တစ်ခါတလေ ဘယ်သူ့ကို နာခံရမလဲ​ဆိုတာ ဝေခွဲမရ ဖြစ်တတ်တယ်။ ကလေးတို့​ရဲ့ ဖေဖေ၊ မေမေ​က တစ်မျိုး လုပ်​ခိုင်း​မယ်။ ဒါပေမဲ့ ကျောင်းဆရာ၊ ဆရာမ ဒါမှမဟုတ် ရဲတစ်ယောက်က နောက်​တစ်မျိုး ခိုင်းရင် ခိုင်း​မယ်။ ဒါဆိုရင် ကလေးတို့ ဘယ်သူ့​စကား နားထောင်​မလဲ။—

ဒီ​စာအုပ်ရဲ့ ရှေ့​ပိုင်း အခန်း ၇ မှာ ကျမ်းစာကနေ ဧဖက် ၆:၁-၃ ကို တို့တစ်တွေ ဖတ်​ခဲ့​ကြတယ်။ မိဘ​စကားကို သားသမီးတွေ နားထောင်​ရမယ်လို့ ဆိုထားတယ်။ “ဘုရားသခင့် အလိုတော်​နဲ့​အညီ မိဘကို နာခံကြပါ” လို့ ဆိုထားတယ်။ ဘာကို ဆိုလိုသလဲ သိသလား။— ဘုရား​ပညတ်​တွေကို နာခံဖို့ မိဘတွေ သင်ပေးတဲ့​အခါ သားသမီးတွေ နာခံ​ရမယ်လို့ ဆိုလိုတာ။

ဒါပေမဲ့ တချို့​လူကြီးတွေ ယေဟောဝါကို မယုံကြဘူး။ အဲဒီလို လူကြီး​တစ်ယောက်က စာမေးပွဲ​မှာ ခိုးချ​တာ မမှား​ဘူး၊ ဆိုင်​က​ပစ္စည်း​ကို အလစ်​သုတ်​တာ​လည်း မမှား​ဘူးလို့ ပြောရင် ဘယ်လို လုပ်မလဲ။ ကလေး​တစ်ယောက် စာ​ခိုးချ​တာ​တို့၊ အလစ်​သုတ်​တာ​တို့ လုပ်သင့်သလား​ကွဲ့။—

တစ်ခါတုန်းက နေဗုခဒ်နေဇာ မင်းကြီး​ဟာ သူ​တည်ထားတဲ့ ရွှေရုပ်​တု​ကြီး​ကို လူတိုင်း ဦးချ​ရှိခိုး​ရမယ်လို့ အမိန့်ပေး​ခဲ့​တာ ပြန်သတိရပါ။ ဒါပေမဲ့ ရှာဒရက်၊ မေရှက်​နဲ့ အဗေဒနေဂေါ​တို့​က ဦးမချ​ကြဘူး​လေ။ ဘာကြောင့်လဲ သိသလား။— ယေဟောဝါ တစ်ပါးတည်းကိုပဲ ကိုးကွယ်​ရမယ်လို့ ကျမ်းစာမှာ ဆို​ထားလို့​ပဲ။—ထွက်မြောက်ရာ ၂၀:၃။ မဿဲ ၄:၁၀။

ယေရှု သေ​ပြီးနောက် တမန်တော်တွေဟာ ဂျူး​တရားရုံးချုပ်​ရှေ့ ခေါ်သွင်း​ခံရကြ​တယ်။ ပုရောဟိတ်မင်း ကယာဖက “[ယေရှု] နာမည်ကို အမှီပြု​ပြီး မသွန်သင်​ဖို့ မင်းတို့ကို တင်းတင်းကျပ်ကျပ် အမိန့်ထုတ်​ထား​လျက်​နဲ့ ဂျေရုဆလင်​တစ်မြို့လုံး​ကို မင်းတို့ရဲ့​သွန်သင်ချက် ပြည့်နေ​အောင် လုပ်လိုက်​ကြပြီ” ဆိုပြီး ပြောတယ်။ တမန်တော်​တို့​က ဂျူး​တရားရုံးချုပ်ရဲ့ အမိန့်​ကို ဘာဖြစ်လို့ မနာခံ​ကြတာလဲ။— တမန်တော်​အားလုံး ကိုယ်စား ပေတရု​က ‘ကျွန်တော်တို့​ကတော့  လူ့စကား​ထက် အုပ်စိုးရှင် ဘုရားသခင်ရဲ့ စကားကို နားထောင်​မှာ​ပဲ’ ဆိုပြီး ကယာဖ​ကို ပြန်​ပြောတယ်။—တမန်တော် ၅:၂၇-၂၉။

