အပိုင်း ၅
ဘုရားသခင်ကို သိကျွမ်းခြင်း
အကြံဉာဏ် လိုချင်တဲ့အခါ ယုံကြည်အားကိုးထိုက်သူဆီ သွားမယ် မဟုတ်လား။ ယုံကြည်ထိုက်တဲ့သူဆီက အကြံဉာဏ် ရတဲ့အခါ ချက်ချင်း အကျိုးရရ၊ မရရ လိုက်နာချင်ကြတယ်။ ကျမ်းစာပါ လက်တွေ့ကျအကြံဉာဏ်ကနေ အမှန်တကယ် အကျိုးရချင်ရင် ကျမ်းစာအာဘော်ရှင်ကို သိကျွမ်းရမယ်။ “မိတ်ဆွေ” တွေတောင် ဖြစ်လာနိုင်တယ်။—ဟေရှာယ ၄၁:၈။
၂ တစ်စုံတစ်ဦးနဲ့ မိတ်ဖွဲ့ချင်ရင် သူ့နာမည်ကို သိချင်မယ်။ ဘုရားသခင်မှာကော နာမည် ရှိပါသလား။ “ငါဟာ ယေဟောဝါပဲ။ ဒါဟာ ငါ့နာမည်ပဲ။ ငါ့ရဲ့ဘုန်းအသရေကို ဘယ်သူ့ကိုမှ မပေးဘူး။ ငါရထိုက်တဲ့ ချီးမွမ်းခြင်းကိုလည်း ရုပ်တုတွေကို မပေးဘူး” လို့ မိန့်ဆိုတယ်။ (ဟေရှာယ ၄၂:၈) ဟီဘရူး ဗျည်းလုံးလေး יהוה ဖော်ပြတဲ့ “ယေဟောဝါ” ဆိုတာ ဘုရားရဲ့ နာမတော် ဖြစ်တယ်။ မူရင်း ဟီဘရူးကျမ်းစာမှာ နာမတော် အကြိမ်ပေါင်း ၇,၀၀၀ နီးပါး ပါရှိတယ်။ နာမတော်ဟာ “ကိုယ်တော် ဖြစ်လာစေတယ်” လို့ အဓိပ္ပာယ် ရတယ်။ ရည်ရွယ်တော်မူချက်တွေ ပြည့်စုံစေဖို့ ကိုယ်တိုင်ရော၊ ဖန်ဆင်းရာတွေကိုပါ ဘာမဆို ဖြစ်စေနိုင်စွမ်း ရှိတယ်လို့ ဆိုလိုတယ်။ ဒီ့ပြင် ဟီဘရူးစကားလုံးက အဆင့်ဆင့် ဆောင်ရွက်မှုကို ဖော်ပြတဲ့ သဒ္ဒါပုံစံ ဖြစ်တယ်။ ဘာကို ဆိုလိုသလဲ။ ယေဟောဝါဟာ ရည်ရွယ်ချက်တွေ ပြည့်စုံအောင် လုပ်ဆောင်ခဲ့ကြောင်း၊ လုပ်ဆောင်နေဆဲဖြစ်ကြောင်း ဖော်ပြတယ်။ ယေဟောဝါဟာ စွမ်းအားတစ်ခု မဟုတ်ဘဲ အသက်ရှင်တဲ့ဘုရား ဖြစ်တယ်။
၃ ယေဟောဝါဟာ ဖန်ဆင်းရှင် ဖြစ်တယ်။ (ကမ္ဘာဦး ၁:၁) “ကောင်းကင်၊ မြေကြီး၊ သမုဒ္ဒရာနဲ့ အဲဒီမှာရှိသမျှကို ဖန်ဆင်းတဲ့အရှင်၊ အသက်ရှင်နေတဲ့ ဘုရားသခင်” ဖြစ်တယ်။ (တမန်တော် ၁၄:၁၅) ယေဟောဝါက ပထမလူသားမောင်နှံ အာဒံနဲ့ ဧဝ အပါအဝင် အရာခပ်သိမ်းကို ဖန်ဆင်းခဲ့တယ်။ ဒါကြောင့် “အသက်ရဲ့ ပင်ရင်း” ဖြစ်တယ်။ (ဆာလံ ၃၆:၉) အသက်ကို ထောက်ပံ့ပေးရှင်လည်း ဖြစ်တယ်။ “ဘုရားသခင်က ခင်ဗျားတို့ကို အစားအစာ အလျှံပယ်ပေးဖို့၊ ရွှင်လန်းဝမ်းမြောက်စေဖို့ မိုးကောင်းကင်ကနေ မိုးရွာစေတယ်၊ အသီးအနှံတွေ ဖြစ်ထွန်းစေတဲ့ ရာသီဥတုကို ပေးတယ်။ ဒီနည်းနဲ့ ခင်ဗျားတို့အတွက် ကောင်းမှုပြုပြီး မိမိတည်ရှိကြောင်း မပျက်မကွက် သက်သေခံနေတယ်။” (တမန်တော် ) အာဖရိကနဲ့ အာရှမှာ ဘိုးဘေးတွေကို ကိုးကွယ်ကြတယ်။ ဘိုးဘေးတွေဆီက အသက် ရရှိကြလို့ပဲ။ ဖန်ဆင်းရှင်၊ အသက်ကို ထောက်ပံ့ပေးရှင်၊ ပထမလူသားမောင်နှံကို ဖန်ဆင်းပြီး