ယေဟောဝါကို ဝတ်ပြု​ရတာ လွယ်တယ်​လို့ ထင်သလား။— ကြီးမြတ်တဲ့​ဆရာက လွယ်မယ်​လို့ မပြောခဲ့​ဘူးကွဲ့။ အသတ်​မခံရ​ခင် ညမှာ ယေရှု​က “ဒီ​လောကက ခင်ဗျားတို့ကို မုန်း​ရင် ခင်ဗျားတို့ကို မမုန်း​ခင်​ကတည်းက ကျွန်တော့်ကို မုန်းတယ်​ဆိုတာ သိမှတ်​ကြပါ” လို့ တမန်တော်တွေကို ပြောပြ​ခဲ့​တယ်။—ယောဟန် ၁၅:၁၈။

ပေတရု​က ယေရှုကို ဘယ်တော့မှ မစွန့်​ဘူးလို့ ကြွား​ခဲ့​ပေမဲ့ အဲဒီ​ညမှာ​ပဲ ယေရှုကို မသိ​ဘူးလို့ သုံးကြိမ်​တိုင်တိုင် ငြင်း​လိမ့်မယ်လို့ ယေရှု ပြော​လိုက်တယ်။ ပြောတဲ့​အတိုင်းပဲ ပေတရု ငြင်းခဲ့တယ်။ (မဿဲ ၂၆:၃၁-၃၅၊ ၆၉-၇၅) ဘယ်လို ဖြစ်သွား​ရတာလဲ။— ပေတရုဟာ ကျန်တဲ့​တမန်တော်တွေ​လို​ပဲ ကြောက်စိတ် ဝင်လာတဲ့​အတွက် ခုလို​ဖြစ်သွား​ရတာပါ။

တမန်တော်တွေ ဘာဖြစ်လို့ ကြောက်စိတ် ဝင်လာသလဲ သိကြသလား။— အင်မတန် အရေးကြီးတဲ့ ကိစ္စ​တစ်ခုကို လုပ်ဖို့ သူတို့ ပျက်ကွက်ခဲ့​ကြလို့ပဲ။ အဲဒီ​အကြောင်းကို သိထားမယ်ဆို​ရင် တို့တစ်​တွေကို လူတွေ ဘာပဲ​ပြောပြော၊ ဘာပဲ​လုပ်​လုပ် ယေဟောဝါကို ဆက်​ဝတ်ပြု​နိုင်​လိမ့်မယ်။ ဒါပေမဲ့ တမန်တော်တွေ​နဲ့ ယေရှု အတူတူ​ရှိခဲ့တဲ့ နောက်ဆုံး​ညမှာ ဖြစ်ပျက်ခဲ့တာ​တွေကို ပြန်​စဉ်းစား​ကြည့်ရအောင်။

ပထမဦးဆုံး သူတို့ ပသခါ​ပွဲကို အတူတူ ကျင်းပ​ကြတယ်။ ပသခါပွဲ​ဆိုတာ အီဂျစ်​ပြည် ကျွန်​ဘဝကနေ လွတ်မြောက်​ခဲ့​ပုံကို ဘုရားရဲ့​လူမျိုး သတိ​ရစေဖို့ နှစ်​တိုင်း ကျင်းပ​ရတဲ့ အထူး​ညစာ​စားပွဲ ဖြစ်တယ်။ အဲဒီ​နောက်မှာ ယေရှု​က ညစာ​စားပွဲ နောက်​တစ်ခုကို စတင်​ကျင်းပတယ်။ အဲဒီ​အကြောင်းကို နောက်ပိုင်းကျမှ ဆွေးနွေးမယ်။ အဲဒီ​ညစာ​စားပွဲ​က ယေရှုကို ဘယ်လို သတိ​ရစေသလဲ​ဆိုတာလည်း ရှင်းပြမယ်။ ညစာ စား​ပြီး၊ တမန်တော်တွေကို အားပေး​စကား ပြောပြီး​တဲ့​နောက်မှာ ယေရှု​က သူတို့ကို ဂေသရှေမန်​ဥယျာဉ်​ကို ခေါ်သွားတယ်။ ဒီ​ဥယျာဉ်ဟာ သူတို့ သိပ်​ကြိုက်​လို့ ခဏခဏ သွားတဲ့​နေရာ ဖြစ်တယ်။