အဲဒီခေတ်​တုန်း​က ဂျူး​ဘာသာရေး ခေါင်းဆောင်တွေ​ဟာ တော်တော်လေး အာဏာ​ရှိကြတယ်။ ဒါပေမဲ့ သူတို့​တိုင်းပြည်​ဟာ ရောမ​အစိုးရ​လက်အောက် ရောက်နေတယ်။ ရောမ​အစိုးရ​အဖွဲ့ရဲ့  အကြီးအကဲ​ကို ဆီဇာ​လို့​ခေါ်တယ်။ ဂျူးတွေဟာ ဆီဇာ​ရဲ့ အုပ်ချုပ်မှုကို မလိုလား​ကြပေမဲ့ ရောမ​အစိုးရ​က  ပြည်သူတွေ​အတွက် ကောင်းကျိုး​အများကြီး ဆောင်ရွက်ပေး​တယ်။  အခုခေတ်  အစိုးရ​တွေ​လည်း တိုင်းသူပြည်သား​တွေ အကျိုးကို ဆောင်ရွက်ပေး​ကြတယ်။ ဘာတွေ ဆောင်ရွက်ပေးသလဲ ကလေးတို့ သိသလား။—

အစိုးရ​တွေ​က လမ်း​တွေ ဖောက်​ပေးတယ်၊ တို့တစ်တွေကို ကာကွယ်​စောင့်ရှောက်​ဖို့ ရဲတပ်ဖွဲ့​နဲ့ မီးသတ်​တပ်ဖွဲ့​တွေကို လစာ​ပေးပြီး ခန့်ထား​တယ်။ ကလေးတွေ​အတွက် ကျောင်း​ပညာရေး၊ သက်ကြီးရွယ်အို​တွေ​အတွက် ကျန်းမာရေး စောင့်ရှောက်မှု​တွေကို​လည်း စီစဉ်​ပေးတယ်။ ဒါတွေ​ဆောင်ရွက်ဖို့ အစိုးရ​က ငွေတွေ​ကုန်ကျ​တယ်။ ဒီ​ငွေတွေကို အစိုးရ ဘယ်က ရသလဲ သိသလား။— ပြည်သူတွေ​ဆီက​ပေါ့။ ပြည်သူတွေက အစိုးရကို ပေး​ရတဲ့​ငွေကို အခွန်​လို့ ခေါ်တယ်။

ကြီးမြတ်တဲ့​ဆရာ ကမ္ဘာပေါ် အသက်ရှင်​တုန်း​က ဂျူးလူမျိုး​အများ​က ရောမ​အစိုးရကို အခွန် မ​ဆောင်​ချင်​ကြဘူး။ ဒါကြောင့် တစ်နေ့မှာ ပုရောဟိတ်တွေ​က ယေရှုကို ချောက်တွန်း​ဖို့ လူတချို့ကို  ငှား​ပြီး မေးခွန်း​တစ်ခု မေး​ခိုင်း​လိုက်တယ်။ ‘ဆီဇာ​ကို ကျွန်တော်တို့ အခွန်ဆောင်သင့်သလား၊ မ​ဆောင်သင့်​ဘူး​လား’ ဆိုတဲ့ မေးခွန်း​ပေါ့။ အဲဒါ ပရိယာယ်​ဆင်​တဲ့ မေးခွန်း​လေ။ ယေရှု​က ‘မင်းတို့ အခွန်ဆောင်​ရမယ်’ လို့​ဖြေ​ခဲ့ရင် ဂျူး​အတော်များများ​က ကြိုက်ကြမှာ မဟုတ်ဘူး။ ဒါပေမဲ့ ‘မင်းတို့ အခွန်ဆောင်​စ​ရာ မလိုဘူး’ လို့​လည်း ပြောလို့​မဖြစ်​ဘူး။ အဲဒီလို​ပြောရင် မှားသွား​မှာ​ပေါ့။

ဒီတော့ ယေရှု ဘာ​လုပ်သလဲ။ ‘ဒေနာရိ​တစ်ပြား ပြပါ​ဦး’ လို့​ပြောတယ်။ ဒေနာရိ​တစ်ပြား ယူလာတဲ့​အခါ ‘ဒီမှာ ဘယ်သူ့​ပုံ​လဲ။ ဘယ်သူ့​နာမည်​လဲ’ ဆိုပြီး မေးလိုက်တယ်။ လူတွေက ‘ဆီဇာ’ လို့​ဖြေကြတယ်။ ဒါနဲ့ ယေရှု​က “ဆီဇာနဲ့​ဆိုင်တာ ဆီဇာ​ကို ပေးပါ။ ဘုရားသခင်နဲ့​ဆိုင်တာ ဘုရားသခင်ကို ပေးပါ” ဆိုပြီး ပြော​လိုက်တယ်။—လုကာ ၂၀:၁၉-၂၆။

