo ka̱ʼa̱nndó tu̱ʼun ña̱ va̱ása va̱ʼa” (Efesios 4:29).

•  Chika̱a̱-iniún kéʼún iin ña̱ʼa. Chika̱ún ndeé ña̱ ti̱xin iin yo̱o̱ va̱ása ka̱ʼún tu̱ʼun kini. Kaʼyí ña̱ xa̱a̱ kéʼún nu̱ú iin tutu a nu̱ú iin calendario. Ta ña̱ va̱ʼa saxínún ña̱ chi̱ka̱a̱-iniún keʼún, xíniñúʼu keʼún inkaka ña̱ʼa. Tá kúú:

•  Va̱ása kotoún á keʼún ña̱ʼa ña̱ chindaʼá yóʼo ña̱ ka̱ʼún tu̱ʼun kini. Biblia káʼa̱nña: “tá kítáʼanndó xíʼin na̱ yiví na̱ kéʼé ña̱ va̱ása va̱ʼa, nandósóndó keʼéndó ña̱ va̱ʼa” (1 Corintios 15:33). Versículo yóʼo su̱ví na̱ yiví na̱ kitáʼan xíʼún kuití káʼa̱nña xa̱ʼa̱, chi saátu káʼa̱nña xa̱ʼa̱ película, videojuego xíʼin yaa ña̱ ndáka̱xiún kuniso̱ʼún. Ñá Kenneth, ñá kúúmií 17 ku̱i̱ya̱, káchiñá: “Sava yichi̱ tá xítaún yaa ña̱ kútóoníún va̱ása kiʼún kuenta ña̱ káʼa̱nña tu̱ʼun kini. Saáchi liviníña túviún”.

•  Na̱ʼa̱ ña̱ kúún iin na̱ yiví na̱ xu̱xa-ini. Savana káʼa̱nna tu̱ʼun kini ña̱ va̱ʼa na̱ʼa̱na ña̱ kúúna na̱ yiví na̱ xa̱a̱ chée. Soo na̱ yiví na̱ xa̱a̱ xu̱xa “ndákunina ndáaña kúú ña̱ va̱ʼa ta ndáaña kúú ña̱ va̱ása va̱ʼa” (Hebreos 5:14). Na̱ yiví na̱ xu̱xa va̱ása káʼa̱nna tu̱ʼun kini ña̱ va̱ʼa kindo̱o va̱ʼa kuitína nu̱ú inkana.

 Tá káʼún tu̱ʼun kini íxaya̱ku̱a̱ña ña̱ ndákanixi̱níún. Nu̱ú ñuyǐví yóʼo xa̱a̱ ku̱a̱ʼání ña̱ kini íyo. Libro ña̱ nani Cuss Control káchiña “Va̱ása kundiku̱n keʼún ndiʼi ña̱ kéʼé na̱ yiví, chika̱a̱ ndee̱ ña̱ va̱ása ka̱ʼún tu̱ʼun kini. Tásaá ná keʼún, va̱ʼaní kuniún, ta saátu na̱ kítáʼan xíʼún kusi̱í-inina.”