 ဥယျာဉ်​ထဲ ရောက်တော့ ယေရှုဟာ တစ်​နေရာ သွားပြီး တစ်ယောက်တည်း ဆုတောင်းတယ်။ ပေတရု၊ ယာကုပ်၊ ယောဟန်တို့ကိုလည်း ဆုတောင်းဖို့ မှာ​သွားတယ်။ ဒါပေမဲ့ သူတို့ အိပ်ပျော်​သွားကြတယ်။ ယေရှုဟာ ခပ်လှမ်းလှမ်း သွားပြီး သုံးခါ ဆုတောင်းတယ်။ ပြန်လာတဲ့​အခါတိုင်း ပေတရုနဲ့ တမန်တော်တွေ အိပ်ပျော်​နေတာကို တွေ့ရတယ်။ (မဿဲ ၂၆:၃၆-၄၇) ဒီလို​အချိန်မှာ သူတို့ ဘာကြောင့် နိုးနိုးကြားကြား​ရှိပြီး ဆုတောင်းနေသင့်သလဲ သိသလား။— ကြည့်ရအောင်။

အဲဒီ​ညနေ စောစော​ပိုင်း ပသခါပွဲ​မှာ ယုဒရှကာရုတ်​ဟာ ယေရှု​အပါအဝင် ကျန်​တမန်တော်တွေ​နဲ့​အတူ ရှိနေခဲ့တယ်။ ယုဒ သူခိုး ဖြစ်သွား​တာ​ကို မှတ်မိ​ဦး​မှာ​ပေါ့​နော်။ အခုတော့ ယုဒဟာ သစ္စာဖောက်​တစ်ယောက် ဖြစ်​သွားပြီလေ။ ဂေသရှေမန်​ဥယျာဉ်မှာ ယေရှုနဲ့ တမန်တော်တွေ မကြာခဏ တွေ့ဆုံ​တဲ့​နေရာကို သူ​သိထားတယ်။ ဒါကြောင့် ယေရှုကို ဖမ်းဖို့ အဲဒီ​နေရာကို စစ်သားတွေ ခေါ်လာ​တယ်။ သူတို့ ရောက်လာတော့ ယေရှု​က “ဘယ်သူ့ကို ရှာနေတာလဲ” ဆိုပြီး မေးလိုက်တယ်။

စစ်သည်တွေ​က “ယေရှုကို ရှာ​နေတာ” လို့​ပြောတော့ ယေရှု​က “ကျွန်တော်ဟာ ယေရှု​ပဲ” ဆိုပြီး မကြောက်မရွံ့ ပြော​လိုက်တယ်။ ယေရှုရဲ့ သတ္တိ​ကြောင့် စစ်သည်တွေ အံ့သြ​လွန်း​လို့ နောက်ဆုတ်​သွားပြီး လဲကျ​ကုန်တယ်။ ဒါနဲ့ ယေရှု​က “ကျွန်တော့်ကို ရှာ​နေတာ​ဆိုရင် သူတို့တွေ သွားပါစေ” လို့​ပြောတယ်။—ယောဟန် ၁၈:၁-၉။

စစ်သည်တွေ​က ယေရှုကို ဖမ်း​ပြီး လက်ကို ကြိုး​တုတ်​တဲ့အခါ တမန်တော်တွေ ကြောက်လို့ ထွက်ပြေးကြ​ပါလေရော။ ဒါပေမဲ့ ပေတရုနဲ့ ယောဟန်တို့ကတော့ ဘာ​ဆက်ဖြစ်​မလဲ​ဆိုတာ သိချင်​လို့ ခပ်လှမ်းလှမ်း​ကနေ လိုက်သွား​ကြတယ်။ ယေရှုကို ပုရောဟိတ်မင်း ကယာဖရဲ့ အိမ်ကို ခေါ်သွား​ကြတယ်။ ယောဟန်ဟာ ပုရောဟိတ်မင်းရဲ့ အသိ​ဖြစ်နေလို့ တံခါး​စောင့်​က သူနဲ့ ပေတရု​ကို အိမ်​ခြံဝင်း​ထဲ ဝင်ခွင့်​ပေး​လိုက်တယ်။

ပုရောဟိတ်တွေ​က ယေရှုကို စစ်ဆေး​မေးမြန်း​ဖို့ ကယာဖရဲ့ အိမ်မှာ စုရုံး​ရောက်ရှိနေ​ကြပြီ။ သူတို့က ယေရှုကို သတ်ပစ်ချင်​နေကြတာ။ ဒါကြောင့် ယေရှုကို မဟုတ်မမှန် စွပ်စွဲ​ဖို့ သက်သေ​တွေ ခေါ်လာ​ကြတယ်။ လူတွေက ယေရှုကို လက်သီး​နဲ့ ထိုး​တယ်၊ ပါး​ရိုက်တယ်။ ဒါတွေ​ဖြစ်နေ​ချိန်မှာ ပေတရုဟာ အနီးအနားမှာ ရှိနေတယ်။