မျိုးပွားနိုင်စွမ်း ပေးသနားတဲ့အရှင်ကို ပိုကျေးဇူးတင် ဝတ်ပြုသင့်တယ် မဟုတ်လား။ ဒီအချက်ကို စဉ်းစားဆင်ခြင်ခြင်းက ဒီလို ပြောဆိုဖို့ လှုံ့ဆော်ခံရနိုင်တယ်– “ယေဟောဝါဘုရား၊ ကိုယ်တော်က အရာခပ်သိမ်းကို ဖန်ဆင်းခဲ့တယ်။ အရာခပ်သိမ်းဟာ အလိုတော်ကြောင့် ဖန်ဆင်းခံရပြီး တည်ရှိနေတယ်။ ဒါကြောင့် ဂုဏ်တင်မှု၊ ချီးမွမ်းမှုနဲ့ အစွမ်းခွန်အားတွေကို ကိုယ်တော် ရထိုက်ပါတယ်။”— ၁၄:၁၇ဗျာဒိတ် ၄:၁၁။
၄ သမ္မာကျမ်းစာအားဖြင့် ဖန်ဆင်းရှင်ယေဟောဝါကို သိကျွမ်းလာနိုင်တယ်။ ဘယ်လို ဘုရားမျိုး ဖြစ်ကြောင်း သင်ယူနိုင်တယ်။ “ဘုရားသခင်ဟာ ချစ်ခြင်းမေတ္တာ ဖြစ်တယ်” လို့ ကျမ်းစာက ဆိုတယ်။ (၁ ယောဟန် ၄:၁၆။ ထွက်မြောက်ရာ ၃၄:၆၊ ၇) ကမ္ဘာဦးကျမ်းကနေ ဗျာဒိတ်ကျမ်းအထိ ဖတ်ကြည့်မယ်ဆိုရင် ဘုရားဟာ တကယ့်မေတ္တာရှင် ဖြစ်ကြောင်း ဖော်ပြတဲ့ မှတ်တမ်းများစွာကို တွေ့ရမယ်။ ဖန်ဆင်းရှင်ကို သိကျွမ်းလာဖို့ သမ္မာကျမ်းစာကို နေ့စဉ် ဖတ်ပါ။ သမ္မာကျမ်းစာကို အကျွမ်းတဝင်ရှိသူတွေရဲ့ အကူအညီနဲ့ ဂရုတစိုက် လေ့လာပါ။ (တမန်တော် ၈:၂၆-၃၅) ဘုရားဟာ တရားမျှတပြီး ဆိုးသွမ်းမှုကို ထာဝစဉ် ခွင့်ပြုမှာ မဟုတ်ကြောင်း သိလာမယ်။ (တရားဟောရာ ၃၂:၄) လူသားတွေအနေနဲ့ မေတ္တာနဲ့ တရားမျှတမှု တင်ပြရာမှာ ဟန်ချက်ညီဖို့ မလွယ်ဘူး။ ဒါပေမဲ့ ယေဟောဝါဟာ ဉာဏ်ပညာကြောင့် ဟန်ချက်ညီနိုင်တယ်။ (ရောမ ၁၁:၃၃။ ၁၆:၂၇) ဘုရားက အနန္တတန်ခိုးရှင် ဖြစ်လို့ ရည်ရွယ်ချက်တွေ ပြည့်စုံအောင် တန်ခိုးကို လိုအပ်သလို အသုံးပြုနိုင်တယ်။ (ကမ္ဘာဦး ၁၇:၁) ကျမ်းစာပါ ပညာရှိအကြံဉာဏ်တွေကို ကျင့်သုံးရင် ဖန်ဆင်းရှင်ကို ပိုလေးမြတ်လာမယ်။ ဘုရားရဲ့ အကြံဉာဏ်တွေဟာ ကျွန်တော်တို့ အကျိုးအတွက်သာ ဖြစ်ကြောင်း နားလည်လာမယ်။
၅ ဘုရားသခင်နဲ့ ရင်းနှီးနိုင်တဲ့ နောက်နည်းလမ်းတစ်ခုက ဆုတောင်းခြင်း ဖြစ်တယ်။ ယေဟောဝါဟာ “ဆုတောင်းသံကို နားထောင်တဲ့အရှင်” ဖြစ်တယ်။ (ဆာလံ ၆၅:၂) “ကျွန်တော်တို့ တောင်းလျှောက်သမျှ၊ ကြံစည်သမျှထက် အတိုင်းထက်အလွန် လုပ်ဆောင်နိုင်တဲ့ ဘုရားသခင်” ဖြစ်တယ်။ (ဧဖက် ၃:၂၀) ဒါပေမဲ့ အကူအညီလိုမှပဲ ရောက်လာတတ်တဲ့ ‘မိတ်ဆွေ’ ကို ဘယ်လို သဘောထားမလဲ။ သိပ်အထင်ကြီးလေးစားမှာ မဟုတ်ဘူး။ အလားတူပါပဲ၊ လိုအပ်ရာတွေကို တောင်းဆိုဖို့ ဆုတောင်းတာ မဟုတ်ဘဲ ဘုရားသခင်ကို ကျေးဇူးတင်ချီးမွမ်းဖို့လည်း ဆုတောင်းချင်ကြမှာ သေချာတယ်။—ဖိလိပ္ပိ ၄:၆၊ ၇။ ၁ သက်သာလောနိတ် ၅:၁၇၊ ၁၈။