ဒီလို​ဖြေလိုက်​တဲ့​အတွက် ဘယ်သူမှ အပြစ်ရှာ​လို့ မရတော့ဘူး။ ဆီဇာ​ဘုရင်ဟာ လူထု​အကျိုး သယ်ပိုး​တယ်​ဆိုရင် အဲဒီ​ဆောင်ရွက်မှု​အတွက် သူ​လုပ်​ထားတဲ့​ပိုက်ဆံ​နဲ့ သူ့ကို ပေးဆက်​ရမှာ​ပေါ့။ ဒါကြောင့် အစိုးရ လုပ်ဆောင်ပေး​တဲ့ အရာတွေ​အတွက် အခွန်ဆောင်သင့်တဲ့​အကြောင်း ဒီ​နည်းနဲ့ ယေရှု ဖော်ပြခဲ့တယ်။

ခု​ချိန်မှာ ကလေးတို့ဟာ အခွန်ဆောင်​ရမယ့် အရွယ်​တော့ မ​ရောက်​သေး​ဘူး​ပေါ့။ ဒါပေမဲ့ ကလေးတို့လည်း အစိုးရကို ပေး​ရမယ့်​အရာတွေ ရှိတယ်။ ဘာတွေလဲ သိသလား။— အစိုးရရဲ့  ဥပဒေ​ကို လိုက်နာ​ဖို့​ပဲ။ ‘အထက်​အာဏာပိုင်တွေကို လူတိုင်း လက်အောက်​ခံရမယ်’ လို့ ကျမ်းစာ​က ဆိုထားတယ်။ အထက်​အာဏာပိုင်တွေ​ဆိုတာ အစိုးရ​အဖွဲ့မှာ အာဏာ​ရှိတဲ့​သူတွေကို ပြောတာ။ ဒါကြောင့် အစိုးရရဲ့ ဥပဒေတွေကို လိုက်နာ​ရမယ်လို့ ပြောတဲ့​သူဟာ ဘုရားသခင် ဖြစ်တယ်ကွဲ့။—ရောမ ၁၃:၁၊ ၂။

လမ်းပေါ်မှာ စက္ကူ​စ​တို့၊ အမှိုက်​တို့ မပစ်ရဘူး​ဆိုတဲ့ ဥပဒေ​ရှိမယ်။ အဲဒီ​ဥပဒေ​ကို ကလေးတို့ လိုက်နာ​ရမလား။— လိုက်နာ​ရမယ်၊ ဘုရားသခင်က တို့တစ်တွေကို လိုက်နာ​စေချင်တယ်။ ရဲတပ်​ဖွဲ့​ဝင်​တွေရဲ့ စကားကိုလည်း နားထောင်​ရမလား။ ပြည်သူတွေ​ကို ကာကွယ်ဖို့ ရဲတပ်ဖွဲ့​တွေကို အစိုးရ​က လစာ​ပေးထားတယ်။ သူတို့​စကား နားထောင်​ရင် အစိုးရ​စကားကို နားထောင်တာ​နဲ့ အတူတူပဲ။

ဒါကြောင့် ကလေးတို့ လမ်း​ဖြတ်ကူး​ခါနီး ရဲ​တစ်ယောက်က “ခဏ​နေ​ဦး” လို့​ပြောရင် ကလေးတို့ ဘာလုပ်မလဲ။— တခြား​လူတွေက လမ်း​ဖြတ်​ပြေး​မယ်​ဆိုရင်ကော၊ ကလေးတို့ လိုက်​ပြေးသင့်သလား။— ကိုယ်​တစ်ယောက်တည်း စောင့်​ရင်​စောင့်​ရ​ပါစေ၊ စောင့်​ရမှာပဲ။ ဘုရားသခင်က နာခံ​ခိုင်း​နေတာ​လေ။