 ပေတရုနဲ့ ယောဟန်တို့ကို ခြံဝင်း​ထဲ ဝင်ခွင့်​ပေးတဲ့ တံခါး​စောင့် အစေခံ​မ​လေး​က ပေတရု​ကို သတိထား​မိတယ်။ ဒါနဲ့ “ရှင်ဟာ ယေရှုနဲ့ တစ်ဖွဲ့​တည်း​ပဲ” လို့​ပြောတယ်။ ဒါပေမဲ့ ပေတရု​က ယေရှု​ကို သိတောင်​မသိ​ဘူးလို့ ငြင်း​လိုက်တယ်။ ခဏ​ကြာ​တော့ အစေခံ​မ​လေး နောက်​တစ်ယောက်က ပေတရု​ကို မှတ်မိ​သွားပြီး အနားမှာ ရပ်နေတဲ့ လူတွေကို “ဒီ​လူဟာ ယေရှုနဲ့ တစ်ဖွဲ့​တည်း​ပဲ” လို့​ပြောတယ်။ ပေတရု​က ယေရှုကို မသိ​ဘူးလို့ ငြင်း​ပြန်တယ်။ ခဏ​ကြာ​တော့ အဲဒီမှာ ရပ်နေသူ​တစ်စု​က ပေတရု​ကို “တကယ်တော့ ခင်ဗျားလည်း သူတို့နဲ့ တစ်ဖွဲ့​တည်း​ပဲ” လို့ ပြော​ကြတယ်။ ပေတရု​က “သူ့ကို ကျွန်တော် မသိ​ဘူး” ဆိုပြီး တတိယ​အကြိမ် ငြင်း​လိုက်တယ်။ တကယ်​ပြောတာပါ​ဆိုပြီး ကျိန်​ပြောလိုက်​သေးတယ်။ အဲဒီအချိန်မှာ ယေရှု​က ပေတရု​ကို လှည့်ကြည့်​တယ်။—မဿဲ ၂၆:၅၇-၇၅။ လုကာ ၂၂:၅၄-၆၂။ ယောဟန် ၁၈:၁၅-၂၇။

ပေတရု ဘာလို့ ညာ​လိုက်သလဲ သိလား။— ဟုတ်တယ်၊ ကြောက်လို့​ပေါ့။ ဘာကြောင့် ကြောက်​တာလဲ။ ဘာကြောင့် သတ္တိ​မရှိခဲ့တာ​လဲ။ ဒီ​အချက်ကို စဉ်းစား​ကြည့်။ သတ္တိ​ရှိဖို့ ယေရှု ဘာလုပ်ခဲ့သလဲ။— ဘုရားသခင်​ဆီ ဆုတောင်းခဲ့တယ်။ ဘုရားသခင်ကလည်း သတ္တိ​ရှိအောင် ကူညီ​ပေးခဲ့တယ်။ ယေရှု​က ပေတရု​ကို ဆုတောင်းပါ၊ နိုးနိုးကြားကြား ရှိပါ၊ စောင့်နေ​ပါ​ဆိုပြီး သုံးကြိမ်​တောင် မှာ​ခဲ့တာကို သတိရ​ကြပါ။ ဒါပေမဲ့ ဘာတွေ ဖြစ်ပျက်​ခဲ့သလဲ။—

 ယေရှု ပြန်လာတဲ့​အခါတိုင်း ပေတရု အိပ်ပျော်​နေခဲ့တယ်။ ဆုမတောင်း​ဘူး၊ စောင့်မ​နေခဲ့​ဘူး။ ဒါကြောင့် ယေရှု အဖမ်းခံရတဲ့​အခါ အငိုက်မိ​သွားတာ​ပေါ့။ နောက်ပိုင်း စစ်ဆေး​မေးမြန်းတဲ့​အခါ၊ ယေရှုကို ရိုက်​ပြီး အသေသတ်ဖို့ ကြံစည်​ကြတာကို မြင်​တော့ ပေတရု ပို​ကြောက်​လာတယ်။ ဒါပေမဲ့ အဲဒီလို​မဖြစ်ခင် နာရီ​အနည်းငယ်​က တမန်တော်တွေ ဘာ​မျှော်လင့်​ထားရမယ်​လို့ ယေရှု ပြောခဲ့သလဲ။— လောကသား​တွေ​က ယေရှုကို မုန်း​ရင် တပည့်တွေလည်း အမုန်းခံ​ရမယ်လို့ ပြောခဲ့တယ်။

