ယေရှုသေပြီး သုံးရက်နေ့ရောက်တဲ့အခါ ရှင်ပြန်ထမြောက်လာတယ်။ အဲဒီနေ့မှာပဲ သူ့တပည့်တော်တွေရှေ့မှာ အချိန်ခြားပြီး ငါးကြိမ် ကိုယ်ယောင်ထင်ရှားပြခဲ့တယ်။ ဆက်ပြီးတော့လည်း ရက်ပေါင်း ၄၀ ကိုယ်ယောင်ထင်ရှားပြခဲ့တယ်။ ပြီးတော့ တပည့်တော်တချို့တွေကြည့်နေတုန်း ကောင်းကင်ကိုတက်ကြွသွားတယ်။ ဆယ်ရက်ကြာတော့ ယေရုရှလင်မြို့မှာ စောင့်နေတဲ့ယေရှုရဲ့နောက်လိုက်တွေပေါ်မှာ ဘုရားသခင် သန့်ရှင်းတဲ့ဝိညာဉ်တော်သွန်းလောင်းပေးခဲ့တယ်။

အဲဒီနောက် ဘုရားသခင်ရဲ့ရန်သူတွေက တမန်တော်တွေကို ထောင်ထဲချခဲ့ကြတယ်။ ဒါပေမဲ့ ကောင်းကင်တမန်က သူတို့ကိုကယ်လိုက်တယ်။ တပည့်တော်သတေဖန်ကို အတိုက်အခံသမားတွေက ခဲနဲ့ပေါက်သတ်လိုက်တယ်။ ဒါပေမဲ့ အတိုက်အခံလုပ်တဲ့ ဒီလူတွေထဲကတစ်ယောက်ကို ယေရှုက အထူးအစေခံတစ်ယောက်အနေနဲ့ ရွေးကောက်ခဲ့တဲ့အကြောင်း၊ အဲဒီလူဟာလည်း တမန်တော်ပေါလုဖြစ်လာတဲ့အကြောင်းကိုသိရလိမ့်မယ်။ ပြီးတော့ ယေရှုသေလို့သုံးနှစ်ခွဲအကြာမှာ ဘုရားသခင်က ပေတရုကိုလွှတ်ပြီး ဂျူးလူမျိုးမဟုတ်တဲ့ ကော်နေလိနဲ့သူ့မိသားစုကို ဟောပြောခိုင်းခဲ့တယ်။

၁၃ နှစ်နောက်ပိုင်းမှာ ပေါလုက ပထမအချီဟောပြောခြင်းခရီးစဉ်ကိုစခဲ့တယ်။ ဒုတိယအချီရောက်တော့ တိမောသေပါလိုက်သွားတယ်။ ပေါလုနဲ့သူ့ခရီးဖော်တွေ ဘုရားသခင်ကိုဝတ်ပြုတဲ့နေရာမှာ ဘယ်လိုစွန့်စားမှုတွေကြုံခဲ့ရတာတွေကိုသိရမယ်။ နောက်ဆုံးတော့ ပေါလုထောင်ကျသွားတယ်။ နောက်နှစ်နှစ်ကြာတော့ လွတ်လာတယ်။ ဒါပေမဲ့ နောက်တစ်ကြိမ်ထောင်အချခံရပြီး အသတ်လည်းခံရရှာတယ်။ အပိုင်း ၇ မှာပါတဲ့အဖြစ်အပျက်တွေဟာ ၃၂ နှစ်အတွင်းဖြစ်ပျက်တဲ့ အဖြစ်အပျက်တွေပေါ့။