ရပ်ကွက်​ထဲမှာ ပြဿနာ​တစ်ခုခု ဖြစ်လို့ ရဲ​က “လမ်းပေါ် မ​ထွက်ကြ​နဲ့၊ အိမ်ထဲမှာ​ပဲ နေကြ” လို့ ပြောမယ်။ ဒါပေမဲ့ ဆူညံ​အော်ဟစ်သံ​တွေ ကြား​တော့ ဘာများ​ဖြစ်ပါ​လိမ့်​ဆိုပြီး သိချင်​မှာ​ပဲ။ ဒီတော့ အိမ်ပြင်ထွက် ကြည့်သင့်သလား။— အဲဒီလိုလုပ်ရင် ‘အထက်​အာဏာပိုင်တွေ’ ကို နာခံ​ရာ ရောက်​ပါ့မလား။—

နေရာ တော်​တော်​များများ​မှာ အစိုးရ​က ကျောင်း​တွေ ဆောက်​ပေးတယ်။ ဆရာ၊ ဆရာမတွေ​ကို လစာ​လည်း ပေးတယ်။ ဘုရားသခင်က ကလေးတို့ကို ဆရာ၊ ဆရာမ​စကား နားထောင်စေချင်​တယ်လို့ ထင်သလား။— ဒါကို စဉ်းစား​ကြည့်၊ ပြည်သူတွေ​ကို ကာကွယ်​စောင့်ရှောက်​ဖို့ ရဲတပ်ဖွဲ့​ကို လစာ​ပေးထားသလို စာသင်​ဖို့ ဆရာ၊ ဆရာမတွေ​ကို အစိုးရ​က လစာ​ပေးထားတယ်။ ဒီတော့ ရဲ​ကို​ဖြစ်ဖြစ်၊ ဆရာ့​ကို​ဖြစ်ဖြစ် နားထောင်မယ်​ဆိုရင် အစိုးရကို နာခံ​တာ​ပဲ​ပေါ့။

ဒါပေမဲ့ ဆရာ​တစ်ယောက်က ရုပ်တု​ရုပ်ပုံ တစ်မျိုးမျိုး​ရှေ့မှာ တစ်ကြိမ်ပဲ ရှိခိုး​ဦးချ​ခိုင်း​မယ် ဆိုရင်​ကော။ အဲဒီအခါ ကလေးတို့ ဘယ်လို​လုပ်မလဲ။— ဟီဘရူး​လူငယ် သုံးယောက်ဟာ  နေဗုခဒ်​နေဇာ​မင်းကြီး အမိန့်​ပေးတာ​တောင်မှ ရုပ်တုကြီး​ကို ရှိခိုး​ဦးချ မ​လုပ်ခဲ့ကြ​ဘူး။ ဘာကြောင့်လဲ​ဆိုတာ မှတ်မိလား။— ဘုရားသခင့် အမိန့်​ကို မနာခံ​တာ​မျိုး မဖြစ်စေ​ချင်လို့​ပေါ့။

သမိုင်း​ပညာရှင် ဝီလ် ဒူးရန့်​က ကနဦး ခရစ်ယာန်များ​အကြောင်း ရေးသားတဲ့​အခါမှာ ဒီခရစ်ယာန်တွေဟာ ‘ဆီဇာ​ဘုရင်​အပေါ် အကြွင်းမဲ့ ကျေးဇူးသစ္စာ စောင့်သိသည် မဟုတ်’ ဆိုပြီး ပြောခဲ့တယ်။ ဟုတ်​ပါတယ်၊ သူတို့ဟာ ယေဟောဝါအပေါ်သာ အကြွင်းမဲ့ ကျေးဇူးသစ္စာ စောင့်သိ​ကြတယ်။ ဒါကြောင့် တို့တစ်တွေရဲ့​ဘဝမှာ ဘုရားသခင်ပဲ ပထမ​နေရာမှာ ရှိရမယ်​ဆိုတာ အမြဲတမ်း မှတ်ထား​ရမယ်။

တို့တစ်တွေ အစိုးရကို နာခံတာဟာ ဘုရားသခင်က နာခံ​ခိုင်း​လို့​ဖြစ်တယ်။ ဒါပေမဲ့ ဘုရားသခင်က မလုပ်ရဘူးလို့ ပြောထား​တာ​ကို လုပ်​ခိုင်း​လာ​ရင်​ကော ဘာ​ပြော​ကြ​မလဲ။— ပုရောဟိတ်မင်း​ကို တမန်တော်တွေ ပြောခဲ့သလို ပြောသင့်တယ်– “ကျွန်တော်တို့​ကတော့ လူ့​စကား​ထက် အုပ်စိုးရှင် ဘုရားသခင်ရဲ့ စကားကို နားထောင်​မှာ​ပဲ။”—တမန်တော် ၅:၂၉။