ပေတရု ဖြစ်ခဲ့သလို​မျိုး တို့တစ်တွေ​မှာလည်း ဖြစ်နိုင်​တာတွေကို စဉ်းစား​ကြည့်ရအောင်။ ကလေးတို့​ရဲ့ အတန်း​ထဲမှာ ကျောင်းသား​တချို့က အလံ အလေး​မပြုတဲ့​သူ၊ ဒါမှမဟုတ် ခရစ္စမတ်ပွဲ မ​ကျင်းပတဲ့​သူတွေ​အကြောင်း မကောင်း​ပြော​နေကြ​တယ် ဆိုပါစို့။  တစ်ယောက်က ကလေးတို့​ဘက် လှည့်​ပြီး “မင်းတို့ အလံ အလေး​မပြုဘူး​ဆိုတာ ဟုတ်သလား” ဆိုပြီး မေး​လာ​ရင်​ကော။ ဒါမှမဟုတ် “မင်းတို့​က ခရစ္စမတ်ပွဲ​တောင် မလုပ်ကြဘူး​ဆို” လို့ ပြောမယ်​ဆိုရင်ကော။ အမှန်​ကို​ပြောရဲ​မလား။— ပေတရု လို​မျိုး လိမ်ပြော​မိ​မလား။—

ပေတရုဟာ ယေရှုကို မသိ​ဘူးလို့ ငြင်းခဲ့​မိ​တဲ့​အတွက် တအား ဝမ်းနည်း​သွားတယ်။ သူ​မှားသွား​မှန်း သိတဲ့​အခါ အပြင်ထွက်ပြီး ငို​ခဲ့​တယ်။ ဟုတ်​ပါတယ်၊ ယေရှု​ဆီ ပြန်​လှည့်လာ​တယ်။ (လုကာ ၂၂:၃၂) အခု ဒီ​အချက်ကို စဉ်းစား​ကြည့်ရအောင်။ ပေတရု​လို​မျိုး တို့တစ်တွေလည်း ကြောက်​ကြောက်​နဲ့ မပြော​မိအောင် ဘာက အကူအညီ ပေးနိုင်သလဲ။— ဆုတောင်းဖို့၊ သတိနဲ့​စောင့်နေဖို့ ပေတရု ပျက်ကွက်ခဲ့​တာ​ကို သတိရ​ကြပါ။ ဒီတော့ ကြီးမြတ်တဲ့​ဆရာရဲ့ နောက်လိုက်​တစ်ယောက်​ဖြစ်ဖို့ တို့တစ်တွေ ဘာလုပ်ဖို့​လိုတယ်လို့ ကလေးတို့ ပြောမလဲ။—

ယေဟောဝါ​ဆီက အကူအညီ ရဖို့ မဖြစ်​မနေ ဆုတောင်းဖို့ လိုတယ်။ ယေရှု ဆုတောင်းတဲ့အခါ ဘုရားသခင် ဘာလုပ်​ပေးတယ်ဆိုတာ ကလေးတို့ သိကြသလား။— ကောင်းကင်တမန်​တစ်ပါး​ကို စေလွှတ်​ပြီး ယေရှုကို အားပေးခဲ့တယ်။ (လုကာ ၂၂:၄၃) ဘုရားရဲ့ ကောင်းကင်တမန်တွေ​က တို့တစ်​တွေကို​ကော ကူညီ​ပေး​နိုင်သလား။— “ယေဟောဝါကို ကြောက်ရွံ့​သူတွေရဲ့ ပတ်လည်မှာ ကောင်းကင်တမန် ခြံရံ​နေတယ်” ဆိုပြီး ကျမ်းစာက ဆိုတယ်။ (ဆာလံ ၃၄:၇) ဒါပေမဲ့ ဘုရားဆီက အကူအညီ ရဖို့​ဆိုရင် ဆုတောင်းတာ​ထက်မက လုပ်ဖို့ လိုတယ်။ ဘာလုပ်​ရဦး​မလဲ​ဆိုတာ ကလေးတို့ သိကြသလား။— ယေရှု​က နောက်လိုက်​တွေကို နိုးနိုးကြားကြား ရှိဖို့၊ သတိနဲ့ စောင့်နေဖို့ မှာခဲ့တယ်။ ဘာက ကူညီ​ပေးမယ် ထင်သလဲ။—

ခရစ်ယာန် အစည်းအဝေးတွေမှာ သေသေချာချာ နားထောင်ဖို့၊ ကျမ်းစာက ဖတ်ရ​တာတွေကို အာရုံစိုက်​ဖို့ လိုတယ်။ ဘုရားသခင်ကို ဝတ်ပြုရာမှာ အကူအညီ​ပေးဖို့ ယေဟောဝါ​ဆီ မှန်မှန် ဆုတောင်းဖို့​လည်း လိုတယ်။ ဒါဆိုရင် ကြောက်စိတ်​ကို အောင်နိုင်ဖို့ အကူအညီ​ရမှာ ဖြစ်တယ်။ ဒါဆိုရင် ကြီးမြတ်တဲ့​ဆရာနဲ့ သူ့​ဖခင်​အကြောင်း သူများ​ကို​ပြောပြဖို့ အခွင့်အရေး ရတဲ့အခါ တို့တစ်တွေ ဝမ်းသာ​ကြမှာပဲ။