သင်ခန်းစာ ၂
ပထမဆုံး ယောက်ျားနဲ့ မိန်းမကို ဘုရားသခင် ဖန်ဆင်း
ယေဟောဝါက ဧဒင်ဆိုတဲ့ နေရာမှာ ဥယျာဉ်တစ်ခု စိုက်ပျိုးထားတယ်။ အဲဒီဥယျာဉ်ထဲမှာ သစ်ပင်ပန်းမန်တွေနဲ့ တိရစ္ဆာန်တွေ အပြည့်ပဲ။ ဘုရားသခင်က ပထမဆုံးလူ အာဒံကို ဖန်ဆင်းဖို့ မြေမှုန့်နဲ့ ပုံဖော်ပြီး နှာခေါင်းထဲ အသက်စွမ်းအားကို မှုတ်လိုက်တဲ့အခါ အသက်ရှင်တဲ့လူ ဖြစ်လာတယ်။ ဥယျာဉ်ကို စောင့်ရှောက်ဖို့၊ တိရစ္ဆာန်အားလုံးကို နာမည်ပေးဖို့ အာဒံကို ယေဟောဝါ တာဝန်ပေးတယ်။
ယေဟောဝါက အာဒံကို အရေးကြီးတဲ့ ပညတ်တစ်ခုလည်း ပေးသေးတယ်– ‘အပင်အားလုံးရဲ့ အသီးကို မင်းစားခွင့်ရှိတယ်။ ဒါပေမဲ့ အပင်တစ်ပင်ရဲ့ အသီးကိုတော့ မစားနဲ့။ စားရင် မင်း သေမယ်’ တဲ့။
နောက်ပိုင်းမှာ ယေဟောဝါက ‘အာဒံကို ကူညီမယ့်သူ ငါလုပ်ပေးမယ်’ လို့ပြောပြီး အာဒံကို အိပ်ပျော်စေတယ်။ ပြီးတော့ အာဒံရဲ့ နံရိုးတစ်ချောင်းနဲ့ မိန်းမတစ်ယောက် ဖန်ဆင်းတယ်။ သူ့နာမည်က ဧဝတဲ့။ အာဒံနဲ့ဧဝဟာ ပထမဆုံး မိသားစု ဖြစ်လာတယ်။ ဧဝကိုတွေ့တော့ အာဒံ
ဘယ်လိုခံစားရသလဲ။ ‘ဒါလေးက ငါ့နံရိုးနဲ့ ဘုရားဖန်ဆင်းပေးထားတာ၊ ငါ့လိုလူပါလား’ လို့ ဝမ်းသာအားရ ပြောတယ်။ယေဟောဝါက အာဒံနဲ့ ဧဝကို သားသမီးတွေမွေးပြီး ကမ္ဘာမြေကို ပြည့်စေပါလို့ ပြောတယ်။ ကမ္ဘာတစ်ခုလုံး ပရဒိသု ဒါမှမဟုတ် ဧဒင်ဥယျာဉ်လို လှပတဲ့ပန်းခြံဖြစ်အောင် လုပ်ကြပါလို့လည်း ပြောသေးတယ်။ ဒါပေမဲ့ အဲဒီလို မဖြစ်လာဘူး။ ဘာကြောင့်လဲ သိလား။ နောက်အခန်းမှာ ဖော်ပြထားတယ်။
‘အစအဦးမှာ ဖန်ဆင်းရှင်က ယောက်ျားနဲ့မိန်းမကို ဖန်ဆင်းခဲ့တယ်။’ —မဿဲ ၁၉:၄။